Bible mɛnyaka hwe dia Jehowa koka mbuta awui wayosalema lo nshi yayaye. (Isa. 45:21) Tɔ hatotɛ kiambokambo tshɛ yendana la woho kana etena kasɔnande dia nsala dui sɔ kana lofulo l’akambo lasɔnde dia mbeya. Laasɔ, sho hatokoke mbeya kiambokambo tshɛ yendana la dikoka diele la Jehowa dia mbuta awui wayosalema lo nshi yayaye. Koko ekɔ awui angana wahombaso nshihodia.

Jehowa bu l’elelo onyake elelo wayadjɛnde ndamɛ. Lam’ele nde ekɔ la lomba laha l’elelo, nde koka mbewoya la ntondo kiambokambo tshɛ yasɔnande dia mbewoya. (Rɔmɔ 11:33) Lam’ele nde ekɔ la ndjakimɛ ka kokele, nde koka nto nsɔna diaha mbeya kɛnɛ kayosalema.—Ɛdika la Isaya 42:14.

Jehowa salaka dia lolango lande salema. Ngande wɔtɔnɛ dikambo sɔ la dikoka diele lande dia mbuta awui wayosalema lo nshi yayaye? Isaya 46:10 mbutaka ɔnɛ: “Oma ko etatelo, dimi lakatatshi akambo wakahombe ndjosalema, ndo oma ko nshi y’edjedja akambo wahatasalema. Dimi lambota nte: ‘Yɛdikɔ yami hayototɔ, ndo dimi layosala kɛnɛ tshɛ kalangami.’”

Ɔnkɔnɛ, ɔkɔkɔ ɔmɔtshi wele Jehowa koka mbuta kɛnɛ kayosalema lo nshi yayaye ele nde ekɔ la wolo wa nsala di’akambo salema. Nde keema l’ohomba wa mbeya kakɔna kayosalema lo nshi yayaye, oko watotendaka filimɛ kɛmɔtshi ko ndjambola woho wayokomɛ filimɛ kakɔ. Koko, Jehowa koka shikikɛ dia dui dimɔtshi diayosalema l’etena kɛmɔtshi shikaa, ko oma laasɔ nde nsala dia dui diakɔ salema l’etena kakandashikikɛ.—Eto. 9:​5, 6; Mat. 24:36; Ets. 17:31.

L’ɔkɔkɔ ɔsɔ mbele Bible kambaka la tɔtɛkɛta tele oko “nɔngɔsɔla,” “nkongɛ,” ndo “nsangoya” dia nembetshiya kɛnɛ kasala Jehowa lo kɛnɛ kendana l’awui amɔtshi wa lo nshi yayaye. (2 Nku. 19:25; nɔtɛ.; Isa. 46:11) Tɔtɛkɛta tɔsɔ takakadimɔma oma lo tshɛkɛta ya lo nshi y’edjedja yɔtɔnɛ la tshɛkɛta yalembetshiya “okengi wa mpoke.” (Jɛr. 18:4) Oko wele okengi wa manamana kokaka nkenga ɛngɔ k’olangala efula la diwomba diande, mbele Jehowa koka nkenga kana nkongɛ akambo yoho mɔtshi dia nkotsha lolango lande.—Ɛf. 1:11.

Jehowa nɛmiyaka lotshungɔ la nsɔna lakandasha anto. Nde koshikikɛ la ntondo kɛnɛ kayosalema lo lɔsɛnɔ l’onto l’onto; kana nkonya anto w’ɛlɔlɔ dia nsala dui dimɔtshi diayowakonya l’elanyelo kawɔ. Nde mbishaka onto tshɛ lotshungɔ la nsɔna yoho ya lɔkɛwɔ lahombande monga lalɔ ndo nde mbakeketshaka dia nsɔna lɔkɛwɔ la dimɛna.

Tɔsɛdingole bɛnyɛlɔ dihende. Ka ntondo mendanaka la wanɛ wakadjasɛka la Niniva. Jehowa akate dia osomba ɔsɔ wayolanyema l’ɔtɛ w’awui wa kɔlɔ wakawasalaka lɔkɔ. Koko etena kakayatshumoya anto wa lɛkɔ, Jehowa “akanyomɔsɛdingola mpokoso kakandate dia mbaela ko nde kokiela.” (Jɔna 3:​1-10) Jehowa akatshikitanya yɛdikɔ yande nɛ di’ase Niniva wakakambe la lotshungɔ lawɔ la nsɔna dia ndjatshumoya l’ɔkɔngɔ wa vɔ mboka losango l’ɔhɛmwɛlɔ lakaatomɛ Jehowa.

Ɛnyɛlɔ ka hende ekɔ prɔfɛsiya kendana la Kurɔ ombidji w’otshumba, ɔnɛ lakahombe ntshungola ase Juda lo lɔhɔmbɔ ndo mbidjanga dia tɛmpɛlɔ ka Jehowa nyomohikama nto. (Isa. 44:26–45:4) Nkumekanga Kurɔ k’ose Pɛrɛsiya akakotsha prɔfɛsiya kɛsɔ. (Ɛzr. 1:​1-4) Koko, Kurɔ kɔtɛmɔlaka Nzambi ka mɛtɛ. Jehowa akakambe la Kurɔ dia nkotsha prɔfɛsiya lo ntshika Kurɔ dia nde nkamba la lotshungɔ lande la nsɔna onto lahombande ntɛmɔla.—Tok. 21:1.

Eelo, ongo ekɔ awui angana ato wadja Jehowa yimba lɔkɔ etena kakambande la dikoka diande dia mbeya akambo wayosalema la ntondo. Lo mɛtɛ, ndooko onto lakoka nshihodia tshɛ lo tshɛ mboka ya Jehowa. (Isa. 55:​8, 9) Koko, kɛnɛ kakatosholɛ Jehowa keketshaka mbetawɔ kaso k’ɔnɛ nde salaka nshi tshɛ kɛnɛ kele ɔlɔlɔ kaanga etena katande awui wayosalemale lo nshi yayaye