WAKELƐKA abuku asɔ ɔnɛ collection arc-en-ciel. Etena kakamonge l’akoka wa mbawadia, lakatane bɛnyɛlɔ di’amɛna efula diakonge la shɛngiya lo ekanelo kami ka yimba. Etombelo wakonge ele, oma ko dikɛnda lakonge la nsaki k’efula k’awui wa lo Bible, ɛnyɛlɔ awui wakatanemaka l’abuku wa diambo asɔ.

Oko waki Ta dia hende dia l’andja w’otondo suke la ndɔma la Inde, lɔsɛnɔ lami lakatatɛ ntshikitana lo kɔlɔ. Ambutshi ami wakakakitɔna ndo wakayodiaka diwala. Dimi koshihodia lande na kakakakitɔna anto ahende wakamokaka ngandji. Laki la lonyangu l’efula ndo lakayaoke okalema. Dimi laki tshɔi y’ɔna ndo dimi kɔfɔnyaka dia layotana esambelo ndo osukɔ wakamalangaka efula.

L’etena kɛsɔ, dimi la mama takatodjasɛ la Karachi, kapitalɛ ka prɔvɛnsɛ. Lushi lɔmɔtshi Fred Hardaker, dɔkɔtɛlɛ di’opalanga laki Ɔmɛnyi wa Jehowa akakɔkɔla lo soko diaso. Nde aki la mbetawɔ kele oko ka misiɔnɛrɛ wakasha nkumbo kaso abuku asɔ. Nde akalɔmbɛ mama dia vɔ mbeka Bible. Mama akatone, koko akate dia dimi koka mbetawɔ.  Lomingu lakayele, lakatatɛ mbeka l’ɔnangɛso Hardaker.

Mingu ngana l’ɔkɔngɔ, lakatatɛ ntshɔ lo nsanganya y’Akristo yakasalemaka lo lopitadi laki ɔnangɛso Hardaker. Ɛmɛnyi wa Jehowa oko 12 w’epalanga mbakasanganaka lɛkɔ dia ntɛmɔla. Vɔ wakasambe ndo wakakokɛ oko ɔna. Dimi mbohɔka woho wakawadjasɛka kaamɛ la mi, woho wakawakitakitaka dia mbɛdima la diema diami ndo woho wakawasawolaka la mi oko angɛnyi w’eshika wakimi mɛtɛ l’ohomba l’etena kɛsɔ.

Kombeta edja, ɔnangɛso Hardaker akanɔmbɛ dia mbotshindɛ l’esambishelo. Nde akambetsha woho wa mpɛtsha fɔnɔ kakatɛmbaka l’anya kaki l’asawo wa tomondo w’oma lo Bible wakadjama l’eshinga. Asawo yema tshitshɛ l’atei awɔ wakanyangiyaka anto amɔtshi, nɛ dia vɔ kɔngɛnangɛnaka losango lakɔ. Koko, laki l’ɔngɛnɔngɛnɔ dia nsambisha anto akina. Laki l’ohetoheto l’akambo wa mɛtɛ wa lo Bible ndo lakalangaka nsambisha anto akina awui akɔ.

Oko waki asɔlayi w’ase Japon suke la ndɔsha Inde, ewandji w’ase Grande-Bretagne wakatatɛ ndɔsha Ɛmɛnyi wa Jehowa. L’ekomelo, lo Ngɔndɔ k’esambele 1943, dimi lawɔ lakalɔshama. Owandji wa kalasa laki owandji ɔmɔtshi w’ɔtɛmwɛlɔ akaminya oma lo kalasa lo mbuta ɔnɛ “lekɔ la lɔkɛwɔ la kɔlɔ.” Nde akatɛ mama ɔnɛ woho wakamekesanɛka l’Ɛmɛnyi wa Jehowa akasha ɛnyɛlɔ ka kɔlɔ le ambeki akina. Nde akanyange efula ndo akashimbe diaha mbekesanɛ l’Ɛmɛnyi wa Jehowa. L’ɔkɔngɔ diko, nde akatome le papa la Peshawar, osomba wakangana oko kilɔmɛtrɛ 1 370. Oko wakamahombe mbo ya ndɛ ya lo nyuma ndo lɔngɛnyi lami l’Ɛmɛnyi wa Jehowa, diɔtɔnganelo diami la Jehowa diakakitakita.

Lo 1947, lakakalola la Karachi dia toyanga olimu. Etena kakimi lɛkɔ, lakatshu lo lopitadi la dɔkɔtɛlɛ Hardaker. Nde akanongola la wangasanu ndo l’otema ɔtɔi.

Lo mfɔnya dia lakaye la hemɔ, nde akamimbola ate: “Kakɔna kakokiyanya?”

Lakokadimola nte: “Dɔkɔtɛlɛ, dimi bu la hemɔ lo demba, lekɔ la hemɔ lo nyuma. Lekɔ l’ohomba wa mbeka Bible.”

Nde akamimbola ate: “Etena kakɔna kalangayɛ ntatɛ?”

Lakakadimola nte: “Ko wonya ɔnɛ naka kokaka.”

Taketsha dikɔlɔ dia dimɛna efula lo mbeka Bible. Lakoke dia lambosambema nɛ dia lakonge nto kaamɛ l’Ɛmɛnyi wa Jehowa. Mama akasale la wolo diaha dimi mbekesanɛ l’Ɛmɛnyi wa Jehowa, koko l’etena kɛsɔ, lakayashikikɛ dia mbɔsa yɛdikɔ dia kambɛ Jehowa. Lo Ngɔndɔ k’enanɛi 31, 1947, lakɛnya ndjakimɔ kami le Jehowa lo batizama l’ashi. Kombeta edja, etena kakimi l’ɛnɔnyi 17, lakatatɛ nkamba oko ombatshi mboka wa pondjo.

Dihole dia ntondo diakawatome tosambisha oko ombatshi mboka aki la Quetta, mpango k’edjedja k’asɔlayi w’ase Grande-Bretagne. Lo 1947, wodja ɔsɔ wakakahanyema ɛtshi kɛmɔtshi Inde ɛtshi kekina Pakistan. * Dui sɔ diakakonya di’awui wa ngala wendana l’ɔtɛmwɛlɔ diangana, etombelo wakonge ele leemba la woke l’anto wakonɔ woho wahatasalemaka. Ase dawo oko miliyɔ 14 wakatshu l’ahole wotshikitanyi. Waa Misilma waki la Inde wakatshu lo Pakistan ndo waa Hindu la waa Sikhs waki la Pakistan wakonɔ la Inde. Lo efukutanu ɛsɔ, lakande lɔkɛndɔ lo kawolo kaki l’anto tɔɔ oma la Karachi otsha la Quetta, lakatakimɛka lowolo lɔmɔtshi l’andja.

La Quetta, lakɛnana la George Singh, ombatshi mboka wa laande waki l’ɛnɔnyi 20 l’ɛmɔtshi. George akambisha dikalo di’omusu diakamatshɔka l’ɛtshi ka nkɛtɛ kele l’akona kɛsɔ. Mbala efula, lakasambishaka dimɛ. L’ɔkɔngɔ wa ngɔndɔ shamalo, lakonge l’ambeki wa Bible 17 ndo amɔtshi l’atei awɔ wakakome Akristo. Ɔmɔtshi laki owandji w’asɔlayi wakawelɛka Sadiq Masih, akatokimanyiya dimi la George dia nkadimola ekanda ɛmɔtshi walembetshiya Bible lo Ourdou, ɔtɛkɛta waleka tɛkɛtama la Pakistan. L’ɔkɔngɔ diko, Sadiq akayonga opandjudi wa lokumu l’ɔlɔlɔ waki l’ohetoheto.

L’ɔkɔngɔ wa laasɔ, lakakalola la Karachi ndo lakatokamba kaamɛ la Henry Finch ndo Harry Forrest, waa misiɔnɛrɛ w’eyoyo wakaye oma lo Kalasa ka Ngiliyadɛ. Vɔ wakambisha olowanyelo  w’ohomba efula wendana l’awui wa l’okongamelo! Etena kɛmɔtshi, lakatshindɛ ɔnangɛso Finch dia tosambisha lo nɔrdɛ ka Pakistan. Lo dihole di’akona efula sɔ, takatane ase ngelo efula wakatɛkɛtaka Ourdou waki la mposa k’akambo wa mɛtɛ wa lo Bible. L’ɔkɔngɔ w’ɛnɔnyi ehende, lakayotshɔ dia tɔtɔ lo Kalasa ka Ngiliyadɛ, wakakaloya la Pakistan dia mongaka omendji w’otshimbedi lo tena dimɔtshi. Lakadjasɛka lo luudu la waa misiɔnɛrɛ la Lahore la anangɛso akina asato waki waa misiɔnɛrɛ.

Lonyangu ko lo 1954, waa misiɔnɛrɛ waki la Lahore wakonge l’ekakatanu lam’asawɔ ndo dui sɔ diakakonya dia filialɛ ntoma amɔtshi l’ahole akina. Lam’ele lakasale dindja dia mbeta wedi ɔmɔtshi etena kaki owanu ɔsɔ, wakambisha alako wa wolo. Lakakɔmɔ efula ndo lakafɔnya ɔnɛ lambɔla lo nyuma. Lakakalola la Karachi ndo oma laasɔ la Londres, Angleterre, l’elongamelo ka totatɛ nkamba dihole dikina.

La Londres, etshumanelo kaso kaki ndo l’ase nkumbo ka Bɛtɛlɛ efula wa la Londres. Pryce Hughes, laki okambi wa filialɛ w’ɔlɔlɔ, akakimanyiya la ngandji tshɛ. Lushi lɔmɔtshi, nde akambitɛ dia lo diaaso dimɔtshi ɔnangɛso Joseph F. Rutherford ɔnɛ lakalɔmbɔlaka olimu w’esambishelo wa l’andja w’otondo akawosha dako dia wolo. Etena kakalange ɔnangɛso Hughes mbisha tɛkɛnɛndɛ, ɔnangɛso Rutherford akoohangwɛ wolo. Lakambe dia mɛna ɔnangɛso Hughes amɔnamɔna etena kakandohɔka dui sɔ. Nde akate ɔnɛ dui sɔ diakawomadia oma l’etatelo. Koko l’ɔkɔngɔ diko, nde akashihodia ɔnɛ nde aki l’ohomba wa dako dia wolo ndo ɔnɛ ɔsɔ aki djembetelo ya ngandji ka Jehowa. (Hɛb. 12:6) Awui wakandambitɛ wakananda otema ami ndo wakakimanyiya dia nyomokamba l’ɔngɛnɔngɛnɔ.

L’etena kɛsɔ, mama akonɔ la Londres ndo aketawɔ mbeka Bible la John E. Barr, lakayonga ose Olui-walɔmbɔla. Nde akatetemala mpama lo nyuma ndo akabatizama lo 1957. L’ɔkɔngɔ diko lakayeya dia ntondo ka papa mvɔ, nde la wɔ akeke l’Ɛmɛnyi wa Jehowa.

Lo 1958 lakatshuke Lene, kadiyɛso k’ose Danemark lakayodjasɛ la Londres. Ɔnɔnyi wakayele, takote Jane ɔnaso la womoto l’enondo lo anaso atanu. Laadiko dia laasɔ, lakakondja waɛsɛ l’etshumanelo ka Fulham. Koko l’ɔkɔngɔ diko, takahombe monɔ otsha lo dihole dia tanyi l’ɔtɛ wa yoonge ya Lene. Diakɔ diele lo 1967, takonɔ otsha la Adélaïde, Australie.

Etshumanelo kaso ka la Adélaïde kaki ndo la Akristo w’akitami w’epalanga 12. Vɔ wakasambishaka l’ohetoheto. Kombeta edja takayala la mbekelo y’amɛna ya lo nyuma nto.

 Lo 1979, dimi la Lene takote Daniel ɔnaso la tanu. Nde akadiɛnɛka la hemɔ ka trisomie * ndo sho konongamɛ dia nde ayɔsɛna edja. Kaanga nshi nyɛ, ekɔ wolo nembetshiya okiyanu waki laso. Takasalaka tshɛ dia nkotsha ehomba ande, aha la mbohɛ anaso akina anɛi. Lo tena dimɔtshi, Daniel akakadimɔka ɛlɛsɛlɛsɛ naka nde ambohomba hiɛlɛlɛ l’ɔtɛ wa wesho ehende waki lo doyi diande, ko takalawɔka la nde otsha la lopitadi. Koko kaanga mbakinde la hemɔ, nde aki la yimba efula ndo akokanaka ngandji. Nde akayashaka nto l’akambo wa lo nyuma efula. Etena kakalɔmbaka nkumbo kaso la ntondo ka ndɛ, nde akadaka losaka, akasotshaka ɔtɛ ndo akataka ate: “Aamɛ!” Paka oma laasɔ, mbakandalɛka diangɔ diande.

Etena kaki Daniel la ɛnɔnyi ɛnɛi, nde akonge la leucémie aiguë. Dimi la Lene takakɔmɔ efula lo demba ndo lo yimba. Lakoke dia laki suke la monga la dépression nerveuse. Koko, lushi lɔmɔtshi lakatakɔmɔ efula, Neville Bromwich omendji aso w’otshimbedi akaye dia ndjotenda la ngelo kaso. La dikɔlɔ sɔ la asɔyi lo washo, nde akatokumbatɛ. Sho tshɛ takalele. Ɛtɛkɛta ande woludi la ngandji ndo la kɛtshi wakatosambe efula. Nde akayomɔ oya l’oshidi ɔtɔi w’otsho. Yema tshitshɛ l’ɔkɔngɔ wa laasɔ Daniel akavu. Nyɔi kande kakatosha paa efula lo lɔsɛnɔ laso. Koko takakikɛ ɔkɛyi aso, l’eshikikelo k’ɔnɛ ndooko ɛngɔ oyadi nyɔi kakoka nkakitola Daniel la ngandji ka Jehowa. (Rɔmɔ 8:38, 39) Tekɔ lo nomɔlomɔ mɛnana la nde etena kayondolɔma l’andja w’oyoyo waki Nzambi!​—Jni. 5:28, 29.

Ɛlɔ kɛnɛ, l’ɔkɔngɔ wa sho pomana l’ekakatanu ehende wa weke, lekɔ lo ntetemala monga ekumanyi l’etshumanelo. Awui wakakomɛ tshutshuyakami dia ndjadja lo dihole di’anto akina ndo mbaoka kɛtshi djekoleko wanɛ wadiɛnɛ l’ekakatanu. Dimi salaka la wolo diaha mbalombosha. Koko dimi ndjambolaka ɔnɛ: ‘Ngande wambonga awui wambakomɛ lo lɔsɛnɔ la shɛngiya lo yoho yayaokawɔ ndo yakanyiyawɔ? Ngande wakokami mbaɛnya dia lekɔ lo ndjakiyanya? Ngande wakokami mbakeketsha dia vɔ nsala lolango la Jehowa?’ Dimi nangaka mɛtɛ nsala olimu wa nama ɛkɔkɔ l’etshumanelo! Diakɔ diele, etena kasambami ndo kakeketshami anto akina lo nyuma, dimi mbɔsaka dia lekɔ lo ndjasamba ndo ndjakeketsha.

Dimi ndjaokaka oko omembi w’osambo lakate ate: “Etena kakamamɛnama la ekiyanu, [Jehowa] akansambe ndo akambɔladia.” (Os. 94:19) Nde akasukɛ etena kaki nkumbo kami l’ekakatanu, ɔlɔshamelo w’oma le ase ɔtɛmwɛlɔ, etena kakimi la lonyangu ndo ɔkɔmwɛlɔ. Lo mɛtɛ, Jehowa akonge ombutshi wa pami wa mɛtɛ mɛtɛ le mi!