1. Lo yoho yakɔna yakoka Akristo monga oko osongo? (Enda ndo osato.)

 YOKEDI mɔtshi mbutaka ɔnɛ: “Lɔpɛpɛ hɔkɔlaka osongo wakoka nkotama.” Dui sɔ mɛnyaka dia esongo pombaka kotamaka lɛnɛ la lɛnɛ etena kapɛpa lɔpɛpɛ diaha vɔ mbɔkɔ esadi eto. Dia mpama lo nyuma, Akristo pombaka ndjaɔtɔnganyiyaka ndo monga suke dia nkotama. Lo woho akɔna? Sho pombaka monga l’ekanelo k’ɔlɔlɔ lo ndjaɔtɔnganyiyaka etena kasalema etshikitanu lo lɔsɛnɔ laso ndo nɛmiya tokanyi ndo tɛdikɔ t’anto akina.

2. Waonga akɔna wayotokimanyiya dia ndjaɔtɔnganyiya la awui wahomana la so lo lɔsɛnɔ ndo kakɔna kayotɔsɛdingola lo sawo nɛ?

² Oko ekambi wa Jehowa, sho pombaka monga l’ekanelo k’ɔlɔlɔ. Sho nangaka nto monga l’okitshakitsha ndo la kɛtshi. Lo sawo nɛ, tayɛna woho wakakimanyiya waonga asɔ Akristo amɔtshi dia ntondoya etena kakatshikitana nsɛnɔ yawɔ. Tayɛna nto woho wakoka waonga asɔ tokimanyiya. Dia ntatɛ, nyɛsɔ tokondja wetshelo oma le Jehowa nde la Yeso, wanɛ wele bɛnyɛlɔ dia kokele diendana la ekanelo k’ɔlɔlɔ.

3. Kakɔna katoshikikɛ dia Jehowa ekɔ l’ekanelo k’ɔlɔlɔ?

³ Jehowa mbelamɛka ɔnɛ “Dive” nɛ dia nde tshikalaka nge, nshikimala. (Eoh. 32:4) Koko, nde ekɔ nto l’ekanelo k’ɔlɔlɔ. Oko watatshikitana awui wa l’andja ɔnɛ, Nzambi kaso mongaka suke dia ndjaɔtɔnyiya ndo ndjashikikɛka dia ɛngɔ tshɛ kakandalake kayokotshama. Jehowa akatonge anto l’efanelo kande la dikoka dia nsala etshikitanu etena katshikitana awui lo lɔsɛnɔ laso. Nde akatosha atɔndɔ wokɛma hwe watokimanyiya dia mbɔsa tɛdikɔ ta lomba oyadi ekakatanu wakoka mpomana la so. Ɛnyɛlɔ ka Jehowa ndamɛ ndo atɔndɔ wakandatosha toshikikɛka dia nde ekɔ “Dive,” mbutaka ate Jehowa ekɔ nto l’ekanelo k’ɔlɔlɔ.

4. Sha ɛnyɛlɔ kɛnya woho wele Jehowa l’ekanelo k’ɔlɔlɔ. (Lɛw. 5:7, 11)

 ⁴ Mboka ya Jehowa yokongaka kokele ndo nde ekɔ l’ekanelo k’ɔlɔlɔ. Nde bu awui wolo otsha le anto. Tɔsɛdingole ɛnyɛlɔ ka woho wakɛnya Jehowa ekanelo k’ɔlɔlɔ otsha le ase Isariyɛlɛ. Nde kɔnɔmbaka olambo akɔ waamɛ le onto tshɛ, oyadi kanga ɔngɔnyi kana kanga woola. L’awui amɔtshi, nde aketawɔka di’onto l’onto nkimɔ olambo lo ndjela awui wele la nde.​—Adia Akambo w’ase Lɛwi 5:7, 11.

5. Sha ɛnyɛlɔ kɛnya okitshakitsha ndo kɛtshi ka Jehowa.

⁵ Okitshakitsha wa Jehowa ndo kɛtshi kande mbotshutshuyaka dia monga l’ekanelo k’ɔlɔlɔ. Ɛnyɛlɔ, okitshakitsha wa Jehowa wakɛnama hwe etena kakandalanya anto wa kɔlɔ wa lo Sɔdɔma. Lo tshimbo y’andjelo ande, Jehowa akatɛ Lɔta laki onto ɔlɔlɔ dia nde ndawɔ otsha lo lɛkɛ l’akona. Lɔta aki la wɔma wa ntshɔ otsha lo dihole sɔ. Ɔnkɔnɛ, nde akɔsɛngasɛnga dia nde la nkumbo kande ntshɔ la Zɔara, ngielongelo mɔtshi ya tshitshɛ yakahombe Jehowa ndanya. Jehowa otokoka nkɔkɔmiya Lɔta dia paka nde ndjela ɛlɔmbwɛlɔ Kande. Koko, nde aketawɔ dia Lɔta ntshɔ otsha la Zɔara ndo Nde kondanya osomba akɔ. (Etat. 19:18-22) Ntambe efula l’ɔkɔngɔ, Jehowa akayɛnya kɛtshi kande otsha le ase Niniva. Nde akatome omvutshi Jɔna dia tewoya dia keema edja nde ayanga ndanya osomba ɔsɔ. Koko etena kakayatshumoya ase Niniva, Jehowa akawaoke kɛtshi ndo kombetawɔ dia vɔ ndanyema.​—Jɔna 3:1, 10; 4:10, 11.

6. Sha ɛnyɛlɔ ka woho wakokoya Yeso ekanelo k’ɔlɔlɔ ka Jehowa

⁶ Yeso akokoya ekanelo k’ɔlɔlɔ ka Jehowa. Nde akatomama lanɛ la nkɛtɛ dia ndjosambisha “ɛkɔkɔ wakashishɔ wa lo luudu l’Isariyɛlɛ.” Koko nde akɛnya ekanelo k’ɔlɔlɔ etena kakandakotshaka ɔkɛndɛ ande ɔsɔ. Lo diaaso dimɔtshi, womoto ɔmɔtshi laki komonga ose Isariyɛlɛ akɔsɛngasɛnga dia nde nkɔnɔla ɔnande ɔmɔtshi la womoto ‘lakahɛnyahɛnyamaka oma le ɛdiɛngɛ,’ la kɛtshi tshɛ Yeso aketawɔ kɛnɛ kakɔlɔmbaka ɔna womoto ɔsɔ ndo nde akakɔnɔla ɔnande la womoto. (Mat. 15:21-28) Tɔsɛdingole ɛnyɛlɔ kekina. L’etatelo k’olimu ande, Yeso akɛnya hwe ɔnɛ: “Onto tshɛ lamanguna . . . , dimi lawɔ layowanguna.” (Mat. 10:33) Ko onde nde akanguna Petero ɔnɛ lakawanguna mbala shato? Ndooko. Yeso akeyaka dia Petero akanyange efula lo kɛnɛ kakandasale ndo nde aki pami kaki la kɔlamelo y’efula. L’ɔkɔngɔ wa eolwelo kande, Yeso akɛnama le Petero ndo ondo dui sɔ diakoshikikɛ dia nde akodimanyiya ndo nde akawokaka ngandji.​—Luka 24:33, 34.

7. Lo yoho yɔtɔnɛ la Filipɛ 4:5, lokumu lakɔna lakombolaso monga la lɔ?

⁷ Takɛnyi dia Jehowa nde la Yeso wekɔ l’ekanelo k’ɔlɔlɔ. Kayotota lo dikambo diaso? Jehowa nongamɛka dia sho monga l’ekanelo k’ɔlɔlɔ. (Adia Filipɛ 4:5.) Ekadimwelo kɛmɔtshi ka Bible mbutaka ɔnɛ: “Ɛnya oma l’etsha ayɛ dia wɛ ekɔ l’ekanelo ka yimba k’ɔlɔlɔ.” Sho koka ndjambola ɔnɛ: ‘Onde anto mɛnaka dia dimi lekɔ l’ekanelo ka yimba k’ɔlɔlɔ, halotshininala lo nkanyi ndo onto lanya yimba oma lo dikambo? Kana vɔ mbɔsakami dia lekɔ awui wolo, djawudi, kana onto lambɔsa yɛdikɔ ko  hatola? Onde dimi tshininalaka dia paka anto akina nsala akambo lo yoho yafɔnyami dia vɔ pombaka salema? Kana onde dimi pokamɛka anto akina ndo kitanyiyaka kɛnɛ kakombolawɔ naka dui sɔ diekɔ ohomba?’ Etena tshɛ kayotɛnyaka dia tekɔ l’ekanelo k’ɔlɔlɔ, mbayotokoyaka Jehowa nde la Yeso. Nyɛsɔ tɔsɛdingole awui ahende wahombaso mɛnya ekanelo k’ɔlɔlɔ, etena katshikitana awui wa lo lɔsɛnɔ l’onto ndo etena katshikitana tokanyi ndo tɛdikɔ t’anto akina la taso.

8. Kakɔna kakoka tokimanyiya dia monga l’ekanelo k’ɔlɔlɔ etena katshikitana akambo? (Enda ndo nɔtɛ.)

⁸ Tekɔ l’ohomba wa monga l’ekanelo k’ɔlɔlɔ etena katshikitana awui lo lɔsɛnɔ laso. Etshikitanu ɛsɔ mbeyaka tokonya l’ekakatanu weso hatolongamɛki. Sho mbeyaka mpomana l’ekakatanu wa shashimoya wendana la yoonge. Kana etshikitanu wendana l’ekondjelo kana waa awui wa pɔlitikɛ weso hatolongamɛ wasalema lɛnɛ odjashiso mbeyaka mbetɛ lɔsɛnɔ laso ololo. (Ond. 9:11; 1 Kɔr. 7:31) Kaanga otshikitanu wendana la ɔkɛndɛ wa lo teokrasi mbeyaka todja l’ohemba. Oyadi etshikitanu akɔna wambohomana la so, sho kokaka ntondoya lo ndjaɔtɔnganyiya l’awui w’eyoyo wambotohomana la wɔ naka sho ndjela wanya anɛi wayela anɛ: 1) mbetawɔ akambo woho wewɔ, 2) enda kɛnɛ kahombayɛ nsala lo nshi yayaye, ndo leka mbidja yimba lo awui w’ohomba, 3) leka mbidja yimba lo awui w’amɛna wa lo lɔsɛnɔ layɛ, ndo 4) salɛ anto akina akambo. b Tende woho wakakondja anangɛso ndo akadiyɛso wahɔ lo ntakola wanya asɔ.

9. Ngande wakalɔshana atshukanyi amɔtshi waki waa misiɔnɛrɛ la ehemba wakiwɔ konongamɛka?

⁹ Etawɔ akambo woho wewɔ. Emanuele nde la Francesca wakatomama oko waa misiɔnɛrɛ lo wodja ɔmɔtshi w’angɛndangɛnda. Kamakawatatɛ mbeka ɔtɛkɛta wa lɛkɔ ndo kakawatatɛ mbeya anangɛso ndo akadiyɛso wa l’etshumanelo k’oyoyo, ko hemɔ ka COVID-19 kambotatɛ ndo vɔ wakahombe mangana l’anto. Oma laasɔ, nyango aki Francesca akavu la shashimoya. Francesca akakombolaka efula monga kaamɛ la nkumbo kande, koko takandakoke minda lɔkɛndɔ l’ɔtɛ wa hemɔ ka COVID-19. Kakɔna kakokimanyiya dia nde ndɔshana l’ekakatanu ɛsɔ? Dui dia ntondo, Emanuele nde la Francesca wakalɔmbaka kaamɛ dia nkondja lomba la ndɔshana l’ɔkɛyi w’efula waki la wɔ. Jehowa akakadimola alɔmbɛlɔ awɔ lo mbatomɛ mbo ya ndɛ ya lo nyuma la wonya. Ɛnyɛlɔ, vɔ wakakeketshama oma lo kɛnɛ kakate ɔnangɛso ɔmɔtshi lo vidɛo mɔtshi ɔnɛ: “Kamawetawɔso etshikitanu wambohombana la so lo lɔsɛnɔ, mbele aha la ntshimbatshimba ɔngɛnɔngɛnɔ aso kalolaka kaamɛ la diaaso dia nkamba dimɛna l’awui wambotokomɛ.” c Dui dia hende, vɔ wakɔshi yɛdikɔ ya ndjalowanya l’esambishelo ka lo telefɔnɛ ndo vɔ wakatatɛ kaanga mbeka l’onto Bible. Dui dia sato, la lowando tshɛ vɔ waketawɔ ekeketshelo ka la ngandji ndo osukɔ w’oma le anangɛso. Kadiyɛso kɛmɔtshi k’ɔlɔlɔ akaatomɛka mesajɛ wa mondo wele la divɛsa dia lo Bible lushi la lushi l’edja k’ɔnɔnyi w’otondo. Naka ndo sho lawɔ mbetawɔ awui wambotokomɛ lo lɔsɛnɔ, kete tayonga l’ɔngɛnɔngɛnɔ lo kɛnɛ keso l’akoka wa nsala.

10. Ngande wakayaɔtɔnganyiya kadiyɛso kɛmɔtshi la otshikitanu wa woke wa lo lɔsɛnɔ lande?

¹⁰ Enda kɛnɛ kahombayɛ nsala lo nshi yayaye, ndo leka mbidja yimba lo awui w’ohomba.  Christina, kadiyɛso kɛmɔtshi k’ose Roumanie kadjasɛ la Japon, akakɔmɔ etena kakawatola etshumanelo ka l’ɔtɛkɛta w’Angɛlɛ kakandɔtɔka. Koko, nde kotetemala mbidja yimba lo kɛnɛ kakandashile la nsala. Koko nde akɔshi yɛdikɔ ya ntshɔ l’etshumanelo ka l’ɔtɛkɛta wa Japonais ndo nde akasale kɛnɛ tshɛ kakandakoke nsala dia nsambisha l’ɔtɛkɛta ɔsɔ. Nde akalɔmbɛ osekande la l’olimu dia nde mbokimanyiya woho wa nde ntɛkɛta Japonnese dimɛna. Womoto akɔ aketawɔ dia nkamba la Bible ndo la biukubuku Ngɛnangɛnaka la lɔsɛnɔ pondjo pondjo! dia mbetsha Christina Japonais. Ɔnkɔnɛ, Christina akeke dia mbeya ntɛkɛta Japonais dimɛna, koko kɛnɛ koleki tshɛ ohomba ele womoto akɔ aketawɔ mbeya awui efula wendana la Bible. Etena kahatadje yimba lo awui wakete lo nshi y’edjedja ndo kongaso la yimba y’ɔlɔlɔ, etshikitanu wahatalongamɛ kokaka tokonya l’awui w’amɛna weso konongamɛka.      

11. Kakɔna kakakimanyiya atshukanyi amɔtshi wakahomana l’okakatanu wendana l’ekondjelo?

¹¹ Salɛ anto akina akambo. Atshukanyi amɔtshi wadjasɛ lo wodja ɔmɔtshi wa lɛnɛ ele olimu aso wakashimbama wakashisha ekondjelo kawɔ etena kakalana awui wendana l’ekondjelo lo wodja. Ngande wakawayaɔtɔnganyiya? Dui dia ntondo, vɔ wakahembe dia nkitshakitsha adepasɛ awɔ. Dui dikina, lo dihole dia ndeka mbidja yimba l’ekakatanu awɔ, vɔ wakɔshi yɛdikɔ ya ndeka mbetsha wenya l’olimu w’esambishelo. (Ets. 20:35) Omi akate ate: “L’ɔtɛ wakatalekaka ndjasha l’olimu w’esambishelo, sho komongaka la wenya efula wa nkanyiya dikambo di’ekakatanu aso ndo takalekaka monga la wenya efula wa nsala kɛnɛ kakombola Nzambi dia sho nsala.” Etena katshikitana awui wele la so, sho pombaka mbohɔka ohomba wa ntetemala nkimanyiya anto akina, djekoleko lo nsambisha.

12. Ngande wakoka ɛnyɛlɔ ka ɔpɔstɔlɔ Pɔɔlɔ tokimanyiya dia sho ndjaɔtɔnganyiya l’awui wotshikitanyi wahomanaso la wɔ l’esambishelo?

¹² Tekɔ l’ohomba wa ndjaɔtɔnganyiya l’olimu aso w’esambishelo. Sho pomanaka l’anto wele la waetawɔ ndo nkɛwɔ yotshikitanyi ndo wanɛ woye oma l’ahole ndo mbekelo yotshikitanyi. Ɔpɔstɔlɔ Pɔɔlɔ akayaɔtɔnganyiyaka ndo sho koka nkondja wetshelo oma l’ɛnyɛlɔ kande. Yeso akasɔnɛ Pɔɔlɔ oko “ɔpɔstɔlɔ w’ase wedja.” (Rɔmɔ. 11:13) Lo ɔkɛndɛ ande ɔsɔ, Pɔɔlɔ akasambisha ase Juda, ase Ngirika, wanɛ wakɔtɔ kalasa efula, ase wola, ewandji wa laadiko ndo nkumi ya dikanga. Dia minanda etema wa weho w’anto tshɛ asɔ, Pɔɔlɔ “akayala akambo tshɛ le weho w’anto tshɛ.” (1 Kɔr. 9:19-23) Nde akaleke mbidja yimba oma lo ahole wakaye anto asɔ ndo waetawɔ awɔ. Dui sɔ diakokimanyiya dia nde ndjaɔtɔnganyiya ndo ntɛkɛta l’onto tshɛ lo yoho yakoka mbosukanya la Nzambi. Sho lawɔ koka nto ndowanya esambishelo kaso naka sho ndjaɔtɔnganyiyaka ndo tshikitanyaka mbɔtwɛlɔ yaso lo ndjela eyango w’ampokami aso.

13. Waale akɔna wɔtɛkɛtami lo 1 Kɔrɛtɔ 8:9 wakokaso mbewɔ naka talanga nɛmiya tokanyi t’anto akina?

¹³ Ekanelo k’ɔlɔlɔ koka tokimanyiya nto dia nɛmiya tokanyi t’anto akina. Ɛnyɛlɔ, akadiyɛso amɔtshi nangaka ndjalɛnga etena kele akina hawolange nsala dui sɔ. Akristo amɔtshi nangaka nnɔ wanu la wɛdimo, koko akina hawolange ndɛta kaanga yema. Akristo tshɛ kombolaka monga la yoonge ya dimɛna, koko vɔ sɔnaka toho t’esakelo totshikitanyi. Naka sho fɔnyaka mbala tshɛ dia sho mbele la shadiya ndo sho salaka la wolo dia mbetawoya anangɛso l’akadiyɛso dia nsala dui diakombolaso, kete dui sɔ koka ntakanya anto akina ndo mbidja diatɔnelo. Hatokombola nsala dui sɔ! (Adia 1 Kɔrɛtɔ 8:9; 10:23, 24) Tɔsɛdingole  bɛnyɛlɔ pende diɛnya woho wele nkamba l’atɔndɔ wa l’Afundelo koka tokimanyiya dia monga la wɛdimo ndo ntetemala nama wɔladi.

14. Naa atɔndɔ wa lo Bible wahombaso namaka lo yimba etena kɔsaso tɛdikɔ lo kɛnɛ kendana la ɔlɔtɔ ndo la ɔlɔngɔswɛlɔ aso wa divo?

¹⁴ Ɔlɔtɔ ndo ɔlɔngɔswɛlɔ wa divo. Jehowa hatotɛ kɛnɛ kahombaso ndɔta, koko nde akatosha atɔndɔ wahombaso ndjela. Sho ndɔtaka lo yoho yasungana l’ekambi washa Nzambi, mbuta ate la wɛdimo ndo la “yimba y’ɔlɔlɔ.” (1 Tim. 2:9, 10; 1 Pe. 3:3) Koko hatosale dia nkotola yambalo y’anto tshanana oma lo yoho yaso ya ndɔta. Atɔndɔ wa lo Bible wayokimanyiya nto dikumanyi dia mbewɔ dia mbidja ɛlɛmbɛ awɔ hita lo kɛnɛ kendana la ɔlɔtɔ ndo la ɔlɔngɔswɛlɔ wa divo. Ɛnyɛlɔ, dikumanyi dia l’etshumanelo kɛmɔtshi wakakombola nkimanyiya ɛlɔngɔlɔngɔ wanɛ wakokoya yoho ya minya divo y’ɛlɔngɔlɔngɔ wakaadinge lo tshikaka divo toshidika aha la nsakola. Ngande wakakoke dikumanyi mbaakimanyiya aha la mbidja ɛlɛmbɛ awɔ hita? Omendji w’otshimbedi akasha dikumanyi sɔ alako dia vɔ ndaka anangɛso asɔ tshɛ ɔnɛ: “Naka wɛ ekɔ lo lɔyɛnga ko ampokami wamboleka nkotola yambalo yawɔ lo ɛnamelo kayɛ lo dihole dia mbidja yimba lo kɛnɛ katayɛ, kete yoho yayɛ ya ndɔta la yoho yayɛ ya minya divo bu dimɛna.” Olembetshiyelo wa wɔdu ɔsɔ wakahombe nkimanyiya anangɛso w’ɛlɔngɔlɔngɔ dia vɔ nshihodia kɛnɛ kakawahombe nsala ndo dikumanyi komonga l’ohomba wa mbidja ɛlɛmbɛ awɔ hita. d

15. Naa ɛlɛmbɛ l’atɔndɔ wa lo Bible watokimanyiya etena kɔsaso tɛdikɔ tendana l’esakelo aso? (Rɔmɔ 14:5)

¹⁵ Yoonge ya dimɛna. Okristo tshɛ pombaka mbɔsa yɛdikɔ lo woho wakokande nkokɛ yoonge yande hita. (Ngal. 6:5) Etena kasɔna Akristo yoho mɔtshi y’osakelo, vɔ pombaka  nkitanyiya ɛlɛmbɛ wa lo Bible wendana la mbewɔ dikila ndo diɔtɔnganelo dia l’ɛdiɛngɛ. (Ets. 15:20; Ngal. 5:19, 20) Koko lo wedi okina, vɔ koka mbɔsa yɛdikɔ lo kɛnɛ kendana la yoho y’osakelo yakokawɔ mbetawɔ. Amɔtshi nyangaka ekimanyielo oma le aseka enganga lo kɛnɛ kendana la yoho y’esakelo awɔ. Koko akina kombolaka toho tokina t’esakelo. Sho koka monga l’eshikikelo dia yoho y’esakelo mɔtshi shikaa koka monga la wahɔ kana bu, koko sho pombaka nɛmiya lotshungɔ lele l’anangɛso l’akadiyɛso la vɔ mbɔsa tɛdikɔ tawɔ hita lo kɛnɛ kendana la esakelo. Dia nsala dui sɔ, sho pombaka ntetemala namaka lo yimba awui anɛi wayela anɛ. 1) Paka Diolelo diaki Nzambi mbayela anto yoonge ndo ɔkɔnwɛlɔ wa kokele. (Isa. 33:24) 2) Okristo tshɛ pombaka ‘monga l’eshikikelo’ lo kɛnɛ koleki dimɛna le nde. (Adia Rɔmɔ 14:5.) 3) Sho hatolombosha anto akina l’ɔtɛ wa tɛdikɔ tawɔ ndo hatosale ndooko dikambo diakoka mbatakanya. (Rɔmɔ 14:13) 4) Akristo mɛnyanyaka ngandji ndo vɔ shihodiaka dia kaamɛ ka l’etshumanelo mbele dui dioleki tshɛ ohomba oleki tokanyi tawɔ hita. (Rɔmɔ 14:15, 19, 20) Naka sho ntetemala nama awui asɔ lo yimba, kete tayotetemala monga la lɔngɛnyi la ma ma l’anangɛso l’akadiyɛso ndo tayokimanyiya dia wɔladi monga l’etshumanelo.

16. Ngande wakoka ekumanyi kɛmɔtshi mɛnya dia nde ekɔ l’ekanelo k’ɔlɔlɔ lo kɛnɛ kendana la diɔtɔnganelo diasande la dikumanyi dikina? (Enda ndo esato.)

¹⁶ Dikumanyi pombaka mbisha ɛnyɛlɔ k’ɔlɔlɔ lo kɛnɛ kendana la monga l’ekanelo k’ɔlɔlɔ. (1 Tim. 3:2, 3) Ɛnyɛlɔ, ekumanyi hahombe nongamɛ dia tokanyi tande tayetawɔmaka mbala tshɛ l’ɔtɛ wende ekumanyi koleki opalanga l’olui wa dikumanyi. Nde mbeyaka dia nyuma k’ekila ka Jehowa koka ntshutshuya ekumanyi tshɛ ka l’olui wa dikumanyi dia mbuta dui dimɔtshi diayowakimanyiya dia mbɔsa yɛdikɔ ya lomba. Naka dikumanyi efula wambetawɔ yɛdikɔ mɔtshi yahalɔshana l’atɔndɔ wa lo Bible, kete ekumanyi kele l’ekanelo k’ɔlɔlɔ ayetawɔ yɛdikɔ shɔ kaanga awui hasadimi lo yoho yakandakombolaka.

17. Wahɔ akɔna wakondja Akristo wele l’ekanelo k’ɔlɔlɔ?

¹⁷ Etena kongaso l’ekanelo k’ɔlɔlɔ sho kondjaka wahɔ lo toho efula. Sho mongaka la diɔtɔnganelo dia dimɛna lam’asaso l’anangɛso l’akadiyɛso ndo etshumanelo mongaka lo wɔladi. Sho ngɛnangɛnaka woho wele ekambi wa Jehowa la lonto lotshikitanyi ndo la mbekelo yotshikitanyi l’atei awɔ. Dui dioleki tshɛ ele, sho mongaka l’ɔlɔ lo mbeya dia tekɔ lo mbokoya ekanelo k’ɔlɔlɔ ka Jehowa Nzambi kaso.