1, 2. a) Kakɔna kakate Jehowa kahomba salema l’etena kaso kɛnɛ? b) Ambola akɔna wayangaso nkadimola lo sawo nɛ? (Enda osato wele lo mbɔtwɛlɔ.)

JEHOWA akate dia l’etena kaso kɛnɛ, ‘apami dikumi w’oma l’ɛtɛkɛta tshɛ wa wedja wayokimɛ, ɛɛ, vɔ wayokukutɛ okutu w’ose Juda, wata vate: Sho nangaka ntshɔ kaamɛ la nyu, nɛ dia takoke dia Nzambi ekɔ kaamɛ la nyu.’ (Zekariya 8:23) ‘Ose Juda’ nembetshiyaka wanɛ wele Nzambi akaakite nyuma k’ekila. Vɔ mbelamɛka nto ɔnɛ: “Isariyɛlɛ wa Nzambi.” (Ngalatiya 6:16) ‘Apami dikumi’ nembetshiyaka wanɛ wele l’elongamelo ka nsɛna pondjo pondjo lanɛ la nkɛtɛ. Vɔ mbeyaka dia Jehowa akatshɔkɔla djui y’akitami shɔ ndo vɔ mbɔsaka dia ekɔ tshondo ya diɛsɛ dia mbɔtɛmɔla kaamɛ la wɔ.

² L’ɛnyɛlɔ k’omvutshi Zɛkariya, Yeso akate dia ekambi waki Nzambi wayonga kaamɛ. Nde akelɛ wanɛ wele l’elongamelo ka tɔsɛna l’olongo ɔnɛ: “Lemba la tshitshɛ l’ɛkɔkɔ” ndo wanɛ wele l’elongamelo ka nsɛna la nkɛtɛ ɔnɛ: “Ɛkɔkɔ  ekina.” Koko Yeso akate dia vɔ tshɛ wayonga “olui ɔtɔi” ndo wayowoyela, oko wende “olami [awɔ] ɔtɔi.” (Luka 12:32; Joani 10:16) Lam’ele ekɔ elui ehende, anto amɔtshi mbeyaka ndjambola ɔnɛ: 1) Onde ɛkɔkɔ ekina pombaka mbeya nkombo ya wanɛ tshɛ wele akitami ɛlɔ kɛnɛ? 2) Ngande wahomba akitami ndjaɔsa? 3) Naka onto ɔmɔtshi la l’etshumanelo kemi ambotatɛ ndɛ mapa ndo nnɔ vinyɔ lo Eohwelo, ngande wahombami mbɔsa? 4) Onde dimi pombaka ndjakiyanya etena kɛnami dia lofulo la wanɛ walɛ mapa ndo wanɔ vinyɔ lo Eohwelo lekɔ lo tadɛ? Sawo nɛ diayokadimola lo ambola asɔ.

3. Lande na kele hatokoke mbeya l’eshikikelo tshɛ onto akɔna ahomba monga l’atei w’anto 144 000?

³ Onde ɛkɔkɔ ekina pombaka mbeya nkombo y’akitami tshɛ weke lanɛ la nkɛtɛ? Ndooko. Lande na? Nɛ dia ekɔ wolo di’onto mbeya l’eshikikelo tshɛ di’anto asɔ wayolongola difuto diawɔ. ^[1] (Enda nɔtɛ ka la koma.) Kaanga mbele Nzambi akawaelɛ dia vɔ ntshɔ l’olongo, vɔ wayolongola difuto diawɔ paka naka vɔ mbotshikadi la kɔlamelo. Satana mbeyaka dui sɔ, ndo nde kambaka la “amvutshi wa kashi” dia mpemba ‘mbanganyiya.’ (Mateo 24:24) Akristo w’akitami hawokoke monga l’eshikikelo dia vɔ wayolongola difuto diawɔ edja tshɛ kele Jehowa atawaɛnya dia nde ambowaɔsa oko akanga wa kɔlamelo. Jehowa mɛnyaka wetawelo ɔsɔ w’ekomelo kana mbadjaka djembetelo y’ekomelo oyadi la ntondo ka vɔ mvɔ kana yema la ntondo ka “mfɔnu ka woke” ntatɛ.—Ɛnyɛlɔ 2:10; 7:3, 14.

4. Naka hatokoke mbeya nkombo y’akitami tshɛ weke lanɛ la nkɛtɛ, ngande wakokaso ‘ntshɔ kaamɛ’ la wɔ?

⁴ Naka hatokoke mbeya nkombo y’akitami tshɛ weke lanɛ la nkɛtɛ, ngande wakoka ɛkɔkɔ ekina ‘ntshɔ kaamɛ’ la wɔ? Bible mbutaka dia ‘apami dikumi wayokukutɛ okutu w’ose Juda, wata vate: Sho nangaka ntshɔ kaamɛ la nyu, nɛ dia takoke dia Nzambi ekɔ kaamɛ la nyu.’ Bible tɛkɛtaka di’ose Juda ɔtɔi. Koko, etena katatɔ ɔnɛ ‘nyu’ ndo ‘kaamɛ la nyu,’ tɔ tɛkɛtaka di’anto efula. Ndo dui sɔ hɛnya di’ose Juda ekɔ onto ɔtɔi, koko ɔsɔ ekɔ didjidji dia olui w’otondo w’akitami. Ɛkɔkɔ ekina mbeyaka dui sɔ, ndo vɔ kambɛka Jehowa kaamɛ la olui ɔsɔ. Vɔ bu l’ohomba wa mbeya nkombo y’anto tshɛ wele l’olui ɔsɔ kana ndjela ɔmɔmɔ la l’atei awɔ. Yeso mbele Ɔnɔmbɔdi aso, ndo Bible totɛka dia sho pombaka mboyela paka ndaamɛ.—Mateo 23:10.

5. Ɔhɛmwɛlɔ akɔna wahomba akitami nkana la wɔ yimba dimɛna, ndo lande na?

⁵ Akitami pombaka nkana yimba dimɛna lo kɛnɛ kendana l’ɔhɛmwɛlɔ watanaso lo 1 Kɔrɛtɔ 11:27-29. (Adia.) Ngande wakoka okitami ɔmɔtshi ndɛ mapa ndo nnɔ vinyɔ ‘lo yoho yele bu dimɛna’ lo Eohwelo? Naka nde hatetemala  monga la diɔtɔnganelo dia dimɛna la Jehowa ndo bu la kɔlamelo le nde, kete laasɔ etena kalɛ onto la ngasɔ mapa ndo kanɔnde vinyɔ, nde keema la dilɛmiɛlɔ. (Hɛbɛru 6:4-6; 10:26-29) Ɔhɛmwɛlɔ wa wolo ɔsɔ mboholaka akitami dia vɔ pombaka ntshikala la kɔlamelo naka vɔ kombolaka nongola “difuto dia leeta la Nzambi l’otsha l’olongo lo tshimbo ya Kristo Yeso.”—Filipɛ 3:13-16.

6. Ngande wahomba Akristo w’akitami ndjaɔsa?

⁶ Pɔɔlɔ akatɛ Akristo w’akitami ate: “Dimi lele lo lokanu l’ɔtɛ wa Nkumadiɔndjɔ, lambonyɔsɛngasɛnga dia nyu nkɛndakɛnda lo yoho yɔtɔnɛ la leeta lakanyelamɛ.” Ngande wahombawɔ nsala dui sɔ? Pɔɔlɔ akalembetshiya ate: “L’okitshakitsha tshɛ ndo la memakana, la solo dia lotutsha, nyakikanɛ onto la wonyande lo ngandji, nyadja welo wa l’otema ɔtɔi dia nkokɛ kaamɛ kakanyakondja l’ekimanyielo ka nyuma k’ekila lo dimama dia wɔladi.” (Ɛfɛsɔ 4:1-3) Nyuma k’ekila ka Jehowa kimanyiyaka ekambi ande dia monga l’okitshakitsha, koko aha monga l’otako. (Kɔlɔsayi 3:12) Ɔnkɔnɛ akitami hawɔfɔnya dia vɔ ndeka anto akina. Vɔ mbeyaka dia Jehowa hasha akitami nyuma k’ekila lo yɛdikɔ yoleki ekambi ande ekina. Ndo vɔ hawɔfɔnya dia vɔ kokaka nshihodia akambo wa mɛtɛ wa lo Bible lo yoho yoleki anto akina. Vɔ hawohombe nto pondjo mbutɛ onto ɔmɔtshi ɔnɛ nde lawɔ ekɔ okitami ndo nde pombaka ntatɛ ndɛ mapa ndo nnɔ vinyɔ lo Eohwelo. Lo dihole dia nsala ngasɔ, vɔ wekɔ l’okitshakitsha ndo vɔ mbeyaka dia paka Jehowa oto mbakoka nsɔna onto dia nde ntshɔ l’olongo.

7, 8. Kakɔna kahahombe Akristo w’akitami nongamɛ oma le anto akina, ndo lande na?

⁷ Kaanga mbele akitami mbɔsaka dia ekɔ tshondo ya diɛsɛ dia mbelamɛ otsha l’olongo, vɔ hawohombe nongamɛ di’anto akina mbasalɛ akambo lo yoho mɔtshi ya laande. (Ɛfɛsɔ 1:18, 19; adia Filipɛ 2:2, 3.) Vɔ mbeyaka nto dia etena kakaasɔnɛ Jehowa oko akitami, nde kombewoya anto akina dui sɔ. Ɔnkɔnɛ, okitami hambe naka onto hetawɔ mbala kakɔ ɔtɔi dia nde ekɔ okitami. Okitami mbeyaka dia Bible totɛka diaha mbetawɔ mbala kakɔ ɔtɔi onto ɔmɔtshi lata dia Nzambi akawosha ɔkɛndɛ ɔmɔtshi wa laande. (Ɛnyɛlɔ 2:2) Lam’ele okitami halongamɛ di’anto akina mbodja yimba lo yɛdikɔ yamboleka, nde hahombe mbutɛ anto wahomana la nde mbala ka ntondo ɔnɛ nde ekɔ okitami. Nde hahombe mbutɛ kaanga onto ɔtɔi dui sɔ. Nde hahombe nto mfuna akambo wa diambo wayondotosala l’olongo.—1 Kɔrɛtɔ 1:28, 29; adia 1 Kɔrɛtɔ 4:6-8.

⁸ Akristo w’akitami hawɔshi dia vɔ pombaka mbetshaka wenya paka l’asekawɔ akitami, oko anto wakenga olui ɔmɔtshi. Vɔ hawosale la wolo dia nyanga akitami akina dia vɔ nkɛtshanya akambo wendana l’akitami kana vɔ mpomana lo elui dia mbeka Bible. (Ngalatiya 1:15-17) Etshumanelo honga kaamɛ naka akitami nsala dui sɔ. Ndo naka vɔ nsala ngasɔ, kete wayɔlɔshana la nyuma k’ekila kakimanyiya ekambi waki Nzambi dia vɔ monga la wɔladi ndo kaamɛ.—Adia Rɔmɔ 16:17, 18.

9. Lande na kahombayɛ monga la shɛnɔdi lo yoho wɔsayɛ wanɛ walɛ mapa ndo wanɔ vinyɔ lo Eohwelo? (Enda kiombo yele l’ɔtɛ a dui ɔnɛ: “Ngandji ‘hasale akambo wa mfumbɔ nsɔnyi.’”)

⁹ Ngande wahombayɛ mbɔsa anangɛso la akadiyɛso w’akitami? Yeso akatɛ  ambeki ande ate: “Nyu tshɛ nyekɔ onto l’ɔnango.” Nde akakotsha ate: “Onto tshɛ layadiya ayokitshakitshama ndo onto tshɛ layakitshakitsha ayodiyama.” (Mateo 23:8-12) Diakɔ diele, ayonga dui dia kɔlɔ dia ntɛtɛmɔla onto ɔmɔtshi lo yoho yamboleka, oyadi kaanga nde ekɔ ɔnango Kristo l’okitami. Etena katɛkɛta Bible dikambo dia dikumanyi, tɔ tokeketshaka dia sho mbokoya mbetawɔ kawɔ, koko tɔ hatotɛ dia sho kokaka mbetɛ onto ɔmɔtshi ɔnɔmbɔdi aso. (Hɛbɛru 13:7) Ekɔ mɛtɛ dia Bible mbutaka dia anto amɔtshi pombaka “mbɔsama la nɛmɔ dioleki efula.” Ekɔ ngasɔ nɛ dia vɔ ‘nɔmbɔlaka lo yoho ya dimɛna’ ndo ‘kambaka olimu w’efula lo ntɛkɛta ndo lo mbetsha,’ koko aha l’ɔtɛ wewɔ akitami. (1 Timɔte 5:17) Naka sho mbisha akitami lotombo ndo yambalo yamboleka, kete tayowadja l’okandokando. Ndo kɛnɛ koleki tshɛ kɔlɔ ele, sho kokaka ndjakonya dia vɔ monga la otako. (Rɔmɔ 12:3) Ndooko onto l’atei aso lahomba nsala dui dimɔtshi diakoka ndjokonya ɔnango Kristo ɔmɔtshi l’okitami dia nsala munga ka woke ka ngasɔ.—Luka 17:2.

10. Ngande wakokaso mɛnya dia sho nɛmiyaka Akristo w’akitami?

¹⁰ Ngande wakokaso mɛnya dia sho nɛmiyaka wanɛ wakasɔnama oko akitami oma le Jehowa? Hatohombe mambola woho wakawakome akitami. Ɔsɔ ekɔ dui diendana l’onto ndamɛ ndo sho bu la lotshungɔ la mbeya dui sɔ. (1 Tɛsalɔnika 4:11; 2 Tɛsalɔnika 3:11) Ndo hatohombe kanyiya ɔnɛ waomɛwɔ, wadɛwɔ, ambutshi awɔ kana ase nkumbo akina wekɔ vɔ lawɔ akitami. Onto hahombe nkita elongamelo kande oma lo nkumbo kande. (1 Tɛsalɔnika 2:12) Sho pombaka nto mbewɔ ambola wakoka nyangiya anto akina. Ɛnyɛlɔ, hatohombe mimbola wadi aki ɔnangɛso ɔmɔtshi l’okitami woho wayaokande lo kɛnɛ kendana la ndjɔsɛna pondjo pondjo la nkɛtɛ aha la omɛnde monga lawɔ. Laadiko di’akambo asɔ tshɛ, sho kokaka monga l’eshikikelo ɔnɛ l’andja w’oyoyo, Jehowa ‘ayokotsha nsaki ka ɛngɔ tshɛ kasɛna.’—Osambu 145:16.

11. Ngande wayakokɛso naka sho mbewɔ dia ‘ntɛtɛmɔla anto akina’?

¹¹ Naka sho hatosalɛ akitami akambo lo yoho yɛnya dia vɔ ndeka anto akina ohomba, kete tekɔ lo ndjakokɛ. Lo ngande? Bible totɛka dia “anangɛso wa kashi” mbeyaka monga l’etshumanelo wakoka kaanga mbuta dia vɔ wekɔ akitami. (Ngalatiya 2:4, 5; 1 Joani 2:19) Ndo nto, akitami amɔtshi mbeyaka nshisha kɔlamelo yawɔ. (Mateo 25:10-12; 2 Petero 2:20, 21) Koko naka sho mbewɔ dia ‘ntɛtɛmɔla anto akina,’ kete hatotoyela pondjo anto akina, kaanga wanɛ wele akitami kana weyama efula kana wambokambɛ Jehowa edja efula. Nɛ dia naka vɔ wamboshisha kɔlamelo kana wambotomba oma l’etshumanelo, hatotoshisha mbetawɔ kaso le Jehowa kana ntshika mbokambɛ.—Judɛ 16.

12, 13. Lande na kahatahombe ndjakiyanya lo dikambo dia lofulo la wanɛ walɛ mapa ndo wanɔ vinyɔ lo Eohwelo?

¹² L’edja k’ɛnɔnyi efula, lofulo la wanɛ wakalɛka mapa ndo wakanɔka vinyɔ lo Eohwelo lakatatetemalaka nkitakita. Koko shi nyɛ, lofulo lɔsɔ lotadɛka ɔnɔnyi tshɛ. Onde sho pombaka  ndjakiyanya lo dikambo sɔ? Ndooko. Nyɛsɔ tende lande na.

¹³ “Jehowa mbeyaka anto ande.” (2 Timɔte 2:19) Otshikitanyi la Jehowa, anangɛso wadia lofulo la wanɛ walɛ mapa ndo wanɔ vinyɔ lo Eohwelo haweye akɔna ele mɛtɛ okitami. Ɔnkɔnɛ lo lofulo lɔsɔ lekɔ ndo la wanɛ wafɔnya dia vɔ wekɔ akitami, ko tete le vɔ bu akitami. Ɛnyɛlɔ, anto amɔtshi wakalɛka mapa ndo wakanɔka vinyɔ wakayotshika. Mbeyaka monga ko akina waki la hemɔ ya l’ɔtɛ ndo wakafɔnyaka dia wayotolɛ kaamɛ la Kristo l’olongo. Mbokɛmaka hwe dia sho hateye shikaa lofulo l’akitami wambotshikala lanɛ la nkɛtɛ.

14. Kakɔna kata Bible lo kɛnɛ kendana la lofulo l’akitami wayonga la nkɛtɛ etena kayotatɛ mfɔnu ka woke?

¹⁴ Akitami wayonga lo ahole efula wa lanɛ la nkɛtɛ etena kayoya Yeso ndjowaɔsa otsha l’olongo. Bible mbutaka dia Yeso “ayotoma andjelo ande la londjo la dimama dia wolo, ko vɔ wayotshumanya asɔnami ande kaamɛ oma lo atshuku akɔ anɛi, oma lo koma mɔtshi y’olongo polo lo koma kina.” (Mateo 24:31) Bible mɛnyaka nto dia lo nshi y’ekomelo, lofulo la tshitshɛ l’akitami mbayotshikala lanɛ la nkɛtɛ. (Ɛnyɛlɔ 12:17) Koko tɔ hate angana l’atei awɔ wayonga etena kayotatɛ mfɔnu ka woke.

15, 16. Kakɔna kahombaso nshihodia lo dikambo di’anto 144 000 wakasɔnama oma le Jehowa?

¹⁵ Jehowa mbashikikɛ etena kakokande nsɔna akitami. (Rɔmɔ 8:28-30) Jehowa akamɛ nsɔna akitami l’ɔkɔngɔ wa Yeso mbolwama. Mɛnamaka dia lo ntambe ka ntondo, Akristo tshɛ wa mɛtɛ  waki akitami. Ɛnɔnyi nkama l’ɔkɔngɔ wa laasɔ, efula ka wanɛ wakataka dia waki Akristo kondjotetemala ndjela Kristo. Kaanga mbakidiɔ ngasɔ, l’ɛnɔnyi ɛsɔ, Jehowa akasɔnɛ tɔtɔi ta wanɛ waki Akristo wa mɛtɛ dia monga akitami. Vɔ waki oko eponga wakate Yeso ɔnɛ wayola l’atei wa nkangaka. (Mateo 13:24-30) Lo nshi y’ekomelo, Jehowa akatatetemala nsɔna anto wayonga l’atei w’anto 144 000. ^[2] (Enda nɔtɛ ka la koma.) Ɔnkɔnɛ, naka Nzambi ambɔsa yɛdikɔ ya nsɔna amɔtshi l’atei awɔ la ntondo k’ekomelo ndja, kete toyashikikɛ dia aha la taamu nde ekɔ lo nsala dui di’ɔlɔlɔ. (Isaya 45:9; Danyele 4:35; adia Rɔmɔ 9:11, 16.) ^[3] (Enda nɔtɛ ka la koma.) Sho pombaka mbewɔ dia nsala akambo oko ase olimu wakangunɛngunɛ owandji awɔ lo kɛnɛ kakandasalɛ wanɛ wakayotatɛ olimu lo wonya w’ekomelo.—Adia Mateo 20:8-15.

¹⁶ Aha wanɛ tshɛ wele l’elongamelo ka tɔsɛna l’olongo mbakenga “ɔhɔmbɔ wa kɔlamelo ndo kɛsɔ.” (Mateo 24:45-47) Oko wakidiɔ lo ntambe ka ntondo, ɛlɔ kɛnɛ Jehowa nde la Yeso wekɔ lo nkamba la anto yema tshitshɛ dia ndesha kana mbetsha anto efula. Paka Akristo w’akitami yema tshitshɛ wa lo ntambe ka ntondo mbele Nzambi akakambe la wɔ dia mfunda Afundelo w’Akristo wa lo Grɛkɛ. Ndo ɛlɔ kɛnɛ, paka djui ya tshitshɛ y’Akristo w’akitami mbele l’ɔkɛndɛ wa mbisha ekambi waki Nzambi “mbo ya ndɛ l’etena kahombama.”

17. Kakɔna kamboteka lo sawo nɛ?

¹⁷ Kakɔna kamboteka lo sawo nɛ? Tambeka dia Jehowa mbashikikɛ dia mbisha ekambi ande efula lɔsɛnɔ la pondjo lanɛ la nkɛtɛ ndo wanɛ wayotolɛ kaamɛ la Yeso lɔsɛnɔ la l’olongo.

Jehowa futaka ekambi ande tshɛ, mbuta ate ‘ose Juda’ ndo ‘apami dikumi,’ ndo nde mbalɔmbaka dia vɔ nkitanyiya ɛlɛmbɛ akɔ waamɛ ndo dia vɔ ntshikala la kɔlamelo. Vɔ tshɛ pombaka monga l’okitshakitsha. Vɔ tshɛ pombaka mbokambɛ dihɛka lo dihɛka ndo monga kaamɛ. Ndo vɔ tshɛ pombaka ntetemala nkokɛ ki ka l’etshumanelo. Oko wambotoleka nsukana la ekomelo, nyɛsɔ sho tshɛ totetemale kambɛ Jehowa ndo toyele Kristo oko olui ɔtɔi.