LO DIAASO dimɔtshi, afundji wa Bible wakakalolɛka ditelo diakɔ diaamɛ tshɛkɛta lo tshɛkɛta. Tɔsɛdingole awui asato wakakoke ntshutshuya afundji asɔ dia vɔ nsala ngasɔ:

Etena kakafundama Bible. Lo Isariyɛlɛ w’edjedja, suke l’anto efula komonga la kɔpi yawɔ y’Ɛlɛmbɛ. Mbala kawɔ ka ntondo kakawokaka wadielo w’Ɛlɛmbɛ ele etena kakawatshumanaka lo tabɛrnaklɛ. (Eoh. 31:​10-12) Ondo mɛtɛ etena kakawahokamɛka wadielo wemema l’edja ka wenya efula l’atei wa leemba l’anto ndo awui amɔtshi wakakokaka mbekelo timba tawɔ. (Nɛh. 8:​2, 3, 7) Lo waaso asɔ, nkalolɛ ditelo di’ohomba akakimanyiyaka anto dia vɔ mbohɔ aha l’okakatanu avɛsa ndo nkamba la wɔ. Nkalolɛ tɔtɛkɛta tɔmɔtshi akakimanyiyaka lo yoho ya laande dia mbohɔ awui efula, ɛnyɛlɔ oko Ɛlɛmbɛ wa Nzambi ndo tɛdikɔ tande ta dombo.—Lɛw. 18:​4-22; Eoh. 5:1.

Toho t’efundelo. Yɛdikɔ yele oko pursa 10 ya kɛnɛ kofundami lo Bible nkengama l’esambo, mbidja ndo dibuku dia Osambo, dibuku dia Lembo la Sɔlɔmɔna ndo Delo dia Jɛrɛmiya. Tena dimɔtshi, l’esambo wakakalolɛka ditelo dimɔtshi di’ɛtɛkɛta, di’ɛtɛkɛta akɔ monga kaamɛ ndo nkimanyiya ampokami dia nkakatshiya ɛtɛkɛta akɔ l’otema. Ɛnyɛlɔ, tolembete ɛtɛkɛta watanaso l’Osambo 115:​9-11: “[Isariyɛlɛ Ie], yaɛkɛ le Jehowa, nde kele ekimanyielo kawɔ ndo engawo kawɔ. Nyu wanɛ woka Jehowa wɔma, nyoyaɛkɛ le Jehowa, nde kele ekimanyielo kawɔ ndo engawo kawɔ.” Shi wɛ koka mɛna woho wele nkalolɛ tɔtɛkɛta tɔsɔ akahombe nkimanyiya amembi dia vɔ nkakatshiya awui wa mɛtɛ asɔ lo timba ndo l’etema awɔ?

Ohomba wa ntɔtɔmiya awui w’ohomba. Tena dimɔtshi afundji wa Bible wakakalolɛka ditelo di’ohomba. Ɛnyɛlɔ, etena kakadjangɛ Jehowa ase Isariyɛlɛ diaha vɔ ndɛ dikila, nde akalɔmbɛ Mɔsɛ dia nkalolɛ ɛkɔkɔ wa dikambo sɔ mbala efula. Nzambi akalangaka ntɔtɔmiya dia mɛnya dia lɔsɛnɔ lekɔ lo dikila, mbuta ate dikila diekɔ didjidji dia lɔsɛnɔ. (Lɛw. 17:​11, 14) L’ɔkɔngɔ diko, etena kakashile apɔstɔlɔ ndo dikumanyi dia la Jɛrusalɛma toho t’ohomba ta mbewɔ nyangiya Nzambi, vɔ wakanyomɔtɔtɔmiya ohomba wa nsɛka dikila.—Ets. 15:​20, 29.

Jehowa konanga dia tshelo ya nkalolɛ tɔtɛkɛta ta l’Afundelo ndjokoma mbekelo kɛmɔtshi. Ɛnyɛlɔ, Yeso akate ate: “Etena kalɔmbanyu, tanyokalolɛke akambo akɔ waamɛ.” (Mat. 6:7) Oma laasɔ, nde akatɛnya akambo wasungana sho nɔmbaka lo dikambo diawɔ lo yoho yɔtɔnɛ la lolango la Nzambi. (Mat. 6:​9-13) Laasɔ, kaanga kahombaso mbewɔka nkalolɛ tɔtɛkɛta takɔ taamɛ mbala la mbala l’alɔmbɛlɔ aso, tekɔ la lotshungɔ la nkalolɛ akambo akɔ waamɛ w’ohomba mbala ko mbala.—Mat. 7:​7-11.

La ɔkɔkɔ w’oshika, Ɔtɛkɛta wa Nzambi wakasambiyama kalolɛka tɔtɛkɛta ndo ditelo dimɔtshi. Ɔsɔ ekɔ yoho mɔtshi l’atei wa toho efula tatetsha Ombetsha aso wa Woke woho wa sho nkondja wahɔ.—Isa. 48:​17, 18.