1, 2. a) Dikambo diakɔna dioleki ohomba diele la nshɛngiya le anto tshɛ? b) Lande na kele dikambo sɔ diekɔ ohomba le so?

LE ANTO efula ɛlɔ kɛnɛ, falanga mbele dikambo dioleki ohomba. Vɔ kanyiyaka ndo ndjakiyanyaka paka lo dikambo diakɔ. Vɔ mbetshaka wenya awɔ dia ndeka nkondja kana nama falanga yele la wɔ. Le anto akina, dikambo dioleki ohomba ele nkumbo yawɔ, yoonge yawɔ ya demba kana akambo wakombolawɔ nkotsha lo lɔsɛnɔ.

² Koko ekɔ dikambo dimɔtshi dioleki akambo asɔ ohomba efula. Dikambo diakɔ ko oyindjamelo wa lowandji la Jehowa. Ekɔ ohomba efula diaha sho ntshika mbika washo lɔkɔ pondjo. Naka hatongi la shɛnɔdi, kete sho koka ndjonga l’akambo efula wa nsala lo lɔsɛnɔ laso la lushi la lushi kana ndjakiyanya lo dikambo di’ekakatanu aso hita ko ndjohɛ ohomba wele la dikambo sɔ. Naka sho nsukɛ lowandji la Jehowa, kete tayonga l’akoka wa ndɔshana l’ekakatanu wa lo lɔsɛnɔ laso la lushi la lushi ndo tayoleka ndjasukanya la Jehowa.

3. Kakɔna kakate Satana lo kɛnɛ kendana la ɛlɔmbwɛlɔ ka Nzambi?

³ Satana Diabolo akadje taamu dia kana Jehowa ekɔ la lotshungɔ la nɔmbɔla. Satana akalange di’anto mfɔnya ɔnɛ Jehowa ekɔ Ɔnɔmbɔdi wa kɔlɔ ndo Nde halange kɛnɛ koleki ɔlɔlɔ le so. Satana akate dia anto wayoleka monga l’ɔngɛnɔngɛnɔ naka vɔ ndjalɔmbɔla vɔamɛ. (Eta. 3:1-5) Nde akate nto dia ndooko onto lele mɛtɛ la kɔlamelo le Nzambi ndo ɔnɛ naka lɔsɛnɔ laya wolo efula, onto tshɛ ayotona dia nde mbɔlɔmbɔla. (Jɔbɔ 2:4, 5) Ɔnkɔnɛ, Jehowa ekɔ lo ntshika dia etena kɛmɔtshi mbeta dia mɛnya anto tshɛ hwe ɔnɛ, naka Nzambi halɔmbɔdi anto, kete lɔsɛnɔ layonga paa efula.

4. Lande na kahomba dikambo diendana la lowandji kandɔma?

⁴ Lo mɛtɛ, Jehowa mbeyaka dia akambo wakate Diabolo wekɔ kashi. Ko lande na kashande Satana etena dia nshikikɛ mɛtɛ ka kɛnɛ katande kɛsɔ? Okadimwelo wa dimbola sɔ mendanaka la oseka onto tshɛ lele l’olongo ndo lele la nkɛtɛ. (Adia Osambo 83:18.) Adama la Eva wakatone ɛlɔmbwɛlɔ ka Jehowa ndo kɛsɔ mbakasale anto akina efula oma ko laasɔ. Dui sɔ diakakoke nkonya anto amɔtshi dia mfɔnya ɔnɛ Diabolo ekɔ la shadiya. Edja tshɛ kele okakatanu ɔsɔ watakandɔ lo timba t’anto kana t’andjelo, wɔladi la kaamɛ ka mɛtɛ hakoke monga. Koko l’ɔkɔngɔ wa lowandji la Jehowa nyindjama, anto tshɛ wayɔsɛna l’ɛlɔmbwɛlɔ kande ka dimɛna efula pondjo pondjo. Wɔladi wayonga l’andja w’otondo.—Ɛf. 1:9, 10.

5. Ngande wendanaso la dikambo dia lowandji la Nzambi?

⁵ Lowandji la Nzambi layoyindjama ndo ɛlɔmbwɛlɔ ka Satana ndo k’anto kayokita tatala tshɛ lo tshɛ ndo kayonyɛma. Ɛlɔmbwɛlɔ ka Nzambi lo tshimbo ya Diolelo diande diayɔlɔmbɔla Mɛsiya kayotondoya. Anto wa kɔlamelo wayɛnya di’anto koka nama olowanyi awɔ ndo nsukɛ ɛlɔmbwɛlɔ ka Nzambi la kɔlamelo tshɛ. (Isa. 45:23, 24) Onde wɛ nangaka monga l’atei w’anto wa kɔlamelo asɔ? Eelo! Diakɔ diele, sho pombaka nshihodia mɛtɛ ohomba wele la dikambo sɔ.

6. Ohomba akɔna wele la oyindjamelo wa lowandji la Jehowa?

⁶ Oyindjamelo wa lowandji la Jehowa ndeka ɛngɛnɔngɛnɔ aso hita ohomba. Koko dui sɔ halembetshiya ɔnɛ panda kaso bu dui di’ohomba kana ɔnɛ Jehowa hayakiyanya mɛtɛ lo dikambo diaso. Ngande weyaso dui sɔ?

7, 8. Wahɔ akɔna wayonga la oyindjamelo wa lowandji la Nzambi le so?

⁷ Jehowa nangaka anto woho w’anyanya. Lo mɛtɛ, sho tekɔ ohomba efula le nde, diakɔ diakandakimɔ Ɔnande dia sho nkondja lɔsɛnɔ la pondjo. (Jni. 3:16; 1 Jni. 4:9) Naka Jehowa hakotshisha alaka ande wendana la nshi yayaye, kete Satana ndo atunyi akina wayonga la shadiya. Satana mbutaka dia Jehowa ekɔ kanga kashi ladima anto ande kɛnɛ kele ɔlɔlɔ ndo ekɔ lo nɔmbɔla lo yoho ya kɔlɔ. Atunyi wekɔ lo mbɔla alaka wa Jehowa ndo wekɔ lo mbuta ɔnɛ: “Lende ele woongelo ande wakalakema? Nɛ dia ntatɛ lo lushi lakalale watshɛso djɔ lo nyɔi, diangɔ tshɛ diekɔ paka woho wokodiongaka oma k’etongelo k’andja.” (2 Pe. 3:3, 4) Koko, Jehowa ayokotsha alaka ande. Nde ekɔ lo nshikikɛ dia oyindjamelo wa lowandji lande ayendana ndo la panda k’anto wele l’okitanyiya. (Adia Isaya 55:10, 11.) Lowandji la Jehowa  pikama lo ngandji. Ɔnkɔnɛ, sho koka monga l’eshikikelo dia nde ayolangaka ndo ayɔsaka kɔlamelo y’ekambi ande la nɛmɔ nshi tshɛ.—Eto. 34:6.

⁸ Woho wele lowandji la Jehowa dikambo di’ohomba efula halembetshiya dia panda kaso bu ohomba le nde. Jehowa ndjakiyanyaka efula lo dikambo diaso. Sho pombaka nama kɛnɛ koleki ohomba lo yimba ndo nsukɛ ɛlɔmbwɛlɔ ka Jehowa la kɔlamelo tshɛ.

9. Kakɔna kakate Satana lo dikambo dia Jɔbɔ? (Enda osato wele lo mbɔtwɛlɔ.)

⁹ Ekɔ ohomba dia sho monga l’ekanelo k’ɔlɔlɔ lo kɛnɛ kendana la lowandji la Jehowa. Sho koka mɛna dui sɔ lo mbadiaka dibuku dia Jɔbɔ, diele dibuku dimɔtshi l’atei w’abuku wa lo Bible wakafundama ntondo. Lɔkɔ sho mbadiaka dia Satana akate ɔnɛ naka Jɔbɔ nsowa efula, kete nde ayotona Nzambi. Satana akalɔmbɛ Nzambi dia Jɔbɔ soyama. Jehowa kosala dui sɔ, koko nde akatshike dia Satana mpemba Jɔbɔ lo mbuta ɔnɛ: “Eenda, kɛnɛ tshɛ kele la nde kekɔ lo anya ayɛ.” (Adia Jɔbɔ 1:7-12.) Yema tshitshɛ oma laasɔ, Jɔbɔ akashisha ekambi ndo diangɔ diande. Oma laasɔ, nde akoke dia anande dikumi wakavwe. Satana akasale dia mɛnama oko Nzambi mbaki lo kiɔkɔ ya mpokoso shɔ. (Jɔbɔ 1:13-19) L’ɔkɔngɔ wa laasɔ, Satana akatatsha Jɔbɔ hemɔ ka paa efula ndo ka wɔnɔnyi. (Jɔbɔ 2:7) Dia ndeka mbetɛ akambo wolo, wadi aki Jɔbɔ ndo angɛnyi ande asato wa kashi wakawotɛ akambo wa lonyangu efula ndo wakɔkɔmɔla.—Jɔbɔ 2:9; 3:11; 16:2.

10. a) Ngande wakɛnya Jɔbɔ olowanyi ande le Nzambi? b) Lande na kakahombe Jɔbɔ mingɔma?

¹⁰ Onde kɛnɛ kakate Satana kaki mɛtɛ? Ndooko. Kaanga mbakadiɛnɛ Jɔbɔ la mpokoso ya wolo, ndooko lushi lakandatone Jehowa. (Jɔbɔ 27:5) Koko, l’etena kɛmɔtshi Jɔbɔ akohɛ kɛnɛ mɛtɛ kaki ohomba ndo akaleke nkanyiya efula lo dikambo diande ndamɛ. Nde akatetemala mbuta ɔnɛ nde kosala ndooko dikambo dia kɔlɔ. Jɔbɔ akafɔnya nto dia nde kokaka mbeya lande na kakandasowaka. (Jɔbɔ 7:20; 13:24) Ondo sho koka nshihodia woho wakayaoke Jɔbɔ. Koko, Jehowa akeyaka dia Jɔbɔ aki l’ekanelo ka kɔlɔ ndo nde akangola Jɔbɔ. Ngande wakandasale dui sɔ?

11, 12. Jehowa akandakimanyiya Jɔbɔ dia nshihodia? Kakɔna kakasale Jɔbɔ?

¹¹ Sho koka mbadia kɛnɛ kakatɛ Jehowa Jɔbɔ lo—tshapita 38 polo 41. ya lo dibuku dia Jɔbɔ. Jehowa konembetshiya Jɔbɔ lande  na kakandasowaka. Koko, Jehowa akalange mbokimanyiya dia nde nshihodia woho wakinde tshitshɛ lo mbɛdika la Nzambi. Nde aketsha Jɔbɔ di’ekɔ akambo efula w’ohomba woleki ekakatanu waki la Jɔbɔ. (Adia Jɔbɔ 38:18-21.) Ɛtɛkɛta wa Jehowa wakakimanyiya Jɔbɔ dia ntshikitanya ekanelo kande.

¹² Onde komonga dui dia dimɛna dia Jehowa ntɛkɛta la Jɔbɔ lo yoho shɔ l’ɔkɔngɔ wa nde nsowa? Ndooko, ndo Jɔbɔ ndaamɛ kokanyiya ngasɔ. Jɔbɔ akashihodia ndo akɔsɛ alako wa Jehowa la nɛmɔ. Nde akate ate: “[Lambɔlɔmba] edimanyielo lo kɛnɛ kakamate, ndo lamboyatshumoya lo ditshu ndo lo otoko.” (Jɔbɔ 42:1-6) Kombeta edja, ɔlɔngɔlɔngɔ Elihu akakimanyiya Jɔbɔ nto dia nde ntshikitanya ekanelo kande. (Jɔbɔ 32:5-10) L’ɔkɔngɔ wa Jɔbɔ mpokamɛ alako wa Jehowa wa la ngandji ndo wa nde ntshikitanya ekanelo kande, Jehowa akasale di’anto akina mbeya ɔnɛ nde akangɛnangɛna kɔlamelo ya Jɔbɔ.—Jɔbɔ 42:7, 8.

13. Ngande wakakoke dako dia Jehowa nkimanyiya Jɔbɔ l’ɔkɔngɔ w’ehemba ande nkomɛ?

¹³ Jɔbɔ akatetemala nkondja wahɔ oma lo dako dia Jehowa kaanga l’ɔkɔngɔ w’ehemba ande nkomɛ. “Jehowa akatshɔkɔla etenyi k’ekomelo ka lɔsɛnɔ la Jɔbɔ oleki etatelo.” L’ɔkɔngɔ diko, “nde akayonga ndo l’ana akina 7 w’apami ndo 3 wa wamato.” (Jɔbɔ 42:12-14) Kaanga mbakalangaka Jɔbɔ anande asɔ, nde mɛtɛ aki l’olengolengo l’ɔtɛ wa wanɛ wakavu. Ndo ondo nde kombohɛ akambo wa kɔlɔ tshɛ wakokomɛ nde la nkumbo kande. Kaanga naka Jɔbɔ akayeya lande na kakandahembama, nde akakoke mimbola lande na kaketawɔ Nzambi dia nde nsowa efula. Naka Jɔbɔ aki la tokanyi tɔsɔ, kete nde kokoka mbohɛ kɛnɛ kakawotɛ Jehowa. Dui sɔ diakakoke mbosamba ndo mbokimanyiya dia nde monga l’ekanelo k’ɔlɔlɔ.—Os. 94:19, nɔtɛ.

14. Wetshelo akɔna wakokaso nkondja oma lo kɛnɛ kakakomɛ Jɔbɔ?

¹⁴ Nkana yimba lo kɛnɛ kakakomɛ Jɔbɔ koka tokimanyiya dia sho ntshikitanya ekanelo kaso ndo koka tosamba. Dibuku dia Jɔbɔ diekɔ etenyi kɛmɔtshi k’akambo wakafunde Jehowa “dia tosha wetshelo, dia oma lo ekikelo kaso ndo oma lo esambelo k’oma lo Afundelo, sho monga la elongamelo.” (Rɔmɔ 15:4) Diɔ tetshaka ɔnɛ hatohombe kanyiyaka amboleka lo dikambo di’ekakatanu aso ko ndjotshika nkanyiya lo dikambo dia oyindjamelo wa lowandji la Jehowa. L’ɛnyɛlɔ ka Jɔbɔ, sho mɛnyaka woho wasukɛso lowandji la Jehowa lo ntshikala la  kɔlamelo le nde kaanga etena kele lɔsɛnɔ wolo.

15. Monga la kɔlamelo etena keso l’ekakatanu tokimanyiyaka dia nsala na?

¹⁵ Kɛnɛ kakakomɛ Jɔbɔ koka tosamba, nɛ dia tɔ mɛnyaka dia monga la ehemba halembetshiya dia Jehowa ambotomalɛ. Ehemba toshaka diaaso dia nsukɛ lowandji la Jehowa. (Tok. 27:11) Etena kakikɛso la kɔlamelo tshɛ, sho ngɛnyangɛnyaka Jehowa ndo elongamelo kaso ka lo nshi yayaye ndekaka nkeketala. (Adia Rɔmɔ 5:3-5.) Kɛnɛ kakakomɛ Jɔbɔ tɛnyaka dia “Jehowa ekɔ la ngandji k’efula ndo la kɛtshi.” (Jak. 5:11) Naka sho nsukɛ lowandji la Jehowa, kete nde ayotofuta. Mbeya dui sɔ tokimanyiyaka dia “mbikikɛ tshɛ lo tshɛ la solo dia lotutsha ndo l’ɔngɛnɔngɛnɔ.”—Kɔl. 1:11.

16. Lande na kahombaso mbohɔka dia oyindjamelo wa lowandji la Jehowa ekɔ ohomba efula?

¹⁶ Ekɔ mɛtɛ dia koka monga wolo dia ndeka mbidja yimba lo oyindjamelo wa lowandji la Jehowa etena kadiɛnɛso l’ekakatanu wa lo lɔsɛnɔ. Kaanga ekakatanu wa totshitshɛ koka mɛnama weke naka sho ndeka nkanyiya lo dikambo diawɔ. Ɔnkɔnɛ, sho pombaka mbohɔka wonya tshɛ woho wele ekɔ ohomba nsukɛ lowandji la Nzambi oyadi ekakatanu akɔna wele la so.

17. Ngande wele monga l’akambo efula wa nsala l’olimu wa Jehowa koka tokimanyiya dia ndeka mbidja yimba lo kɛnɛ kele mɛtɛ ohomba?

¹⁷ Monga l’akambo efula wa nsala l’olimu wa Jehowa koka tokimanyiya dia mbohɔka kɛnɛ koleki mɛtɛ ohomba. Ɛnyɛlɔ, kadiyɛso Renee aki la hemɔ ka wolo ka lo wɔɔngɔ kakawɛnyaka paa efula, nde aki nto la kasɛrɛ. Etena kakinde lo lopitadi, nde akasambishaka anto wakakambaka lɛkɔ, ɛkɔnyi ekina ndo wanɛ wakembolaka ɛkɔnyi. Etena kaki Renee lo lopitadi l’edja ka mingu hiende l’etenyi, nde akasambisha wenya 80. Kaanga mbakeyaka Renee dia nde ayovɔ, nde kombohɛ pondjo kɛnɛ kaki mɛtɛ ohomba. Nsukɛ lowandji la Jehowa akawosha wɔladi.

18. Kɛnɛ kakakomɛ Jennifer toshaka wetshelo akɔna lo kɛnɛ kendana la nsukɛ lowandji la Jehowa?

¹⁸ Sho koka nto nsukɛ lowandji la Jehowa etena kadiɛnɛso la ekakatanu wa totshitshɛ wa lushi la lushi. Kadiyɛso Jennifer aketsha nshi shato lo sɛkɛ dia ndɛkɛ dia kongaka aviyɔ. Oko wakawatasɛkɔlaka nshi y’aviyɔ ndja, Jennifer akayɔkɔmɔ ndo akayaoke opoko. Nde akakoke ntatɛ nyanga efula. Koko lo dihole dia nsala ngasɔ, Jennifer akalɔmbɛ Jehowa dia mbokimanyiya dia nde nsambisha anto akina wakakongaka aviyɔ lo sɛkɛ lokumu l’ɔlɔlɔ la Diolelo. Nde akasambisha anto efula ndo akawasha ekanda efula walembetshiya Bible. Jennifer akate ate: “Lakoke dia Jehowa akatshɔkɔla oyadi kɛnɛ kakakomɛ kɛsɔ ndo nde akambisha dihonga di’efula dia mɛmba lokombo lande lo yoho yakoka.”

19. Kakɔna keyanya atɛmɔdi wa mɛtɛ?

¹⁹ Paka ekambi wa Jehowa eto mbashihodia ohomba wa lowandji la Jehowa. Oshihodielo ɔsɔ mbeyanya atɛmɔdi wa mɛtɛ. Diakɔ diele, onto tshɛ la l’atei aso pombaka ndjashikikɛ dia ntetemala nsukɛ lowandji la Jehowa.

20. Ngande wayaoka Jehowa lo kɛnɛ tshɛ kasalayɛ dia nsukɛ lowandji lande?

²⁰ Jehowa mɛnaka ndo mbɔsaka la nɛmɔ kɛnɛ tshɛ kasalayɛ dia nsukɛ lowandji lande, woho wokambɛyɛ ndo wakikɛyɛ ehemba la kɔlamelo tshɛ. (Os. 18:25) Sawo diayela diayolembetshiya awui akina wɛnya lande na kele wɛ kokaka nsukɛ lowandji la Jehowa ndo woho wakokayɛ lisukɛ tshɛ lo tshɛ.