1, 2. a) ‘Woshasha w’ofele waheyama mbuta’ wa Nzambi mendanaka l’akambo akɔna? b) Ambola akɔna wayotɔsɛdingola lo sawo nɛ?

JEHOWA akatosha woshasha woleki woke tshɛ wa ngandji kande etena kakandatome Yeso, Ɔnande la nɛmɔ efula, lanɛ la nkɛtɛ! (Joani 3:16; 1 Joani 4:9, 10) Ɔpɔstɔlɔ Pɔɔlɔ akelɛ woshasha ɔsɔ ɔnɛ ‘woshasha w’ofele waheyama mbuta.’ (2 Kɔrɛtɔ 9:15) Lande na kakakambe Pɔɔlɔ l’etelo kɛsɔ?

² Pɔɔlɔ akeyaka dia olambo wa Yeso wekɔ eshikikelo k’ɔnɛ alaka tshɛ wa diambo waki Nzambi wayokotshama. (Adia 2 Kɔrɛtɔ 1:20.) Kɛsɔ nembetshiyaka dia ‘woshasha w’ofele waheyama mbuta’ wa Nzambi mendanaka la olambo waki Yeso ndo la ɛlɔlɔ tshɛ ndo ngandji ka kɔlamelo katoka Jehowa. Woshasha w’oshinga wolo wa ngasɔ ekɔ wolo mbolembetshiya lo woho wakokaso mboka tshɛ lo tshɛ. Ngande wakokaso ndjaoka lo dikambo dia woshasha wa laande ɔsɔ? Ndo ngande wahomba woshasha ɔsɔ totshutshuya dia sho ndjalɔngɔsɔla lo dikambo dia Eohwelo ka nyɔi ka Kristo kayosalema Lushi la sato, Ngɔndɔ ka sato 23, 2016?

3, 4. a) Ngande watoyaokaka etena kakosha onto ɔmɔtshi woshasha? b) Ngande wahomba woshasha wa laande tshikitanya lɔsɛnɔ layɛ?

³ Sho ngɛnangɛnaka etena katosha onto ɔmɔtshi woshasha. Koko, weshasha ɛmɔtshi wekɔ ohomba efula kana wekɔ wa laande lo woho wakokawɔ ntshikitanya lɔsɛnɔ laso. Ɛnyɛlɔ, ohɔsa dia wɛ akadiake onto. Ko wambokofundɛ dilanya dia nyɔi l’ɔtɛ wa dikambo sɔ. Koko la shashimuya, onto ɔmɔtshi lahayeye amboyakimɔ la lolango dia nongola dilanya lo dihole diayɛ. Nde ambetawɔ mvɔ l’ɔtɛ ayɛ! Ngande wahombayɛ ndjaoka lo woshasha wa laande ɔsɔ?

⁴ Woshasha wa ngandji ndo wa laande ɔsɔ, wayokotshutshuya dia nsala etshikitanu lo lɔsɛnɔ layɛ. Ondo, wɛ ayotshutshuyama nto dia ndeka monga la lokaho, la ngandji otsha le anto akina ndo nyimanyiya onto tshɛ lakakosalɛ dui dia kɔlɔ. Lo nshi yayɛ tshɛ ya lɔsɛnɔ, wɛ ayolangaka mɛnya dia wɛ ekɔ la lowando lo olambo wakakimɔma ɔsɔ.

5. Ngande wele woshasha wa Nzambi w’oshinga w’etshungwelo ndeka oseka woshasha okina tshɛ woke?

⁵ Woshasha wa Nzambi w’oshinga w’etshungwelo ndeka woshasha wa l’ɛnyɛlɔ kakatɛnyi woke efula. (1 Petero 3:18) Ohokanyiya lo dikambo nɛ: Sho tshɛ takahowɔ pɛkato oma le Adama, ndo dilanya dia pɛkato ele nyɔi. (Rɔmɔ 5:12) Ngandji mbakatshutshuya Jehowa dia nde ntoma Yeso lanɛ la nkɛtɛ dia nde ndjovwɛ anto tshɛ, ndo nde “akalɛtɛ nyɔi dikambo di’oseka onto tshɛ.” (Hɛbɛru 2:9) Koko, olambo waki Yeso wayosala akambo woleki efula! Vɔ wayonya nyɔi lo pondjo. (Isaya 25:7, 8; 1 Kɔrɛtɔ 15:22, 26) Wanɛ tshɛ wɛnya mbetawɔ le Yeso wayɔsɛna lo wɔladi ndo wayonga l’ɔngɛnɔngɛnɔ wa pondjo, oyadi wanɛ wayolɛ oko nkumi ya dikanga kaamɛ la Kristo l’olongo kana wanɛ wayokita Diolelo dia Nzambi lanɛ la nkɛtɛ. (Rɔmɔ 6:23; Ɛnyɛlɔ 5:9, 10) Naa ɛtshɔkɔ ekina wele lo woshasha wa Jehowa?

6. a) Ɛtshɔkɔ akɔna wa lo woshasha waki Jehowa wakongɛyɛ l’asolo walomɔlomɔ? b) Shila akambo asato wayototshutshuya woshasha wa Nzambi dia sho nsala.

⁶ Oko etenyi ka woshasha waki Nzambi, nkɛtɛ kayokoma paradiso, ase hemɔ wayɔkɔnɔ ndo anto wakavu wayolɔ. (Isaya 33:24; 35:5, 6; Joani 5:28, 29) Sho nangaka Jehowa ndo Ɔnande la ngandji lo woho wakandatosha ‘woshasha w’ofele waheyama mbuta.’ Kakɔna kayototshutshuya woshasha ɔsɔ dia sho nsala? Vɔ wayototshutshuya 1) dia mbokoya Yeso Kristo dimɛna dimɛna, 2) dia mboka anangɛso ngandji, ndo 3) dia dimanyiya anto akina l’otema ɔtɔi.

7, 8. Ngande wahombaso ndjaoka lo kɛnɛ kendana la ngandji ka Kristo, ndo kakɔna kahombatɔ totshutshuya dia nsala?

⁷ Dui dia ntondo, sho pombaka tshutshuyama dia nkamba la lɔsɛnɔ laso dia mbisha Yeso kɛnɛmɔ. Ɔpɔstɔlɔ Pɔɔlɔ akate ate: “Ngandji kele la kristo totshutshuyaka.” (Adia 2 Kɔrɛtɔ 5:14, 15.) Pɔɔlɔ akeyaka dia naka sho mbetawɔ ngandji ka woke ka Yeso, tɔ kayototshutshuya dia mboka Yeso ngandji ndo mbosha kɛnɛmɔ. Eelo, etena kamanaso fundo kɛnɛ kakatosalɛ Jehowa, ngandji kande kayototshutshuya dia sho nsɛna lo yoho yɛnya dia sho mbishaka Yeso kɛnɛmɔ. Ngande wasalaso dikambo sɔ?

⁸ Ngandji kokaso Jehowa kayototshutshuya dia sho mbokoya ɛnyɛlɔ ka Yeso, lo ndjelaka wanya ande dimɛna dimɛna. (1 Petero 2:21; 1 Joani 2:6) Etena kakitanyiyaso Nzambi ndo Kristo, sho mbaɛnyaka ngandji kawaokaso. Yeso akate ate: “Onto tshɛ letawɔ wadjango ami ndo lawakitanyiya, onto ɔsɔ kamboka ngandji. Ndo onto tshɛ lamboka ngandji, Papa ayowoka ngandji, dimi  layowoka ngandji ndo layoyaɛnya hwe le nde.”—Joani 14:21; 1 Joani 5:3.

9. Tɔsɛngiya takɔna tele la so?

⁹ Lo nshi ya Eohwelo nyɛ, ekɔ dimɛna kanaka lomba lo woho wakambaso la lɔsɛnɔ laso. Ɔnkɔnɛ, yambola wɛmɛ wate: ‘Lo awui akɔna wamomoshilaka mbokoya Yeso? Lo awui akɔna wakokami ndjalowanya?’ Ekɔ ohomba dia sho ndjaokaka shwamɛ ambola asɔ nɛ dia anto wa l’andja ɔnɛ nangaka dia sho nsɛna woho wasɛnawɔ. (Rɔmɔ 12:2) Naka hatendji ɔlɔlɔ, kete sho koka ndjaoka oko tambotatɛ tshutshuyama dia mbokoya embetsha wa l’andja ɔnɛ, akanga wa lokumu, ndo akɛnyi wa tɔkɛnyɔ wanyanyema. (Kɔlɔsayi 2:8; 1 Joani 2:15-17) Ngande wakokaso nshika ntanga oma lo shɛngiya shɔ?

10. Ambola akɔna wakokaso ndjambola shwamɛ lo nshi ya Eohwelo nyɛ, ndo kakɔna kakoka ekadimwelo awɔ totshutshuya dia nsala? (Enda osato wele lo mbɔtwɛlɔ.)

¹⁰ Ekɔ dimɛna ntshungola etena lo nshi ya Eohwelo dia nsɛdingola ahɔndɔ aso, filmɛ yaso, ndo mishiki aso, mbidja ndo kɛnɛ kele l’ɔrdinatɛrɛ aso, telefɔnɛ yaso, kana tablɛtɛ yaso. Yambola wɛmɛ wate: ‘Otondonga Yeso ekɔ lanɛ, ko nde mɛna woho wɔlɔtshimi, onde lotooka sɔnyi?’ (Adia 1 Timɔtɛ 2:9, 10.) ‘Onde ahɔndɔ ami mɛnyaka dia lekɔ onto latayele Kristo? Onde Yeso ayolanga menda filmɛ yami? Onde nde ayokoka mpokamɛ mishiki ami? Naka Yeso mamba telefɔnɛ kana tablɛtɛ kami, onde layoka sɔnyi lo kɛnɛ kayondɛna? Onde layonga l’okakatanu wa nembetshiya Yeso lande na kangɛnangɛnami tokɛnyɔ ta tovidɛo takɛnyami?’ Ngandji kokaso Jehowa la dia totshutshuya dia mbikadja ɛngɔ tshɛ kele keema dimɛna le Okristo, oyadi kaanga tɔ kekɔ oshinga wolo efula. (Etsha 19:19, 20) Etena kakatakimɔ lɔsɛnɔ laso le Jehowa, takolake dia nkamba la lɔ lo yoho yasha Kristo kɛnɛmɔ. Ɔnkɔnɛ, hatohombe nama oseka ɛngɔ tshɛ kakoka tosha okakatanu dia mbokoya Yeso.—Mateo 5:29, 30; Filipɛ 4:8.

11. a) Ngande wele ngandji kokaso Jehowa nde la Yeso totshutshuyaka l’olimu w’esambishelo? b) Ngande wakoka ngandji kaso totshutshuya dia sho nkimanyiya anto akina wa l’etshumanelo?

¹¹ Ngandji kokaso Yeso totshutshuyaka dia sho nsambisha ndo mbetsha anto akina l’ohetoheto. (Mateo 28:19, 20; Luka 4:43) Lo nshi ya Eohwelo, onde wɛ hakoke nɔngɔsala ekongelo kayɛ ka lɔsɛnɔ la lushi la lushi lo woho wakokayɛ monga la diaso dia nkamba oko ombatshi mboka wa tshanda ko mbetsha wenya 30 kana 50 l’olimu w’esambishelo? Ɔnangɛso ɔmɔtshi lambovushaka wadi laki l’ɛnɔnyi 84 akafɔnya dia nde hakoke nkamba oko ombatshi mboka l’ɔtɛ wayande opalanga ndo woho wayande bu la yonge ya demba ya dimɛna. Koko, ambatshi mboka waki suke lande wakalangaka mbokimanyiya. Vɔ wakoyangɛ woho wa vɔ mɛmbaka lo mutuka ndo wakasɔnɛ ɛtshi ka nkɛtɛ kakandakoke sambishaka. Etombelo waki la dui sɔ ele, ɔnangɛso akakotsha oyango ande wa wenya 30. Onde wɛ hakoke nkimanyiya onto ɔmɔtshi la l’etshumanelo kanyu dia nde nkamba oko ombatshi mboka wa tshanda lo Ngɔndɔ ka sato kana ka nɛi? Ekɔ mɛtɛ di’aha onto tshɛ mbakoka nkamba oko ombatshi mboka, koko sho koka nkamba la wenyaso ndo la wolo aso dia mpamia olimu wakambɛso Jehowa. Naka sho nsala ngasɔ, kete l’ɛnyɛlɔ ka Pɔɔlɔ, sho tayɛnya dia tambotshutshuyama oma lo ngandji ka Yeso. Dui diakɔna nto diayototshutshuya ngandji ka Nzambi dia sho nsala?

12. Ngandji ka Nzambi totshutshuyaka dia sho nsala dikambo diakɔna?

¹² Dui dia hende ele, ngandji ka Nzambi pombaka totshutshuya dia sho mboka anangɛso ngandji. Ɔpɔstɔlɔ Joani akafunde ate: “Analengo wa ngandji, lam’ele Nzambi akatoke ngandji ngasɔ, sho lawɔ pombaka mbokana ngandji lam’asaso.”  (1 Joani 4:7-11) Ɔnkɔnɛ, naka sho mbetawɔka ngandji ka Nzambi, kete ekɔ ohomba sho mboka anangɛso ngandji. (1 Joani 3:16) Ngande wakokaso mbaoka ngandji?

13. Ɛnyɛlɔ kakɔna kakatshike Yeso lo mboka anto akina ngandji?

¹³ Ɛnyɛlɔ ka Yeso tɛnyaka woho wakokaso mboka anto akina ngandji. Etena kakinde lanɛ la nkɛtɛ, nde akakimanyiya anto, djekoleko akanga w’okitshakitsha. Nde akakɔnɔla ase hemɔ, akanga wa tshumbe, akanga wa totshungu, akanga wa mpoke ndo akanga wa lumi. (Mateo 11:4, 5) Otshikitanyi l’ewandji w’ɛtɛmwɛlɔ, Yeso akangɛnangɛnaka mbetsha anto wakalangaka mbeka awui wendana la Nzambi. (Joani 7:49) Nde akalangaka akanga w’okitshakitsha asɔ ndo akakambaka la wolo dia mbakimanyiya.—Mateo 20:28.

14. Kakɔna kakokayɛ nsala dia mɛnya anangɛso ngandji?

¹⁴ Nshi ya Eohwelo ekɔ nto etena ka dimɛna ka kanyiyaka lo kɛnɛ kendana la woho wakokayɛ nkimanyiya anangɛso l’akadiyɛso wa l’etshumanelo kanyu, djekoleko wanɛ waya epalanga efula. Onde wɛ hakoke membolaka asekaso wa ngandji asɔ? Onde wɛ hakoke mbatɔlɛ yangɔ ya ndɛ, mbakimanyiya l’elimu wa la ngelo, mbatɔla lo nsanganya kana mbaelɛ dia tshɔ la wɔ l’olimu w’esambishelo? (Adia Luka 14:12-14.) Ngandji ka Nzambi kakotshutshuya dia mboka anangɛso ngandji!

15. Kakɔna kahombaso mbetawɔ?

¹⁵ Dui dia sato ko, ngandji ka Jehowa totshutshuyaka dia nyimanyiyaka anangɛso l’akadiyɛso. Sho tshɛ takahowɔ mpɛkato ndo nyɔi oma le Adama diakɔ diele ndoko onto lakoka mbuta ɔnɛ: “Dimi keema l’ohomba w’oshinga w’etshungwelo.” Oyadi kaanga okambi wa Nzambi woleki kɔlamelo tshɛ ekɔ l’ohomba wa woshasha w’oshinga w’etshungwelo. Onto tshɛ la l’atei aso akadimanyiyama dibasa dia woke! Lande na kele ekɔ ohomba mbetawɔ dui sɔ? Sho tanaka okadimwelo lo ɛnyɛlɔ kɛmɔtshi l’atei wa bɛnyɛlɔ dia Yeso.

16, 17. a) Wetshelo akɔna wahombaso nkondja oma lo ɛnyɛlɔ kakasha Yeso ka nkumekanga ndo k’ase olimu? b) L’ɔkɔngɔ wa wɛ nkana yimba la ɛnyɛlɔ kakasha Yeso, kakɔna kamboyoyashikikɛ dia nsala?

¹⁶ Yeso akasha ɛnyɛlɔ ka nkumekanga kɛmɔtshi kakadimanyiya ose olimu ande dibasa di’efula dia dɛnariyo 60 000 000. Koko l’ɔkɔngɔ diko, ose olimu akɔ konanga nyimanyiya wonyande ose olimu dibasa dia tshitshɛ dia dɛnariyo 100 lotoo. Kɛtshi ka nkumekanga kakahombe tshutshuya ose olimu ande dia nde lawɔ nyimanyiya wonyande ose olimu. Nkumekanga akadunganɛ la nkɛlɛ etena kakandoke dia ose olimu ande kombetawɔ nyimanyiya osekande dibasa dia tshitshɛ sɔ. Nde akate ate: “Wɛ ose olimu wa kɔlɔ, dimi lakakokimwɛ dibasa diayɛ tshɛ lam’akayasɛngasɛnga. Onde wɛ lawɔ totoyokoka mboka osekayɛ ose olimu kɛtshi woho wakamakoke kɛtshi?” (Mateo 18:23-35) Oko nkumekanga kɛsɔ, Jehowa akatodimanyiya dibasa diaso dia woke efula. Kakɔna kahomba ngandji ndo kɛtshi ka Jehowa totshutshuya dia sho nsala?

 ¹⁷ Oko wayalɔngɔsalaso lo dikambo dia Eohwelo, sho koka ndjaoka ambola anɛ shwamɛ ɔnɛ: ‘Onde ɔnangɛso ɔmɔtshi akasalɛ dui dimɔtshi diambisha lonyangu? Onde lekɔ l’okakatanu dia mbodimanyiya?’ Naka ngasɔ mbediɔ, kete ɔnɛ ekɔ etena ka dimɛna ka mbokoya Jehowa, ɔnɛ lele “suke dia dimanyiya.” (Nehemiya 9:17; Osambu 86:5) Naka sho mandola woke woke wa kɛtshi ka Jehowa, kete tayokaka anto akina kɛtshi ndo tayowadimanyiyaka l’otema ɔtɔi. Naka hatodimanyiya ndo hatoke anangɛso ngandji, kete sho hatokoke nongamɛ ngandji ndo edimanyiyelo ka Jehowa. (Mateo 6:14, 15) Etena kadimanyiyaso anto akina, dui sɔ hadiotshikitanya lonyangu lakawatotsha, koko dui sɔ diayotokimanyiya dia monga la nshi yayaye yoleki ɔngɛnɔngɛnɔ efula.

18. Ngande wele ngandji ka Nzambi kakakimanyiya kadiyɛso kɛmɔtshi dia mbikikɛ wandja wa kadiyɛso kekina?

¹⁸ Koka monga dui dia wolo dia mbikikɛ wandja w’anangɛso l’akadiyɛso. (Adia Ɛfɛsɔ 4:32; Kɔlɔsayi 3:13, 14.) Kadiyɛso kakasale dui sɔ lokombo lande Lily. ^[1] (Enda nɔtɛ ka la koma.) Nde akakimanyiyaka wadi aki odo lakawelɛka Carol. Ɛnyɛlɔ, nde akɛmbaka Carol lo mutuka dia mbɔtɔla dihole tshɛ diakandalangaka tshɔ, akokimanyiyaka la mbosombɛ diangɔ diaki lande ohombo ndo akosalɛka akambo akina efula. Koyanga mbakosalɛka Lily akambo asɔ tshɛ, Carol aki paka la lɔhɛndɛ loto nshi tshɛ ndo komonga dikambo dia wɔɔdu dia mbokimanyiya l’etena kɛmɔtshi. Koko Lily akadje yimba lo waonga w’amɛna waki Carol ndo akatetemala mbokimanyiya l’edja k’ɛnɔnyi ɛmɔtshi polo ndo lam’akatate Carol wolo efula ndo wakandavu. Kaanga mbaki komonga y’ana ya dikambo dia Lily nkimanyiya Carol, Nde mbutaka ate: “Lekɔ lo nomɔlomɔ dia tɛnana la Carol lo eolwelo k’oma lo nyɔi. Lekɔ lo kombola ntoweya etena kayondoyala aya kokele.” Mbokɛmaka hwe dia, ngandji ka Nzambi koka totshutshuya dia sho monga l’ekikelo otsha le anangɛso l’akadiyɛso ndo nomɔlomɔ dia koma l’etena kayonga eongelo kele keema kokele k’anto kambonyɛma pondjo pondjo.

19. Ngande wayokotshutshuya ‘woshasha w’ofele waheyama mbuta’ wa Nzambi?

¹⁹ Lo mɛtɛ Jehowa akatosha ‘woshasha w’ofele waheyama mbuta.’ Nyɛsɔ toyalake la lowando nshi tshɛ lo dikambo diawɔ! Nshi ya Eohwelo ekɔ etena koleki dimɛna tshɛ ka kana yimba l’awui tshɛ wakatosalɛ Jehowa nde la Yeso. Nyɛso totshutshuyame oma lo ngandji kawɔ dia mbokoya Yeso dimɛna dimɛna, lo mbokaka anangɛso ngandji, ndo lo nyimanyiyaka anangɛso l’otema ɔtɔi.