Lakotɔ lo 1948 lo ngielongelo mɔtshi ya lo sidɛ ɛstɛ ka la Nigéria. L’etena kɛsɔ, Moustapha, kosɛki papa ndo oma laasɔ Wahabi, w’enondo ami, akabatizama oko Ɔmɛnyi wa Jehowa. Papa akavu etena kakimi l’ɛnɔnyi divwa. Otema ami wakakɔmɔ tshɛ. Wahabi akambutɛ dia tayokoka ndjɛnana la papa nto lo eolwelo. Kanyi yakeketsha shɔ yakatshutshuya dia dimi mbeka Bible. Lakalongola batisimu lo 1963. Analengo akina asato vɔ la wɔ nto wakabatizama.

Lo 1965, lakayele Wilson w’enondo ami la Lagos ndo lakangɛnangɛnaka diɔtɔnganelo diakimi kaamɛ l’ambatshi mboka akina waki l’etshumanelo ka Igbobi. Ɔngɛnɔngɛngɔ ndo ohetoheto waki lawɔ wakatshutshuya ndo dimi lawɔ, lo Ngɔndɔ ka ntondo 1968, lakayokoma ombatshi mboka oko vɔ.

Ɔnangɛso ɔmɔtshi lakakambaka lo Bɛtɛlɛ, lakawelɛka Albert Olugbebi, akakongɛ losanganya lɔmɔtshi la laande kaamɛ la so sho ɛlɔngɔlɔngɔ, losanganya lɔsɔ lakendanaka l’ohomba w’ambatshi mboka wa laande lo nɔrdɛ ka Nigéria. Lakatetemala mbohɔ ɛtɛkɛta wa la waasaso tshɛ w’ɔnangɛso Olugbebi w’ɔnɛ: “Wɛ ekɔ ɔlɔngɔlɔngɔ, ndo wɛ koka nkamba la wenya ayɛ ndo wolo ayɛ lo dikambo dia Jehowa. Ekambɔ kambokodihwɛ!” Laka lomɔlomɔ dia mbokoya yimba ya ndjakimɔ la lolango yaki la omvutshi Isaya, ko lakalodia dɛmandɛ.—Isa. 6:8.

 Lo Ngɔndɔ ka tanu 1968, wakatome oko ombatshi mboka wa laande l’osomba wa Kano, lo nɔrdɛ ka Nigéria. Dui sɔ diakasalema etena kakalɔmaka ta dia Biafran, ta diakaviya oma lo 1967 polo 1970, ta sɔ diakalanya ɛtshi ka nkɛtɛ kɛsɔ la ntondo ka diɔ ndjotetemala otsha lo ɛstɛ ka Nigéria. Ɔnangɛso ɔmɔtshi akahembe tshutshuyami diaha dimi ntshɔ lɛkɔ. Koko lakawotɛ nte: “Losaka lo woho wayakiyanyayɛ lo dikambo diami. Koko, naka Jehowa kombolaka dia dimi tookambɛ lɛkɔ, aha la taamu nde ayonga kaamɛ la mi.”

Awui wakalana lo yɛdikɔ y’efula la Kano. Ta dia lam’asa ase ngelo sɔ diakalanya osomba wa woke ɔsɔ lo yɛdikɔ y’efula. Ntena efula etena kakiso l’esambishelo, takɛnaka edo wa wanɛ wakadiakemaka lo ta sɔ. Kaanga mbaki tshumanelo efula la Kano, suke l’anangɛso efula wakalawɔ. Apandjudi l’ɛse ka 15 ato mbakatshikala, ndo vɔ waki la wɔma w’efula ndo wakakɔmɔ. Anangɛso l’akadiyɛso asɔ waki l’ɔngɛnɔngɛnɔ w’efula etena kakakome ambatshi mboka wa laande asamalo wa l’atei aso. Takakeketsha apandjudi asɔ ndo vɔ wakakeketshama. Takaakimanyiya dia vɔ nyomokalolɛ mbekelo yawɔ ya lo nyuma ndo nyomotatɛ ntoma alapɔlɔ ndo nkalolɛ mbekelo ka nɔmbaka ekanda oma le filialɛ.

Sho ambatshi mboka wa laande takatatɛ mbeka ɔtɛkɛta wa Hausa. Etena kakawoke losango la Diolelo l’ɔtɛkɛta awɔ wa lootɔ, ase ngelo efula wakatohokamɛ. Koko, ase ɔtɛmwɛlɔ ɔmɔtshi wakalekaka mbeyama lo ngelo kɛsɔ kɔngɛnangɛnaka olimu aso w’esambishelo, laasɔ takahombe monga la yewo y’efula. Lo diaaso dimɔtshi, pami kɛmɔtshi kaki la lokuwa akatatotshanyaka dimi l’osekami. Koko takoleke lowango ndo nde komonga l’akoka wa tonda! Kaanga mbakatahomana la waale ɛsɔ, Jehowa ‘akatodjashiya lo lotui tshitshi,’ ndo lofulo l’apandjudi lakatatɛ mbidɛ. (Os. 4:8) Ɛlɔ kɛnɛ, ndekana apandjudi 500 wekɔ lo nkamba lo tshumanelo 11 dia la Kano.

L’ekomelo ka Ngɔndɔ k’enanɛi 1968, l’ɔkɔngɔ wa sho mbetsha ngɔndɔ ngana tsho la Kano, wakatome la Niamey, kapitalɛ ka République de Niger, kaamɛ l’ambatshi mboka akina ahende wa laande. Yema tshitshɛ l’ɔkɔngɔ wa sho nkoma la  Niger lo Afrikɛ wa lo owɛstɛ, takashola dia ekɔ dihole dimɔtshi lo ahole wa lanɛ la nkɛtɛ wele dungu efula. Laadiko dia ndɔshana la yanyi y’efula ya lɛkɔ, takahombe nto mbeka ɔtɛkɛta watɛkɛtama lɛkɔ, mbuta ate Falase. Kaanga mbaki ekakatanu ɛsɔ, takayaɛkɛ le Jehowa ndo takatatɛ nsambisha lo kapitalɛ kaamɛ l’apandjudi angana wakadjasɛka lɛkɔ. L’etena ka tshitshɛ keto, onto tshɛ lakadjasɛka la Niamey lakeyaka mbadia akalongola kɔpi kɛmɔtshi ka dibuku diakatekaka l’anto Bible dia La vérité qui conduit à la vie éternelle. Anto wakayaka le so dia ndjoyanga dibuku dimɔtshi!

Atete edja, lakashihodia dia ewandji wa lo wodja ɔsɔ kɔngɛnangɛnaka Ɛmɛnyi wa Jehowa. Lo Ngɔndɔ k’esambele 1969, takasangana lo losanganya la so la ntondo l’otshimbedi lakasalema lo wodja ɔsɔ, takasangana oko anto 20. Takalomɔlomɔka dia batiza apandjudi w’eyoyo ahende. Koko, lo lushi la ntondo la losanganya lɔsɔ, apulushi wakaye ndo wakemadia ekongelo. Vɔ wakatɔlɛ ambatshi mboka wa laande ndo omendji w’otshimbedi otsha lo biro k’apulushi. L’ɔkɔngɔ wa vɔ toka ambola, wakatodjangɛ dia sho nyomokalola nto lushi lokina. Lo nshihodia dia ewandji wa lɛɛta ɛsɔ wayodja lofunge, takakongɛ dia mbisha sawo dia batisimu lo luudu lɔmɔtshi lo woshɛshɛ ndo oma laasɔ takabatiza apandjudi asɔ lo woshɛshɛ l’ɔkɛdi ɔmɔtshi.

Mingu ngana l’ɔkɔngɔ, Ministre de l’Intérieur akantondja dimi l’ambatshi mboka wa laande akina atanu oma lo wodja wa Niger. Vɔ wakatɔsɛkɛ wenya 48 dia sho ntomba oma lo wodja, ndo takahombe nkamba la kɛnɛ kaki la so shoamɛ dia ntomba. Takakitanyiya ndo takatshu mbala kakɔ ɔtɔi lo biro ka filialɛ ka la Nigéria, lɛnɛ akawatototomaka l’ahole akina.

Wakatome lo ngielongelo ya la Nigéria ya Orisunbare, lɛnɛ akamangɛnangɛnaka nsambisha kaamɛ la yema y’apandjudi wakadjasɛka lɛkɔ. Koko l’ɔkɔngɔ wa ngɔndɔ shamalo, biro ka filialɛ akambelɛ ndo akanɔmbɛ dia dimi nkalola la Niger dimɛ. Ntondotondo lakakashimɔ ndo lakakiyana yema, koko lakalomɔlomɔka dia tɛnana l’anangɛso wa la Niger nto!

Lakakalola la Niamey. L’ɔkɔngɔ wa lushi lakamakome, omindji w’okanda ɔmɔtshi akambeye dia lekɔ Ɔmɛnyi ndo akatatɛ mbokami ambola wendana la Bible. Takeke kaamɛ la nde, ndo l’ɔkɔngɔ wa nde ntshika ɔnwɛlɔ wa mfɔka ndo wanu wa wolo, nde akayolongolaka batisimu. Laki l’ɔngɛngɔngɛnɔ w’efula wa nsambisha kaamɛ l’anangɛso l’akadiyɛso wa lo bɛtshi dia nkɛtɛ dia lo Niger ndo laki l’ɔlɔ w’efula lo mɛna woho waketawɔka anto akambo wa mɛtɛ lam’akatetaka ɛnɔnyi. Etena kakamakome mbala ka ntondo, aki Ɛmɛnyi 31 lo wodja w’otondo; lam’akamayotomboka oma lɛkɔ, lakatshike waya 69.

L’ekomelo ka 1977, Iakayokalola la Nigéria dia tolongola olowanyelo. L’ekomelo ka mingu shato y’olowanyelo, Malcolm Vigo laki ɔnɔmbɔdi wa Kɔmite ka Filialɛ, akambadiɛ mukanda ɔmɔtshi oma lo filialɛ  ka Sierra Leone. Anangɛso wakayangaka ɔnangɛso lele la yoonge ya dimɛna, lele ombatshi mboka weke onyemba lakatɛkɛtaka Angɛlɛ ndo Falase dia nde tokamba oko omendji w’otshimbedi la Guinée. Ɔnangɛso Vigo akambewoya dia lakalowanyemaki l’ɔtɛ w’ɔkɛndɛ ɔsɔ. Nde akanembetshiya hwe dia ɔkɛndɛ ɔsɔ bu wa wɔdu. Nde akambitɛ ate: “Kana yimba dimɛna la ntondo ka wɛ mbetawɔ.” Aha la ntshimbatshimba, lakokadimola nte: “Lam’ele Jehowa katatome, dimi layotshɔ.”

Lakɔshi ndɛkɛ otsha la Sierra Leone ndo lakatohomana l’anangɛso wa lo biro ka filialɛ ka lɛkɔ. Ɔnangɛso ɔmɔtshi la lo Kɔmite ka filialɛ akambitɛ ate: “Sho hateye awui efula wendana l’olimu wa Diolelo la Guinée.” Kaanga mbele filialɛ kaso mbele l’ɔkɛndɛ wa mendaka olimu w’esambishelo lo wodja wosukanyi la so wa Guinée, komonga dui dia wɔdu dia nsawola l’apandjudi wa lɛkɔ nɛ dia awui wa pɔlitikɛ wakaleke ndana lɛkɔ. Ndo kaanga mbambotohemba ntoma anangɛso mbala efula dia tembola anangɛso wa la Guinée, anangɛso asɔ komonga l’akoka wa mbɔtɔ lo wodja ɔsɔ. Oma laasɔ, wakanɔmbɛ dia dimi ntshɔ otsha lo kapitalɛ ka Guinée, mbuta ate la Conakry, dia tohemba dia nkondja mukanda washa onto lotshungɔ la mbidjasɛ lɛkɔ.

Etena kakamakome la Conakry, lakatshu lo ambasadɛ wa la Nigéria ndo lakatɛnana la ambasadɛrɛ. Lakawotɛ nsaki kaki la mi ka nsambisha la Guinée. Nde akakɔkɔmiya diaha dimi ntshikala lɛkɔ, naka dimi ntshikala kete wayominda kana awui wayoleka monga kɔlɔ le mi. Nde akambitɛ ate: “Kalola la Nigéria kele tosambishake lɛkɔ,” ko lakokadimola nte: “Dimi lamboyashikikɛ dia mbidjasɛ lo wodja.” Ɔnkɔnɛ, nde akafunde mukanda dia nɔmba ministre de l’Intérieur dia nde kimanyiyami ndo ministrɛ akɔ akanongola la wangasanu tshɛ.

Yema tshitshɛ oma laasɔ, lakakalola otsha lo biro ka filialɛ ka la Sierra Leone ndo lakatewoya anangɛso yɛdikɔ y’oma le ministrɛ. Anangɛso waki l’ɔngɛnɔngɛnɔ w’efula etena kakawoke woho wakatshɔkɔla Jehowa lɔkɛndɔ lami. Lakalongola mikanda washa onto lotshungɔ la mbidjasɛ la Guinée!

Oma lo 1978 polo 1989, Iakakambaka oko omendji w’otshimbedi la Guinée, la Sierra Leone, ndo oko okimanyedi w’omendji w’otshimbedi la Libéria. L’etatelo, lakatataka mbala efula. Tena dimɔtshi dui sɔ diakasalemaka lo bɛtshi dia nkɛtɛ dia tale. Koko anangɛso wakasalaka tshɛ kakawakokaka nsala dia tɔlami lo lopitadi.

Lo diaaso dimɔtshi, Iakandama la malaria ɔmɔtshi wa wolo efula, mbidja ndo ɛsɔhɔ. Lam’akamayɔkɔnɔka, Iakayeyaka dia anangɛso wakakɛtshanyaka lɛnɛ akawakoke nkundɛmi! Kaanga mbakamahomana l’awui wa waale lo lɔsɛnɔ lami asɔ, dimi kokanyiya pondjo dia ntshika olimu ami. Ndo lakatetemala ndjashikikɛ dia ekokelo ka mɛtɛ ndo ka pondjo ndjaka oma le Nzambi lakoka tolola oma lo nyɔi.

Lo 1988, Iakɛnana la Dorcas, kadiyɛso k’ombatshi mboka kakokaka Jehowa ngandji efula ndo kaki l’okitshakitsha w’efula. Takatshukana, ndo nde akandjele l’olimu ami w’otshimbedi. Dorcas akakambaka kaamɛ la ngandji tshɛ ndo la wolo l’ɔkɛndɛ ami ndo aki suke dia ndjahondja awui efula lo dikambo  dia Jehowa. Dimi la nde, takandaka lɔkɛndɔ la kilɔmɛtrɛ oko 25 lam’asa tshumanelo, tatɛmbɛ eshikɔ aso. Lo tshumanelo dia tale, takandaka lɔkɛndɔ l’ehomɔ tshɛ kɛmba anto kakɛnamaka l’etena kɛsɔ l’etadimbo wa lɔtɛkɛ ndo w’afuku afuku.

Dorcas ekɔ la dihonga di’efula. Ɛnyɛlɔ, ntena dimɔtshi takahombaka ntenyanya nkushi yaki ndo la waa nkɔndɛ. Lo lɔkɛndɔ lɔmɔtshi la nshi tshanu, kilalo k’abaya kakawasale lo lushi lɔmɔtshi kakalana ndo takahombe mbɔsa waato ɔmɔtshi wakɛndakɛnda la mɔtɛrɛ. Lam’akalange Dorcas memala dia ntomba oma lo waato ɔsɔ, nde akatambɛ l’ashi. Ndooko onto l’atei aso lakeyaka nsala osale, ndo nkɔndɛ yaki l’ashi asɔ. Dui dia dimɛna ko, ɛlɔngɔ w’apami ɛmɔtshi wakatambɛ l’ashi ndo wakatondja wadɛmi. Dimi la nde kondalaka djɔ etena tshɛ kakatohɔka dui sɔ lo ntena dimɔtshi, koko takatetemala l’olimu aso.

L’etatelo ka 1992, takakashimɔ dia mbeya dia Dorcas aya la diemi. Onde dui sɔ mbakahombe nkomiya olimu aso wa lo tena tshɛ? Takakane yimba ɔnɛ: “Jehowa ambotosha woshasha ɔmɔtshi!” Ɔnkɔnɛ, takɔlɛ ɔnaso la womoto ɔnɛ Jahgift, mbuta ate woshasha w’oma le Jehowa. Ɛnɔnyi ɛnɛi l’ɔkɔngɔ wa Jahgift mbotɔ, Eric kosɛnde ka pami akotɔ. Anaso akɔ ahende asɔ wakɛnya dia vɔ wekɔ weshasha wa lo nyuma le so. Jahgift ekɔ lo nkamba ntena dimɔtshi lo biro k’okadimwelo la Conakry ndo Eric ekɔ lo nkamba oko okambi wakimanyiya.

Kaanga mbakahombe Dorcas memadia olimu ande w’ombatshi mboka wa laande, nde akatetemala nkamba oko ombatshi mboka wa pondjo, kaanga etena kakatodiaka anaso. L’ekimanyielo ka Jehowa, Iekɔ lo ntetemala l’olimu wa laande wa lo tena tshɛ. L’ɔkɔngɔ w’ana aso mbola, Dorcas akayokalolɛka nto olimu ande w’ombatshi mboka wa laande. Wonya ɔnɛ dimi la nde tekɔ lo nkamba oko waa misiɔnɛrɛ la Conakry.

Dimi lakatshɔka dihole tshɛ diakalangaka Jehowa dia dimi ntshɔ. Mbala efula dimi la wadɛmi takokaka woho wakandatokokɛka ndo wakandatɔtshɔkɔlaka. Ndjaɛkɛ le Jehowa akatohandola oma l’ekiyanu efula wahomana la wanɛ wayaɛkɛ tshɛ lo lomombo la l’emunyi. Dimi la Dorcas takeke l’onto ndo l’onto oma l’awui wakatokomɛ dia Kiɔkɔ y’ekokelo ka mɛtɛ ele “Nzambi ka panda kaso,” Jehowa. (1 Ɛk. 16:35) Lekɔ l’eshikikelo dia lɔsɛnɔ la wanɛ tshɛ wayaɛkɛ le nde, “layɔmbama la ekokelo tshɛ lo tapa dia lɔsɛnɔ kaamɛ la Jehowa.”—1 Sa. 25:29.