“AKEMWE! Ngande?”

Aha la taamu mbala efula wɛ kambaka la yoho ya mbishana mɔyɔ shɔ. Wɛ mbeyaka mbisha onto mɔyɔ wa losotshasotsha kana wa lokumbatɛ. Mbekelo ndo ɛtɛkɛta wakamba la so kokaka ntshikitana lo dihole la dihole, koko oyango wa mɔyɔ wekɔ waamɛ. Lo mɛtɛ, naka hatoshana mɔyɔ kana hatetawɔ mɔyɔ, kete dui sɔ mbeyaka mɛnya dia sho bu la ngandji kana la loshilambo.

Koko aha anto tshɛ mbele la mbekelo ka mbishana mɔyɔ. Amɔtshi mengengaka mbishana mɔyɔ l’ɔtɛ wewɔ ɛsɔnyi kana wayaɔsawɔ dia vɔ bu la nɛmɔ. Akina mongaka l’okakatanu dia mbisha anto wele bu la wɔ lokoho ɔtɔi, mbekelo kana dihole diele l’onto lo tshunda mɔyɔ. Koko, kaanga mɔyɔ wa lo tshena pe koka monga l’etombelo w’ɛlɔlɔ.

Yambola wate: ‘Mbisha onto mɔyɔ koka monga la shɛngiya yakɔna? Ndo kakɔna kambetsha Ɔtɛkɛta wa Nzambi lo dikambo dia mɔyɔ?’

Etena kakalongola ɔpɔstɔlɔ Petero Kɔnɛliyo ose Wodja la ntondo l’etshumanelo k’Akristo, nde akate ate: “Nzambi keema la shɔnɔdi.” (Ets. 10:34) L’ɔkɔngɔ diko, Petero akafunde dia Nzambi “nangaka dia anto tshɛ nkondja diaaso dia ndjatshumoya.” (2 Pe. 3:9) Sho mbeyaka ntondo mfɔnya dia avɛsa anɛ mendanaka la onto lakeke akambo wa mɛtɛ. Koko Petero akakeketsha Akristo nto ɔnɛ: “Nyɔlɛmiya weho w’anto tshɛ, nyoke nkumbo k’otondo k’anangɛso ngandji.” (1 Pe. 2:17) Shi ayonga dui dia dimɛna le so dia mbishaka anto akina mɔyɔ oyadi lokoho lawɔ la demba, mbekelo kana dihole diakawole? Ɔsɔ ekɔ yoho mɔtshi ya mɛnya dia sho mbalɛmiyaka ndo mbaokaka ngandji.

Ɔpɔstɔlɔ Pɔɔlɔ akakeketsha ase etshumanelo ate: “Nyolongɔnake oko wakatolongola Kristo.” (Rɔmɔ 15:7) Lo yoho ya laande Pɔɔlɔ akashile anangɛso waki “ekimanyielo kakeketsha” le nde. Ɛlɔ kɛnɛ anangɛso l’akadiyɛso wamboleka monga l’ohomba w’ekeketshelo oko wamboleka Satana ndɔsha ekambi wa Nzambi.​—Kɔl. 4:11, nɔtɛ; Ɛny. 12:12, 17.

Bɛnyɛlɔ dia l’Afundelo mɛnyaka dia mɔyɔ koka monga la shɛngiya y’efula laadiko dia mɛnya anto akina dia tambowalongola.

Etena kakahombe lɔsɛnɔ l’Ɔna Nzambi sangɔma l’otema wa Mariya, Jehowa akatome ondjelo dia ndjosawola la nde. Ondjelo akɔ akatatɛ ate: “He mɔyɔ, wɛ lamboleka mpomɔ lokolo l’ɔlɔ lo washo wa Nzambi! Jehowa ekɔ la yɛ.” Mariya “akahandjɔ wɔɔngɔ efula,” nɛ dia nde kombeya lande na kakasawolaka ondjelo la nde. Etena kakandɛnyi dui sɔ, ondjelo akawotɛ ate: “Tokake wɔma, Mariya. Wɛ ambohomɔ lokolo l’ɔlɔ lo washo wa Nzambi.” Nde akolembetshiya dia aki nsangwelo dia Nzambi lo dikambo diande dia mbota Mɛsiya. Lo dihole dia nde ntetemala mboka wɔma, Mariya akakadimola l’okitanyiya tshɛ ɔnɛ: “Eenda, okambi waki Jehowa wa womoto kemi! Diatshame le mi oko watayɛ.”​—Luka 1:26-38.

Ondjelo ɔsɔ aki la diɛsɛ dia nsala akambo oko dikɛndji dia Jehowa; koko nde kondjaɔsa oko onto lahakoke nsawola l’onto lele keema kokele. Nde akatatɛ la mɔyɔ. Wetshelo akɔna wakokaso nkondja oma l’ɛnyɛlɔ kɛsɔ? Sho pombaka monga suke dia mbisha anto akina mɔyɔ ndo mbakeketsha. La ɛtɛkɛta engana eto sho koka nkimanyiya anto akina ndo mbashikikɛ dia vɔ wekɔ mɛtɛ ekambi wa Jehowa.

Pɔɔlɔ akayeya anto efula wa l’etshumanelo ka l’Asie mineure ndo l’Erɔpɛ. L’ekanda ande nde akatomɛka anto amɔtshi shikaa mɔyɔ. Sho mɛnaka dui sɔ  lo Rɔmɔ tshapita 16. Pɔɔlɔ akatomɛ asekande Akristo efula mɔyɔ. Nde akashile “kadiyɛso,” Febe ndo akakeketsha anangɛso dia “mbolongola lo Nkumadiɔndjɔ lo yoho yakoka le ekilami ndo mbosha ekimanyielo tshɛ kakokande monga la ohomba.” Pɔɔlɔ akasha Priskila l’Akula mɔyɔ, wanɛ wakandate ɔnɛ “aha dimɛ oto, koko ndo tshumanelo tshɛ di’ase wedja diekɔ lo mbasha losaka.” Nde akatomɛ ndo anto amɔtshi wahaleke mbeyama ɛlɔ kɛnɛ mɔyɔ: “Epayinɛtɔ, olangemi ami” ndo “Turufɔna la Turufɔsa, wamato wakambɛ Nkumadiɔndjɔ olimu wa wolo.” Lo mɛtɛ, l’ɔngɛnɔngɛnɔ tshɛ Pɔɔlɔ akasha anango l’akadiyɛnde mɔyɔ.​—Rɔmɔ 16:1-16.

Vɔ waki l’ɔngɛnɔngɛnɔ dia mbeya ɔnɛ nde akawaohɔka. Ngandji kawɔ otsha le Pɔɔlɔ ndo lam’asawɔ kakafule! Ndo etena kakawoke mɔyɔ wa la ngandji ɛsɔ, Akristo akina wakakeketshama ndo wakakimanyiyama dia ntshikala nge lo mbetawɔ. Lo mɛtɛ, mɔyɔ wɛnya dia tekɔ lo ndjasha le onto ndo tekɔ lo mbaandola, keketshaka lɔngɛnyi ndo kaamɛ kele lam’asa ekambi wa Nzambi wa kɔlamelo.

Etena kaki Pɔɔlɔ lo dibongo dia Putiyɔli atatshu otsha la Rɔmɔ, Akristo wa lɛkɔ wakaye ndjoolongola. Kam’akandawaɛnyi oma l’etale, Pɔɔlɔ “akasha Nzambi losaka ndo akakeketala.” (Ets. 28:13-15) Lo tena dimɔtshi sho koka kaanga mɔnamɔna tsho kana mbisha mɔyɔ wa lohohiya. Koko, kaanga nsala ngasɔ koka nkeketsha onto, mbala mɔtshi ɔnɛ lambɔkɔmɔ kana lele la lonyangu.

Ombeki Jakɔba akahombe mbisha dako dia wolo. Akristo amɔtshi wakayonga akanga wa loseka la lo nyuma lo monga la lɔngɛnyi la andja ɔnɛ. (Jak. 4:4) Koko tende woho wakatatɛ Jakɔba mukanda ande:

“Dimi Jakɔba, okambi wa Nzambi ndo wa Nkumadiɔndjɔ Yeso Kristo, lambofundɛ waoho 12 wakahandjɔnɛ lɛnɛ la lɛnɛ nte: Mɔyɔ!” (Jak. 1:1) Aha la taamu ambadi ande komonga l’okakatanu dia mbetawɔ dako diande etena kakawɛnyi oma lo mɔyɔ wakandawasha dia vɔ wekɔ woho ɔtɔi la ntondo ka Nzambi. Lo mɛtɛ, mɔyɔ wa l’okitshakitsha koka nkonya kaanga lo ɔkɛtshanyelo w’awui w’ohomba efula.

Mɔyɔ oyadi wa lo tshena pe, pombaka monga wa l’otema ɔtɔi ndo wakɛnɛmɔla ngandji ka mɛtɛ. Ngasɔ mbediɔ kaanga naka mɛnamaka oko ndooko ladja yimba. (Mat. 22:39) Kadiyɛso kɛmɔtshi ka la Irlande akakome lo Mbalasa ka Diolelo yema tshitshɛ la ntondo ka losanganya ntatɛ. Etena kakandayɔtɔka la shamanya ɔnangɛso ɔmɔtshi akakadimɔ, akamɔnamɔna ndo akawotɛ ate: “Akemwe. Lambɔngɛnangɛna dia kɛna.” Kadiyɛso akatshu tsho dia todjasɛ.

Mingu ngana l’ɔkɔngɔ wa laasɔ, nde akasawola l’ɔnangɛso ndo akawotɛ dia aya edja kadiɛnɛnde l’okakatanu ɔmɔtshi la ngelo. Nde akate ate: “Laki la lonyangu l’efula la dikɔlɔ dingo ndo totomoya lo Mbalasa ka Diolelo. Handjoleka mbohɔ awui wakatama lo losanganya, onyake mɔyɔ wakayambisha. Vɔ wakakimanyiya dia ndjaoka dia wambonongola. Losaka.”

Ɔnangɛso ɔsɔ kombeya shɛngiya ya wolo yaki la mɔyɔ ande wa lo tshena pe ɔsɔ. Nde mbitaka ate: “Etena kakandambitɛ kɛnɛ kakalembetshiya ɛtɛkɛta engana ɛsɔ le nde, lakangɛnangɛna efula l’ɔtɛ wakamadje welo. Dimi lawɔ lakangɛnangɛna.”

Sɔlɔmɔna akafunde ate: “Okɛ mapa ayɛ lo ashi, nɛ dia l’ɔkɔngɔ wa nshi efula wɛ ayowotana nto.” (Ond. 11:1) Lo mbeya ohomba wa mbisha anto akina mɔyɔ, djekoleko asekaso Akristo, sho salɛka anto akina ɔlɔlɔ ndo shoamɛ. Ɔnkɔnɛ, tatɔsake pondjo shɛngiya yele la mɔyɔ oko dui di’anyanya.