SAWO DIA WEKELO 4
OSAMBO 18 Losaka dikambo di’oshinga w’etshungwelo
Kakɔna katetsha Oshinga w’etshungwelo?
“Oma lo dikambo nɛ mbakɛnama ngandji ka Nzambi.”—1 JNI. 4:9.
KƐNƐ KAYOTEKA
Kɛnɛ katosholɛ oshinga w’etshungwelo lo dikambo dia waonga w’amɛna waki Jehowa Nzambi ndo wa Yeso Kristo.
1. Wahɔ akɔna wakondjaso lo mbɔtɔka l’Eohwelo ka nyɔi ka Kristo ɔnɔnyi tshɛ?
AHA la taamu, wɛ mbetawɔka di’oshinga w’etshungwelo ekɔ woshasha wa nɛmɔ! (2 Kɔr. 9:15) Lam’ele Yeso akalambola lɔsɛnɔ lande, wɛ koka monga la diɔtɔnganelo di’oshika la Jehowa Nzambi. Wɛ koka monga nto l’elongamelo ka lɔsɛnɔ la pondjo. Ande ɔlɔ wayonga la so, naka sho mɛnya lowando la so l’oshinga w’etshungwelo ndo le Jehowa ɔnɛ lakatoshawɔ lee! (Rɔmɔ 5:8) Dia tokimanyiya dia ntetemala mɛnya lowando la so l’oshinga w’etshungwelo ndo diaha mbohɛ pondjo kɛnɛ kakatosalɛ Jehowa la Yeso, Yeso akatodjangɛ dia salaka Eohwelo ka nyɔi kande ɔnɔnyi tshɛ.—Luka 22:19, 20.
2. Kakɔna kayotɛna lo sawo nɛ ndo diayela?
2 Ɔnɔnyi ɔnɛ, Eohwelo ka nyɔi ka Yeso kayosalema Lushi la samalo Ngɔndɔ ka nɛi 12, 2025. Aha la taamu, sho tshɛ tekɔ lo ndjalɔngɔsɔla dia mbɔtɔ lo Eohwelo kɛsɔ. Tayokondja wahɔ efula naka lo nshi ya Eohwelo sho kanaka yimba a lo kɛnɛ kakasale Jehowa l’Ɔnande. Lo sawo nɛ, tayɛna kɛnɛ kateetsha oshinga w’etshungwelo lo dikambo dia Jehowa ndo di’Ɔnande. Sawo diayela, diayotokimanyiya dia mɛna woho wakokaso nkondja wahɔ oma l’oshinga w’etshungwelo ndo woho wakokaso mɛnya lowando laso lɔkɔ.
KAKƆNA KATETSHA OSHINGA W’ETSHUNGWELO LO DIKAMBO DIA JEHOWA?
3. Ngande wakakoke nyɔi k’onto ɔtɔi ntshungola miliyɔ y’anto? (Enda ndo osato.)
3 Oshinga w’etshungwelo tetshaka losembwe la Jehowa. (Eoh. 32:4) Lo ngande? Nyɛsɔ tende: Oma l’ohindodi w’Adama, takahowɔ pɛkato katɔla lo nyɔi. (Rɔmɔ 5:12) Dia totshungola oma lo pɛkato la nyɔi, Jehowa akatome Yeso dia ndjokimɔ oshinga w’etshungwelo. Ko ngande wakakoke olambo w’onto ɔtɔi la kokele ntshungola miliyɔ y’anto? Ɔpɔstɔlɔ Pɔɔlɔ akalembetshiya ate: “Oko wele oma lo ohendodi w’onto 1 [Adama] anto efula wakakome atshi wa pɛkato, woho akɔ waamɛ mbele oma lo okitanyiya w’onto 1 [Yeso] anto efula wayokoma anto w’ɛlɔlɔ.” (Rɔmɔ 5:19; 1 Tim. 2:6) L’ɛtɛkɛta ekina, aki oma l’ohindodi w’onto ɔtɔi la kokele mbakatakome ɛhɔmbɔ wa pɛkato la nyɔi. Diakɔ diele, akalɔmbama onto ɔtɔi la kokele dia sho ntshungɔ oma lo pɛkato la nyɔi.
Onto ɔtɔi akasale dia sho nkoma ɛhɔmbɔ wa pɛkato la nyɔi. Woho akɔ waamɛ mbele, onto ɔtɔi akatotshungola oma lo pɛkato la nyɔi ( Enda odingɔ 3)
4. Lande na kaki Jehowa kombetawɔ tsho dia tokanula taki Adama t’etema ɛlɔlɔ nsɛna pondjo pondjo?
4 Onde mɛtɛ Yeso akahombe mvɔ dia toshimbɛ? Onde Jehowa kokoka mbɔsa tsho yɛdikɔ ya tokanula taki Adama t’etema ɛlɔlɔ nsɛna pondjo pondjo? Le anto wele keema kokele, otɛnama dia ɔsɔ aki dui dia lomba dia nsala. Koko, kɛsɔ hɔtɔnɛ la losembwe la kokele la Jehowa. Lam’ele Jehowa ekɔ la losembwe, nde kokoka ndjiha washo lo tshelo y’ohindodi y’Adama.
5. Lande na kakokaso ndjashikikɛ dia Jehowa ayotetemalaka nsala kɛnɛ kele ɔlɔlɔ?
5 Kakɔna kototomba otondongaka Jehowa kombetawɔ nkimɔ oshinga w’etshungwelo ko ntshika di’ana waki Adama wele keema kokele nsɛna pondjo pondjo? Ondo anto amɔtshi wotoyambola dia kana Nzambi ambodiha washo lo losembwe lande. Ɛnyɛlɔ, onde nde ambohekɔ dia nkotsha alaka ande? Sho hatohombe ndjakiyanya lo dikambo sɔ. Woho waketawɔ Jehowa dia nsala kɛnɛ kele losembwe, lo mbetawɔ dia ndjahondja mbuta ate lo nkimɔ Ɔnande la ngandji oko olambo, toshikikɛka dia nde ayotetemalaka nsala kɛnɛ kele ɔlɔlɔ.
6. Naa dionga dikina diakatshutshuya Jehowa dia ntoma Yeso dia nde mvɔ lo dikambo diaso? (1 Joani 4:9, 10)
6 Ekɔ dionga dikina dia laande diakatshutshuya Jehowa dia ntoma Yeso dia nde mvɔ lo dikambo diaso, mbuta ate ngandji katokande. (Jni. 3:16; adia 1 Joani 4:9, 10.) Wetshelo w’oshinga w’etshungwelo tosholɛka dia Jehowa halange dia sho monga tsho la lɔsɛnɔ laha l’ekomelo koko ndo dia sho monga ase nkumbo kande. Tɔsɛdingole dui nɛ: Etena kakasale Adama pɛkato, Jehowa akawonya oma lo nkumbo kande k’atɛmɔdi. Etombelo waki la dui sɔ ele, sho tshɛ takotɔ l’andja wa nkumbo ka Nzambi. Koko lo tshimbo y’oshinga w’etshungwelo, Jehowa todimanyiyaka pɛkato yaso ndo ayokaloya anto tshɛ wele la mbetawɔ ndo l’okitanyiya lo nkumbo kande. Kaanga kakianɛ, tokoka monga la diɔtɔnganelo dia dimɛna la Jehowa ndo l’asekaso atɛmɔdi. Lo mɛtɛ, Jehowa tolangaka!—Rɔmɔ 5:10, 11.
7. Ngande watokimanyiya asui waki Yeso dia sho nshihodia woho wa ngandji katooka Jehowa?
7 Sho koka mɛna polo lo yɛdikɔ yakɔna yatooka Jehowa ngandji naka sho nsɛdingola nɛmɔ diele l’oshinga w’etshungwelo. Satana mbutaka dia ndooko okambi wa Nzambi wakoka ntshikala la kɔlamelo le Nde etena koonga wolo nsala dui sɔ. Dia nkadimola lo kashi kɛsɔ, Jehowa aketawɔ dia Yeso nsowa ndo mvɔ. (Jɔbɔ 2:1-5; 1 Pe. 2:21) Jehowa akɛnaka woho wakasoyaka atunyi w’ɔtɛmwɛlɔ wa mɛtɛ Yeso, woho wakɔɔkɔmɔlaka asɔlayi ndo woho wakawɔkɔkɔla sɛti l’otamba. Ndo nto, Jehowa akɛnyi woho wakadiakema Ɔnande la ngandji l’esehe tshɛ. (Mat. 27:28-31, 39) Jehowa aki la wolo wa nshimba diaha awui asɔ tshɛ salema. Ɛnyɛlɔ, etena kakate atunyi ande ɔnɛ: “Naka Nzambi mbookaka ngandji, awoshimbɛke,” Jehowa akakoke nsala dui sɔ. (Mat. 27:42, 43) Koko otondongaka Nzambi akashimbe akambo asɔ, tshike oshinga w’etshungwelo totowofutama ndo tototonga kaanga la yema y’elongamelo. Diakɔ diele Jehowa aketawɔ di’Ɔnande mbikikɛ asui asɔ polo lo nyɔi.
8. Onde Jehowa akonge la kandji etena kakandɛnaka Ɔnande asowa? Lembetshiya. (Enda ndo osato.)
8 Hatokoke mfɔnya ɔnɛ lam’ele Nzambi ekɔ kanga wolo tshɛ, nde hakoke mboka kandji! Lam’ele takatongama l’efanelo kande ndo la dikoka dia mbokana kandji, laasɔ sho koka mbuta dia Jehowa nde lawɔ mbokanaka kandji. Bible mbutaka dia nde aki la “paa” ndo ‘akanyange.’ (Os. 78:40, 41) Tɔsɛdingole nto ɛnyɛlɔ kaki Abrahama la Isaka. Jehowa akalɔmbɛ Abrahama dia nambola tshɔi yande y’ɔna oko olambo. (Eta. 22:9-12; Hɛb. 11:17-19) Sho koka nkanyiya kandji k’efula kakoke Abrahama etena kakandalange ndjaka ɔnande. Ande kandji kakahombe Jehowa mboka etena kakandɛnaka anto wa kɔlɔ wahɛnyahɛnya Ɔnande ndo mbodiaka nyɔi ka l’esehe lee!—Enda lo jw.org vidɛo yele l’ɔtɛ a dui ɔnɛ: Tokoya mbetawɔ kawɔ—Abrahama, etenyi 2.
Jehowa aki la lonyangu l’efula lo mɛna woho wakasowaka Ɔnande (Enda odingɔ 8)
9. Ngande wakokimanyiya Rɔmɔ 8:32, 38, 39 dia nshihodia woke woke wa ngandji ka Jehowa le yɛ ndo le asekayɛ atɛmɔdi?
9 Oshinga w’etshungwelo tetshaka dia ndooko onto lakoka tooka ngandji, oyadi ase nkumbo kaso kana angɛnyi aso w’eshika, ko mbɛdima la kɛnɛ kakatoke Jehowa. (Adia Rɔmɔ 8:32, 38, 39.) Aha la taamu, Jehowa tolangaka oleki woho wayalangaso shoamɛ. Onde wɛ nangaka nsɛna pondjo pondjo? Jehowa ndeka kokombolɛ dui sɔ. Onde wɛ nangaka dia pɛkato yayɛ dimanyiyama? Jehowa ndeka kokombolɛ dia pɛkato yayɛ dimanyiyama. Kɛnɛ tshɛ kalongamɛnde oma le so l’ɔtɛ w’oshinga w’etshungwelo ele monga la mbetawɔ ndo l’okitanyiya. Oshinga w’etshungwelo ekɔ mɛtɛ ndjembetelo ya ngandji k’efula katooka Jehowa. Ndo l’andja w’oyoyo, tayeka akambo efula wendana la ngandji ka Jehowa.—Ond. 3:11.
KAKƆNA KATETSHA OSHINGA W’ETSHUNGWELO LO DIKAMBO DIA YESO?
10. a) Kakɔna kakakiyanya Yeso lo kɛnɛ kendana la nyɔi kande? b) Lo toho takɔna takaamɛ Yeso lokombo la Jehowa? (Enda ndo kiombo yele l’ɔtɛ a dui ɔnɛ: “ Olowanyi wa Yeso akaamɛ lokombo la Jehowa.”)
10 Yeso ndjakiyanyaka efula lo dikambo dia lokumu la She. (Jni. 14:31) Yeso aki la lonyangu l’efula l’ɔtɛ wakawate dia nde ambɔtɛnga Nzambi ndo dui sɔ diakakoke mbidja lokombo la She mindo. Diakɔ diakandalɔmbɛ ate: “Papa, naka kokaka, ominye dikɔhɔ nɛ.” (Mat. 26:39) Lo ntshikala l’olowanyi le Jehowa polo lo nyɔi, Yeso akaamɛ lokombo la She.
11. Ngande wakɛnya Yeso ngandji k’efula kokande anto? (Joani 13:1)
11 Oshinga w’etshungwelo tetshaka dia Yeso ndjakiyanyaka efula dikambo di’anto, djekoleko dikambo di’ambeki ande. (Tok. 8:31; adia Joani 13:1.) Ɛnyɛlɔ, Yeso akeyaka di’awui amɔtshi wendena l’olimu ande wa la nkɛtɛ wakahombe monga wolo efula, lo yoho laande, nyɔi kande ka l’esehe. Koko, Yeso akakikɛ awui wa wolo asɔ tshɛ aha paka l’ɔtɛ wakɔɔlɔmbɛ Jehowa dia nsala dui sɔ, koko l’ɔtɛ wa ngandji kakandokaka anto. Yeso akɛnya ngandji k’efula kokande anto lo mbasambisha, mbaetsha ndo lo mbakimanyiya. Kaanga lushi lakandadiakema, Yeso akasole ekolo wa apɔstɔlɔ ande, akaakeketsha ndo akaasambe. (Jni. 13:12-15) Ndo etena kakinde l’otamba, Yeso akɔshi yema y’etena dia mbisha otshi wa pɛkato wakahanema suke la nde elongamelo ndo akakongɛ woho wakahombe nyango kokamɛ. (Luka 23:42, 43; Jni. 19:26, 27) Laasɔ, ngandji ka Yeso kɔmɛnama tsho lo nyɔi kande koko ndo lo kɛnɛ kakandasale lanɛ la nkɛtɛ.
12. Kakɔna katetemala Yeso nsala lo dikambo diaso ɛlɔ kɛnɛ?
12 Etena kakavu Kristo “mbala ɔtɔi lo pondjo,” nde ekɔ lo ntetemala nsala akambo efula lo dikambo diaso. (Rɔmɔ 6:10) Lo ngande? Nde ekɔ lo ntetemala nkamba wolo dia tokimanyiya dia sho nkondja wahɔ waya oma l’oshinga w’etshungwelo. Tɔsɛdingole kɛnɛ kasalande. Nde ekɔ lo nkamba oko Nkumekanga kaso, Ɔlɔmbɛdi a laadiko ndo owandji w’etshumanelo. (1 Kɔr. 15:25; Ɛf. 5:23; Hɛb. 2:17) Nde ekɔ l’ɔkɛndɛ wa ntshumanya akitami ndo leemba la woke l’ɛkɔkɔ, olimu wayoshidiyama la ntondo k’ekomelo ka mfɔnu ka woke. b (Mat. 25:32; Makɔ 13:27) Nde ekɔ lo ndjashikikɛ dia ekambi ande wa kɔlamelo wekɔ lo nkondja mbo ya ndɛ ya lo nyuma lo nshi y’ekomelo nyɛ. (Mat. 24:45) Ndo l’Ɛlɔmbwɛlɔ kande k’Ɛnɔnyi Kinunu, nde ayotetemala tokotshɛ ehomba aso. Jehowa mɛtɛ akakimɔ Ɔnande dikambo diaso!
TETEMALA MBEKA
13. Ngande wakoka ekanelo ka yimba kokimanyiya dia ntetemala mbeka awui wendana la ngandji kakatoke Nzambi la Kristo?
13 Wɛ koka ntetemala mbeka woho wakatɛnya Jehowa Nzambi ndo Yeso Kristo ngandji naka wɛ ntetemala nkana yimba lɔkɔ. Wɛ koka nsala dui sɔ lo mbadiaka Evanjiliɔ ɔtɔi kana ehende lo mingu y’otsha lo Eohwelo. Tadiake awui efula mbala ɔtɔi. Lo dihole dia nsala ngasɔ, adia ɔkɔkɛ ndo yanga ɛkɔkɔ wɛnya lande na kakokaso mboka Jehowa ngandji. Oma laasɔ, tɛ anto akina kɛnɛ kakayeke.
14. Lo woho wɔtɔnɛ la Osambo 119:97 ndo nɔtɛ, ngande wakoka eyangelo kokimanyiya dia ntetemala mbeka akambo wendana l’oshinga w’etshungwelo? (Enda ndo osato.)
14 Naka aya edja efula kamboyobatizama, kete wɛ mbeyaka ndjambola dia kana ekɔ awui amɔtshi w’eyoyo wahombayɛ mbeka lo dikambo dia losembwe laki Nzambi, ngandji kande ndo oshinga w’etshungwelo. Kɛnɛ kele mɛtɛ ele, ndooko ekomelo lo kɛnɛ kendana l’awui wakokaso mbeka lo dikambo di’awui asɔ ndo awui akina. Laasɔ, akokayɛ nsala? Adia ndo eka awui efula w’amɛna watanema l’ekanda aso walembetshiya Bible. Etena kayoyoshola dui dimɔtshi dieyɛ hashihodia, sala eyangelo. Oma laasɔ, kana yimba lushi l’otondo lo kɛnɛ kakayashodi lo dikambo dia Jehowa, di’Ɔnande ndo dia ngandji kawɔ oya le yɛ.—Adia Osambo 119:97 ndo nɔtɛ.
Oyadi edja ka ngande kambotobatizama, sho koka mfudia lowando laso l’oshinga w’etshungwelo (Enda odingɔ 14)
15. Lande na kahombaso ntetemala nyanga akambo wa mɛtɛ w’oma lo Bible?
15 Tɔkɔmɔke naka wɛ hashodi dui dimɔtshi di’oyoyo kana dia dimɛna etena tshɛ kadiayɛ kana kasalayɛ eyangelo. Lo nsala ngasɔ, wɛ ayonga oko onto latayange mbɔkɔ y’akɛsɔ. La solo dia lotutsha tshɛ, atshimi wa mbɔkɔ mbetshaka wenya efula la ntondo ka vɔ ndjotana kaanga viɔkɔwɔkɔ ya tshitshɛ. Koko, vɔ tetemalaka nyanga nɛ dia kaanga viɔkɔwɔkɔ ya tshitshɛ yekɔ la nɛmɔ di’efula le wɔ. Ande nɛmɔ diele l’awui wa mɛtɛ wa lo Bible lee! (Os. 119:127; Tok. 8:10) Laasɔ, onga la solo dia lotutsha ndo lɛmiyaka ekongelo ka wadielo ayɛ wa Bible.—Os. 1:2.
16. Ngande wakokaso mbokoya Jehowa la Yeso?
16 Etena katayeke, sala tshɛ dia nkamba la kɛnɛ kekayɛ. Ɛnyɛlɔ, okoya losembwe la Jehowa lo salɛka anto akina akambo aha la shɔnɔdi. Okoya ngandji kakɛnya Yeso otsha le She ndo le anto akina lo monga suke dia nsowa lo dikambo dia lokombo la Jehowa ndo mbetawɔ ndjahondja lo dikambo di’asekayɛ Akristo. Ndo nto, okoya Yeso lo sambishaka anto akina dia vɔ lawɔ nkondja diaaso dia mbetawɔ woshasha wa nɛmɔ wakatosha Jehowa.
17. Kakɔna kayotɔsɛdingola lo sawo diayela?
17 Lam’ayototalekaka nshihodia ndo mɛnya lowando laso l’oshinga w’etshungwelo, mbayototalekaka mboka Jehowa ndo Ɔnande ngandji. Lo wedi awɔ, vɔ wayoleka tooka ngandji lo yoho ya tshamba ndeko. (Jni. 14:21; Jak. 4:8) Laasɔ, tokambe la kɛnɛ tshɛ katosha Jehowa dia ntetemala mbeka lo dikambo di’oshinga w’etshungwelo. Lo sawo diayela, tayɔsɛdingola toho tɔmɔtshi takokaso nkondja wahɔ oma l’oshinga w’etshungwelo ndo woho wakokaso mɛnya lowando laso lo ngandji katooka Jehowa.
OSAMBO 107 Ɛnyɛlɔ ka ngandji kakatosha Nzambi
a ELEMBETSHIELO WA TƆTƐKƐTA: “Nkana yimba” nembetshiyaka ndjasha lo dui dimɔtshi ndo disɛdingola lo yoho ya lotshimola.
b Otshumanyelo wa “diangɔ dia l’olongo” oko wofundamidiɔ lo Ɛfɛsɔ 1:10, ntshikitana l’otshumanyelo wa “asɔnami” wakatɛkɛta Yeso lo Mateo 24:31 ndo lo Makɔ 13:27. Pɔɔlɔ akatɛkɛta di’etena kasɔna Jehowa anande wa lo nyuma lo mbakita esɔ la nyuma k’ekila. Yeso akatɛkɛtaka di’etena kayotshumanyema Akristo w’akitami weke la nkɛtɛ otsha l’olongo l’etena ka mfɔnu ka woke.
