Onde wɛ aakohɔ?
Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:
Etena kalongolawɔ ɛlɔmbwɛlɔ k’oma l’okongamelo waki Nzambi, dionga diakɔna diahomba anangɛso, ɛnyɛlɔ emendji w’etshimbedi ndo dikumanyi dia l’etshumanelo monga la diɔ?
Vɔ pombaka nkitanyiya aha la ntshimbatshimba. Vɔ koka ndjambola ɔnɛ: ‘Onde dimi keketshaka anangɛmi l’akadiyɛmi dia monga la kɔlamelo le Jehowa? Onde dimi ndjelaka ɛlɔmbwɛlɔ kalongolami oma l’okongamelo wa Jehowa aha la ntshimbatshimba?’
Etena kakɔna kakonge Akristo lo lɔhɔmbɔ la Babilɔna?
Dui sɔ diakasalema yema tshitshɛ l’ɔkɔngɔ wa nyɔi k’apɔstɔlɔ. L’etena kɛsɔ, olui w’ewandji w’ɛtɛmwɛlɔ wakatatɛ kengama. Ɔtɛmwɛlɔ la lɛɛta wakasukɛ Akristo w’ɛtɔlɔki ndo wakasale la wolo dia nshila Akristo wele oko eponga oshiki. Koko lo ɛnɔnyi akumi w’oya lo 1914, akitami wakatatɛ ntshungɔ.
Lande na kaki olimu waki Lefèvre d’Étaples ohomba?
Lo ɛnɔnyi wa 1520, Lefèvre akakadimola Bible lo Falase dia anto k’anto monga la tɔ. Woho wakandalembetshiya avɛsa wa lo Bible aki la shɛngiya le Martin Luther, William Tyndale, ndo John Calvin.
Otshikitanu akɔna wele lam’asa “nkanyiya akambo wa lo demba” la “nkanyiya akambo wa lo nyuma”? (Rɔmɔ 8:6)
Onto lakanyiya akambo wa lo demba ndjashaka tshɛ lo nsaki ndo lo kɛnɛ kotoma demba diele keema kokele, sawolaka wonya tshɛ paka di’akambo wa lo demba ndo mbatɛtɛmɔlaka. Onto lakanyiya akambo wa lo nyuma ndjashaka l’akambo wa Nzambi, lɔsɛnɔ ndo tokanyi tande mendanaka la dui sɔ; Okristo wa ngasɔ nɔmbɔmaka la nyuma k’ekila. Nkanyiya akambo wa lo demba tɔlaka lo nyɔi, koko nkanyiya akambo wa lo nyuma tɔlaka lo lɔsɛnɔ ndo wɔladi.
Naa toho tɔmɔtshi shikaa ta nkitshakitsha ekiyanu?
Etsha akambo woleki ohomba lo dihole dia ntondo, longamɛ akambo wakoka salema, kongɛ etena ka kɔkɔlaka demba lushi tshɛ, ngɛnangɛna etongelo ka Nzambi, salaka shɛkɛsɛkɛ tena efula, sutshasutshaka demba mbala la mbala ndo lalaka djɔ efula.—w16.12, lk. 22-23.
“Ɛnɔkɛ akasɛkɔma ko nde kɔmɛna nyɔi.” (Hɛb. 11:5) Lo woho akɔna?
Ondo Nzambi akasɛkɔla Ɛnɔkɛ la ngandji tshɛ oma lo lɔsɛnɔ otsha lo nyɔi aha la nde mbeya dia nde otavu.
Lande na kele ekɔ ohomba mbeya elelo aso?
Onto leya elelo ande ndjaeyaka ndamɛ ndo nde shihodiaka ɔnɛ ekɔ akambo amɔtshi wende bu l’akoka wa nsala. Sho pombaka mbeya woho wakoka dionga diaso monga la shɛngiya le anto akina ndo aha ndjaɔsa la nɛmɔ amboleka.
Djembetelo yakɔna yɛnya ɔnɛ Nzambi akalɔmbɔlaka olui-walɔmbɔla wa lo ntambe ka ntondo paka oko walɔmbɔlande wanɛ wakenga Olui-walɔmbɔla ɛlɔ kɛnɛ?
L’ekimanyielo ka nyuma k’ekila, vɔ wakashihodia akambo wa mɛtɛ wa l’Afundelo. L’ekimanyielo k’andjelo, vɔ wakalɔmbɔlaka olimu w’esambishelo ndo wakayaɛkɛka l’Ɔtɛkɛta wa Nzambi etena kakawashaka ɛlɔmbwɛlɔ. Awui asɔ wekɔ lo salema ndo ɛlɔ kɛnɛ.
Awui akɔna watotshutshuya dia mbɔsa oshinga w’etshungwelo la nɛmɔ?
Awui anɛi anɛ: Onto lakawokimɔ, ɔkɔkɔ wakandawokimɔ, awui wakandayahondja dia mbokimɔ, ndo ohomba wakandakotsha. Sho pombaka nkana yimba lo woho wakakotshama awui asɔ.
L’ɔkɔngɔ wa mbɔsa yɛdikɔ mɔtshi, onde Okristo koka ndjotshikitanya yɛdikɔ yande?
Sho pombaka nɛmiya ɛtɛkɛta aso. Koko, lo tena dimɔtshi ekɔ ohomba nyomɔsɛdingola yɛdikɔ mɔtshi. L’ɔkɔngɔ w’anto ndjatshumoya, Nzambi akatshikitanya yɛdikɔ yande lo dikambo di’ase Niniva. Lo tena dimɔtshi, awui kana nsango y’eyoyo mbeyaka nɔmba dia nsala woho akɔ waamɛ.
Lande na kele lɔtɛndɔ la kɔlɔ lekɔ waale efula?
Lɔ koka nkonya onto diaha ndjakimɛ ndo ndeka mbetɛ okakatanu wolo. Oyadi tekɔ la shadiya kana bu, aha ntondja ɛtɛkɛta wa kɔlɔ mbayokandola dikambo.
