1. Lo na ayasha anto efula ɛlɔ kɛnɛ?

 ONDE wɛ hɛnyi di’anto efula wa nshi nyɛ wekɔ lo ndjayangɛ lotombo? Ɛnyɛlɔ, anto amɔtshi kambaka la rɛzo sɔsio dia nkotola yambalo y’anto oya le wɔ ndo lo kɛnɛ kasalawɔ. Koko, ɛlɔ kɛnɛ anto yema tshitshɛ tsho mbasha Jehowa Nzambi lotombo. Lo sawo nɛ, tayɔsɛdingola kɛnɛ kalembetshiya mbisha Jehowa lotombo ndo kɛnɛ kahomba totshutshuya dia nsala dui sɔ. Tayeka nto woho wakokaso mbisha Nzambi lotombo lasungana la nde ndo woho wayondotombola lokombo lande lo nshi yayaye yaya k’emembe.

KAKƆNA KALEMBETSHIYA MBISHA JEHOWA LOTOMBO?

2. Ngande wakɛnya Jehowa lotombo lande lo Dikona dia Sinayi? (Enda ndo osato.)

² Lotombo kɛdikɛdi na? Lo Bible, tshɛkɛta “lotombo” koka nembetshiya dui tshɛ diakoka nkonya onto, onto la lokumu. Jehowa akɛnya lotombo lande lo yoho ya diambo yema tshitshɛ l’ɔkɔngɔ wa wodja w’Isariyɛlɛ ntshungɔ oma lo lɔhɔmbɔ l’Edjibito. Onga oko onto lɛna kɛnɛ kakete: Miliyɔ y’ase Isariyɛlɛ yosanganyi kaamɛ l’ɛse ka Dikona dia Sinayi dia tohomana la Nzambi kawɔ. Dinge di’odima nkomba dikona. La shashimoya, didimu dia nkɛtɛ diambosalema wate kana oko wonya walanga vɔlka ntondɔ, nkɛtɛ yambotatɛ didima etena kele angadimu, ndjadi ndo londjo l’amama lekɔ lo mbokɛ. (Eto. 19:​16-18; 24:17; Os. 68:8) Ohokanyiya woho wakaambe ase Isariyɛlɛ waki laawɔ etena kakɛnya Jehowa lotombo lande lo yoho ya diambo shɔ.

3. Kakɔna kalembetshiya mbisha Jehowa lotombo?

 ³ Ko kayotota lo dikambo di’anto? Onde sho kokaka mɛtɛ mbisha Jehowa lotombo? Eelo, sho kokaka. Yoho mɔtshi yakokaso mbisha Jehowa lotombo ele, mbutɛ anto akina awui wendana la wolo ande wa diambo ndo la waonga ande w’amɛna. Sho tombolaka Nzambi nto etena kawoshaso kɛnɛmɔ l’ɔtɛ wa dui tshɛ diatokimanyiyande dia nsala. (Isa. 26:12) Nkumekanga Davidɛ aki ɛnyɛlɔ ka dimɛna efula k’onto lakasha Jehowa lotombo. Lo dɔmbɛlɔ dimɔtshi diakandalɔmbɛ la ntondo k’etshumanelo k’otondo k’ase Isariyɛlɛ, Davidɛ akatɛ Nzambi ate: “Jehowa le, wɛ kakanga woke, wolo, olangala, lotombo ndo lɔnɛnɛ, nɛ dia ɛngɔ tshɛ kele l’olongo ndo la nkɛtɛ kayɛ mbetɔ.” L’ɔkɔngɔ wa Davidɛ nkomiya la nɔmba, “etshumanelo k’otondo wakatombola Jehowa.”—1 Ɛk. 29:​11, 20.

4. Ngande wakasha Yeso, Jehowa lotombo?

⁴ Etena kaki Yeso la nkɛtɛ, nde akasha She lotombo lo mɛnya dia Nde mbaki lo Kiɔkɔ y’ahindo wakandasalaka. (Makɔ 5:​18-20) Yeso akasha nto Jehowa lotombo lo woho wakandatɛkɛta akambo wendana la She ndo lo woho wakandasalɛka anto akina akambo. Lo diaaso dimɔtshi, Yeso aketshaka lo shinangɔnga. L’atei w’anto wakoohokamɛka, mbaki ndo womoto ɔmɔtshi lakadiɛnɛka l’ɔdiɛngɛ l’edja k’ɛnɔnyi 18. Ɔdiɛngɛ ɔsɔ akookotanya kota ndo nde kokokaka nsembɔ. Ande kandji lee! Yeso akatshutshuyama la kɛtshi ndo akatshu le womoto akɔ ko akawotɛ la wɔlamu tshɛ ate: “Womoto, wɛ ambotshungɔ oma l’ɔlɛmbɛlɔ ayɛ.” Nde akawahɛ anya, ko mbala kakɔ ɔtɔi nde akasembɔ ndo “akatatɛ ntombola Nzambi,” laasɔ, nde akanyomonga la yonge ya dimɛna! (Luka 13:​10-13) Womoto ɔsɔ aki l’ɔkɔkɔ w’oshika wa mbisha Jehowa lotombo.

KAKƆNA KATOTSHUTSHUYA DIA MBISHA JEHOWA LOTOMBO?

5. Ɛkɔkɔ akɔna wele la so wa nɛmiya Jehowa?

⁵ Sho tombolaka Jehowa nɛ dia sho mbɔlɛmiyaka lo yɛdikɔ y’efula. Tekɔ l’ɛkɔkɔ efula wa mbɔlɛmiya. Jehowa ekɔ Kanga-Wolo-Tshɛ; nde ekɔ la wolo waha l’elelo. (Os. 96:​4-7) Lomba lande lahadjama anya mɛnamaka hwe lo diangɔ diakandatonge. Nde mbele Kiɔkɔ ya lɔsɛnɔ laso ndo nde mbele osukɔ alɔ. (Ɛny. 4:11) Nde ekɔ la kɔlamelo. (Ɛny. 15:4) Nde tondoyaka lo kɛnɛ tshɛ kasalande ndo nde kotshaka nshi tshɛ alaka ande. (Jas. 23:14) Diakɔ diakate omvutshi Jɛrɛmiya lo dikambo dia Jehowa ate: “L’atei w’akanga wa tomba tshɛ wa lo wedja ndo l’atei wa waolelo awɔ tshɛ, ndooko ɔnɛ lele oko wɛ”! (Jɛr. 10:​6, 7) Aha la taamu, tekɔ l’ɛkɔkɔ w’eshika wa nɛmiya Shɛso lele l’olongo. Koko Jehowa nongamɛka awui efula oma le so oleki tsho dilɛmiɛlɔ diaso, mbuta ate ngandji kawokaso.

6. Lande na kalangaso Jehowa?

⁶ Sho tombolaka Jehowa nɛ dia sho mbolangaka efula. Tɔsɛdingole waonga wa Jehowa watokonya dia mbolanga. Nde mbokanaka kɛtshi ndo kandji. (Os. 103:13; Isa. 49:15) Nde mbokanaka kandji; etena keso l’ekiyanu, nde minandemaka. (Zɛk. 2:8) Nde tokimanyiyaka dia sho mbeeya ndo nkoma angɛnyi Ande. (Os. 25:14; Ets. 17:27) Nde ekɔ l’okitshakitsha; “nde minyamaka dia menda olongo la nkɛtɛ, nde monyiyaka mbolambola oma lo ditshu.” (Os. 113:​6, 7) L’ɔtɛ w’awui asɔ tshɛ, ngande wakokaso mɛtɛ ntona ntombola Nzambi kaso ka woke?—Os. 86:12.

7. Diaaso diakɔna dia laande diele la so?

⁷ Sho tombolaka Jehowa nɛ dia sho nangaka di’anto akina mbeeya. Anto efula haweye akambo wa mɛtɛ wendana la Jehowa. Lande na?  Nɛ dia Satana ambowaetɛ totshungu lo timba lo dianganya kashi y’efula lo dikambo dia Jehowa. (2 Kɔr. 4:4) Satana aketawoya anto ɔnɛ Jehowa ekɔ Nzambi kahadimanyiyana, kahayakiyanya lo dikambo di’anto ndo ɔnɛ nde mbele lo kiɔkɔ y’ekakatanu wele l’anto l’andja. Koko sho mbeyaka kɛnɛ kele mɛtɛ lo dikambo dia Nzambi kaso! Tekɔ la diaaso dia mbutɛ anto woho wa Nzambi kende ndo mbakimanyiya dia vɔ mbotombola. (Isa. 43:10) Osambo 96 tɛkɛtaka dia woho wa mbisha Jehowa lotombo. Etena katatasɛdingola ɛtɛkɛta ɛmɔtshi wakasambiyama wele l’osambo ɔnɛ, kana yimba lo toho takokayɛ mbisha Jehowa lotombo lasungana la nde.

NGANDE WAKOKASO MBISHA JEHOWA LOTOMBO LASUNGANA LA NDE?

8. Naa yoho mɔtshi yakokaso ntombola Jehowa? (Osambo 96:​1-3)

⁸ Adia Osambo 96:​1-3. Sho koka ntombola Jehowa oma lo kɛnɛ kataso lo dikambo diande. Lo avɛsa anɛ, ekambi wa Jehowa nɔmbamaka dia ‘membɛ Jehowa,’ ‘ntombola lokombo lande,’ ‘mbewoyaka lokumu l’ɔlɔlɔ la panda kande’ ndo dia ‘nsanya lotombo lande l’atei wa wedja.’ Toho tɔsɔ tshɛ ekɔ toho takokaso ntombola Shɛso lele l’olongo. Ase Juda ndo Akristo wa lo ntambe ka ntondo komengenga dia mbutɛ anto akina akambo tshɛ w’amɛna wakaasalɛ Jehowa ndo dia mamɛ lokumu lande. (Dan. 3:​16-18; Ets. 4:29) Ngande wakokaso nsala woho akɔ waamɛ?

9-10. Wetshelo akɔna wamboyokondja oma lo kɛnɛ kakakomɛ Angelena? (Enda ndo osato.)

⁹ Tɔsɛdingole kɛnɛ kakakomɛ kadiyɛso kelɛwɔ Angelena a kadjasɛ l’États-Unis. Nde akaamɛ lokumu la Jehowa la dihonga tshɛ lo kɔpanyi kakambande olimu. Oko ose olimu weke oyoyo, Angelena akelamɛ lo losanganya la wanɛ weke eyoyo lo kɔpanyi lɛnɛ akawawashaka diaaso dia ndjalowola. Angelena akalɔngɔsɔla foto mɔtshi yɛnya ɔngɛnɔngɛnɔ wele la nde oko Ɔmɛnyi wa Jehowa. Koko yema tshitshɛ la ntondo ka vɔ mbosha diaaso dia ntɛkɛta, osekande la l’olimu akayalowola dia nde akoodiama oko ɔmɔtshi la l’atei w’Ɛmɛnyi wa Jehowa. Nde akatatɛ mbuta awui wa kɔlɔ lo dikambo di’Ɛmɛnyi wa Jehowa ndo lo kɛnɛ kendana la dietawɔ diawɔ. Angelena mbutaka ate: “Solo diami diakatɛ. Koko lakakanyiya nte: ‘Onde dimi layetawɔ di’onto ɔmɔtshi mbuta kashi lo dikambo dia Jehowa? Ko kana layamɛ awui wendana la Nde?’”

 ¹⁰ Lam’akashidiya osekande la l’olimu la ntɛkɛta, Angelena akasale dɔmbɛlɔ dia mondo l’otema. Ko nde akawotɛ la loshilambo tshɛ ate: “Ɔkɔndɔ ami fɔnaka la wayɛ. Dimi lawɔ lakoodiama oko Ɔmɛnyi wa Jehowa ndo lekɔ lo ntetemala monga Ɔmɛnyi wa Jehowa polo ɛlɔ.” Kaanga mbakookiyanya dui sɔ, Angelena akatshikala ki, akɛnya asekande wa l’olimu foto yande ndo y’angɛnyi ande wakambɛ Jehowa l’ɔngɛnɔngɛnɔ tshɛ ndo akaalembetshiya la dilɛmiɛlɔ ndo l’ɔkɔmi tshɛ waetawɔ ande. (1 Pe. 3:15) Etombelo akɔna waki la dui sɔ? Lam’akashidiya Angelena ndjalowola, osekande la l’olimu la pami akatshikala ki. Ndo pami kakɔ akate dia nde mbohɔka waaso w’amɛna wakandetsha etena kakinde dikɛnda kaamɛ l’Ɛmɛnyi wa Jehowa. Angelena mbutaka ate: “Jehowa sunganaka dia sho mamɛ lokombo lande. Ekɔ nɛmɔ di’efula dia ntɛkɛta akambo wendana la lokombo lande.” Sho lawɔ pombaka ntombola Jehowa kaanga etena kele anto akina hawɔɔlɛmiya.

11. L’edja k’ɔkɔndɔ w’ana w’anto, ngande wakayele atɛmɔdi wa mɛtɛ tɔndɔ diele lo Osambo 96:8?

¹¹ Adia Osambo 96:8. Sho koka ntombola Jehowa la diangɔ diaso dia nɛmɔ. Atɛmɔdi wa mɛtɛ nɛmiyaka Jehowa nshi tshɛ lo yoho shɔ. (Tok. 3:9) Ɛnyɛlɔ, ase Isariyɛlɛ wakakimɔka weshasha dia mbika ndo dia nɔngɔsɔla tɛmpɛlɔ. (2 Nku. 12:​4, 5; 1 Ɛk. 29:​3-9) Ambeki waki Yeso amɔtshi wakakimɔ weshasha oma lo “diangɔ diawɔ” l’oyango wa nde l’apɔstɔlɔ ande monga la kɛnɛ kaki la wɔ ohomba. (Luka 8:​1-3) Akristo wa lo ntambe ka ntondo vɔ lawɔ wakakimɔ weshasha w’ekimanyielo lo dikambo di’anangɛwɔ l’akadiyɛwɔ. (Ets. 11:​27-29) Ɛlɔ kɛnɛ, sho lawɔ koka ntombola Jehowa oma lo weshasha aso wa la lolango.

12. Ngande wakoka weshasha aso mbisha Jehowa lotombo? (Enda ndo osato.)

¹² Tɔsɛdingole dui ɔtɔi to diɛnya woho washa weshasha aso Jehowa lotombo. Alapɔlɔ ɔmɔtshi wa lo 2020 mɛnyaka etombelo wakonge l’ɔwɔ wakaviya la Zimbabwe. Miliyɔ y’anto wakonɔ l’ɔtɛ wa ndjala, mbidja ndo kadiyɛso kelɛwɔ Prisca. Kaanga mbaki okakatanu wa wolo ɔsɔ, Prisca akatetemala la ekongelo kande k’esambishelo Lushi la sato la Lushi la tanu tshɛ, kaanga lo nshi ya dikambɔ. Asukanyi ande wakawɔnyɔlaka l’ɔtɛ wakandatshɔka l’olimu w’esambishelo lo dihole dia nde ntshɔ tokamba, lo mbotɛ ɔnɛ: “Wɛ ayovɔ la ndjala.” L’eshikikelo tshɛ, Prisca akakadimolaka ate: “Jehowa hasɛkaka ekambi ande pondjo.”  Kombeta edja, nde akalongola ekimanyielo oma le okongamelo aso. Ekimanyielo kɛsɔ kakonge lo tshimbo ya weshasha aso. Asukanyi wa Prisca wakaambe ndo wakawotɛ vate: “Nzambi mɛtɛ kokohekɔ pondjo, laasɔ tekɔ lo nanga mbeka akambo efula wendana la Jehowa.” Asukanyi ande esambele wakatatɛ mbɔtɔ nsanganya ya l’etshumanelo.

13. Ngande wakoka lɔkɛwɔ laso mbisha Jehowa lotombo? (Osambo 96:9)

¹³ Adia Osambo 96:9. Sho koka ntombola Jehowa oma lo lɔkɛwɔ laso. Ɛlɔmbɛdi wakakambaka lo tɛmpɛlɔ ka Jehowa wakahombaka monga pudipudi lo demba. (Eto. 40:​30-32) Koko, kɛnɛ koleki tshɛ ohomba oleki ndo pudipudi ka lo demba ele lɔkɛwɔ la pudipudi. (Os. 24:​3, 4; 1 Pe. 1:​15, 16) Sho pombaka nsala la wolo dia nkolola “lonto l’edjedja,” mbuta ate lɔkɛwɔ ndo ditshelo dia mindo, ko ndɔta “lonto l’oyoyo,” mbuta ate woho wa nkanyiya ndo wa nsala akambo lo yoho yɔtɔnɛ la waonga w’amɛna wa Jehowa. (Kɔl. 3:​9, 10) L’ekimanyielo ka Jehowa, oyadi onto lele la lɔkɛwɔ loleki tshɛ mindo ndo kanga ngala koka ntshikitana ko ndɔta lonto l’oyoyo.

14. Kakɔna kamboyeka oma lo kɛnɛ kakakomɛ Jack? (Enda ndo osato.)

¹⁴ Tende kɛnɛ kakakomɛ Jack, laki kanga ngala ndo pami ka kɔlɔ lakayelamɛka ɔnɛ: Ɔdiɛngɛ. L’ɔtɛ w’awui wa kɔlɔ wakasale Jack, wakɔsɛkɛ lokanu la nyɔi. Koko, l’etena kakandakongaka dia ndjakema, ɔnangɛso ɔmɔtshi akatshu dia tembola lokanu lɔsɔ ndo akɔɔlɔmbɛ dia vɔ ntatɛ mbeka Bible, ko Jack aketawɔ. Kaanga mbakasale Jack awui wa kɔlɔ efula lo nshi yakete, nde akakolola lonto l’edjedja ndo akalɔtɛ lonto l’oyoyo ko akalongola batisimu. Jack akatshikitana efula diakɔ diele lo lushi lakandahombe ndjakema, alami amɔtshi wa lo lokanu wakakɛdia asɔyi etena kakawalakanaka la nde. Owandji ɔmɔtshi wakakambaka lo lokanu lɔsɔ akate ate: “Jack mbakaleke ose lokanu la kɔlɔ lanɛ. Koko kakianɛ nde aya ɔmɔtshi l’atei w’ase lokanu woleki ɛlɔlɔ.” Lomingu ɔtɔi l’ɔkɔngɔ wa Jack ndjakema, etena kakakalola anangɛso lo lokanu dia tɔlɔmbɔla losanganya lasalema lomingu la lomingu, vɔ wakahomana l’ose lokanu ɔmɔtshi lakɔtɔ lo losanganya mbala ka ntondo. Kakɔna kakootshutshuya dia mbɔtɔ lo losanganya lɔsɔ? Nde akaambe lo menda woho wakatshikitanya  Jack lɔkɛwɔ ndo akalange mbeya kɛnɛ kakandahombe nsala dia ntɛmɔla Jehowa. Lo mɛtɛ, lɔkɛwɔ laso koka ntombola Shɛso lele l’olongo!—1 Pe. 2:12.

NGANDE WAYOTOMBOLA JEHOWA LOKOMBO LANDE LO NSHI YAYAYE YAYA K’EMEMBE?

15. Ngande wayotombola Jehowa lokombo lande tshɛ lo tshɛ lo nshi yayaye yaya k’emembe? (Osambo 96:​10-13)

¹⁵ Adia Osambo 96:​10-13. Avɛsa w’ekomelo wa lo Osambo 96 mɛnyaka dia Jehowa ekɔ Shushi yele la losembwe ndo Nkumekanga. Ngande wayotombola Jehowa lokombo lande lo nshi yayaye yaya k’emembe? Lo tshimbo ya dombwelo diande. Kem’edja, nde ayanga ndanya Babilɔna ka Woke l’ɔtɛ wakadje Babilɔna ka Woke lokombo lande l’ekila mindo. (Ɛny. 17:​5, 16; 19:​1, 2) Anto amɔtshi wayɛna elanyelo ka Babilɔna ka Woke mbeyaka ondo ndjonga kaamɛ la so lo ɔtɛmwɛlɔ wa mɛtɛ. L’ekomelo, lo Aramangɛdɔna, Jehowa ayolanya dikongɛ tshɛ di’akambo dia Satana, anto tshɛ walɔshana la nde ndo wanɛ wɔnyɔla lokombo lande, koko ayoshimbɛ wanɛ tshɛ wawoka ngandji, wawokitanyiya ndo wawotombola. (Makɔ 8:38; 2 Tɛs. 1:​6-10) L’ɔkɔngɔ w’ohemba w’ekomelo wayoyelana l’Ɛlɔmbwɛlɔ ka Kristo k’Ɛnɔnyi Kinunu, Jehowa ayokidia lokombo lande tshɛ lo tshɛ. (Ɛny. 20:​7-10) L’etena kɛsɔ, “nkɛtɛ kayolola la ewo ka lotombo la Jehowa oko watokombaka ashi ndjale.”—Hab. 2:14.

16. Kakɔna kamboyoyashikikɛ dia nsala? (Enda ndo osato.)

¹⁶ Ande dimɛna diayonga etena kayosha onto tshɛ Jehowa lotombo lɛdimi la lokombo lande lee! Kaanga kakianɛ, sho koka nsala kɛnɛ tshɛ kakokaso nsala dia ntombola Nzambi kaso lo diaaso tshɛ. Dia ntɔtɔmiya ohomba wa dui sɔ, Olui-walɔmbɔla wakasɔnɛ Osambo 96:8 oko divɛsa diaso dia l’ɔnɔnyi wa 2025 diata ɔnɛ: “Nyosha Jehowa lotombo lɛdimi la lokombo lande.”