1. L’ɔtɛ w’ɛngɔ kakɔna kolekiso waa nyama?

JEHOWA akasha anto ɛngɔ kɛmɔtshi ka laande. Ɛngɔ kakɔ ele nkum’otema. L’ɔtɛ w’ɛngɔ kɛsɔ mbolekiso waa nyama. Ngande weyaso dia Adama la Eva waki la nkum’otema? L’ɔkɔngɔ wa vɔ pindolɛ Nzambi, vɔ wakayashɛ. Nkum’otema kawɔ kakawaanya.

2. Ngande wafɔna nkum’otema kaso la yɛnya nɔrdɛ? (Enda osato wele lo mbɔtwɛlɔ.)

² Nkum’otema kaso kekɔ dikoka diele l’etei k’otema dia ntshikitanya ɔlɔlɔ la kɔlɔ diakoka tɔlɔmbɔla lo lɔsɛnɔ. Onto lele la nkum’otema kahekiyama dimɛna ekɔ oko masuwa wele la yɛnya nɔrdɛ yambolana. Mpɛpɛ ndo asuku wa lo ndjale koka ntɔla masuwa ɔsɔ otsha lo dihole dia kɔlɔ. Koko yɛnya nɔrdɛ yakamba dimɛna kimanyiyaka kapitɛnyi dia ntetemala nkɛndjakɛndja masuwa otsha lɛnɛ atandatshu. Woho akɔ waamɛ mbele, naka sho mbekiya nkum’otema kaso dimɛna, kete tɔ koka tɔlɔmbɔla dimɛna.

3. Kakɔna kakoka ntomba naka hatekiya nkum’otema kaso dimɛna?

³ Naka nkum’otema kaso hekiyama dimɛna, kete tɔ hatotewola  diaha nsala kɛnɛ kele kɔlɔ. (1 Tim. 4:1, 2) Tɔ koka kaanga tetawoya ɔnɛ “kɔlɔ ekɔ ɔlɔlɔ.” (Isa. 5:20) Yeso akatɛ ambeki ande ate: “Wonya wekɔ lo ndjaye wele onto tshɛ lanyodiaka ayɔfɔnya dia nde ambokambɛ Nzambi olimu w’ekila.” (Jni. 16:2) Ngasɔ mbakafɔnyaka wanɛ wakadiake ombeki Stɛfano. (Ets. 6:8, 12; 7:54-60) L’edja k’ɔkɔndɔ w’anto, ase ɛtɛmwɛlɔ efula wakasale akambo wa kɔlɔ efula, ɛnyɛlɔ ndjaka ndo vɔ wakate dia wakasale dui sɔ lo lokombo la Nzambi. Koko lo mɛtɛ, kɛnɛ kakawasale kɔmbɔtɔnɛka la ɛlɛmbɛ wa Nzambi. (Eto. 20:13) Mɛnamaka dia nkum’etema yawɔ kombalɔmbɔla dimɛna!

4. Ngande wakokaso nshikikɛ dia nkum’otema kaso kekɔ lo nkamba dimɛna?

⁴ Ko ngande wakokaso nshikikɛ dia nkum’otema kaso kekɔ lo nkamba dimɛna? Ɛlɛmbɛ ndo atɔndɔ wa lo Bible “wekɔ ohomba dia mbetsha, dia mpangwɛ, dia mbidja akambo l’ɔnɔngɔ ndo dia mpokola lo losembwe.” (2 Tim. 3:16) Sho pombaka mbekaka Bible mbala la mbala, kanaka yimba efula la kɛnɛ katatɔ ndo nkamba la tɔ lo lɔsɛnɔ laso. Lo nsala ngasɔ, tayeka dia ndeka nkanyiya oko wakanyiya Jehowa. Oma laasɔ, sho koka nshikikɛ dia nkum’otema kaso kayotɔlɔmbɔla dimɛna. Tayanga nsɛdingola woho wakokaso nkamba la ɛlɛmbɛ ndo atɔndɔ wa Jehowa dia mbekiya nkum’otema kaso.

5, 6. Ngande watokimanyiya ɛlɛmbɛ wa Nzambi?

⁵ Naka sho nangaka di’ɛlɛmbɛ wa Nzambi tokimanyiya, kete sho pombaka nsala awui efula laadiko dia mbawadia tsho kana mbeya kɛnɛ katawɔ. Sho pombaka mbalanga ndo mbakitanyiya. Bible totɛka ɔnɛ: “Nyohetsha kɛnɛ kele kɔlɔ ndo nyolange kɛnɛ kele ɔlɔlɔ.” (Am. 5:15) Ko ngande wakokaso nsala dui sɔ? Sho pombaka mbeka dia mɛna akambo oko awaɛna Jehowa. Tokane yimba la dui nɛ. Ohɔsa dia wɛ haladi dimɛna ndo dɔkɔtɛlɛ diayɛ ambokotɛ dia wɛ pombaka ndɛ mbo ya ndɛ y’amɛna, ndeka nsutshasutsha demba ndo ntshikitanya awui akina lo yoho yayɛ ya lɔsɛnɔ. Wɛ amboyela dako diande ndo awui weta dimɛna! Ngande wayoyoyaoka lo dikambo di’alako wa dɔkɔtɛlɛ sɔ?

⁶ Woho akɔ waamɛ mbele, Otungi aso akatosha ɛlɛmbɛ dia tokokɛ lo etombelo wa kɔlɔ w’oma lo pɛkato ndo dia ndowanya lɔsɛnɔ laso. Ɛnyɛlɔ, Bible tetshaka dia hatohombe mbita kashi, mbiva lo kalasa, mbiva, nsala awui wa mindo wa dieyanelo, awui wa ngala ndo aha monga la diɔtɔnganelo la ɛdiɛngɛ. (Adia Tokedi 6:16-19; Ɛny. 21:8) Etena kɛnaso etombelo w’amɛna waya lo nkitanyiya Jehowa, ngandji kawokaso ndo kokaso ɛlɛmbɛ ande fulaka.

7. Ngande watokimanyiya ɛkɔndɔ wa lo Bible?

⁷ Aha paka tambosowa l’etombelo wa kɔlɔ w’oma lo mpindola ɛlɛmbɛ wa Nzambi ko sho ndjeka kɛnɛ kele ɔlɔlɔ la kɛnɛ kele kɔlɔ. Sho koka nkondja wetshelo oma lo munga yakasale anto akina lo nshi yakete. Bɛnyɛlɔ di’anto asɔ diekɔ lo Bible. Tokedi 1:5 mbitaka ɔnɛ: “Kanga lomba pokamɛka ndo kondjaka wetshelo efula.” Dako sɔ ndja oma le Nzambi ndo diɔ diekɔ dako dioleki tshɛ dimɛna! Ɛnyɛlɔ, tokanyiya woho wakasowe Davidɛ l’ɔkɔngɔ wa nde pindolɛ Jehowa ndo nsala loseka la Batɛ-Shɛba. (2 Sa. 12:7-14) Etena kadiayɛ ɔkɔndɔ ɔsɔ, yambola wate: ‘Ngande wakakoke Davidɛ mbewɔ ohemba ɔsɔ? Kakɔna kotomosala otomonga la ntondo k’ohemba akɔ waamɛ? Otondonga dimi mbakahembama dia nsala awui  wa mindo wa dieyanelo, onde lotonga oko Davidɛ kana oko Yɔsɛfu?’ (Eta. 39:11-15) Naka sho nkana yimba dimɛna lo etombelo wa kɔlɔ waya oma lo pɛkato, kete tayoleka “[mp]etsha kɛnɛ kele kɔlɔ.”

8, 9. a) Kakɔna katokimanyiya nkum’otema kaso dia nsala? b) Ngande walɔmbwama nkum’otema kaso la atɔndɔ wa Jehowa?

⁸ Ekɔ dimɛna sho mangana etale l’akambo wahetsha Nzambi. Ko ahombaso nsala la ntondo ka dui diele Bible hasha ɔlɛmbɛ shikaa? Ngande wayoteya kɛnɛ kalanga Nzambi dia sho nsala? Naka taketawɔ dia Bible ndowanya nkum’otema kaso, kete tayɔsa yɛdikɔ ya lomba.

⁹ Lam’ele Jehowa tokaka ngandji, nde akatosha atɔndɔ wakoka nɔmbɔla nkum’otema kaso. Nde mbutaka ɔnɛ: “Dimi Jehowa kele Nzambi kayɛ, Ɔnɛ latoketshaka dikambo dia wahɔ ayɛ, Ɔnɛ lakɔlɔmbɔla lo mboka kahombayɛ nkɛndakɛnda.” (Isa. 48:17, 18) Etena kakanaso yimba efula l’atɔndɔ wa lo Bible ndo ketawɔso dia vɔ minanda otema aso, sho koka mingola kana ndowanya nkum’otema kaso. Dui sɔ tokimanyiyaka dia mbɔsa tɛdikɔ ta lomba.

10. Tɔndɔ kɛdikɛdi na, ndo ngande wakakambe Yeso l’atɔndɔ lo wetshelo ande?

¹⁰ Tɔndɔ ekɔ dikambo dia mɛtɛ di’ohomba di’oma lo Bible dialɔmbɔla ekanelo kaso ndo diatokimanyiya dia mbɔsa tɛdikɔ t’amɛna. Mbeya atɔndɔ wa Jehowa tokimanyiyaka dia nshihodia woho wakanyiyande ndo lande na katodjɛnde ɛlɛmbɛ ɛmɔtshi. Yeso akakambe l’atɔndɔ dia mbetsha ambeki ande dia waonga ndo etsha w’onto mongaka l’etombelo ɛmɔtshi. Ɛnyɛlɔ, nde aketsha dia nkɛlɛ koka nkonya lo awui wa ngala ndo ɔnɛ tokanyi ta mindo koka nkonya lo loseka. (Mat. 5:21, 22, 27, 28) Naka sho mbetawɔ di’atɔndɔ wa Jehowa tɔlɔmbɔla, kete nkum’otema kaso kayekiyama dimɛna ndo tayosala ɛsɔnwɛlɔ watombola Nzambi.—1 Kɔr. 10:31.

11. Ngande wakoka nkum’otema k’onto ɔmɔtshi ntshikitana la k’onto okina?

¹¹ Oyadi Akristo wambekiya nkum’etema yawɔ lo nkamba la Bible, onto l’onto koka monga la kanyi yotshikitanyi l’awui amɔtshi. Ɛnyɛlɔ ka dui sɔ koka mendana la nnɔ wanu kana bu. Bible hate dia ekɔ kɔlɔ nnɔ wanu, koko tɔ tewolaka dia hatohombe nnɔ wanu efula kana mbidjɔ. (Tok. 20:1; 1 Tim. 3:8) Onde dui sɔ nembetshiyaka dia Okristo hahombe mbidja yimba l’awui akina kaanga naka nde ekɔ lo nnɔ wanu la wɛdimo? Ndooko. Oyadi kaanga nkum’otema kande hawanya etena kanɔnde wanu, nde pombaka mbidja yimba lo nkum’otema k’anto akina.

12. Ngande wakoka ɛtɛkɛta wele lo Rɔmɔ 14:21 tokimanyiya dia nɛmiya nkum’etema y’anto akina?

¹² Pɔɔlɔ akɛnya dia sho pombaka nɛmiya nkum’etema y’anto akina etena kakandafunde ate: “Ndeka dimɛna aha ndɛ onatshi kana nnɔ wanu kana nsala dikambo dikina tshɛ diakoka ntakanya ɔnanyɔ.” (Rɔmɔ 14:21) Kaanga naka tekɔ la lotshungɔ la nnɔ wanu, sho koka monga suke dia ndjahondja lotshungɔ lɔsɔ naka sho mbeyaka ɔnɛ nnɔ wanu ayokiyanya nkum’otema k’Okristo okina. Mbeyaka monga ko ɔnangɛso ɔmɔtshi aki mfumbe ka wanu ntondo ka mbeka akambo wa mɛtɛ ndo akɔshi yɛdikɔ y’aha nnɔ nto. Hatohombe nsala ndooko dui diakoka mbokonya dia kalolɛ mbekelo yande y’edjedja. (1 Kɔr. 6:9, 10) Naka wɛ ambelɛ ɔnangɛso ɔsɔ lakayɛ, onde wɛ ayowotshutshuya dia nnɔ wanu kaanga nde ekɔ lo ntona? Ndooko kaanga yema!

13. Ngande wakalɛmiya Timɔte nkum’etema y’anto akina dia mbakimanyiya dia vɔ mbetawɔ lokumu l’ɔlɔlɔ?

 ¹³ Etena kaki Timɔte ɔlɔngɔlɔngɔ, nde aketawɔ minyɛma mpota kaanga mbaki dui sɔ nkandji efula. Nde akeyaka dia minya mpota aki dui di’ohomba le ase Juda wakandatatshɔka tosambisha. L’ɛnyɛlɔ ka Pɔɔlɔ, Timɔte konangaka ntakanya anto akina. (Ets. 16:3; 1 Kɔr. 9:19-23) Onde wɛ lawɔ ekɔ suke dia ndjahondja dia nkimanyiya anto akina?

14, 15. a) Ngande wongaso anto wambotshunda? b) Ngande wasalɛ Akristo wambotshunda anto akina akambo?

¹⁴ Sho tshɛ hatohombe komɛ tsho lo mbeya “wetshelo w’etatelo wendana la Kristo,” koko tosale la wolo dia “monga anto wambotshunda.” (Hɛb. 6:1) Hatoyala Akristo wambotshunda paka l’ɔtɛ wamboteya akambo wa mɛtɛ l’edja k’ɛnɔnyi efula. Sho pombaka mbidja welo dia ntshunda. Sho pombaka pamia ewo ndo eokelo kaso. Diakɔ diele sho pombaka mbadiaka Bible lushi tshɛ. (Os. 1:1-3) Naka wɛ mbadiaka Bible lushi la lushi, kete wɛ ayoleka nshihodia ɛlɛmbɛ ndo atɔndɔ wa Jehowa.

¹⁵ Ɔlɛmbɛ akɔna woleki ohomba le Akristo? Ɔlɛmbɛ wa ngandji. Yeso akatɛ ambeki ande ate: “Oma lo dikambo nɛ, anto tshɛ wayeya dia nyu nyekɔ ambeki ami, naka nyayokana ngandji lam’asanyu.” (Jni. 13:35) Ngandji mbelamɛka ɔnɛ “ɔlɛmbɛ wa woke wa Nkumekanga” ndo “ekotshamelo k’ɛlɛmbɛ.” (Jak. 2:8; Rɔmɔ 13:10) Hatokashimɔ lo woho wele ngandji ohomba efula, nɛ dia Bible mbitaka dia “Nzambi ekɔ ngandji.” (1 Jni. 4:8) Le Nzambi, ngandji bu tsho nsaki kɛmɔtshi. Nde mɛnyaka ngandji kande oma l’etsha ande. Joani akafunde ate: “Oma lo dikambo nɛ mbakɛnama ngandji ka Nzambi le so: Nzambi akatome Ɔnande ɛtɔi lakandote l’andja dia sho nkondja lɔsɛnɔ lo tshimbo yande.” (1 Jni. 4:9) Etena kɛnyaso ngandji kokaso Jehowa, Yeso, anangɛso ndo anto akina, sho mɛnyaka dia tekɔ Akristo wambotshunda.​—Mat. 22:37-39.

16. Oko watatahame dia ndjala Akristo wambotshunda, lande na kalekaso mbɔsa atɔndɔ la nɛmɔ?

¹⁶ Lo yɛdikɔ yatataleke ndjala Akristo  wambotshunda, mbatataleke mbɔsa atɔndɔ la nɛmɔ. Mbala efula vɔ kambaka la ɛlɛmbɛ lo awui amɔtshi shikaa, koko vɔ kambaka la atɔndɔ lo awui efula wotshikitanyi. Ɛnyɛlɔ, ɔna dikɛnda hashihodia di’ekɔ waale mbɔtɔ lɔngɛnyi l’anto wa kɔlɔ, diakɔ diele ambutshi ande pombaka mbodjɛ ɛlɛmbɛ dia mbokokɛ. (1 Kɔr. 15:33) Koko etena kola ɔna, nde mbekaka woho wa nkana yimba la atɔndɔ wa lo Bible. Atɔndɔ asɔ wayowokimanyiya dia nsɔna angɛnyi w’ɛlɔlɔ. (Adia 1 Kɔrɛtɔ 13:11; 14:20.) Oko watataleke nkana yimba la atɔndɔ wa lo Bible, mbayotoleka ndjaɛkɛ lo nkum’otema kaso. Sho ndekaka nshihodia kɛnɛ kalanga Nzambi dia sho nsala lo dui tshɛ.

17. Lande na kakokaso mbuta dia tekɔ la ɛngɔ tshɛ kele la so ohomba dia mbɔsa tɛdikɔ ta lomba?

¹⁷ Tekɔ l’ɛngɔ tshɛ kele la so ohomba dia mbɔsa tɛdikɔ tangɛnyangɛnya Jehowa. Lo Bible, sho tanaka ɛlɛmbɛ ndo atɔndɔ watokimanyiya dia monga “l’akoka tshɛ ndo la kɛnɛ tshɛ kahombama dia nsala olimu w’ɔlɔlɔ tshɛ.” (2 Tim. 3:16, 17) Atɔndɔ wa lo Bible tokimanyiyaka dia nshihodia woho wakanyiya Jehowa. Koko sho pombaka mbidja welo dia mbatana. (Ɛf. 5:17) Dia tokimanyiya, tekɔ la Index des publications des Témoins de Jéhovah, Dibuku di’eyangelo di’Ɛmɛnyi wa Jehowa, Watchtower Library, BIBLIƆTƐKƐ WA LO ƐTƐRNƐTƐ Watchtower ndo application JW Library. Naka sho nkamba la dihomɔ sɔ, kete tayokondja wahɔ oma lo wekelo w’onto ndamɛ ndo wa lo nkumbo.

18. Etombelo akɔna wonga etena kakambaso la ɛlɛmbɛ ndo atɔndɔ wa Jehowa lo lɔsɛnɔ laso?

¹⁸ Lɔsɛnɔ laso ndowanaka efula etena kakambaso la ɛlɛmbɛ ndo atɔndɔ wa Jehowa! Osambo 119:97-100 mbitaka ɔnɛ: “Ande woho walangami ɛlɛmbɛ ayɛ lee! Dimi kanaka yimba la wɔ lushi l’otondo. Wadjango ayɛ mbetɛkami kanga lomba ndeka atunyi ami, nɛ dia vɔ wekɔ kaamɛ la mi pondjo pondjo. Dimi lekɔ la shɛnɔdi ndeka embetsha ami tshɛ, nɛ dia dimi kanaka yimba lo waohwelo ayɛ. Dimi salaka akambo la yimba ndeka epalanga w’anto, nɛ dia dimi kitanyiyaka wadjango ayɛ.” Naka sho mbɔsa etena ka nkana yimba efula lo dikambo di’ɛlɛmbɛ ndo atɔndɔ wa Nzambi, kete tayoleka nsala akambo la lomba ndo la shɛnɔdi. Ndo naka sho nkamba la ɛlɛmbɛ ndo atɔndɔ asɔ dia mbekiya nkum’etema yaso, kete tayokoma “lo yɛdikɔ ya diema di’otondo dia Kristo.”​—Ɛf. 4:13.