Ɔsa woshasha ayɛ wa lotshungɔ la nsɔna la nɛmɔ
“Lɛnɛ ele nyuma kaki Jehowa, lotshungɔ lekɔ.”—2 KƆR. 3:17.
ESAMBO: 62, 65
1, 2. a) Naa tokanyi totshikitanyi tele l’anto lo dikambo dia lotshungɔ la nsɔna? b) Kakɔna katotɛ Bible lo dikambo dia lotshungɔ laso la nsɔna, ndo ambola akɔna wayangaso nsɛdingola?
ETENA kakandasalaka ɛsɔnwɛlɔ ande, womoto ɔmɔtshi akatɛ ɔngɛnyi ande ɔmɔtshi ɔnɛ: “Tokonyake dia nkanyiya efula; ombute tsho kɛnɛ kakokami nsala, kete amboshila.” Womoto ɔsɔ akalangaka dia vɔ mbotɛ kɛnɛ kakokande nsala lo dihole dia nde nkamba la lotshungɔ lande la nsɔna, lele woshasha w’oshinga wolo w’oma le Otungi ande. Kayotota lo dikambo diayɛ? Onde wɛ nangaka mbɔsa tɛdikɔ wɛmɛ, ko kana wɛ nangaka dia anto akina kɔsɛ tɛdikɔ? Ngande wɔsayɛ lotshungɔ la nsɔna?
2 Anto wekɔ la tokanyi totshikitanyi lo dikambo dia lotshungɔ la nsɔna. Amɔtshi mbutaka ɔnɛ ndooko onto lele la lotshungɔ la nsɔna mɛtɛ, nɛ dia Nzambi amboshilaka mbɔsa yɛdikɔ yendana la etsha aso tshɛ. Akina mbutaka ɔnɛ lotshungɔ la nsɔna kokaka monga paka naka tekɔ la lotshungɔ tshɛ lo tshɛ. Koko, Bible totɛka ɔnɛ onto l’onto akatongama la dikoka ndo lotshungɔ la nsala ɛsɔnwɛlɔ wa lomba. (Adia Jashua 24:15.) Lo Bible sho tanaka nto ekadimwelo lo ambola wayela anɛ: Onde lotshungɔ laso la nsɔna lekɔ la elelo? Ngande wahombaso nkamba la lotshungɔ lele la so la mbɔsa tɛdikɔ? Onde tɛdikɔ taso mɛnyaka mɛtɛ dia sho mbokaka Jehowa ngandji k’efula? Ngande wakokaso mɛnya ɔnɛ sho nɛmiyaka tɛdikɔ t’anto akina?
WETSHELO AKƆNA WAKOKASO NKONDJA OMA LE JEHOWA LA YESO?
3. Ngande wakamba Jehowa la lotshungɔ la tshɛ lo tshɛ lele la nde?
3 Jehowa ekɔ la lotshungɔ tshɛ lo tshɛ ndo sho koka nkondja wetshelo oma lo yoho yakambande la lotshungɔ lande. Ɛnyɛlɔ, Jehowa akasɔnɛ wodja w’Isariyɛlɛ dia monga wodja ande, “ɛngɔ kande ka laande.” (Eoh. 7:6-8) Nde aki la ɔkɔkɔ wa nsala ɔsɔnwɛlɔ ɔsɔ. Jehowa akalange dia nkotsha daka diakandalake ɔngɛnyi ande Abrahama. (Eta. 22:15-18) Laadiko dia laasɔ, Jehowa okongaka tena tshɛ la ngandji ndo l’ekanelo k’ɔlɔlɔ etena kakambande la lotshungɔ lande. Sho koka nshikikɛ dui sɔ lo yoho yakandahokolaka ase Isariyɛlɛ etena kakawohindolɛka. Etena kakawɔlɔmbaka edimanyielo l’ɔtɛ wa kɛnɛ kakawasale, Jehowa akawaokaka ngandji ndo kɛtshi. Nde akate ate: “Dimi layowakɔnɔla ko vɔ hawotoshisha kɔlamelo nto. Dimi layowalanga la lolango lami hita.” (Hɔs. 14:4) Jehowa akatosha ɛnyɛlɔ ka dimɛna lo nkamba la lotshungɔ lande dia nkimanyiya anto akina!
4, 5. a) Naa onto la ntondo lakakondja woshasha waki Nzambi wa lotshungɔ la nsɔna, ndo ngande wakandakambe la wɔ? b) Dimbola diakɔna diahomba onto tshɛ ndjaoka?
4 Jehowa akasɔnɛ dia ntonga andjelo ndo anto la lotshungɔ la nsɔna. Jehowa akatonge Yeso oko etongami kande ka ntondo. Yeso akatongama l’efanelo ka Nzambi ndo ekɔ la lotshungɔ la nsɔna. (Kɔl. 1:15) Ngande wakakambaka Yeso la lotshungɔ lande? Ntondo ka nde ndja la nkɛtɛ, Yeso akasɔnɛ dia ntshikala la kɔlamelo le Nzambi, koko aha mbeta lo wedi wa Satana ndo ɔtɔmbɔkwɛlɔ ande. Etena kakaye Yeso la nkɛtɛ, nde akasɔnɛ dia nshika ntanga la ntondo k’ehemba wa Satana. (Mat. 4:10) Oma laasɔ, l’otsho wa la ntondo ka nyɔi kande, Yeso akashikikɛ She dia nde nangaka nsala lolango Lande. Nde akate ate: “Papa, naka wɛ nangaka, ominye dikɔhɔ nɛ. Kele aha oko walangami, koko lolango layɛ latshame.” (Luka 22:42) Onde sho kokaka mɛtɛ mbokoya Yeso ndo nkamba la lotshungɔ laso la nsɔna dia ntombola Jehowa ndo nsala lolango lande?
5 Eelo sho kokaka mbokoya Yeso, nɛ dia sho la wɔ takatongama l’efanelo ka Nzambi. (Eta. 1:26) Koko sho bu la lotshungɔ tshɛ lo tshɛ oko Jehowa. Ɔtɛkɛta wa Nzambi nembetshiyaka ɔnɛ Jehowa akadje elelo lo lotshungɔ laso ndo ɔnɛ nde nongamɛka dia sho ndjela elelo ɛsɔ. Ɛnyɛlɔ, lo nkumbo, wadi pombaka ndjakitshakitsha l’ɛse ka waomɛwɔ ndo ana pombaka nkitanyiya ambutshi awɔ. (Ɛf. 5:22; 6:1) Shɛngiya yakɔna yele la elelo ɛsɔ lo yoho yakambaso la lotshungɔ laso la nsɔna? Okadimwelo wa dimbola sɔ koka nshikikɛ kana tayonga la nshi yayaye ya pondjo.
OKAMBELO WA DIMƐNA NDO WA KƆLƆ WA LA LOTSHUNGƆ LA NSƆNA
6. Sha ɛnyɛlɔ kɛnya lande na kele ekɔ ohomba dia lotshungɔ laso monga la elelo.
6 Onde lotshungɔ lele l’elelo koka monga lotshungɔ la mɛtɛ? Eelo, lɔ koka monga! Lande na? Nɛ dia elelo kokaka tokokɛ. Ɛnyɛlɔ, sho koka nsɔna dia ndawɔ la mutuka kana mututu lo ngelo la lowango l’efula. Ko tɔshi dia ɛlɛmbɛ wendana l’ɔkɛndjɛkɛndjɛlɔ bu, ndo onto tshɛ ekɔ la lotshungɔ la ndawɔ lowango woho walangande ndo mbeta lo wedi akɔna tshɛ w’otadimbo. Onde wɛ ayeteta l’otadimbo ɔsɔ aha la mboka wɔma? Ndooko. Elelo wekɔ ohomba dia onto tshɛ ngɛnangɛna la wahɔ w’oma lo lotshungɔ la mɛtɛ. Nyɛsɔ tɔsɛdingole bɛnyɛlɔ dimɔtshi dia lo Bible diɛnya wahɔ
wakokaso nkondja oma lo elelo wakatodjɛ Jehowa.7. a) Naa otshikitanu ɔmɔtshi waki lam’asa Adama la waa nyama? b) Lembetshiya yoho mɔtshi yakakambe Adama la lotshungɔ lande la nsɔna.
7 Etena kakatonge Jehowa Adama, onto la ntondo, nde akawosha woshasha akɔ waamɛ wakandasha andjelo: woshasha wa lotshungɔ la nsɔna. Koko Nzambi kombisha waa nyama lotshungɔ la nsɔna. Ngande wakakambe Adama la lotshungɔ lande la nsɔna lo yoho ya dimɛna? Adama akakondja diɛsɛ dia mbɔlɛ waa nyama nkombo. Nzambi “akadiela le pami dia menda woho wayondodiɔlɛ nkombo.” L’ɔkɔngɔ wa Adama nsɛdingola nyama tshɛ, nde akakiɔlɛ lokombo lele la kitshimudi. Jehowa kotshikitanya kaanga lokombo ɔtɔi lakasɔnɛ Adama. Koko, “lokombo lakɔlɛka pami etongami kasɛna tshɛ mbakongaka lokombo latɔ.”—Eta. 2:19.
8. Ngande wakakambe Adama la lotshungɔ lande la nsɔna lo yoho ya kɔlɔ, ndo etombelo akɔna wakonge?
8 Jehowa akasha Adama ɔkɛndɛ wa nkadimola nkɛtɛ paradiso lo mbotɛ ɔnɛ: “Nyootane, nyofulane, nyolodia nkɛtɛ ndo nyoyiole. Nyoole nse ya lo ndjale, ditongami diafumbɔ l’olongo ndo ditongami tshɛ diele la lɔsɛnɔ diakɛndakɛnda la nkɛtɛ.” (Eta. 1:28) Koko Adama akasɔnɛ dia ndɛ olowa wakasekɛma ndo lo nsala dui sɔ, nde akatambe elelo wakawodjɛ Jehowa. Lam’ele Adama akakambe la lotshungɔ lande la nsɔna lo yoho ya kɔlɔ, anto wambodiɛnɛ l’edja k’ɛnɔnyi nunu. (Rɔmɔ 5:12) Tatohɛke etombelo wa kɔlɔ ɛsɔ w’oma lo yɛdikɔ yakɔshi Adama. Dui sɔ diayototshutshuya dia nkamba la lotshungɔ laso lo yoho ya dimɛna ndo ndjela elelo wakatodjɛ Jehowa.
9. Ɔsɔnwɛlɔ akɔna wakasha Jehowa wodja ande Isariyɛlɛ, ndo kakɔna kakawalake dia nsala?
9 Anto tshɛ wakahowɔ eongelo kele keema kokele ndo nyɔi oma le Adama la Eva. Koko tekɔ la lotshungɔ la nkamba la woshasha wa nsɔna. Sho kokaka nshikikɛ dui sɔ oma lo yoho yakasalɛka Nzambi wodja w’Isariyɛlɛ akambo. Jehowa akawatɛ dia nsɔna dia monga ɛngɔ kande ka laande kana bu. (Eto. 19:3-6) Wodja ɔsɔ wakasɔnɛ dia monga wodja waki Nzambi ndo waketawɔ dia ndjela elelo wakawadjɛ Nzambi. Vɔ wakate ɔnɛ: “Tambetawɔ nsala kɛnɛ tshɛ kakatshi Jehowa.” (Eto. 19:8) Lonyangu ko, l’ɔkɔngɔ diko wodja akɔ kondjɔlɛmiya dɔkɔlɔkɔ diakawatshike le Jehowa. Sho koka nkondja wetshelo w’ohomba efula oma lo ɛnyɛlɔ kɛsɔ. Nyɛsɔ tɔsake tena tshɛ woshasha aso wa lotshungɔ la nsɔna la nɛmɔ ndo totetemale ndjaɛkɛ le Jehowa ndo nkitanyiya ɛlɛmbɛ ande.—1 Kɔr. 10:11.
10. Bɛnyɛlɔ diakɔna diele lo Hɛbɛru tshapita 11 diashikikɛ ɔnɛ anto wele keema kokele koka nkamba la lotshungɔ lawɔ la nsɔna dia ntombola Nzambi? (Enda osato wele lo mbɔtwɛlɔ.)
10 Lo Hɛbɛru tshapita 11, sho tanaka nkombo y’apami la wamato wa kɔlamelo 16 wakasɔnɛ dia nɛmiya elelo wakadje Jehowa. Etombelo waki la dui sɔ ko, vɔ wakakondja ɛtshɔkɔ efula ndo waki la elongamelo ka dimɛna efula ka lo nshi yayaye. Ɛnyɛlɔ, Nɔa aki la mbetawɔ ka wolo ndo akasɔnɛ dia ndjela ɛlɔmbwɛlɔ kaki Nzambi ka nsala waato wa luudu dia nshimbɛ nkumbo kande ndo nɔnga ya lo nshi yayaye. (Hɛb. 11:7) Abrahama la Sara waketawɔ nkitanyiya Nzambi ndo wakatshu lo wodja wakandalake dia towasha. Kaanga mbakiwɔ la “diaaso dia nkalola” l’osomba wa Ura, vɔ wakaleke mbidja yimba lo alaka waki Nzambi wa lo nshi yayaye. Bible mbutaka dia vɔ waki lo “nyanga dihole dioleki dimɛna.” (Hɛb. 11:8, 13, 15, 16) Mɔsɛ akatone ɛngɔnyi wa l’Edjibito ko akasɔnɛ “dia pɛnyahɛnyama l’ekambi waki Nzambi lo dihole dia monga l’ɔngɛnɔngɛnɔ wa pɛkato wa tshanda mɔtshi tsho.” (Hɛb. 11:24-26) Nyɛsɔ tokoya mbetawɔ k’apami la wamato asɔ ndo tɔngɛnɛngɛnɛ woshasha aso wa lotshungɔ la nsɔna, tokambe la wɔ dia nsala lolango la Nzambi.
11. a) Naa ɔtshɔkɔ ɔmɔtshi woleki woke waya oma lo lotshungɔ la nsɔna? b) Kakɔna kakotshutshuya dia nkamba la lotshungɔ layɛ la nsɔna lo yoho ya dimɛna?
11 Koka mɛnama oko ekɔ dui dia wɔdu di’onto okina tɔsɛ tɛdikɔ, koko hatotɔngɛnangɛna la ɔtshɔkɔ ɔmɔtshi woleki woke wa monga la lotshungɔ la nsɔna. Ɔtshɔkɔ akɔna ɔsɔ? Bible mbolembetshiyaka lo Eohwelo k’Ɛlɛmbɛ 30:19, 20. (Adia.) Lo divɛsa 19, sho mbadiaka dia Nzambi akasha ase Isariyɛlɛ ɔsɔnwɛlɔ. Lo divɛsa 20, sho mɛnaka dia Jehowa akawasha diɛsɛ dia mɛnya dia vɔ wakawokaka ngandji k’efula. Sho la wɔ kokaka nsɔna dia ntɛmɔla Jehowa. Ndo nto, tekɔ la diɛsɛ dia laande dia nkamba la woshasha aso wa lotshungɔ la nsɔna dia ntombola Jehowa ndo mɛnya dia sho mbookaka ngandji k’efula!
TOKAMBAKE LA WOSHASHA AYƐ WA LOTSHUNGƆ LA NSƆNA LO YOHO YA KƆLƆ
12. Kakɔna kahatahombe pondjo nsala la woshasha aso wa lotshungɔ la nsɔna?
12 Ohɔsa dia wɛ ambosha ɔngɛnyi ayɛ ɔmɔtshi woshasha wa dimɛna efula. Ngande wayoyoyaoka naka nde ambokasha woshasha ayɛ lo daala kana ambokamba la wɔ dia salɛ onto ɔmɔtshi kɔlɔ? Wɛ ayonyanga efula. Jehowa akatosha woshasha wa lotshungɔ la nsɔna. Diakɔ diele, nde pombaka nyanga etena kɛnande anto wakamba la lotshungɔ lawɔ lo yoho ya kɔlɔ ndo kasalawɔ ɛsɔnwɛlɔ wa kɔlɔ kana kasalɛwɔ anto akina kɔlɔ. Bible kakate dia “lo nshi y’ekomelo,” anto wayonga “akanga wa lɔhɛndɛ.” (2 Tim. 3:1, 2) Ko ngande wakokaso mɛnya ɔnɛ tekɔ la lowando l’ɔtɛ wa woshasha aso w’oshinga wolo w’oma le Jehowa? Ndo ngande wakokaso mbewɔ dia nkamba la wɔ lo yoho ya kɔlɔ?
13. Naa yoho mɔtshi yakokaso mbewɔ dia nkamba la lotshungɔ laso l’Okristo lo yoho ya kɔlɔ?
13 Onto tshɛ la l’atei aso ekɔ la lotshungɔ la nsɔna angɛnyi, ɔlɔtɔ ndo ɔlɔngɔswɛlɔ wa divo la tɔkɛnyɔ. Koko, sho mbeyaka ndjokamba la lotshungɔ laso oko yɛkɛ nɛndɛ dia nsala ɛsɔnwɛlɔ wahangɛnyangɛnya Nzambi kana ndjela mbekelo y’anto wa l’andja ɔnɛ. (Adia 1 Petero 2:16.) Lo dihole dia nkamba la lotshungɔ laso oko diaaso dia nsala kɛnɛ kele kɔlɔ, sho pombaka nkamba la lɔ oko diaaso dia “[nsala] akambo tshɛ dia lotombo la Nzambi.”—1 Kɔr. 10:31; Ngal. 5:13.
14. Lande na kahombaso ndjaɛkɛ le Jehowa etena kakambaso la lotshungɔ laso la nsɔna?
Isa. 48:17) Sho pombaka ndjaɛkɛ le Jehowa ndo mbetawɔ elelo wakandadje dia sho nsala ɛsɔnwɛlɔ w’amɛna. L’okitshakitsha tshɛ sho mbetawɔka ɔnɛ “onto bu l’akoka wa ndjalɔmbɔla. Lam’akɛndakɛnda onto, nde bu la lotshungɔ la nɔmbɔla kaanga ekolo ande.” (Jɛr. 10:23) Adama ndo ase Isariyɛlɛ waki komonga la kɔlamelo wakasɔnɛ dia ntamba elelo wakadje Jehowa ndo wakayaɛkɛ le wɔ vɔamɛ. Nyɛsɔ tokondja wetshelo oma lo ɛnyɛlɔ kawɔ ka kɔlɔ. Lo dihole dia sho ndjaɛkɛ le so shoamɛ, nyɛsɔ “[to]yaɛkɛ le Jehowa la otema a[so] tshɛ.”—Tok. 3:5.
14 Jehowa akate ate: “Dimi Jehowa kele Nzambi kayɛ, Ɔnɛ latoketshaka dikambo dia wahɔ ayɛ, Ɔnɛ lakɔlɔmbɔla lo mboka kahombayɛ nkɛndakɛnda.” (TƆLƐMIYA LOTSHUNGƆ LA NSƆNA L’ANTO AKINA
15. Wetshelo akɔna wakondjaso oma lo tɔndɔ diele lo Ngalatiya 6:5?
15 Sho pombaka nto nɛmiya lotshungɔ lele l’anto akina la mbɔsa tɛdikɔ tawɔ ta lo lɔsɛnɔ. Lande na? Lam’ele sho tshɛ tekɔ la woshasha wa lotshungɔ la nsɔna, tena tshɛ Akristo ahende hawotokoka mbɔsa tɛdikɔ takɔ taamɛ. Dui sɔ mendanaka ndo la tɛdikɔ tendana la dionga diaso ndo ɔtɛmwɛlɔ. Tatohɛke tɔndɔ diele lo Ngalatiya 6:5. (Adia.) Naka sho mbeya dia Okristo tshɛ ekɔ la ɔkɛndɛ wa mbɔsa tɛdikɔ tande hita, kete tayɔlɛmiya lotshungo lele l’anto akina la nkamba la lotshungɔ lawɔ la nsɔna.
Sho kokaka mbɔsa tɛdikɔ taso shoamɛ aha la ntshutshuya anto akina dia vɔ mbɔsa tɛdikɔ takɔ taamɛ (Enda odingɔ 15)
16, 17. a) Ngande wakayala lotshungɔ la nsɔna tshondo y’okakatanu la Kɔrɛtɔ? b) Ngande wakakimanyiya Pɔɔlɔ Akristo asɔ, ndo wetshelo akɔna wakokaso nkondja oma lo dui sɔ?
16 Nyɛsɔ tɔsɛdingole ɛnyɛlɔ kɛmɔtshi kele lo Bible kɛnya lande na kahombaso nɛmiya lotshungɔ la nsɔna lele l’anangɛso. Akristo wa l’etshumanelo ka la Kɔrɛtɔ wakawane lo dikambo dia olelo wa nyama yakawalambola dikishi, koko yakayosondjama lo lomingu lasondjawɔ nyama. Nkum’otema k’Akristo amɔtshi kakaatshutshuya dia ndɛ nyama shɔ, nɛ dia vɔ wakeyaka ɔnɛ ekishi ekɔ ɛngɔ k’anyanya. Koko, akina wakatɛmɔlaka dikishi sɔ ntondo wakɔsaka dia ndɛ nyama shɔ ayonga oko nsala tshelo y’ɔtɛmwɛlɔ. (1 Kɔr. 8:4, 7) Ɔsɔ aki okakatanu wa wolo wakakoke mbidja diatɔnelo lo etshumanelo. Ngande wakakimanyiya Pɔɔlɔ Akristo asɔ dia nkandola okakatanu wa wolo ɔsɔ?
17 Ntondotondo, Pɔɔlɔ akohola elui akɔ ehende ɔnɛ aha mbo ya ndɛ mbayokeketsha diɔtɔnganelo diasawɔ la Nzambi. (1 Kɔr. 8:8) Oma laasɔ, Pɔɔlɔ akaahɛmɔla ɔnɛ tanyetawɔke dia “lotshungɔ lele la nyu la nsɔna” ntakanya nkum’otema ka wanɛ wele wɔdu. (1 Kɔr. 8:9) L’ɔkɔngɔ diko, nde akayotɛ wanɛ waki konangaka ndɛ nyama yakɔ diaha nombosha wanɛ wakasɔnɛ dia ndjilɛ. (1 Kɔr. 10:25, 29, 30) Ɔkɔnɛ lo kɛnɛ kendana la akambo w’ohomba wakendanaka la ɔtɛmwɛlɔ, Okristo tshɛ akahombaka mbɔsa yɛdikɔ ndamɛ. Shi sho la wɔ pombaka nɛmiya lotshungɔ lele l’anangɛso la mbɔsa tɛdikɔ tawɔ hita oyadi l’akambo wa totshitshɛ?—1 Kɔr. 10:32, 33.
18. Ngande wakokayɛ mɛnya ɔnɛ wɛ mbɔsaka woshasha wa lotshungɔ la nsɔna la nɛmɔ?
18 Jehowa akatosha woshasha wa lotshungɔ la nsɔna ndo lɔ toshaka lotshungɔ la mɛtɛ. (2 Kɔr. 3:17) Tɔshi woshasha ɔsɔ la nɛmɔ nɛ dia vɔ tokimanyiyaka dia mbɔsa tɛdikɔ tɛnya dia sho mbokaka Jehowa ngandji k’efula. Ɔnkɔnɛ, nyɛsɔ totetemale nsala ɛsɔnwɛlɔ wawotombola ndo tɔlɛmiya lotshungɔ lele l’anto akina la nsɔna yoho yakokawɔ nkamba la woshasha w’oshinga wolo ɔsɔ.