1, 2. Lande na kakatone Nzambi Saolo? (Enda osato wele lo mbɔtwɛlɔ.)

ETENA kakasɔnɛ Jehowa Saolo dia monga nkumekanga, Saolo aki onto lakeyaka elelo ande. (1 Sa. 9:1, 2, 21; 10:20-24) Koko l’ɔkɔngɔ wa nde monga nkumekanga, nde akayonga l’otako. Lo diaaso dimɔtshi, nunu di’ase Filistiya wakaye dia ndjɔlɔsha ase Isariyɛlɛ. Omvutshi Samuɛlɛ akatɛ Saolo dia nde ayoya dia ndjolambola Jehowa olambo. Koko, la ntondo ka Samuɛlɛ nkoma, ase Isariyɛlɛ wakoke wɔma ndo efula ka l’atei awɔ wakatshike Saolo. Nde komonga nto la solo dia lotutsha ndo lo dihole dia nde nkonga Samuɛlɛ, nde akalambola olambo ndamɛ. Saolo komonga la lotshungɔ la nsala dui sɔ ndo Jehowa kɔngɛnangɛna.—1 Sa. 13:5-9.

² Etena kakakome Samuɛlɛ, nde akahangwɛ Saolo l’ɔtɛ wakandahindolɛ Jehowa. Koko Saolo kombetawɔ dia nde akasale kaanga dui ɔtɔi dia kɔlɔ. Nde akasha tɛkɛ nɛndɛ, ndo akɛndja  anto akina onongo wa munga kande. (1 Sa. 13:10-14) Oma k’etena kɛsɔ, Saolo akasale akambo akina efula l’otako tshɛ. Diakɔ diele, Jehowa akawotone dia nde monga nkumekanga. (1 Sa. 15:22, 23) Lɔsɛnɔ la Saolo lakatatɛ dimɛna, koko lakayokomɛ kɔlɔ efula.—1 Sa. 31:1-6.

3. a) Kakɔna kafɔnya anto efula lo kɛnɛ kendana la mbeya elelo awɔ? b) Ambola akɔna wayotokadimola?

³ Ɛlɔ kɛnɛ, anto efula fɔnyaka dia hawokoke mbeya elelo awɔ ko l’etena kakɔ kaamɛ ntondoya lo lɔsɛnɔ kana l’olimu. Vɔ ndjasɛmaka dia mɛnya dia vɔ ndeka anto akina. Ɛnyɛlɔ, ɔkɛnyi ndo ose pɔlitikɛ ɔmɔtshi la lokumu akate ate: “Mbeya elelo ekɔ etelo kahendana la mi kaanga yema ndo dimi mɛnaka dia tɔ hendanaki la mi pondjo.” Ko lande na kele ekɔ ohomba dia Okristo mbeya elelo ande? Mbeya elelo kɛdikɛdi na, ndo kakɔna kahadialembetshiya? Lo sawo nɛ, tayokadimola ambola asɔ. Ndo lo sawo diayela, tayɛna woho wakokaso ntetemala mbeya elelo aso kaanga l’etena kakoka dui sɔ monga wolo nsala.

4. Akambo w’otako kɛdikɛdi na?

⁴ Bible mɛnyaka dia otako ntshikitana la mbeya elelo aso. (Adia Tokedi 11:2.) Davidɛ akasɛngasɛnga Jehowa ate: “Nya okambi ayɛ oma lo akambo w’otako.” (Os. 19:13) Akambo w’otako kɛdikɛdi na? Kɛdikɛdi nsala dui dimɔtshi dieso bu la lotshungɔ la nsala, mbeyaka monga l’ɔtɛ weso bu la solo dia lotutsha kana weso la lotamanya. Lo tena dimɔtshi onto tshɛ la l’atei aso tosalaka dui dimɔtshi l’otako l’ɔtɛ weso bu kokele. Koko oko wakatɛnyi oma l’ɛnyɛlɔ ka Saolo, naka dui sɔ diaya tshondo ya mbekelo, kete Jehowa hatɔngɛnangɛna. Osambo 119:21 mbutaka dia Jehowa “pangwɛka akanga w’etako.” Lande na kasalande dui sɔ?

5. Lande na kele nsala akambo l’otako ekɔ kɔlɔ efula?

⁵ Ntondotondo, naka sho nsala dui dimɔtshi l’otako, kete tayɛnya dia hatokitanyiya Jehowa, Nzambi ndo Omboledi aso. Dui dia hende ele, naka sho nsala dui dieso bu la lotshungɔ la nsala, kete ondo ewanu ndo ekakatanu wayonga lam’asaso l’anto akina. (Tok. 13:10) Ndo dui dia sato ele, sho koka ndjɔsama oko dinginya naka anto akina wambeya dia takasale dui dimɔtshi l’otako. (Luka 14:8, 9) Mbokɛmaka dia sho koka nshihodia lande na kalanga Jehowa dia sho mbeya elelo aso.

6, 7. Ngande wɔtɔnɛ mbeya elelo aso la okitshakitsha?

⁶ Mbeya elelo mbɔtɔnɛka efula la okitshakitsha. Okristo wele l’okitshakitsha bu la otako, koko nde mbɔsaka dia anto akina mboleka. (Flpɛ. 2:3) Mbala efula onto lele l’okitshakitsha mbeyaka nto elelo ande. Ndo l’okitshakitsha tshɛ nde mbetawɔka wandja ande. Nde nangaka mpokamɛ tokanyi t’anto akina ndo nkondja wetshelo oma le wɔ. Onto lele l’okitshakitsha ngɛnyangɛnyaka Jehowa efula.

⁷ Bible mɛnyaka dia onto leya elelo ande ndjaeyaka ndamɛ ndo nde shihodiaka ɔnɛ ekɔ akambo amɔtshi wende bu l’akoka wa nsala kana wende la lotshungɔ la nsala. Dui sɔ mbokimanyiyaka dia nde nɛmiya anto akina ndo mbasalɛ akambo la ngandji tshɛ.

8. Dia ntetemala monga l’okitshakitsha, tokanyi takɔna tahombaso mbewɔ?

⁸ Koko sho koka ntatɛ nkanyiya l’otako tshɛ aha la sho mbeya. Ngande wakoka  dui sɔ salema? Sho mbeyaka ntatɛ mfɔnya dia tekɔ ohomba efula ndeka anto akina nɛ dia sho kana anto weyaso dimɛna wekɔ l’ɛkɛndɛ ɛmɔtshi l’etshumanelo. (Rɔmɔ 12:16) Kana sho koka ntatɛ nkotola yambalo y’anto amboleka efula oya le so. (1 Tim. 2:9, 10) Sho mbeyaka ndjotatɛ kaanga mbutɛ anto akina akambo wahombawɔ kana wahawahombe nsala.—1 Kɔr. 4:6.

9. Lande na kakayokomaka anto amɔtshi dia monga l’otako? Sha ɛnyɛlɔ kɛmɔtshi ka lo Bible.

⁹ Sho kokaka ntatɛ monga l’otako naka hatahemɛ nsaki yaso ya kɔlɔ. Anto efula wakayokoma dia monga l’otako l’ɔtɛ wakawalange ndjatombola, wakawakɔmiya anto akina kana wakiwɔ kombahemɛ nkɛlɛ yawɔ. Dui sɔ diakakomɛ anto amɔtshi woshilami lo Bible, ɛnyɛlɔ Abisalɔma, Uziya ndo Nɛbukadinɛza. Jehowa akawaɛnya hwe dia vɔ pombaka monga l’okitshakitsha.—2 Sa. 15:1-6; 18:9-17; 2 Ɛk. 26:16-21; Dan. 5:18-21.

10. Lande na kahombaso mbewɔ mvɔ eyango wele l’anto akina tshɔdia? Sha ɛnyɛlɔ kɛmɔtshi ka lo Bible.

¹⁰ Lo tena dimɔtshi, mbeyaka monga ko ekɔ ɛkɔkɔ ekina wakonya anto amɔtshi diaha mbeya elelo awɔ. Tokanyiya yema dikambo dia Abimɛlɛkɛ la Petero. (Eta. 20:2-7; Mat. 26:31-35) Onde apami asɔ waki l’otako? Kana onde akakoke monga ko vɔ kombeyaka oseka kiambokambo tshɛ kana wakasale akambo aha la nkanyiya? Lam’ele hatokoke mbeya kɛnɛ kele l’etema w’anto, hatohombe mvɔ eyango wele l’anto akina tshɔdia.—Adia Jakɔba 4:12.

11. Kakɔna kahombaso nshihodia?

¹¹ Onto leya elelo ande shihodiaka ɔkɛndɛ ande l’okongamelo wa Nzambi. Jehowa ekɔ Nzambi kaha l’ofukutanu. Nde akasha onto tshɛ la l’etshumanelo ɔkɛndɛ ɔmɔtshi. Onto tshɛ la l’atei aso ekɔ ohomba. Jehowa akasha onto tshɛ la l’atei aso weshasha wotshikitanyi, ɛnyɛlɔ diewo, losha kana akoka ndo nde toshaka lotshungɔ la nsɔna woho wakokaso nkamba la wɔ. Naka sho mbeya elelo aso, kete tayokamba la losha laso lo yoho yalanga Jehowa. (Rɔmɔ 12:4-8) Sho mbeyaka dia Jehowa nongamɛka dia sho nkamba la lɔ dia mbotombola ndo nkimanyiya anto akina.—Adia 1 Petero 4:10.

12, 13. Kakɔna kahombaso mbohɔ naka etshikitanu wambonga l’olimu wakambɛso Jehowa?

¹² Kɛnɛ kasalaso l’olimu wa Jehowa mbeyaka ntshikitana l’edjedja ka wonya. Ɛnyɛlɔ, ohokanyiya etshikitanu efula wakakomɛ Yeso. Ntondotondo, nde aki nde la She ato. (Tok. 8:22) Oma laasɔ, nde akakimanyiya Jehowa dia ntonga andjelo, andja ndo anto. (Kɔl. 1:16) L’ɔkɔngɔ diko, nde akayotomama la nkɛtɛ. Nde akotɔ oko ɔna ashashi ndo oma laasɔ nde akayonga opalanga. (Flpɛ. 2:7) L’ɔkɔngɔ wa nyɔi kande, Yeso akakalola l’olongo ndo nde akayala Nkumekanga ka Diolelo diaki Nzambi lo 1914. (Hɛb. 2:9) Ndo lo nshi yayaye, l’ɔkɔngɔ wa nde mbolɛ oko Nkumekanga l’edja k’ɛnɔnyi kinunu, Yeso ayokaloya Jehowa Diolelo, dia “Nzambi monga laadiko dia tshɛ.”—1 Kɔr. 15:28.

¹³ Sho la wɔ koka monga l’etshikitanu efula lo nsɛnɔ yaso. Lo tena dimɔtshi, ɛkɛndɛ aso koka ntshikitana l’ɔtɛ wa tɛdikɔ taso hita. Ɛnyɛlɔ, mbeyaka monga ko taki onyemba, ko tamboyɔsa yɛdikɔ ya ntshuka. Kana tamboyota ana. L’ɔkɔngɔ diko, sho koka mbɔsa yɛdikɔ ya nsala etshikitanu ɛmɔtshi l’oyango wa kambɛ Jehowa lo tena tshɛ. Lo tena dikina, ɛkɛndɛ aso mbeyaka  ntshikitana l’ɔtɛ w’akambo wele la so. Sho koka monga l’akoka wa nsala akambo efula kana yema tshitshɛ. Koko, oyadi tekɔ ɛlɔngɔlɔngɔ kana epalanga, la yoonge ya dimɛna kana bu, Jehowa mbeyaka woho wakoka onto tshɛ la l’atei aso mbokambɛ lo yoho yoleki dimɛna. Nde halongamɛ dia sho nsala kɛnɛ koleki kɛnɛ keso l’akoka wa nsala. Ndo nde ngɛnangɛnaka efula kɛnɛ tshɛ kasalaso lo dikambo diande.—Hɛb. 6:10.

14. Ngande wakoka mbeya elelo aso tokimanyiya dia ngɛnangɛna lo oseka dikambo tshɛ?

¹⁴ Yeso akangɛnangɛnaka ɔkɛndɛ tshɛ wakawoshaka Jehowa, ndo sho lawɔ tɔngɛnangɛnake waso. (Tok. 8:30, 31) Onto leya elelo ande ngɛnangɛnaka elimu ndo ɛkɛndɛ wele la nde l’etshumanelo. Nde haleke mbidja yimba lo kɛnɛ kasala anto akina. Koko, nde ngɛnangɛnaka la ɔkɛndɛ wele la nde l’okongamelo waki Nzambi. Nde mbɔɔsaka dia vɔ ndja oma le Jehowa. Ndo nto, onto lele l’okitshakitsha nɛmiyaka anto akina ndo ngɛnangɛnaka mbasukɛ. Nde shihodiaka dia Jehowa akawasha ndo vɔ la wɔ ɔkɛndɛ.—Rɔmɔ 12:10.

15. Wetshelo akɔna wakokaso nkondja oma l’ɛnyɛlɔ ka Ngidiyɔna?

¹⁵ Ngidiyɔna ekɔ ɛnyɛlɔ ka dimɛna efula k’onto lakeyaka elelo ande. Etena kakawosha Jehowa ɔkɛndɛ wa nshimbɛ ase Isariyɛlɛ oma le ase Midiyana, Ngidiyɔna akate ate: “Nkumbo kami koleki tshitshɛ laka aseka Manase ndo dimi koleki onto l’anyanya lo  luudu la papa.” (Emb. 6:15) Koko, Ngidiyɔna akayaɛkɛ le Jehowa ndo aketawɔ ɔkɛndɛ ɔsɔ. Oma laasɔ, Ngidiyɔna akasale la wolo dia nshihodia tshɛ lo tshɛ kɛnɛ kakalongamɛka Jehowa le nde ndo akalɔmbɛ ɛlɔmbwɛlɔ kande. (Emb. 6:36-40) Ngidiyɔna aki pami ka wolo ndo ka dihonga, koko nde aki nto la lomba ndo yewo. (Emb. 6:11, 27) L’ɔkɔngɔ diko, etena kakalange anto dia nde monga owandji awɔ, nde akatone. L’ɔkɔngɔ wa nde nsala kɛnɛ kakɔlɔmbɛ Jehowa dia nsala, nde akakalola otsha lakande.—Emb. 8:22, 23, 29.

16, 17. Ngande wakoka onto leya elelo ande mpama?

¹⁶ Naka onto ambetawɔ ɔkɛndɛ ɔmɔtshi wambowowosha kana ambolanga nsala akambo efula l’etshumanelo, dui sɔ halembetshiya dia nde heye elelo ande. Bible mbutaka di’ekɔ dimɛna efula dia okambi wa Jehowa mbetawɔ kambɛ anango olimu efula ndo mpama. (1 Tim. 4:13-15) Ko onde sho pombaka monga l’ɔkɛndɛ ɔmɔtshi dia mpama? Ndooko. Sho tshɛ koka ntetemala ndowanya lonto laso l’Okristo ndo akoka wakatosha Jehowa dia sho mbokambɛ dimɛna ndo nkimanyiya anto akina.

¹⁷ La ntondo ka nde mbetawɔ ɔkɛndɛ ɔmɔtshi, onto leya elelo ande salaka la wolo dia mbeya kɛnɛ kayondɔlɔmbama. Nde nɔmbaka lo kɛnɛ kendana l’ɔkɛndɛ akɔ, ndo la yewo tshɛ nde sɛdingolaka dia mbeya kana nde ayonga l’akoka wa nsala olimu akɔ. Onde nde ayotetemala monga l’etena k’efula ndo la wolo wa nsala akambo akina w’ohomba? Naka bu, onde anto akina kokaka ndjokamba elimu ɛmɔtshi wakambande l’etena kɛnɛ? L’ɔkɔngɔ wa nde nkana yimba la ambola asɔ, onto leya elelo ande kokaka nshikikɛ dia kana nde hatokoka nkotsha ɔkɛndɛ wambowowosha ɔsɔ dimɛna. Naka sho mbeyaka elelo aso, kete sho kokaka ntona.

18. a) Kakɔna kayosala onto leya elelo ande etena kawoshawɔ ɔkɛndɛ ɔmɔtshi? b) Ngande watokimanyiya Rɔmɔ 12:3 dia mbeya elelo aso?

¹⁸ Jehowa nangaka dia sho “nkɛndakɛnda la okitshakitsha” kaamɛ la nde. (Mika 6:8) Ɔnkɔnɛ, etena katoshawɔ ɔkɛndɛ ɔmɔtshi sho nyangaka ɛlɔmbwɛlɔ ndo ekimanyielo kande oko wakasale Ngidiyɔna. Sho pombaka nkana yimba dimɛna lo kɛnɛ katotɛ Jehowa lo tshimbo ya Bible ndo y’okongamelo ande. Tatohɛke dia kɛnɛ tshɛ keso l’akoka wa nsala l’olimu ande, hatokisale l’ɔtɛ w’akoka wele la so, koko nɛ dia Jehowa ekɔ l’okitshakitsha ndo nangaka tokimanyiya. (Os. 18:35) Onto leya elelo ande hakoke “nkanyiya efula dikambo diande hita oleki kɛnɛ kele ohomba nde nkanyiya.”—Adia Rɔmɔ 12:3.

19. Lande na kahombaso mbeya elelo aso?

¹⁹ Onto leya elelo ande, mbeyaka dia paka Jehowa mbasungana nongola lotombo tshɛ, nɛ dia nde ekɔ Otungi ndo Ɔnɛ-Laheme-Tshɛ. (Ɛny. 4:11) Naka sho mbeyaka elelo aso, kete tayɔngɛnangɛna kɛnɛ tshɛ kasalaso l’olimu wa Jehowa. Tayɔlɛmiya nsaki ndo tokanyi t’anangɛso l’akadiyɛso, ndo etombelo wayonga la dui sɔ ele, sho tshɛ tayonga kaamɛ. Onto leya elelo ande kanyiyaka efula la ntondo ka nsala dui dimɔtshi ndo lo nsala ngasɔ, nde mbewɔka dia nsala munga ya weke. Jehowa ngɛnangɛnaka efula anto weya elelo awɔ. L’ɔtɛ w’ɛkɔkɔ ɛsɔ mbele, mbeya elelo aso ekɔ dui di’ohomba efula le ekambi wa Nzambi. Lo sawo diayela, tayɛna woho wakokaso ntetemala mbeya elelo aso kaanga etena kele dui sɔ wolo nsala.