“DINELA diekɔ woke, koko ekambi mbele yema tshitshɛ. Ɔnkɔnɛ, nyɔlɔmbɛ Owandji wa dinela dia nde ntoma ekambi lo dinela diande.” (Luka 10:2) Ɛtɛkɛta wakate Yeso ɛsɔ ambeta ɛnɔnyi 2 000 mɛnyaka kɛnɛ keta la Myanmar ɛlɔ kɛnɛ. Lande na? Nɛ dia la Myanmar paka apandjudi 4 200 mbasambisha anto miliyɔ 55 losango la Diolelo.

Koko Jehowa, “Owandji wa dinela” ambonanda etema w’anangɛso l’akadiyɛso nkama wa lo wedja wotshikitanyi ndo wambotshɔ lo wodja ɔsɔ wele lo Sudɛ-ɛsta k’Asiya. Kakɔna kakaatshutshuya dia monɔ oma lo wedja awɔ? Ngande wakawaakimanyiya dia monɔ? Ndo ɛtshɔkɔ akɔna wambowokondja? Tayanga mbaeya.

Ambeta ɛnɔnyi ɛmɔtshi, Kazuhiro ombatshi mboka wa la Japon, aki la hemɔ k’ekunyɛ ko akakɔ hohakayi ndo wakɔtɔlɛ lo lopitadi. Dɔkɔtɛlɛ akawotɛ diaha nkɛndjakɛndja mutuka l’edja k’ɛnɔnyi ehende. Kazuhiro akanyange. Nde akayambola ate: ‘Ngande wayomotetemala nsala kɛnɛ kalangami, mbuta ate olimu w’ombatshi mboka?’ Nde akalɔmbɛ l’etete, akasɛngasɛnga Jehowa dia mbodiholɛ mboka dia nde ntetemala nkamba oko ombatshi mboka.

Kazuhiro mbutaka ate: “L’ɔkɔngɔ wa ngɔndɔ ɔtɔi, ɔngɛnyi ami lakakambaka la Myanmar akoke lokumu la hemɔ kami. Nde akambelɛ ndo akambutɛ ate: ‘La Myanmar anto ndekaka mbeteta lo bisi. Naka wɛ ndja lendo, wɛ koka ntetemala olimu w’esambishelo aha paka wɛ kongi la mutuka!’ Lakambola dɔkɔtɛlɛ diami dia kana lakakoke ntshɔ la Myanmar. Lakambe etena kakate dɔkɔtɛlɛ ate: ‘Manyi mɔtshi lo akambo wa wɔɔngɔ ekɔ lo ndjaye oma la Myanmar oya lo Japon kakianɛ. Layoyokɛnyanya la nde. Naka wɛ ambototata nto, nde koka tokokimanyiya.’ Lakɔshi okadimwelo wa dɔkɔtɛlɛ sɔ oko okadimwelo w’oma le Jehowa.”

Aha la ntshimbatshimba, Kazuhiro akatomɛ filialɛ ka la Myanmar mesajɛ ndo akɛnya dia nde la wadɛnde wekɔ la nsaki ka tokamba oko ambatshi mboka lo wodja ɔsɔ. L’ɔkɔngɔ wa nshi tshanu tsho, filialɛ kakakadimola ɔnɛ: “Yaka, tekɔ l’ohomba w’ambatshi mboka efula!” Kazuhiro la wadɛnde Mari wakasondja mituka awɔ, wakasombe viza ndo wakafute atikɛ wa ndɛkɛ. Ɛlɔ kɛnɛ, vɔ wekɔ lo nkamba l’ɔngɛnɔngɛnɔ kaamɛ l’olui wa l’ɔtɛkɛta w’akanga a mpoke wa la Mandalay. Kazuhiro mbutaka ate: “Dui sɔ diambokeketsha mbetawɔ kaso lo daka dia Nzambi diele lo  Osambo 37:5 diata ɔnɛ: ‘Kimɔ mboka kayɛ le Jehowa; yaɛkɛ le nde, ko nde ayosala akambo lo wahɔ ayɛ.’”

Lo 2014, Ɛmɛnyi wa Jehowa wa la Myanmar waki la diɛsɛ dia nsala losanganya la woke la laande. Wakatome anto w’oma lo wedja ekina efula lo losanganya lɔsɔ. Kadiyɛso Monique ɔmɔtshi l’atei awɔ aki l’ɛnɔnyi 34 laki oma l’États-Unis mbutaka ate: “L’ɔkɔngɔ wa dimi nkalola oma lo losanganya la woke lɔsɔ, lakalɔmbɛ Jehowa lo dikambo dia kɛnɛ kakamahombe nsala oma laasɔ. Ndo nto, lakasawola l’ambutshi ami dikambo di’eyango ami wa lo nyuma. Sho tshɛ takɛnyi dia lakahombe nkalola la Myanmar, koko akahombe mbɔsa etena kɛmɔtshi ndo lakahombe nɔmba efula ntondo ka mbɔsa yɛdikɔ yami y’ekomelo.” Monique nembetshiyaka lande na.

“Yeso akakeketsha ambeki ande dia ‘nkamba akumi.’ Diakɔ diakamayambola nte: ‘Onde lekɔ la falanga yahombama dia monɔ? Onde layonga l’akoka wa ndjakotshɛ ehomba ami lo wodja ɔsɔ aha la mbɔsa wenya efula dia nkamba olimu wa l’emunyi?’” Nde mbutaka ate: “Lakashihodia esadi eto dia dimi komonga la falanga yahombama dia monɔ lo wodja okina.” Ko, ngande wakandayonga l’akoka wa monɔ?​—Luka 14:28.

Monique mbutaka ate: “Lushi lɔmɔtshi owandji ami w’olimu akanɔmbɛ dia mɛnana la nde. Lakatshimbe wɔɔngɔ, lakafɔnya dia wayanga minyami l’olimu. Koko, owandji ami w’olimu akambisha losaka l’ɔtɛ wakamakambaka olimu dimɛna. Oma laasɔ nde akambitɛ ɔnɛ nde ambokongɛ dia mbishami dikuta dia laadiko diakahombe monga lofulo la falanga laki la mi ohomba dia nkotsha ehomba ami wendana la falanga!”

Monique ekɔ lo nkamba la Myanmar oma ko Ngɔndɔ ka dikumi l’ahende 2014. Ngande wayaokande lo dikambo di’esambishelo kande lo dihole diewɔ l’ohomba efula? Nde mbutaka ate: “Lekɔ l’ɔngɛnɔngɛnɔ efula dia monga lanɛ. Lekɔ lo mbeka l’anto asato Bible. Ombeki ami ɔmɔtshi ekɔ l’ɛnɔnyi 67. Mbala tshɛ nde mbishakami mɔyɔ l’ɔmɔnɔmɔnɔ ndo kumbatɛkami. Etena kakandeye dia lokombo la Nzambi ele Jehowa, nde akalele. Nde akate ate: ‘Ɔnɛ ekɔ mbala ka ntondo kamomoka dia lokombo la Nzambi ele Jehowa. Wɛ ekɔ dikɛnda efula lo mbɛdika la mi, koko wɛ ambombetsha dui dioleki ohomba diahamatekaka.’ Lo mɛtɛ, dimi lawɔ lakalele. Awui wa ngasɔ mbetɛka olimu wa nkamba lɛnɛ ewɔ l’ohomba efula olimu washa ɔngɛnɔngɛnɔ w’efula lo lɔsɛnɔ.” Atete edja, Monique aki la diɛsɛ dia mbɔtɔ Kalasa k’esambisha wa Diolelo.

Dui dikina diakatshutshuya anto amɔtshi dia ntshɔ la Myanmar ele ɔkɔndɔ wendana la wodja ɔsɔ wele lo Annuaire des Témoins de Jéhovah 2013. Li kadiyɛso kele l’ɛnɔnyi 30 l’ɛmɔtshi akadjasɛka lo Sidɛ-ɛstɛ ka Aziya. Nde aki l’olimu wakawɔsɛka wenya tshɛ, koko ɔkɔndɔ wa lo Annuaire wakotshutshuya dia nkanyiya dia tokamba la Myanmar. “Lo 2014 etena kakamɔtɔ losanganya la woke la Rangoun, lakatɛnana la wadi l’omi amɔtshi wakamba lo dihole diewɔ l’ohomba efula l’ɛtshi ka nkɛtɛ kele ase Chine la Myanmar. Lam’ele lakatɛkɛtaka Chinois, lakɔshi yɛdikɔ ya monɔ la Myanmar dia tosukɛ olui wakasalaka nsanganya lo Chinois. Dimi la Monique takonɔ la Mandalay. Jehowa akatɔtshɔkɔla, takakondja olimu wa mbetshaka etenyi ka lushi lo kalasa kakɔ kaamɛ ndo takafutɛ luudu suke la laawɔ. Kaanga mbele tanyi ndo ekakatanu ekina, dimi ngɛnangɛnaka olimu wakambami lanɛ. Anto wa la Myanmar wekɔ la lɔsɛnɔ laha kawotake, koko wekɔ la loshilambo ndo nangaka mpokamɛ lokumu l’ɔlɔlɔ. Ekɔ dui di’ɔngɛnɔngɛnɔ efula dia mɛna woho watatɔlɛ Jehowa olimu ande otsha la ntondo. Lekɔ la mbetawɔ tshɛ lo tshɛ di’ekɔ lolango la Jehowa dia dimi monga lanɛ la Mandalay.”

Anto efula watshɔ lɛnɛ ewɔ l’ohomba efula mɛnaka wolo wele la dɔmbɛlɔ. Tɔshi ɛnyɛlɔ ka Jumpei la  wadɛnde Nao, vɔ tshɛ wekɔ l’ɛnɔnyi 30 l’ɛmɔtshi. Vɔ wakakambaka l’etshumanelo ka l’ɔtɛkɛta w’akanga a mpoke la Japon. Lande na kakawonɔ la Myanmar? Jumpei mbutaka ate: “Dimi la wadɛmi takayadjɛ oyango dia tokamba lɛnɛ ewɔ l’ohomba efula lo wodja okina. Ɔnangɛso ɔmɔtshi la l’etshumanelo kaso ka l’ɔtɛkɛta w’akanga a mpoke ka la Japon akonɔ la Myanmar. Kaanga mbakiso paka la yema ya falanga tshitshɛ yakatombe, lo Ngɔndɔ ka tanu 2010 sho lawɔ takonɔ. Anangɛso l’akadiyɛso wa la Myanmar wakatolongola dimɛna efula!” Ngande wayaokande dikambo di’esambishelo ka l’ɔtɛkɛta w’akanga a mpoke ka la Myanmar? “Anto efula wekɔ lo mɛnya nsaki. Etena kɛnyaso tovidɛo ta l’ɔtɛkɛta w’akanga a mpoke, apokami aso w’akanga a mpoke mambaka. Tekɔ l’ɔngɛnɔngɛnɔ w’efula l’ɔtɛ wa yɛdikɔ yakatɔshi dia ndja ndjokambɛ Jehowa lanɛ!”

Ngande wakakotsha Jumpei la Nao ehomba awɔ wendana la falanga? Jumpei mbutaka ate: “L’ɔkɔngɔ w’ɛnɔnyi esato, takakambe la falanga yakatombe suke la tshɛ ndo sho komonga la falanga efula ya mfuta luudu ɔnɔnyi okina. Dimi la wadɛmi takasale alɔmbɛlɔ efula w’oma k’ɛse otema. Aha la sho nongamɛ, wakatotomɛ mukanda oma lo filialɛ dia sho nkamba oko ambatshi mboka wa laande lo tshanda mɔtshi. Takayaɛkɛ le Jehowa ndo takɛnyi dia nde kotokalɛ. Nde akatokokɛka lo toho tshɛ.” Atete edja, Jumpei la Nao wakɔtɔ Kalasa k’esambisha wa Diolelo.

Kakɔna kakatshutshuya Simone, ɔnangɛso l’ose Italie, lele l’ɛnɔnyi 43 la wadɛnde Anna, kadiyɛso k’ose Nouvelle-Zélande kele l’ɛnɔnyi 37 dia monɔ la Myanmar? Anna mbutaka ate: “Ɔkɔndɔ wa lo Annuaire 2013 wendana la Myanmar mbakatotshutshuya!” Simone mbutaka ate: “Ekɔ diɛsɛ dia laande dia monga la Myanmar. Lɔsɛnɔ bu wolo lanɛ, ndo dimi koka nkamba wenya efula l’olimu wa Jehowa. Ekɔ dui di’ɔngɛnɔngɛnɔ dia mɛna woho watokokɛ Jehowa etena kakambaso l’ɛtshi ka nkɛtɛ kewɔ l’ohomba efula.” (Os. 121:5) Anna mbutaka ate: “Talongaka l’ɔngɛnɔngɛnɔ wa ngasɔ. Tekɔ la lɔsɛnɔ l’ɔsɛlɛngɛ. Taya la wenya efula wa nsawola dimi l’omɛmi ndo tamboleka monga kaamɛ. Ndo nto, tambokondja angɛnyi w’eshika. Anto hawokanɛ Ɛmɛnyi wa Jehowa kɔlɔ ndo woho wɛnya anto wasambiso nsaki ekɔ dui dia diambo efula!” Lo tohotakɔna?

Anna mbutaka ate: “Lushi lɔmɔtshi lakasambisha ombeki ɔmɔtshi wa l’inivɛrsite lo lobingu ndo takokana dia dimi ndjɛnana la nde nto. Etena kakamatshu towenda, nde akaye l’ɔngɛnyi ande ɔmɔtshi. Mbala kekina, nde akaye l’anto akina. Oma laasɔ nde akaye l’anto akina efula. L’etena kɛnɛ lekɔ lo mbeka la atanu l’atei awɔ.” Simone mbutaka ate: “Anto wa l’ɛtshi ka nkɛtɛ kɛsɔ wekɔ oko angɛnyi ndo nangaka mbeya awui efula. Efula kawɔ mɛnyaka nsaki. Dikambo ɔtɔi ko sho bu la wenya efula wa membola wanɛ tshɛ wɛnya nsaki.”

Ko awui akɔna shikaa wahomba onto nsala dia mbɔsa yɛdikɔ ya monɔ la Myanmar? Kadiyɛso Mizuho k’ose Japon mbutaka ate: “Mbala tshɛ dimi l’omɛmi Sachio takalangaka tokamba lo wodja wewɔ l’ohomba efula, ko lende akatahombe ntshɔ? L’ɔkɔngɔ wa  sho mbadia ɔkɔndɔ wendana la Myanmar lo Annuaire 2013, takanandema efula oma lo awui w’amɛna wakahomana l’anto wakatɛkɛtama lɔkɔ, ko takatatɛ nkanyiya dia kana tayokoka tokamba la Myanmar.” Sachio kotshaka ate: “Takɔshi yɛdikɔ ya ntshɔ lomingu ɔtɔi dia tembola Rangoun, osomba woleki woke la Myanmar dia tokembola nkɛtɛ. Wembwelo waki kɔmbɔsa nshi efula ɔsɔ akatoshikikɛ dia takahombe monɔ lanɛ.”

Rodney nde la wadɛnde Jane ase Australie, vɔ tshɛ wekɔ l’ɛnɔnyi 50 l’ɛmɔtshi ndo Jordan ɔnawɔ la pami la Danica ɔnawɔ la womoto wekɔ lo nkamba la Myanmar lɛnɛ ewɔ l’ohomba efula oma ko 2010. Rodney mbutaka ate: “Kɛnɛ kakaleke totshutshuya ele woho wele anto la ndjala k’akambo wa lo nyuma. Dimi nɔmbaka nkumbo kina dia vɔ nsala la wolo dia tokamba lo dihole diele oko la Myanmar.” Lande na? “Ndooko dui diakokaso mbɛdika la kɛnɛ kambosalɛ dui sɔ nkumbo kaso lo nyuma! Ɛlɔngɔlɔngɔ l’esekaseka efula wekɔ lo ndjasha tshɛ lo telefɔnɛ yawɔ, mituka, elimu ndo awui akina. Koko anaso wekɔ lo ndjasha tshɛ dia mbeka tɔtɛkɛta t’eyoyo tahombawɔ tokamba la tɔ l’esambishelo. Vɔ salaka la wolo dia mbeka woho wa nkana yimba l’anto waheye Bible ndo woho wa mbisha okadimwelo lo nsanganya ya l’etshumanelo ka lo dihole dieso ndo vɔ ndjashaka tshɛ l’akambo akina efula w’amɛna wa lo nyuma.”

Oliver, ɔnangɛso l’ose États-Unis lele l’ɛnɔnyi 37 nembetshiyaka lande na kakeketshande anto akina dia nkamba olimu ɔsɔ lo mbuta ɔnɛ: “Kambɛ Jehowa lo dihole diahamaleke mbeya ambokondjiyɛ ɛtshɔkɔ efula. Woho wakamonɔ oma lakaso ambokimanyiya dia ndjaɛkɛ le Jehowa oyadi la ntondo ka dui diakɔna diakoka pomana la mi. Nkamba kaamɛ l’anto wakimi kombeyaka ntondo koko wele la dietawɔ diele la mi, ambokimanyiya mɛtɛ dia mɛna ɔnɛ ndooko dui dia l’andja ɔnɛ diakoka mbɛdima la Diolelo dia Nzambi ohomba.” Ɛlɔ kɛnɛ Oliver la wadɛnde Anna, wekɔ lo ntetemala nkamba l’ohetoheto l’ɛtshi ka nkɛtɛ katɛkɛtawɔ Chinois.

Trazel, kadiyɛso k’ose Australie kele l’ɛnɔnyi 52 ekɔ lo nkamba la Myanmar oma ko 2004. Nde mbutaka ate: “Dimi nɔmbaka wanɛ wele la diaaso dia ntshɔ tokamba lɛnɛ ewɔ l’ohomba efula. Lamboshihodia dia naka wɛ ekɔ la nsaki ka nkamba, kete Jehowa ayɔtshɔkɔla welo ayɛ. Dimi kɔfɔnyaka dia layɔsɛna yoho nyɛ. Ɔsɔ ekɔ lɔsɛnɔ loleki dimɛna ndo l’ɔngɛnɔngɛnɔ lakimi kɔfɔnyaka dia layonga la lɔ.”

Ɛtɛkɛta w’oma k’ɛse otema wa wanɛ wakamba lɛnɛ ewɔ l’ohomba efula la Myanmar ɛsɔ wakokeketsha dia nkanyiya dia tokimanyiya anto w’etema ɛlɔlɔ wele lo bɛtshi dia nkɛtɛ diahawatasambishaka. Lo mɛtɛ, wanɛ wakamba lɛnɛ ewɔ l’ohomba efula wekɔ lo kelɛ lo mbuta ɔnɛ: “Lam’alangɛ, yaka lendo la Myanmar kele yotokimanyiya!”