1. Kakɔna kɛnya dia Jehowa ekɔ la lokaho?

AKI etena kɛmɔtshi kaki Jehowa ndamɛ oto. Oma laasɔ, nde akɔshi yɛdikɔ ya mbisha ditongami diande diele la yimba dia l’olongo ndo dia la nkɛtɛ woshasha wa lɔsɛnɔ. Jehowa “Nzambi k’ɔngɛnɔngɛnɔ” nangaka nkaha diangɔ di’amɛna. (1 Tim. 1:11; Jak. 1:17) Lam’ele Jehowa nangaka dia sho lawɔ monga l’ɔngɛnɔngɛnɔ, nde tetshaka woho wa monga la lokaho.​—Rɔmɔ 1:20.

2, 3. a) Lande na kongaso l’ɔngɛnɔngɛnɔ naka tekɔ la lokaho? b) Kakɔna kayotɔsɛdingola lo sawo nɛ?

² Nzambi akatonge anto l’efanelo kande. (Eta. 1:27) Dui sɔ nembetshiyaka dia Jehowa akatotonge la waonga wele oko wande. Dia sho monga mɛtɛ l’ɔngɛnɔngɛnɔ ndo tshɔkwama oma le Jehowa, sho pombaka ndjela ɛnyɛlɔ kande. Sho pombaka ndjasha l’otema ɔtɔi le anto akina ndo monga anto wele la lokaho. (Flpɛ. 2:3, 4; Jak. 1:5) Lande na? Nɛ dia ngasɔ  mbakatotonge Jehowa. Kaanga mbeso bu kokele, sho lawɔ koka mbokoya Jehowa ndo monga la lokaho.

³ Tayanga nsɛdingola wetshelo ɛmɔtshi washa Bible lo kɛnɛ kendana la lokaho. Tayeya lande na kele Jehowa ngɛnangɛnaka naka tekɔ la lokaho. Tayeya nto, lande na kele lokaho tokimanyiyaka dia nkamba olimu wakatosha Jehowa ndo lande na kongaso l’ɔngɛnɔngɛnɔ naka tekɔ la lokaho. Ndo tayɔsɛdingola lande na kahombaso ntetemala monga la lokaho.

4, 5. Ngande wakɛnya Jehowa la Yeso lokaho, ndo lande na kahombaso mbaokoya?

⁴ Jehowa nangaka dia sho mbookoya, diakɔ diele nde ngɛnangɛnaka naka tekɔ la lokaho. (Ɛf. 5:1) Jehowa nangaka nto di’anto monga l’ɔngɛnɔngɛnɔ. Sho mbeyaka dui sɔ nɛ dia nde akatotonge lo yoho ya diambo efula ndo akatonge nkɛtɛ ka dimɛna efula ndo ɛngɔ tshɛ kele lɔkɔ dia sho monga l’ɔngɛnɔngɛnɔ. (Os. 104:24; 139:13-16) Diakɔ diele, sho tombolaka Jehowa etena kangɛnyangɛnyaso anto akina.

⁵ Sho mbokoyaka nto Yeso lakasha ɛnyɛlɔ ka kokele lo woho wakoka anto monga la lokaho. Nde akate ate: “Ɔna onto akaye aha dia anto mbokambɛ olimu, koko dia ndjokambɛ anto akina olimu ndo nkimɔ lɔsɛnɔ lande oko oshinga w’etshungwelo dikambo di’anto efula.” (Mat. 20:28) Ndo ɔpɔstɔlɔ Pɔɔlɔ akakeketsha Akristo ate: “Nyongake la yimba nyɛ yaki ndo le Kristo Yeso . . . Nde akatshike kɛnɛ tshɛ kaki la nde, ko akayaetɛ oko mfumbe.” (Flpɛ. 2:5, 7) Diakɔ diele, sho koka ndjambola ɔnɛ: ‘Onde dimi koka nyomoleka ndjela ɛnyɛlɔ ka Yeso?’​—Adia 1 Petero 2:21.

6. Kakɔna kakatetsha Yeso lo wɛɛla w’ose Samariya l’ɔlɔlɔ? (Enda osato wele lo mbɔtwɛlɔ.)

⁶ Jehowa ngɛnangɛnaka etena kayelaso ɛnyɛlɔ ka kokele kakandatosha nde la Yeso. Sho salaka dui sɔ etena kayashaso le anto ndo kayangaso toho ta mbakimanyiya. Yeso akɛnya woho wele dui sɔ ohomba etena kakandasha wɛɛla w’ose Samariya l’ɔlɔlɔ. (Adia Luka 10:29-37.) Nde aketsha ambeki ande ɔnɛ vɔ pombaka nkimanyiya anto akina, oyadi woho w’anto akɔna wewɔ kana oma lɛnɛ oyewɔ. Onde wɛ mbohɔka lande na kakasha Yeso wɛɛla ɔsɔ? Aki l’ɔtɛ wakawombola ose Juda ɔmɔtshi ɔnɛ: “Akɔna mɛtɛ ele wonyami?” Okadimwelo waki Yeso tetshaka dia l’ɛnyɛlɔ k’ose Samariya ɔsɔ, sho pombaka monga la lokaho, naka sho nangaka ngɛnyangɛnya Jehowa.

7. Ngande wɛnyaso ɔnɛ sho mbetawɔka ɔnɛ yoho yasala Jehowa akambo mboleki dimɛna? Lembetshiya.

⁷ Ɔkɔkɔ okina wahombaso monga la lokaho mendanaka la kɛnɛ kakatombe l’ekambɔ k’Ɛdɛna. Satana akate dia Adama l’Eva wayoleka ngɛnangɛna, naka vɔ hawokitanyiyisha Jehowa ndo kanyiyaka paka lo dikambo diawɔ vɔamɛ. Eva aki la lokaki ndo akalange dia monga oko Nzambi. Adama aki la lokaki ndo akalange dia ngɛnyangɛnya Eva oleki Nzambi. (Eta. 3:4-6) Dui sɔ diaki l’etombelo wa kɔlɔ efula. Mbokɛmaka dia ndooko onto lakoka monga l’ɔngɛnɔngɛnɔ, naka nde ekɔ la lokaki. Koko naka sho bu la lokaki ko tekɔ la lokaho, sho mɛnyaka dia sho mbetawɔka dia yoho yasala Jehowa akambo mboleki dimɛna.

8. Lande na kakahombe Adama l’Eva nkanyiya dikambo di’anto akina?

⁸ Kaanga mbaki Adama l’Eva vɔamɛ l’ekambɔ k’Ɛdɛna, vɔ wakahombe nkanyiya dikambo di’anto akina. Lande na? Jehowa akawasha olimu wa nsala. Nde akawatɛ dia ndodia nkɛtɛ l’anawɔ ndo kietɛ paradiso. (Eta. 1:28) Adama l’Eva wakahombe nkombola di’anawɔ wakahombe ndjotɔ monga l’ɔngɛnɔngɛnɔ oko wakakombola Jehowa dia vɔ tshɛ monga l’ɔngɛnɔngɛnɔ. Vɔ tshɛ wakahombe nkamba kaamɛ dia mbetɛ nkɛtɛ k’otondo paradiso. Ɔsɔ otonga olimu w’efula.

9. Lande na kotonga anto l’ɔngɛnɔngɛnɔ etena kotowetɛ nkɛtɛ paradiso?

⁹ Anto wa kokele wakahombe nto nkamba kaamɛ la Jehowa dia mbetɛ nkɛtɛ paradiso ndo nkotsha lolango lande. Lo nsala ngasɔ, vɔ wotɔtɔ lo momuya kande. (Hɛb. 4:11) Ande dimɛna ndo ɔlɔ wotonga olimu ɔsɔ lee! Jehowa otowatshɔkɔla efula otondonga vɔ wakakanɛ anto akina ndo komonga la lokaki.

10, 11. Kakɔna kayotokimanyiya dia nsambisha ndo mbetɛ anto ambeki?

¹⁰ Ɛlɔ kɛnɛ, Jehowa akatosha olimu wa laande wa nkamba. Nde nangaka dia sho nsambisha ndo mbetɛ anto ambeki. Dia nkamba olimu ɔsɔ, sho pombaka mɛtɛ ndjakiyanya dikambo di’anto akina. Lo mɛtɛ, sho koka ntetemala nkamba olimu ɔsɔ, paka naka tekɔ l’ɛkɔkɔ watotshutshuya, mbuta ate ngandji kokaso Jehowa ndo anto.

¹¹ Pɔɔlɔ akate dia nde l’Akristo akina wa lo ntambe ka ntondo waki “ekambi kaamɛ la Nzambi,” nɛ dia vɔ wakasambishaka ndo waketshaka anto akambo wa mɛtɛ. (1 Kɔr. 3:6, 9) Ɛlɔ kɛnɛ, sho lawɔ koka monga “ekambi kaamɛ la Nzambi” lo kambaka la wenya ndo wolo aso ndo kimɔka diangɔ dia l’emunyi dia nkamba olimu w’esambishelo wakatosha Nzambi. Ɔsɔ ekɔ diɛsɛ dia laande!

12, 13. Ɛlɔlɔ akɔna waya lo mbetɛ anto ambeki?

¹² Nkamba la wenya ndo la wolo aso dia nsambisha ndo mbetsha toshaka ɔngɛnɔngɛnɔ w’efula. Kɛsɔ mbata anangɛso l’akadiyɛso efula wakonge la diaaso dia mbeka l’anto Bible. Sho mongaka l’ɔngɛnɔngɛnɔ efula etena kɛnaso ambeki aso wangɛnangɛna etena kashihodiawɔ kɛnɛ katetsha Bible, kongawɔ la mbetawɔ k’oshika, kasalawɔ etshikitanu lo nsɛnɔ yawɔ ndo katatɛwɔ mbitɛ anto akina awui wekawɔ. Yeso akonge nde lawɔ l’ɔngɛnɔngɛnɔ w’efula, etena kakandɛnyi ambeki ande 70 ‘wambokalola l’ɔngɛnɔngɛnɔ’ l’ɔtɛ w’awui w’amɛna wakahomana la wɔ.​—Luka 10:17-21.

¹³ Anangɛso l’akadiyɛso wa l’andja w’otondo mongaka l’ɔngɛnɔngɛnɔ etena kɛnawɔ woho wakimanyiya losango la lo Bible anto  dia ntshikitanya nsɛnɔ yawɔ. Ɛnyɛlɔ, Anna kadiyɛso k’onyemba k’osekaseka akalangaka nsala awui efula lo dikambo dia Jehowa. * Diakɔ diele, nde akonɔ l’ɛtshi ka nkɛtɛ ka lo Erɔpɛ wa lo ɛstɛ lɛnɛ akiwɔ l’ohomba efula w’apandjudi. Nde akafunde ate: “Lekɔ la waaso efula wa mbeka l’anto Bible lanɛ ndo dimi nangaka dui sɔ efula. Olimu ami mbishakami ɔlɔ w’efula. Etena kakalolami la ngelo, dimi bu l’etena ka ndjasha l’awui ami dimɛ. Dimi kanyiyaka dikambo di’anto weka la mi, ekakatanu ndo ekiyanu awɔ. Dimi nyangaka toho shikaa ta mbakeketsha ndo mbakimanyiya. Ndo lamboshikikɛ dia ‘ɔngɛnɔngɛnɔ waya lo mbisha ndeka wa nongola.’”—Ets. 20:35.

14. Ngande wakokayɛ ngɛnangɛna esambishelo oyadi kaanga anto hawohokamɛ?

¹⁴ Oyadi anto hawotohokamɛ etena kasambishaso, sho koka monga l’ɔngɛnɔngɛnɔ, nɛ dia tekɔ lo mbasha diaaso dia vɔ mboka lokumu l’ɔlɔlɔ. Jehowa nongamɛka dia sho nsala dui diakɔ diamɛ diakandalɔmbɛ Ɛzɛkiyɛlɛ dia nsala nɛ: “Wɛ pombaka mbatɛ ɛtɛkɛta ami, oyadi vɔ mpokamɛ kana bu.” (Ɛzk. 2:7; Isa. 43:10) Ɔnkɔnɛ, oyadi anto mbetawɔ kana hawetawe, Jehowa mbɔsaka welo wadjaso la nɛmɔ. (Adia Hɛbɛru 6:10.) Ɔnangɛso ɔmɔtshi akate lo dikambo di’esambishelo kande ate: “Sho takonɛ, takatɛ ashi ndo takalɔmbɛ l’elongamelo dia Jehowa ayodia.”​—1 Kɔr. 3:6.

15. Onde sho pombaka monga la lokaho paka naka anto wekɔ la lowando? Lembetshiya.

¹⁵ Yeso nangaka dia sho monga la lokaho nɛ dia dui sɔ tɔngɛnyangɛnyaka. Naka sho monga la lokaho, kete anto efula wayonga vɔ lawɔ la lokaho. Diakɔ diatokeketshande ate: “Nyonge la mbekelo ka nkaha, ko wayonyokahɛ. Wayonyodjɛ lo afunda anyu yɛdikɔ y’ɔlɔlɔ yoludi, ya lɔkɔkɔmɛ ndo yatshulɔtshulɔ. Nɛ dia la yɛdikɔ yɛdikɛnyu anto akina mbayowonyɛdikɛ ndo nyu.” (Luka 6:38) Lo mɛtɛ, oyadi wɛ ekɔ la lokaho, aha anto tshɛ mbayonga la  lowando. Koko oyadi vɔ bu la lowando, tetemala nkaha. Wɛ hateya pondjo etombelo w’amɛna wakoka monga la tshelo tshɔi ya lokaho.

16. Anto akɔna wahombaso kahɛ, ndo lande na?

¹⁶ Lo mɛtɛ, anto wele la lokaho hawokahe l’elongamelo k’anto ndjowakahɛ vɔ lawɔ. Yeso akate ate: “Etena kasalayɛ fɛtɛ, elɛ ase wola, akanga wa dikɔmɔ, akanga wa tshumbe ndo akanga wa totshungu; ko wɛ ayonga l’ɔngɛnɔngɛnɔ, nɛ dia vɔ ndooko la ɛngɔ ka kofuta.” (Luka 14:13, 14) Bible mbutaka nto ɔnɛ: “Kanga lokaho ayɔtshɔkwama,” ndo ɔnɛ: “Ɔngɛnɔngɛnɔ le ɔnɛ tshɛ ladja mbolambola yimba.” (Tok. 22:9; Os. 41:1) Sho pombaka monga la lokaho nɛ dia sho nangaka mɛtɛ nkimanyiya anto akina.

17. Naa toho tɔmɔtshi takokaso monga la lokaho ko monga l’ɔngɛnɔngɛnɔ?

¹⁷ Etena kakashile Pɔɔlɔ ɛtɛkɛta wa Yeso wata ɔnɛ “ɔngɛnɔngɛnɔ waya lo mbisha ndeka wa nongola,” nde kɔtɛkɛtaka tsho lo kɛnɛ kendana la mbishana diangɔ dia l’emunyi. Sho koka mbisha anto ndo ekeketshelo, alako w’oma lo Bible ndo ekimanyielo. (Ets. 20:31-35) Lo ndjela kɛnɛ kakate ndo kakasale Pɔɔlɔ, nde akatetsha ohomba wa monga la lokaho lo kɛnɛ kendana la wenya, wolo, yimba ndo ngandji kaso.

18. Kakɔna kata anyangiyangi efula lo kɛnɛ kendana la monga la lokaho?

¹⁸ Anyangiyangi wakeke lɔkɛwɔ l’onto wakɛnyi vɔ lawɔ dia lokaho mbishaka anto ɔngɛnɔngɛnɔ. Lo ndjela sawo dimɔtshi, anto mbutaka dia vɔ ndekaka monga l’ɔngɛnɔngɛnɔ l’ɔkɔngɔ wa vɔ salɛ anto akina awui w’amɛna. Anyangiyangi mbutaka dia etena kakimanyiyaso anto akina, sho ndjaokaka dia lɔsɛnɔ laso lekɔ l’oyango ndo ohomba. Diakɔ diele, tomanyi tɔmɔtshi mbutaka di’anto kambaka elimu la lolango dia ndeka monga la yoonge ya dimɛna ndo l’ɔngɛnɔngɛnɔ. Lo mɛtɛ, kɛnɛ kakawashola hatambiya, nɛ dia Jehowa Otungi aso wa ngandji, mbutaka tena tshɛ dia lokaho toshaka ɔngɛnɔngɛnɔ.​—2 Tim. 3:16, 17.

19, 20. Lande na kalangayɛ monga la lokaho?

¹⁹ Etena kayakiyanya anto wotodingi paka lo dikambo diawɔ, koka monga tshondo y’okakatanu dia ntetemala monga la lokaho. Koko Yeso akatohola dia ɛlɛmbɛ ehende woleki weke ekɔ nanga Jehowa Nzambi kaso l’otema aso tshɛ, la anima aso tshɛ, la yimba yaso tshɛ ndo la wolo aso tshɛ ndo nanga wonyaso onto oko wayalangaso. (Makɔ 12:28-31) Tambeka lo sawo nɛ di’anto woka Jehowa ngandji mbookoyaka. Jehowa la Yeso wekɔ la lokaho. Vɔ tokeketshaka dia ndjela ɛnyɛlɔ kawɔ, nɛ dia vɔ mbeyaka dia dui sɔ diayotosha mɛtɛ ɔngɛnɔngɛnɔ. Naka sho monga la lokaho lo kɛnɛ kasalaso lo dikambo dia Jehowa ndo wonyaso onto, kete tayotombola Jehowa ndo tayokondja wahɔ shoamɛ ndo anto akina.

²⁰ Lo mɛtɛ, wɛ okosalaka la wolo dia monga la lokaho ndo nkimanyiya anto akina, djekoleko anangɛyɛ l’akadiyɛyɛ. (Ngal. 6:10) Naka wɛ ntetemala nsala dui sɔ, kete anto wayonga la lowando, wayokoka ngandji ndo wɛ ayonga l’ɔngɛnɔngɛnɔ. Bible mbutaka ɔnɛ: “Kanga lokaho ayɔngɔna, ndo ɔnɛ lashana ashi wa nnɔ wayowosha ndo nde lawɔ.” (Tok. 11:25) Lo lɔsɛnɔ laso ndo l’esambishelo kaso, tekɔ la toho efula takokaso mbisha, monga ɔlɔlɔ ndo la lokaho. Tayɔsɛdingola toho tɔmɔtshi l’atei atɔ lo sawo diayela.