Lande na kakate pami kakawelɛka “Kapanda” dia naka nde ntshuka Ruta dui sɔ ‘diayowoshishɛ’ etenyi kande k’okitɔ? (Ruta 4:1, 6)

Naka pami kɛmɔtshi kakatshuke ambovɔ aha la nde totshi ɔna, lo nshi yakafundamaka Bible, ambola amɔtshi waki ohomba kadimɔma: Naka pami kɛmɔtshi ambovɔ aha latotshi ana, kakɔna kakahombaka ntomba lo dikambo dia bɛtshi dia nkɛtɛ diande? Onde lokombo la nkumbo kande layoshishɔ pondjo? Ɛlɛmbɛ wa Mɔsɛ akakimanyiyaka dia ntana ekadimwe lo ambola asɔ.

Kakɔna kakakomɛka ɛtshi ka nkɛtɛ ka pami kɛmɔtshi kambovɔ kana kakayokomaka woola ndo akayosondja ɛtshi ka nkɛtɛ kande? Ɔnango ɔmɔtshi kana owotɔ ande wa suke suke pombaka ndjotshungola ɛtshi ka nkɛtɛ kɛsɔ. Kɛsɔ akakimanyiyaka dia nkumbo ntetemala nama ɛtshi ka nkɛtɛ kakɔ.​—Lɛw. 25:23-28; Wal. 27:8-11.

Ngande wakahombaka ase nkumbo ka pami kovwe ndjashikikɛ dia lokombo la nkumbo kawɔ haloshishwe? Ele lo tshimbo ya diwala di’okitɔ kana onto kina ntshuka wadi ɔnango oko wakadiasalema lo dikambo dia Ruta. Pami kakɔ ayotshuka wadi ɔnango lakavu laki kombota l’oyango wa mbota ɔna l’okitɔ layoyohomba mbɔsa lokombo la pami kakavu ndo nkita diangɔ diande. Yɛdikɔ yoludi la ngandji shɔ yakakokɛka ndo wadi waki edo.​—Eoh. 25:5-7; Mat. 22:23-28.

Tɔsɛdingole ɛnyɛlɔ ka Naomi. Nde akatshukana la pami kakawelɛka Elimɛlɛkɛ. Lam’akavu pami kɛsɔ ndo anawɔ ahende, etena kɛsɔ ndooko onto la lo nkumbo lakahombe mbokotshɛ ehomba ande. (Ruta 1:1-5) L’ɔkɔngɔ wa Naomi kalola la Juda kaamɛ la Ruta, Naomi akatɛ okilo ande Ruta dia nɔmba Bɔaza dia nsala akambo oko otshungodi wa nkɛtɛ. Nde aki owotɔ wa suke wa Elimɛlɛkɛ. (Ruta 2:1, 19, 20; 3:1-4) Koko Bɔaza akayeyaka dia ekɔ owotɔ okina, ɔnɛ lelɛ Bible ɔnɛ “Kapanda,” aki owotɔ ɔmɔtshi wa suke suke. Nde mbaki onto la ntondo lakahombe nsala akambo oko otshungodi.​—Ruta 3:9, 12, 13.

Oma l’etatelo, “Kapanda” aki suke dia nkimanyiya. (Ruta 4:1-4) Kaanga mbakalɔmbamaka falanga efula dia nsala dui sɔ, nde akayɛnaka dia Naomi takinde nto l’akoka wa mbota ɔna lakahombe ndjokita ɛtshi ka nkɛtɛ ka Elimɛlɛkɛ. Laasɔ, Kapanda mbakahombe ndjokita ɛtshi ka nkɛtɛ kɛsɔ, diakɔ diele yɛdikɔ shɔ yakɛnamaka dia yekɔ ya dimɛna.

Koko Kapanda akayotshikitanyaka kanyi yande, etena kakandayeyaka dia Ruta aki suke la tshukama. Nde akate ate: “Dimi bu la akoka wa kitshungola, nɛ dia dimi mbeyaka ndjolanya etenyi kami k’okitɔ.” (Ruta 4:5, 6) Lande na kakandatshikitanya kanyi?

Naka Kapanda kana onto okina ndjotshuka Ruta ndo ndjota ɔna, ɔna ɔsɔ akahombe ndjokita ɛtshi ka nkɛtɛ ka Elimɛlɛkɛ. Ngande wakakoke Kapanda nshisha ‘etenyi kande k’okitɔ’? Bible hate dikambo sɔ, koko tende toho tɔmɔtshi.

• Ya ntondo, falanga yakandahombe nkamba la yɔ yototshɔ olongo swa, nɛ dia ɛtshi ka nkɛtɛ kaki Elimɛlɛkɛ takatayokoka ndjonga kande. Tɔ kakahombe ndjonga kaki ɔna Ruta.

• Ya hende, nde mbotoyonga l’ɔkɛndɛ wa ndesha ndo kotsha oyadi ehomba waki Naɔmi kana waki Ruta.

• Ya sato, naka Ruta ndjota ana akina nde la Kapanda, kete anasɔ wakahombe ndjokahana etenyi k’okitɔ kɛsɔ kaamɛ l’ana tshɛ wakandahombe ndjota.

• Ya nɛi, naka Kapanda hotshi ana akina wande hita, kete ɔna Ruta lakandote la Elimɛlɛkɛ ndo la Kapanda mbotonga la lotshungɔ la diangɔ sɔ. Ɔna laki la lokombo laki Elimɛlɛkɛ mbotɔɔka lo ndɛngɔ, koko aha ɔnande. Kapanda konanga nshisha etenyi kande k’okitɔ paka dia nkimanyiya Naɔmi. Nde akɛnyi ɔlɔlɔ dia otshungodi okina, mbuta ate Bɔaza mbɔsa ɔkɛndɛ ɔsɔ. Bɔaza akasale dui sɔ, nɛ dia nde akalange “mbolola lokombo laki dɛwɔ lo etenyi kande k’okitɔ.”​—Ruta 4:10.

Ondo Kapanda akalekaka ndjakiyanya dia ntetemala nama lokombo lande hita ndo etenyi kande k’okitɔ. Nde aki la yimba ya lokaki. Koko lo dihole dia nde nkokɛ lokombo lande, lokombo Kapanda lakashishɔ l’ɔkɔndɔ. Nde akayoshishaka nto diɛsɛ dia laande diakayokondjaka Bɔaza, dia shilama l’ɔnɔngɔ wa ɔlɔndji wakayokonyaka le Mɛsiya, mbuta ate Yeso Kristo. Ande etombelo wa kɔlɔ wakakomɛ Kapanda l’ɔtɛ wakandewɔ la lokaki tshɛ diaaso dia nkimanyiya onto ɔmɔtshi laki lo dihombo lee!​—(Mat. 1:5; Luka 3:23, 32)