1. Kaanga mbele Jehowa Onto laheme laadiko dia tshɛ, kakɔna kalɔmbande anto akina dia vɔ nsala?

JEHOWA mbele Onto laheme laadiko dia tshɛ. Nde mbakatonge ɛngɔ tshɛ, nde ekɔ la lomba ndo la wolo waha l’elelo. L’ɔkɔngɔ wa nde nkimanyiya Jɔbɔ dia nde nshihodia dikambo sɔ, Jɔbɔ akawotɛ ate: ‘Kakianɛ dimi lambeya dia wɛ ekɔ la akoka wa nsala akambo tshɛ. Ndo ndooko dui dionga la yɛ lo yimba dia nsala diahayakoke nsala.’ (Jobo 42:2) Jehowa koka nsala kɛnɛ kalangande aha l’ekimanyielo k’onto. Koko nde mɛnyaka ngandji kokande anto lo nɔmba anto akina dia nkamba kaamɛ la nde dia nkotsha sangwelo diande.

2. Naa olimu w’ohomba wakalɔmbɛ Jehowa Yeso dia nde nsala?

² Nzambi akatonge Ɔnande Yeso la ntondo ka nde ntonga oseka onto tshɛ ndo oseka ɛngɔ kekina tshɛ. Oma laasɔ, Jehowa aketawɔ di’Ɔnande mbokimanyiya dia ntonga diangɔ dikina tshɛ. (Joani 1:1-3, 18) Ɔpɔstɔlɔ Pɔɔlɔ akafunde lo  dikambo dia Yeso ate: “Lo tshimbo yande mbakatongama diangɔ dikina tshɛ l’olongo ndo la nkɛtɛ, diangɔ diɛnama ndo diangɔ diahɛnama, oyadi kiti ya lowandji kana dɔmbwɛlɔ kana waolelo kana mandji. Diangɔ dikina tshɛ diakatongama lo tshimbo yande ndo lo dikambo diande.” (Kɔlɔsayi 1:15-17) Ɔnkɔnɛ, Jehowa kombisha tsho Ɔnande olimu ɔmɔtshi w’ohomba, koko nde akatɛ anto akina akambo wendana l’olimu akɔ. Ande diɛsɛ diakawakondja lee!

3. Jehowa akandalɔmbɛ Adama dia nsala, ndo lande na?

³ Jehowa akalɔmbɛ ndo anto dia nkamba kaamɛ la nde. Ɛnyɛlɔ, nde akasha Adama ɔkɛndɛ wa mbɔlɛ nyama nkombo. (Etatelu 2:19, 20) Ohokanyiya ɔngɛnɔngɛnɔ wakoke Adama dia nsala olimu ɔsɔ! Nde akeke la shɛnɔdi ɛnamelo ka waa nyama ndo woho wakayasalaka akambo, oma laasɔ ko nde ndjɔsɔna lokombo la mbɔlɛ nyama la nyama. Jehowa mbakatonge nyama tshɛ, ɔnkɔnɛ nde akakoke ndjiɔlɛ nkombo ndaamɛ. Koko, Jehowa akɛnya Adama woho wakandawokaka ngandji lo mbetawɔ mbosha ɔkɛndɛ dia nde mbɔlɛ nyama nkombo. Nzambi akasha nto Adama ɔkɛndɛ wa mbetɛ nkɛtɛ k’otondo paradiso. (Etatelu 1:27, 28) Koko l’ɔkɔngɔ diko, Adama akayɔsa yɛdikɔ ya ntshika nkamba kaamɛ la Nzambi ndo etombelo waki la dui sɔ ele asui wa wolo wakookomɛ nde la tokanula tande tshɛ.—Etatelu 3:17-19, 23.

4. Ngande wakakambe anto akina kaamɛ la Nzambi dia nkotsha lolango lande?

⁴ L’ɔkɔngɔ diko, Nzambi akalɔmbɛ anto akina dia nkamba kaamɛ la nde. Nɔa akasale waato wa luudu wakooshimbɛ nde la nkumbo kande oma lo Mvula k’elola. Mɔsɛ akatshungola wodja w’Isariyɛlɛ oma l’Edjibito. Jashua akalɔmbɔla ase Isariyɛlɛ otsha lo nkɛtɛ ya Daka. Sɔlɔmɔna akake tɛmpɛlɔ la Jɛrusalɛma. Mariya akonge nyango Yeso. Anto wa kɔlamelo asɔ tshɛ ndo anto akina efula wakakambe kaamɛ la Jehowa dia nkotsha lolango lande.

5. Lo olimu akɔna wakokaso mbisha lonya, ndo onde Jehowa akalange dia sho ndjasha l’olimu akɔ? (Enda osato wele lo mbɔtwɛlɔ.)

⁵ Ɛlɔ kɛnɛ, Jehowa tɔlɔmbaka dia sho nsala kɛnɛ tshɛ kakokaso nsala dia nsukɛ Diolelo diande. Ekɔ tooho efula takokaso kambɛ Nzambi. Kaanga mbele aha anto tshɛ wele l’atei aso mbele l’akoka wa mbokambɛ woho akɔ waamɛ, sho tshɛ kokaka nsambisha lokumu l’ɔlɔlɔ la Diolelo. Jehowa akakoke nsala olimu ɔsɔ ndaamɛ. Nde akakoke ntɛkɛta l’anto wa la nkɛtɛ mbala kakɔ ɔtɔi oma l’olongo. Yeso akate dia Jehowa kokaka nkamba kaanga la ave dia mbutɛ anto akina akambo wendana la Nkumekanga ka Diolelo Diande. (Luka 19:37-40) Koko Jehowa aketawɔ dia sho monga “ekambi kaamɛ la nde.” (1 Kɔrɛtɔ 3:9) Ɔpɔstɔlɔ Pɔɔlɔ akafunde ate: “Lo nkamba kaamɛ la nde, sho lawɔ tambonyokeketsha diaha nyu mbetawɔ ɔlɔlɔ waheyama mbɛdika waki Nzambi ko ndjoshisha oyango awɔ.” (2 Kɔrɛtɔ 6:1) Ekɔ diɛsɛ dia woke dia mbelamɛ dia nkamba kaamɛ la Nzambi. Nyɛsɔ tende ɛkɔkɔ ɛmɔtshi wɛnya dia dikambo sɔ telaka ɔngɛnɔngɛnɔ w’efula.

6. Kakɔna kakate Ɔna Nzambi l’enondo lo woho wakandayaoke lo nkamba kaamɛ la She?

⁶ Nkamba kaamɛ la Nzambi mbishaka ekambi wa Jehowa ɔngɛnɔngɛnɔ nshi tshɛ. La ntondo ka ndja lanɛ la nkɛtɛ, Ɔna Nzambi l’enondo akate ate: ‘Jehowa akantonge oko etatelo k’olimu ande . . . dimi lakikɔ suke la nde oko okambi wa kɔmba. Dimi kakandangɛnangɛnaka lo yoho ya  laande lushi la lushi; dimi lakangɛnangɛnaka la ntondo kande ntena tshɛ.’ (Tukedi 8:22, 30) Etena kakakambaka Yeso kaamɛ la She, nde aki l’ɔngɛnɔngɛnɔ nɛ dia nde akasale akambo efula ndo akeyaka ɔnɛ Jehowa akawokaka ngandji. Ko kayotota lo dikambo diaso?

7. Lande na kele olimu w’esambishelo telaka ɔngɛnɔngɛnɔ?

⁷ Yeso akate ɔnɛ sho mongaka l’ɔngɛnɔngɛnɔ etena kashaso ndo kalongolaso. (Etsha 20:35) Sho takonge l’ɔngɛnɔngɛnɔ etena kakatalongola akambo wa mɛtɛ, ko lande na kongaso nto l’ɔngɛnɔngɛnɔ etena kewoyaso anto akina akambo wa mɛtɛ? Nɛ dia sho mɛnaka woho wonga anto la ɔngɛnɔngɛnɔ wa mɛtɛ etena kashihodiawɔ kɛnɛ ketsha Bible ndo katatɛwɔ monga la diɔtɔnganelo dia dimɛna la Nzambi. Sho ngɛnangɛnaka etena kawaɛnaso watshikitanya ekanelo kawɔ ka yimba ndo yoho yawɔ ya lɔsɛnɔ. Olimu w’esambishelo ekɔ olimu woleki ohomba ndo waleka mbisha ɔngɛnɔngɛnɔ wakokaso nsala. Vɔ mbishaka wanɛ wakoma angɛnyi wa Nzambi diaaso dia nkondja lɔsɛnɔ la pondjo.—2 Kɔrɛtɔ 5:20.

8. Kakɔna kakate anto amɔtshi lo kɛnɛ kendana la ɔngɛnɔngɛnɔ waya lo nkamba kaamɛ la Jehowa?

⁸ Etena kakimanyiyaso anto akina dia mbeya akambo wendana la Nzambi, sho mbeyaka dia tekɔ lo ngɛnyangɛnya Jehowa ndo ɔnɛ nde mbɔsaka welo wadjaso dia mbokambɛ la nɛmɔ. Dui sɔ toshaka nto ɔngɛnɔngɛnɔ. (Adia 1 Kɔrɛtɔ 15:58.) Marco, lodjashi l’Italie mbutaka ate: “Lekɔ l’ɔngɛnɔngɛnɔ waheyama mbuta dia mbeya ɔnɛ lekɔ lo mbisha Jehowa kɛnɛ koleki dimɛna le mi koko aha onto ɔmɔtshi lakoka mbohɛ esadi eto kɛnɛ kakamasale.” Woho akɔ waamɛ mbele, Franco, lakamba nde lawɔ l’Italie mbutaka ate: “Oma lo tshimbo ya Ɔtɛkɛta ande ndo ya mbo ya ndɛ ya lo nyuma yatoshande, Jehowa tooholaka lushi tshɛ dia nde tokaka ngandji ndo ɔnɛ kɛnɛ tshɛ kosalɛso kekɔ ohomba kaanga mbakoka welo wadjaso mɛnama oko anyanya le so. Diakɔ diele, nkamba kaamɛ la Nzambi  mbishakami ɔngɛnɔngɛnɔ ndo lɔsɛnɔ lami mongaka l’oyango.”

9. Diɔtɔnganelo dia ngande diaki lam’asa Jehowa nde la Yeso, ndo lande na?

⁹ Etena kakambaso kaamɛ la wanɛ wokaso ngandji, sho ndjasukanyaka suke la wɔ. Sho ndjeyaka akambo efula wendana la lonto lawɔ ndo la waonga awɔ. Sho ndjeyaka eyango awɔ ndo woho wasalawɔ la wolo dia mbakotsha. Yeso akakambe kaamɛ la Jehowa ondo miliyara y’ɛnɔnyi. Ngandji ka lam’asawɔ kakonge ka wolo woho wele ndooko ɔnɛ lakoka ndanya diɔtɔnganelo diele lam’asawɔ. Yeso akɛnya woho wakiwɔ la diɔtɔnganelo dia ma ma etena kakandate ate: ‘Dimi la Papa tekɔ ɔtɔi.’ (Joani 10:30) Vɔ mɛtɛ waki kaamɛ ndo wakakambaka kaamɛ dihɛka lo dihɛka.

10. Lande na kele esambishelo tosukanyaka la Nzambi ndo l’anto akina?

¹⁰ Yeso akalɔmbɛ Jehowa dia nkokɛ ambeki ande. Lande na? Nde akalɔmbɛ ɔnɛ: ‘Dia vɔ tshɛ monga ɔtɔi oko weso ɔtɔi.’ (Joani 17:11) Etena kasɛnaso lo yoho yɔtɔnɛ l’atɔndɔ wa Nzambi ndo kayashaso l’olimu w’esambishelo, sho shihodiaka waonga ande wa diambo dimɛna. Sho shihodiaka lande na kele ekɔ dui dia lomba dia ndjaɛkɛ le nde ndo ndjela ɛlɔmbwɛlɔ kande. Ndo etena kayasukanyaso la Nzambi, nde ndjasukanyaka la so. (Adia Jakɔba 4:8.) Sho ndjasukanyaka nto la anangɛso la akadiyɛso nɛ dia sho pomanaka l’ekakatanu ndo ɛngɛnɔngɛnɔ akɔ waamɛ ndo nɛ dia tekɔ la eyango waamɛ. Sho kambaka kaamɛ, ngɛnangɛnaka kaamɛ ndo mbikikɛka kaamɛ. Octavia, lodjashi la Grande-Bretagne mbutaka ate: “Nkamba kaamɛ la Jehowa sukanyakami la anto akina.” Nde mbutaka ngasɔ nɛ dia lɔngɛnyi lasande la wɔ mpikama lo “oyango ɔtɔi ndo ɛlɔmbwɛlɔ kaamɛ.” Lo mɛtɛ, sho lawɔ ndjaokaka woho akɔ waamɛ. Etena kɛnaso weelo wadja anangɛso dia ngɛnyangɛnya Jehowa, dui sɔ tosukanyaka suke suke la wɔ.

11. Lande na kele tayonga suke suke la Jehowa ndo la anangɛso l’andja w’oyoyo?

¹¹ Ngandji kokaso Nzambi ndo anangɛso kekɔ wolo ɛlɔ kɛnɛ, koko tɔ kayoleka monga wolo l’andja w’oyoyo. Ohokanyiya elimu tshɛ w’ɔngɛnɔngɛnɔ wayotosala lo nshi yayaye! Tayolongola wanɛ wayolɔ ndo tayowaetsha akambo wendana la Jehowa. Tayokamba nto dia mbetɛ nkɛtɛ paradiso. Tayonga l’ɔngɛnɔngɛnɔ w’efula dia nkamba kaamɛ ndo tayotakomaka kokele yema yema l’ɛlɔmbwɛlɔ ka Kristo. Anto tshɛ wayonga suke suke lam’asawɔ ndo wayonga suke la Jehowa ɔnɛ mɛtɛ ‘layokotsha nsaki ka ɛngɔ tshɛ kasɛna.’—Osambu 145:16.

12. Ngande wele olimu w’esambishelo wekɔ tshondo y’ekokelo?

¹² Sho pombaka nkokɛ diɔtɔnganelo diele lam’asaso la Jehowa. Tekɔ lo nsɛna l’andja waki Satana ndo tekɔ anto wele keema kokele, diakɔ diele ekɔ wɔdu dia  sho ntatɛ nkanyiya ndo nsala akambo oko wasala ase andja ɔnɛ. Tekɔ oko anto watasale osale lo ashi wa mpedu watatɔtɔlɛ lo lɛkɛ lahatalange ntshɔ. Diakɔ diele, sho pombaka nsala la wolo aso tshɛ dia nsala osale dia ntshɔ otsha lo lɛkɛ lokina. Woho akɔ waamɛ mbele, sho pombaka nsala la wolo dia mbewɔ sɛngiyama oma le andja waki Satana. Ko ngande wele nsambisha tokokɛka? Etena katɛkɛtaso akambo wendana la Jehowa ndo la Bible, sho mbikaka washo lo akambo wele ohomba ndo w’amɛna, koko aha lo akambo wayɔdia mbetawɔ kaso. (Filipɛ 4:8) Nsambisha keketshaka mbetawɔ kaso nɛ dia dui sɔ toholaka alaka wa Nzambi ndo atɔndɔ ande wa ngandji. Dui sɔ tokimanyiyaka nto dia ntetemala monga la waonga wele la so ohomba dia sho ndjakokɛ oma le Satana ndo oma le andja ande.—Adia Ɛfɛsɔ 6:14-17.

13. Ngande wayaoka Ɔmɛnyi wa Jehowa ɔmɔtshi wadjasɛ l’Australie lo kɛnɛ kendana la nsambisha?

¹³ Etena kongaso l’akambo efula l’esambishelo, lo wekelo ndo kakimanyiyaso anto amɔtshi wa l’etshumanelo, tekɔ lo kokamɛ nɛ dia sho bu l’etena ka ndjakiyanya amboleka lo ekakatanu aso hita. Joel, ladjasɛ l’Australie, mbutaka ate: “Olimu w’esambishelo kimanyiyakami diaha dimi mbohɛ akambo weta l’andja ɔnɛ. Dui sɔ mboholakami ekakatanu wahomana l’anto ndo wahɔ wambomokondja lo nkitanyiya atɔndɔ wa lo Bible lo lɔsɛnɔ lami. Olimu w’esambishelo kimanyiyakami dia dimi monga l’okitshakitsha ndo vɔ mbishakami diaaso dia dimi ndjaɛkɛ le Jehowa ndo le anangɛmi la akadiyɛmi.”

14. Lande na kele etete kaso l’olimu w’esambishelo mɛnyaka dia nyuma ka Nzambi kekɔ kaamɛ la so?

¹⁴ Ndo nto esambishelo ndekaka toshikikɛ ɔnɛ nyuma ka Nzambi kekɔ kaamɛ la so. Tɔshi ɛnyɛlɔ kɛnɛ: Ohɔsa dia wɛ ekɔ lo nkamba olimu wa mbishaka anto wa lo tshunda dianyu mapa. Koko wɛ hafutama lo olimu ɔsɔ, ndo wɛmɛ mbahomba ndjafutɛ adepasɛ ayɛ. Ndo nto, anto efula hawolange mapa ndo amɔtshi wokohetsha l’ɔtɛ wawaelayɛ mapa akɔ. L’edja ka nshi ngana yayoyotetemala nkamba olimu wa ngasɔ? Wɛ ayɔkɔmɔ esadi eto ndo ondo wɛ ayotshika olimu akɔ. Koko, anto efula wa l’atei aso wekɔ lo ntetemala nkamba olimu w’esambishelo ɔnɔnyi l’ɔnɔnyi, kaanga mbele dikambo sɔ tɔsɛka wenya efula, falanga ndo kaanga mbele anto amɔtshi tɔsɔkaka kana tomalɛɛka. Kɛsɔ mɛnyaka dia nyuma ka Nzambi kekɔ lo tokimanyiya.

15. Ngande wele esambishelo ka lokumu l’ɔlɔlɔ mbɔtɔnɛka la sangwelo diaki Nzambi lo dikambo di’anto?

¹⁵ Ngande wele olimu w’esambishelo mbɔtɔnɛka la sangwelo diaki Jehowa lo dikambo di’anto? Sangwelo dia Nzambi aki dia anto sɛnaka pondjo pondjo ndo sangwelo diande kotshikitana etena kakasale Adama pɛkato. (Isaya 55:11) L’ɔkɔngɔ wa pɛkato salema, Nzambi akɔshi yɛdikɔ mɔtshi dia sho ntshungɔ oma lo  pɛkato la nyɔi. Lo ngande? Yeso akaye la nkɛtɛ ndo akayokimɔ lɔsɛnɔ lande oko olambo. Koko dia nkondja wahɔ oma lo olambo ande, anto pombaka nkitanyiya Nzambi. Diakɔ diele, Yeso aketsha anto kɛnɛ kaalɔmba Nzambi ndo nde akadjangɛ ambeki ande dia nsala woho akɔ waamɛ. Etena kasambishaso ndo kakimanyiyaso anto akina dia nkoma angɛnyi wa Nzambi ɛlɔ kɛnɛ, tekɔ lo nkamba mbala kakɔ ɔtɔi kaamɛ la Nzambi lo yɛdikɔ yakandɔshi la ngandji dia mbitsha anto oma lo pɛkato la nyɔi.

16. Ngande wele esambishelo kaso mbɔtɔnɛka la ɛlɛmbɛ wa Nzambi woleki weke?

¹⁶ Etena kakimanyiyaso anto akina dia ntana mboka k’otsha lo lɔsɛnɔ la pondjo, sho mɛnyaka dia sho mbaokaka vɔ la Jehowa ngandji. Nde “nangaka dia weho w’anto tshɛ shimbamɛ ndo nkondja ewo k’oshika k’akambo wa mɛtɛ.” (1 Timɔte 2:4) Etena kakambola Ofarisɛ ɔmɔtshi Yeso ɔnɛ ɔlɛmbɛ akɔna waki Nzambi woleki woke, Yeso akate ate: “‘Olange Jehowa Nzambi kayɛ l’otema ayɛ tshɛ ndo la anima ayɛ tshɛ ndo la yimba yayɛ tshɛ.’ Ɔsɔ mbele ɔlɛmbɛ woleki woke ndo wa ntondo. Wa hende wafɔna la wɔ, vɔ ɔnɛ: ‘Olange wonyayɛ onto oko wayalangayɛ.’” (Mateo 22:37-39) Etena kasambishaso lokumu l’ɔlɔlɔ, sho kitanyiyaka ɛlɛmbɛ ɛsɔ.—Adia Etsha 10:42.

17. Ngande wayaokayɛ lo kɛnɛ kendana la diɛsɛ diele la yɛ dia nsambisha lokumu l’ɔlɔlɔ?

¹⁷ Ande ɛtshɔkɔ wele laso lee! Jehowa akatosha olimu watela ɔngɛnɔngɛnɔ, watosukanya la nde ndo la anangɛso ndo watokimanyiya dia nkokɛ diɔtɔnganelo diele lam’asaso la nde. Olimu akɔ toshaka nto waaso wa mɛnya ngandji kokaso Nzambi ndo anto akina. Jehowa ekɔ la miliyɔ y’ekambi l’andja w’otondo ndo vɔ tshɛ wekɔ l’akambo wotshikitanyi. Koko oyadi tekɔ ɔlɔngɔlɔngɔ kana opalanga, ɔngɔnyi kana wola, wolo kana wɔdu, tosale kɛnɛ tshɛ kakokaso nsala dia mbewoya anto akina dietawɔ diaso. Sho ndjaokaka oko Chantel ladjasɛ la France, lata ate: “Onto loleki wolo tshɛ l’andja w’otondo, Otungi wa diangɔ tshɛ, Nzambi k’ɔngɛnɔngɛnɔ kambutɛ ate: ‘Tshɔka! Tɛkɛta! Tɛɛ anto awui wendana la mi, tɛkɛta awui w’oma l’otema ayɛ. Lambokosha wolo ami, Ɔtɛkɛta ami Bible, osukɔ w’oma l’olongo, asekayɛ ambetawudi wele la nkɛtɛ, olowanyelo watatetemala, ndo wetshelo wa shikaa lo etena kahombama.’ Ande diɛsɛ dia woke diele la so dia nsala kɛnɛ katɔlɔmba Jehowa ndo nkamba kaamɛ la Nzambi kaso lee!”