SAWO DIA WEKELO 3
OSAMBO 35 ‘Toshikikɛ akambo woleki ohomba’
Ɔsa tɛdikɔ tangɛnyangɛnya Jehowa
“Wɔma wa Jehowa kele etatelo ka lomba, ndo mbeya Ɔnɛ loleki Ekila mbele yimba.”—TOK. 9:10.
KƐNƐ KAYOTEKA
Woho wa nkamba la ewo, eokelo ndo shɛnɔdi dia mbɔsa tɛdikɔ ta lomba.
1. Okakatanu akɔna wele la so sho tshɛ?
LUSHI tshɛ sho mbɔsaka tɛdikɔ. Tɔmɔtshi mongaka wɔdu mbɔsa, ɛnyɛlɔ, tɛdikɔ tendana la kɛnɛ ka ndɛ kana etena ka ndala. Tɛdikɔ tokina mongaka wolo mbɔsa. Tɔ koka monga la shɛngiya lo yoonge yaso, ɔngɛnɔngɛnɔ aso ndo otsha le wakiso wa ngandji kana l’ɔtɛmwɛlɔ aso. Sho nangaka dia tɛdikɔ taso monga l’etombelo w’amɛna le so ndo le nkumbo kaso. Kɛnɛ koleki ohomba ele, sho nongamɛka dia tɛdikɔ taso tayɔngɛnyangɛnya Jehowa.—Rɔmɔ 12:1, 2.
2. Wanya akɔna wakokayɛ ntakola dia mbɔsa tɛdikɔ ta lomba?
2 Wɛ koka mbɔsa yɛdikɔ ya lomba naka wɛ 1) mbeya akambo akɔ dimɛna, 2) mbeya kanyi ya Jehowa lo dikambo diakɔ ndo 3) mbeya etombelo wayonga l’ɛsɔnwɛlɔ ayɛ. Lo sawo nɛ, tayɔsɛdingola wanya asato wakoka tokimanyiya dia ndowanya wolo aso wa shɛnɔdi.—Tok. 2:11.
EYA AKAMBO AKƆ DIMƐNA
3. Sha ɛnyɛlɔ kɛnya lande na kele ekɔ ohomba mbeya akambo akɔ dimɛna la ntondo ka mbɔsa yɛdikɔ mɔtshi.
3 Nna dia ntondo diakoka kokimanyiya dia mbɔsa yɛdikɔ ya dimɛna ele, mbeya akambo akɔ dimɛna. Lande na kele dui sɔ ohomba? Tɔshi dia ɔkɔnyi ɔmɔtshi ambotshɔ tɛnana la dɔkɔtɛlɛ dia mbɔkɔndɔlɛ hemɔ kele la nde ka wolo. Onde dɔkɔtɛlɛ ayɔsa yɛdikɔ ya mbosakɛ mbala kakɔ ɔtɔi aha la tawosadi ɛgzamɛ kana mbooka ambola? Ndooko mɛtɛ. Ndo wɛ lawɔ ayɔsa tɛdikɔ ta lomba naka wɛ nsɛdingola ntondo etombelo wayonga la dui sɔ le yɛ. Ngande wakokayɛ nsala dui sɔ?
4. Lo ndjela woho wɔtɔnɛ la Tokedi 18:13, ngande wakokayɛ ndjashikikɛ ɔnɛ wɛ mbeyaka akambo akɔ dimɛna? (Enda ndo osato.)
4 Wɛ kokaka mbeya akambo akɔ dimɛna lo mbokaka ambola. Ohɔsa dia wambokelɛ lo fɛtɛ kɛmɔtshi. Onde wɛ ayotshɔ? Naka wɛ heye onto layonga ɔnɔmbɔdi kana woho wokongɛmi fɛtɛ kakɔ, kete wɛ ayonga l’ohomba wa mbombola ambola wele oko wanɛ: “Lende ndo etena kakɔna kayosalema fɛtɛ kakɔ? Anto angana wayonga lɛkɔ? Ayonga ɔnɔmbɔdi wa fɛtɛ kakɔ? Waa na wayoya lo fɛtɛ kakɔ? Ngande wokongɛmi fɛtɛ kakɔ? Onde wanu wayoshama lɛkɔ?” Ekadimwelo lo ambola asɔ wayokokimanyiya dia mbɔsa tɛdikɔ ta lomba.—Adia Tokedi 18:13.
Eya awui efula lo mboka ambola (Enda odingɔ 4) a
5. Kakɔna kayoyosala l’ɔkɔngɔ wa wɛ mbeya akambo akɔ?
5 Dui dikina diakokayɛ nsala ele, nsɛdingola la yambalo tshɛ dikambo diakɔ lo tshɛ kadiɔ. Ɛnyɛlɔ, kakɔna kayoyosala naka wɛ ambeya di’anto wayonga lo fɛtɛ kakɔ hawɔlɛmiya atɔndɔ wa lo Bible kana wanu wayoshama aha la wɛdimu? Onde wɛ fɔnyaka dia fɛtɛ kɛsɔ kayonga dimɛna wɛ ntshɔ lɛkɔ? (1 Pe. 4:3) Lo wedi okina, kakɔna kayoyosala naka fɛtɛ kakɔ kayokoshimba dia wɛ ntshɔ lo losanganya kana l’olimu w’esambishelo? Etena kayoyɛna akambo lo tshɛ kawɔ, wɛ ayonga l’akoka wa mbɔsa yɛdikɔ ya dimɛna. Koko ekɔ nna dikina diakokayɛ ntakola. Wɛ ambeya woho wɛnayɛ dikambo diakɔ; ko ngande wadiɛna Jehowa?—Tok. 2:6.
EYA KANYI YA JEHOWA LO DIKAMBO DIAKƆ
6. Lo ndjela Jakɔba 1:5, lande na kahombaso nɔmbaka Jehowa dia tokimanyiya?
6 Lɔmba Jehowa dia kokimanyiya dia wɛ nshihodia kanyi yande. Jehowa ndakaka dia tosha lomba dia nsɛdingola dia kana yɛdikɔ mɔtshi yayowɔngɛnyangɛnya. “La lokaho tshɛ nde mbishaka anto tshɛ [lomba] aha la mbahangwɛ.”—Adia Jakɔba 1:5.
7. Ngande wakokayɛ mbeya woho wakanyiya Jehowa? Sha ɛnyɛlɔ.
7 L’ɔkɔngɔ wa nɔmba Jehowa ɛlɔmbwɛlɔ, onga la yambalo dia mɛna okadimwelo ande. Tɔshi ɛnyɛlɔ kɛnɛ: Naka wɛ ekɔ lo tande lɔkɛndɔ ko wɛ ambonganɛ, wɛ mbeyaka nyanga onto ɔmɔtshi la lo dihole diakɔ dia kokimanyiya. Onde wɛ ayotahongomɔka tsho aha la nkonga ekadimwelo ande? Aha ngasɔ. Wɛ ayohomba mpokamɛ la yambalo tshɛ ɛlɔmbwɛlɔ kande. Woho akɔ waamɛ mbele, l’ɔkɔngɔ wa wɛ nɔmba Jehowa lomba, salaka la wolo dia nshihodia ekadimwelo ande lo mbekaka atɔndɔ la wadjango ande watanema lo Bible ndo woho wa nkamba la wɔ lo dikambo diele la yɛ. Ɛnyɛlɔ, etena kɔsayɛ yɛdikɔ dia kana wɛ kokaka ntshɔ lo fɛtɛ kakatatɛkɛtshi la ntondo, wɛ koka nsɛdingola kɛnɛ kata Bible lo dikambo dia fɛtɛ, lɔngɛnyi la kɔlɔ ndo ohomba wa mbetsha wahɔ wa Diolelo lo dihole dia ntondo lo dihole dia wahɔ ayɛ.—Mat. 6:33; Rɔmɔ 13:13; 1 Kɔr. 15:33.
8. Kakɔna kakokayɛ nsala naka wɛ nangaka mbeya akambo amɔtshi? (Enda ndo osato.)
8 Koko lo tena dimɔtshi, wɛ koka monga l’ohomba w’ekimanyielo dia mbeya dui dimɔtshi. Wɛ koka nsala dui sɔ lo nyanga alako oma le ɔnangɛso kana kadiyɛso kɛmɔtshi kambohokɔ akambo. Koko, wɛ koka nkondja wahɔ nto lo nsala eyangelo. Wɛ koka ntana ekimanyielo oma lo dihomɔ diaso dia wekelo, ɛnyɛlɔ oma lo Dibuku di’eyangelo di’Ɛmɛnyi wa Jehowa ndo oma lo dibuku Avɛsa wendana la Lɔsɛnɔ l’Okristo. Eya dia oyango ayɛ ele: Mbɔsa yɛdikɔ yayɔngɛnyangɛnya Jehowa.
Eya kanyi ya Jehowa lo dikambo diakɔ (Enda odingɔ 8) b
9. Ngande wakokaso ndjashikikɛ dia yɛdikɔ yaso yayɔngɛnyangɛnya Jehowa? (Ɛfɛsɔ 5:17)
9 Ngande wakokaso ndjashikikɛ dia yɛdikɔ yaso yayɔngɛnyangɛnya Jehowa? Ntondotondo, sho pombaka mbeeya dimɛna. Bible mbutaka ɔnɛ: “Mbeya Ɔnɛ loleki Ekila mbele yimba.” (Tok. 9:10) Lo mɛtɛ, eokelo ka mɛtɛ ndjaaka oma lo mbeya waonga wa Jehowa, sangwelo diande ndo kɛnɛ kalangande kana kahetshande. Yambola wate: ‘Lo menda kɛnɛ keyami lo dikambo dia Jehowa, yɛdikɔ yakɔna yakokami mbɔsa yayowɔngɛnyangɛnya?’—Adia Ɛfɛsɔ 5:17.
10. Lande na kele atɔndɔ wa lo Bible ndeka mbekelo y’ashidi kana awui wa lo ngelo ohomba?
10 L’oyango wa ngɛnyangɛnya Jehowa, sho pombaka lo ntena dimɔtshi nsala dui diayonyangiya angɛnyi aso. Ɛnyɛlɔ, ambutshi amɔtshi mbeyaka ntshutshuya ɔnawɔ la womoto laya opalanga dia ntshukana la pami kele la falanga, mbuta ate ɔnɛ lakoka mbaala okundji w’efula, oyadi nde bu la lonyuma la dimɛna. Lo mɛtɛ, ambutshi nangaka di’ɔnawɔ monga la lɔsɛnɔ la dimɛna, koko ɔnakɔ koka ndjambola ate: “Onde pami kɛnɛ ayokimanyiya dia dimi monga la diɔtɔnganelo dia dimɛna la Jehowa?” Naa kanyi ya Jehowa lo dikambo sɔ? Sho tanaka ekadimwelo lo Mateo 6:33. Lɔkɔ, Akristo keketshamaka dia ntetemala “nyanga ntondo Diolelo.” Kaanga mbashaso ambutshi aso kɛnɛmɔ ndo mbalɛmiyaso anto wa lo tshunda diaso, kɛnɛ koleki ohomba le so ele ngɛnyangɛnya Jehowa.
EYA ETOMBELO WAYONGA L’ƐSƆNWƐLƆ AYƐ
11. Dionga diakɔna diɔtɛkɛtami lo Filipɛ 1:9, 10 diayokokimanyiya dia nsala ɛsɔnwɛlɔ w’amɛna?
11 L’ɔkɔngɔ wa wɛ nkana yimba lo atɔndɔ wa lo Bible, kana yimba dimɛna lo ɛsɔnwɛlɔ ayɛ. (Adia Filipɛ 1:9, 10.) Shɛnɔdi ayokokimanyiya dia nshihodia etombelo wayonga l’ɛsɔnwɛlɔ wayoyosala. Tena dimɔtshi, mbeyaka monga wɔdu mbɔsa yɛdikɔ. Koko, aha tɛdikɔ tshɛ mbatongaka wɔdu mbɔsa. Shɛnɔdi ayokokimanyiya dia mbɔsa tɛdikɔ ta lomba kaanga l’akambo wa wolo.
12-13. Ngande wakoka shɛnɔdi tokimanyiya dia mbɔsa yɛdikɔ ya lomba lo kɛnɛ kendana l’ɔsɔnwɛlɔ w’olimu?
12 Tokanyiya dikambo nɛ. Wɛ ekɔ lo nyanga olimu wayokoka kokimanyiya dia nkotsha ehomba w’ase nkumbo kayɛ. Ko wɛ ambotana ahole ahende wa nkamba olimu. Wɛ ambɔsɛdingola awui tshɛ wendana l’elimu akɔ, ɛnyɛlɔ, ekongelo, wenya wayoyetshaka l’olimu ndo akambo akina. Ko l’elimu akɔ ehende, ndooko walɔshana l’atɔndɔ wa lo Bible. Wɛ mbeyaka nsɔna olimu ɔmɔtshi nɛ dia vɔ wekɔ la difuto di’efula. Koko, ekɔ akambo akina wahombayɛ nsɛdingola la ntondo ka wɛ mbɔsa yɛdikɔ.
13 Ɛnyɛlɔ, onde wɛ koka mbetawɔ nkamba olimu wakoka koshimba dia mbɔtɔka lo nsanganya ya l’etshumanelo? Onde wɛ ayokoka nkamba olimu wakoka koshimba dia wɛ kotshaka ehomba wa longandji ndo wa lo nyuma w’ase nkumbo kayɛ? Ndjaoka ambola wa ngasɔ ayokokimanyiya dia mbidja “akambo woleki ohomba,” mbuta ate ɔtɛmwɛlɔ ayɛ ndo ehomba w’ase nkumbo kayɛ lo dihole dia ntondo. Oma laasɔ wɛ koka mbɔsa yɛdikɔ yakoka Jehowa ntshɔkɔla.
14. Ngande wele monga la shɛnɔdi ndo mbokana ngandji ayotokimanyiya dia mbewɔ ntakanya anto akina?
14 Shɛnɔdi tokimanyiyaka nto dia nshihodia etombelo wayonga l’ɛsɔnwɛlɔ aso le anto akina l’oyango wa sho mbewɔ “ntakanya anto akina.” (Flpɛ. 1:10) Dui sɔ diekɔ ohomba etena kɔsaso shoamɛ tɛdikɔ lo kɛnɛ kendana l’ɔlɔtɔ ndo l’ɔlɔngɔswɛlɔ wa divo. Ɛnyɛlɔ, sho koka nkombola yoho mɔtshi y’ɔlɔtɔ wa laande kana y’ɔlɔngɔswɛlɔ wa divo. Ko kakɔna kayotosala naka dui sɔ takanyaka ase etshumanelo kana anto wa l’andja? Shɛnɔdi ayotokimanyiya dia nɛmiya nsaki yawɔ. Ngandji ayotokimanyiya dia ntetemala nyanga wahɔ “w’anto akina” ndo monga la wɛdimu. (1 Kɔr. 10:23, 24, 32; 1 Tim. 2:9, 10) Kɛsɔ ayotokimanyiya dia mbɔsa yɛdikɔ yɛnya ngandji ndo dilɛmiɛlɔ diaso le anto akina.
15. Kakɔna kalɔmbama dia mbɔsa tɛdikɔ t’ohomba?
15 Naka wɛ ekɔ lo nanga mbɔsa yɛdikɔ mɔtshi y’ohomba, kete kana yimba l’etombelo wayonga la dikambo sɔ. Yeso akatetsha dia “nkamba akumi” la ntondo ka nsala dikambo dimɔtshi. (Luka 14:28) Ɔnkɔnɛ, kana yimba lo etena, ekondjelo, ndo welo wakokayɛ mbidja dia nkamba olimu akɔ. Lo tena dimɔtshi, wɛ koka nkɛtshanya l’ase nkumbo kayɛ lo kɛnɛ kahomba onto tshɛ la l’atei anyu nsala dia nsukɛ yɛdikɔ yɔshinyu. Lande na kele ekongelo ka ngasɔ ohomba? Tɔ koka kokimanyiya dia mɛna dia kana wɛ koka nsala etshikitanu lo yɛdikɔ yayɛ kana nsala ɔsɔnwɛlɔ okina. Ndo etena kalɔmbayɛ ekimanyielo k’ase nkumbo kayɛ ndo kahokamɛyɛ tokanyi tawɔ, vɔ wayoleka kokimanyiya dia nkotsha yɛdikɔ yakayɔshi.—Tok. 15:22.
ƆSA YƐDIKƆ YAYOYOKOTSHA
16. Wanya akɔna wayokokimanyiya dia mbɔsa tɛdikɔ t’amɛna? (Enda ndo kiombo yele l’ɔtɛ a dui ɔnɛ: “Woho wa mbɔsa tɛdikɔ ta lomba.”)
16 Naka wɛ akatakola wanya woshidiso la diko, kete wɛ aya suke dia mbɔsa yɛdikɔ ya lomba. Wɛ ekɔ la tolembetelo ndo akasɛdingola atɔndɔ wayokokimanyiya dia mbɔsa yɛdikɔ yayɔngɛnyangɛnya Jehowa. Kakianɛ, wɛ koka nɔmba Jehowa dia kokimanyiya dia wɛ nkotsha yɛdikɔ yayɛ.
17. Naa dui di’ohomba diayokokimanyiya dia mbɔsa tɛdikɔ t’amɛna?
17 Oyadi kaanga wɛ ambɔsaka tɛdikɔ t’amɛna lo nshi yakete, ohɔka dia kɛnɛ kakoka kokimanyiya dia mbɔsa tɛdikɔ t’amɛna ele lo ndjaɛkɛ aha lo lomba kana diewo diayɛ hita, koko lo lomba la Jehowa. Paka ndamɛ oto mbakoka kosha ewo ka mɛtɛ, eokelo ndo shɛnɔdi, mbuta ate waonga w’ohomba wakenga lomba. (Tok. 2:1-5) Jehowa koka kokimanyiya dia mbɔsa tɛdikɔ tawɔngɛnyangɛnya.—Os. 23:2, 3.
OSAMBO 28 Tɔtɔ la Jehowa ɔngɛnyi
