Onde wɛ akadia la yambalo tshɛ numɛlɔ ya Tshoto y’Etangelo yeke katomba? Naka ngasɔ, kete enda kana Onde wɛ wɛ kokaka nkadimola ambola wayela anɛ:

Naa awui anɛi wakokaso nsala dia ndowanya yoho yaso ya memba?

Sho kokaka nsembɔ tɔɔ ndo mbedia dibuku di’esambo la diko. Sho pombaka mpɛnga dimɛna. Naka sho mbasola onyɔ dimɛna ndo memba, kete tayokoka memba la dui dia wolo.​—w17.11, lk. 5.

Kakɔna kakoka tambiya lo dikambo dia ahole ndo etadimbo wakatshɔka otsha l’esomba w’eshamelo l’Isariyɛlɛ?

Aki esomba w’eshamelo esamalo lo wodja akɔ, ndo etadimbo w’amɛna wakatshɔka otsha lɛkɔ. Onto akakokaka ntana eshamelo esadi eto ndo aha l’okakatanu.​—w17.11, lk. 14.

Lande na kele woshasha wa Nzambi w’oshinga w’etshungwelo lo tshimbo ya Yeso wekɔ woshasha woleki dimɛna tshɛ wakokaso nkondja?

Vɔ kotshaka nsaki kaso ka nsɛna pondjo pondjo ndo vɔ kotshaka ohomba wele la so wa ntshungɔ oma lo pɛkato la nyɔi. Oko wokande tokanula ta Adama ngandji, Nzambi akatome Yeso lo dikambo diaso kaanga mbakiso atshi wa pɛkato.​—wp17.6, lk. 6-7.

Kakɔna kakate Osambo 118:22 lo dikambo dia eolwelo ka Yeso?

Wakatone Yeso oko Mɛsiya ndo wakodiake. Dia nde monga “dive dia woke dia tshuku,” nde akahombe mbolwama.​—w17.12, lk. 9-10.

Onde ɔlɔndji wakayotɔ Mɛsiya wakakakatanyema la lotshungɔ l’ɔna enondo?

Lo tena dimɔtshi ɔna enondo la pami mbaki l’ɔlɔndji wakayotɔ Yeso, koko aha tena tshɛ. Davidɛ komonga ɔna Jɛse l’enondo; koko Davidɛ aki l’ɔlɔndji wakayotɔ Mɛsiya.​—w17.12, lk. 14-15.

Naa atɔndɔ amɔtshi wendana l’aseka enganga watanema lo Bible?

Lo ndjela Ɛlɛmbɛ wa Mɔsɛ, wanɛ waki la hemɔ mɔtshi wakahombaka nkakitɔna l’anto akina. Anto wakahombaka mbɔka l’ɔkɔngɔ wa minanda odo. Ɛlɛmbɛ akɔ wakalɔmbaka anto dia monga la dihole dia wɛtɔ. Wakahombaka minya mpota lushi l’enanɛi l’ɔkɔngɔ w’ɔna mbotɔ, dui sɔ diaki dimɛna ndo lo kɛnɛ kendana la okamelo wa dikila.—wp18.1, lk. 7.

Lande na kele bu kɔlɔ di’Okristo ndjalanga la wɛdimu?

Sho pombaka nanga wonyaso onto oko wayalangaso. (Makɔ 12:31) Waomi pombaka “nanga wadɛwɔ oko alemba awɔ hita.” (Ɛf. 5:28) Lo mɛtɛ naka onto ndjalanga amboleka, kete dui sɔ koka monga kɔlɔ.​—w18.01, lk. 23.

Naa wanya amɔtshi wakokaso ntakola dia mpama lo nyuma?

Sho pombaka mbekaka Ɔtɛkɛta wa Nzambi, kanaka yimba l’awui akɔ ndo nkitanyiya kɛnɛ kamboteka. Sho pombaka nto mbidja yimba ndo otema aso lo shɛngiya ya nyuma k’ekila ndo mbetawɔ ekimanyielo k’anto akina la lowando.​—w18.02, lk. 26.

Lande na kele awui wa tɔɔtɔ ndo wotelo w’akambo wahataye bu awui wakimanyiya dia mbeya akambo wa lo nshi yayaye?

L’ɔtɛ w’ɛkɔkɔ efula, koko ɔkɔkɔ woleki woke ele Bible tonaka ditshelo diakɔ pende.​—wp18.2, lk. 4-5.

Naka tambetawɔ leeta la tɔlɛ yangɔ, ngande wahombaso mbɔsa dui sɔ?

Naka taketawɔ dia ntshɔ, kete sho pombaka nsala la wolo dia nkotsha ɛtɛkɛta aso. (Os. 15:4) Hatohombe mbitola l’ɔtɛ w’ɔkɔkɔ w’anyanya. Mbeyaka monga ko ɔnɛ lakatelɛ akasale olimu efula dia nɔngɔsɔla mbo ya ndɛ.​—w18.03, lk. 18.

Wetshelo akɔna wakoka apami wakasɔnama nkondja oma le Timɔte?

Timɔte akayakiyanyaka mɛtɛ lo dikambo dia anto ndo aketshaka wahɔ wa lo nyuma lo dihole dia ntondo. Nde akakambaka olimu w’ekila efula ndo akakambaka la wetshelo wakandakondjaka. Nde akatetemalaka ndjalowanya ndo akayaɛkɛka lo nyuma ka Jehowa. Dikumanyi ndo anto akina kokaka mbokoya ɛnyɛlɔ kande.​—w18.04, lk. 13-14.