1. Lembetshiya kɛnɛ kakatombe etena kakasale Yeso dihindo diande dia ntondo.

 OHƆSA dia wɛ ekɔ lo mɛna kɛnɛ kakasalemaka l’ekomelo ka ntambe 29 T.D. l’etatelo k’olimu wa Yeso. Yeso nde la mama kande, Mariya ndo ambeki ande amɔtshi wakelamɛ lo fɛtɛ ka diwala la Kana, ngielongelo yakatanemaka l’osomba wa ngelo kakotɔ Yeso, mbuta ate la Nazarɛtɛ. Mariya ekɔ ɔngɛnyi wa nkumbo kaki otshuki l’otshukami ndo mɛnamaka dia nde akakimanyiyaka dia nongola angɛndangɛnda. Koko l’etena kasalema fɛtɛ kakɔ, dui dimɔtshi diambotomba diakoka nkiyanya ase nkumbo lo yɛdikɔ y’efula ndo atshukanyi akɔ, mbuta ate wanu wamboshila. b Ondo lofulo l’angɛndangɛnda lamboleka efula oleki wanɛ wakawalongamɛka. Mariya ambotshɔ esadi eto otsha le ɔnande ndo ambowotɛ ate: “Vɔ bu la wanu.” (Jni. 2:1-3) Kakɔna kambosala Yeso? Dui dimɔtshi dia diambo efula, mbuta ate nde ambokadimola ashi “wanu woleki amɛna.”​—Jni. 2:9, 10.

2-3. a) Weho w’ahindo akɔna wakasale Yeso? b) Wahɔ akɔna wakokaso nkondja oma lo nsɛdingola ahindo wakasale Yeso?

² Yeso akasale ahindo akina efula etena kakandakambaka olimu  ande. c Nde akakambe la wolo ande wa nsala ahindo dia nkimanyiya nunu akumi di’anto. Ɛnyɛlɔ, lo ahindo ande ahende ato, nde akalesha apami 5000 ndo l’ɔkɔngɔ wa laasɔ, nde akayoleshaka apami 4000, lofulo l’anto lɔsɔ laki ondo tshɛ tshɛ anto ndekana 27000 naka sho mbidja ndo wamato la ana w’akɛnda waki ndo vɔ lawɔ lo diaaso sɔ. (Mat. 14:15-21; 15:32-38) Lo waaso ahende asɔ, Yeso akakɔnɔla nto anto efula waki la hemɔ. (Mat. 14:14; 15:30, 31) Ohokanyiya woho wakambe lokema l’anto lɔsɔ lo woho wakawakɔnɔ ndo woho wakawaleshama lo yoho ya dihindo oma le Yeso!

³ Ɛlɔ kɛnɛ, sho kokaka mbeka awui efula oma l’ahindo wa Yeso. Lo sawo nɛ, tayɔkɛtshanya wetshelo ɛmɔtshi wakeketsha mbetawɔ wakoka ahindo asɔ tetsha. Oma laasɔ, tayɔsɛdingola woho wakokaso mbokoya okitshakitsha ndo kɛtshi kakɛnya Yeso etena kakandasalaka ahindo.

4. Ahindo wakasale Yeso tetshaka wetshelo wakeketsha mbetawɔ kaso lo dikambo di’onto akɔna?

⁴ Ahindo wakasale Yeso tetshaka wetshelo wakeketsha mbetawɔ aha tsho lo dikambo diande koko ndo lo dikambo dia She. L’akambo asɔ tshɛ, Jehowa mbaki Kiɔkɔ ya mɛtɛ y’ahindo asɔ. Etsha 10:38 totɛka ɔnɛ: “Nzambi akookite [Yeso] esɔ la nyuma k’ekila ndo la wolo ndo nde aketeta lo wodja w’otondo, atasale akambo w’ɛlɔlɔ ndo atakɔnɔla wanɛ tshɛ wakahɛnyahɛnyamaka oma le Diabolo, nɛ dia Nzambi aki kaamɛ la nde.” Tohɔ nto ɔnɛ, lo kɛnɛ tshɛ kakataka ndo kakasalaka Yeso, mbidja ndo ahindo wakandasale, lo yoho ya kokele nde akakɛnɛmɔla ekanelo ka yimba ka She ndo nsaki yande. (Jni. 14:9) Tɔsɛdingole wetshelo esato wakokaso nkondja oma l’ahindo wa Yeso.

5. Kakɔna kakatshutshuya Yeso dia nsala ahindo? (Mateo 20:30-34)

⁵ Ntondotondo, Yeso nde la She tokaka ngandji k’efula. Etena kakinde la nkɛtɛ, Yeso akɛnya ngandji kande k’efula otsha le anto lo nkamba la wolo ande wa nsala ahindo dia nkimanyiya wanɛ wakasowaka. Lo diaaso dimɔtshi, akanga a totshungu ahende wakoowelɛ la dui dia wolo dia nyanga ekimanyielo. (Adia Mateo 20:30-34.) Tolembete dia Yeso “akawaoke kɛtshi” ndo oma laasɔ nde akaakɔnɔla. Vɛrbɛ ya lo Grɛkɛ yokambiwɔ la yɔ lanɛ yokadimɔmi ɔnɛ “akawaoke kɛtshi” mendanaka la mboka kɛtshi k’efula k’oma ka tshina di’otema. Kɛtshi k’efula kɛsɔ, kele djembetelo ya ngandji, kakatshutshuya Yeso nto dia nde ndesha wanɛ waki la ndjala ndo nkɔnɔla akanga wa sudi. (Mat. 15:32; Makɔ 1:41) Sho koka monga l’eshikikelo dia Jehowa, Nzambi ekɔ la “kɛtshi k’efula” ndo Ɔnande tokaka ngandji efula ndo ndjakiyanyaka lo dikambo di’asui aso. (Luka 1:78; 1 Pe. 5:7) Ande woho walomɔlomɔwɔ dia minya ekakatanu tshɛ wɛnya anto paa lee!

6. Wolo akɔna wakasha Nzambi Yeso?

⁶ Dui dia hende, Nzambi akasha Yeso wolo wa nkandola ekakatanu tshɛ wɛnya anto paa. Lo tshimbo y’ahindo ande, Yeso akɛnya wolo ande dia nde koka nshidiya ekakatanu tshɛ weso hatokokaki nshidiya la wolo aso hita. Ɛnyɛlɔ, nde ekɔ la wolo wa totshungola oma lo kɛnɛ kele lo kiɔkɔ y’ekakatanu w’anto, mbuta ate pɛkato kakatahowɔ ndo etombelo w’oma lɔkɔ, hemɔ ndo nyɔi. (Mat. 9:1-6; Rɔmɔ 5:12, 18, 19) Ahindo ande wakɛnya dia nde koka nkɔnɔla weho tshɛ wa hemɔ ndo kaanga mbolola edo. (Mat. 4:23; Jni. 11:43, 44) Ndo nto, nde aki la wolo wa mbɔladia lɔpɛpɛ la wolo ndo ntshungola anto oma le nyuma ya kɔlɔ. (Makɔ 4:37-39; Luka 8:2) Ande eshikikelo kele la so lo dui sɔ dia mbeya dia Jehowa akakitsha wolo ɔsɔ l’anya w’Ɔnande!

7-8. a) Ahindo wakasale Yeso toshaka eshikikelo kakɔna? b) Dihindo diakɔna dialomɔlomɔyɛ ndjɛna lo andja w’oyoyo wayaye?

 ⁷ Dui dia sato, sho koka monga l’eshikikelo dia ɛtshɔkɔ wa lo nshi yayaye wa l’ɛse k’ɛlɔmbwɛlɔ ka Diolelo dia Nzambi wayokotshama mɛtɛ. Ahindo wakasale Yeso lam’akinde la nkɛtɛ oko onto tetshaka dia nde ayosala ahindo asɔ lo nkɛtɛ k’otondo, nɛ dia nde ekɔ Nkumekanga ka Diolelo dia Nzambi. Tɔsɛdingole kɛnɛ kangaso mɛna keem’edja l’ɛse k’ɛlɔmbwɛlɔ ka Kristo. Tayɔngɛnangɛna la yoonge ya kokele, nɛ dia nde ayonya weho wa hemɔ tshɛ ndo dikɔmɔ diasoya anto tshɛ wa la nkɛtɛ. (Isa. 33:24; 35:5, 6; Ɛny. 21:3, 4) Hatongaki pondjo la ndjala kana nsowa l’etombelo wa kɔlɔ w’oma lo mpokoso k’oma lo diangɔ diakatongama. (Isa. 25:6; Makɔ 4:41) Tayonga mɛtɛ l’ɔngɛnɔngɛnɔ w’efula wa nongola wakiso wa ngandji, wanɛ tshɛ wayotomba oma lo “waombo wohɔma.” (Jni. 5:28, 29) Naa dihindo dialomɔlomɔyɛ dia ndjɛna lo andja w’oyoyo wayaye?

⁸ Etena kakandasalaka ahindo, Yeso akɛnya okitshakitsha lo yoho y’efula ndo kɛtshi, mbuta ate waonga wele dimɛna le so dia mbokoya. Nyɛsɔ tɔsɛdingole bɛnyɛlɔ dihende, totate l’ɔkɔndɔ wa fɛtɛ ka diwala ka la Kana.

9. Lande na kakasale Yeso dihindo lo fɛtɛ ka diwala ka la Kana? (Joani 2:6-10)

⁹ Adia Joani 2:6-10. Etena kakashile wanu lo fɛtɛ ka diwala, onde Yeso akalɔmbama dia nsala dui dimɔtshi? Ndooko. Ndooko prɔfɛsiya kakatatshi dia Mɛsiya ayoyotondja wanu lo dihindo.  Ko ohokanyiya woho wotoyoyaoka otondongaka lo fɛtɛ kayɛ ka diwala mbakashile wanu. Yeso akoke ondo nkumbo kɛsɔ kɛtshi, lo yoho ya laande otshuki la otshukami ndo nde konanga dia vɔ monga l’okiyanu. Ɔnkɔnɛ, oko wakadiatami oma l’etatelo, nde akasale dihindo dimɔtshi. Nde akakadimola litrɛ oko 390 y’ashi otsha lo wanu woleki amɛna. Ondo nde akakadimola ashi w’efula asɔ wanu la lokaho tshɛ dia wanu amɔtshi ntshikala dia vɔ ndjokamba la wɔ lo fɛtɛ kekina kana kaanga ndjosondjama dia nkimanyiya atshukanyi asɔ la yema ya dikuta. Aande ɔngɛnɔngɛnɔ wakakoke monga l’atshukanyi w’eyoyo asɔ lee!

10. Naa awui amɔtshi w’ohomba wofundami l’ɔkɔndɔ wa Joani tshapita 2? (Enda ndo osato.)

¹⁰ Tɔsɛdingole awui amɔtshi w’ohomba wofundami l’ɔkɔndɔ wa Jaoni tshapita 2. Onde tambɛna dia Yeso kondodia mbaka y’ave l’ashi? Lo dihole dia nde nkotola yambalo le nde ndamɛ, nde akatɛ wanɛ wakakambaka dia ndodia ashi lo mbaka. (Divɛsa 6, 7) Ndo l’ɔkɔngɔ wa nde nkadimola ashi asɔ wanu w’amɛna, Yeso kɔmbɔsa ndamɛ yema ya wanu dia tosha ɔnɔmbɔdi wa fɛtɛ. Koko, nde akatɛ wanɛ wakakambaka dia nsala dui sɔ. (Divɛsa 8) Kɛnɛ kele mɛtɛ ele Yeso kɔmbɔsa dikɔhɔ dia wanu ko dikimɛ la ntondo k’angɛndangɛnda ndo ndjafuna ɔnɛ: ‘Nyolonge yema ya wanu wekimi oma la nsala!’

11. Wetshelo akɔna wakokaso nkondja oma lo dihindo dia Yeso?

¹¹ Wetshelo akɔna wokokiso nkondja oma lo dihindo diakasale Yeso dia nkadimola ashi wanu? Sho kondjaka wetshelo w’okitshakitsha. Yeso kondjafuna l’ɔtɛ wa dihindo sɔ; lo mɛtɛ, nde kondjafuna pondjo l’ɔtɛ wa kɛnɛ kakandasalaka. Koko, l’okitshakitsha tshɛ ndo mbala la mbala nde akashaka lotombo tshɛ le She. (Jni. 5:19, 30; 8:28) Naka sho mbokoya Yeso lo ntetemala monga l’okitshakitsha le so shoamɛ, kete hatotoyafuna l’ɔtɛ wa kɛnɛ kasalaso. Oyadi kɛnɛ kakokaso nsala l’olimu wa Jehowa, tatoyafunake lo dikambo diaso shoamɛ, koko toyafune lo dikambo dia Nzambi kaso ka diambo keso la diɛsɛ dia kambɛ. (Jɛr. 9:23, 24) Nyɛsɔ towoshake lotombo lasungana la nde. Ndo nto, sho hatokokaki pondjo nsala dui dia dimɛna, naka aha l’ekimanyielo ka Jehowa​—1 Kɔr. 1:26-31.

12. Naa yoho kina yakokaso mbokoya okitshakitsha wa Yeso? Sha ɛnyɛlɔ.

¹² Tende yoho kina yakokaso mbokoya okitshakitsha wa Yeso. Ohokanyiya dui nɛ: Ekumanyi kɛmɔtshi ambetsha wenya efula dia nkimanyiya okambi ɔmɔtshi wakimanyiya w’ɔlɔngɔlɔngɔ dia nɔngɔsɔla sawo diande dia ntondo dia lo sɛkɛ. L’ɔtɛ wakokimanyiya ekumanyi kɛsɔ, ɔlɔngɔlɔngɔsɔ ɔsɔ ambosha sawo dia dimɛna dia nkeketsha ndo diambɔngɛnyangɛnya etshumanelo. L’ɔkɔngɔ wa losanganya, onto ɔmɔtshi amboya lale ekumanyi ko ambowotɛ ate: ‘Ɔnangɛso Kapanda akasha sawo dia dimɛna efula, nshi ngasɔ?’ Onde ekumanyi kɛsɔ pombaka mbuta ɔnɛ: ‘Eelo, koko laketsha wenya efula dia mbokimanyiya ‘ko kana l’okitshakitsha tshɛ nde ayota ate: ‘Eelo kam’aditayɛ asɔ. Onde lekɔ l’ofunu lo dikambo diande?’ Etena keso l’okitshakitsha, hatotosala la wolo dia ndjasha lotombo l’akambo w’amɛna wasalɛso anto akina. Sho mongaka l’ɔngɛnɔngɛnɔ lo mbeya dia Jehowa mɛnaka ndo ngɛnangɛnaka kɛnɛ kasalaso. (Ɛdika la Mateo 6:2-4; Hɛb. 13:16) Eelo mɛtɛ, sho ngɛnyangɛnyaka Jehowa etena kokoyaso Yeso lo monga l’okitshakitsha.​—1 Pe. 5:6.

13. Kakɔna kambɛna Yeso suke l’osomba wa Nayina ndo kakɔna kamondosala la dui sɔ? (Luka 7:11-15)

¹³ Adia Luka 7:11-15. Ohokanyiya dui nɛ diakatombe oya l’atei atei w’olimu wa Yeso. Nde ambonda lɔkɛndɔ otsha la Nayina, osomba wa Ngalileya waki komangana etale la Shunɛma, lɛnɛ akolola Elisha ɔna aki womoto ɔmɔtshi ambeta ɛnɔnyi oko 900. (2 Nku. 4:32-37)  Lam’akayasukanaka Yeso la soko, nde ambɛna olui w’anto wayatombe l’odo oma l’osomba. Aki dui dia kandji efula, mbuta ate wadi aki odo amboshisha tshɔi yande y’ɔna. Koko mama kakɔ kele l’ɔkɛyi bu ndamɛ; olui a woke w’anto w’oma l’osomba waki kaamɛ la nde. Yeso ambowaemadia ndo ambosala dui dimɔtshi dia diambo otsha le mama kele l’ɔkɛyi kɛsɔ, mbuta ate nde ambolola ɔnande! Ɔnɛ ekɔ dihindo dia ntondo l’ahindo asato wa eolwelo wakasale Yeso waleka ntɛkɛtama lo Evanjiliyɔ.

14. Naa awui amɔtshi w’ohomba wɔkɔndwami lo ɔkɔndɔ wa lo Luka tshapita 7? (Enda ndo osato.)

¹⁴ Tɔsɛdingole awui amɔtshi w’ohomba wɔtɛkɛtami lo ɔkɔndɔ watanema lo Luka tshapita 7. Onde nyakɛnyi dia ‘lam’akɛnyi’ Yeso womoto laki l’ɔkɛyi ko oma laasɔ, nde “akawoke kɛtshi”? (Divɛsa 13) Ɔnkɔnɛ, nde akawɛnyi, mbuta ate ondo atakɛndakɛnda atalele la ntondo ka kaka y’odo y’ɔnande, ko otema wa Yeso wakalole tɔɔ la kɛtshi otsha le nde. Yeso komonga tsho la kɛtshi otsha le mama kɛsɔ; koko nde akɛnya kɛtshi kande otsha le nde. Nde akatɛkɛta la nde aha la taamu la wondjo wa dui wa dimɛna, ndo akawotɛ ate: “Takolela.” Oma laasɔ, nde akɔshi yɛdikɔ ya nsala dui dimɔtshi. Nde akolola ɔnakɔ ndo “akawosha nyango.”​—Divɛsa 14, 15.

15. Wetshelo akɔna wakokaso nkondja oma lo dihindo dia Yeso?

¹⁵ Wetshelo akɔna wakokaso nkondja oma lo dihindo dia Yeso diakandolola ɔna aki wadi aki odo? Tambokondja wetshelo dia mɛnya kɛtshi otsha le wanɛ wele l’ɔkɛyi. Lo mɛtɛ, sho hatokoke mbolola edo, oko wakasale Yeso. Koko, l’ɛnyɛlɔ ka Yeso, sho koka nkɛnɛmɔla kɛtshi otsha le wanɛ wele l’ɔkɛyi. Sho koka mbɔsa yɛdikɔ ya mbowaɛnya kɛtshi lo mbuta ndo lo nsala kɛnɛ kakoka mbakimanyiya ndo mbakeketsha. d (Tok. 17:17; 2 Kɔr. 1:3, 4; 1 Pe. 3:8) Kaanga ɛtɛkɛta wa wɔdu ndo totshelo tɔmɔtshi tatotshithɛ kokaka mbakeketsha ndo mbasamba efula.

16. Oko wadiɛnya osato, wetshelo akɔna wambotokondja oma lo kɛnɛ kakakomɛ mama kɛmɔtshi kaki oma la mvusha ɔnande atete edja?

¹⁶ Tɔsɛdingole dui dimɔtshi diakete. Ambeta ɛnɔnyi engana, etena kakandembaka osambo  ɔmɔtshi lam’akiwɔ lo losanganya lɔmɔtshi la l’etshumanelo, kadiyɛso kɛmɔtshi akɛnyi mama kakasukana la nde alela. Osambo akɔ wakatɛkɛtaka dia elongamelo ka eolwelo ndo atete edja mama kakɔ aki oma la mvusha ɔnande la womoto. Etena kakandeye dui sɔ, kadiyɛso kɛsɔ akatshu aha la ntshimbatshimba suke la nde ko akakumbatɛ mama kakɔ ko akatetemala memba osambo akɔ kaamɛ la nde. Mama kɛsɔ akayotaka l’ɔkɔngɔ ate: “Lakayaoke dia dimi nangemaka efula oma le anangɛmi l’akadiyɛmi.” Nde aki la lowando efula woho wakandatshu otsha lo losanganya. Nde mbutaka ate: “Lɛkɔ mbakondjaso ekimanyielo, mbuta ate lo Mbalasa ka Diolelo.” Sho koka monga l’eshikikelo dia Jehowa mɛnaka ndo nde mbɔsaka la nɛmɔ kaanga towuiwui tatotshitshɛ tasalaso dia sho mɛnya kɛtshi otsha le wanɛ wambovusha wele la “lɔkɔnyɔ lo yimba.”​—Os. 34:18.

17. Wetshelo akɔna wambotokondja oma lo sawo nɛ?

¹⁷ Sho kokaka keketshama efula etena kekaso ɛkɔndɔ w’Evanjiliyɔ wendana l’ahindo wakasale Yeso. Vɔ tetshaka dia Jehowa nde la Yeso tokaka ngandji efula, dia Yeso ekɔ la wolo wa nshidiya ekekatanu tshɛ wɛnya anto paa ndo tekɔ l’eshikikelo dia alaka wa diambo wa lo nshi yayaye wayokotshama keem’edja etena kanga mbolɛ Diolelo dia Nzambi nkɛtɛ k’otondo. Etena katatasɛdingola ɛkɔndɔ akɔ, sho kokaka nkana yimba lo toho takokaso mbokoya waonga wa Yeso. Ondo wɛ koka nsala ekongelo ka wekelo w’onto ndamɛ kana k’Ɔtɛmwɛlɔ wa lo nkumbo monga la ntenyi dialeka ntɛkɛta ahindo akina wakasale Yeso. Enda wetshelo wakokayɛ nkondja ndo oma laasɔ, nkahana l’anto akina kɛnɛ kekiyɛ. Wɛ ayonga l’akoka wa nsawola l’anto efula asawo wakeketsha etena kasalayɛ dui sɔ!​—Rɔmɔ 1:11, 12.

18. Kakɔna kayotɔsɛdingola lo sawo diayela ?

¹⁸ Otsha l’ekomelo k’olimu ande, Yeso akasale dihindo diande dia sato ndo eolwelo k’ekomelo kɔtɛkɛtami lo Bible. Koko dihindo sɔ ntshikitana, mbuta ate nde akolola ɔngɛnyi ande wakandokaka ngandji l’ɔkɔngɔ wa nde mvɔ l’edja ka nshi nyɛi. Wetshelo akɔna wakokaso nkondja oma l’ɔkɔndɔ w’Evanjiliyɔ wendana la dihindo sɔ? Ndo ngande wakokaso nkeketsha mbetawɔ kaso lo elongamelo ka eolwelo? Tayɔsɛdingola ambola asɔ lo sawo diayela.