1, 2. Ngande wakɛnya ɔpɔstɔlɔ Pɔɔlɔ dia nde aki la lowando lo ɔlɔlɔ waheyama mbɛdika waki Nzambi?

ƆPƆSTƆLƆ Pɔɔlɔ akakoke mɛtɛ mbuta ɔnɛ: “Ɔlɔlɔ [wa Nzambi] waheyama mbɛdika komonga anyanya le mi.” (Adia 1 Kɔrɛtɔ 15:9, 10.) Pɔɔlɔ akeyaka hwe dia nde kosungana kana kokoka mbokama kɛtshi k’efula ka Nzambi. Nde akasoyaka Akristo.

² Oya l’ekomelo ka lɔsɛnɔ lande, Pɔɔlɔ akafundɛ Timɔte ate: “Lekɔ la lowando le Kristo Yeso Nkumɛso lakambisha wolo, nɛ dia nde akambɔshi oko onto lele la kɔlamelo lo mbishami olimu.” (1 Timɔte 1:12-14) Olimu akɔna ɔsɔ? Pɔɔlɔ akatɛ dikumanyi dia l’etshumanelo ka l’Ɛfɛsɔ ate: “Dimi halɔshi lɔsɛnɔ lami hita la nɛmɔ le mi wate kana oko lekɔ ohomba efula, dia dimi nshidiya ndawɔ lowango lami ndo olimu wakamalongola oma le Nkumadiɔndjɔ Yeso wa nsambisha dimɛna dimɛna lokumu l’ɔlɔlɔ lendana la  ɔlɔlɔ waheyama mbɛdika waki Nzambi.”—Etsha 20:24.

3. Naa olimu wa laande wakawasha Pɔɔlɔ (Enda osato wele lo mbɔtwɛlɔ.)

³ Naa “lokumu l’ɔlɔlɔ” lakasambisha Pɔɔlɔ ndo ngande wakalɛnya ɔlɔlɔ waheyama mbɛdika waki Jehowa? Pɔɔlɔ akatɛ Akristo wa l’Ɛfɛsɔ ate: “Nyakoke dikambo dia ɔkɛndɛ wa ɔlɔlɔ waheyama mbɛdika waki Nzambi wakawambisha lo wahɔ anyu.” (Ɛfɛsɔ 3:1, 2) Yeso akatɛ Pɔɔlɔ dia nsambisha wanɛ waki komonga ase Juda lokumu l’ɔlɔlɔ. L’etena kɛsɔ anto w’oma lo wedja wakakoke monga etenyi ka lowandji kana Diolelo dialɔmbwama oma le Mɛsiya. (Adia Ɛfɛsɔ 3:5-8.) Pɔɔlɔ akasambishaka l’ohetoheto ndo akatshikɛ Akristo ɛnyɛlɔ k’ɔlɔlɔ ɛlɔ kɛnɛ. Nde akɛnya dia ɔlɔlɔ waheyama mbɛdika waki Nzambi komonga “anyanya” kana aha la wahɔ le nde.

4, 5. Lande na kakokaso mbuta dia “lokumu l’ɔlɔlɔ la Diolelo” ekɔ lokumu l’ɔlɔlɔ la “ɔlɔlɔ waheyama mbɛdika waki Nzambi”?

⁴ L’etena kɛnɛ k’ekomelo, ekambi wa Jehowa wekɔ l’ɔkɛndɛ wa nsambisha ‘lokumu l’ɔlɔlɔ la Diolelo lo nkɛtɛ k’otondo oko ɔmɛnyi le anto wa lo wedja tshɛ.’ (Mateo 24:14) Lokumu l’ɔlɔlɔ la Diolelo lekɔ nto “lokumu l’ɔlɔlɔ lendana la ɔlɔlɔ waheyama mbɛdika waki Nzambi.” Lo woho akɔna? Ɛtshɔkɔ tshɛ wayotokondja oma lo Diolelo diaki Nzambi wayonga etombelo w’oma lo ɔlɔlɔ waheyama mbɛdika waki Jehowa. (Ɛfɛsɔ 1:3) Pɔɔlɔ akɛnya lowando l’ɔtɛ w’ɔlɔlɔ waheyama mbɛdika waki Jehowa lo nsambisha l’ohetoheto. Onde tekɔ lo mbokoya ɛnyɛlɔ ka Pɔɔlɔ?—Adia Rɔmɔ 1:14-16.

⁵ Lo sawo di’etshi, takekeke woho wakondjaso wahɔ oma lo ɔlɔlɔ waheyama mbɛdika waki Jehowa lo toho efula kaanga mbeso atshi wa pɛkato. Lam’ele tambokondja wahɔ efula, tekɔ la ɔkɛndɛ wa mbetsha anto akina woho wɛnya Jehowa ngandji kande ndo woho wakokawɔ nkondja wahɔ oma lɔkɔ. Lo toho takɔna takokaso nkimanyiya anto akina dia monga la lowando l’ɔtɛ wa ɔlɔlɔ waheyama mbɛdika waki Nzambi?

6, 7. Etena kalembetshiyaso anto awui wendena l’oshinga w’etshungwelo, ngande wadianganyaso lokumu l’ɔlɔlɔ lendana la ɔlɔlɔ waheyama mbɛdika waki Nzambi?

⁶ Ɛlɔ kɛnɛ, anto efula hawɔsɛ dia wekɔ l’onongo etena kasalawɔ pɛkato, diakɔ diahawashihodia lande na kele anto l’ohomba w’oshinga w’etshungwelo. Lo etena kakɔ kaamɛ, anto efula wekɔ lo nshihodia ɔnɛ yoho yawɔ ya lɔsɛnɔ hawasha ɔngɛnɔngɛnɔ. Ndo polo Ɛmɛnyi wa Jehowa wambasambisha, anto efula haweye kɛnɛ kelɛwɔ pɛkato, woho wongatɔ la shɛngiya le so ndo kɛnɛ kahombaso nsala dia ntshungɔ oma lo lɔhɔmbɔ la pɛkato. Kam’ashihodiawɔ kɛnɛ kelɛwɔ pɛkato, anto w’etema ɛlɔlɔ ngɛnangɛnaka dia mbeya ɔnɛ Jehowa akatome Ɔnande la nkɛtɛ dia ndjototshungola oma lo pɛkato la nyɔi. Jehowa akasale dui sɔ l’ɔtɛ wa ngandji kande k’efula ndo ɔlɔlɔ ande waheyama mbɛdika.—1 Joani 4:9, 10.

 ⁷ Tolembete kɛnɛ kakate Pɔɔlɔ lo dikambo di’Ɔna Jehowa lokande ngandji ɔnɛ: “Lo tshimbo yande mbeso la etshungwelo diɛsɛ la oshinga w’etshungwelo oma lo dikila diande, ɛɛ, edimanyielo ka kɔlɔ yaso lo ndjela ɔngɔnyi wa ɔlɔlɔ ande [wa Jehowa] waheyama mbɛdika.” (Ɛfɛsɔ 1:7) Olambo w’oshinga w’etshungwelo wa Kristo wekɔ djembetelo yoleki woke ya ngandji ka Nzambi le so ndo mɛnyaka woke woke w’ɔlɔlɔ Ande waheyama mbɛdika. Ande ɔlɔ dia mbeya ɔnɛ naka sho monga la mbetawɔ l’olambo waki Yeso, kete pɛkato yaso yayodimanyiyama ndo tayonga la nkum’otema ka pudipudi lee! (Hɛbɛru 9:14) Ɔsɔ mɛtɛ ekɔ lokumu l’ɔlɔlɔ la nkahana l’anto akina.

8. Lande na kahomba atshi wa pɛkato mbokana la Nzambi?

⁸ Naka anto bu la mbetawɔ lo olambo wa Yeso, kete Nzambi mbaɔsaka oko atunyi. Diakɔ diele, tekɔ la ɔkɛndɛ wa mbatɛ ɔnɛ vɔ koka monga angɛnyi wa Nzambi. Ɔpɔsɔlɔ Joani akafunde ɔnɛ: “Onto tshɛ lele la mbetawɔ le Ɔna ayokondja lɔsɛnɔ la pondjo. Onto tshɛ lahakitanyiya Ɔna hatɛna lɔsɛnɔ, koko odudu wa Nzambi wekɔ le nde.” (Joani 3:36) Sho koka monga l’ɔngɛnɔngɛnɔ l’ɔtɛ watokimanyiya olambo wa Kristo dia monga angɛnyi wa Nzambi. Pɔɔlɔ akalembetshiya dui sɔ lo mbuta ate: “Nyu wanɛ waki ntondo etale ndo atunyi nɛ dia timba tanyu taki lo etsha wa kɔlɔ, kakianɛ nde amboyaokanya la nyu l’ekimanyielo ka demba dia l’emunyi di’onto akɔ lo tshimbo ya nyɔi kande.”—Kɔlɔsayi 1:21, 22.

9, 10. a) Ɔkɛndɛ akɔna wakasha Kristo anango w’akitami? b) Ngande wakimanyiya “ɛkɔkɔ ekina” akitami?

⁹ Kristo akasha anango w’akitami wa la nkɛtɛ “olimu wa diokanyelo.” Pɔɔlɔ akawatɛ ate: “Akambo tshɛ ndja oma le Nzambi lakatookanya la nde ndamɛ lo tshimbo ya Kristo ndo lakatosha olimu wa diokanyelo, mbuta ate Nzambi akayaokanyaka ndamɛ nto la andja lo tshimbo ya Kristo, aha la mbidja yimba lo kɔlɔ yawɔ, ndo nde akatosha losango la diokanyelo. Ɔnkɔnɛ, sho tekɔ atomami wakamba lo dihole dia Kristo, wate kana oko Nzambi ekɔ lo nsɛngasɛnga anto lo tshimbo yaso. Lo dihole dia Kristo, tekɔ lo nsɛngasɛnga anto shate: ‘Nyokane nto la Nzambi.’”—2 Kɔrɛtɔ 5:18-20.

¹⁰ Ekɔ tshondo ya diɛsɛ le “ɛkɔkɔ ekina” dia nkimanyiya akitami lo olimu ɔsɔ. (Joani 10:16) Oko “atomami” kana akɛndji wa Kristo, “ɛkɔkɔ ekina” wekɔ lo nsala etenyi koleki woke ka olimu w’esambishelo, wekɔ lo mbetsha anto akambo wa mɛtɛ ndo wekɔ lo mbakimanyiya dia monga la diɔtɔnganelo dia ma ma la Jehowa. Ɔsɔ ekɔ etenyi k’ohomba k’esambishelo ka lokumu  l’ɔlɔlɔ lendana la ɔlɔlɔ waheyama mbɛdika waki Nzambi.

11, 12. Lande na kele ekɔ lokumu l’ɔlɔlɔ le anto dia mbeya ɔnɛ vɔ koka nɔmba Jehowa?

¹¹ Anto efula nɔmbaka nɛ dia dui sɔ mbakimanyika dia ndjaoka dimɛna, koko vɔ hawetawɔ mɛtɛ dia Nzambi pokamɛka alɔmbɛlɔ awɔ. Vɔ pombaka mbeya dia Jehowa ekɔ Ɔnɛ “latokaka dɔmbɛlɔ.” Omembi w’esambo Davidɛ akafunde ate: “Wɛ latokaka dɔmbɛlɔ le, le yɛ mbayoyaka weho w’anto tshɛ. Munga yami yambonkonya ewo, koko wɛ kombaka kɔlɔ yaso.”—Osambo 65:2, 3.

¹² Yeso akatɛ ambeki ande ate: “Dikambo tshɛ diayonyɔlɔmba lo lokombo lami, dimi layodisala.” (Joani 14:14) Dui sɔ nembetshiyaka dia sho koka nɔmba “dikambo tshɛ” diɔtɔnɛ la lolango la Jehowa. Joani akafunde ate: “Eshikikelo kɛnɛ mbele la so le nde shoate kɛnɛ tshɛ kɔɔlɔmbaso kɔtɔnɛ la lolango lande, nde tokɛka.” (1 Joani 5:14) Ande dui dia dimɛna nkimanyiya anto dia nshihodia ɔnɛ dɔmbɛlɔ bu tsho dui dimɔtshi diawakimanyiya dia ndjaoka dimɛna, koko diekɔ yoho mɔtshi ya ndjasukanya la “kiti ka lowandji ka ɔlɔlɔ waheyama mbɛdika” kaki Jehowa lee! (Hɛbɛru 4:16) Etena ketshaso anto woho wa nɔmba lo yoho ya dimɛna, le Onto lahombama ndo dia akambo wahombama, sho mbakimanyiyaka dia monga angɛnyi wa Jehowa ndo nkondja esambelo etena kasowawɔ.—Osambo 4:1; 145:18.

13, 14. a) Naa waɛsɛ wa diambo wayonga l’Akristo w’akitami lo nshi yayaye? b) Naa olimu wa diambo wayokamba akitami lo dikambo di’anto?

¹³ Jehowa ayoleka mɛnya ɔlɔlɔ ande wayehama mbɛdika “lo akongɛ w’akambo wayaye.” Ngande wayosalema dui sɔ? Nzambi ayosha anto 144000 wayolɛ kaamɛ la Kristo l’olongo diɛsɛ dia diambo. Pɔɔlɔ akɛnya kɛnɛ kayolembetshiya diɛsɛ sɔ etena kakandafunde ate: “Nzambi lele ɔngɔnyi lo kɛtshi, l’ɔtɛ wa ngandji k’efula kakandatolange akatosha lɔsɛnɔ kaamɛ la Kristo kaanga etena kakatavu lo munga yaso, (oma lo ɔlɔlɔ waheyama mbɛdika mbakanyashimbamɛ). Ndo nto, nde akatolola kaamɛ ndo akatodjashiya kaamɛ lo ahole wa l’olongo kaamɛ la Kristo Yeso, dia lo akongɛ w’akambo wayaye, nde kɛnya ɔngɔnyi woleki wa ɔlɔlɔ ande waheyama mbɛdika lo kɛtshi kande otsha le so wanɛ wele kaamɛ la Kristo Yeso.”—Ɛfɛsɔ 2:4-7.

¹⁴ Ekɔ dui dia wolo nkanyiya awui wa diambo wambɔlɔngɔsɔlɛ Jehowa Akristo w’akitami etena kayowolɛ kaamɛ la Kristo l’olongo. (Luka 22:28-30; Filipɛ 3:20, 21; 1 Joani 3:2) Jehowa “[ay]ɛnya ɔngɔnyi woleki wa ɔlɔlɔ ande waheyama mbɛdika” otsha le wɔ lo yoho ya laande.  Vɔ wayonga “Jɛrusalɛma y’Oyoyo,” mbuta ate wadi a Kristo. (Ɛnyɛlɔ 3:12; 17:14; 21:2, 9, 10) Vɔ wayokamba kaamɛ la Yeso dia “ɛkɔnwɛlɔ ka wedja.” Vɔ wayokimanyiya anto dia ntshungɔ oma lo wotsho wa pɛkato la nyɔi ndo wayowakimanyiya dia nkoma kokele.—Adia Ɛnyɛlɔ 22:1, 2, 17.

15, 16. Ngande wayɛnya Jehowa ɔlɔlɔ ande waheyama mbɛdika otsha le “ɛkɔkɔ ekina” lo nshi yayaye?

¹⁵ Ɛfɛsɔ 2:7 mbutaka dia Nzambi ayɛnya ɔlɔlɔ waheyama mbɛdika lo “akongɛ w’akambo wayaye.” L’etena kɛsɔ, onto tshɛ la la nkɛtɛ ayokondja “ɔngɔnyi woleki wa ɔlɔlɔ ande waheyama mbɛdika.” (Luka 18:29, 30) Yoho mɔtshi yoleki woke yayɛnya Jehowa ɔlɔlɔ ande waheyama mbɛdika la nkɛtɛ ele, eolwelo k’anto oma lo “Diombo.” (Jɔbɔ 14:13-15; Joani 5:28, 29) Waa na wayolwama? Apami ndo wamato wakavu la ntondo ka Kristo mvɔ ndo anto akina wa l’atei wa “ɛkɔkɔ ekina” wavɔ la kɔlamelo le Jehowa lo nshi y’ekomelo. Anto wa kɔlamelo asɔ tshɛ wayolwama dia ndjotetemala kambɛ Jehowa.

¹⁶ Miliyɔ y’anto wakavu aha la mbeya Nzambi, wayolwama ndo vɔ. Joani akafunde ate: “Lakɛnyi anto wakavu, anto w’anyanya ndo wa lokumu wemadi la ntondo ka kiti ka lowandji, ko wɛɔmbɔ wakafɔma. Koko wakafola wɔɔmbɔ okina, ɔsɔ ekɔ dibuku dia lɔsɛnɔ. Anto wakavu wakalomboshama lo ndjela akambo wakafundama lo wɛɔmbɔ akɔ lo ndjela etsha awɔ. Ko ndjale kakatondja edo waki lɔkɔ, ndo nyɔi la Diombo wakatondja  edo waki lɔkɔ, ko vɔ wakalomboshama onto l’onto lo ndjela etsha ande.” (Ɛnyɛlɔ 20:12, 13) Wanɛ wayolwama wayonga la diaaso dia mbeka akambo wendana la Jehowa ndo mbetawɔ ɛlɔmbwɛlɔ kande. Vɔ wayeka ndo nkitanyiya atɔndɔ wa lo Bible ndo wetshelo w’eyoyo wayotanema lo “wɛɔmbɔ.” Wetshelo w’eyoyo ɛsɔ, wayonga yoho kina yayɛnya Jehowa ɔlɔlɔ ande waheyama mbɛdika.

17. Kakɔna kahombaso nama lo yimba etena keso l’olimu aso w’esambishelo?

¹⁷ Ɔnɛ kele etena koleki ohomba dia nsambisha lokumu l’ɔlɔlɔ la Diolelo, nɛ dia ekomelo kaya suke. (Makɔ 13:10) Sho pombaka mbohɔka ɔnɛ oyango aso etena kasambishaso ele wa ntombola Jehowa. Ngande wakokaso nsala dui sɔ? Sho pombaka mbutɛ anto dia tayokondja ɛtshɔkɔ ɛsɔ tshɛ diɛsɛ la ɔlɔlɔ waheyama mbɛdika waki Jehowa.

18, 19. Ngande watombolaso ɔlɔlɔ waheyama mbɛdika waki Jehowa?

¹⁸ Etena kasambishaso anto, sho kokaka mbalembetshiya ɔnɛ etena kayɔlɔmbɔla Diolelo dia Kristo, anto wayokondja wahɔ tshɛ w’oma lo oshinga w’etshungwelo ndo yema yema vɔ wayokoma kokele. Bible mbutaka ɔnɛ: “Ditongami diɔ lawɔ diayotshungɔ oma lo lɔhɔmbɔ l’ɛhɔndɛlɔ ndo diayonga la lotshungɔ la lotombo la ana wa Nzambi.” (Rɔmɔ 8:21) Dui sɔ diayosalema paka diɛsɛ l’ɔlɔlɔ waheyama mbɛdika wa Jehowa.

¹⁹ Tekɔ la diɛsɛ dia mbutɛ anto tshɛ awui wendana la daka dia dimɛna efula diatanaso lo Ɛnyɛlɔ 21:4, 5 diata ɔnɛ: “[Nzambi] ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.” Ndo Jehowa, ɔnɛ lodjashi lo kiti ka lowandji, ekɔ lo mbuta ate: “Eenda! Dimi leetɛ diangɔ tshɛ eyoyo.” Nde ekɔ lo mbuta nto ate: “Funda, nɛ dia ɛtɛkɛta ɛnɛ wekɔ wa kɔlamelo ndo mɛtɛ.” Etena kasambishaso anto akina lokumu l’ɔlɔlɔ lɔsɔ l’ohetoheto, lo mɛtɛ sho tombolaka ɔlɔlɔ waheyama mbɛdika waki Jehowa.