LAM’ELE ekakatanu wekɔ lo tafule lo “nshi y’ekomelo,” ekambi wa Jehowa wamboleka monga l’ohomba wa solo dia lotutsha. (2 Tim. 3:1-5) Sho dingama l’andja wele mbala efula anto wekɔ lo ndjalanga, hawolange mbokana ndo bu la ndjakimɛ. Mbala efula, wanɛ wakɛnɛmɔla waonga asɔ bu la solo dia lotutsha. Koko, Okristo tshɛ pombaka ndjambola ɔnɛ: ‘Onde andja wele anto bu la solo dia lotutsha wekɔ la shɛngiya le mi? Elɛwɔ mɛtɛ monga la solo dia lotutsha? Ndo ngande wakokami mbetɛ dionga di’ohomba di’Okristo sɔ dionga dia lo lonto lami?’

Lo ndjela Bible, solo dia lotutsha nembetshiyaka awui efula laadiko dia nsala la wolo dia mbikikɛ dui dimɔtshi. Onto lele la solo dia lotutsha dia Nzambi mbikikɛka l’oyango ɔmɔtshi. Nde hende tsho ehomba ande, koko nde mbidjaka yimba lo ɔlɔlɔ w’onto loosale dui dimɔtshi dia kɔlɔ. L’ɔtɛ w’ɔkɔkɔ ɔsɔ mbele, naka onto lele la solo dia lotutsha ambonyanga kana wambowosalɛ dui dia kɔlɔ, nde hahekɔ nongamɛ dia diɔtɔnganelo diakalana diayɔlɔngɔsɔma. Dui dia diambo ko, Bible shilaka “solo dia lotutsha” oko dionga dia ntondo lo waonga efula w’amɛna waya oma lo ngandji. * (1 Kɔr. 13:4) Ɔtɛkɛta wa Nzambi shilaka ndo “solo dia lotutsha” oko dionga dimɔtshi dia lo “olowa wa nyuma.” (Ngal. 5:22, 23) Ko kakɔna kalɔmbama dia monga la dionga dia Nzambi sɔ?

Dia monga la solo dia lotutsha, sho pombaka nɔmba ekimanyielo ka nyuma ka Jehowa kashande wanɛ wayaɛkɛ le nde. (Luka 11:13) Koko kaanga mbele nyuma ka Nzambi kekɔ la wolo w’efula, sho pombaka nsala kɛnɛ kakokaso nsala ndo nsala akambo lo yoho yɔtɔnɛ l’alɔmbɛlɔ aso. (Os. 86:10, 11) Dui sɔ nembetshiyaka dia sho pombaka nsala la wolo dia monga la solo dia lotutsha lushi tshɛ dia dionga sɔ mbika edio lo etema aso. Koko, kaanga l’ɔkɔngɔ wa laasɔ sho koka ndeka mbidja welo dia solo dia lotutsha mongaka etenyi kɛmɔtshi ka lonto laso. Kakɔna kakoka tokimanyiya nto?

Sho koka monga la solo dia lotutsha lo nsɛdingola ndo mbokoya ɛnyɛlɔ ka kokele ka Yeso. Lo yoho yɔtɔnɛ la ɛnyɛlɔ kɛsɔ, ɔpɔstɔlɔ Pɔɔlɔ akate l’ekimanyielo ka nyuma dia “lonto l’oyoyo,” mendanaka ndo la “solo dia lotutsha” ndo oma laasɔ nde akatokeketsha ate “wɔladi wa Kristo walɔmbɔlɛ etema anyu.” (Kɔl. 3:10, 12, 15) Sho koka mbetawɔ dia wɔladi ɔsɔ ‘nɔmbɔla’ etema aso lo mbokoya mbetawɔ k’efula kaki la Yeso ɔnɛ Nzambi ayɔlɔngɔsɔla akambo watokiyanya l’etena kahombama. Naka sho mbokoya ɛnyɛlɔ ka Yeso, kete hatotoshisha solo dia lotutsha oyadi dui diakɔna diakoka ntomba lo dihole dieso.​—Jni. 14:27; 16:33.

 Kaanga mbalomɔlomɔso dia mɛna andja w’oyoyo watolaka Nzambi, sho mbekaka dia ndeka monga la solo dia lotutsha etena kakanaso yimba lo woho wele Jehowa la solo dia lotutsha oya le so. Afundelo toshikikɛka ɔnɛ: “Jehowa hatshimbatshimba dia nkotsha daka diande oko wafɔnya anto amɔtshi dia nde ekɔ lo ntshimbatshimba, koko nde ekɔ la solo dia lotutsha otsha le nyu, nɛ dia nde halange kaanga onto 1 ndanyema, koko nde nangaka dia anto tshɛ nkondja diaaso dia ndjatshumoya.” (2 Pe. 3:9) Etena kɛnaso woho wele Jehowa la solo dia lotutsha oya le so, shi sho tshutshuyamaka dia ndeka monga la solo dia lotutsha otsha le anto akina? (Rɔmɔ 2:4) La dui sɔ lo yimba, naa awui amɔtshi walɔmba dia monga la solo dia lotutsha?

Awui efula wahomana la so lushi la lushi mbeyaka mbidja solo diaso dia lotutsha l’ohemba. Ɛnyɛlɔ, naka wɛ ekɔ la dui di’ohomba dia mbuta, ondo ayonga ohomba dia wɛ monga la solo dia lotutsha diaha mpembola anto akina ɔtɛkɛta. (Jak. 1:19) Ondo ayonga ohomba nto wɛ monga la solo dia lotutsha etena keyɛ kaamɛ la asekayɛ ambetawudi wele la mbekelo yakomadia. Lo dihole dia nsala akambo la esasesase, ayonga dui dia lomba le yɛ dia nsɛdingola kɛnɛ kasala Jehowa la Yeso la wɛɔdu aso. Vɔ hawoke washo lo munga yaso ya totshitshɛ. Koko, vɔ mendaka waonga aso w’ɛlɔlɔ ndo la solo dia lotutsha tshɛ vɔ mendaka welo wadjaso dia ndjalowanya.​—1 Tim. 1:16; 1 Pe. 3:12.

Dui dikina diakoka mbidja solo diaso dia lotutsha lo ohemba ele etena katomamatanyɛ onto ɔmɔtshi dia sho takate kana takasale dui dimɔtshi dia kɔlɔ. Mbala efula, sho koka momala esadi ndo ndjaswɛlɛ. Koko, Ɔtɛkɛta wa Nzambi tɔlɔmbaka dia nsala akambo lo yoho kina. Vɔ mbutaka ɔnɛ: “Ndeka dimɛna monga la solo dia lotutsha lo dihole dia monga la yimba ya lotamanya. Tongake suke dia mboka nkɛlɛ, nɛ dia wokelo wa nkɛlɛ mbidjasɛka lo ntolo ka akanga wa dinginya.” (Ond. 7:8, 9) Koko, kaanga naka kɛnɛ katawɔ lo dikambo diaso kekɔ kashi tshɛ lo tshɛ, la solo dia lotutsha tshɛ sho pombaka nsɔna ɛtɛkɛta wa ntondja. Yeso akayele tɔndɔ sɔ etena kakatɛkɛta anto kɔlɔ lo dikambo diande.​—Mat. 11:19.

Lo yoho ya laande, ambutshi pombaka monga la solo dia lotutsha dia nkimanyiya anawɔ dia ntshikitanya lɔkɛwɔ lawɔ ndo mbewɔ nsaki ya kɔlɔ. Tɔshi ɛnyɛlɔ ka Mattias, lele ose nkumbo ka Bɛtɛlɛ la Scandinavie. Etena kakinde mangase, Mattias akakikɛ ntɛngɔ yakawɔtɛngaka la kalasa l’ɔtɛ wa dietawɔ diande. L’etatelo, ambutshi ande kombeyaka dui sɔ. Koko, vɔ wakahombe diɛnɛ la etombelo w’oma l’ɔlɔshamelo ɔsɔ le ɔnawɔ la pami lakatatɛ ndjambola dia kana nde akeyaka akambo wa mɛtɛ. Gillis she Mattias mbutaka ate: “Dui sɔ diakalɔmbɛ dia monga la solo dia lotutsha di’efula.” Mattias akambola ate: “Ele Nzambi? Ko kayotota naka Bible bu Ɔtɛkɛta wa Nzambi? Ngande weyaso dia Nzambi mɛtɛ mbatɔlɔmba dui kapanda?” Nde akayotɛ she nto ate: “Lande na kahombami nomboshama naka dimi haloyaoke woho wayaokayɛ ndo haletawɔ kɛnɛ ketawɔyɛ?”

Gillis mbutaka ate: “Lo tena dimɔtshi ɔnaso akokaka ambola la nkɛlɛ, aha l’ɔtɛ wakinde la nkɛlɛ lo dikambo diami kana dia nyango, koko l’ɔtɛ w’akambo wa mɛtɛ wakandafɔnyaka dia wambowetɛ lɔsɛnɔ wolo efula.” Ngande wakakandola Gillis okakatanu ɔsɔ? Nde mbutaka ate: “Etena kɛmɔtshi, dimi la ɔnami takadjasɛ ndo takasawola l’edja ka wenya efula. Lakaleke mbohokamɛ ndo lakawokaka ambola wenya ɛmɔtshi dia mbeya woho wakandayaokaka ndo kanyi yande. L’etena kɛmɔtshi,  lakoolembetshiya awui wakandahombe nkana la wɔ yimba lushi l’otondo kana ndekana ntondo ka sho ndjotetemala la sawo diaso. Lo tena dikina, laki l’ohomba wa nshi ngana dia nkana yimba dikambo dia kanyi mɔtshi yakandasha. Diɛsɛ la sawo dia mbala la mbala sɔ, yema yema, Mattias akafudia eokelo kande ndo aketawɔ, ɛnyɛlɔ wetshelo wendana la oshinga w’etshungwelo, lowandji laki Nzambi ndo ngandji ka Jehowa. Akɔshi etena k’otale ndo mbala efula aki tshondo y’okakatanu, koko yema yema ngandji ka Jehowa kakafule l’otema ande. Dimi la wadɛmi tekɔ l’ɔngɛnɔngɛnɔ w’efula, nɛ dia welo wakatadje la solo dia lotutsha dia nkimanyiya ɔnaso etena kakinde mangase wakonge l’etombelo w’ɛlɔlɔ ndo wakananda otema ande.”

Gillis la wadɛnde wakayaɛkɛ lo osukɔ wa Jehowa ndo la solo dia lotutsha tshɛ, vɔ wakakambe kaamɛ l’ɔnawɔ. Etena kakanyiyande dui sɔ, Gillis mbutaka ate: “Mbala efula lakatɛka Mattias ɔnɛ ngandji kawokaso mbatotshutshuya dimi la nyango dia nɔmba efula dia Jehowa mbokimanyiya dia nshihodia akambo.” Ande ɔngɛnɔngɛnɔ wele l’ambutshi asɔ l’ɔtɛ wakawakɛnɛmɔla dionga di’ohomba efula dia solo dia lotutsha lee!

Laadiko dia mbisha ekimanyielo ka lo nyuma, Akristo wa mɛtɛ pombaka monga la solo dia lotutsha etena kakokɛwɔ ase nkumbo kana angɛnyi awɔ wele la hemɔ yahakɔnɔ. Tɔshi ɛnyɛlɔ ka Ellen, * lele nde lawɔ la Scandinavie.

Ambeta ɛnɔnyi suke l’enanɛi wele, omi aki Ellen akadiɛnɛka la hemɔ hiende ya lo wɔɔngɔ yakafukutanya wɔɔngɔ ande. Etombelo wele la dui sɔ ele, nde hayokoka mbokana kɛtshi, ngɛnangɛna kana nyanga. Ɔsɔ ekɔ okakatanu wa wolo le Ellen. Nde mbutaka ate: “Dui sɔ nɔmbaka dia monga la solo dia lotutsha ndo nɔmbaka efula.” Nde kotshaka ate: “Divɛsa dialekami nanga diambisha esambelo ele Filipɛ 4:13, diata ɔnɛ: ‘Lo akambo tshɛ, dimi lekɔ la wolo oma le ɔnɛ lambisha lokalo.’” Diɛsɛ la wolo ɔsɔ, Ellen ekɔ lo mbikikɛ la solo dia lotutsha tshɛ ndo ekɔ lo ndjaɛkɛ tshɛ lo tshɛ l’osukɔ wa Jehowa.​—Os. 62:5, 6.

Lo mɛtɛ, lo kɛnɛ kendana la nkɛnɛmɔla solo dia lotutsha, Jehowa ekɔ ɛnyɛlɔ koleki tshɛ kahombaso ndjela. (2 Pe. 3:15) Ɔtɛkɛta wa Nzambi wekɔ la ɛkɔndɔ efula wɛnya etena kakakɛnɛmɔla Jehowa solo dia lotutsha lo yɛdikɔ y’efula. (Nɛh. 9:30; Isa. 30:18) Ɛnyɛlɔ, kakɔna kakasale Jehowa etena kakawokaka Abrahama ambola lo kɛnɛ kendana la yɛdikɔ Yande ya ndanya Sɔdɔma? Ntondotondo, Jehowa kopembola Abrahama ɔtɛkɛta. Koko la solo dia lotutsha tshɛ, Jehowa akahokamɛ dimbola tshɛ diaki Abrahama ndo kɛnɛ kakawokiyanyaka. Oma laasɔ, Jehowa akɛnya dia nde pokamɛka etena kakandate nto kɛnɛ kakate Abrahama ndo kakandoshikikɛ dia nde hatolanya Sɔdɔma naka nde ntana kaanga anto dikumi ato w’ɛlɔlɔ lo osomba ɔsɔ. (Eta. 18:22-33) Ande ɛnyɛlɔ ka dimɛna ka mpokamɛ la solo dia lotutsha ndo aha nsala akambo la esasesase lee!

Lo mɛtɛ solo dia lotutsha diaki Nzambi diekɔ dionga di’ohomba efula dia lonto l’oyoyo lahomba Akristo tshɛ ndɔta. Naka sho mbidja welo dia monga la dionga di’ohomba ndo diakimanyiya dia mbikikɛ sɔ, kete tayotombola Shɛso ka l’olongo latokokɛ ndo lele la solo dia lotutsha ndo wayotadia l’atei wa “wanɛ wakita alaka lo woho wewɔ la mbetawɔ ndo la solo dia lotutsha.”​—Hɛb. 6:10-12.