1. Jehowa akatonge anto la akoka akɔna wa laande?

JEHOWA akatonge anto l’akoka wa laande. Nde akatosha dikoka di’ekanelo ka yimba, diatokimanyiya dia nkandola ekakatanu ndo nkongɛ awui wa lo nshi yayaye. (Tok. 2:11) Nde akatosha wolo, dia sho salaka kɛnɛ kakongɛso ndo nkotsha eyango aso. (Flpɛ. 2:13) Nde akatosha nto nkum’otema, mbuta ate dikoka dia ntshikitanya ɔlɔlɔ la kɔlɔ dieso la diɔ l’etei k’otema. Nkum’otema kaso tokimanyiyaka dia mbewɔ nsala pɛkato ndo ntshika wandja aso.—Rɔmɔ 2:15.

2. Ngande walongamɛ Jehowa dia sho nkamba l’akoka aso?

² Jehowa nongamɛka dia sho nkamba l’akoka aso lo yoho ya dimɛna. Lande na? Nɛ dia nde tokaka ngandji ndo nde mbeyaka dia tayonga l’ɔngɛnɔngɛnɔ naka sho nkamba la weshasha wakandatosha. Ɛnyɛlɔ, lo Afundelo wa lo Hɛbɛru, sho mbadiaka ɔnɛ: “Asangwelo wa kanga etete konyaka mɛtɛ lo otondoyelo,” ndo “kɛnɛ tshɛ kɛna lonya layɛ dia nsala, salatɔ la wolo ayɛ tshɛ.”  (Tok. 21:5; Ond. 9:10) Lo Afundelo wa lo Grɛkɛ, sho mbadiaka ɔnɛ: “Lam’ekeso la diaaso, nyɛsɔ tosalɛke anto tshɛ ɔlɔlɔ,” ndo “lo yɛdikɔ yakalongola onto l’onto losha, nyokambe la lɔ dia kimanyiyana.” (Ngal. 6:10; 1 Pet. 4:10) Mbokɛmaka hwe dia, Jehowa nangaka dia sho nsala kɛnɛ tshɛ kakokaso nsala dia ndjakondjɛ wahɔ ndo kondjɛ anto akina wahɔ.

3. Elelo akɔna wele l’anto?

³ Jehowa nangaka dia sho nkamba la akoka aso, koko nde mbeyaka dia tekɔ l’elelo. Ɛnyɛlɔ, hatokoke minya eongelo kele bu kokele, pɛkato ndo nyɔi. (1 Ku. 8:46) Ndo nto, hatokoke mbahemɛ anto akina, nɛ dia onto tshɛ ekɔ la lotshungo la nsala ɛsɔnwɛlɔ ande hita. Ndo oyadi ewo ndo diewo dia ngande diele la so, hatɛdimaki la Jehowa pondjo.—Isa. 55:9.

4. Kakɔna kayotɔsɛdingola lo sawo nɛ?

⁴ Tena tshɛ sho pombaka mbetawɔ dia Jehowa tɔlɔmbɔla, monga l’eshikikelo dia nde ayotosukɛ ndo tosalɛ kɛnɛ kahatakoke shoamɛ nsala. Koko, Jehowa nangaka nto dia sho nkana yimba lo kɛnɛ kakokaso nsala dia nkandola ekakatanu ndo nkimanyiya anto akina. (Adia Osambo 37:3.) Sho pombaka “[ndj]aɛkɛ le Jehowa ndo sala kɛnɛ kele ɔlɔlɔ.” Sho pombaka “sala akambo la kɔlamelo.” Ngande wakokaso nsala dui sɔ? Tayɔsɛdingola ɛnyɛlɔ ka Nɔa, Davidɛ ndo ekambi wa Nzambi ekina wa kɔlamelo wakayaɛkɛ le Jehowa. Tayɛna dia aki awui amɔtshi wakiwɔ kokoka nsala, koko vɔ wakasɔnɛ dia ndjasha tshɛ lo awui wakawakoke nsala.

5. Lembetshiya okakatanu waki la Nɔa.

⁵ Nɔa akasɛnaka l’andja “[w]akalole la akambo wa ngala” ndo awui wa mindo. (Eta. 6:4, 9-13) Kaanga mbakandeyaka dia Jehowa akahombe ndjolanya andja wa kɔlɔ ɔsɔ, Nɔa akakoke momala l’ɔtɛ wa kɛnɛ kakasalaka anto asɔ. Lo dui sɔ, Nɔa akashihodia ɔnɛ aki awui amɔtshi wakinde kokoka nsala, koko nde akashihodia nto ɔnɛ aki awui akina wakandakoke nsala.

6, 7. a) Kakɔna kaki Nɔa kokoka nsala? b) Ngande wele andja wasɛnaso fɔnaka la wa lo nshi ya Nɔa?

⁶ Kɛnɛ kaki Nɔa kokoka nsala: La kɔlamelo tshɛ, Nɔa akasambishaka losango la Jehowa l’ɔhɛmwɛlɔ, koko nde kokoka ntshutshuya anto dia lietawɔ. Ndo nde kokoka nsala dia Mvula k’elola ndɔ esadi. Nɔa akahombe monga l’eshikikelo ɔnɛ Jehowa ayokotsha daka  diande dia komiya awui wa kɔlɔ, lo mbetawɔ ɔnɛ Nzambi akahombe nsala dui sɔ paka l’etena kahombama.—Eta. 6:17.

⁷ Sho la wɔ tekɔ lo nsɛna l’andja woludi la awui wa kɔlɔ, weyaso dia Jehowa akalake dia mbolanya. (1 Jn. 2:17) Etena kaakatakonge dui sɔ, hatokoke ntshutshuya anto dia mbetawɔ “lokumu l’ɔlɔlɔ . . . la Diolelo.” Ndo ndooko dui diakokaso nsala dia “mfɔnu ka woke” ntatɛ esadi. (Mat. 24:14, 21) L’ɛnyɛlɔ ka Nɔa, sho pombaka monga la mbetawɔ ka wolo, monga l’eshikikelo ɔnɛ keema edja Nzambi ayokomiya awui wa kɔlɔ tshɛ. (Os. 37:10, 11) Tekɔ l’eshikikelo dia Jehowa hatetawɔ dia andja wa kɔlɔ ɔnɛ ntetemala monga kaanga lushi ɔtɔi laadiko di’etena kakashikikɛma.—Hab. 2:3.

8. Lo awui akɔna wakayasha Nɔa? (Enda osato wele lo mbɔtwɛlɔ.)

⁸ Kɛnɛ kakakoke Nɔa nsala: Lo dihole dia mpekɔ l’ɔtɛ wa kɛnɛ kakinde kokoka nsala, Nɔa akayasha tshɛ lo kɛnɛ kakandakoke nsala. La kɔlamelo tshɛ, Nɔa akasambishaka losango la Jehowa l’ɔhɛmwɛlɔ. (2 Pet. 2:5) Olimu ɔsɔ akahombe mbokimanyiya dia ntetemala nkeketsha mbetawɔ kande. Laadiko dia nsambisha, nde akayele ɛlɔmbwɛlɔ ka Jehowa ka nsala waato.—Adia Hɛbɛru 11:7.

9. Ngande wakokaso mbokoya ɛnyɛlɔ ka Nɔa?

⁹ L’ɛnyɛlɔ ka Nɔa, tekɔ l’akambo efula wa nsala “l’olimu wa Nkumadiɔndjɔ.” (1 Kɔr. 15:58) Ɛnyɛlɔ, sho koka mbisha lonya lo wokelo ndo ɔlɔngɔswɛlɔ wa Mbalasa ya Diolelo ndo Mbalasa ya nsanganya ya weke, ndjakimɔ la lolango dia nkamba lo nsanganya ya weke, lo Bɛtɛlɛ kana lo Biro k’okadimwelo. Kɛnɛ koleki ohomba ele, ndjasha efula l’olimu w’esambishelo, olimu wakeketsha elongamelo kaso kendana la nshi yayaye. Kadiyɛso kɛmɔtshi kele la kɔlamelo akate ɔnɛ etena katɛnde anto akina ɛtshɔkɔ wayela Diolelo diaki Nzambi, nde shihodiaka ɔnɛ anto bu kaanga l’elongamelo ɔtɔi ndo ɔnɛ vɔ mɛnaka dia ekakatanu awɔ hawoshilaki. Oko wakadite kadiyɛso kɛsɔ, sho tekɔ l’elongamelo ndo tɔ ndekaka monga wolo etena katɛso anto akina akambo wendana la tɔ. Elongamelo kɛsɔ tokimanyiyaka dia ntetemala ndawɔ lowango l’otsha lo lɔsɛnɔ!—1 Kɔr. 9:24.

10. Kɔndɔla kɛnɛ kakasale Davidɛ.

¹⁰ Nkumekanga Davidɛ aki pami kaki la kɔlamelo, ndo Jehowa akawolangaka efula.  (Ets. 13:22) Kaanga mbakidiɔ ngasɔ, Davidɛ akeyana la Batɛ-Shɛba, ɔsɔ aki pɛkato ka woke efula. Koko kɛnɛ kakaleke tshɛ kɔlɔ ele, nde akahembe mbishɛ pɛkatɔ kande lo nkongɛ dia Uriya omi aki Batɛ-Shɛba todiakema lo ta. Davidɛ akakome polo lo ntoma Uriya dia tokimɔ mukanda wakɛnyaka woho wakandahombe todiakema! (2 Sa. 11:1-21) L’ekomelo, pɛkato yaki Davidɛ yakayeyama. (Makɔ 4:22) Etena kakeyama dui sɔ, kakɔna kakasale Davidɛ?

11, 12. a) Kakɔna kaki Davidɛ kokoka nsala l’ɔkɔngɔ wa nde nsala pɛkato? b) Kakɔna kayotosalɛ Jehowa naka sho ndjatshumoya?

¹¹ Kɛnɛ kaki Davidɛ kokoka nsala: Davidɛ kokoka ntshikitanya kɛnɛ kakandasale. Koko, nde akahombe diɛnɛ la etombelo ɛmɔtshi w’oma lo pɛkato kande lo lɔsɛnɔ lande. (2 Sa. 12:10-12, 14) Diakɔ diele nde akahombe monga la mbetawɔ. Nde akahombe monga l’eshikikelo ɔnɛ naka nde ndjatshumoya l’otema ɔtɔi, Jehowa akakoke mbodimanyiya ndo mbokimanyiya dia mbikikɛ etombelo w’oma l’etsha ande.

¹² Lam’ele tekɔ anto wele keema kokele, sho tshɛ salaka pɛkato. Koko pɛkato mɔtshi yekɔ weke ndeka nkina ndo lo waaso amɔtshi mbeyaka monga ko hatokoke ntshikitanya pɛkato yaso. Sho la wɔ koka diɛnɛ la etombelo w’oma l’etsha aso. (Ngal. 6:7) Koko tekɔ lo ndjaɛkɛ lo daka diaki Nzambi diata ɔnɛ naka sho ndjatshumoya, nde ayotosukɛ lo tena di’ekakatanu, oyadi kaanga ekakatanu ɛsɔ ndja oma lo munga yaso hita.—Adia Isaya 1:18, 19; Etsha 3:19.

13. Ngande wakalɔngɔsɔla Davidɛ diɔtɔnganelo diande la Jehowa?

¹³ Kɛnɛ kakakoke Davidɛ nsala: Davidɛ akalange nɔngɔsɔla diɔtɔnganelo diande la Jehowa. Ngande wakandasale dui sɔ? Davidɛ aketawɔ dia Jehowa mbokimanyiya. Ɛnyɛlɔ, nde aketawɔ engwelo kakawosha Natana omvutshi wa Jehowa. (2 Sa. 12:13) Ndo nto, Davidɛ akalɔmbɛ Jehowa, akashola pɛkato yande, ndo akɛnya dia nde akalangaka mɛtɛ nyometawɔma oma le Jehowa. (Os. 51:1-17) Lo dihole dia ndeka ndjakiyanya l’ɔtɛ w’onongo ande, Davidɛ akakondja wetshelo oma lo pɛkato yande. Nde kosala pɛkato ya weke shɔ nto pondjo. Ɛnɔnyi efula l’ɔkɔngɔ wa laasɔ, nde akavu oko pami ka kɔlamelo ndo ngasɔ mbawohɔ Jehowa.—Hɛb. 11:32-34.

14. Wetshelo akɔna wakokaso nkondja oma l’ɛnyɛlɔ ka Davidɛ?

¹⁴ Wetshelo akɔna wakokaso nkondja oma l’ɛnyɛlɔ ka Davidɛ? Naka tambosala pɛkato ka woke, sho pombaka ndjatshumoya l’otema ɔtɔi, mbishola pɛkato kaso le Jehowa ndo mbɔlɔmba edimanyielo. (1 Jn. 1:9) Sho pombaka nto mbutɛ dikumanyi, nɛ dia vɔ koka tokimanyiya dia nɔngɔsɔla diɔtɔnganelo diaso la Jehowa. (Adia Jakɔba 5:14-16.) Etena ketawɔso ekimanyielo ka Jehowa, sho mɛnyaka dia tekɔ lo ndjaɛkɛ lo daka diande dia todimanyiya. Laadiko dia laasɔ, sho pombaka nkondja wetshelo oma lo pɛkato yaso ndo ntetemala kambɛ Jehowa l’eshikikelo.—Hɛb. 12:12, 13.

15. Wetshelo akɔna wakondjaso oma l’ɛnyɛlɔ ka Hana?

¹⁵ Ondo wɛ koka nkana yimba lo dikambo dia ekambi wa kɔlamelo ekina wɔtɛkɛtami lo Bible wakayaɛkɛ le Jehowa ndo wakasalaka kɛnɛ kakawakoke nsala lo tena di’ekakatanu. Ɛnyɛlɔ, aki etena kɛmɔtshi kele Hana kokoka mbota. Nde kokoka ntshikitanya okakatanu ande. Koko nde aki l’eshikikelo ɔnɛ Jehowa ayowosamba. Nde akatetemala ntɛmɔla lo tabɛrnaklɛ ndo nɔmba Jehowa, lo mbotɛ woho wakandayaokaka. (1 Sa. 1:9-11) Ande ɛnyɛlɔ k’ɔlɔlɔ kakandatotshikɛ lee! Etena keso l’ekakatanu wendana la yoonge kana ekakatanu ekina wahatakoke ntshikitanya, sho pombaka  nkitsha okiyanu aso le Jehowa ndo monga l’eshikikelo dia nde ayotokokɛ. (1 Pet. 5:6, 7) Ndo sho pombaka nsala kɛnɛ kakokaso nsala dia nkondja wahɔ oma lo nsanganya y’Akristo ndo dikongelo dikina dialɔngɔsɔla okongamelo wa Jehowa.—Hɛb. 10:24, 25.

16. Wetshelo akɔna wakoka ambutshi nkondja oma le Samuɛlɛ?

¹⁶ Kayotota lo dikambo di’ambutshi wele la kɔlamelo wele anawɔ hawoyokambɛ Jehowa? Omvutshi Samuɛlɛ kokoka ntshutshuya anande w’apami w’epalanga dia ntetemala monga la kɔlamelo le Nzambi. (1 Sa. 8:1-3) Nde akahombe ntshika dui sɔ l’anya wa Jehowa. Koko, Samuɛlɛ akasale kɛnɛ kakandakoke nsala dia ntetemala monga la kɔlamelo le Nzambi ndo ngɛnyangɛnya She ka l’olongo. (Tok. 27:11) Ɛlɔ kɛnɛ, ambutshi w’Akristo efula wekɔ l’okakatanu akɔ waamɛ. Vɔ wekɔ l’elongamelo ɔnɛ l’ɛnyɛlɔ ka ombutshi wa pami wɔtɛkɛtami lo wɛɛla wa Yeso wendana la ɔna la lotshito, mbala tshɛ Jehowa ekɔ suke dia nongola atshi wa pɛkato wayatshumoya. (Luka 15:20) Etena kakongawɔ dui sɔ, ambutshi koka ndjasha tshɛ dia ntetemala monga la kɔlamelo le Jehowa, wele l’elongamelo ɔnɛ ɛnyɛlɔ kawɔ ayotshutshuya anawɔ dia nkalola le nde.

17. Lande na kele ɛnyɛlɔ ka wadi aki odo laki kanga wola tokeketshaka?

¹⁷ Ɛnyɛlɔ kekina k’ɔlɔlɔ ele ka womoto la wadi aki odo laki kanga wola lo nshi ya Yeso. (Adia Luka 21:1-4.) Nde kokoka nsala ndooko dui lo kɛnɛ kendana la awui wa kɔlɔ wakasalemaka lo tɛmpɛlɔ ndo nde kokoka ntshikitanya woho wakinde kanga wola. (Mat. 21:12, 13) Koko woho wakandayaɛkɛka le Jehowa, akootshutshuya dia nsukɛ ɔtɛmwɛlɔ wa mɛtɛ. Nde aki la lokaho ndo akakimɔ “ekenga 2 wa totshitshɛ wa falanga,” ɔsɔ mbaki falanga tshɛ yaki la nde. Womoto laki la kɔlamelo ɔsɔ akɛnya dia nde akayaɛkɛka tshɛ lo tshɛ le Jehowa. Nde akeyaka ɔnɛ naka nde mbetsha olimu wa Jehowa lo dihole dia ntondo, Jehowa ayoyashikikɛ dia nde ekɔ la kɛnɛ kele la nde ohomba. Woho akɔ waamɛ mbele, tekɔ l’eshikikelo ɔnɛ naka sho mbetsha Diolelo diaki Nzambi lo dihole dia ntondo, Jehowa ayoyashikikɛ dia sho tekɔ la kɛnɛ kele la so ohomba.—Mat. 6:33.

18. Sha ɛnyɛlɔ ka ɔnangɛso ɔmɔtshi laki la ekanelo ka dimɛna.

¹⁸ Ɛlɔ kɛnɛ anangɛso l’akadiyɛso efula ndjaɛkɛka ngasɔ le Jehowa lo ndjasha tshɛ lo kɛnɛ kakokawɔ nsala lo dihole dia ndjasha lo kɛnɛ kahawakoke nsala. Tɔshi ɛnyɛlɔ ka ɔnangɛso lelɛwɔ Malcolm, lakatshikala la kɔlamelo polo lo nyɔi kande lo 2015. L’edja k’ɛnɔnyi efula wakawakambɛ Jehowa nde la wadɛnde, vɔ waki la tena di’ɔngɛnɔngɛnɔ ndo tena dia paa. Nde akate ate: “Lɔsɛnɔ l’onto koka ntshikitana, ndooko onto leya woho wayonga lɔsɛnɔ lande la lo nshi yayaye ndo lɔ koka ndjokoma edika w’edika. Jehowa tshɔkɔlaka wanɛ wayaɛkɛ le nde.” Alako akɔna wakasha Malcolm? “Nɔmbaka Jehowa dia nde tokimanyiya dia sho tɔsha elowa lo mongaka l’ohetoheto l’olimu ande. Mbika washo lo kɛnɛ kasalaso, koko aha lo kɛnɛ keso bu l’akoka wa nsala.” *—Enda nɔtɛ ka l’ɛse ka dikatshi.

19. a) Lande na kele divɛsa diaso dia l’ɔnɔnyi 2017 diakasɔnama dimɛna? b) Ngande wayoyokamba la divɛsa dia l’ɔnɔnyi 2017 lo lɔsɛnɔ layɛ?

¹⁹ Andja wa kɔlɔ ɔnɛ wekɔ lo taleke “mpama lo kɔlɔ,” diakɔ diele sho koka nongamɛ dia tayonyomoleka monga l’ekakatanu. (2 Tim. 3:1, 13) Etena kɛnɛ mbamboleka monga ohomba diaha sho ndeka ndjakiyanya l’ɔtɛ w’ekakatanu aso. Koko, sho pombaka ndjaɛkɛ tshɛ le Jehowa ndo ndjasha lo kɛnɛ kakokaso nsala. Diakɔ diele divɛsa diaso nɛ dia l’ɔnɔnyi 2017 diakasɔnama dimɛna: “Yaɛkɛ le Jehowa ndo sala kɛnɛ kele ɔlɔlɔ”!—Os. 37:3.