1. Lande na kakokaso mbita ɔnɛ Jehowa kakanga ɛngɔ tshɛ? (Enda osato wele lo mbɔtwɛlɔ.)

ƐNGƆ tshɛ kekɔ ka Jehowa! Nde mbakanga “olongo wa laadiko di’elongo ndo nkɛtɛ la kɛnɛ tshɛ kele lɔkɔ.” (Eoh. 10:14; Ɛny. 4:11) Lam’ele Jehowa mbakatonge anto, sho tshɛ tekɔ anto ande. (Os. 100:3) Koko, Nzambi akasɔnɛ anto amɔtshi oma l’atei w’anto tshɛ dia monga anto ande lo yoho ya laande.

2. Lo ndjela Bible, waa na wele anto wa Jehowa lo yoho ya laande?

² Ɛnyɛlɔ, Osambo 135 mbutaka di’atɛmɔdi wa Jehowa wa kɔlamelo waki lo Isariyɛ w’edjedja waki “ɛngɔ kande ka laande.” (Os. 135:4) Ndo nto, Hɔsɛya akate prɔfɛsiya ɔnɛ anto amɔtshi waki komonga ase Isariyɛlɛ wakahombe ndjonga ekambi wa Jehowa. (Hɔs. 2:23) Prɔfɛsiya kɛsɔ kakakotshama etena kakatatɛ Jehowa nsɔna anto waki komonga ase Isariyɛlɛ dia tolɛ kaamɛ la Kristo l’olongo. (Ets. 10:45; Rɔmɔ 9:23-26) Anto wakakitama nyuma k’ekila asɔ mbelamɛka “wodja w’ekila.” Vɔ wekɔ “anto waki Nzambi wa laande.” (1 Pe. 2:9, 10) Ko kayotota lo dikambo di’Akristo tshɛ wa kɔlamelo wa nshi nyɛ wele l’elongamelo ka nsɛna pondjo pondjo la nkɛtɛ? Jehowa mbaelɛka ndo vɔ ɔnɛ “anto ami” ndo “ɛsɔnami ami.”​—Isa. 65:22.

3. a) Waa na wele la diɔtɔnganelo dia laande la Jehowa ɛlɔ kɛnɛ? b) Kakɔna kayotɔsɛdingola lo sawo nɛ?

 ³ Ɛlɔ kɛnɛ, “leemba la tshitshɛ l’ɛkɔkɔ,” lele l’elongamelo ka tɔsɛna pondjo pondjo l’olongo ndo “ɛkɔkɔ ekina,” wele l’elongamelo ka nsɛna pondjo pondjo la nkɛtɛ wekɔ lo ntɛmɔla Jehowa kaamɛ oko “olui 1.” (Luka 12:32; Jni. 10:16) Sho nangaka mɛnya Jehowa lowando lele laso l’ɔtɛ weso la diɔtɔnganelo dia laande sho la nde. Lo sawo nɛ, tayɔsɛdingola woho wakokaso mɛnya lowando laso le Jehowa l’ɔtɛ wa nɛmɔ dia laande sɔ.

4. Ngande wakokaso mɛnya lowando le Jehowa l’ɔtɛ wakandetawɔ dia sho monga la diɔtɔnganelo la nde, ndo ngande wakasale Yeso dui dia ngasɔ?

⁴ Sho mɛnyaka lowando laso le Jehowa etena kayakimɔso le nde ndo kabatizamaso. Oma laasɔ, anto tshɛ koka mɛna dia tekɔ anto wa Jehowa ndo sho nangaka mbokitanyiya. (Hɛb. 12:9) Yeso akasale dui dia ngasɔ etena kakandabatizama. Kaanga mbakinde ose wodja wakayakimɔ le Jehowa, nde akayakimɔ ndamɛ le Jehowa. Aki oko nde akataka ɔnɛ: “Dia nsala lolango layɛ, wɛ Nzambi kami, kele nsaki kami.”​—Os. 40:7, 8, nɔtɛ.

5, 6. a) Kakɔna kakate Jehowa etena kakabatizama Yeso? b) Ɛnyɛlɔ kakɔna kakoka tokimanyiya dia nshihodia woho wayaoka Jehowa etena kayakimɔso le nde?

⁵ Ngande wakayaoke Jehowa etena kakabatizama Yeso? Bible mbutaka ɔnɛ: “L’ɔkɔngɔ wa nde batizama, mbala kakɔ ɔtɔi, Yeso akatombe oma l’ashi; nyolonge, olongo wakadihɔ, ko nde akɛnyi nyuma ka Nzambi kayaholɔ oko fudu k’enga, ko tɔ kakayowahema. Ndo nto, nyolonge, dui diakokɛma oma l’olongo diata ɔnɛ: ‘Ɔnɛ ele Ɔnami, lokami ngandji, ɔnɛ lamometawɔ.’” (Mat. 3:16, 17) Yeso okongaka onto laki Nzambi. Koko Jehowa aki l’ɔngɛnɔngɛnɔ etena kakandɛnyi dia Yeso aketawɔ nkamba la lɔsɛnɔ la nde dia mbokambɛ, Nde oto. Jehowa ngɛnangɛnaka ndo lo dikambo diaso etena kayakimɔso le nde ndo nde tɔtshɔkɔlaka.​—Os. 149:4.

⁶ Jehowa okongaka kanga ɛngɔ tshɛ! Ko kakɔna kakokaso mbosha? Tɔshi dia pami kɛmɔtshi ekɔ l’alɛmbɔlɛmbɔ w’amɛna lo jardɛ yande. Lushi lɔmɔtshi, ɔnande la womoto la dikɛnda ambokola dɛmbɔlɛmbɔ dimɔtshi ko ambowosha. Kaanga mbele alɛmbɔlɛmbɔ akɔ wokongaka wande, papa ka ngandji kɛsɔ ambɔngɛnangɛna la woshasha ɔsɔ. Dui sɔ mɛnyaka di’ɔnande mbokaka ngandji. Dɛmbɔlɛmbɔ di’oma le ɔnande sɔ diekɔ la nɛmɔ efula le nde ndeka alɛmbɔlɛmbɔ akina tshɛ wa lo jardɛ yande. Woho akɔ waamɛ mbele, Jehowa ngɛnangɛnaka etena ketawɔso ndjakimɔ le nde.​—Eto. 34:14.

7. Ngande watokimanyiya Malaki dia nshihodia woho wayaoka Jehowa lo dikambo di’anto wawokambɛ la lolango?

⁷ Adia Malaki 3:16. Lande na kele ekɔ ohomba efula wɛ ndjakimɔ le Jehowa ndo batizama? Ekɔ mɛtɛ dia oma ko etena kakayotɔ, wɛ akonge onto laki Jehowa Otungi ayɛ. Ko, ohokanyiya ɔngɛnɔngɛnɔ wayonga la Jehowa etena kawetawɔyɛ oko Ɔnɔmbɔdi ayɛ ndo kayakimɔyɛ le nde! (Tok. 23:15) Jehowa mbeyaka wanɛ walanga mbɔtɛmɔla ndo nde fundaka nkombo yawɔ lo “dibuku dia[nde dia] eohwelo.”

8, 9. Kakɔna kalɔmba Jehowa wanɛ wele nkombo yawɔ fundama lo “dibuku dia eohwelo”?

⁸ Naka sho nangaka dia lokombo laso ntshikala lo “dibuku dia eohwelo” dia  Jehowa, kete ekɔ dui dimɔtshi diahombaso nsala. Malaki akate ɔnɛ sho pombaka mboka Jehowa wɔma ndo nkana yimba lo lokombo lande. Naka sho ntɛmɔla onto kana ɛngɔ kekina tshɛ, kete lokombo laso layodimɔma oma lo dibuku dia Jehowa!​—Eto. 32:33; Os. 69:28.

⁹ Diakɔ diele, aha ɔnɛ ntshika dɔkɔlɔkɔ dia tayosalaka lolango la Jehowa ndo batizama, kete ambokoka. Ɔsɔ ekɔ awui wasalaso mbala ɔtɔi, koko ntɛmɔla Jehowa ekɔ dikambo dia lɔsɛnɔ l’otondo. Lushi tshɛ, l’edja tshɛ keso la lɔsɛnɔ, sho pombaka mɛnya oma l’etsha aso dia tekɔ lo nkitanyiya Jehowa.​—1 Pe. 4:1, 2.

10. Naa otshikitanu wahomba mɛnama hwe lam’asa wanɛ watɛmɔla Jehowa la wanɛ wahɔtɛmɔla?

¹⁰ Lo sawo dietshi, takeke dia Kɛna, Sɔlɔmɔna ndo ase Isariyɛlɛ wakataka dia wakatɛmɔlaka Jehowa, koko vɔ komonga la kɔlamelo le nde. Takeke oma lo bɛnyɛlɔ sɔ diaha mbuta tsho ɔnɛ tekɔ lo ntɛmɔla Jehowa kete ambokoka. Sho pombaka mpetsha kɛnɛ kele kɔlɔ ndo nanga kɛnɛ kele ɔlɔlɔ. (Rɔmɔ 12:9) Jehowa akate dia otshikitanu wayɛnama hwe “lam’asa onto ɔlɔlɔ la kanga kɔlɔ, lam’asa ɔnɛ lakambɛ Nzambi la ɔnɛ lahookambɛ.”​—Mal. 3:18.

11. Lande na kahomba anto tshɛ mɛna hwe ɔnɛ tekɔ lo ntɛmɔla Jehowa oto?

¹¹ Tekɔ la lowando le Jehowa l’ɔtɛ wakandatɔsɔnɛ dia monga ekambi ande! Anto tshɛ pombaka mɛna aha l’okakatanu ɔnɛ tekɔ lo wedi wa Jehowa. (Mat. 5:16; 1 Tim. 4:15) Yambola ɔnɛ: ‘Onde anto akina wekɔ lo mɛna dia lekɔ la kɔlamelo tshɛ lo tshɛ le Jehowa? Onde lekɔ l’ofunu dia mbitɛ anto akina ɔnɛ lekɔ Ɔmɛnyi wa Jehowa?’ Ohokanyiya woho wayonyanga Jehowa naka sho mboka nsɔnyi dia mbitɛ anto akina ɔnɛ tekɔ anto ande.​—Os. 119:46; adia Makɔ 8:38.

12, 13. Ngande wakonya anto amɔtshi anto dia monga l’okakatanu dia mbaeya dia wekɔ Ɛmɛnyi wa Jehowa?

¹² Lonyangu ko, kaanga Ɛmɛnyi wa Jehowa ɛmɔtshi wekɔ lo mbokoya “yimba  y’andja ɔnɛ.” Etombelo wele la dui sɔ ele, vɔ hawoleke ntshikitana la wanɛ wahatɛmɔla Jehowa. (1 Kɔr. 2:12) “Yimba y’andja ɔnɛ” konyaka anto dia ndeka mbidja yimba lo nsaki yawɔ ya lokaki. (Ɛf. 2:3) Ɛnyɛlɔ, oyadi alako tshɛ walongolaso, amɔtshi sɔnaka dia ndɔta aha la wɛdimo. Vɔ ndɔtaka ahɔndɔ wa mwɛ ndo wasanga demba, kaanga lo nsanganya y’Akristo. Kana vɔ sɔnaka dia mbɛla divo lo yoho ya tshamba ndeko. (1 Tim. 2:9, 10) Etombelo wele la dui sɔ ele, anto akina koka monga l’okakatanu dia mbeya kana vɔ wekɔ Ɛmɛnyi wa Jehowa kana bu.​—Jak. 4:4.

¹³ Ekɔ toho tokina tele Ɛmɛnyi wa Jehowa ɛmɔtshi hawɛnya hwe dia vɔ ntshikitana l’ase andja ɔnɛ. Ɛnyɛlɔ lo waa fɛtɛ, amɔtshi nɔka lokombe ndo salaka akambo lo yoho yahetawɔma le Akristo. Akina mbidjaka lo réseaux sociaux foto yawɔ ndo kɔmatɛrɛ yɛnya dia vɔ wekɔ la tokanyi ta lo demba. Ondo vɔ watalongola ohokwelo l’etshumanelo k’Akristo l’ɔtɛ wa pɛkato ka woke, koko vɔ koka monga la shɛngiya ya kɔlɔ le anangɛso l’akadiyɛso wasala la wolo dia ntshikitana l’ase andja ɔnɛ.​—Adia 1 Petero 2:11, 12.

14. Ahombaso nsala dia nkokɛ diɔtɔnganelo dia laande diasaso la Jehowa?

¹⁴ Andja ɔnɛ keketshaka anto dia ndeka monga la “nsaki ka demba ndo nsaki ka washo ndo ɔsɛmɔ wa kɛnɛ kele la onto lo lɔsɛnɔ.” (1 Jni. 2:16) Tekɔ anto wa Jehowa, diakɔ diahombaso ntshikitana l’anto akina. Ekɔ ohomba sho “ntona akambo wa kɔlɔ ndo nsaki y’andja ɔnɛ” ndo sho “nsɛna la yimba y’ɔlɔlɔ, la losembwe ndo omamemelo le Nzambi l’atei wa dikongɛ nɛ di’akambo.” (Tito 2:12) Lɔsɛnɔ laso l’otondo, mbidja ndo woho watɛkɛtaso, walɛso, wanɔso, walɔtaso ndo wakambaso olimu, pombaka mɛnya anto tshɛ hwe ɔnɛ tekɔ anto waki Jehowa.​—Adia 1 Kɔrɛtɔ 10:31, 32.

15. Lande na kahombaso monga ɔlɔlɔ ndo la ngandji otsha le Akristo akina?

¹⁵ Sho mɛnyaka dia sho mbɔsaka  diɔtɔnganelo diasaso la Jehowa la nɛmɔ oma lo yoho yasalɛso anangɛso l’akadiyɛso akambo. Vɔ wekɔ anto waki Jehowa oko sho. Naka sho mbohɔka dui sɔ, kete tayowasalɛka akambo w’ɛlɔlɔ tena tshɛ ndo la ngandji. (1 Tɛs. 5:15) Naa ohomba wa dui sɔ? Yeso akatɛ ambeki ande ate: “Oma lo dikambo nɛ, anto tshɛ wayeya dia nyu nyekɔ ambeki ami, naka nyayokana ngandji lam’asanyu.”​—Jni. 13:35.

16. Wetshelo akɔna wakondjaso oma lo Ɛlɛmbɛ wa Mɔsɛ lo kɛnɛ kendana la woho woka Jehowa ekambi ande ngandji?

¹⁶ Ɛnyɛlɔ k’oma l’Ɛlɛmbɛ wa Mɔsɛ koka tokimanyiya dia nshihodia woho wahombaso salɛ ase etshumanelo akambo. Lo tɛmpɛlɔ ka Jehowa, aki diangɔ dimɔtshi diakawakambaka la diɔ paka dikambo di’ɔtɛmwɛlɔ. Ɛlɛmbɛ wakalembetshiya hwe woho wakahombaka ase Lɛwi nkokɛ diangɔ sɔ ndo onto tshɛ laki kondjelaka ɛlɔmbwɛlɔ ɛsɔ, akahombaka ndjakema. (Wal. 1:50, 51) Naka Jehowa akayakiyanyaka efula lo woho wakawahombaka nkamba la diangɔ dia l’ɔtɛmwɛlɔ ande, shi kete nde ndekaka ndjakiyanya lo dikambo dia woho wasalɛ anto atɛmɔdi ande wele la kɔlamelo wakayakimɔ le nde akambo! Nde akasale dia sho mbeya ɔnɛ tekɔ la nɛmɔ efula le nde etena kakandate ate: “Ɔnɛ tshɛ lanyonanda ambonanda ɔna sso diami.”​—Zɛk. 2:8.

17. Jehowa ‘mbidjaka yimba ndo pokamɛka’ awui akɔna?

¹⁷ Malaki akate dia Jehowa ‘mbidjaka yimba ndo pokamɛka’ woho wasalanɛ ekambi ande akambo. (Mal. 3:16) Jehowa “mbeyaka anto ande.” (2 Tim. 2:19) Nde mbeyaka dimɛna dikambo tshɛ diasalaso ndo diatɛkɛtaso. (Hɛb. 4:13) Naka sho bu ɔlɔlɔ otsha le anangɛso l’akadiyɛso, Jehowa ekɔ lo mɛna. Koko, sho koka monga l’eshikikelo dia Jehowa mɛnaka ndo etena kalongɔnaso, keso la lokaho, kadimanyiyanaso ndo keso ɔlɔlɔ.​—Hɛb. 13:16; 1 Pe. 4:8, 9.

18. Ngande wakokaso mɛnya Jehowa lowando l’ɔtɛ wakandatɔsɔnɛ dia monga ekambi ande?

¹⁸ Sho nangaka mɛnya Jehowa dia tekɔ la lowando l’ɔtɛ weso ekambi ande. Sho mbeyaka di’etena kakatayakimɔ le nde, takɔshi yɛdikɔ yoleki tshɛ dimɛna. Kaanga mbasɛnaso “l’atei wa lɔlɔnga la wɛngɛngɛ ndo la kɔlɔ,” sho koka monga “pudipudi ndo aha l’onongo” ndo mpɛta “oko esase lo andja ɔnɛ.” (Flpɛ. 2:15) Ɔnkɔnɛ, tamboyashikikɛ dia mbewɔ nsala dui tshɛ diahetsha Jehowa. (Jak. 4:7) Sho nangaka ndo nɛmiyaka anangɛso l’akadiyɛso nɛ dia vɔ lawɔ wekɔ anto wa Jehowa.​—Rɔmɔ 12:10.

19. Ngande wafuta Jehowa anto ande?

¹⁹ Bible ndakaka ɔnɛ: “Jehowa hatotshika anto ande.” (Os. 94:14) Ɔsɔ ekɔ eshikikelo. Oyadi dui diakɔna diakoka ntomba, Jehowa ayonga kaamɛ la so. Kaanga naka tambovɔ, nde hotohɛ. (Rɔmɔ 8:38, 39) “Naka tekɔ lo nsɛna, kete tekɔ lo nsɛna dikambo dia lotombo la Jehowa ndo naka tambovɔ, kete tambovɔ dikambo dia lotombo la Jehowa. Ɔnkɔnɛ, oyadi tekɔ lo nsɛna kana tambovɔ, tekɔ anto waki Jehowa.” (Rɔmɔ 14:8) Tekɔ lo kongɛɛ l’asolo walomɔlomɔ etena kayolola Jehowa angɛnyi ande tshɛ wa kɔlamelo wakavu. (Mat. 22:32) Ndo kaanga l’etena kɛnɛ, tekɔ lo nkondja weshasha efula w’amɛna oma le Shɛso. Oko wata Bible, “ɔngɛnɔngɛnɔ le wodja wele Jehowa kele Nzambi kawɔ, anto wakandasɔnɛ oko wande hita.”​—Os. 33:12.