1. Ngande wakakɛnɛmɔla yana ya hiami mɔtshi elongamelo kande lo eolwelo?

 ƆNA ɔmɔtshi lokombo lande Matthew aki la hemɔ ka wolo ndo nde akahombe nsala epaso efula. Etena kakandakotsha ɛnɔnyi esambele, nde la nkumbo kande wakendaka emisiɔ wa ngɔndɔ la ngɔndɔ wa JW televiziɔ^®. Otsha l’ekomelo ka emisiɔ, vɔ wakɛnyi mishiki wa lo vidɛo wendana la woho wayotolongola wakiso wa ngandji wakavu oma lo eolwelo. b L’ɔkɔngɔ w’emisiɔ, Matthew akasukana la le ambutshi ande, akaakimɛ l’anya ndo akawatɛ ate: “Mama, Papa, nyekɔ lo mɛna? Kaanga naka dimi lambovɔ, layolɔ lo eolwelo. Nyayokoka kongami; awui tshɛ wayonga dimɛna.” Ohokanyiya ɔngɛnɔngɛnɔ wakahombe mboka ambutshi asɔ etena kakawoke dia ɔnawɔ ekɔ la mbetawɔ ka mɛtɛ lo eolwelo!

2-3. Lande na kele ekɔ dimɛna le so dia kanaka yimba la daka dia eolwelo?

² Ekɔ dui dia dimɛna le so, dia kanaka yimba la daka dia lo Bible diendana la eolwelo ka lo nshi yayaye. (Jni. 5:28, 29) Lande na? Nɛ dia hateye etena kakɔna kakokaso monga la hemɔ ka wolo kana kakokaso mvusha onto ɔmɔtshi lokaso ngandji. (Ond. 9:11; Jak. 4:13, 14) Elongamelo kaso ka eolwelo kokaka tokimanyiya dia mbikikɛ ekakatanu ɛsɔ. (1 Tɛs. 4:13) Afundelo toshikikɛka dia Shɛso ka l’olongo teyaka dimɛna ndo tokaka ngandji k’efula. (Luka 12:7) Jehowa pombaka teya dimɛna dimɛna l’oyango wa nde ndjotolola la lonto lakɔ laamɛ lele la so ndo yimba yele oko nyɛ yele laso l’etena kɛnɛ mbuta ate yimba ya mbohɔ akambo. Ande ngandji katoka Jehowa lo woho watoshande diaaso dia sho ndjokondja lɔsɛnɔ la pondjo, kaanga lo tolola naka kokaka lee!

³ Lo sawo nɛ, tayɔtɛkɛta ntondotondo lande na kakokaso monga  la mbetawɔ lo daka dia eolwelo. Oma laasɔ, tayɔsɛdingola ɔkɔndɔ wa lo Bible wakeketsha mbetawɔ watanema l’ɛtɛkɛta wɔsami ɔtɛ wa sawo nɛ wata ɔnɛ: “Ɔnanyɔ ayolɔ.” (Jni. 11:23) L’ekomelo, tayɛna woho wahombaso mbetɛ elongamelo ka eolwelo dui dioleki mɛtɛ le so.

4. Dia mbetawɔ daka dimɔtshi, awui akɔna wakokaso ndjashikikɛ? Sha ɛnyɛlɔ.

⁴ Dia monga la mbetawɔ lo daka dia eolwelo, sho pombaka ndjashikikɛ dia ɔnɛ lalaka daka sɔ ekɔ la nsaki ndo la wolo kana akoka wa nkotsha daka sɔ. Tɔshi ɛnyɛlɔ: Ohɔsa dia luudu layɛ lambolanyema tshɛ lo tshɛ oma lo lɔpɛpɛ lɔmɔtshi. Ɔngɛnyi ayɛ ɔmɔtshi amboya le yɛ ndo ambokolaka ate: ‘Langa kokimanyiya dia nyomokokɛ luudu layɛ.’ Nde ekɔ onto latotaka mɛtɛ ndo wɛ ekɔ l’eshikikelo dia nde ekɔ la nsaki ka kokimanyiya. Naka nde ekɔ manyi ya lo wokelo ndo ekɔ la dihomɔ tshɛ diele ohomba, wɛ ayeya dia nde ekɔ ndo l’akoka wakokimanyiya. Ɔnkɔnɛ, wɛ ambonga la mbetawɔ lo daka diande. Ko laasɔ, kayotota lo dikambo dia daka dia Nzambi dia eolwelo? Onde mɛtɛ nde ekɔ la nsaki ndo la wolo wa nkotsha daka sɔ?

5-6. Lande na kakokaso monga l’eshikikelo dia Jehowa ekɔ la nsaki ka mbolola wanɛ wakavu?

⁵ Onde Jehowa ekɔ la nsaki ka mbolola anto? Nde mɛtɛ ekɔ la tɔ. Nde akasambiya lofulo lɔmɔtshi l’afundji wa Bible dia vɔ mfunda daka diande dia lo nshi yayaye dia eolwelo. (Isa. 26:19; Hɔs. 13:14; Ɛny. 20:11-13) Ndo etena kalaka Jehowa daka dimɔtshi, ntena tshɛ nde todikotshaka. (Jas. 23:14) Lo mɛtɛ, Jehowa ekɔ lo nomɔlomɔ dia mbolola wanɛ wakavu. Lande na kataso ngasɔ?

⁶ Tokane yimba la ɛtɛkɛta wakate Jɔbɔ laki owandji wa nkumbo. Nde aki l’eshikikelo dia kaanga nde kovɔka, Jehowa ayokombola nyomowɛna nto. (Jɔbɔ 14:14, 15, nɔtɛ.) Kɛsɔ mbakombola Jehowa ndo lo dikambo dia atɛmɔdi ande tshɛ wakavu. Nde ekɔ lo nomɔlomɔ dia nyomowasha nto lɔsɛnɔ dia vɔ ngɛnangɛna la yoonge ya dimɛna. Kayotota dikambo dia miliyara y’anto wakavu aha la monga la diɛsɛ dia mbeka awui wa mɛtɛ wendana la Jehowa? Nzambi kaso ka ngandji nangaka mbowaolola ndo vɔ la wɔ. (Ets. 24:15) Nde nangaka dia vɔ nkondja diaaso dia nkoma angɛnyi ande ndo sɛnaka pondjo pondjo la nkɛtɛ. (Jni. 3:16) Mbokɛmaka hwe dia, Jehowa ekɔ la nsaki ka mbolola wanɛ wakavu.

7-8. Lande na kakokaso monga l’eshikikelo dia Jehowa ekɔ la wolo wa mbolola wanɛ wakavu?

⁷ Onde Jehowa nde la wɔ ekɔ la wolo wa mbolola wanɛ wakavu? Eelo! Nde ekɔ “Kanga-Wolo-Tshɛ.” (Ɛny. 1:8) Ɔnkɔnɛ, nde ekɔ la wolo w’efula wa nɛndja otunyi tshɛ, kaanga ndo nyɔi. (1 Kɔr. 15:26) Sho kondjaka ekeketshelo ndo esambelo lo mbeya dui sɔ. Tende kɛnɛ kakakomɛ Kadiyɛso Emma Arnold. Nde la nkumbo kande wakahomana la ehemba wa wolo efula etena kakalɔmaka Ta dia hende dia l’andja w’otondo. Emma akasambe ɔnande la womoto nɛ dia anto wakandokaka ngandji wakavu lo mpango ya nkanu y’ase Nazi ndo Emma akate ate: “Otondongaka ɔnɛ anto wavɔ hawokokaki mbolɔ pondjo, keema kɛsɔ kotɛnya dia nyɔi lele otunyi aso ekɔ la wolo efula ndeka Nzambi? Koko dui sɔ hakoke pondjo monga mɛtɛ.” Lo mɛtɛ, ndooko ɛngɔ kakoka ndeka Jehowa wolo! Nzambi, Kanga-Wolo-Tshɛ ɔnɛ lakatonge lɔsɛnɔ ekɔ l’akoka wa nkaloya lɔsɛnɔ la wanɛ wakavu.

⁸ Ɔkɔkɔ okina weyaso dia Nzambi ekɔ l’akoka wa mbolola wanɛ wakavu ele nɛ dia nde ekɔ la yimba yaha l’elelo. Nde mbelɛka yɔɔtɔ tshɛ lo lokombo la yɔ. (Isa. 40:26) Ndo nto, nde mbohɔka wanɛ wakavu. (Jɔbɔ 14:13; Luka 20:37, 38) Nde koka esadi eto mbohɔ kiambokambo tshɛ ya tshitshɛ yendana la wanɛ wayondolola,  mbidjda ndo ɛnamelo kawɔ ndo lonto laki la wɔ ntondo, awui wakawahomana lawɔ lo lɔsɛnɔ ndo awui wakaweyaka.

9. Lande na keyɛ la mbetawɔ lo daka diaki Jehowa dia eolwelo dia lo nshi yayaye?

⁹ Mɛnamaka hwe, dia sho koka monga la mbetawɔ lo daka dia Jehowa dia lo nshi yayaye diendana la eolwelo, nɛ dia sho mbeyaka dia nde ekɔ la nsaki ndo la wolo wa dikotsha. Tɔsɛdingole ɔkɔkɔ okina weso la mbetawɔ lo daka diaki Nzambi diendana la eolwelo: Jehowa ambololaka anto. Lo nshi yakafundamaka Bible, nde akasha apami angana waki la mbetawɔmbidja ndo Yeso wolo wa mbolola wanɛ wakavu. Tɔsɛdingole ɔkɔndɔ ɔmɔtshi wa eolwelo kɛmɔtshi kakasale Yeso, wofundami lo Joani tshapita 11.

10. Kakɔna kambotomba etena katasambisha Yeso la wedi wa Jɔrdana oma la Bɛtaniya ndo kakɔna kamondosala? (Joani 11:1-3)

¹⁰ Adia Joani 11:1-3. Ohokanyiya kɛnɛ kakatombe la Bɛtaniya otsha l’ekomelo 32 T.D. Yeso aki l’angɛnyi ande wa ma ma lo ngielongelo shɔ, mbuta ate Lazaro nde la akadiyɛnde ahende, Mariya nde la Maata. (Luka 10:38-42) Koko Lazaro aki la hemɔ ndo akadiyɛnde wakayakiyanyaka efula. Vɔ wakatomɛ Yeso losango, laasɔ ko Yeso ekɔ la wedi wa Jɔrdana ondo lɔkɛndɔ la nshi hiende oma la Bɛtaniya. (Jni. 10:40) Lonyangu ko, Lazaro ambovɔ ondo etena kambokoma losango le Yeso. Kaanga kambeya Yeso dia ɔngɛnyi ande oma la mvɔ, nde ambotshikala nto nshi hiende lɛnɛ aakinde ndo oma laasɔ nde ambotshɔ la Bɛtaniya. Ɔnkɔnɛ, etena kambokoma Yeso, laasɔ ko Lazaro ambovɔ l’edja ka nshi nyɛi. Yeso ayanga nsala dui dimɔtshi diayokondjiyɛ angɛnyi ande wahɔ ndo mbisha Nzambi lotombo​—Jni. 11:4, 6, 11, 17.

11. Wetshelo akɔna wendana la lɔngɛnyi wakokaso nkondja oma l’ɔkɔndɔ ɔnɛ?

¹¹ Sho kondjaka wetshelo ɔmɔtshi wendana la lɔngɛnyi oma l’ɔkɔndɔ ɔsɔ. Teende dui nɛ: Etena kakatome Mariya nde la Maata losango otsha le Yeso, vɔ kombɔlɔmba dia nde ndja la Bɛtaniya. Vɔ wakate tsho dia ɔngɛnyi ande wakandokaka ngandji ekɔ la hemɔ. (Jni. 11:3) Etena kakavu Lazaro, Yeso otokoka mboolola oma l’etale. Koko, Yeso akasɔnɛ dia ntshɔ la Bɛtaniya dia tonga kaamɛ la angɛnyi ande, mbuta ate Mariya nde la Maata. Onde wɛ ekɔ l’ɔngɛnyi ayɛ ɔmɔtshi wayokokimanyiya aha la wɛ mbɔlɔmba dia nde kokimanyiya? Oma laasɔ, wɛ ambeya dia wɛ koka ndjaɛkɛ le nde dia nyanga ekimanyielo lo “tena dia paa.” (Tok. 17:17) L’ɛnyɛlɔ ka Yeso, ondo sho koka monga woho w’ɔngɛnyi wa ngasɔ! Nyɛsɔ tokalole kakianɛ l’ɔkɔndɔ ndo tende kɛnɛ kakatombe oma laasɔ.

12. Kakɔna kambolaka Yeso Maata ndo lande na kakokande mbetawɔ daka sɔ? (Joani 11:23-26)

¹² Adia Joani 11:23-26. Maata ambeya dia Yeso ekɔ suke la Bɛtaniya. Nde ambotshɔ esadi eto dia tohomana la nde ndo ambowotɛ ate: “Nkumadiɔndjɔ, otondonga wɛ aki lanɛ, tshike ɔnalengo havwe.” (Jni. 11:21) Mɛtɛ, nde otokoka nkɔnɔla Lazaro. Koko Yeso ekɔ lo nanga nsala dui dimɔtshi dia diambo efula. Nde amboolaka ate: “Ɔnanyɔ ayolɔ.” Nde la wɔ ambosha nto Maata ɔkɔkɔ akɔ waamɛ wa monga la mbetawɔ  lo daka diande, nde ambota ate: “Dimi lekɔ eolwelo ndo lɔsɛnɔ.” Eelo, Nzambi akasha Yeso wolo wa mbolola wanɛ wakavu. Ntondotondo, nde akolola yana ya yimato yema tshitshɛ l’ɔkɔngɔ wa ɔnakɔ mvɔ ndo nto nde akolola ɔlɔngɔ a pami ɔmɔtshi, ondo ko lushi lakɔ lakandavu. (Luka 7:11-15; 8:49-55) Ko onde nde koka mbolola onto lambovɔ l’edja ka nshi nyɛi ndo lele demba diande diambotatɛ la mpɔnda?

13. Okowotamidiɔ lo Joani 11:32-35, kakɔna kambosala Yeso etena kamondɛna Mariya nde l’anto akina walela? (Enda ndo osato.)

¹³ Adia Joani 11:32-35. Ohokanyiya kɛnɛ kakatombe oma laasɔ. Mariya, laki kadiyɛki Lazaro, ambotshɔ dia tohomana la Yeso. Nde ambonyomota ɛtɛkɛta wakatshi kadiyɛnde ate: “Nkumadiɔndjɔ, otondonga wɛ aki lanɛ, tshike ɔnalengo havwe.” Mariya nde la kadiyɛnde wekɔ lo ndela efula. Etena kamondowawɛna ndo kamondoka walela, Yeso ambondama la kandji k’efula. Lam’ele nde ambonandema la kɛtshi k’efula lo dikambo di’ɔngɛnyi ande, nde ambolela. Nde amboka woho watongaka paa efula etena kavushaso lakiso ɔmɔtshi la ngandji. Lo mɛtɛ, nde ekɔ lo nomɔlomɔ dia nkitola asɔyi tshɛ oma lo washo awɔ!

14. Wetshelo akɔna wakokaso nkondja lo dikambo dia Jehowa oma lo kɛnɛ kakasale Yeso etena kakalelaka Mariya?

¹⁴ Kɛnɛ kambosala Yeso etena kɛnande Mariya alela tetshaka dia Jehowa ekɔ Nzambi kele la kɛtshi efula. Lande na kakokaso mbuta ngasɔ? Oko wakatadiɛnyi lo sawo dietshi, Yeso akakɛnɛmɔla ekanelo ka yimba ka kokele ndo nsaki yande. (Jni. 12:45) Yeso akalele nɛ dia nde akoke angɛnyi ande wakalelaka kɛtshi k’efula. Laasɔ, sho lawɔ mbeyaka dia Jehowa nde la wɔ tokaka kɛtshi k’efula etena kɛnande takɛdia wasɔyi w’ɔkɛyi. (Os. 56:8) Onde dui sɔ hatotshutshuya dia sho ndjasukanya suke suke la Nzambi ka kɛtshi?

15. Okowotamidiɔ lo Joani 11:41-44, kakɔna kambosalema lo diombo dia Lazaro. (Enda ndo osato.)

¹⁵ Adia Joani 11:41-44. Yeso ambokoma lo diombo dia Lazaro ndo ambota dia vɔ minya dive diakawafɛ diombo. Maata ambotona, lo mbuta dia odo waya solo wonya ɔnɛ. Yeso ambokadimola ate: “Onde dimi hakote nte naka wɛ monga la mbetawɔ, kete wɛ  ayɛna lotombo la Nzambi?” (Jni. 11:39, 40) Oma laasɔ, Yeso ambedia washo ande l’olongo ndo ambosala dɔmbɛlɔ la ntondo k’anto tshɛ. Nde ekɔ lo nanga mbisha Jehowa lotombo tshɛ l’ɔtɛ wa kɛnɛ kayangasalema oma laasɔ. Ko Yeso ambelɛ la dui dia wolo ate: “Lazaro, tomba!” Ndo Lazaro akatombe oma lo diombo aya nkɛndakɛnda! Yeso ambosala dui diele anto amɔtshi hawɔfɔnyisha dia diɔ koka salema.​—Enda sawo diele l’ɔtɛ a dui ɔnɛ: “Lande na kele akete nshi nyɛi dia Yeso koma la diombo diaki Lazaro? Dia tanema lo Tshoto y’Etangelo ya Ngɔndɔ ka ntondo 1, 2008.

16. Ngande wakeketsha ɔkɔndɔ watanema lo Joani tshapita 11 mbetawɔ kaso lo elongamelo ka eolwelo?

¹⁶ Ɔkɔndɔ watanema lo Joani tshapita 11 keketshaka mbetawɔ kaso lo elongamelo ka eolwelo. Lo ngande? Tohɔ daka dia Yeso diakandasha Maata ate: “Ɔnanyɔ ayolɔ.” (Jni. 11:23) L’ɛnyɛlɔ ka She, Yeso ekɔ la nsaki k’efula ndo la wolo wa nkotsha daka sɔ. Woho wakandakɛdia asɔyi akɛnya dia nde ekɔ la nsaki k’efula ka mbolola anto oma lo nyɔi ndo minya ɔkɛyi w’efula woka anto etena kavushawɔ. Ndo etena kakayatombaka Lazaro oma lo diombo, Yeso akɛnya nto dia nde ekɔ la wolo wa mbolola wanɛ wakavu. Ndo nto, ohokanyiya kɛnɛ kakohola Yeso Maata ate: “Onde dimi hakote nte naka wɛ monga la mbetawɔ, kete wɛ ayɛna lotombo la Nzambi?” (Jni. 11:40) Tekɔ l’ɛkɔkɔ w’eshika wa monga la mbetawɔ ɔnɛ Nzambi ayokotsha daka diande dia mbolola wanɛ wakavu. Ko, kakɔna kakokaso nsala dia mbetɛ elongamelo kɛsɔ dui dioleki mɛtɛ le so?

17. Kakɔna kakokaso mbohɔka etena kadiaso ɛkɔndɔ wa lo Bible wendana eolwelo watanema?

¹⁷ Adiaka ndo kanaka yimba la eolwelo ka lo nshi y’edjedja. Lo Bible, tekɔ l’ɛkɔndɔ enanɛi w’anto wakolɔ la nkɛtɛ. c Lande na kahateke ɛkɔkɔ ɛsɔ la yambalo tshɛ? Etena kasalaso dui  sɔ, tohɔ dia anto asɔ waki anto wa mɛtɛ, mbuta ate apami, wamato ndo ana. Tende wetshelo wakokayɛ nkondja. Nkana yimba la woho wele ɛnyɛlɔ tshɛ mɛnyaka dia Nzambi ekɔ la nsaki ndo la wolo wa mbolola anto oma lo nyɔi. Ndo nto, nyomoleka nkana yimba la eolwelo koleki tshɛ ohomba, mbuta ate eolwelo ka Yeso. Ohɔ dia eolwelo kande kakashikikɛma oma le ɛmɛnyi nkama ndo tɔ toshaka ɛkɔkɔ w’eshika wa monga la mbetawɔ ka wolo lo eolwelo ka lo nshi yayaye.​—1 Kɔr. 15:3-6, 20-22.

18. Ngande wakokayɛ nkamba dimɛna la esambo aso watɛkɛta dia elongamelo ka eolwelo? (Enda ndo nɔtɛ.)

¹⁸ Kamba dimɛna la “nkembo ya lo nyuma” yatɛkɛta dikambo dia elongamelo ka eolwelo. d (Ɛf. 5:19) Esambo ɛsɔ mbetɛka eolwelo dui dioleki mɛtɛ le so ndo keketshaka mbetawɔ kaso lo daka dia nɛmɔ sɔ. Tohokamɛke esambo akɔ, ekakawɔ dimɛna dia wɛ monga l’akoka wa mbowaemba dimɛna ndo nyɔkɛtshanyake ɛtɛkɛta wa l’esambo akɔ l’ɔtɛmwɛlɔ anyu wa lo nkumbo. Kimɛka ɛtɛkɛta akɔ ndo kanaka yimba efula la wɔ dia vɔ nkeketsha mbetawɔ kayɛ ndo minanda otema aso. Oma laasɔ, naka wɛ ekɔ lo mpomana la ehemba lo lɔsɛnɔ layɛ kana akavusha lakiyɛ ɔmɔtshi la ngandji, nyuma ka Jehowa kayokokimanyiya dia wɛ mbohɔka esambo ɛsɔ dia vɔ kosha esambelo ndo ekeketshelo.

19. Awui akɔna ondo wakokayɛ kanyiya lo dikambo dia eolwelo? (Enda kiombo yele l’ɔtɛ a dui ɔnɛ: “ Kakɔna kayoyowambola?”)

¹⁹ Kamba la yimba yayɛ dia mɛna. Jehowa akatosha akoka wa monga oko anto wɛna andja w’oyoyo. Kadiyɛso kɛmɔtshi mbutaka ate: “Laketshaka wenya efula dia kanyiyaka oko onto laya l’andja w’oyoyo la nɔna alɛmbɔlɛmbɔ watomba lo Paradiso.” Ohokanyiya dia wɛ ambɛnana la apami ndo wamato wa kɔlamelo wa lo nshi yakafundamaka Bible. Onto akɔna alomɔlomɔyɛ dia tɛnana la nde? Ambola akɔna wayoyowoka onto akɔ? Ohokanyiya nto dia wɛ ambonyomɛnana nto la wakiyɛ wa ngandji wakavu. Ohokanyiya waaso wayonyotshumana kaamɛ la wakiyɛ wa ngandji wakavu. Ohokanyiya ɛtɛkɛta wa ntondo wayoyowatɛ, woho wayakumbatɛ l’ɔngɛnɔngɛnɔ tshɛ ndo ɔlɔ wayoyonga la wɔ dia mbowaɛna.

20. Kakɔna kahombaso ndjashikikɛ?

²⁰ Ande lowando lele la so lo daka dia Jehowa dia eolwelo lee! Sho koka monga l’eshikikelo dia daka sɔ diayokotshama, nɛ dia Jehowa ekɔ la nsaki ndo la wolo wa dikotsha. Nyɛsɔ toyashikikɛ dia ntetemala nkeketsha mbetawɔ kaso lo elongamelo ka dimɛna efula kɛsɔ. Lo nsala ngasɔ, tayoleka ndjasukanya la Nzambi, kalaka ɔmɔmɔ la l’atei aso ɔnɛ: ‘Wakiyɛ wa ngandji wayolɔ!’