Etena kadiaso Bible, sho koka nkamba la dihomɔ dia wekelo diotshikitanyi dia sho nshihodia kɛnɛ kadiaso. Koko sho hateke tsho dia mpamiya ewo kaso k’oma lo Bible. Sho kombolaka ntana diangɔ di’oshinga wolo dia lo nyuma lo kɛnɛ kendana la lonto la Jehowa layotokimanyiya dia mfudia ngandji kaso otsha le nde. Dia nsala dui sɔ, sho koka ndjambola ɔnɛ: ‘Kakɔna kambetsha ɔkɔndɔ wa lo Bible ɔnɛ lo dikambo dia Jehowa?’

Ɛnyɛlɔ, wɛ koka nsala la wolo dia ntana awui efula wendana la woho wakɛnya Jehowa ngandji, lomba, losembwe ndo wolo. Koko, lonto la Jehowa hakomɛ tsho lo waonga asɔ. Koko tekɔ la waonga akina efula w’amɛna waki Jehowa wakokaso mbeka. Lende akokayɛ nyomeya awui efula wendana la waonga ande?

Enda listɛ la waonga ande akina ndekana 50 watanema lo Index des publications des Témoins de Jéhovah l’ɛse ka ɔtɛ a dui “Jehowa” ndo oma laasɔ, l’ɛse k’ɔtɛ a dui wahɔnyi “Qualités par nom.” Sala eyangelo lo dui tshɛ diɔtɔnɛ l’ɔkɔndɔ wa lo Bible watayadia. (Naka wɛ ekɔ paka la Dibuku di’eyangelo di’Ɛmɛnyi wa Jehowa, kete yanga l’ɔtɛ a dui wahɔnyi “Jehowa Nzambi” ndo oma laasɔ, l’ɔtɛ a dui wahɔnyi “waonga wa Jehowa.”)