DAVIDƐ dia l’Isariyɛlɛ w’edjedja mbakatɛkɛta ɛtɛkɛta wele la diko engo dia mandola womoto ɔmɔtshi lakahomana la nde. Lokombo la womoto akɔ ko Abigayɛlɛ. Kakɔna kakatshutshuya Davidɛ dia mbaandola ndo ngande wakokaso nkondja wahɔ oma l’ɛnyɛlɔ kande?

Davidɛ akahomana la womoto lakatshukama ɔsɔ etena kɛmɔtshi lam’akandatalawɔka nkumekanga Saolo. Abigayɛlɛ aki wadi aki Nabala, pami k’ɔngɔnyi ndo kakalongaka leemba lande la woke l’ɛkɔkɔ lo lɛkɛ l’akona la lo sidɛ ka Judeya. Davidɛ nde la anto ande waki “oko ehele k’ekokelo” le alami w’ɛkɔkɔ ndo ɛkɔkɔ wa Nabala. L’ɔkɔngɔ wa laasɔ, Davidɛ akayotoma akɛndji le Nabala dia tɔlɔmba ‘kɛnɛ tshɛ kakandakoke mbasha’ oko mbo ya ndɛ. (1 Sa. 25:8, 15, 16) Kɛnɛ kakalɔmbɛ Davidɛ kɛsɔ komonga kɔlɔ lo menda woho wakandakokɛ nde la anto ande diangɔ diaki Nabala.

Koko Nabala, lele lokombo lande nembetshiyaka “Bu la yimba” kana “Enginya,” akasale akambo lo yoho yɔtɔnɛ la lokombo lande. Nde akakadimola ɛtɛkɛta wa kɔlɔ ndo wa lɔtɛngɔ ndo akatone mbisha Davidɛ kɛnɛ kakandɔlɔmbɛ. Diakɔ diele, Davidɛ akayalɔngɔsɔla dia mbisha Nabala dilanya l’ɔtɛ w’okadimwelo ande wa kɔlɔ ndo waha la nkana yimba. Nabala nde l’ase nkumbo kande wakahombe nongola dilanya l’ɔtɛ w’enginya kande.—1 Sa. 25:2-13, 21, 22.

Etena kakandeye awui wa wolo wakawakongɛ l’ɔtɛ w’etsha wa Nabala waha la nkana yimba, la dihonga tshɛ Abigayɛlɛ akasale dui dimɔtshi. La dilɛmiɛlɔ tshɛ, nde akasɛngasɛnga Davidɛ l’ɔtɛ wa diɔtɔnganelo diande la Jehowa. Ndo nde akatɔlɛ Davidɛ lakahombe ndjonga nkumekanga ndo anto ande mbo ya ndɛ efula. Davidɛ lo wedi ande, akeye dia Jehowa akakambe la Abigayɛlɛ dia mboshimba diaha nsala dui diakakoke mbokonya dia monga l’onongo la ntondo ka Nzambi. Davidɛ akatɛ Abigayɛlɛ ate: “Ekanelo kayɛ k’ɔlɔlɔ katshɔkwame! Ɔtshɔkwame l’ɔtɛ wamboyonshimba ɛlɔ dia monga la onongo wa dikila.”—1 Sa. 25:18, 19, 23-35.

Sho koka nshihodia esadi eto dia hatolange pondjo monga oko Nabala, lo monga anto wele bu la lowando l’ɔtɛ w’awui w’amɛna watosalɛwɔ. Laadiko dia laasɔ, naka tambɛna dui dimɔtshi dia kɔlɔ diayanga salema, kete ayonga ɔlɔlɔ sho nsala kɛnɛ tshɛ kakokaso nsala dia dikandola. Lo mɛtɛ, sho koka ndjaoka oko omembi w’esambo lakatɛ Nzambi ate: “Ombetsha ekanelo k’ɔlɔlɔ ndo ewo.”—Os. 119:66.

Anto akina mbeyaka mɛna dia tekɔ la lomba kana l’ekanelo k’ɔlɔlɔ oma l’etsha aso. Oyadi vɔ mbuta kana bu, vɔ koka ndjaoka oko Davidɛ lakate ate: “Ekanelo kayɛ k’ɔlɔlɔ katshɔkwame!”