LUSHI la sato, Ngɔndɔ ka ntondo 18, 2023, diewoyelo dimɔtshi dia laande diakatombe lo jw.org, diewoyelo diakɔ diakate dia ɔnangɛso Gage Fleegle nde la Jeffrey Winder wakasɔnama dia nkamba oko ase Olui-walɔmbɔla w’Ɛmɛnyi wa Jehowa. Anangɛso akɔ ahende wambokambɛ Jehowa la kɔlamelo l’edja k’ɛnɔnyi efula.

Ɔnangɛso Fleegle akole lo owɛstɛ wa Pennsylvanie, U.S.A., oma le ambutshi ande wakokaka Nzambi wɔma. Etena kakinde l’ɛnɔnyi dikumi l’ɛmɔtshi, nkumbo kande kakonɔ otsha l’osomba wa tshitshɛ efula lɛnɛ akiwɔ l’ohomba efula w’apandjudi. Yema tshitshɛ l’ɔkɔngɔ, nde akayobatizamaka lo Ngɔndɔ ka dikumi l’ɔtɔi 20, 1988.

Ambutshi waki Fleegle wakokeketshaka mbala tshɛ dia mbɔsa olimu wa lo tena tshɛ. Mbala efula vɔ wakahangiyaka emendji w’etshimbedi ndo ase nkumbo ka bɛtɛlɛ lakawɔ, ndo ɔnangɛso Fleegle akakokaka mɛna ɔngɛnɔngɛnɔ waki l’anangɛso ndo akadiyɛso asɔ. Yema tshitshɛ l’ɔkɔngɔ wa batisimu kande, nde akatatɛ nkamba olimu w’ombatshi mboka wa pondjo, lo Ngɔndɔ ka divwa 1, 1989. Ɛnɔnyi ehende l’ɔkɔngɔ, nde akakotsha oyango wakandayadjɛ lam’akinde l’ɛnɔnyi 12, oyango wa nkamba lo Bɛtɛlɛ. Nde akatatɛ nkamba lo Bɛtɛlɛ ka la Brooklyn lo Ngɔndɔ ka dikumi 1991.

Lo Bɛtɛlɛ, ɔnangɛso Fleegle akakambe l’edja k’ɛnɔnyi enanɛi lo dihole diakawakakatanyaka abuku, oma laasɔ wakayotomaka dia tokamba lo Departɛma di’olimu. L’etena kɛsɔ, nde akɔtɔka l’etshumanelo kakasalaka nsanganya lo Russe l’edja k’ɛnɔnyi engana. Lo 2006 nde akatshuke kadiyɛso Nadia, lakayoyelaka l’olimu wa lo Bɛtɛlɛ. Ndo vɔ akɔ ahende wakɔtɔka l’etshumanelo ka Portugais ndo l’edja kolekanyi ɛnɔnyi dikumi lo etshumanelo ka Espagnole. L’ɔkɔngɔ wa nde nkamba ɛnɔnyi efula lo Departɛma di’olimu, wakayotomaka ɔnangɛso Fleegle dia nde tokambaka lo biro ka Kɔmite ka wetshelo ndo oma laasɔ, wakayotomaka lo Biro wa Kɔmite k’olimu. Lo Ngɔndɔ ka sato 2022 nde akasɔnama oko okimanyedi lo Kɔmite k’olimu k’Olui-walɔmbɔla.

 Ɔnangɛso Winder akole la Murrieta, Californie, U.S.A. Nde akodiama l’akambo wa mɛtɛ oma le ambutshi ande ndo nde akabatizama lo Ngɔndɔ ka sato 29, 1986. Lo ngɔndɔ yakayele, nde akɔshi yɛdikɔ ya kambaka oko ombatshi mboka wa tshanda. Nde akangɛnangɛnaka olimu ɔsɔ efula ko nde akalangaka ntetemala lawɔ. L’ɔkɔngɔ wa nde nkamba oko ombatshi mboka wa tshanda ngɔndɔ efula, nde akayotatɛka nkamba oko ombatshi mboka wa pondjo lo Ngɔndɔ ka dikumi 1, 1986.

Lam’akinde l’ɛnɔnyi dikumi l’ɛmɔtshi, ɔnangɛso Winder akatshu dia tembola nondo diande pende di’apami diakakambaka lo Bɛtɛlɛ l’etena kɛsɔ. Wembwelo ɔsɔ wakalomialomia nsaki kande ka nde ndodia dɛmandɛ dia nkamba lo Bɛtɛlɛ etena kayondonga opalanga. Ndo lo Ngɔndɔ ka tanu 1990, nde akelamɛ dia tokamba lo Bɛtɛlɛ ka la Wallkill.

Lo Bɛtɛlɛ, ɔnangɛso Winder akatokambaka l’adepartɛma efula wotshikitanyi, mbidja ndo lo Departɛma diendana l’osolelo wa mvudu, Departɛma diendana l’olongelo wa waa nyama, ndo lo Biro ka Bɛtɛlɛ. Nde akatshukana la wadɛnde Angela, lo 1997, ndo vɔ akɔ ahende wakatatɛ nkamba kaamɛ lo Bɛtɛlɛ oma ko etena kɛsɔ. Lo 2014 vɔ wakatomama la Warwick, lɛnɛ akatoshaka ɔnangɛso Winder lonya l’olimu wa wokelo wa Mbalasa kalɔmbɔla olimu aso l’andja w’otondo. Lo 2016 vɔ wakonɔ la Patterson, lɛnɛ asalema kalasa y’okongamelo, lɛkɔ ɔnangɛso Winder akatokambaka lo Audio/Vidéo. Ɛnɔnyi ɛnɛi l’ɔkɔngɔ, vɔ wakayokalolaka la Warwick ndo ɔnangɛso Winder akayotomamaka dia tokamba lo biro ka Kɔmite kenda ase Bɛtɛlɛ. Lo Ngɔndɔ ka sato 2022 nde akasɔnama oko okimanyedi lo Kɔmite kenda ase Bɛtɛlɛ k’Olui-walɔmbɔla.

Tekɔ lo nɔmba Jehowa dia nde ntshɔkɔla efula, ‘apami asɔ wele oko weshasha’ dia vɔ ntetemala la olimu wa wolo wakambawɔ lo wahɔ wa Diolelo.—Ɛf. 4:8.