1, 2. Lande na kahombaso mbeya woho wa nsamba wanɛ wele l’ɔkɛyi? (Enda osato wele lo mbɔtwɛlɔ.)

SUSI akate ate: “Suke l’ɔnɔnyi w’otondo l’ɔkɔngɔ w’ɔnaso la pami mvɔ, takadiɛnɛka la ɔkɛyi w’efula.” L’ɔkɔngɔ wa wadɛnde mvɔ la shashimoya, ɔnangɛso ɔmɔtshi akate ate nde aki la “paa kaheyama mbuta lo demba.” Lonyangu ko, anto efula mongaka la paa ka woho ɔsɔ. Ɛlɔ kɛnɛ l’etshumanelo k’Akristo, efula k’anangɛso l’akadiyɛso hawolongamɛ dia wakiwɔ wa ngandji mvɔ la ntondo k’Armangɛdɔna. Mbeyaka monga ko wɛ akavusha lakiyɛ ɔmɔtshi lokayɛ ngandji kana ondo wɛ mbeyaka onto ɔmɔtshi lele l’ɔkɛyi. Naka ngasɔ mbediɔ, kete wɛ koka ndjambola ɔnɛ: ‘Ngande wakoka onto lele l’ɔkɛyi sambema?’

² Anto amɔtshi mbutaka ɔnɛ mpota tshɛ koka nkɔnɔ l’edjedja ka wonya. Ko onde ngasɔ mbatongaka dui sɔ mbala tshɛ? Wadi aki odo ɔmɔtshi akate ate: “Kaanga mbatoshilaka lonyangu l’edjedja ka wonya, lakɛnyi dia ndeka ɔlɔlɔ mbuta ɔnɛ: kɛnɛ katsha onto dia nkimanyiya onyande lele la paa mbookimanyiya dia nde nshidiya lonyangu lande.” Mpota ka lo demba mbɔsaka etena ndo nɔmbaka dia kikokɛ dimɛna dia tɔ ndjɔkɔnɔ.  Woho akɔ waamɛ mbele, nɔmbamaka etena ndo ekokelo ka dimɛna dia paa ka lo yimba nkɔnɔ. Ko kakɔna shikaa kakoka nkimanyiya wanɛ wele l’ɔkɛyi dia nkitshakitsha paa kele la wɔ?

3, 4. Lande na kakokaso monga l’eshikikelo dia Jehowa shihodiaka ɔkɛyi wonga la so?

³ Jehowa Shɛso ka nkɛtshi mbele onto loleki tosha esambelo keso l’ohomba. (Adia 2 Kɔrɛtɔ 1:3, 4.) Nde ekɔ ɛnyɛlɔ koleki woke k’onto lokana nkɛtshi ndo nde ndakaka ekambi ande ɔnɛ: “Dimi dimɛ kele Ɔnɛ lanyosamba.”​—Isa. 51:12; Os. 119:50, 52, 76.

⁴ Shɛso ka ngandji nde la wɔ akavusha anto wakandokaka ngandji, ɛnyɛlɔ okambi ande Abrahama, Isaka, Jakɔbɔ, Mɔsɛ ndo nkumekanga Davidɛ. (Wal. 12:6-8; Mat. 22:31, 32; Ets. 13:22) Bible tɛnyaka dia Jehowa ekɔ lo nomɔlomɔ dikambo dia lushi layondolola apami wa kɔlamelo asɔ. (Jɔbɔ 14:14, 15) L’etena kɛsɔ, vɔ wayonga l’ɔngɛnɔngɛnɔ ndo la yoonge ya kokele. Jehowa akavusha ndo Ɔnande ɛtɔi lakandote. Bible mbutaka dia Yeso aki onto lele Nzambi “[akawɔ]ngɛnangɛnaka lo yoho ya laande.” (Tok. 8:22, 30) Hatokoke kaanga nkanyiya nkandji kaki la Jehowa etena kakandɛnaka Ɔnande avɔ nyɔi ka kɔlɔ efula.​—Jni. 5:20; 10:17.

5, 6. Ngande watosamba Jehowa?

⁵ Sho koka monga l’eshikikelo tshɛ lo tshɛ ɔnɛ Jehowa ayotokimanyiya. Ɔnkɔnɛ, hatohombe mengenga mbɔlɔmba ndo mbɔkɛnɛmɔlɛ paa ndo ɔkɛyi w’efula wele la so. Ande esambelo kakondjaso dia mbeya ɔnɛ Jehowa shihodiaka nsaki yaso ndo toshaka esambelo kele la so ohomba lee! Ko ngande wasalande dui sɔ?

⁶ Yoho mɔtshi l’atei wa toho efula tatosamba Jehowa ekɔ lo tshimbo ya nyuma kande k’ekila kele la wolo efula. (Ets. 9:31) Yeso akalake ɔnɛ Shɛso ayosha nyuma kande k’ekila le onto tshɛ lawɔlɔmbatɔ. (Luka 11:13) Susi, lakatatɛkɛtshi dikambo diande l’etatelo mbutaka ate: “Mbala efula takakaka adwe dia nsɛngasɛnga Jehowa dia tosamba. Tena tshɛ, wɔladi wa Nzambi wakalamaka etema ndo timba taso.”​—Adia Filipɛ 4:6, 7.

7, 8. Lande na kakokaso monga l’eshikikelo dia Yeso ayotosamba?

⁷ Etena kakinde la nkɛtɛ, Yeso akokoya lo yoho ya kokele waonga w’amɛna wa She oma lo kɛnɛ kakandataka ndo kakandasalaka. (Jni. 5:19) Jehowa akatome Yeso la nkɛtɛ dia ndjosamba “etema wambatɛ” ndo “wanɛ tshɛ walela.” (Isa. 61:1, 2; Luka 4:17-21) Anto wakeyaka dia Yeso akashihodiaka asui waki la wɔ ndo akalangaka mɛtɛ mbakimanyiya.​—Hɛb. 2:17.

⁸ Etena kaki Yeso ɔlɔngɔlɔngɔ, ondo angɛnyi ande wa ma ma ndo ase nkumbo kande amɔtshi wakavu. Ɛnyɛlɔ, mɛnamaka dia ondo Yɔsɛfu, she ka lodia akavu etena kaki Yeso eke ɔlɔngɔlɔngɔ. * Ohokanyiya okakatanu wakakoke monga la ɔlɔngɔlɔngɔ wakokanaka nkɛtshi ɔsɔ dia mbikikɛ ɔkɛyi ande, wa nyango, wa anango ndo w’akadiyɛnde.

9. Ngande wakɛnya Yeso nkɛtshi etena kakavu Lazaro?

 ⁹ Etena kakandasambishaka, Yeso akɛnya dia nde mɛtɛ akashihodiaka awui waki l’anto ndo akawaokaka nkɛtshi. Ɛnyɛlɔ etena kakavu Lazaro ɔngɛnyi ande wa ma ma, Yeso akashihodia paa k’efula kaki la Mariya nde la Maata. Nde akawaoke nkɛtshi k’efula ko akatatɛ ndela, kaanga mbakandeyaka dia nde ayanga mbolola Lazaro.​—Jni. 11:33-36.

10. Ngande wakokaso monga l’eshikikelo dia Yeso shihodiaka woho wayaokaso?

¹⁰ Ngande wakoka ɛtɛkɛta wa Yeso w’esambelo tokimanyiya ɛlɔ kɛnɛ? Bible mɛnyaka hwe dia Yeso atatshikitana. Tɔ mbutaka ɔnɛ: “Yeso Kristo ekɔ woho akɔ waamɛ loyi, ɛlɔ ndo pondjo pondjo.” (Hɛb. 13:8) Nde mbelamɛka ɔnɛ “Owandji wa Woke wa lɔsɛnɔ” nɛ dia diɛsɛ la nde mbayotokondja lɔsɛnɔ la pondjo. Yeso shihodiaka nto ɔkɛyi wele l’anto ndo “nde ekɔ la akoka wa nkimanyiya wanɛ wahembama.” (Ets. 3:15; Hɛb. 2:10, 18) Ɔnkɔnɛ, sho koka monga l’eshikikelo dia Yeso hangɛnangɛna etena konga anto akina la paa. Nde shihodiaka ɔkɛyi awɔ ndo nde koka mbasamba “etena kahombama.”​—Adia Hɛbɛru 4:15, 16.

11. Naa avɛsa shikaa wakoka kosamba?

¹¹ Avɛsa wɛnya ɔkɛyi w’efula waki la Yeso etena kakavu Lazaro, wekɔ l’atei w’avɛsa efula w’esambelo wele l’Ɔtɛkɛta wa Nzambi. Dui sɔ hatambiya nɛ dia “akambo tshɛ wakafundama lo nshi y’edjedja wakafundama dia tosha wetshelo, dia oma lo ekikelo kaso ndo oma lo esambelo k’oma lo Afundelo, sho monga la elongamelo.” (Rɔmɔ 15:4) Naka wɛ ekɔ l’ɔkɛyi, wɛ la wɔ koka sambema ngasɔ oma lo avɛsa wayela anɛ:

• “Jehowa ekɔ suke la wanɛ wele l’etema wambatɛ; nde shimbɛka wanɛ wele la lɔkɔnyɔ lo yimba.”​—Os. 34:18, 19.

• “Etena kakamamɛnama la ekiyanu, wɛ [Jehowa] akansambe ndo akambɔladia.”​—Os. 94:19.

• “Nkumɛso Yeso Kristo ndamɛ ndo Nzambi Shɛso lakatolange ndo lakatosha esambelo ka pondjo ndo elongamelo ka dimɛna lo tshimbo ya ɔlɔlɔ waheyama mbɛdika asambe etema anyu ndo anyokeketsha.”​—2 Tɛs. 2:16, 17. *

12. Ngande wakokaso nsamba anto akina?

¹² Anto wele l’ɔkɛyi koka nkondja nto esambelo l’etshumanelo k’Akristo. (Adia 1 Tɛsalɔnika 5:11.) Ngande wakokayɛ nkeketsha ndo nsamba wanɛ wele la “yimba yambɔkɔmɔ”? (Tok. 17:22) Ohɔ dia ekɔ “etena ka mbɔlama la etena ka ntɛkɛta.” (Ond. 3:7) Wadi aki odo lelɛwɔ Dalene mbutaka ɔnɛ wanɛ wele l’ɔkɛyi wekɔ l’ohomba wa nkɛnɛmɔla tokanyi ndo nsaki yawɔ. Diakɔ diele, dui dioleki ohomba diakokayɛ nsala ele mbahokamɛ aha la mbahembola ɔtɛkɛta. Junia, lele ɔnango akayadiake mbutaka ɔnɛ: “Kaanga mbahayakoke nshihodia tshɛ lo tshɛ ɔkɛyi wele la wɔ, kɛnɛ koleki ohomba ele nanga dia nshihodia woho wayaokawɔ.”

13. Ahombaso mbohɔka lo dikambo di’ɔkɛyi?

¹³ Sho pombaka mbohɔka di’aha onto tshɛ la l’atei aso mboka ndo mbakɛnɛmɔla ɔkɛyi lo yoho yakɔ yamɛ. Tena dimɔtshi ekɔ wolo nembetshiya paa kokaso tshɛ lo tshɛ. Ɔtɛkɛta  wa Nzambi mbutaka ɔnɛ: “Otema mbeyaka ololo awɔ hita, ndo ndooko onto l’oma l’andja lakoka ngɛnangɛna kaamɛ la wɔ.” (Tok. 14:10) Kaanga etena kakɛnɛmɔla onto ɔmɔtshi woho wayaokande, aha mbala tshɛ mbatongaka wɔdu di’anto akina nshihodia kɛnɛ kalangande mbuta.

14. Akokaso mbuta dia nsamba wanɛ wele l’ɔkɛyi?

¹⁴ Koka monga wolo dia mbeya kɛnɛ ka mbutɛ onto ɔmɔtshi lele l’ɔkɛyi. Koko Bible mbutaka dia “lolemi la kanga lomba lekɔ ɛkɔnwɛlɔ.” (Tok. 12:18) Anto efula tanaka ɛtɛkɛta wa nsamba anto akina lo biukubuku Etena Kavɔ Onto Ɔmɔtshi Lalangayɛ. * Koko mbala efula, dui dioleki ohomba diakokayɛ nsala ele “[ndela] la wanɛ walela.” (Rɔmɔ 12:15) Gaby lakavusha omɛnde, mbutaka dia lo tena dimɔtshi yoho yaamɛ ya nkɛnɛmɔla nsaki yande ele ndela. Nde kotshaka ate: “Diakɔ diele dimi sambemaka yema etena kalela angɛnyi ami amɔtshi kaamɛ la mi. L’etena kɛsɔ, haleke ndjaoka opoko lo ɔkɛyi wele la mi.”

15. Ngande wakokaso nsamba anto akina naka tekɔ l’okakatanu dia nsala dui sɔ? (Enda ndo kiombo yele l’ɔtɛ a dui ɔnɛ: “ Ɛtɛkɛta wa lotutsha w’esambelo.”)

¹⁵ Naka wɛ ekɔ l’okakatanu dia mbutɛ onto dui dimɔtshi dia mbosamba lalende, kete koka monga dui dia wɔdu mbotomɛ nɔtɛ, mesajɛ l’Ɛtɛrnɛtɛ kana l’ehomɔ kekina kana mukanda. Wɛ koka tsho nshila divɛsa di’esambelo, nshila dionga dimɔtshi diohɔyɛ diaki l’onto lakavu kana dui dimɔtshi diakayohɔ diangɛnangɛnayɛ. Junia mbutaka ate: “Nongola kaanga yema ya mesajɛ w’ekeketshelo kana mbelamɛ dia tetsha wenya kaamɛ l’osekami Okristo kimanyiyakami efula ndeka  ndo kɛnɛ kakokami mbuta. Awui asɔ mɛnyakami dia dimi nangemaka ndo kokamɛka.”

16. Naa yoho ya dimɛna efula ya nsamba anto akina?

¹⁶ Alɔmbɛlɔ aso koka nkimanyiya anangɛso l’akadiyɛso wele l’ɔkɛyi. Sho kokaka nɔmbaka lo dikambo diawɔ kana nɔmbaka kaanga kaamɛ la wɔ. Kaanga mbakoka dui sɔ monga wolo nsala l’ɔtɛ wayaokayɛ dia wɛ koka ndela, alɔmbɛlɔ ayɛ w’oma k’ɛse otema koka monga esambelo ka wolo. Dalene mbohɔka ɔnɛ: “Tena dimɔtshi lam’akayaka akadiyɛso dia ndjosamba, lakawatɛka dia kana wayokoka nɔmba yema. Etena kakawatatɛka nɔmba, tena efula vɔ waki la yema y’okakatanu, koko tena tshɛ l’ɔkɔngɔ wa vɔ ntatɛ, vɔ ndjɔlɔmbaka dimɛna ndo vɔ salaka dɔmbɛlɔ di’oma k’ɛse otema. Mbetawɔ kawɔ ka wolo, ngandji ndo woho wakawayakiyanyaka lo dikambo diami akakeketsha mbetawɔ kami efula.”

17-19. Lande na kahombaso ntetemala nsamba anto akina?

¹⁷ Bu dui dia wɔdu dia mbeya edja ka ngande kakoka onto l’onto monga l’ɔkɛyi. Etena kavusha onto lakinde ɔmɔtshi la ngandji, oma l’etatelo angɛnyi la ewotɔ ande ndjaka efula dia ndjowosamba. Koko l’ɔkɔngɔ wa vɔ nkalola dia tokamba elimu awɔ, wanɛ wele l’ɔkɛyi tetemalaka monga l’ohomba w’esambelo. Ɔnkɔnɛ tonge suke dia nkimanyiya. “Ɔngɛnyi wa mɛtɛ mbokanaka ngandji tena tshɛ, ndo ekɔ ɔnanyɔ lakokayɛ mendɛ le nde lo tena dia paa.” (Tok. 17:17) Sho pombaka nsamba wanɛ wele l’ɔkɛyi l’edja tshɛ kewɔ l’ohomba.​—Adia 1 Tɛsalɔnika 3:7.

¹⁸ Ohɔ dia onto ɔmɔtshi koka mɛnama la ɔkɛyi la shashimoya l’etena kakɔna tshɛ. Dui sɔ koka monga l’ɔtɛ wa lushi la eotwelo, mishiki ɛmɔtshi, foto, elimu kana nsolo kɛmɔtshi, wondjo ɔmɔtshi, kana deko dia l’ɔnɔnyi. Etena kasala wadi kana omi lambovusha dui dimɔtshi ndamɛ mbala ka ntondo, ɛnyɛlɔ mbɔtɔ lo losanganya la woke kana lo Eohwelo, dui sɔ koka mbosha paa efula. Ɔnangɛso ɔmɔtshi mbutaka ate: “Lakalongamɛka dia lam’ayokoka datɛ dia lushi la diwala diami, layoka paa efula, ndo ɔsɔ komonga dui dia wɔdu. Koko anangɛso l’akadiyɛso amɔtshi wakakongɛ dia angɛnyi ami wa ma ma ndjaka lalemi diaha dimi ndjatshikalɛka.”

¹⁹ Tohɔ dia wanɛ wele l’ɔkɛyi wekɔ l’ohomba w’ekeketshelo aha tsho lo waaso wa laande. Junia mbutaka ate: “Mbala efula ekimanyielo ndo wembwelo w’anto lo waaso akina waha wa laande mongaka ohomba efula. Tena dia la shashimoya sɔ diekɔ ohomba efula ndo mbishaka esambelo k’efula.” Lo mɛtɛ, hatotokoka minya opoko kana ɔkɛyi awɔ tshɛ, koko sho koka nsamba wanɛ wele l’ɔkɛyi lo mbasalɛ akambo amɔtshi. (1 Jni. 3:18) Gaby mbutaka ate: “Lekɔ la lowando l’efula le Jehowa l’ɔtɛ wa dikumanyi dia ngandji diakakimanyiya l’edja tshɛ kakimi l’okakatanu. Vɔ wakakimanyiya mɛtɛ dia mboka dia anya wa ngandji wa Jehowa dingami.”

20. Lande na kele alaka wa Jehowa wekɔ kiɔkɔ y’esambelo k’efula?

²⁰ Ekɔ dui di’ekeketshelo dia mbeya ɔnɛ Jehowa, Nzambi k’esambelo tshɛ, ayonya ɔkɛyi tshɛ lo tshɛ l’etena ka eolwelo. (Jni. 5:28, 29) Nzambi ndakaka ɔnɛ “nde ayonya nyɔi pondjo, ndo Nkum’Olongo Nkumadiɔndjɔ Jehowa ayokitola asɔyi oma lo dungi tshɛ.” (Isa. 25:8) Oma laasɔ, lo dihole dia “n[dela] la wanɛ walela,” onto tshɛ la la nkɛtɛ “[ayɔngɛnangɛna] la wanɛ wangɛnangɛna.”​—Rɔmɔ 12:15.