1, 2. Kakɔna kahomba onto l’onto l’atei aso mbeya? (Enda osato wele lo mbɔtwɛlɔ.)

OKO wakatadiɛnyi lo sawo dietshi, Diabolo ekɔ lo mbuta dia Jehowa hasungana nɔmbɔla anto. Nde mbutaka dia Jehowa halɔmbɔla dimɛna ndo ɔnɛ anto wayoleka monga l’ɔngɛnɔngɛnɔ naka vɔ ndjalɔmbɔla vɔamɛ. Onde Satana ekɔ la shadiya? Tɔshi dia anto kokaka ndjalɔmbɔla ndo nsɛna pondjo pondjo. Onde vɔ wotonga l’ɔngɛnɔngɛnɔ ndeka wɔnɛ wotonga la wɔ otondonga Nzambi mbaalɔmbɔla? Onde wɛ otoleka monga l’ɔngɛnɔngɛnɔ otondonga wɛ kokaka nsɛna pondjo pondjo aha la mendɛ tshɛ lo tshɛ le Nzambi?

² Ndooko onto lakoka mbisha okadimwelo wa ambola asɔ lo dihole diayɛ. Onto l’onto l’atei aso pombaka nkana yimba dimɛna lo dikambo diawɔ. Lo nsala ngasɔ mbayotoshihodia hwe dia yoho ya Jehowa ya nɔmbɔla ndeka tshɛ dimɛna ndo ɔnɛ nde mbakokaso nsukɛ l’otema ɔtɔi. Sho shikikɛka mɛtɛ ka dui sɔ l’ɔtɛ wa kɛnɛ kadiaso lo Bible. Tayanga mɛna kɛnɛ kata Bible lo dikambo dia lotshungɔ lele la Jehowa la nɔmbɔla andja w’otondo.

3. Lande na kele Jehowa ekɔ la lotshungɔ la monga Omboledi w’andja w’otondo?

³ Jehowa ndamɛ mbele Omboledi w’andja w’otondo, nɛ dia  nde mbele Nzambi Kanga-Wolo-Tshɛ ndo Otungi. (1 Ɛk. 29:11; Ets. 4:24) Lo ɛnɛlɔ kɛmɔtshi ka l’olongo, nkumi ya dikanga 144 000 wayolɛ kaamɛ la Kristo wakate ɔnɛ: “Wɛ Jehowa Nzambi kaso, wɛ kasungana nongola lotombo, kɛnɛmɔ ndo wolo, nɛ dia wɛ kakatonge diangɔ tshɛ, ndo oma lo lolango layɛ mbakadionge ndo mbakadiatongama.” (Ɛny. 4:11) Jehowa mbakatonge diangɔ tshɛ, diakɔ diele nde ekɔ la lotshungɔ la nɔmbɔla onto tshɛ, oyadi l’olongo kana la nkɛtɛ.

4. Lande na kele lotshungɔ la nsɔna hatosha lotshungɔ la tɔmbɔkwɛ Nzambi?

⁴ Satana kotonga ndooko ɛngɔ. Diakɔ diele, nde bu kaanga la yema ya lotshungɔ la nɔmbɔla andja. Satana nde la wadi l’omi la ntondo komonga l’okitanyiya etena kakawatɔmbɔkwɛ lowandji la Jehowa. (Jɛr. 10:23) Onde lotshungɔ lawɔ la nsɔna lakawasha lotshungɔ la ntona ɛlɔmbwɛlɔ ka Jehowa? Ndooko. Lotshungɔ la nsɔna mbishaka onto lotshungɔ la nsɔna ndo mbɔsa tɛdikɔ, koko aha lotshungɔ la tɔmbɔkwɛ Jehowa Otungi. Lo mɛtɛ, tɔmbɔkwɛ Nzambi ekɔ nkamba la lotshungɔ la nsɔna lo yoho ya kɔlɔ. Oko weso anto, tekɔ l’ohomba w’ɛlɔmbwɛlɔ ka Jehowa.

5. Lande na kele tɛdikɔ ta Nzambi mongaka tena tshɛ la losembwe?

⁵ Tende ɔkɔkɔ okina wɛnya lande na kele Jehowa ekɔ la lotshungɔ la nɔmbɔla. Nde kambaka la lowandji lande lo yoho ya kokele. Nde totɛka ɔnɛ: “Dimi kele Jehowa, Ɔnɛ lɛnya ngandji ka kɔlamelo, losembwe ndo sambo k’ɔlɔlɔ la nkɛtɛ, nɛ dia lo akambo asɔ mbangɛnangɛnami.” (Jɛr. 9:24) Jehowa bu l’ohomba w’ɛlɛmbɛ w’anto dia mbokimanyiya dia nshikikɛ kɛnɛ kele ɔlɔlɔ. Koko, nde shikikɛka atɔndɔ wendana la kɛnɛ kele ɔlɔlɔ. Ndo Jehowa mbidjɛka anto ɛlɛmbɛ wohikami lo losembwe lande la kokele. Omembi w’esambo akate ate: “Kiti kayɛ ka lowandji mbikama lo losembwe la sambo k’ɔlɔlɔ.” Diakɔ diele, ɔlɛmbɛ tshɛ, tɔndɔ ndo yɛdikɔ tshɛ y’oma le Jehowa yekɔ ɔlɔlɔ. (Os. 89:14; 119:128) Satana mbutaka dia Jehowa ekɔ Ɔnɔmbɔdi wele bu la losembwe. Koko, Satana ndamɛ hakoke mbela losembwe l’andja ɔnɛ.

6. Naa ɔkɔkɔ ɔmɔtshi wɛnya dia Jehowa ekɔ la lotshungɔ la nɔmbɔla?

⁶ Ɔkɔkɔ okina wɛnya dia Jehowa ekɔ la lotshungɔ la nɔmbɔla ele nɛ dia nde ekɔ la ewo ndo lomba la nkokɛ andja w’otondo. Sho mɛnaka dui sɔ lo woho wakandasha Ɔnande dikoka dia nkɔnɔla hemɔ yele ndooko dɔkɔtɛlɛ diakakoke nkɔnɔla. (Mat. 4:23, 24; Makɔ 5:25-29) Kaanga mbele akambo asɔ wekɔ ahindo le so, vɔ komonga ahindo le Jehowa. Nde shihodiaka woho wakamba demba di’onto ndo nde kokaka nkɔnɔla oseka hemɔ tshɛ kele lɔkɔ. Nde kokaka nto mbolola wanɛ wakavu ndo nkomiya mpokoso y’oma lo diangɔ diakatongama.

7. Lo woho akɔna wele Jehowa la lomba ndeka onto tshɛ la l’andja wa Satana?

⁷ Andja walɔmbɔma oma le Satana hawokoke mbela wɔladi, oyadi lo wodja ɔmɔtshi kana lam’asa wedja. Paka Jehowa mbele la lomba la mbela wɔladi l’andja ɔnɛ. (Isa. 2:3, 4; 54:13) Sho ndjaokaka oko ɔpɔstɔlɔ Pɔɔlɔ etena kakandate ate: “Ande efula ka ɔngɔnyi, ka lomba ndo ka ewo ka Nzambi lee! Dombwelo diande hadiomanema mfundo ndo mboka yande hayeyama mɛtɛ nɔnda!”—Rɔmɔ 11:33.

8. Ngande wayaokayɛ lo kɛnɛ kendana la yoho ya Jehowa ya nɔmbɔla?

⁸ Oko wambotodiɛna, Bible mɛnyaka hwe dia Jehowa ekɔ la lotshungɔ la nɔmbɔla. Tɔ mɛnyaka nto lande na kende Ɔnɔmbɔdi woleki tshɛ dimɛna. Ɔkɔkɔ ɔmɔtshi ele nɛ dia nde  nɔmbɔlaka la ngandji. Sho ndjaokaka suke la nde etena kakanyiyaso woho wende Nzambi “ka kɛtshi ndo kokana kandji, kahoke nkɛlɛ esadi ndo koludi tɔɔ la ngandji ka kɔlamelo ndo la mɛtɛ.” (Eto. 34:6) Nzambi tosalɛka akambo la kɛnɛmɔ ndo la dilɛmiɛlɔ. Nde tokokɛka oleki woho wakokaso ndjakokɛ. Diabolo mbutaka dia Jehowa ekɔ lo dima ekambi Ande diangɔ di’ɛlɔlɔ, koko ɔsɔ ekɔ kashi. Nzambi akakimɔ ndo Ɔnande la nɛmɔ efula dia sho monga l’elongamelo ka nsɛna pondjo pondjo.—Adia Osambo 84:11; Rɔmɔ 8:32.

9. Ngande weyaso dia Nzambi ndjashaka le so l’onto ndo l’onto?

⁹ Jehowa nangaka ekambi ande tshɛ oko olui. Koko nde ndjashaka nto efula le onto l’onto. Tokanyiya yema kɛnɛ kakatombe lo nshi y’edjedja. L’edja k’ɛnɔnyi oko nkama shato, Jehowa akakambe la toshushi dia nɔmbɔla wodja ande ndo mbakimanyiya dia vɔ mbidja atunyi awɔ otshumba. Koko l’etena kɛsɔ tshɛ, Jehowa akatetemala ndjasha le onto l’onto. Ruta aki womoto ɔmɔtshi l’atei awɔ. Nde komonga ose Isariyɛlɛ ndo nde akatshike awui efula dia monga ɔtɛmɔdi wa Jehowa. Nde akoofute lo mbosha omi ndo ɔna pami. Koko laadiko dia laasɔ, ɔnaki Ruta akayonga onto ɔmɔtshi la l’ɔlɔndji wa nkumbo kakakonya le Mɛsiya. Jehowa akasale nto dia ɔkɔndɔ wa lɔsɛnɔ la Ruta fundama lo Bible, lo dibuku diakayelamɛ lokombo lande. Ngande wafɔnyayɛ wayoyaoka Ruta etena kayondolɔ ndo kayondeya awui asɔ?—Ruta 4:13; Mat. 1:5, 16.

10. Lande na kakokaso mbuta ɔnɛ ɛlɔmbwɛlɔ ka Jehowa bu ka la ngala?

¹⁰ Ɛlɔmbwɛlɔ ka Jehowa bu ka la ngala. Diakɔ diele, wanɛ wookitanyiya hawoyaoke lo shasa ndo wekɔ l’ɔngɛnɔngɛnɔ efula. (2 Kɔr. 3:17) Davidɛ akate lo dikambo dia Jehowa ate: “Lalende kele lɔnɛnɛ ndo lotombo; wolo ndo ɔngɛnɔngɛnɔ wekɔ lo dihole diadjasɛnde.” (1 Ɛk. 16:7, 27) Omembi w’esambo Etana akafunde ate: “Ɔngɛnɔngɛnɔ le anto weya mbida ekoko w’ɔngɛnɔngɛnɔ. Jehowa le, vɔ kɛndakɛndaka lo osase w’elungi kayɛ. Vɔ ngɛnangɛnaka lo lokombo layɛ lushi l’otondo, ndo vɔ wambodiyama lo losembwe layɛ.”—Os. 89:15, 16.

11. Ngande wakokaso ndeka monga l’eshikikelo ɔnɛ lowandji la Jehowa mboleki tshɛ dimɛna?

¹¹ Etena kayotoleka nkana yimba lo ɔlɔlɔ wa Jehowa, mbayotoleka nshikikɛ ɔnɛ ɛlɔmbwɛlɔ kande mboleki tshɛ dimɛna. Sho ndjaokaka oko omembi w’esambo wakatɛ Nzambi ate: “Lushi ɔtɔi lo asɛkɛ ayɛ ndeka nshi kinunu (1000) dihole dikina tshɛ!” (Os. 84:10) Jehowa mbakatotonge, diakɔ diele nde mbeyaka shikaa kɛnɛ kayotosha ɔngɛnɔngɛnɔ. La lokaho tshɛ nde toshaka diangɔ efula oleki kɛnɛ kele la so ohomba. Dikambo tshɛ diatɔlɔmba Jehowa dia nsala diekɔ lo wahɔ aso hita. Kaanga naka sho pombaka ndjahondja awui amɔtshi, tayongaka nshi tshɛ l’ɔngɛnɔngɛnɔ naka sho nkitanyiya Jehowa.—Adia Isaya 48:17.

12. Ɔkɔkɔ akɔna woleki woke wasukɛso lowandji la Jehowa?

¹² Sho mbeyaka l’ekimanyielo ka Bible ɔnɛ l’ɔkɔngɔ wa Ɛlɔmbwɛlɔ k’ɛnɔnyi kinunu ka Kristo, anto amɔtshi wayɔtɔmbɔkwɛ lowandji la Jehowa. (Ɛny. 20:7, 8) Kakɔna kayowakonya dia nsala dui sɔ? L’etena kɛsɔ, Diabolo ayotshutshuya anto dia nsala akambo la lokaki. Nde okosalaka dui sɔ. Nde ayosala la wolo dia mbetawoya anto ɔnɛ vɔ koka nsɛna pondjo pondjo aha la nkitanyiya Jehowa. Dui sɔ hadiokoke monga mɛtɛ pondjo. Koko sho pombaka ndjambola ɔnɛ: ‘Onde layetawɔ kashi  ka ngasɔ?’ Naka mɛtɛ sho mbokaka Jehowa ngandji ndo tekɔ l’eshikikelo ɔnɛ nde ekɔ ɔlɔlɔ ndo ɔnɛ nde ekɔ la lotshungɔ la nɔmbɔla andja, kete tayotona kashi ka ngasɔ. Tayolanga nsɛna paka l’ɛlɔmbwɛlɔ ka lowandji la Jehowa, ɔnɛ lalɔmbɔla la ngandji.

13. Ngande wasukɛso lowandji la Nzambi etena kawokoyaso?

¹³ Oko wambotodiɛna, Jehowa ekɔ la lotshungɔ la nɔmbɔla ndo yoho yande ya nɔmbɔla mboleki tshɛ dimɛna. Sho pombaka nsukɛ lowandji lande tshɛ lo tshɛ. Sho lisukɛka etena kongaso la kɔlamelo le Jehowa ndo kawokoyaso. Etena kasalaso la wolo dia nsala akambo oko wasala Jehowa, sho mɛnyaka dia sho mbolangaka ndo sukɛka yoho yande ya nɔmbɔla.—Adia Ɛfɛsɔ 5:1, 2.

14. Ngande wakoka dikumanyi ndo ewandji wa nkumbo mbokoya Jehowa?

¹⁴ Sho mbeyaka l’ekimanyielo ka Bible ɔnɛ mbala tshɛ Jehowa kambaka la wolo ande la ngandji. Ewandji wa nkumbo ndo dikumanyi dialanga lowandji la Jehowa mbookoyaka ndo hawonge awui wolo kana nyanga dia mbeya vuiwui tshɛ. Ɔpɔstɔlɔ Pɔɔlɔ akasale la wolo dia mbokoya Nzambi ndo Ɔnande. (1 Kɔr. 11:1) Nde kombotsha anto akina nsɔnyi kana mbatshutshuya dia nsala kɛnɛ kaki ɔlɔlɔ. Koko, la ngandji tshɛ nde akaakimanyiyaka dia nsala kɛnɛ kaki ɔlɔlɔ. (Rɔmɔ 12:1; Ɛf. 4:1; Filɛ. 8-10) Lo nsala dui sɔ, Pɔɔlɔ akookoya Jehowa. Etena kasalɛso anto akina akambo la ngandji, sho sukɛka lowandji la Jehowa.

15. Ngande wasukɛso ɛlɔmbwɛlɔ ka Jehowa lo nɛmiya wanɛ wele la lowandji?

¹⁵ Sho sukɛka ɛlɔmbwɛlɔ ka Jehowa nto lo nɛmiya ndo nkamba kaamɛ la wanɛ wakandasha lowandji. Kaanga naka hatoshihodia tshɛ lo tshɛ kana hatetawɔ yɛdikɔ mɔtshi yambowɔsa, sho pombaka mbasukɛ. Aha ngasɔ mbasala ase andja ɔnɛ, koko sho ngasɔ mbasalaso  etena ketawɔso Jehowa oko Ɔnɔmbɔdi aso. (Ɛf. 5:22, 23; 6:1-3; Hɛb. 13:17) Ndo oma laasɔ sho mongaka l’ɔngɛnɔngɛnɔ, nɛ dia Nzambi nangaka kɛnɛ koleki ɔlɔlɔ le so.

16. Ngande wakoka tɛdikɔ tɔsaso mɛnya dia sho sukɛka lowandji laki Nzambi?

¹⁶ Sho koka nto nsukɛ lowandji la Nzambi oma lo tɛdikɔ tɔsaso. Jehowa hatosha ɛlɛmbɛ ɛmɔtshi shikaa wendana la dui tshɛ dia lo lɔsɛnɔ. Koko, nde totɛka woho wakanyiyande. Dui sɔ tokimanyiyaka dia nshihodia kɛnɛ kahombaso nsala. Ɛnyɛlɔ, Jehowa hasha Akristo listɛ la kɛnɛ kahombawɔ ndɔta kana kahawahombe ndɔta. Koko, nde totɛka dia ɛnamelo kaso pombaka monga la wɛdimo ndo kakoka le Ɛmɛnyi wa Jehowa. (1 Tim. 2:9, 10) Nde nangaka dia sho nkana yimba lo woho wonga tɛdikɔ taso la shɛngiya le anto akina. (1 Kɔr. 10:31-33) Etena kɔsaso tɛdikɔ tohikami lo woho wakanyiya Jehowa, sho mɛnyaka dia sho nangaka ndo sukɛka yoho yande ya nɔmbɔla.

17, 18. Ngande wakoka atshukanyi mɛnya dia wekɔ lo nsukɛ lowandji la Jehowa?

¹⁷ Tende woho wakoka atshukanyi w’Akristo nsukɛ lowandji la Jehowa. Diwala di’atshukanyi amɔtshi koka monga woho wakiwɔ kɔfɔnyaka. Vɔ koka kaanga monga l’ekakatanu wa wolo. Naka ngasɔ mbediɔ, kete vɔ koka nkondja wahɔ lo nkana yimba lo woho wakasalɛka Jehowa wodja w’Isariyɛlɛ w’edjedja akambo. Jehowa akatɛkɛta dikambo diande ndamɛ lo monga oko omi le wodja ande. (Isa. 54:5; 62:4) Wodja ɔsɔ wakanyangiyaka Jehowa mbala efula. Diɔtɔnganelo sɔ diaki oko dia lo diwala diele l’ekakatanu. Koko Jehowa kɔsɛka Isariyɛlɛ esadi eto. Koko, nde akaadimanyiyaka mbala la mbala ndo akakotshaka alaka ande lo dikambo diawɔ.—Adia Osambo 106:43-45.

¹⁸ Atshukanyi w’Akristo woka Jehowa ngandji salaka la wolo dia mbookoya. Kaanga naka ekakatanu wekɔ lo diwala diawɔ, vɔ hawoyange dia ndjaka diwala lo yoho yahɔtɔnɛ l’Afundelo. Vɔ mbeyaka dia Jehowa mbɔsaka dɔkɔlɔkɔ dia diwala oko dui di’ohomba ndo nde nangaka dia wadi l’omi ‘mamatana.’ Awui wa mindo wa dieyanelo mbele tshɔi y’ɔkɔkɔ wa l’Afundelo wakoka onto ndjaka diwala ndo monga la lotshungɔ la nyomotshukana. (Mat. 19:5, 6, 9) Etena kasala Akristo kɛnɛ tshɛ kakokawɔ nsala dia ntondoya diwala diawɔ, vɔ sukɛka lowandji la Jehowa.

19. Kakɔna kahombaso nsala naka tambosala munga?

¹⁹ Sho tshɛ keema kokele, ndo lo tena dimɔtshi sho salaka akambo wanyangiya Jehowa. Nde mbeyaka dui sɔ, diakɔ diakandakimɔ oshinga w’etshungwelo wa Kristo. Ɔnkɔnɛ, etena kasalaso munga, sho pombaka nɔmba Jehowa dia nde todimanyiya. (1 Jni. 2:1, 2) Lo dihole dia nyanga tsho l’ɔtɛ wa munga yaso, sho pombaka nsala la wolo dia nkondja wetshelo oma lɔkɔ. Sho nangaka ntshikala suke la Jehowa, ɔnɛ latodimanyiya, latokimanyiya dia nkɔnɔ ndo ntetemala mbokambɛ.—Os. 103:3.

20. Lande na kahombaso nsukɛ lowandji la Jehowa oma ko kakianɛ?

²⁰ L’andja w’oyoyo, onto tshɛ ayɔlɔmbɔma oma le Jehowa ndo ayeka mboka yande y’osembwe. (Isa. 11:9) Koko kaanga kakianɛ sho koka mbeka akambo efula wendana la woho wakanyiyande ndo woho walangande dia sho nsala akambo. Kema edja nto, ndooko onto layodja taamu lo dikambo dia lotshungɔ lele la Nzambi la nɔmbɔla. Ɔnkɔnɛ, nyɛsɔ tosale kɛnɛ tshɛ kakokaso nsala dia nsukɛ lowandji la Jehowa, lo mbokitanyiyaka, mbokambɛka la kɔlamelo tshɛ ndo tosale la wolo dia mbookoya lo kɛnɛ tshɛ kasalaso.