“Osase anyu wahɛtɛ” dia ntombola Jehowa
“Osase anyu wahɛtɛ la ntondo k’anto . . . ko wayotombola Shɛnyu.”—MAT. 5:16.
1. Naa ɔkɔkɔ wa laande wele laso wa monga l’ɔngɛnɔngɛnɔ?
TEKƆ l’ɔngɛnɔngɛnɔ efula dia mboka di’ekambi wa Nzambi wekɔ lo mpɛtsha osase awɔ! Ɔnɔnyi wetshi, ekambi wa Jehowa wakeke Bible la anto ndekana 10 000 000. Ndo miliyɔ y’anto wakayasha l’akambo wa mɛtɛ wakaye lo Eohwelo ndo wakeke akambo wendana la woshasha woludi la ngandji wa Jehowa wa oshinga w’etshungwelo.—1 Jni. 4:9.
2, 3. a) Kakɔna kahatoshimbe dia “mpɛta . . . oko esase”? b) Kakɔna kayotɔsɛdingola lo sawo nɛ?
2 Ɛmɛnyi wa Jehowa wa lo nkɛtɛ k’otondo wekɔ lo ntɛkɛta ɛtɛkɛta efula. Koko, dui sɔ hatoshimbe dia ntombola Jehowa oko nkumbo ɔtɔi kele kaamɛ. (Ɛny. 7:9) Oyadi ɔtɛkɛta akɔna watɛkɛtaso kana lo dihole diakɔna diodjashiso, tekɔ lo mpɛta “oko esase lo andja ɔnɛ.”—Flpɛ. 2:15.
3 Olimu aso w’esambishelo, kaamɛ kaso k’Akristo ndo woho wasalaso akambo la shamanya tombolaka Jehowa. Ngande wakokaso mpɛtsha osase aso lo awui asato asɔ?—Adia Mateo 5:14-16.
KIMANYIYA ANTO AKINA DIA NTƐMƆLA JEHOWA
4, 5. a) Laadiko dia nsambisha, ngande wakokaso mpɛtsha osase aso? b) Naa etombelo w’amɛna waya lo monga ɔlɔlɔ? (Enda osato wele lo mbɔtwɛlɔ.)
4 Nsambisha ndo mbetɛ anto ambeki ekɔ yoho y’ohomba efula yahɛtshaso osase aso. (Mat. 28:19, 20) Lo 1925, sawo diaki l’ɔtɛ a dui ɔnɛ: “Osase lo wodjima” diakataka ɔnɛ lo nshi y’ekomelo, ndooko onto lakoka monga la kɔlamelo le Nkumadiɔndjɔ naka nde “hakambe la diaaso dia mpɛtsha osase ande.” Oma laasɔ, diɔ diakate ɔnɛ: “Nde pombaka nsala dui sɔ lo mbewoya anto wa la nkɛtɛ lokumu l’ɔlɔlɔ ndo lo ndjaɔtɔnganyiya la weho w’esase akɔ.” (Tshoto y’Etangelo, Ngɔndɔ ka samalo 1, 1925 lo Angɛlɛ) Laadiko di’olimu aso w’esambishelo, dionga diaso tombolaka Jehowa. Anto efula tɛnaka etena kasambishaso. Naka sho mbamɔnɛmɔnɛ ndo mbasha mɔyɔ la wangasanu, kete dui sɔ diayowakimanyiya dia monga la kanyi ya dimɛna lo dikambo diaso ndo Nzambi katɛmɔlaso.
5 Yeso akatɛ ambeki ande ate: “Lam’ayonyɔtɔ lo luudu, kanyosha wanɛ wele lɔkɔ mɔyɔ.” (Mat. 10:12) Lo ahole wakasambishaka Yeso, anto waki la mbekelo ka mbɔtshiya angɛndangɛnda lo mvudu yawɔ. Ɛlɔ kɛnɛ l’ahole efula, anto waya bu la mbekelo kɛsɔ. Mbala efula anto momalaka etena kɛnawɔ angɛndangɛnda la soko diawɔ. Koko naka sho salɛ anto akambo la lɔngɛnyi ndo monga ɔlɔlɔ, vɔ koka ndjaoka dimɛna. Etena kasambishayɛ lo sɛkɛ lo nkamba la mɛsa wanɛwɔ ekanda, onde wɛ atɛnaka dia naka wɛ mɔnamɔna ndo mbisha anto mɔyɔ la lɔngɛnyi, kete vɔ ngɛnangɛnaka dia ndja ndjɔsa ekanda? Vɔ koka kaanga nanga dia ntatɛ sawo!
6. Kakɔna kakimanyiya wadi l’omi amɔtshi w’esombe dia ndjala l’ohetoheto l’esambishelo?
6 Wadi l’omi amɔtshi w’esombe wa la Angleterre hawoyokoka nsambisha lo luudu la luudu oko wakawasambishaka, nɛ dia vɔ waya bu la yoonge ya dimɛna. Diakɔ diele vɔ kitshaka mɛsa w’ekanda la soko dia lokombo lawɔ. Vɔ mbidjasɛka suke la kalasa kɛmɔtshi, diakɔ diele vɔ kitshaka ekanda wakoka ngɛnyangɛnya ambutshi waya dia ndjɔsa anawɔ. Ambutshi amɔtshi wakɔshi mikanda ɛsɔ, mbidja ndo Les jeunes s’interrogent. Réponses pratiques, Volumes 1 ndo 2. Mbala efula kadiyɛso kɛmɔtshi kele ombatshi mboka ndjosambishaka kaamɛ la wadi l’omi asɔ. Ambutshi mɛnaka dia nde mbasalɛka akambo oko angɛnyi ndo ɔnɛ wadi l’omi asɔ nangaka mɛtɛ nkimanyiya anto akina. Ombutshi ɔmɔtshi akayotatɛ mbeka Bible.
7. Ngande wakokayɛ nkimanyiya ase dawo wele l’ɛtshi kayɛ ka nkɛtɛ?
7 Atete edja, anto efula wakatshutshuyama dia ndawɔ oma lo wedja awɔ ko todjasɛ lo wedja ekina oko ase dawo. Akokayɛ nsala dia nkimanyiya ase dawo wele l’ɛtshi kayɛ ka nkɛtɛ dia mbeka awui wendana la Jehowa? Dui dia ntondo ele, wɛ koka mbeka woho wa mbisha onto mɔyɔ l’ɔtɛkɛta ande. Laadiko dia laasɔ, lo nkamba la application JW Language, wɛ koka mbeka ditelo dimɔtshi diakoka kosha diaaso dia nsawola la wɔ. Oma laasɔ, wɛ koka mbaɛnya tovidɛo ndo ekanda wa l’ɔtɛkɛta awɔ wele lo jw.org.—Eoh. 10:19.
8, 9. a) Ngande watokimanyiya nsanganya ya l’atei wa lomingu? b) Ngande wakoka ambutshi nkimanyiya anawɔ dia ndowanya kɔmatɛrɛ yashawɔ lo nsanganya?
8 Jehowa ekɔ lo tosha kɛnɛ keso mɛtɛ l’ohomba dia nsambisha dimɛna. Ɛnyɛlɔ, awui wekaso lo Losanganya Lɔsɛnɔ ndo olimu w’Okristo tokimanyiyaka dia ndeka
monga l’eshikikelo lo kɛnɛ kendana la woho wa nsala wendelo w’eyoyo ndo ntatɛ mbeka l’anto Bible.9 Etena kaya anto lo nsanganya yaso, mbala efula vɔ mambaka dia mboka woho washa ana kɔmatɛrɛ. Wɛ koka mbetsha anayɛ dia mbishaka kɔmatɛrɛ l’ɛtɛkɛta awɔ hita. Anto amɔtshi wakakotɔma oya l’ɔtɛmwɛlɔ wa mɛtɛ etena kakawoke ana wakɛnɛmɔla mbetawɔ kawɔ la ɛtɛkɛta wa wɔdu ndo w’oma k’ɛse otema.—1 Kɔr. 14:25.
KIMANYIYA DIA KAAMƐ MONGA
10. Ngande wakoka ɔtɛmwɛlɔ wa lo nkumbo nkimanyiya nkumbo dia ndeka monga kaamɛ?
10 Yoho kina yakokayɛ mpɛtsha osase ayɛ ele, lo nkimanyiya dia kaamɛ monga lo nkumbo kayɛ ndo l’etshumanelo. Ɛnyɛlɔ naka wɛ ekɔ ombutshi, kete yalɔngɔsɔla dia salaka Ɔtɛmwɛlɔ wa lo nkumbo wa la dikɔlɔ mbala la mbala. Nkumbo efula mendaka JW Télédiffusion kaamɛ ndo l’ɔkɔngɔ wa laasɔ, vɔ kɛtshanyaka woho wakokawɔ nkamba la kɛnɛ kakawoki. Tohɛke dia ɛlɔmbwɛlɔ kele ɔna dikɛnda l’ohomba ntshikitana l’ɛlɔmbwɛlɔ kele ohomba le ɔna la mangase. Sala la wolo dia nkimanyiya ose nkumbo kayɛ tshɛ dia nkondja wahɔ l’ɔtɛmwɛlɔ wa lo nkumbo.—Os. 148:12, 13.
Ekɔ dimɛna dia sho mongaka kaamɛ l’epalanga (Enda odingɔ 11)
11-13. Ngande wakokaso nkimanyiya etshumanelo kaso dia ndeka monga kaamɛ?
11 Kaanga naka wɛ eke ɔlɔngɔlɔngɔ, wɛ koka nkimanyiya di’onto tshɛ la l’etshumanelo ndjaoka dia nde ekɔ ohomba. Yoho mɔtshi yakokayɛ nsala dui sɔ ele, mbɔtɔ lɔngɛnyi l’anangɛso ndo akadiyɛso w’epalanga. Mbolawɔ kɛnɛ kambakimanyiya dia kambɛ Jehowa l’edja k’ɛnɔnyi efula. Vɔ koka ketsha akambo w’ohomba efula. Dui sɔ diayonyokeketsha nyu tshɛ! Ndo sho tshɛ oyadi tekɔ ɛlɔngɔlɔngɔ kana epalanga, tayosala dia anto woye lo Mbalasa kaso ka Diolelo ndjaoka dia wambolongɔma. Wɛ koka mbasha mɔyɔ, mbamɔnɛmɔnɛ lo yoho ya dimɛna, mbakimanyiya dia ntana dihole dia mbidjasɛ ndo mbaeyanya l’anto akina. Sala dia vɔ ndjaoka oko wekɔ lakawɔ.
12 Naka wambokosha ɔkɛndɛ wa nɔmbɔlaka nsanganya y’otsha l’esambishelo, wɛ koka nkimanyiya epalanga dia vɔ ntetemala ngamola osase awɔ. Yashikikɛ dia vɔ wekɔ la ɛtshi ka nkɛtɛ ka dimɛna. Kongɛ dia vɔ nsambisha kaamɛ l’ɛlɔngɔlɔngɔ kana l’esekaseka. Mbala efula, anangɛso l’akadiyɛso w’epalanga ndo
wanɛ wele l’ekakatanu wendana la yoonge kɔmɔka l’ɔtɛ wahawayokoka nsambisha efula oko wakawasambishaka. Koko, vɔ wayɔngɛnangɛna etena keyawɔ dia wɛ ndjakiyanyaka lo dikambo diawɔ ndo shihodiaka ekakatanu wele la wɔ. Oyadi ɛnɔnyi akɔna wele la wɔ kana edja ka ngande kayawɔ Akristo, ɔlɔlɔ ayɛ koka mbakeketsha dia ntetemala nsambisha l’ohetoheto.—Lɛwi 19:32.13 Ase Isariyɛlɛ wakangɛnangɛnaka ntɛmɔla Jehowa kaamɛ. Omembi w’esambo akafunde ate: “Ande dimɛna ndo ande ɔlɔ dia onto la ɔnango mbidjasɛ kaamɛ lee!” (Adia Osambo 133:1, 2.) Nde akɛdika kaamɛ kɛsɔ la esɔ k’okitelo katutadia lokoho ndo kapɔ nsolo ka dimɛna. Woho akɔ waamɛ mbele, sho koka mbututadia anangɛso l’akadiyɛso lo mbangɛnyangɛnya ndo monga ɔlɔlɔ. Dui sɔ ndekaka mbetɛ etshumanelo kaamɛ. Onde wɛ hakoke nsala la wolo dia ndeka mbeya anangɛso wa l’etshumanelo kanyu?—2 Kɔr. 6:11-13; nɔtɛ.
14. Ngande wakokayɛ mpɛtsha osase ayɛ lo dihole dieyɛ?
14 Osase ayɛ koka mpɛta oyadi lo dihole diakɔna dieyɛ. Ɔlɔlɔ ayɛ koka nkonya asukanyi ayɛ dia nanga mbeka akambo efula wendana la Jehowa. Yambola ɔnɛ: ‘Kakɔna kata asukanyi ami lo dikambo diami? Onde luudu lami lekɔ pudipudi ndo ɛngɔ tshɛ kekɔ lo dihole diatɔ? Onde lɔ lekɔ la ɛnamelo ka dimɛna? Onde dimi kimanyiyaka asukanyi ami?’ Mbola Ɛmɛnyi wa Jehowa ekina woho wakonge ɔlɔlɔ ndo ɛnyɛlɔ kawɔ ka dimɛna la shɛngiya le ewotɔ awɔ, asukanyi, asekawɔ wa l’olimu kana le asekawɔ wa la kalasa.—Ɛf. 5:9.
TOSUNGUKALAKE
15. Lande na kahombaso sungukalaka?
15 Naka sho nangaka dia osase aso ntetemala ngamola, kete sho pombaka mbeya etena kakɔna kasɛnaso. Mbala efula, Yeso akatɛka ambeki ande ate: “Nyosungukalake.” (Mat. 24:42; 25:13; 26:41) Naka sho fɔnyaka ɔnɛ “mfɔnu ka woke” katasukana, kete hatotokamba la diaaso tshɛ dia nkimanyiya anto akina dia vɔ mbeya akambo wendana la Jehowa. (Mat. 24:21) Lo dihole di’osase aso ngamola, osase aso wayotakitakitaka ndo vɔ koka kaanga dimala.
16, 17. Akokayɛ nsala dia ntetemala nsala akambo la shamanya?
16 L’etena kɛnɛ kamboleka tshɛ monga ohomba wa nsungukala. Awui wa l’andja ɔnɛ wekɔ lo taleke ntshɔ otsha lo kɔlɔ. Koko, sho mbeyaka di’ekomelo kayoya paka l’etena kakashikikɛ Jehowa. (Mat. 24:42-44) Etena kakatakonge dui sɔ, sho pombaka monga la solo dia lotutsha ndo ndeka mbidja yimba lo nshi yaso yayaye. Adiaka Bible lushi la lushi ndo totshikake pondjo dia nɔmba Jehowa. (1 Pe. 4:7) Eka awui oma le anangɛso l’akadiyɛso wambokambɛ Jehowa ɛnɔnyi efula. Ɛnyɛlɔ, wɛ koka mbadia ɛkɔndɔ wa lɔsɛnɔ, ɛnyɛlɔ lo sawo diele l’ɔtɛ a dui ɔnɛ: “Aya ɛnɔnyi akumi esambele wamomokimɛ ohembo wa dihɔndɔ di’ose Juda,” diakatondjama lo Tshoto y’Etangelo ya Ngɔndɔ ka nɛi 15, 2012, lɛkɛ 18-21.
17 Tetemala monga l’akambo efula wa nsala l’olimu wa Jehowa. Salɛ anto akina akambo w’ɛlɔlɔ ndo ongaka kaamɛ l’anangɛso l’akadiyɛso. Lo nsala ngasɔ, wɛ ayonga l’ɔngɛnɔngɛnɔ ndo wɛ ayɛna dia nshi yekɔ lo tete esadi esadi. (Ɛf. 5:16) Ekambi wa Jehowa wakasale akambo efula lo ɛnɔnyi ndekana lokama wetshi. Ndo ɛlɔ kɛnɛ, tamboleka monga l’akambo efula wa nsala. Olimu wa Jehowa wambohama lo yoho yahatakoke nkanyiya. Osase aso wekɔ lo taleke ngamɔ mɛtɛ!
Etena kasalawɔ wembwelo w’ɛkɔkɔ, sho koka nkondja wahɔ oma lo lomba la Nzambi (Enda odingɔ 18, 19)
18, 19. Ngande wakoka dikumanyi tokimanyiya dia kambɛ Jehowa l’ohetoheto? Sha ɛnyɛlɔ.
Ɛfɛsɔ 4:8, 11, 12.) Diakɔ diele etena katshɔ dikumanyi dia tokembola, kondja wahɔ etena keyɛ la wɔ dia mbeka akambo oma lo lomba ndo alako awɔ.
18 Kaanga mbasalaso munga efula, Jehowa mbetawɔka dia sho mbokambɛ. Dia tokimanyiya, nde toshaka “apami wele oko weshasha,” mbuta ate dikumanyi dia l’etshumanelo. (Adia19 Ɛnyɛlɔ, wadi l’omi amɔtshi wa la Angleterre waki l’okakatanu lo diwala diawɔ, ko wakalɔmbɛ dikumanyi pende dia towakimanyiya. Wadi akɛnaka di’omɛnde kɔnɔmbɔlaka awui wa lo nyuma. Omi akafɔnyaka dia nde komonga ombetsha w’oshika ndo aketawɔ dia nde kondjalɔngɔsɔlaka dia salaka ɔtɛmwɛlɔ wa lo nkumbo mbala la mbala. Dikumanyi diakakimanyiya wadi l’omi asɔ dia nkanyiya dikambo di’ɛnyɛlɔ ka Yeso. Vɔ wakakeketsha omi dia mbokoya woho wakakokɛka Yeso ambeki ande. Vɔ wakakeketsha wadi dia monga la solo dia lotutsha otsha le omɛnde. Laadiko dia laasɔ, vɔ wakasha wadi l’omi asɔ alako amɔtshi lo kɛnɛ kendana la woho wakawakoke salaka ɔtɛmwɛlɔ wa lo nkumbo kaamɛ l’anawɔ ahende. (Ɛf. 5:21-29) Omi akasale la wolo dia monga owandji wa nkumbo w’oshika. Dikumanyi wakokeketsha diaha mpekɔ ndo ntetemala ndjaɛkɛ lo nyuma ka Jehowa. Ngandji ndo ɔlɔlɔ wakɛnya dikumanyi akakimanyiya nkumbo kɛsɔ!
20. Naa etombelo wayonga naka wɛ mpɛtsha osase ayɛ?
20 “Ɔngɛnɔngɛnɔ le onto tshɛ loka Jehowa wɔma, ɔnɛ lakɛndakɛnda lo mboka Yande.” (Os. 128:1) Wɛ ayonga l’ɔngɛnɔngɛnɔ naka wɛ mpɛtsha osase ayɛ. Ɔnkɔnɛ, etsha anto akina akambo wendana la Nzambi, sala la wolo dia nkimanyiya nkumbo kayɛ ndo etshumanelo dia monga kaamɛ ndo sungukalaka. Anto akina wayɛna ɛnyɛlɔ kayɛ ka dimɛna ndo vɔ la wɔ wayolanga dia ntombola Jehowa Shɛso.—Mat. 5:16.