1-2. Lande na ondo kayaokaso dia Jehowa hakadimola lo alɔmbɛlɔ aso?

 “NGƐNANGƐNA lo yɛdikɔ y’efula le Jehowa, ko nde ayokokotshɛ nsaki y’otema ayɛ.” (Os. 37:4) Ande daka dia diambo lee! Onde sho pombaka nongamɛ dia Jehowa koka tosha kɛnɛ tshɛ kɔlɔmbaso ko l’etena kakɔ kaamɛ? Lande na kahombaso ndjaoka dimbola sɔ? Tɔsɛdingole ɛnyɛlɔ kayela kɛnɛ. Kadiyɛso kɛmɔtshi keke onyemba ekɔ lo nɔmba dia vɔ mbelɛ dia nde tɔtɔ lo Kalasa k’esambisha wa Diolelo. Koko ɛnɔnyi efula wambeta ndo nde kombelamɛ. Ɔnangɛso ɔmɔtshi l’ɔlɔngɔlɔngɔ ekɔ lo nɔmba Jehowa dia nde mbɔkɔnɔla oma lo hemɔ kande ka wolo l’oyango wa nde nyomoleka mbokambɛ efula l’etshumanelo. Koko nde hakɔlɔngana. Ambutshi w’Akristo wekɔ lo nɔmba dia ɔnawɔ ntetemala ntshikala l’akambo wa mɛtɛ. Koko ɔnawɔ ambɔsa yɛdikɔ ya ntshika kambɛ Jehowa.

² Ondo ndo wɛ ambɔlɔmbaka Jehowa dui dimɔtshi dia ngasɔ, koko wɛ konongola okadimwelo. Etombelo ele, wɛ mbeyaka ndjota dia Jehowa kadimolaka lo alɔmbɛlɔ w’anto amɔtshi koko aha wayɛ. Kana ondo wɛ mbeyaka mfɔnya dia wɛ akasale dui dimɔtshi dia kɔlɔ. Kadiyɛso kɛmɔtshi kelɛwɔ Janice b akayaoke woho akɔ waamɛ. Nde la omɛnde wakalɔmbaka dia ntshɔ tokamba lo Bɛtɛlɛ. Nde mbutaka ɔnɛ: “Laki l’eshikikelo dia keema edja tayelamɛ lo Bɛtɛlɛ.” Koko ngɔndɔ ndo ɛnɔnyi wakete ndo atshukanyi asɔ kombelamɛ. Janice mbutaka ɔnɛ: “Lakayaoke kɔlɔ efula ndo lakatshimbe wɔɔngɔ. Lakayambolaka dia kana lakasalɛ Jehowa dui dimɔtshi dia kɔlɔ.  Ɔnkɔnɛ, lakalɔmbɛ djekoleko ɛlɔmbwɛlɔ kande. Lande na kakinde kokadimola lo dɔmbɛlɔ diami?”

3. Kakɔna kayotɔsɛdingola lo sawo nɛ?

³ Mbala efula, sho mbeyaka ndjambola dia kana Jehowa ekɔ lo pokamɛ alɔmbɛlɔ aso. Kaanga apami amɔtshi wa kɔlamelo wa lo nshi y’edjedja wakayakiyanyaka ndo vɔ lawɔ. (Jɔbɔ 30:20; Os. 22:2; Hab. 1:2) Kakɔna kakoka koshikikɛ dia Jehowa ayokadimola lo alɔmbɛlɔ ayɛ? (Os. 65:2) Dia kokimanyiya dia wɛ nkondja okadimwelo lo dimbola sɔ, tayanga ntondotondo nkadimola lo ambola wayela anɛ: 1) Kakɔna kakokaso nongamɛ oma le Jehowa? 2) Kakɔna kalongamɛ Jehowa oma le so? 3) Lande na ondo kahombaso nsala etshikitanyu ɛmɔtshi lo alɔmbɛlɔ aso?

4. Lo ndjela Jɛrɛmiya 29:​12, kakɔna katolaka Jehowa dia nsala?

⁴ Jehowa tolakaka dia nde pokamɛka alɔmbɛlɔ aso. (Adia Jɛrɛmiya 29:12.) Nzambi kaso mbokaka atɛmɔdi ande wa kɔlamelo ngandji, diakɔ diele nde hanyaki pondjo yimba oma l’alɔmbɛlɔ awɔ. (Os. 10:17; 37:28) Koko, dui sɔ halange nembetshiya dia nde ayotoshaka kɛnɛ tshɛ k’ɔlɔmbaso. Ondo sho mbeyaka nkonga polo l’andja w’oyoyo la ntondo ka sho ndjolongola awui amɔtshi wɔlɔmbaso.

5. Kakɔna kasɛdingola Jehowa etena kahokamɛnde alɔmbɛlɔ aso? Lembetshiya.

⁵ Jehowa sɛdingolaka dia kana alɔmbɛlɔ wɔlɔmbaso mbɔtɔnɛka la sangwelo diande lo tshɛ kadiɔ. (Isa. 55:​8, 9) Etenyi kɛmɔtshi ka sangwelo diande mendanaka ndo la ndodia nkɛtɛ l’apami ndo wamato wele l’ɔngɛnɔngɛnɔ wele kaamɛ l’ɛse k’ɛlɔmbwɛlɔ kande. Koko Satana sɛmaka di’anto wayonga dimɛna naka vɔ ndjalɔmbɔla vɔamɛ. (Eta. 3:​1-5) Dia mɛnya dia ofunu waki Diabolo ɔsɔ wekɔ kashi, Jehowa aketawɔ di’anto ndjalɔmbɔla vɔamɛ. Koko, ɛlɔmbwɛlɔ k’ɔna onto kambela ekakatanu efula wahomana la so ɛlɔ kɛnɛ. (Ond. 8:9) Sho shihodiaka dia Jehowa hatonya ekakatanu ɛsɔ tshɛ l’etena kɛnɛ. Naka nde nsala dui sɔ, kete amɔtshi mbeyaka ndjota dia ɛlɔmbwɛlɔ k’onto kekɔ dimɛna, ndo ɔnɛ vɔ wekɔ l’akoka wa nkandola ekakatanu w’anto tshɛ.

6. Lande na keso l’ohomba wa ndjashikikɛ dia Jehowa ayosalaka akambo lo yoho ya la ngandji ndo yosembwe?

⁶ Jehowa mbeyaka nkadimola lo alɔmbɛlɔ akɔ waamɛ lo toho totshikitanyi. Ɛnyɛlɔ, etena kaki nkumekanga Hɛzɛkiya la hemɔ ka wolo efula, nde akalɔmbɛ Jehowa dia nde mbɔkɔnɔla. Ko Jehowa akɔkɔnɔla. (2 Nku. 20:​1-6) Lo wedi okina, etena kakasɛngasɛnga ɔpɔstɔlɔ Pɔɔlɔ Jehowa dia nde mbonyɛ ‘tɛndɛ dia lo demba diande,’ ondo hemɔ kɛmɔtshi ka lo demba, Jehowa kombonyɛtɔ. (2 Kɔr. 12:​7-9) Tɔsɛdingole nto ɛnyɛlɔ ka ɔpɔstɔlɔ Jakɔba nde la Petero. Nkumekanga Hɛrɔdɛ akakombola mbadiaka vɔ akɔ ahende. Etshumanelo kakalɔmbaka dikambo dia Petero ndo ondo ndo diaki Jakɔba. Koko, Jakɔba akadiakema etena kele Petero akatshungɔ lo yoho ya dihindo. (Ets. 12:​1-11) Sho mbeyaka ndjambola ɔnɛ: ‘Lande na kakashimbɛ Jehowa Petero koko koshimbɛ Jakɔba?’ Bible hate ndooko dui. c Kɛnɛ kakokaso monga l’eshikikelo ele mboka ya Jehowa “keema la wɛngɛngɛ.” (Eoh. 32:4) Ndo sho mbeyaka dia oyadi Petero kana Jakɔba, vɔ akɔ ahende waketawɔmaka oma le Jehowa. (Ɛny. 21:14) Lo ntena dimɔtshi, sho mbeyaka mpomana l’ekakatanu weso konongamɛka. Koko lam’ele sho ndjaɛkɛka ɔnɛ ekadimwelo wa Jehowa lo alɔmbɛlɔ aso wokongaka nshi tshɛ la ngandji ndo losembwe, hatodje taamu lo yoho yasɔnande dia nkadimola lo alɔmbɛlɔ aso.—Jɔbɔ 33:13.

7. Kakɔna kahombaso mbewɔ ndo lande na?

 ⁷ Sho pombaka nsala la wolo dia mbewɔ mbɛdika awui wele laso la awui wahomana l’anto akina. Ɛnyɛlɔ, sho mbeyaka nɔmba Jehowa dia nde tokimanyiya lo dui dimɔtshi shikaa, koko hatolongola kɛnɛ kɔlɔmbaso. Oma laasɔ, tamboyeya dia onto ɔmɔtshi akalɔmbaka dui diakɔ diaamɛ ko mɛnamaka dia Jehowa akokadimoladiɔ. Kadiyɛso kɛmɔtshi kelɛwɔ Anna akahomana la dui dia ngasɔ. Nde akalɔmbaka dia Matthew, w’omɛnde kɔlɔngana oma lo hemɔ kande ka kansɛrɛ. L’etena kakɔ kaamɛ, akadiyɛso ahende w’Akristo waya esombe ndo vɔ la wɔ wakalɔshanaka la hemɔ ka kansɛrɛ. Anna akalɔmbɛ efula lo dikambo dia Matthew ndo lo dikambo dia akadiyɛso asɔ. Akadiyɛso asɔ wakakɔlɔngana, koko Matthew akavu. L’etatelo, Anna akayambolaka dia kana akadiyɛso asɔ wakakɔlɔngana l’ɔtɛ wakaakimanyiya Jehowa dia vɔ kɔlɔngana. Ndo naka ngasɔ mbakidiɔ, lande na kende kokadimola lo alɔmbɛlɔ wakalɔmbaka kadiyɛso dia omɛnde mboka dimɛna? Hatokoke mbeya ngande wakakɔnɔ akadiyɛso ahende asɔ. Kɛnɛ keyaso ele Jehowa mbeeya woho wa nkandola asui aso tshɛ lo pondjo, ndo nde ekɔ lo nomɔlomɔ dia mbolola angɛnyi ande wakavu.—Jɔbɔ 14:15.

8. a) Lo ndjela Isaya 43:​2, ngande watosukɛ Jehowa? b) Ngande wakoka dɔmbɛlɔ tokimanyiya etena kahomanaso l’ekakatanu? (Enda vidɛo yele l’ɔtɛ a dui ɔnɛ: Dɔmbɛlɔ tokimanyiyaka dia mbikikɛ tena dia wolo.)

⁸ Jehowa tosukɛka mbala tshɛ. Oko wende Shɛso ka ngandji, Jehowa halange tɛna tasowa. (Isa. 63:9) Koko, nde hatoshimbɛ oma l’ehemba tshɛ wahomana la so, wakoka mbɛdikama la ɛkɛdi kana loombe la dja. (Adia Isaya 43:2.) Koko nde tolakaka dia nde ayotokimanyiya ‘dia mbaatehɔ.’ Ndo nde hetawɔki dia ehemba wele la so ɛlɔ kɛnɛ tokonya dia sho sowaka pondjo. Jehowa toshaka nto wolo ande wa nyuma kande k’ekila katokimanyiya dia sho mbikikɛ. (Luka 11:13; Flpɛ. 4:13) Etombelo wele la dui sɔ ele, sho koka monga l’eshikikelo dia tayongaka nshi tshɛ la kɛnɛ keso la tɔ mɛtɛ ohomba dia mbikikɛ ndo ntetemala ntshikala la kɔlamelo le nde. d

9. Lo yoho yɔtɔnɛ la Jakɔba 1:​6, 7, lande na keso l’ohomba wa ndjaɛkɛ dia Jehowa ayotokimanyiya?

⁹ Jehowa nongamɛka dia sho ndjaɛkɛ le nde. (Hɛb. 11:6) Lo tena dimɔtshi, ehemba wahomanaso la wɔ mbeyaka mɛnama diele oko hatotowatondoya. Sho mbeyaka kaanga ntatɛ monga la taamu ɔnɛ Jehowa ayotokimanyiya. Koko Bible toshikikɛka dia lo tshimbo ya wolo waki Nzambi sho kokaka “mbidɛ lo ehele.” (Os. 18:29) Ɔnkɔnɛ, lo dihole dia sho monga la taamu, sho pombaka nɔmba dia monga la mbetawɔ k’efula tele l’eshikikelo dia Jehowa ayokadimola alɔmbɛlɔ aso.—Adia Jakɔba 1:​6, 7.

10. Lembetshiya woho wakoka etsha aso mbɔtɔnɛ la alɔmbɛlɔ aso.

¹⁰ Jehowa nongamɛka dia sho nsala akambo lo yoho yɔtɔnɛ l’alɔmbɛlɔ aso. Ɛnyɛlɔ, ɔnangɛso ɔmɔtshi mbeyaka nɔmba Jehowa dia nde mbokimanyiya dia nde mbɔsa vakashi l’olimu wakambande wa l’emunyi l’oyango wa nde tɔtɔ lo losanganya lɔmɔtshi la rɛjɔ. Ngande wakoka Jehowa nkadimola lo dɔmbɛlɔ sɔ? Nde koka mbisha ɔnangɛso dihonga diele lande ohomba dia ntshɔ tɔlɔmba owandji ande w’olimu. Koko ɔnangɛso ndamɛ mbahomba ntshɔ otsha le owandji ande ndo tɔɔlɔmba. Ondo nde mbeyaka monga l’ohomba wa mbɔlɔmba mbala la mbala. Ondo nde mbeyaka kaanga nɔmba dia mengɔnya l’osekande ose olimu ɔmɔtshi nshi yawɔ ya nkamba. Ndo naka ekɔ ohomba, nde mbeyaka mbɔlɔmba vakashi yayowohembola dikuta.

11. Lande na kahombaso nɔmbaka mbala la mbala lo dikambo di’ekakatanu aso?

 ¹¹ Jehowa nongamɛka dia sho mbɔlɔmbaka mbala la mbala lo kɛnɛ kendana l’ekakatanu aso. (1 Tɛs. 5:17) Yeso akɛnya dia alɔmbɛlɔ aso amɔtshi hawotokadimɔma l’etena kalongamɛso. (Luka 11:9) Ɔnkɔnɛ tohekɔke! Lɔmbaka l’otema ɔtɔi ndo mbala la mbala. (Luka 18:​1-7) Etena katetemalaso nɔmba lo dikambo di’okakatanu ɔmɔtshi, sho mɛnyaka Jehowa dia kɛnɛ kɔlɔmbaso kekɔ ohomba efula le so. Sho lawɔ mɛnyaka mbetawɔ kaso lo dikoka diele la nde dia tokimanyiya.

12. a) Naa dimbola dimɔtshi diahombaso ndjaoka lo dikambo di’ekakatanu walɔmbaso ndo lande na? b) Ngande wakokaso ndjashikikɛ dia alɔmbɛlɔ aso wekɔ lo mɛnya dilɛmiɛlɔ diaso otsha le Jehowa? (Enda kiombo yele l’ɔtɛ a dui ɔnɛ: “ Onde dimi mɛnyaka dilɛmiɛlɔ diami otsha le Jehowa?”)

¹² Naka hatolongola ekadimwelo lo dɔmbɛlɔ dialɔmbaso, kete sho koka ndjaoka ambola asato anɛ. Dia ntondo, ‘Onde dimi lekɔ lo nɔmba lo dikambo dia dui dia dimɛna?’ Mbala efula sho fɔnyaka dia sho mbeyaka kɛnɛ koleki dimɛna le so. Koko awui walɔmbaso mbeyaka mɛnama dia hawotonga la wahɔ le so otsha la ntondo. Naka tekɔ lo nɔmba l’ɔtɛ w’okakatanu ɔmɔtshi, kete ondo mbeyaka monga ko tekɔ la yoho mɔtshi ya nkandola okakatanu akɔ oleki yoho yalɔmbaso dia mbokandola. Ndo awui amɔtshi walɔmbaso mbeyaka monga ko hawɔtɔnɛ la lolango la Jehowa. (1 Jni. 5:14) Ɛnyɛlɔ, tɔsɛdingole ɛnyɛlɔ k’ambutshi wakatatɛkɛtshi l’etatelo. Vɔ wakalɔmbaka Jehowa dia ɔnawɔ ntetemala ntshikala l’akambo wa mɛtɛ. Mɛnamaka dia dɔmbɛlɔ sɔ diaki dimɛna. Koko, Jehowa hatshutshuya ndooko onto la l’atei aso dia mbokambɛ. Nde kombolaka dia sho tshɛ, mbidja ndo anaso, nsɔna dia mbɔtɛmɔla. (Eoh. 10:​12, 13; 30:​19, 20) Ɔnkɔnɛ, ambutshi asɔ wakakoke nɔmba Jehowa  dia nde mbakimanyiya dia minanda otema w’ɔnawɔ dia nde ntshutshuyama dia nde mboka Jehowa ngandji ndo nkoma ɔngɛnyi Ande.—Tok. 22:6; Ɛf. 6:4.

13. Lo ndjela Hɛbɛru 4:​16, etena kakɔna kayotokimanyiya Jehowa? Lembetshiya.

¹³ Dia hende ele ɔnɛ: ‘Onde ɔnɛ mɛtɛ mbele etena le Jehowa dia nde nkadimola lo dɔmbɛlɔ diami?’ Sho mbeyaka mfɔnya dia tekɔ mɛtɛ l’ohomba w’ekadimwelo lo alɔmbɛlɔ aso aha la ntshimbatshimba. Koko kɛnɛ kele mɛtɛ ele, Jehowa mbeyaka etena koleki dimɛna ka tokimanyiya. (Adia Hɛbɛru 4:16.) Etena kele hatolongola mbala kakɔ ɔtɔi kɛnɛ kalɔmbaso, sho mbeyaka mfɔnya dia ekadimwelo wa Jehowa ele ɔnɛ ‘Keema.’ Koko ekadimwelo ande koka monga ɔnɛ ‘Aha l’etena kɛnɛ.’ Ɛnyɛlɔ, ohokanyiya dia ɔnangɛso l’ɔlɔngɔlɔngɔ lakalɔmbaka dia nde nkɔnɔ oma lo hemɔ kande. Naka Jehowa otondɔɔkɔnala lo yoho ya dihindo, Satana otokoka mbuta dia ɔnangɛso ɔsɔ ekɔ lo ntetemala kambɛ Jehowa paka l’ɔtɛ wɔkɔnɔdinde. (Jɔbɔ 1:​9-11; 2:4) Ndo nto, Jehowa amboshikikɛka etena kayondɔkɔnɔla hemɔ tshɛ. (Isa. 33:24; Ɛny. 21:​3, 4) Polo ndo l’etena kɛnɛ, sho hatokoke nongamɛ dia nkɔnɔ lo yoho ya dihindo. Ɔnkɔnɛ, ɔnangɛso akakoke nɔmba Jehowa dia nde mbokeketsha ndo mbosha wɔladi wa lo yimba dia nde mbikikɛ hemɔ kande ndo ntetemala kambɛ Nzambi la kɔlamelo tshɛ.—Os. 29:11.

14. Kakɔna kamboyeka lo kɛnɛ kakakomɛ Janice?

¹⁴ Tonyomokana yimba la kɛnɛ kakakomɛ Janice, lakalɔmbaka dia tokamba lo Bɛtɛlɛ. Ɛnɔnyi etanu wakete la ntondo ka nde ndjoshihodia woho wakakadimola Jehowalo dɔmbɛlɔ diande. Nde mbutaka ate: “Jehowa akakambe l’etena kɛsɔ dia nde mbetshami ndo nkimanyiyami dia nkoma Okristo wa dimɛna. Wɛkamu ande otsha le mi wakahombe mpama. Lakahombe nyomolowanya wekelo ami w’onto ndamɛ. Ndo laki l’ohomba wa ntana ɔngɛnɔngɛnɔ wa  l’etei k’otema, waki konemanɛka la dihole tshɛ diakambɛmi Jehowa.” L’ɔkɔngɔ diko, Janice nde la omɛnde wakayelamɛka dia tokamba l’olimu w’otshimbedi. Lo nkaloya washo l’ɔkɔngɔ, Janice mbutaka ɔnɛ: “Jehowa akakadimola lo alɔmbɛlɔ ami, lo yoho yakimi konongamɛka. Akɔshi yema y’etena ka nshihodia dia okadimwelo wakambisha Jehowa waki woshasha wa dimɛna efula, koko lekɔ la lowando efula dia mɛna ngandji ndo ɔlɔlɔ w’otema ande.”

15. Lande na ondo kahatahombe nɔmbaka dui ɔtɔi to shikaa? (Enda ndo esato.)

¹⁵ Dimbola dia sato ele ɔnɛ: ‘Onde dimi pombaka nɔmba dikambo dia dui dikina?’ Kaanga mbele ekɔ dui dia dimɛna mbuta dui shikaa dui dialɔmbaso, ondo lo ntena dimɔtshi mbeyaka monga dui dia dimɛna diaha ndeka nɔmbaka dui ɔtɔi shikaa l’alɔmbɛlɔ aso l’oyango wa sho mbishola kɛnɛ kakombola Jehowa le so. Tɔsɛdingole ɛnyɛlɔ ka kadiyɛso k’onyemba kakalɔmbaka dia tɔtɔ lo Kalasa k’esambisha wa Diolelo. Nde akakombolaka dia tɔtɔ kalasa kɛsɔ l’oyango wa nde monga l’akoka wa tokamba lɛnɛ aki ohomba efula w’apandjudi. Ɔnkɔnɛ, etena kakandatetemalaka nɔmba dia mbelamɛ lo kalasa, nde akakoke nɔmba nto Jehowa dia nde mbokimanyiya dia mbeya waaso akina wa nde mpamia olimu ande w’esambishelo. (Ets. 16:​9, 10) Oma laasɔ, nde akakoke nsala akambo lo yoho yɔtɔnɛ la dɔmbɛlɔ diande lo mimbola omendji w’otshimbedi dia kana etshumanelo kɛmɔtshi kekɔ suke ndo kekɔ l’ohomba efula w’apandjudi. Kana nde akakoke fundɛ biro ka filialɛ dia mimbola lɛnɛ ele ohomba efula w’apandjudi wa Diolelo. e

16. Eshikikelo kakɔna kakokaso monga la tɔ?

¹⁶ Oko wamboteka, sho koka monga l’eshikikelo dia Jehowa ayokadimola alɔmbɛlɔ aso lo yoho ya la ngandji ndo yosembwe. (Os. 4:3; Isa. 30:18) Ntena dimɔtshi mbeyaka monga ko hatolongola ekadimwelo lo yoho yalongamɛso. Koko Jehowa hanya pondjo yimba l’alɔmbɛlɔ aso. Nde tokaka ngandji efula. Ndo nde hatɔsɛkaki pondjo. (Os. 9:10) Ɔnkɔnɛ, totetemale ‘ndjaɛkɛ le nde tena tshɛ lo mbodiholɛ etema aso lo dɔmbɛlɔ’.—Os. 62:8.