1, 2. a) Lembetshiya wɛɛla waki Yeso wa kanga ekambɔ ka vinyɔ. b) Ngande wɛnya ɔkɔndɔ ɔsɔ waonga wa lokaho ndo ɔlɔlɔ waheyama mbɛdika?

LUSHI lɔmɔtshi la pindju ka pɛɛ, kanga ekambɔ kɛmɔtshi ka vinyɔ akatshu lo lobingu dia toyanga anto dia vɔ ndjowokambɛ. Nde akokana la wɔ dia mbafuta lofulo lɔmɔtshi la falanga ndo vɔ waketawɔ. Koko lam’ele kanga ekambɔ aki l’ohomba w’ase olimu efula, nde akatshu lo lobingu mbala efula la yanyi dia toyanga anto akina efula. Nde akokana la wɔ dia mbafuta vɔ tshɛ lofulo laamɛ la falanga. L’ekomelo ka lushi, kanga ekambɔ akatshumanya ase olimu dia mbafuta. Ndo oyadi wanɛ wakakambe lushi l’otondo kana wanɛ wakakambe paka wonya wa ntango ɔtɔi oto, nde akawasha lofulo laamɛ la falanga. Koko, onto ɔmɔtshi lakakambe lushi l’otondo akatatɛ ngunanguna, ko kanga ekambɔ akawombola ate: ‘Onde wɛ hetawe difuto diakatokanyi? Onde dimi bu la lotshungɔ la mbisha ase olimu ami tshɛ kɛnɛ tshɛ kalangami? Onde wɛ ekɔ  la kandjema l’ɔtɛ wemi ɔlɔlɔ?’—Mateo 20:1-15, nɔtɛ.

² Ɔkɔndɔ waki Yeso ɔsɔ tetshaka wetshelo w’ohomba lo dikambo dia “ɔlɔlɔ waheyama mbɛdika” waki Jehowa. ^[1] (Enda nɔtɛ ka la koma.) (Adia 2 Kɔrɛtɔ 6:1.) Lo woho akɔna? Anto amɔtshi mbeyaka mfɔnya dia, wanɛ wakakambe lushi l’otondo wakahombe nongola falanga efula ndeka akina. Koko kanga ekambɔ akasalɛ ase olimu wakakambe paka etenyi ka lushi keto ɔlɔlɔ waheyama mbɛdika. Nomb’ewo kɛmɔtshi akate lo dikambo dia tshɛkɛta “ɔlɔlɔ waheyama mbɛdika” yokambi la wɔ lo Bible ate: “Lokanyi loleki ohomba lele la tshɛkɛta nyɛ ekɔ woshasha waheyama mbɛdika, ɛngɔ kɛmɔtshi koshawɔ onto lahakoke kikondja ndo lahasungana.”

3, 4. Lande na ndo ngande wakasalɛ Jehowa anto tshɛ ɔlɔlɔ waheyama mbɛdika?

³ Bible totɛka dia ɔlɔlɔ waheyama mbɛdika waki Nzambi wekɔ “losha la woshasha.” (Ɛfɛsɔ 3:7) Lam’ele hatokoke nkitanyiya Jehowa tshɛ lo tshɛ, sho hatosungana salemɛ kaanga ɔlɔlɔ ɔtɔi oma le Nzambi. Koko, sho sunganaka mvɔ. Nkumekanga Sɔlɔmɔna akate ate: “Ndooko onto ɔlɔlɔ la nkɛtɛ latosalaka nshi tshɛ ɔlɔlɔ ndo lahasale pondjo pɛkato.” (Ondaki 7:20) L’ɔkɔngɔ diko, ɔpɔstɔlɔ Pɔɔlɔ akayotaka ate: “Anto tshɛ wakasale pɛkato ndo hawokome lo lotombo la Nzambi.”—Rɔmɔ 3:23; 6:23a.

⁴ Lam’ele Jehowa nangaka anto woho w’anyanya, nde akatome “Ɔnande ɛtɔi lakandote” dia ndjovɔ dikambo diaso. Ɔsɔ aki yoho yoleki tshɛ yakandasale ɔlɔlɔ waheyama mbɛdika. (Joani 3:16) Pɔɔlɔ akate lo dikambo dia Yeso ate: “Kakianɛ l’ɔtɛ wakandasoyama polo lo nyɔi, wɛ amboofuta lo mbosha lotombo la kɛnɛmɔ, dia oma l’ɔlɔlɔ waheyama mbɛdika waki Nzambi, nde alɛtɛ nyɔi dikambo di’oseka onto tshɛ.” (Hɛbɛru 2:9) Lo mɛtɛ, “woshasha washa Nzambi ele lɔsɛnɔ la pondjo oma le Kristo Yeso Nkumɛso.”—Rɔmɔ 6:23b.

5, 6. Etombelo akɔna wonga etena kalɔmbwamaso a) oma lo pɛkato? b) oma lo ɔlɔlɔ waheyama mbɛdika?

⁵ Lande na kasalaso pɛkato ndo kavɔso? Bible mbutaka dia “oma lo pɛkato k’onto 1 nyɔi kakolɛ anto oko nkumekanga.” Diakɔ diele, l’ɔtɛ weso tokanula taki Adama, sho tekɔ anto wele keema kokele ndo tekɔ lo mvɔ. (Rɔmɔ 5:12, 14, 17) Koko, taakakoke nsɔna diaha nɔmbwama kana sɛngiyama oma lo pɛkato. Ngande wakoka dui sɔ salema? Etena kongaso la mbetawɔ lo oshinga w’etshungwelo waki Kristo, sho kondjaka wahɔ oma lo ɔlɔlɔ waheyama mbɛdika waki Jehowa. Bible mbutaka ate: “Lɛnɛ akafule pɛkato, ɔlɔlɔ waheyama mbɛdika wakaleke mfula. La oyango akɔna? Dia oko wele pɛkato la nyɔi wakolɛ oko nkumekanga, mbele ɔlɔlɔ waheyama mbɛdika wekɔ lo mbolɛ oko nkumekanga oma lo losembwe lakonya lo lɔsɛnɔ la pondjo oma le Yeso Kristo.”—Rɔmɔ 5:20, 21.

⁶ Kaanga mbekeso atshi wa pɛkato, hatokoke mbetawɔ dia pɛkato tahemɛ. Diakɔ diele, etena kasalaso dui dimɔtshi dia kɔlɔ, sho nɔmbaka Jehowa edimanyielo. Pɔɔlɔ akatɔhɛmɔla ate: “Pɛkato hahombe nyahemɛ lam’ele nyaya bu l’ɛse k’ɛlɛmbɛ, koko l’ɛse k’ɔlɔlɔ waheyama mbɛdika.” (Rɔmɔ 6:14) Ko, ngande wakokaso nkondja wahɔ oma lo ɔlɔlɔ waheyama mbɛdika waki Nzambi? Pɔɔlɔ akate ate: “Ɔlɔlɔ waheyama mbɛdika waki Nzambi . . .  tetshaka dia ntona akambo wa kɔlɔ ndo nsaki y’andja ɔnɛ ndo dia nsɛna la yimba y’ɔlɔlɔ, la losembwe ndo omamemelo le Nzambi l’atei wa dikongɛ nɛ di’akambo.”—Tito 2:11, 12.

7, 8. Kakɔna kalembetshiya ɔlɔlɔ waheyama mbɛdika waki Jehowa “wakɛnɛmɔma lo toho totshikitanyi”? (Enda esato wele lo mbɔtwɛlɔ.)

⁷ Ɔpɔstɔlɔ Petero akafunde ate: “Lo yɛdikɔ yakalongola onto l’onto losha, nyokambe la lɔ dia kimanyiyana oko wenyu alami w’eshika w’ɔlɔlɔ waheyama mbɛdika waki Nzambi wakɛnɛmɔma lo toho totshikitanyi.” (1 Petero 4:10) Kakɔna kalembetshiya ɔlɔlɔ waheyama mbɛdika waki Jehowa “wakɛnɛmɔma lo toho totshikitanyi”? Dui sɔ nembetshiyaka dia oyadi ekakatanu akɔna wakoka mpomana la so lo lɔsɛnɔ, Jehowa ayotosha kɛnɛ kele la so ohomba dia mbikikɛ. (1 Petero 1:6) Nde ayotoshaka nshi tshɛ paka kɛnɛ kele la so ohomba dia sho ntondoya ohemba tshɛ.

⁸ Ɔpɔstɔlɔ Joani akafunde ate: “Nde ekɔ lo tosalɛ sho tshɛ ɔlɔlɔ waheyama mbɛdika laadiko di’ɔlɔlɔ waheyama mbɛdika.” (Joani 1:16) Lam’ele Jehowa ekɔ lo tosalɛ ɔlɔlɔ ande waheyama mbɛdika lo toho totshikitanyi, sho kondjaka ɛtshɔkɔ efula. Naa ɛtshɔkɔ ɛmɔtshi l’atei wa ɛtshɔkɔ ɛsɔ?

9. Ngande wakondjaso wahɔ oma lo ɔlɔlɔ waheyama mbɛdika waki Jehowa, ndo ngande wakokaso mɛnya lowando laso l’ɔtɛ wa dui sɔ?

⁹ Jehowa dimanyiyaka pɛkato yaso. Diɛsɛ la ɔlɔlɔ ande waheyama mbɛdika, Jehowa dimanyiyaka pɛkato yaso. Koko, nde salaka dui sɔ paka naka tamboyatshumoya ndo tekɔ lo ntetemala ndɔshana la nsaki yaso ya nsala pɛkato. (Adia 1 Joani 1:8, 9.) Pɔɔlɔ akalembetshiya Akristo w’akitami wa lo nshi yande woho wadimanyiya Jehowa pɛkato. Nde akate ate: “[Nzambi] akatotsha oma lo lowandji la wodjima ndo akatɔtɔlɛ otsha lo diolelo dia Ɔnande la ngandji, ɔnɛ lele lo tshimbo yande mbambototshungɔ oma lo lɔhɔmbɔ l’ekimanyielo ka oshinga w’etshungwelo, edimanyielo ka pɛkato yaso.” (Kɔlɔsayi 1:13, 14) Tekɔ la lowando l’efula lo kɛtshi kaki Nzambi diakɔ dialangaso mbotombola. Ndo lam’ele Jehowa dimanyiyaka pɛkato yaso, sho koka nto nkondja ɛtshɔkɔ ekina wa diambo efula.

10. Kakɔna kele la so l’ɔtɛ wa ɔlɔlɔ waheyama mbɛdika waki Nzambi?

¹⁰ Sho koka monga la diɔtɔnganelo dia wɔladi lam’asaso la Nzambi. Tekɔ anto wele keema kokele, diakɔ diele oma ko etena kotɔso, sho mongaka atunyi wa Nzambi. Koko, Pɔɔlɔ akate ate: “Etena kakiso atunyi, sho takayokana la Nzambi oma lo nyɔi k’Ɔnande.” (Rɔmɔ 5:10) Diɛsɛ la oshinga w’etshungwelo, sho koka mbokana la Nzambi, mbuta ate sho koka monga la wɔladi lam’asaso la nde ndo monga angɛnyi ande. Pɔɔlɔ akalembetshiya dui sɔ ndo woho wɔtɔnɛdiɔ la ɔlɔlɔ waheyama  mbɛdika waki Jehowa etena kakandatɛ anango w’akitami ate: “Etena kɛnɛ kambotɔsama oko anto w’ɛlɔlɔ l’ɔtɛ wa mbetawɔ, toyale la wɔladi lam’asaso la Nzambi lo tshimbo ya Nkumɛso Yeso Kristo, ɔnɛ lele lo tshimbo yande, diɛsɛ la mbetawɔ mbayaso la diaaso dia vɔ tosalɛ ɔlɔlɔ ɔnɛ waheyama mbɛdika wele la so kakianɛ.” (Rɔmɔ 5:1, 2) Ande lowando lele la so dia monga la lɔngɛnyi la wɔladi lam’asaso la Jehowa lee!

11. Ngande wakimanyiya akitami “ɛkɔkɔ ekina” dia monga anto wosembwe?

¹¹ Sho koka monga anto wosembwe la ntondo ka Nzambi. Omvutshi Danyɛlɛ akafunde dia lo etena k’ekomelo, “wanɛ wele la shɛnɔdi,” mbuta ate akitami wayokonya “efula lo losembwe.” (Adia Danyɛlɛ 12:3.) Ngande wasala akitami dui sɔ? Vɔ sambishaka lokumu l’ɔlɔlɔ ndo mbetshaka miliyɔ ya “ɛkɔkɔ ekina” ɛlɛmbɛ wa Jehowa. (Joani 10:16) Vɔ mbakimanyiyaka dia mbɔsama oko anto wosembwe la ntondo ka Nzambi, dui diasalema paka diɛsɛ la ɔlɔlɔ waheyama mbɛdika waki Jehowa. Pɔɔlɔ akalembetshiya ate: “Woho wɔsamawɔ oko anto w’ɛlɔlɔ ekɔ oko woshasha oma l’ɔlɔlɔ ande [waki Nzambi] waheyama mbɛdika lo tshimbo y’etshungwelo k’oma l’oshinga w’etshungwelo wakafute Kristo Yeso.”—Rɔmɔ 3:23, 24.

12. Ngande wɔtɔnɛ dɔmbɛlɔ la ɔlɔlɔ waheyama mbɛdika waki Nzambi?

¹² Sho koka ndjasukanya la Nzambi lo tshimbo ya dɔmbɛlɔ. L’ɔtɛ wa ɔlɔlɔ ande waheyama mbɛdika, sho koka nɔmba Jehowa. Pɔɔlɔ mbelɛka kiti ka lowandji ka Jehowa ate “kiti ka lowandji ka ɔlɔlɔ waheyama mbɛdika,” ndo nde tɔlɔmbaka dia sho nsukana la tɔ “la dihonga tshɛ.” (Hɛbɛru 4:16a) Sho koka nɔmba Jehowa wonya tshɛ lo tshimbo ya Yeso. Ɔsɔ mɛtɛ ekɔ diɛsɛ dia woke! Pɔɔlɔ akate ate: “[Tekɔ] l’akoka wa ntɛkɛta la dihonga ndo ndjasukanya la Nzambi l’eshikikelo  tshɛ, nɛ dia tekɔ la mbetawɔ le nde.”—Ɛfɛsɔ 3:12.

13. Ngande wakoka ɔlɔlɔ waheyama mbɛdika “tokimanyiya lo etena kahombama”?

¹³ Sho koka nkondja ekimanyielo l’etena kahombama. Pɔɔlɔ akatokeketsha dia nɔmbaka Jehowa etena tshɛ kele dui sɔ ohomba, “dia sho mbokama kɛtshi ndo dia ɔlɔlɔ waheyama mbɛdika tokimanyiya lo etena kahombama.” (Hɛbɛru 4:16b) Etena tshɛ kahomanaso l’ehemba kana l’ekakatanu lo nsɛnɔ yaso, sho koka nɔmba Jehowa ekimanyielo. Ndo nde kadimolaka lo alɔmbɛlɔ aso oyadi kaanga nde halɔmbama dia nsala dui sɔ. Mbala efula, nde kambaka l’anangɛso ndo l’akadiyɛso dia tokimanyiya. Jehowa kadimolaka alɔmbɛlɔ aso “dia sho monga la dihonga di’efula ndo mbuta ɔnɛ: ‘Jehowa kele okimanyedi ami, dimi hantoka wɔma. Kakɔna kakoka onto salɛmi?’”—Hɛbɛru 13:6.

14. Ngande wakondjaso wahɔ oma lo ɔlɔlɔ waheyama mbɛdika waki Jehowa?

¹⁴ Sho koka nkondja esambelo dikambo di’etema aso. Ekɔ tshondo y’ɔtshɔkɔ wa woke dia Jehowa tosamba etena tshɛ kongaso l’akambo watotshindja wɔɔngɔ. (Osambo 51:17) Etena kakasowaka Akristo wa la Tɛsalɔnika la ɛhɛnyɔhɛnyɔ, Pɔɔlɔ akafunde ate: “Nkumɛso Yeso Kristo ndamɛ ndo Nzambi Shɛso lakatolange ndo lakatosha esambelo ka pondjo ndo elongamelo ka dimɛna lo tshimbo ya ɔlɔlɔ waheyama mbɛdika asambe etema anyu ndo anyokeketsha.” (2 Tɛsalɔnika 2:16, 17, nɔtɛ.) Ande ekeketshelo kakondjaso lo mbeya ɔnɛ diɛsɛ la ɔlɔlɔ ande waheyama mbɛdika, Jehowa tolangaka ndo tokokɛka lee!

15. Diɛsɛ la ɔlɔlɔ waheyama mbɛdika waki Nzambi, elongamelo kakɔna kele la so?

¹⁵ Tekɔ l’elongamelo ka lɔsɛnɔ la pondjo. Lam’ele tekɔ atshi wa pɛkato, tototonga l’elongamelo otondonga aha ekimanyielo ka Jehowa. (Adia Osambo 49:7, 8.) Koko, Jehowa akatosha elongamelo ka dimɛna efula. Naa elongamelo kakɔ? Yeso akate ate: “Lolango la Papa ele dia onto tshɛ leya Ɔna ndo longa la mbetawɔ le nde akondja lɔsɛnɔ la pondjo.” (Joani 6:40) Ɔnkɔnɛ, taya l’elongamelo ka ndjɔsɛna pondjo pondjo diɛsɛ la ɔlɔlɔ waheyama mbɛdika waki Jehowa. Pɔɔlɔ akate ate: “Ɔlɔlɔ waheyama mbɛdika waki Nzambi wambɛnama ndo vɔ mbelaka weho w’anto tshɛ panda.”—Tito 2:11.

16. Ngande wakalanya Akristo amɔtshi wa lo ntambe ka ntondo ɔlɔlɔ waheyama mbɛdika waki Nzambi?

¹⁶ Sho kondjaka ɛtshɔkɔ efula diɛsɛ la ɔlɔlɔ waheyama mbɛdika waki Jehowa. Koko, hatohombe nkamba lo yoho ya kɔlɔ la ɔlɔlɔ ande, mbuta ate mbeetɛ oko yɛkɛ nɛndɛ dia nsala pɛkato. L’atei w’Akristo wa lo ntambe ka ntondo, amɔtshi wa l’atei awɔ “waka[ka]dimola ɔlɔlɔ waheyama mbɛdika waki Nzambi . . . lo lɔkɛwɔ la fumbɔ nsɔnyi.” (Judɛ 4) Ondo Akristo waki komonga la kɔlamelo asɔ, wakafɔnyaka dia vɔ kokaka nsala pɛkato ndo ɔnɛ Jehowa ayowadimanyiyaka mbala tshɛ. Vɔ wakakonyaka kaanga anangɛwɔ akina dia mbayela lo pɛkato yawɔ. Ɛlɔ kɛnɛ nto, onto tshɛ lasala awui wa ngasɔ “amb[ɔ]tɛnga la diɔnyɔ tshɛ nyuma ka ɔlɔlɔ waheyama mbɛdika.”—Hɛbɛru 10:29.

17. Naa dako di’oshika diakasha Petero?

¹⁷ Ɛlɔ kɛnɛ, Satana ekɔ lo nkesa Akristo amɔtshi dia mfɔnya ɔnɛ vɔ koka nsala pɛkato ndo Jehowa ayowadimanyiya ndooko  onyake. Ekɔ mɛtɛ dia Jehowa ekɔ suke dia dimanyiya atshi wa pɛkato wayatshumoya, koko nde nongamɛka dia sho ndɔshana la nsaki yaso ya nsala pɛkato. Jehowa akasambiya ɔpɔstɔlɔ Petero dia mfunda ɔnɛ: “Ɔnkɔnɛ, nyu analengo wa ngandji, lam’ele nyamboteyi akambo asɔ la ntondo, nyoyalame diaha nyu minganyiyama kaamɛ la wɔ oma lo munga kasala amɔnyɔdi w’ɛlɛmbɛ ko nyu ndjoshisha eshikikalelo kanyu ka nge. Koko, nyotetemale nongola ɔlɔlɔ waheyama mbɛdika ndo ewo ka Nkumɛso ndo Oshimbedi aso Yeso Kristo.”—2 Petero 3:17, 18.

18. Ɛkɛndɛ akɔna wele la so l’ɔtɛ w’ɔlɔlɔ waheyama mbɛdika waki Jehowa?

¹⁸ Tekɔ la lowando l’efula l’ɔtɛ w’ɔlɔlɔ waheyama mbɛdika waki Jehowa. Koko sho pombaka nkamba la losha laso dia ntombola Jehowa ndo nkimanyiya anto akina. Sho pombaka nsala dui sɔ. Ngande wakokaso nkamba la losha laso? Pɔɔlɔ mbutaka ate: “Ko lam’ele onto l’onto la l’atei aso ekɔ la losha lotshikitanyi lo ndjela ɔlɔlɔ waheyama mbɛdika wakawatosalɛ, . . . Naka olimu, totetemale mbokamba. Ɔnɛ letsha, ayasha lo wetshelo ande. Ɔnɛ lakeketshana, asha ekeketshelo . . . Ɔnɛ lokana kɛtshi, asale dikambo sɔ l’ɔngɛnɔngɛnɔ.” (Rɔmɔ 12:6-8) L’ɔtɛ w’ɔlɔlɔ waheyama mbɛdika waki Jehowa, tekɔ l’ɔkɛndɛ wa nsambisha efula, mbetsha anto akina Bible, nkeketsha anangɛso l’akadiyɛso ndo dimanyiya onto tshɛ lakoka tosalɛ kɔlɔ.

19. Ɔkɛndɛ akɔna wele la so wayotɔtɛkɛta lo sawo diayela?

¹⁹ Oko anto wakatshɔkwama oma l’ɔlɔlɔ waheyama mbɛdika waki Jehowa, sho pombaka tshutshuyama dia nsala kɛnɛ tshɛ kakokaso nsala dia “nsambisha dimɛna dimɛna lokumu l’ɔlɔlɔ lendana la ɔlɔlɔ waheyama mbɛdika waki Nzambi.” (Etsha 20:24) Tayɔtɛkɛta di’ɔkɛndɛ ɔsɔ lo sawo diayela.