AKRISTO wa lo ntambe ka ntondo wakadje welo dia nsambisha anto efula “lokumu l’ɔlɔlɔ . . . la Diolelo.” (Mat. 24:14) Amɔtshi wakakome polo lo ntshɔ lo wedja ekina. Ɛnyɛlɔ, ɔpɔstɔlɔ Pɔɔlɔ akatshu lɛnɛ atanema Turquie ka nshi nyɛ ndo nde akasambisha efula lɛkɔ etena kakandandaka nkɛndɔ yande ya misiɔnɛrɛ. * Ɛnɔnyi oko 2 000 l’ɔkɔngɔ, lo 2014, wakadje yimba nto dia nsala esambishelo ka laande la Turquie. Lande na kakawakongɛ esambishelo ka laande kɛsɔ? Waa na wakakisale?

Ɛlɔ kɛnɛ, apandjudi ndekana 2 800 mbele la Turquie, koko wodja ɔsɔ wekɔ l’anto miliyɔ 79. Dui sɔ nembetshiyaka dia opandjudi 1 wa la Turquie pombaka nsambisha anto suke la 28 000. Oko wakokayɛ nkanyiya, apandjudi wakakoke nsambisha anto yema tshitshɛ tsho wadjasɛ lo wodja ɔsɔ. Oyango wakaleke woke wa esambishelo ka laande kɛsɔ aki dia nsambisha anto efula l’etena ka tshitshɛ. Anangɛso l’akadiyɛso oko 550 w’oma lo wedja ekina wakatshu la Turquie ndo wakatosala kaamɛ l’apandjudi wa lɛkɔ esambishelo ka laande. Etombelo akɔna waki la dui sɔ?

Esambishelo ka mamba kakasalema. Etshumanelo kɛmɔtshi ka la Istanbul kakafunde ɔnɛ: “Etena kakatɛnyi anto, vɔ wakambola ɔnɛ: ‘Onde losanganya la laande mbayanga salema lanɛ? Tekɔ lo mɛna Ɛmɛnyi wa Jehowa ahole tshɛ!’” Etshumanelo kɛmɔtshi ka l’osomba wa Izmir kakafunde ɔnɛ: “Pami kɛmɔtshi kakamba lo dihole diemala mituka akelɛ ekumanyi ka l’etshumanelo kɛmɔtshi ka lɛkɔ ko akawombola ate: ‘Ambotomba? Nyambofudia olimu anyu?’” Lo mɛtɛ, anto wakashihodia di’esambishelo ka laande kekɔ lo salema.

Wanɛ wakaye oma lo wedja ekina wakangɛnangɛna olimu w’esambishelo. Steffen, lakaye oma la Danemark, akate ate: “Lushi tshɛ, lakasambishaka anto wahatokaka akambo wendana la Jehowa. Lakashihodia dia lakeyanyaka mɛtɛ lokombo la Jehowa.” Jean-David lakaye oma la France akafunde ate: “Takasambishaka shinga tshɔi tsho l’edja ka wenya efula. Ɔsɔ aki dui dia diambo! Anto efula kombeyaka Ɛmɛnyi wa Jehowa. Takasambishaka lo soko suke la tshɛ, takɛnyaka vidɛo yaso mɔtshi ndo takatshikɛka ampokami ekanda aso.”

 Anto oko 550 wakasambishaka wakakahe ekanda oko 60 000 lo mingu hiende tsho! Esambishelo ka laande kɛsɔ kakakimanyiya di’esambishelo ka mamba salema.

Wakafudia ohetoheto lo dikambo di’esambishelo. Esambishelo ka laande kakonge la shɛngiya le anangɛso wa lɛkɔ. Efula l’atei awɔ wakatatɛ nkongɛ dia monga ekambi wa lo tena tshɛ. Diakɔ diele, lofulo l’ambatshi mboka wa pondjo wa la Turquie lakadɛ lo pursa 24 l’edja ka ngɔndɔ 12 l’ɔkɔngɔ w’esambishelo ka laande.

Apandjudi wakaye oma lo wedja ekina wakɛnya woho wakonge esambishelo ka laande kɛsɔ la shɛngiya lo esambishelo kawɔ kaanga l’ɔkɔngɔ wa vɔ nkalola lo wedja awɔ. Şirin, kadiyɛso kakaye oma l’Allemagne akafunde ate: “Anangɛso wa la Turquie wakasambishaka lo tshakitudi aha l’okakatanu. Dimi mbokaka nsɔnyi efula dia nsambisha lo tshakitudi. Koko diɛsɛ l’esambishelo ka laande kɛsɔ, ɛnyɛlɔ k’anangɛso wa lɛkɔ ndo alɔmbɛlɔ efula, lakayonga l’akoka wa nsala kɛnɛ kakimi kokokaka nsala ntondo. Lakayokoma lo nsambisha ndo mbisha kaanga anto wa l’ahole wemala kawolo traktɛ! Laya bu ɔsɔnyi woho wakimi ntondo.”

Johannes lakaye oma l’Allemagne, akate ate: “Lakakondja wetshelo ɛmɔtshi lo dikambo di’esambishelo kami. Anangɛso wa la Turquie nangaka mɛtɛ mbewoya anto efula akambo wa mɛtɛ. Vɔ sambishaka lo diaaso tshɛ. Lakɔshi yɛdikɔ ya nsala woho akɔ waamɛ etena kakamakalola l’Allemagne. Ndo kakianɛ, losambisha anto efula oleki woho wakamasalaka ntondo.”

Zeynep lakaye oma la France mbutaka ate: “Esambishelo ka laande kɛsɔ kakonge la shɛngiya y’efula l’esambishelo kami. Tɔ kakakimanyiya dia ndeka monga la dihonga ndo ndeka ndjaɛkɛ le Jehowa.”

Apandjudi wakaleke monga kaamɛ. Ngandji ndo kaamɛ kaki l’anangɛso wakaye oma lo wedja wotshikitanyi akambiya anto. Jean-David lakatashidi la diko akate ate: “Sho ‘takalɛtɛ’ ɔlɔlɔ w’oma le anangɛso.” Nde akakotsha ate: “Vɔ wakatɔshi oko angɛnyi awɔ ndo takonge oko ase nkumbo yawɔ. Vɔ wakatolongola lo ngelo yawɔ. Lakeyaka dia tekɔ lo nkumbo k’onto l’ɔnango ka l’andja w’otondo; nɛ dia lambadiaka  dui sɔ mbala efula l’ekanda aso. Koko l’etena kɛsɔ, lakɛnyi dui sɔ la washo ami. Lakayala ndo l’ofunu dia monga l’atei w’ekambi wa Jehowa ndo lekɔ lo mbosha losaka l’ɔtɛ wa diɛsɛ di’ohomba sɔ.”

Claire lakaye oma la France, akate ate: “Kaanga mbakaye amɔtshi oma la Allemagne, Danemark, France, kana Turquie, sho tshɛ taki oko nkumbo ɔtɔi. Aki oko Nzambi akanya elelo tshɛ wa wedja la odimɔ wa woke.”

Stéphanie lakaye oma la France akakotsha ate: “Esambishelo ka laande kakatetsha ɔnɛ aha mbekelo kana ɔtɛkɛta mbatokimanyiya dia monga kaamɛ, koko ngandji kokaso Jehowa.”

Apandjudi efula wakaye oma lo wedja ekina wakatatɛ nsangoya dia monɔ la Turquie dia tosha lonya l’olimu w’efula waakahombe salema lɛkɔ. Amɔtshi wamboshilaka monɔ. Anto watshɔ dia tokamba lɛnɛ ele ohomba efula asɔ mandɔmaka efula.

Ɛnyɛlɔ, djui y’apandjudi 25 wakatshu lo ɛtshi kɛmɔtshi ka nkɛtɛ. Aki paka ekumanyi ɔtɔi lɛkɔ l’edja k’ɛnɔnyi efula. Ohokanyiya ɔngɛnɔngɛnɔ wakonge l’apandjudi asɔ lo 2015, etena kakawɛnyi anto asamalo wambonɔ dia ndjokamba lɛnɛ ele ohomba efula oma l’Allemagne ndo Pays-Bas dia towasukɛ!

Kakɔna kakate wanɛ wakatshu dia tokimanyiya la Turquie lo tshanda mɔtshi lo dikambo dia lɔsɛnɔ lawɔ lɛkɔ? Lo mɛtɛ, lo tena dimɔtshi okakatanu mongaka, koko wanɛ watshɔ dia tokimanyiya lɛnɛ ele ohomba efula wekɔ l’ɛtshɔkɔ efula. Tende kɛnɛ kakate anto amɔtshi:

Federico ɔnangɛso lotshukanyi laya l’ɛnɔnyi 40 l’ɛmɔtshi lakonɔ oma la Espagne mbutaka ate: “Woho wakimi kotshɔ la lomombo la l’emunyi efula dia ndjasha lɔkɔ, akakimanyiya dia ndjasha efula l’akambo woleki ohomba.” Onde nde akakeketsha anto dia nkamba olimu ɔsɔ? Nde mbutaka ate: “Eelo! Naka wɛ ambonɔ otsha lo wodja okina dia tokimanyiya anto dia mbeya Jehowa, kete wɛ mɛtɛ amboyatshika l’anya ande. Wɛ ayoshihodia dia Jehowa ayokokokɛ woho woleki tshɛ.”

Rudy ɔnangɛso lotshukanyi laya suke la nkotsha ɛnɔnyi 60 lakaye oma lo Pays-Bas mbutaka ate:  “Sho mongaka l’ɔngɛnɔngɛnɔ efula dia nkamba lɛnɛ ele ohomba w’ekimanyielo, dia ntɛkɛta ndo mbewoya anto efula wahatasambishamaka akambo wa mɛtɛ. Mɛna ɔngɛnɔngɛnɔ wonga l’anto etena ketawɔwɔ akambo wa mɛtɛ, ekɔ kiɔkɔ y’ɔngɛnɔngɛnɔ efula.”

Sascha, ɔnangɛso lotshukanyi lele l’ɛnɔnyi 40 l’ɛmɔtshi lakonɔ oma l’Allemagne mbutaka ate: “Etena tshɛ kemi l’esambishelo, dimi sambishaka anto wamboka akambo wa mɛtɛ mbala ka ntondo. Mbisha anto wa ngasɔ diaaso dia mbeya Jehowa ngɛnyangɛnyakami efula.”

Atsuko, kadiyɛso kotshukami kele l’ɛnɔnyi 30 l’ɛmɔtshi kakaye oma la Japon, mbutaka ate: “Ntondo, lakakombolaka di’Armangɛdɔna ndja esadi eto. Koko l’ɔkɔngɔ wa monɔ la Turquie, lekɔ lo mbisha Jehowa losaka l’ɔtɛ wende la solo dia lotutsha. Lam’atamaleke mɛna woho walɔmbɔla Jehowa akambo, mbatamaleke nkombola ndjasukanya la nde.”

Alisa, kadiyɛso kele l’ɛnɔnyi 30 l’ɛmɔtshi kakaye oma la Russie, mbutaka ate: “Kambɛ Jehowa l’olimu wa nganɛ ambokimanyiya dia ndɛta ɔlɔlɔ ande tshɛ.” (Os. 34:8) Nde kotshaka ɔnɛ: “Jehowa bu tsho Papa, koko ndo Ɔngɛnyi ami wa ma ma wamomoleka mbeya dimɛna l’akambo wotshikitanyi. Lɔsɛnɔ lami lambololanɛ la tena di’ɔngɛnɔngɛnɔ, l’akambo w’amɛna ndo ɛtshɔkɔ efula!”

L’ekimanyielo k’esambishelo ka laande la Turquie, anto efula wakoke lokumu l’ɔlɔlɔ. Koko, bɛtshi dia nkɛtɛ diekekɔ efula diahatasambishama. Lushi tshɛ, anto watshɔ dia tokimanyiya la Turquie sambishaka anto wahatokaka akambo wendana la Jehowa. Onde wɛ nangaka nkamba l’ɛtshi ka nkɛtɛ ka ngasɔ? Naka ngasɔ, kete sho kokeketshaka ɔnɛ: ‘Edia washo, enda, dikambɔ diambɛla dia mina.’ (Jni. 4:35) Onde wɛ hakoke ntshɔ dia tokimanyiya l’ɛtshi kɛmɔtshi ka nkɛtɛ kele “dikambɔ diambɛla dia mina”? Naka ngasɔ, kete ntatɛ ndjalɔngɔsɔla dia nkotsha oyango ɔsɔ. Kɛnɛ kele mɛtɛ ele: Ndjasha efula dia dianganya lokumu l’ɔlɔlɔ “polo ndo l’ahole woleki etale wa lo nkɛtɛ” ayokela ɛtshɔkɔ waheyama mbɛdika!—Ets. 1:8.