YESO akate di’ambeki ande wayonga la dinela di’efula lo nshi y’ekomelo nyɛ. (Mat. 9:37; 24:14) Tende woho wakɛnama mɛtɛ k’ɛtɛkɛta ande lo yoho ya laande l’ɛtshi ka nkɛtɛ ka Transcarpatie, Ukraine. Ekɔ tshumanelo 50 ndo ndekana apandjudi 5 400 l’esomba esato eto wosukanyi wa l’ɛtshi ka nkɛtɛ kakɔ. * Dui dia diambo ko, onto 1 lo anto 4 wa l’esomba esato ɛsɔ ekɔ Ɔmɛnyi wa Jehowa!

Ngande wele anto wa l’ɛtshi ka nkɛtɛ kɛsɔ? Ɔnangɛso Vasile la l’ɛtshi ka nkɛtɛ kɛsɔ mbutaka ate: “Anto wa lanɛ mbɔsaka Bible la nɛmɔ, nangaka losembwe, nkumbo yawɔ yekɔ kaamɛ ndo vɔ salaka mɛtɛ la wolo dia kimanyiyana lam’asawɔ.” Nde kotshaka ate: “Aha mbala tshɛ mbetawɔwɔ awui wendana la dietawɔ diaso. Koko etena kawaɛnyayɛ dui dimɔtshi di’oma lo Bible, vɔ pokamɛka la yambalo tshɛ.”

Lo mɛtɛ, anangɛso l’akadiyɛso pomanaka l’ekakatanu ɛmɔtshi etena kasambishawɔ l’ɛtshi ka nkɛtɛ kɛsɔ kele l’apandjudi efula lo mbɛdika la lofulo l’anto. Ɛnyɛlɔ, etshumanelo kɛmɔtshi kekɔ l’apandjudi 134, koko paka mvudu 50 tsho mbele l’ɛtshi ka nkɛtɛ kɛsɔ! Ko ngande wayaɔtɔnganyiya apandjudi la dui sɔ?

Anangɛso l’akadiyɛso efula ndjashaka dia nsambisha lo bɛtshi dia nkɛtɛ diewɔ l’ohomba efula w’ekimanyielo. Ɔnangɛso Ionash lele l’ɛnɔnyi 90 mbutaka ate: “Lofulo l’apandjudi lo mbɛdika la mvudu ya l’ɛtshi ka nkɛtɛ k’etshumanelo kaso lekɔ opandjudi 1 lo mvudu 2. Lekɔ lo nsambisha lo ngielongelo yaso, koko polo atete edja etena kakalana yoonge yami, dimi la wɔ lakande lɔkɛndɔ la kilɔmɛtrɛ oko 160 otsha l’ɛtshi ka nkɛtɛ kahawatatomaka onto, lɛnɛ akamatosambisha l’ɔtɛkɛta wa hongrois.” Apandjudi pombaka ndjahondja awui efula dia mbisha ekimanyielo lo bɛtshi dia nkɛtɛ dikina. Ionash mbutaka ate: “Dia nkoma lɛnɛ ele kawolo, lakemɔka lo eshidi 4:00 wa pindju ndo lakasambishaka polo 6:00 wa dikɔlɔ, wonya wakonɛka kawolo otsha la ngelo. Lakasalaka dui sɔ mbala hiende kana shato lo lomingu.” Onde nde ndjaokaka dia aki ohomba mbidja welo wa ngasɔ? Nde mbutaka ate: “Laki l’ɔngɛnɔngɛnɔ efula lo yoho y’esambishelo shɔ. Laki l’ɔngɛnɔngɛnɔ wa nkimanyiya nkumbo kɛmɔtshi ka lo dihole dianganyi dia mbeka akambo wa mɛtɛ.”

Mbokɛmaka dia aha anto tshɛ wa lo tshumanelo dia l’ɛtshi ka nkɛtɛ kɛsɔ mbele l’akoka wa ntshɔ lo dihole di’etale. Koko anto tshɛ, mbidja ndo apandjudi w’esombe salaka la wolo dia nsambisha lo ɛtshi kawɔ ka nkɛtɛ k’otondo. Etombelo wele la dui sɔ ele, lo 2017 lofulo l’anto wa l’esomba esato ɛsɔ wakɔtɔ lo Eohwelo waki suke la ndodia l’ahende lofulo l’apandjudi kana k’ahende ɔtɔi k’anto wa l’esomba akɔ. Aha la tamu, dihole tshɛ diakokaso nkamba, diekɔ la “akambo efula wa nsala l’olimu wa Nkumadiɔndjɔ.”​—1 Kɔr. 15:58.