1. Losango lakɔna lakewoya omvutshi Isaya asekande ase Isariyɛlɛ?

 OMVUTSHI Isaya akate dia Jehowa ekɔ “Nzambi k’akambo wa mɛtɛ.” Tshɛkɛta yakakadimɔma ɔnɛ “akambo wa mɛtɛ” nembetshiyaka tshɛkɛta lo tshɛkɛta ɔnɛ “aamɛɛ.” (Isa. 65:​16, nɔtɛ.) “Aamɛɛ” nembetshiyaka “ayale ɔsɔku,” kana “ndooko onyake ayokotshama.” Etena kakambema tshɛkɛta “aamɛɛ” lo Bible lo dikambo dia Jehowa kana dia Yeso, dui sɔ toshikikɛka ɔnɛ dui sɔ diekɔ mɛtɛ. Losango laki Isaya otsha le asekande ase Isariyɛlɛ lakokɛma hwe ɔnɛ: Kɛnɛ tshɛ kokotaka Jehowa kokongaka nshi tshɛ mɛtɛ. Jehowa mɛnyaka mɛtɛ ka dui sɔ lo nkotsha oseka daka diande tshɛ.

2. Lande na kakokaso ndjaɛkɛ l’alaka wa Jehowa wendana la nshi yaso yayaye ndo ambola akɔna wayotɔsɛdingola?

² Onde hatokoke ndjaɛkɛ woho akɔ waamɛ l’alaka wa Jehowa watolakande lo nshi yayaye? Suke l’ɛnɔnyi 800 mbeta l’ɔkɔngɔ wa nshi ya Isaya, ɔpɔstɔlɔ Pɔɔlɔ akalembetshiya hwe lande na kakokaso monga l’eshikikelo di’alaka waki Nzambi wayongaka nshi tshɛ mɛtɛ. Pɔɔlɔ akate ate: “Nzambi hakoke pondjo mbuta kashi.” (Hɛb. 6:18) Paka oko wahatokokaka ɛtɛkɔ kɛmɔtshi k’ashi ntondja ashi w’amɛna ndo ashi wa lɛɛhɔ, mbele Jehowa lele Kiɔkɔ y’akambo wa mɛtɛ hakoke mbuta kashi. Sho koka ndjaɛkɛ tshɛ lo tshɛ lo kɛnɛ kata Jehowa, mbidja ndo alaka ande tshɛ wendana la nshi yaso yayaye. Lo sawo nɛ, tayɔsɛdingola ambola anɛ: Kakɔna katolaka Jehowa dia tosha lo nshi  yayaye? Ndo ngande watoshikikɛ Jehowa dia daka diande diayokotshama?

3. a) Naa daka dia dimɛna dialanga ekambi wa Nzambi? (Ɛnyɛlɔ 21:​3, 4) b) Ngande wasala anto amɔtshi etena kawatɛso awui wendana l’alaka asɔ?

³ Daka nɛ diayangaso nsɛdingola diekɔ ohomba efula le ekambi wa Nzambi wa l’andja w’otondo. (Adia Ɛnyɛlɔ 21:​3, 4.) Jehowa ndakaka dia ekɔ etena kɛmɔtshi kele “nyɔi hatoyala nto, otanda hatoyala nto, delo hatoyala nto, kaanga kandji hatoyala nto.” Efula ka l’atei aso kambaka l’avɛsa wakeketsha asɔ dia nsamba anto wasambishaso ndo mbowaɛnya woho wayoyala lɔsɛnɔ lo paradiso. Ngande wasala anto amɔtshi etena kawatɛso daka sɔ? Efula mbeyaka mbuta ɔnɛ: “Akambo asɔ wekɔ amɛna efula, koko hafɔnya dia vɔ wayokoka kotshama.”

4. a) Etena kakalake Jehowa daka diande dia paradiso, kakɔna kakandeyaka kayohomba salema lo nshi yaso nyɛ? b) Laadiko dia mbisha daka, kakɔna kakasale Jehowa nto?

⁴ Lo mɛtɛ, etena kakandasambiyɛ ɔpɔstɔlɔ Joani dia mfunda daka dia lɔsɛnɔ la lo paradiso, Jehowa akeyaka dia ɛlɔ kɛnɛ tayotɛ anto akina dikambo di’elongamelo kɛsɔ, etena kasambishaso losango la Diolelo. Ndo nto, Jehowa akeyaka dia ayonga wolo le anto efula dia mbetawɔ dia etshikitanu ɛsɔ wayosalema lo nshi yayaye. (Isa. 42:9; 60:2; 2 Kɔr. 4:​3, 4) Ko ngande wakokaso ndjashikikɛ ndo nshikikɛ anto akina dia ɛtshɔkɔ wɔtɛkɛtami lo Ɛnyɛlɔ 21:​3, 4 wayokotshama? Jehowa kokomɛ tsho lo mbisha daka dia nkeketsha, koko ndo ɛkɔkɔ watoshikikɛ dia sho koka ndjaɛkɛ lo daka diakɔ. Naa ɛkɔkɔ akɔ?

5. Ɛkɔkɔ akɔna wele la so wa ndjaɛkɛ lo daka dia Nzambi diendana la paradiso ndo lende awatanaso?

⁵ Sho tanaka ɛkɔkɔ wa ndjaɛkɛ lo daka dia Jehowa dia paradiso lo avɛsa wayela. Lɔkɔ sho mbadiaka ɔnɛ: “Ko Ɔnɛ lakadjasɛ lo kiti ka lowandji akate ate: ‘Eenda! dimi leetɛ diangɔ tshɛ eyoyo.’ Nde akate nto ate: ‘Funda, nɛ dia ɛtɛkɛta ɛnɛ wekɔ wa kɔlamelo ndo mɛtɛ.’ Ko nde akambutɛ ate: ‘Vɔ wambokotshama! Dimi kele Alfa la Omega, etatelo la ekomelo.’”—Ɛny. 21:​5, 6a.

6. Lande na kele eshikikelo katanaso l’Ɛnyɛlɔ 21:​5, 6 keketshaka wɛkamu aso lo daka dia Nzambi?

⁶ Lande na kakeketsha avɛsa wa lo Bible asɔ wɛkamu aso lo daka dia Nzambi? Dibuku Révélation: dénouement mbutaka lo dikambo dia avɛsa asɔ ɔnɛ: “Ekɔ oko Jehowa ndamɛ akadje sinyatirɛ lo mukanda dia nshikikɛ anto wa kɔlamelo, kana mbasha djembetelo yawasha lotshungɔ la vɔ ndjashikikɛ ɔnɛ ɛtshɔkɔ wa lo nshi yayaye wayokotshama.” b Daka diaki Nzambi fundama lo Ɛnyɛlɔ 21:​3, 4. Koko oma laasɔ, lo divɛsa dia 5 ndo 6, Jehowa kotshaka sinyatirɛ yande dia toshikikɛ dia kɛnɛ kakandalake kayokotshama ndooko onyake. Nyɛsɔ tende la yambalo tshɛ kɛnɛ katoshikikɛ Jehowa dia sho koka ndjaɛkɛ le nde.

7. Atatɛ ntɛkɛta lo divɛsa dia 5 ndo lande na kele dui sɔ diekɔ dui dia laande?

⁷ Eshikikelo ka Nzambi tatɛka la mbɔtwɛlɔ kɛnɛ: “Ko Ɔnɛ lakadjasɛ lo kiti ka lowandji akate ate.” (Ɛny. 21:5a) Ɛtɛkɛta ɛsɔ wekɔ ɛtɛkɛta wa laande nɛ dia ɔnɛ ekɔ paka mbala ɔtɔi lo mbala shato yatanema lo dibuku dia Ɛnyɛlɔ diele Jehowa ndamɛ mbatɛkɛta. Ɔnkɔnɛ, eshikikelo kɛsɔ kombishama oma le ondjelo ɔmɔtshi wa wolo, kana oma le Yeso lakolwama, koko oma le Jehowa ndamɛ! Dui dia mɛtɛ sɔ mbikaka epole ɔsɛkɛ lo ɛtɛkɛta wayela. Lande na kediɔ ngasɔ? Nɛ dia Jehowa “hakoke mbuta kashi.” (Tito 1:2) Ɔnkɔnɛ, ɛtɛkɛta wa lo Ɛnyɛlɔ 21:​5, 6 wayokotshama ndooko onyake.

8. Kakɔna kakatɔtɔmiya Jehowa mɛtɛ dia mɛnya dia daka diande diayokotshama? (Isaya 46:10)

⁸ Oma laasɔ, nyɛsɔ tɔsɛdingole tshɛkɛta “Eenda!” (Ɛny. 21:5) Etelo ka lo Grɛkɛ kakakadimɔma ɔnɛ “eenda!” kambemaka mbala efula lo dibuku dia Ɛnyɛlɔ. Dibuku dimɔtshi mbutaka dia etelo kɛnɛ kakakambema oko “yoho mɔtshi ya nkotola yambalo y’ambadi lo dui dimɔtshi diayela.” Kakɔna kakate Nzambi oma laasɔ? Nzambi akate ɔnɛ: “Dimi leetɛ diangɔ tshɛ eyoyo.” Lo mɛtɛ, Jehowa ekɔ lo ntɛkɛta dikambo di’etshikitanu wa lo nshi yayaye, koko le nde daka sɔ diayokotshama mɛtɛ, diakɔ diatɛkɛtande di’etshikitanu ɛsɔ oko wate kana wamboshilaka la kotshama.—Adia Isaya 46:10.

9. a) Etelo k’ɔnɛ “leetɛ diangɔ tshɛ eyoyo” mendanaka l’elimu akɔna ehende wa Jehowa? b) Kakɔna kayokomɛ “olongo” ndo “nkɛtɛ” nyɛ?

⁹ Nyɛsɔ tɔsɛdingole etelo kayela katanaso lo Ɛnyɛlɔ 21:5 kata ɔnɛ: “Dimi leetɛ diangɔ tshɛ eyoyo.” Kakɔna kalanga nembetshiya dui sɔ? Lo tshapita ya lo Bible nyɛ, etelo kɛsɔ mbelaka kanyi y’elimu ehende wakamba Jehowa, mbuta ate mpɛnya ndo nɔngɔsɔla. Ntondotondo, kakɔna kayɔhɛnya Jehowa? Sho mbadiaka lo Ɛnyɛlɔ 21:1 ɔnɛ: “Olongo w’edjedja la nkɛtɛ k’edjedja wakashishɔ.” “Olongo w’edjedja” nembetshiyaka mandji ya pɔlitikɛ ya l’andja ɔnɛ ya sɛngiyama oma le Satana l’ɛdiɛngɛ ande. (Mat. 4:​8, 9; 1 Jni. 5:19) Oko wokambimidiɔ lo Bible, “nkɛtɛ” koka nembetshiya anto wadjasɛ lɔkɔ. (Eta. 11:1; Os. 96:1) Oma laasɔ, “nkɛtɛ k’edjedja” nembetshiyaka anto wa kɔlɔ wa lo tshunda di’ana w’anto. Jehowa hɔlɔngɔsɔla kana nshikikɛ “olongo” ndo “nkɛtɛ” nyɛ; koko, ayowalanya lo mbahɛnya l’olongo w’oyoyo ndo la nkɛtɛ k’oyoyo. Nde ayɔhɛnya olongo wa nshi nyɛ ndo nkɛtɛ ka nshi nyɛ la “olongo w’oyoyo” ndo la “nkɛtɛ k’oyoyo,” mbuta ate lowandji l’oyoyo ndo tshunda di’anto di’oyoyo.

10. Kakɔna kayetɛ Jehowa oyoyo?

¹⁰ Lo Ɛnyɛlɔ 21:​5, sho mbadiaka nto kɛnɛ kata Jehowa lo dikambo dia diangɔ diayondetɛ eyoyo. Lembetɛ dia Jehowa hate ɔnɛ: “Dimi lekɔ lo teetɛ diangɔ tshɛ eyoyo.” Koko lo dihole dia nde mbuta ngasɔ, nde ekɔ lo mbuta ɔnɛ: “Dimi leetɛ diangɔ tshɛ eyoyo.” Lo yoho kina yakɔna yayetɛ Jehowa diangɔ tshɛ eyoyo? (Ɛny. 21:5) Jehowa ayɔkɔnɔla nkɛtɛ ndo anto wodjashi lɔkɔ dia vɔ nkoma kokele. Oko wakatatshi Isaya, Jehowa ayetɛ nkɛtɛ k’otondo dihole dia dimɛna di’olangala efula diele oko ekambɔ k’Ɛdɛna. Ndo nde ayotetɛ eyoyo lo nkɔnɔla onto tshɛ la l’atei aso. Akanga wa tshumbe, akanga wa totshungu ndo akanga wa mpoke wayɔkɔnɔ ndo kaanga edo wayolɔ.—Isa. 25:8; 35:​1-7.

11. Kakɔna kakatɛ Jehowa Joani dia nsala ndo lande na?

¹¹ Kakɔna nto kakate Nzambi katoshikikɛ dia sho koka ndjaɛkɛ le nde? Jehowa akatɛ Joani ate: “Funda, nɛ dia ɛtɛkɛta ɛnɛ wekɔ wa kɔlamelo ndo mɛtɛ.” (Ɛny. 21:5) Jehowa akawotɛ awui efula koko aha tsho didjango dia “funda.” Nde akawosha nto ɔkɔkɔ. Nde akate ate: “Nɛ dia ɛtɛkɛta ɛnɛ wekɔ wa kɔlamelo ndo mɛtɛ,” mbuta ate sho pombaka mbɛkɛ ɛtɛkɛta waki Nzambi ɛsɔ otema ndo wekɔ mɛtɛ. Tekɔ la lowando l’efula lo woho wakakitanyiya Joani didjango diata ɔnɛ “funda.” Etombelo wele la dui sɔ ele, sho tokoka mbadia awui wendana la daka dia Jehowa diendana la paradiso ndo nkana yimba l’ɛtshɔkɔ wa diambo watokongɛ.

12. Lande na kakate Jehowa ɔnɛ: “Vɔ wambokotshama!”

¹² Kakɔna kata Nzambi nto? “Vɔ wambokotshama!” (Ɛny. 21:6) Kakianɛ Jehowa ekɔ lo ntɛkɛta watekana awui tshɛ wakatatɛkɛtshi wendana  la paradiso wamboshilaka lakotshama. Ndo nde koka ntɛkɛta lo yoho shɔ nɛ dia ndooko ɛngɔ kakoka mboshimba dia nkotsha sangwelo diande. Oma laasɔ, Jehowa mbutaka dui dimɔtshi nto diatoshikikɛ ɔnɛ daka diande diayokotshama tshɛ lo tshɛ. Naa eshikikelo kakɔ?

13. Lande na kakate Jehowa ɔnɛ: “Dimi kele Alfa la Omega”?

¹³ Oko wakadiatami oma l’etatelo, Jehowa ndamɛ akatɛkɛta ntena sato lo waɛnɛlɔ wakɛnyi Joani. (Ɛny. 1:8; 21:​5, 6; 22:13) Lo diaaso tshɛ l’atei wa waaso asɔ, Jehowa akate ɛtɛkɛta akɔ waamɛ ɔnɛ: “Dimi kele Alfa la Omega.” Dɛta Alfa mbotate lo alfabɛtɛ wa lo Grɛkɛ ndo dɛta Omega mbokome. Lo nkamba la etelo ka “Alfa la Omega,” Jehowa mɛnyaka dia etena katatɛnde dui dimɔtshi, nde tshɔka la diɔ polo ambodishidiya.

14. a) Sha ɛnyɛlɔ ka etena kakate Jehowa “Alfa” ndo etena kayondota lo yoho mɔtshi ɔnɛ “Omega.” b) Naa eshikikelo katanaso l’Etatelo 2:​1-3?

¹⁴ L’ɔkɔngɔ wa Jehowa ntonga Adama la Eva, Nde akawatɛ sangwelo diande dia l’etatelo lo dikambo di’anto ndo dia nkɛtɛ. Bible mbutaka ɔnɛ: “Nzambi akaatshɔkɔla ndo Nzambi akawatɛ ate: ‘Nyootane, nyofulane, nyolodia nkɛtɛ ndo nyoyiole.’” (Eta. 1:28) L’etena kɛsɔ, lo mɛtɛ Jehowa akate “Alfa.” Nde akɛnya hwe sangwelo diande ɔnɛ: Etena kayokoka kele tokanula taki Adama la Eva ta kokele, tayonga l’akoka wa ndodia nkɛtɛ ndo kietɛ paradiso. Etena kayaye kɛsɔ, Jehowa ayota lo yoho mɔtshi ɔnɛ “Omega.” L’ɔkɔngɔ wa nshidiya ntonga “olongo la nkɛtɛ ndo diangɔ tshɛ diele lɔkɔ,” Jehowa akate dui dimɔtshi diatoshikikɛ ɔnɛ sangwelo diande diayokotshama ndooko onyake. Dui sɔ tanemaka lo Etatelo 2:​1-3. (Adia.) Jehowa akatshike lushi l’esambele oko lushi l’ekila dikambo diande. Kakɔna kalembetshiya  dui sɔ? Jehowa akatoshikikɛ dia nde ayokotsha sangwelo diande lo dikambo di’anto ndo dia nkɛtɛ. Diɔ diayokotshama tshɛ lo tshɛ l’ekomelo ka lushi l’esambele.

15. Lande na ondo kakafɔnyaka Satana diele oko nde ekɔ l’akoka wa nshimba diaha sangwelo dia Nzambi kotshama?

¹⁵ L’ɔkɔngɔ wa Adama l’Eva ntɔmbɔkɔ, vɔ wakakome atshi wa pɛkato ndo wakasambiyɛ tokanula tawɔ pɛkato ndo nyɔi. (Rɔmɔ 5:12) Etombelo wambonga la dui sɔ ele, akayɛnamaka diele oko Satana akadje taamu dia Nzambi hakoke ndodia nkɛtɛ l’anto wele kokele ndo wele l’okitanyiya. Dui sɔ diakayɛnamaka diele oko Satana ekɔ lo mbidjɛ Jehowa wekamu diaha nde mbuta “Omega.” Ondo Satana akafɔnya dia Nzambi hayokoka nkotsha sangwelo diande. Ondo nde akafɔnya dia Nzambi ayodiaka Adama l’Eva ko ntonga atshukanyi akina wa kokele dia nkotsha sangwelo Diande lo dikambo di’anto. Koko otondongaka Nzambi akasale ngasɔ, Diabolo otokoka mbuta dia Nzambi ekɔ kanga kashi. Lande na? Nɛ dia oko wofundamidiɔ l’Etatelo 1:​28, Jehowa akatɛ Adama l’Eva dia tokanula tawɔ mbayohomba ndodia nkɛtɛ.

16. Lande na ondo kakafɔnyaka Satana dia nde koka mbuta dia Jehowa ambokita tatala?

¹⁶ Yɛdikɔ yakɔna kina ondo yakafɔnyaka Satana yakahombe Nzambi mbɔsa? Ondo Satana akafɔnya dia Jehowa ayetawɔ dia Adama l’Eva mbota ana wele hawokomaki pondjo kokele. (Ond. 7:20; Rɔmɔ 3:23) Lo dikambo sɔ, ondo Diabolo otofuna dia Jehowa hatondoyisha. Lande na? Nɛ dia yɛdikɔ shɔ takayakoke nkotsha sangwelo dia Nzambi, mbuta ate ndodia paradiso ka la nkɛtɛ la tokanula ta Adama l’Eva ta kokele ndo tele l’okitanyiya.

17. Ngande wakasale Jehowa dia nkandola ɔtɔmbɔkwɛlɔ wa Satana ndo w’anto wa ntondo ndo etombelo akɔna wayonga l’ekomelo? (Enda ndo osato.)

¹⁷ Jehowa akakandola ɔtɔmbɔkwɛlɔ wa Satana ndo w’anto wa ntondo lo yoho yakahombe mambiya Satana. (Os. 92:5) Lo dihole dia nde mɛnya dia nde ekɔ kanga kashi, Jehowa akɛnya dia nde ekɔ onto lata mɛtɛ lo mbetawɔ dia Adama l’Eva mbota ana. Ndo lo dihole dia nde mɛnya dia nde hatondoyisha, Jehowa akɛnya dia nde akatondoya. Nde akayashikikɛ dia sangwelo diande diayokotshama lo ntondja “kanula” yakahombe ndjoshimbɛ tokanula ta Adama l’Eva tele l’okitanyiya. (Eta. 3:15; 22:18) Satana akahombe mamba efula lo yɛdikɔ yakɔshi Jehowa yendana l’oshinga w’etshungwelo! Lande na? Nɛ dia ɔsɔ aki yɛdikɔ yakahikama lo ngandji ka ndjahondja. (Mat. 20:28;  Jni. 3:16) Satana bu la dionga sɔ. Nde ekɔ kanga lokaki. Ko laasɔ, kakɔna kayosalema l’ɔtɛ wa yɛdikɔ yendana l’oshinga w’etshungwelo? L’ekomelo k’ɛnɔnyi kinunu, tokanula taki Adama l’Eva ta kokele tayɔsɛna lo paradiso ka la nkɛtɛ oko waki sangwelo dia Jehowa dia l’etatelo. L’etena kɛsɔ, Jehowa ayota lo yoho mɔtshi ɔnɛ “Omega.”

18. Naa dishikikelo sato diatosha Nzambi? (Enda nto kiombo yele l’ɔtɛ a dui ɔnɛ: “ Ɛkɔkɔ esato wa ndjaɛkɛ lo daka dia Jehowa.”)

¹⁸ Lo menda kɛnɛ kambotɔsɛdingola, eshikikelo kakɔna kakokaso mbisha wanɛ wadja taamu ɔnɛ daka diaki Nzambi lo dikambo dia paradiso diayokotshama? Ntondotondo, Jehowa ndamɛ mbakalake daka diakɔ. Dibuku dia Ɛnyɛlɔ mbutaka ɔnɛ: “Ko Ɔnɛ lakadjasɛ lo kiti ka lowandji akate ate: ‘Eenda! dimi leetɛ diangɔ tshɛ eyoyo.’” Nde ekɔ la lomba la wolo ndo la nsaki ka nkotsha daka diande. Dui dia hende, ekotshamelo ka daka diande ekɔ dui dia mɛtɛ, nɛ dia lo ndjela kanyi ya Jehowa, diɔ diamboshilaka la kotshama. Diakɔ diatande ɔnɛ: “Ɛtɛkɛta ɛnɛ wekɔ wa kɔlamelo ndo mɛtɛ. . . . Vɔ wambokotshama!” Dui dia sato, etena katatɛ Jehowa dui dimɔtshi, nde tshɔka ladiɔ polo ambodishidiya, oko washikikɛ ɛtɛkɛta w’ɔnɛ: “Dimi kele Alfa la Omega.” Jehowa ayɛnya dia Satana ekɔ kanga kashi ndo ambokita tatala.

19. Etena kele anto efula l’okakatanu wa mbetawɔ ɔnɛ daka dia Nzambi diendana la paradiso diayokotshama, kakɔna kahombayɛ nsala?

¹⁹ Ohɔka dia etena katɛyɛ anto akina kɛnɛ kakate Jehowa dia toshikikɛ dia alaka ande wayokotshama, wɛ keketshaka wɛkamu ayɛ hita l’alaka wa Jehowa. Laasɔ, mbala kekina kayoyadia ɛtɛkɛta wakeketsha ɛsɔ wendana la paradiso kayaye oko wɔtɛkɛtamidiɔ lo Ɛnyɛlɔ 21:4 ko onto ɔmɔtshi ambota ɔnɛ: “Dui sɔ diekɔ dimɛna efula, koko diɔ mɛnamaka dia diɔ hadiotokotshama,” kakɔna kayoyohomba nsala? Lande na kahayawadiyɛ ndo mbolembetshiya divɛsa dia 5 la dia 6? Ɛnyande woho wakashikikɛ Jehowa daka diande, lo mbidja sinyatirɛ lɔkɔ watekana oko sinyatirɛ yande hita.—Isa. 65:16.