1. Lande na kele ekɔ dui dia lomba dia ndjalɔngɔsɔla dikambo dia mpokoso?

 ƆLƆNGƆSWƐLƆ mbitshaka nsɛnɔ y’anto. Ɛnyɛlɔ, etena katomba mpokoso kɛmɔtshi, anto wakayalɔngɔsɔla dikambo dia mpokoso kakɔ mbaleka mbika ndo vɔ mboonga l’akoka wa nkimanyiya anto akina. Tshunda dimɔtshi dia l’Erɔpɛ dia nkimanyiya anto mbutaka ɔnɛ: “Ɔlɔngɔswɛlɔ wa dimɛna kokaka mbitsha nsɛnɔ.”

2. Lande na kahombaso ndjalɔngɔsɔlaka dikambo dia mfɔnu ka woke? (Mateo 24:44)

² “Mfɔnu ka woke” kayoya la shashimoya. (Mat. 24:21) Koko mfɔnu ka woke kayotshikitana la mpokoso efula y’oma lo diangɔ diakatongama, nɛ dia sho mbeyaka dia tɔ hatolanya anto tshɛ. Aya oko ɛnɔnyi 2 000 wambeta, Yeso akahɛmɔla ambeki ande dia ndjalɔngɔsɔla dikambo dia lushi lɔsɔ. (Adia Mateo 24:44.) Naka takayalɔngɔsɔla, kete ayonga dui dia wɔdu le so dia mbikikɛ okakatanu ɔsɔ ndo tayokimanyiya anto akina dia nsala woho akɔ waamɛ.​—Luka 21:36.

3. Ngande wele ekikelo, kɛtshi ndo ngandji tokimanyiyaka dia monga suke dikambo dia mfɔnu ka woke?

³ Tɔsɛdingole waonga asato wakoka tokimanyiya dia monga suke dikambo dia mfɔnu ka woke. Kakɔna kayotosala naka wambotɔlɔmba dia mbewoya losango la wolo la kilombo ndo wanɛ wele bu ambetawudi wotɔlɔsha? (Ɛny. 16:21) Tayonga l’ohomba wa ekikelo dia nkitanyiya Jehowa ndo monga l’eshikikelo ɔnɛ nde ayotokokɛ. Kakɔna kayotosala naka anangɛso wamboshisha diangɔ diawɔ dimɔtshi kana diangɔ diawɔ tshɛ dia l’emunyi? (Hab. 3:17, 18) Tayonga l’ohomba wa monga la kɛtshi katotshutshuya dia mbasha kɛnɛ kewɔ la tɔ ohomba. Kakɔna kayotosala naka osanga wa wedja wambotɔlɔsha, ko naka dui sɔ diambotokonya dia monga suke suke l’anangɛso l’akadiyɛso efula l’etena kɛmɔtshi? (Ɛzk. 38:10-12) Tayonga l’ohomba wambaɛnya ngandji  k’efula dia mbakimanyiya dia vɔ ntenyanya etena k’okakatanu kɛsɔ.

4. Ngande wɛnya Bible dia sho pombaka nkɛnɛmɔla ekikelo, kɛtshi ndo ngandji?

⁴ Ɔtɛkɛta wa Nzambi tokeketshaka dia sho ntetemala nkɛnɛmɔla ekikelo, kɛtshi ndo ngandji. Luka 21:19 mbutaka ɔnɛ: “Ndo oma lo ekikelo kanyu mbayonyoshimbɛ nsɛnɔ yanyu.” Kɔlasayi 3:12 mbutaka ɔnɛ: “Nyɔlɔtɛ . . . kɛtshi.” Ndo 1 Tɛsalɔnika 4:9, 10 mbutaka ɔnɛ: “Nyuamɛ nyekɔ lo mbetshama oma le Nzambi dia mbokana ngandji lam’asanyu. . . . Koko anangɛso le, tambonyokeketsha dia nyu ntetemala nsala ngasɔ lo yɛdikɔ y’efula.” Avɛsa asɔ tshɛ wakafundama otsha le ambeki wakashile mɛnya ekikelo, kɛtshi ndo ngandji. Koko, vɔ wakahombe ntetemala nkɛnɛmɔla waonga asɔ. Sho la wɔ pombaka nsala woho akɔ waamɛ. Dia tokimanyiya, tayanga nsɛdingola woho wakakɛnɛmɔla Akristo wa lo ntambe ka ntondo dionga la dionga lo waonga asɔ. Oma laasɔ, tayɛna woho wakokaso mbokoya ambeki asɔ ndo dui sɔ diayɛnya dia taya suke dikambo dia mfɔnu ka woke.

5. Ngande wakakikɛ Akristo wa lo ntambe ka ntondo ehemba awɔ?

⁵ Akristo wa lo ntambe ka ntondo waki l’ohomba w’ekikelo. (Hɛb. 10:36) Vɔ wakahomanaka l’ekakatanu akɔ waamɛ wele oko wanɛ wakasɛnaka l’etena kawɔ. Koko vɔ waki nto l’ekakatanu l’ɔtɛ wakiwɔ Akristo. Efula ka l’atei awɔ wakahɛnyahɛnyamaka, aha tsho paka oma le ewandji w’ɛtɛmwɛlɔ w’ase Juda ndo ewandji w’ase Rɔmɔ koko ndo nto oma le ase nkumbo yawɔ hita. (Mat. 10:21) Ndo l’etei k’etshumanelo, ntena dimɔtshi vɔ wakahombaka ndɔshana la shɛngiya ya waa apɔsta ndo wetshelo awɔ wakandjaka diatɔnelo. (Ets. 20:29, 30) Koko, Akristo asɔ wakakikɛ. (Ɛny. 2:3) Lo ngande? Vɔ wakakane yimba la bɛnyɛlɔ dia l’Afundelo dia ekikelo, ɛnyɛlɔ oko ka Jɔbɔ. (Jak. 5:10, 11) Vɔ wakalɔmbɛ dia nkondja wolo. (Ets. 4:29-31) Ndo vɔ wakake washo l’etombelo w’ɛlɔlɔ wayowokondja oma l’ekikelo.​—Ets. 5:41.

6. Wetshelo akɔna wambotokondja oma lo kɛnɛ kakasale Merita dia mbikikɛ ɔlɔshamelo?

⁶ Sho lawɔ nto kokaka mbikikɛ naka sho mbekaka bɛnyɛlɔ diendana l’ekikelo mbala la mbala l’Ɔtɛkɛta wa Nzambi ndo dia l’ekanda aso ndo kanaka la diɔ yimba. Lo nsala ngasɔ, Merita, kadiyɛso kɛmɔtshi kadjasɛ l’Albanie, akakikɛ ɔlɔshamelo wa wolo lo nkumbo kande. Nde mbutaka ate: “Lakanandema efula etena kakameke ɔkɔndɔ wa lo Bible wa Jɔbɔ. Nde akasowaka efula aha la nde mbeya ɔnɛ laki lo kiɔkɔ y’ehemba ande. Ndo nto nde mbutaka ate: ‘Polo lam’ayomovɔ, dimi hatotshika olowanyi ami!’ (Jɔbɔ 27:5) Lakakane yimba la woho wele ekakatanu waki la Jɔbɔ waki wolo efula lo mbɛdika la wɛnɛ wele la mi. Otshikitanyi la nde, dimi lakeyaka ɔnɛ laki l’edia k’ekakatanu ɛsɔ.”

7. Kaanga naka tatahomana l’ohemba wa wolo l’etena kɛnɛ, kakɔna kahombaso nsala kakianɛ?

⁷ Sho lawɔ nto kokaka nkeketsha ekikelo kaso lo mbitɛka Jehowa mbala la mbala ndo oma k’ɛse otema ekakatanu wele la so. (Flpɛ. 4:6; 1 Tɛs. 5:17) Mbeyaka monga ko wɛ atahomana l’ehemba wa wolo l’etena kɛnɛ. Kaanga mbediɔ ngasɔ, onde wɛ nyangaka ɛlɔmbwɛlɔ ka Jehowa mbala tshɛ kayaokayɛ dia wɛ ekɔ l’ɔkɔmwɛlɔ, hayeya kasala kana kamboyokoma ewo? Naka wɛ nɔmbaka Nzambi ekimanyielo mbala la mbala l’ehemba wahomanayɛ lawɔ lushi la lushi l’etena kɛnɛ, kete wɛ hengenga dia nsala dui sɔ etena kayoyohomana l’ekakatanu wa wolo lo nshi yayaye. Wɛ ayonga l’eshikikelo dia nde mbeyaka shikaa etena ndo woho wayondosala akambo lo wahɔ ayɛ.​—Os. 27:1, 3.

8. Ngande wɛnya ɛnyɛlɔ ka Mira dia mbikikɛ ehemba wa lo nshi nyɛ koka tokimanyiya dia ndjokikɛ wa lo nshi yayaye? (Jakɔba 1:2-4) (Enda ndo osato.)

⁸ Ondo tayoleka mbikikɛ mfɔnu ka woke  kayaye naka sho mbikikɛ ehemba wahomana la so ɛlɔ kɛnɛ. (Rɔmɔ 5:3) Lande na kakokaso mbuta ngasɔ? Anangɛso l’akadiyɛso efula mbutaka dia etena tshɛ kakikɛwɔ okakatanu ɔmɔtshi wa wolo, dui sɔ mbakimanyiyaka dia vɔ mbikikɛ ekakatanu wa lo nshi yayaye. Ekikelo mbowaɛdiaka, keketshaka mbetawɔ kawɔ dia Jehowa ekɔ suke ndo ayowakimanyiya. Lo wedi okina, mbetawɔ mbakimanyiyaka dia mbikikɛ ehemba wa lo nshi yayaye. (Adia Jakɔba 1:2-4.) Mira lele ombatshi mboka wa l’Albanie, akɛnyi dia woho wakandakikɛ lo nshi yakete akokimanyiya dia nde ntetemala mbikikɛ. Nde mbutaka dia lo ntena dimɔtshi nde ndjaokaka diele oko ndamɛ oto mbele l’ekakatanu efula. Koko nde mbohɔka polo lo yɛdikɔ yakɔna yakokimanyiya Jehowa l’ɛnɔnyi oko 20 wambeta ndo nde mbutaka ate: ‘Tshikala la kɔlamelo. Totshikake kambɛ Jehowa l’etena kɛnɛ l’ɔkɔngɔ wa nde kokimanyiya dia wɛ mbikikɛ ntena dia wolo efula.’ Wɛ lawɔ nto koka nkana yimba lo woho wamboshilaka Jehowa kokimanyiya dia mbikikɛ. Onga l’eshikikelo dia nde mɛnaka etena tshɛ kakikɛyɛ ohemba ɔmɔtshi ndo di’ɔnɛ nde ayokofuta. (Mat. 5:10-12) Oma laasɔ, etena kayanga ntatɛ mfɔnu ka woke, wɛ ayeka woho wa mbikikɛ ndo wɛ ayoyashikikɛ dia ntetemala mbikikɛ.

9. Ngande wakɛnya etshumanelo ka l’Atiyɔka wa la Suriya kɛtshi?

⁹ Tɔsɛdingole kɛnɛ kakakomɛ Akristo wa la Judeya etena kakawahomana la ndjala ka kasha. L’ɔkɔngɔ w’etshumanelo ka l’Atiyɔka wa la Suriya mboka awui wendana la ndjala kɛsɔ, aha la taamu vɔ wakatshutshuyama la kɛtshi lo dikambo di’anangɛwɔ l’akadiyɛwɔ wa la Judeya. Ɔnkɔnɛ, vɔ wakasale dui dimɔtshi dia nkimanyiya anangɛwɔ l’akadiyɛwɔ. Vɔ “wakɔshi y’ɛdikɔ ya tomɛ anangɛwɔ wakadjasɛka la Judeya ekimanyielo, onto l’onto londjela ekondjelo kande.” (Ets. 11:27-30) Kaanga mbele anangɛso l’akadiyɛso wakahomana la ndjala kɛsɔ wakangana etale la wɔ, Akristo wa l’Atiyɔka wakayashikikɛ dia mbakimanyiya.​—1 Jni. 3:17, 18.

10. Lo toho takɔna takokaso mɛnya kɛtshi etena kahomana asekaso ambetawudi la mpokoso kɛmɔtshi? (Enda ndo osato.)

¹⁰ Sho lawɔ nto koka mɛnya kɛtshi ɛlɔ kɛnɛ etena keyaso dia asekaso atɛmɔdi wambohomana la mpokoso kɛmɔtshi. Sho mongaka suke dia mbisha ekimanyielo ondo lo mimbola dikumanyi kana sho kokaka ndjasha lo nkamba lo prɔjɛ kɛmɔtshi, lo nkimɔ weshasha wendana l’olimu aso wa l’andja w’otondo kana lo nɔmba lo dikambo dia wanɛ wakahomana la mpokoso. b (Tok. 17:17) Ɛnyɛlɔ, lo 2020, ndekana Kɔmite yasha ekimanyielo etena katomba mpokoso 950 yakakengama l’andja w’otondo dia nkokɛ wanɛ wakandama la hemɔ ka COVID-19. Wanɛ wakamba lo kɔmite shɔ sunganaka mandɔma efula. Lo tshutshuyama la kɛtshi otsha le anangɛwɔ l’akadiyɛwɔ, vɔ wakakahanya diangɔ dia l’emunyi, wakasha ekimanyielo ka lo nyuma ndo lo ndjela awui wakahomana l’anto l’anto, wakalɔngɔsɔla kana wakawakɛ mvudu yawɔ ndo ahole w’ɔtɛmwɛlɔ.​—Ɛdika la 2 Kɔrɛtɔ 8:1-4.

11. Ngande watombola etsha aso wa kɛtshi Shɛso lele l’olongo?

¹¹ Etena kɛnyaso kɛtshi l’ɔkɔngɔ wa mpokoso kɛmɔtshi, anto akina mɛnaka woho wayahondjaso. Ɛnyɛlɔ lo 2019, lɔpɛpɛ lɔmɔtshi la wolo lelɛwɔ Dorian lakalanya Mbalasa ka Diolelo la Bahamas. Etena kakakaka anangɛso Mbalasa  ka Diolelo kakɔ, vɔ wakambola ɛjɛniɛrɛ ɔmɔtshi waki komonga Ɔmɛnyi wa Jehowa dia nde mbatɛ lofulo la falanga la ngande lalɔmbama dia nsala olimu ɔsɔ. Nde akawatɛ ate: “Lekɔ lo nanga nkimɔ woshasha . . . Layolanga nkimɔ diangɔ di’olimu ndo anto wayosala olimu akɔ . . . . Lekɔ lo nanga nkimɔ weshasha ɛnɛ l’ɔtɛ w’okongamelo anyu. Lakaambe lo menda woho wele lɔngɛnyi lele lam’asanyu.” Anto efula wa l’andja ɔnɛ haweye Jehowa. Koko efula ka l’atei awɔ sɛdingolaka Ɛmɛnyi wa Jehowa. Ande diesɛ dia mbeya di’etsha aso wa kɛtshi koka nkotola onto otsha le “ɔnɛ lele ɔngɔnyi lo kɛtshi,” lee!​—Ɛf. 2:4.

12. Ngande wele nkɛnɛmɔla kɛtshi ɛlɔ kɛnɛ tɔlɔngɔsɔlaka dikambo dia mfɔnu ka woke? (Ɛnyɛlɔ 13:16, 17)

¹² Lande na kayotonga l’ohomba wa mɛnyanya kɛtshi lo mfɔnu ka woke? Bible mɛnyaka dia wanɛ wele hawotosukɛ mandji ya l’andja ɔnɛ wayohomana l’ekakatanu l’etena kɛnɛ ndo lo mfɔnu ka woke. (Adia Ɛnyɛlɔ 13:16, 17.) Anangɛso l’akadiyɛso koka monga l’ohomba w’ekimanyielo ka kɛnɛ kele la wɔ ohomba dia nsɛna. Etena kayoya Nkumekanga kaso, Yeso Kristo, dia ndjolanya anto, sho kombolaka dia nde totana tɛnyanya kɛtshi ndo tele suke dia “ndjokita Diolelo.”​—Mat. 25:34-40.

13. Oko wadiɛnya Rɔmɔ 15:7, ngande wakakeketsha Akristo wa lo ntambe ka ntondo dimama diawɔ dia ngandji?

¹³ Ngandji aki ndjembetelo yakeyamaka Akristo wa lo ntambe ka ntondo. Onde aki wɔdu le wɔ dia vɔ mɛnyanya ngandji? Tɔsɛdingole woho wakatshikitana Akristo wa l’etshumanelo ka la Rɔmɔ. L’atei awɔ komonga tsho ase Juda, wanɛ wakakitanyiyaka ɛlɛmbɛ wa Mɔsɛ, koko aki ndo ase Wedja, wanɛ wele mbekelo yawɔ yakatshikitana tshɛ lo tshɛ. Ondo Akristo amɔtshi waki mfumbe etena kele akina komonga mfumbe, ondo akina waki ndo la waa mfumbe yawɔ hita. Ngande wakakoke Akristo asɔ ntondoya etshikitanu ɛsɔ ndo nkeketsha ngandji kawɔ? Ɔpɔstɔlɔ Pɔɔlɔ akaakeketsha dia vɔ ‘nongɔnaka lam’asawɔ.’ (Adia Rɔmɔ 15:7.) Kakɔna kakandalange mbuta? Tshɛkɛta yokadimɔmi ɔnɛ “nyolongɔnake” nembetshiyaka nongola onto ɔmɔtshi la ngandji tshɛ kana la lokaho tshɛ, ɛnyɛlɔ oko lo luudu l’onto kana monga angɛnyi la wɔ. Ɛnyɛlɔ, Pɔɔlɔ akatɛ Filɛmɔna dia nde nongola Ɔnɛsimo laki mfumbe kakalawɔ ate: “Longolande dimɛna.” (Filɛ. 17) Ndo Piriskila la Akula wakalongola Apolo, ɔnɛ laki kombeyaka akambo efula wendana la Lokristo oko wakaweyaka ndo ‘wakawɔshi oko ɔngɛnyi awɔ.’ (Ets. 18:26) Lo dihole dia vɔ mbetawɔ di’otshikitanu ɔsɔ mbidja diatɔnelo lam’asawɔ, Akristo asɔ wakekola wekamu ɛsɔ ndo wakalongɔna lam’asawɔ.

14. Ngande wakɛnya Anna nde l’omɛnde ngandji?

¹⁴ Sho la wɔ nto koka mɛnya anangɛso l’akadiyɛso ngandji lo nkoma angɛnyi awɔ ndo lo mbetshaka wenya kaamɛ la wɔ. Lo wedi awɔ, vɔ la wɔ nto wayotɛnya ngandji. (2 Kɔr. 6:11-13) Tɔsɛdingole kɛnɛ kakakomɛ Anna nde l’omɛnde. Yema tshitshɛ l’ɔkɔngɔ wa vɔ mbatoma oko waa misiɔnɛrɛ lo ɛstɛ k’Afrikɛ, hemɔ ka COVID-19 kakatatɛ. Oko wakiwɔ weke eyoyo, vɔ kokoka mɛnana l’ase etshumanelo kawɔ okoko l’okoko. Ngande wakakoke atshukanyi asɔ mbowaɛnya ngandji? Vɔ wakakambe la vidɛo kɔfɛransɛ dia nsawola l’anangɛso l’akadiyɛso waki lɛkɔ ndo mbowatɛ polo lo yɛdikɔ yakɔna yakombolawɔ vɔ mbowaeya dimɛna. Nkumbo shɔ yakanandema ndo wakayotatɛka mbelanɛ lo telefɔnɛ ndo fundanɛ mesajɛ mbala la mbala. Lande na kakasale waa misiɔnɛrɛ ɛsɔ tshɛ kakawakoke nsala dia mbeya anangɛwɔ ndo akadiyɛwɔ wa l’etshumanelo k’oyoyo? Anna mbutaka ate: “Etsha wa ngandji wakawamɛnya ndo wakawɛnya nkumbo kaso lo ntena di’amɛna ndo lo ntena dia kɔlɔ, akananda otema ami efula ndo dui sɔ diakatshikala lo wɔɔngɔ ami. Bɛnyɛlɔ diawɔ diakatshutshuya dia dimi mɛnya ngandji.

15. Wetshelo akɔna wamboyokondja oma l’ɛnyɛlɔ ka Vanessa lo kɛnɛ kendana la mboka anangɛso l’akadiyɛso tshɛ ngandji? (Enda ndo osato.)

 ¹⁵ Efula ka l’atei aso tekɔ lo tshumanelo diokengami l’anangɛso ndo akadiyɛso woye oma l’ahole wotshikitanyi ndo wele la lonto lotshikitanyi. Sho koka nkeketsha ngandji kaso lewɔ vɔ tshɛ lo mbika washo lo waonga awɔ w’amɛna. Kadiyɛso kelɛwɔ Vanessa, kadjasɛ la Nouvelle-Zélande, aki l’okakatanu wa mbekesanɛ l’ase etshumanelo kande amɔtshi. Oma laasɔ, nde akɔshi yɛdikɔ mɔtshi, lo dihole dia nde mbewɔ anto wele la waonga wa wotsha nkɛlɛ, nde akahombe mbetshaka wenya efula kaamɛ la wɔ. Nsala dui sɔ akokimanyiya dia nde mɛna kɛnɛ kalanga Jehowa otsha le wɔ. Nde mbutaka ate: “Lam’akatatɛ omɛmi nkamba oko omendji w’otshimbedi, toleka mbetsha wenya efula kaamɛ l’anangɛso ndo akadiyɛso wele la lonto lotshikitanyi ndo lambɛna dia ekɔ wɔdu mbokana la wɔ. Kakianɛ lɔngɛnangɛna otshikitanu ɔsɔ. Mɛnamaka hwe dia Jehowa nangaka dui sɔ nto, nɛ dia anto wetawɔnde dia mbɔtɛmɔla vɔ tshɛ tshikitana lam’asawɔ.” Etena kekaso dia mɛna anto akina woho wawaɛna Jehowa, sho mɛnyaka ngandji kawaokaso.​—2 Kɔr. 8:24.

16. Lande na kayonga ngandji ohomba efula l’etena ka mfɔnu ka woke? (Enda ndo osato.)

¹⁶ Ngandji kayonga dui di’ohomba efula lo mfɔnu ka woke. Etena kayotatɛ mfɔnu ka woke, lende ayototana ekokelo? Tɔsɛdingole kɛnɛ kakatɛ Jehowa ekambi ande dia nsala etena kakalɔshama Babilɔna k’edjedja: “Anto ami le, nyotshu nyɔtɔ lo mvudu ya l’etei, ndo nyodihe nkuke yanyu. Nyoyashɛ lo tshanda ya tshitshɛedja ndo nkɛlɛ kambeta.” (Isa. 26:20) Mɛnamaka dia ɛtɛkɛta ɛsɔ kambemaka ndo le so etena kayotonga lo mfɔnu ka woke. “Mvudu ya l’etei” mbeyaka nembetshiya tshumanelo diaso. L’etena ka mfɔnu ka woke, Jehowa tolakaka dia nde ayotokokɛ naka sho ntetemala mbokambɛ kaamɛ l’anangɛso ndo akadiyɛso. Diakɔ diele, sho pombaka nkamba la wolo kakianɛ dia nkɛnɛmɔla ngandji k’efula otshale anangɛso ndo akadiyɛso. Ondo eko kaso koka nemanɛ la dui sɔ!

17. Naka sho ndjalɔngɔsɔla oma ko kakianɛ, kakɔna kayotonga l’akoka wa nsala lo mfɔnu ka woke?

¹⁷ “Lushi la woke la Jehowa” layonga etena k’okakatanu efula le anto tshɛ. (Zɛf. 1:14, 15) Ekambi wa Jehowa wayosowa ndo vɔ la wɔ. Koko naka sho ndjalɔngɔsɔla oma ko kakianɛ, kete tayonga l’akoka wa ntshikala ki ndo nkimanyiya anto akina. Tayokikɛ okakatanu tshɛ wayohomana la so. Etena kayosowa asekaso ambetawudi, tayosala tshɛ kakokaso nsala dia mbasha ekimanyielo lo mbowaɛnya kɛtshi ndo mbowasha kɛnɛ kewɔ la tɔ ohomba. Ndo tayotshikala suke suke l’anangɛso ndo akadiyɛso, wanɛ wambotoshilaka mɛnyanya ngandji. Oma laasɔ, Jehowa ayotofuta lo tosha lɔsɛnɔ la pondjo l’andja wele mpokoso tshɛ ndo asui wayohamamɛ.​—Isa. 65:17.