1, 2. a) Ngande weyaso dia sho kokaka ndɔta lonto l’oyoyo? b) Waonga akɔna wa lo lonto l’oyoyo watanaso lo Kɔlɔsayi 3:10-14?

LO BIBLE—Ekadimwelo k’andja w’oyoyo, sho tanaka etelo k’ɔnɛ “lonto l’oyoyo” mbala hiende. (Ɛf. 4:24; Kɔl. 3:10) Dui sɔ mendanaka la lonto “lakatongama lo ndjela lolango la Nzambi.” Onde sho kokaka ndɔta lonto l’oyoyo lɔsɔ? Eelo. Jehowa akatonge anto l’efanelo kande, diakɔ diele tekɔ l’akoka wa mbokoya waonga ande w’amɛna.​—Eta. 1:26, 27; Ɛf. 5:1.

² Ekɔ mɛtɛ dia l’ɔtɛ wakatahowɔ eongelo kele keema kokele, sho tshɛ mongaka la nsaki ya kɔlɔ lo tena dimɔtshi. Sho sɛngiyamaka nto oma lo dihole dieso. Koko lo kɛtshi ka Jehowa, sho koka monga woho w’anto walangande sho monga. Dia tokimanyiya dia mbɔsa yɛdikɔ ya nsala dui sɔ, tayanga nsɛdingola waonga efula wa lo lonto l’oyoyo. (Adia Kɔlɔsayi 3:10-14.) Oma laasɔ, tayɛna woho wakokaso nkɛnɛmɔla waonga asɔ l’olimu aso w’esambishelo.

3. Naa dionga dimɔtshi dia lo lonto l’oyoyo?

³ Pɔɔlɔ akalembetshiya dia aha monga la shɔnɔdi ekɔ dionga  di’ohomba dia lo lonto l’oyoyo. Nde akate ate: “Otshikitanu keema lam’asa ose Ngirika la ose Juda, minya mpota la aha minya mpota, ɔngɛndangɛnda la Skutiya, * mfumbe la onto lele la lotshungɔ.” L’etshumanelo, ndooko onto lahomba mfɔnya dia nde ndeka anto akina l’ɔtɛ wa lokoho lande la demba, wodja ande kana dihole diele la nde lo tshunda. Lande na? Nɛ dia oko weso ambeki wa Yeso, sho tshɛ “[t]ekɔ kaamɛ.”​—Kɔl. 3:11; Ngal. 3:28.

4. a) Ngande wahomba ekambi wa Jehowa salɛ anto akina akambo? b) Dui diakɔna diakoka mbidja kaamɛ k’Akristo l’ohemba?

⁴ Etena kalɔtaso lonto l’oyoyo, sho salɛka anto tshɛ akambo la dilɛmiɛlɔ ndo la kɛnɛmɔ oyadi lokoho lakɔna la demba lele la wɔ kana dihole dioyewɔ. (Rɔmɔ 2:11) L’ahole amɔtshi, dui sɔ koka monga tshondo y’okakatanu. Ɛnyɛlɔ, lo nshi yakete l’Afrique du Sud, emboledi wakalɔngɔsɔlɛ anto wa lokoho la lokoho ahole awɔ wa mbidjasɛka. Anto efula wa lo wodja akɔ, mbidja ndo Ɛmɛnyi wa Jehowa waakadjasɛ l’ahole asɔ. Olui-walɔmbɔla wakakeketsha anangɛso dia “[n]taloya ngandji.” Diakɔ diele, lo Ngɔndɔ ka dikumi 2013, vɔ waketawɔ yɛdikɔ mɔtshi ya laande yakahombe nkimanyiya anangɛso wele la nkoho y’alemba yotshikitanyi dia ndeka mbeyana lam’asawɔ.​—2 Kɔr. 6:13, nɔtɛ.

5, 6. a) Ekongelo kakɔna kakasalema lo wodja ɔmɔtshi kakakimanyiya ekambi waki Nzambi dia ndeka monga kaamɛ? (Enda osato wele lo mbɔtwɛlɔ.) b) Etombelo akɔna waki la dui sɔ?

⁵ Anangɛso wakakongɛ dia lo wikɛndɛ ɛmɔtshi, Ɛmɛnyi wa Jehowa wa lo tshumanelo pende dia l’ɛtɛkɛta ndo nkoho y’alemba yotshikitanyi mbetshaka wenya kaamɛ. Anangɛso l’akadiyɛso w’oma lo tshumanelo pende sɔ wakasambishaka kaamɛ, wakatshɔka lo nsanganya kaamɛ ndo wakembɔnaka la waa kawɔ. Nkama ya tshumanelo wakasukɛ ekongelo kɛsɔ ndo biro ka filialɛ akalongola alapɔlɔ efula w’amɛna. Dui sɔ diakambiya kaanga anto amɔtshi waki komonga Ɛmɛnyi wa Jehowa. Ɛnyɛlɔ, owandji w’ɔtɛmwɛlɔ ɔmɔtshi akate ate: “Dimi keema Ɔmɛnyi wa Jehowa, koko dimi koka mbuta dia nyu nyakakongɛ olimu w’esambishelo lo yoho ya laande ndo kaanga mbenyu la nkoho y’alemba yotshikitanyi, nyekɔ kaamɛ.” Ngande wakayaoke anangɛso l’akadiyɛso l’ɔtɛ w’ekongelo kɛsɔ?

⁶ L’etatelo, kadiyɛso Noma katɛkɛta Xhosa akayakiyanyaka efula dia mbelɛ Ɛmɛnyi wa Jehowa wa l’etshumanelo k’Angɛlɛ lo luudu lande laha kawotake. Koko l’ɔkɔngɔ wa nde nsambisha l’Ɛmɛnyi wa Jehowa w’asungu ndo mbaembola la waa kawɔ, nde akangɛnangɛna efula. Nde akate ate: “Vɔ wekɔ anto oko sho!” Ɔnkɔnɛ, etena kakaye anangɛso l’akadiyɛso wa l’etshumanelo k’Angɛlɛ dia ndjosambisha l’ase etshumanelo ka Xhosa, Noma akelɛ amɔtshi l’atei awɔ lakande dia ndjɔlɛ la wɔ yangɔ. Nde akambe efula etena kakandɛnyi ɔngɛndangɛnda ande ɔmɔtshi waki ekumanyi k’osungu ambodjasɛ lo kisaka ka ponde ka tshitshɛ l’ɔngɛnɔngɛnɔ tshɛ. Diɛsɛ l’ekongelo kɛsɔ, anangɛso l’akadiyɛso efula wakakondja angɛnyi w’eyoyo ndo wakatetemala mbeya anto w’oma l’ahole wotshikitanyi.

7. Lande na kahombaso mbokaka anto akina kɛtshi mbala tshɛ?

⁷ Polo l’ekomelo k’andja wa Satana ɔnɛ, ekambi wa Jehowa wayongaka l’ehemba. Ohombelo w’olimu, hemɔ ya wolo, ɔlɔshamelo, mpokoso y’oma lo diangɔ diakatongama, oshishelo wa diangɔ l’ɔtɛ w’akambo wa kɔlɔ kana ekakatanu ekina koka monga la shɛngiya le so. Dia kimanyiyana lo tena di’ehemba, sho pombaka mbokana kɛtshi ka mɛtɛ. Kɛtshi  k’efula kayototshutshuya dia salɛ anto akina akambo w’ɛlɔlɔ. (Ɛf. 4:32) Waonga asɔ wekɔ waonga wa lo lonto l’oyoyo. Vɔ wayotokimanyiya dia mbokoya Nzambi ndo nsamba anto akina.​—2 Kɔr. 1:3, 4.

8. Naa etombelo w’amɛna wakoka monga naka sho mboka anto tshɛ wa l’etshumanelo kɛtshi ndo mbasalɛ ɔlɔlɔ? Sha ɛnyɛlɔ.

⁸ Ngande wakokaso nyomoleka mɛnya ɔlɔlɔ w’otema le ase etshumanelo kaso wakonɔ oma lo wodja okina kana wanɛ wele lo dihombo? Sho nangaka mbalongola, monga angɛnyi awɔ ndo mbakimanyiya dia vɔ nshihodia ɔnɛ tekɔ l’ohomba awɔ l’etshumanelo. (1 Kɔr. 12:22, 25) Ɛnyɛlɔ Dannykarl, akonɔ oma la Japon otsha la Philippines. Lam’ele nde aki ɔngɛndangɛnda, vɔ kombosalɛka akambo oko ase olimu akina wa lɛnɛ akandakambaka. Oma laasɔ, nde akatshu lo losanganya lɔmɔtshi l’Ɛmɛnyi wa Jehowa. Dannykarl akate ate: “Suke l’onto tshɛ laki lɛkɔ aki ose Japon, koko wakanongola la wasaso tshɛ oko onto lokoweyaka.” Ɔlɔlɔ wakosalɛ anangɛso wakatetemala mbokimanyiya dia ndjasukanya la Jehowa. L’ɔkɔngɔ diko, Dannykarl akabatizama ndo ɛlɔ kɛnɛ nde ekɔ ekumanyi. Asekande dikumanyi wekɔ l’ɔngɛnɔngɛnɔ, nɛ dia nde la wadɛnde Jennifer wekɔ ase etshumanelo ndo mbutaka ɔnɛ: “Vɔ waketɛ nsɛnɔ yawɔ ɛsɛlɛngɛ dia monga ambatshi mboka ndo wekɔ lo tosha ɛnyɛlɔ ka dimɛna k’anto wayanga ntondo Diolelo.”​—Luka 12:31.

9, 10. Sha ɛnyɛlɔ kɛnya etombelo w’amɛna wonga etena kokaso anto kɛtshi l’esambishelo.

⁹ Tekɔ la diaaso dia salɛ “anto tshɛ ɔlɔlɔ” etena kasambishaso lokumu l’ɔlɔlɔ la Diolelo. (Ngal. 6:10) Ɛmɛnyi wa Jehowa efula mbokaka anto wakonɔ kɛtshi ndo salaka la wolo dia mbeka ɔtɛkɛta awɔ. (1 Kɔr. 9:23) Welo wadjawɔ mongaka l’etombelo w’amɛna. Ɛnyɛlɔ, kadiyɛso Tiffany kele ombatshi mboka l’Australie akeke Swahili dia nkimanyiya etshumanelo ka Swahili ka l’osomba wa Brisbane. Kaanga mbele, nde aki l’okakatanu dia mbeka ɔtɛkɛta akɔ, lɔsɛnɔ lande lakaleke monga l’oyango. Tiffany mbutaka ate: “Naka wɛ nangaka monga l’ɔngɛnɔngɛnɔ l’olimu w’esambishelo, kete nkamba l’etshumanelo ka l’ɔtɛkɛta okina mendanaka la yɛ. Ɔsɔ ekɔ oko onto lɛngɔdi aha la ntomba oma l’osomba awɔ. Wɛ ayeya nkumbo kaso k’onto l’ɔnango ka l’andja w’otondo ndo ayɛna woho wetɔ kaamɛ oko lo dihindo.”

¹⁰ Nkumbo kɛmɔtshi ka lo Japon wakasale woho akɔ waamɛ. Sakiko, dikɛnda dia womoto mbutaka ate: “Mbala efula, etena kakiso l’esambishelo takahomanaka l’ase Brésil wakonɔ. Etena kakatawaɛnyaka avɛsa oma lo Bible kawɔ ka lo portugais, ɛnyɛlɔ Osambo 37:10, 11, 29 kana Ɛnyɛlɔ 21:3, 4, vɔ wakadjaka yimba ndo lo tena dimɔtshi vɔ wakakɛdiaka asɔyi.” Nkumbo  kɛsɔ wakoke wanɛ wakonɔ asɔ kɛtshi ndo wakalange mbakimanyiya dia mbeka akambo wa mɛtɛ, ko vɔ wakatatɛ mbeka portugais lo nkumbo. L’ɔkɔngɔ diko, nkumbo kakɔ wakayokimanyiya di’etshumanelo ka portugais ntatɛ. L’ɔkɔngɔ w’ɛnɔnyi efula, vɔ wakayokimanyiya anto efula wakonɔ dia monga ekambi wa Jehowa. Sakiko mbutaka ate: “Takadje welo efula dia mbeka portugais, koko ɛtshɔkɔ wakatakondja wakaleke welo wakatadje la fwa. Tekɔ la lowando l’efula le Jehowa.”​—Adia Etsha 10:34, 35.

11, 12. a) L’oyango akɔna wahombaso ndɔta lonto l’oyoyo? b) Kakɔna kayotokimanyiya dia ntetemala monga l’okitshakitsha?

¹¹ Sho pombaka ndɔta lonto l’oyoyo l’oyango wa ntombola Jehowa, koko aha di’anto akina totombola. Tohɔ dia kaanga ondjelo wa kokele akonge l’otako ndo akasale pɛkato. (Ɛdika la Ɛzɛkiyɛlɛ 28:17.) Sho keema kokele, diakɔ diele sho ndekaka monga l’okakatanu dia mbewɔ otako. Koko, sho kokaka ndɔta okitshakitsha. Kakɔna kayotokimanyiya dia nsala dui sɔ?

¹² Dui dia ntondo diayotokimanyiya dia monga l’okitshakitsha ele, mbadiaka Ɔtɛkɛta wa Nzambi lushi tshɛ ndo kanaka yimba la kɛnɛ kadiaso. (Eoh. 17:18-20) Sho pombaka nkana yimba lo yoho ya laande la kɛnɛ kakatetsha Yeso ndo ɛnyɛlɔ kande k’okitshakitsha. (Mat. 20:28) Yeso aki l’okitshakitsha w’efula woho wele nde akasole apɔstɔlɔ ande ekolo. (Jni. 13:12-17) Dikambo dikina diakokaso nsala ele, nɔmba Jehowa nyuma kande. Nyuma kande k’ekila kokaka tokimanyiya dia minya kanyi tshɛ yakoka tokonya dia mfɔnya ɔnɛ sho ndeka anto akina.​—Ngal. 6:3, 4; Flpɛ. 2:3.

13. Ɛtshɔkɔ akɔna waya lo monga l’okitshakitsha?

¹³ Adia Tokedi 22:4. Jehowa tɔlɔmbaka dia sho monga l’okitshakitsha. Okitshakitsha mbelaka ɛtshɔkɔ efula. Naka sho monga l’okitshakitsha, kete etshumanelo kayoleka monga lo wɔladi ndo kaamɛ. Ndo nto, Jehowa tɛnyaka ɔlɔlɔ ande waheyama mbɛdika. Ɔpɔstɔlɔ Petero akate ate: “Nyu tshɛ nyɔlɔtɛ okitshakitsha lam’asanyu, nɛ dia Nzambi petshaka akanga wa lotamanya, koko nde salɛka akanga w’okitshakitsha ɔlɔlɔ waheyama mbɛdika.”​—1 Pe. 5:5.

14. Onto akɔna ele ɛnyɛlɔ koleki tshɛ k’onto lele la memakana ndo solo dia lotutsha?

¹⁴ L’andja wa nshi nyɛ naka onto ekɔ la memakana ndo solo dia lotutsha, mbala efula anto akina fɔnyaka dia nde bu la wolo. Koko, dui sɔ bu mɛtɛ. Waonga w’amɛna asɔ ndja oma le Jehowa, Onto loleki wolo l’andja w’otondo. Nde ekɔ ɛnyɛlɔ koleki tshɛ k’onto lele la memakana ndo l’okitshakitsha. (2 Pe. 3:9) Ɛnyɛlɔ, tokane yimba lo dikambo dia solo dia lotutsha diaki la Jehowa etena kakandakadimolaka Abrahama la Lɔta lo tshimbo y’andjelo Ande. (Eta. 18:22-33; 19:18-21) Ndo tokane yimba lo dikambo dia solo dia lotutsha diaki la Jehowa otsha le wodja w’Isariyɛlɛ wakohindolɛ l’edja k’ɛnɔnyi ndekana 1 500.​—Ɛzk. 33:11.

15. Ɛnyɛlɔ kakɔna kakatshike Yeso ka monga la memakana ndo solo dia lotutsha?

¹⁵ Yeso aki la “memakana.” (Mat. 11:29) Nde aki la solo dia lotutsha di’efula otsha le ambeki ande kaanga mbakiwɔ la wandja. Lam’akandakambaka olimu w’esambishelo la nkɛtɛ, mbala efula wakɔnyɔlaka Yeso ndo wakomamatanyiyɛka akambo. Koko nde aki la memakana ndo solo dia lotutsha polo lo nyɔi kande. Etena kakadiɛnɛka Yeso la paa k’efula l’otamba w’asui, nde akalɔmbɛ She dia dimanyiya apami wakodiake. Nde akate ate: “Vɔ haweye kɛnɛ kasalawɔ.” (Luka 23:34) Kaanga etena kaki Yeso l’okiyanu kana la paa, nde aki  la memakana ndo solo dia lotutsha.​—Adia 1 Petero 2:21-23.

16. Ngande wakokaso mɛnya dia tekɔ la memakana ndo solo dia lotutsha?

¹⁶ Pɔɔlɔ akashile yoho mɔtshi yakokaso nkɛnɛmɔla memakana ndo solo dia lotutsha etena kakandafunde ate: “Nyotetemale mbikikanɛ kɔlɔ ndo nyodimanyiyanake l’otema ɔtɔi lam’asanyu, oyadi kaanga onto ekɔ la dikambo dia nyangɛ osekande, oko wakanyodimanyiya Jehowa l’otema ɔtɔi, nyu lawɔ pombaka nsala woho akɔ waamɛ.” (Kɔl. 3:13) Dia dimanyiya anto akina, sho pombaka monga la solo dia lotutsha ndo memakana. Dui sɔ diayokimanyiya dia kaamɛ ntetemala monga l’etshumanelo.

17. Lande na kele memakana ndo solo dia lotutsha ekɔ ohomba?

¹⁷ Jehowa tɔlɔmbaka dia sho monga la memakana ndo solo dia lotutsha otsha le anto akina. Waonga asɔ wekɔ ohomba efula naka sho nangaka nsɛna l’andja ande w’oyoyo. (Mat. 5:5; Jak. 1:21) Naka tekɔ la memakana ndo solo dia lotutsha, kete tayotombola Jehowa ndo nkimanyiya anto akina dia nsala woho akɔ waamɛ.​—Ngal. 6:1; 2 Tim. 2:24, 25.

18. Ngande wɔtɔnɛ ngandji ndo aha monga la shɔnɔdi?

¹⁸ Waonga wambotɔsɛdingola asɔ tshɛ mbɔtɔnɛka la ngandji. Ɛnyɛlɔ, ombeki Jakɔba akalake anango nɛ dia vɔ wakasalɛka akanga w’ɔngɔnyi akambo lo yoho ya dimɛna efula oleki ase wola. Nde akalembetshiya dia dui sɔ ndɔshanaka l’ɔlɛmbɛ wa Nzambi wata ɔnɛ “langa wonyayɛ onto oko wayalangayɛ.” Oma laasɔ nde akakotsha ate: “Naka nyayotetemala monga la shɔnɔdi, kete nyekɔ lo nsala pɛkato.” (Jak. 2:8, 9) Naka sho nangaka anto, kete hatotonga la shɔnɔdi y’onto l’ɔtɛ wa kalasa kakandɔtɔ, lokoho lande la demba kana dihole diele la nde lo tshunda. Hatokoke nsala akambo tsho dia mɛnya dia sho bu la shɔnɔdi. Aha monga la shɔnɔdi pombaka monga lo lonto laso.

19. Lande na kele ekɔ ohomba dia sho ndɔta ngandji?

¹⁹ Ngandji ekɔ nto la “solo dia lotutsha ndo ɔlɔlɔ” ndo “hayadiya.” (1 Kɔr. 13:4) Sho pombaka monga la solo dia lotutsha, ɔlɔlɔ ndo l’okitshakitsha dia ntetemala nsambisha asukanyi aso lokumu l’ɔlɔlɔ. (Mat. 28:19) Laadiko dia laasɔ, waonga asɔ tokimanyiyaka dia mbokana l’anangɛso l’akadiyɛso tshɛ wa l’etshumanelo. Naka sho tshɛ monga la ngandji ka ngasɔ, kete etshumanelo kaso kayonga kaamɛ ndo kayotombola Jehowa. Anto akina wayɛna kaamɛ kɛsɔ ndo wayokotwama oya l’akambo wa mɛtɛ. Ekɔ ngasɔ nɛ dia elembetshielo washa Bible lo dikambo dia lonto l’oyoyo komɛka ɔnɛ: “Laadiko dia akambo asɔ tshɛ, nyɔlɔtɛ ngandji, nɛ dia tɔ kele dimama dia kokele.”​—Kɔl. 3:14.

20. a) Ambola akɔna wahombaso ndjaoka? Lande na? b) Nshi yayaye ya ngande yakokaso kongɛɛ l’asolo walomɔlomɔ?

²⁰ Sho pombaka ndjambola ɔnɛ: ‘Etshikitanu akɔna waakamahombe nsala dia nkolola ndo aha nyomɔlɔta lonto l’edjedja?’ Sho pombaka nɔmba Jehowa ndo mbɔsɛngasɛnga dia nde tokimanyiya. Sho pombaka nsala la wolo dia ntshikitanya tokanyi ndo etsha aso wa kɔlɔ dia sho “[ndj]okita Diolelo dia Nzambi.” (Ngal. 5:19-21) Sho pombaka nto ndjambola ɔnɛ: ‘Onde dimi tetemalaka ntshikitanya yoho yami y’ekanelo ka yimba dia ngɛnyangɛnya Jehowa?’ (Ɛf. 4:23, 24) Sho keema kokele, ɔnkɔnɛ sho pombaka ntetemala nsala la wolo dia ndɔta ndo ntetemala monga la lonto l’oyoyo. Ɔsɔ ekɔ dui diahombaso ntetemala nsala. Ande lɔsɛnɔ la dimɛna layotonga la lɔ etena kayɔlɔta onto tshɛ lonto l’oyoyo ndo kayotokoya waonga w’amɛna wa Jehowa lo yoho ya kokele lee!