Ambola w’oma le ambadi
Ngande wɛnya hwe sawo “Lokombo layɛ lakidiame” dia lo Tshoto y’Etangelo ya Ngɔndɔ ka samalo 2020 dietawɔ diaso diendana la lokombo la Jehowa ndo la lowandji lande?
Lo sawo diakɔ, takeke dia ekɔ dui dimɔtshi di’ohomba efula diele la shɛngiya le anto tshɛ ndo le andjelo: Dui diakɔ ko okidiamelo wa lokombo la woke la Jehowa. Dui sɔ mendanaka la lowandji, mbuta ate yoho yoleki tshɛ dimɛna yalɔmbɔla Jehowa, mbɔtɔnɛka la okidiamelo wa lokombo la Jehowa. Woho akɔ wamɛ mbele, dikambo diendana l’olowanyi w’onto ekɔ dui dikina dia woke diendana la dikambo sɔ.
Lande na kakaso epole ɔsɛkɛ lo dikambo dia woke diendana la lokombo laki Jehowa ndo okidiamelo alɔ? Nyɛsɔ tɔsɛdingole ɛkɔkɔ esato.
Satana akamamatanyiyɛ lokombo la Nzambi akambo oma ko ɔtɔmbɔkwɛlɔ wa l’ekambo k’Ɛdɛna
Wa ntondo, Satana akalɔshana la lokombo kana lokumu la Jehowa, l’ekambɔ k’Ɛdɛna. Dimbola diakambola Satana Eva akɛnya dia Jehowa bu Nzambi kele la lokaho ndo wadjango wakandasha Adama nde la Eva kosungana. Oma laasɔ, Satana akalɔshana la kɛnɛ kakate Jehowa, nde akate dia kɛnɛ kakate Nzambi kekɔ kashi. Ngasɔ mbakandamamatanyɛ lokombo la Jehowa akambo. Nde akakome “Diabolo,” kitshimudi ate “omamanyishi.” (Jni. 8:44) Lam’ele Eva aketawɔ kashi ka Satana, nde akatone kitanyiya Nzambi ndo nde akɛnya dia nde halange dia nde monga ɔnɔmbɔdi ande. (Eta. 3:1-6) Polo ɛlɔ kɛnɛ, Satana ekɔ lo ntetemala mamatanyɛ lokombo la Nzambi akambo, lo dianganya akambo wa kashi lo dikambo dia Jehowa. Anto wetawɔ kashi ya woho ɔsɔ tonaka nkitanyiya Jehowa. Koko le ekambi waki Nzambi, mamatanyiyɛ lokombo l’ekila la Jehowa akambo wa kashi ekɔ dui dia kɔlɔ efula. Ɔsɔ mbele ɔkɔkɔ woleki tshɛ wɛnya lande na kambolola asui ndo awui wa kɔlɔ l’andja ɔnɛ.
Ɔkɔkɔ wa hende, ele dia wahɔ wa ditongami tshɛ, Jehowa ayɔsa yɛdikɔ ya kidia lokombo lande, liɛndia oma lo nsɔnyi tshɛ. Ɔsɔ ekɔ dui dioleki tshɛ ohomba le Jehowa. Diakɔ diatande ate: “Dimi mɛtɛ layokidia lokombo lami la woke.” (Ɛzk. 36:23) Ndo Yeso akɛnya hwe dikambo diahomba mbetaka la ntondo l’alɔmbɛlɔ w’ekambi tshɛ wa Jehowa wa kɔlamelo etena kakandate ɔnɛ: “Lokombo layɛ lakidiame.” (Mat. 6:9) Bible mbikaka epole ɔsɛkɛ mbala ko mbala l’ohomba wa ntombola lokombo laki Jehowa. Tɔsɛdingole bɛnyɛlɔ dingana: “Nyosha Jehowa lotombo lɛdimi la lokombo lande.” (1 Ɛk. 16:29; Os. 96:8) “Nyembe esambo wa lotombo dikambo dia lokombo lande la lotombo.” (Os. 66:2) “Dimi layotombolaka lokombo layɛ pondjo pondjo.” (Os. 86:12) Mbala kɛmɔtshi lo mbala yakatɛkɛta Jehowa ndamɛ oma l’olongo akasalema lo tɛmpɛlɔ ka la Jɛrusalɛma lɛnɛ akate Yeso ate: “Papa, otombole lokombo layɛ.” Jehowa akakadimola ate: “Dimi lakalitombola ndo layolitombola nto.”—Jni. 12:28. a
Ɔkɔkɔ wa sato, sangwelo dia Jehowa mbɔtɔnɛka mbala tshɛ la lokombo lande, kana lokumu lande. Ɛnyɛlɔ: Kakɔna kayotomba l’ɔkɔngɔ wa ohemba w’ekomelo wa ɛnɔnyi kinunu w’ɛlɔmbwɛlɔ ka Kristo? Ngande wayoyaoka andjelo ndo anto tshɛ lo dikambo dia lokombo la Jehowa l’etena kɛsɔ? Dia tokimanyiya dia nkadimola lo dimbola sɔ, nyɛsɔ totokohola akambo ahende wɔtɔnɛ, mbuta ate, anto wele l’olowanya ndo lowandji la l’andja w’otondo. Onde anto wakɛnya kɔlamelo yawɔ wayotetemala ndɔshana l’ekakatanu dia ntetemala nama olowanyi awɔ? Ndooko. Vɔ wayonga anto wa kokele ndo anto wambohembama tshɛ lo tshɛ. Vɔ wayolongola lɔsɛnɔ la pondjo lele la ntondo kawɔ. Onde dikambo dia lowandji la l’andja w’otondo diayoleka tɛkɛtama ndo kaanga mbidja diatɔnelo lam’asa ditongami diele la timba. Ndooko. Ndo l’etena kɛsɔ, ditongami oyadi diele l’olongo kana dia la nkɛtɛ wayonga kaamɛ ndo wayetawɔ ɛlɔmbwɛlɔ ka Jehowa. L’etena kɛsɔ, onde lokombo la Jehowa layotetemala monga dui di’ohomba le ekambi ande?
L’etena kɛsɔ, anto tshɛ wayeya kɛnɛ kele mɛtɛ lo dikambo dia Jehowa ndo lokombo lande layokidiama tshɛ lo tshɛ. Koko, lokombo la Jehowa layotetemala monga dui dioleki tshɛ ohomba le ekambi tshɛ wa kɔlamelo. Lande na? Nɛ dia vɔ wayɛna Jehowa atetemala nsala akambo wa diambo. Ɛnyɛlɔ: Lam’ele Yeso ayokaloya l’okitshakitsha tshɛ lowandji le Jehowa, laasɔ Nzambi ayoyala “laadiko dia tshɛ.” (1 Kɔr. 15:28) L’ɔkɔngɔ wa laasɔ, anto tshɛ wa la nkɛtɛ wayoyala “la lotshungɔ la lotombo la ana wa Nzambi.” (Rɔmɔ 8:21) Ndo Jehowa ayokotsha sangwelo dia nde tshɛ lo tshɛ dia nkumbo kande oyadi ka l’olongo kana ka la nkɛtɛ monga kaamɛ.—Ɛf. 1:10.
L’ɔkɔngɔ w’awui asɔ tshɛ kotshama, ngande wayoyaoka nkumbo ka Jehowa kele l’olongo ndo kele la nkɛtɛ? Lo mɛtɛ, tayonga la mposa k’efula ka tombolaka lokombo la Jehowa l’olangala efula. Omembi w’esambo akafunde lotshimbo ya nyuma k’ekila ɔnɛ: “Jehowa Nzambi atombɔme . . . Lokombo lande la diambo latombɔmake pondjo pondjo.” (Os. 72:18, 19) Pondjo la pondjo, tayotetemalaka monga la waaso w’eyoyo ndo ɛkɔkɔ wa nsala dui sɔ.
Lokombo laki Jehowa layolembetshiya ɛngɔ tshɛ kendana la nde. Etena tshɛ kakanyiyaso dikambo dia lokombo laki Jehowa, tokanyiyake dia ngandji kande. (1 Jni 4:8) Tayohɔka mbala tshɛ dia ngandji kakatɛnya Jehowa etena kakandatotonge ndo etena kakandakimɔ oshinga w’etshungwelo. Koko mbala tshɛ tayotetemalaka mɛna woho watɛnya etongelo ka Jehowa ngandji kande. Pondjo la pondjo, tayotshutshuyamaka dia ndjasukanyaka suke suke la nde oko wende Shɛso ndo tayotombolaka lokombo lande la diambo.—Os. 73:28.
