Koko, Jehowa tɔlɔmbaka dia mbokonga la solo dia lotutsha tshɛ dia nde nsala akambo l’etena kakandashikikɛ. Lande na katɔlɔmbande dui sɔ? Kakɔna kakoka tokimanyiya dia monga l’ɔngɛnɔngɛnɔ etena kakongaso?

LANDE NA KALONGAMƐ JEHOWA DIA SHO NKONGƐ?

Bible mbutaka ɔnɛ: “Jehowa ekɔ lo nkonga la solo dia lotutsha dia nyosalɛ ɔlɔlɔ, ndo nde ayemala dia nyoka kɛtshi. Nɛ dia Jehowa ekɔ Nzambi ka losembwe. Ɔngɛnɔngɛnɔ le wanɛ tshɛ watetemala nongamɛ le nde.” (Isa. 30:18) Ɛtɛkɛta w’Isaya ɛsɔ wakendanaka mbala kakɔ ɔtɔi l’ase Juda waki ɛtɛ wolo. (Isa. 30:1) Koko aki anto amɔtshi waki la kɔlamelo l’atei w’ase Juda ndo ɛtɛkɛta ɛsɔ wakawashaka elongamelo. Ɛtɛkɛta akɔ waamɛ mbishaka ekambi wa Jehowa wa kɔlamelo elongamelo ɛlɔ kɛnɛ.

Sho pombaka nkonga la solo dia lotutsha tshɛ nɛ dia Jehowa ekɔ lo nkonga la solo dia lotutsha. Nde akasɔnɛ etena kayondela ekomelo ka dikongɛ nɛ di’akambo, ndo nde ekɔ lo nkonga dia lushi lakɔ ndo wonya akɔ koka. (Mat. 24:36) L’etena kɛsɔ, ayɛnama hwe di’awui wafunda Diabolo Jehowa ndo ekambi Ande wekɔ kashi. Oma laasɔ, Nde ayonya Satana ndo onto tshɛ leta lo wedi ande, koko Nde ‘ayotoka kɛtshi.’

L’etena kaakatakonge, ondo Jehowa hatotonyɛ ekakatanu wahomana laso, koko nde toshikikɛka dia sho koka monga l’ɔngɛnɔngɛnɔ etena kawokongaso. Oko wakate Isaya, sho koka monga l’ɔngɛnɔngɛnɔ kaanga kambotokongɛ l’etena k’otale kana nongamɛ dui dimɔtshi dia dimɛna salema. (Isa. 30:18) a Ngande wakokaso monga l’ɔngɛnɔngɛnɔ? Wanya anɛi anɛ koka tokimanyiya.

WOHO WAKOKASO MONGA L’ƆNGƐNƆNGƐNƆ ETENA KAKONGASO

Ka washo lo kɛnɛ kele ɔlɔlɔ. Nkumekanga Davidɛ akadiɛnɛ l’akambo efula wa kɔlɔ lo lɔsɛnɔ lande. (Os. 37:35) Koko, nde akafunde ate: “Ɔlama la ntondo ka Jehowa ndo kongaka la elongamelo tshɛ le nde. Totshimbake wɔɔngɔ l’ɔtɛ w’onto latondoya dia nkotsha tokanyi tande.” (Os. 37:7) Davidɛ ndamɛ akakambe la dako sɔ lo mbidja yimba yande l’elongamelo  kande ka mpanda. Ndo nto nde akadjaka yimba l’ɛtshɔkɔ tshɛ wakandalongola oma le Jehowa. (Os. 40:5) Naka sho lawɔ mbika washo l’akambo w’ɛlɔlɔ wa lo lɔsɛnɔ laso aha la mbidja yimba l’ekakatanu aso, kete ayonga dui dia wɔdu le so dia nkongɛ le Jehowa.

Tetemala tombolaka Jehowa. Ofundji w’Osambo wa 71, lele ondo Davidɛ akatɛ Jehowa ate: “Dimi layotetemala kongɛ; layonyomoleka kotombola.” (Os. 71:14) Ngande wakandatombola Jehowa? Nde akahombaka mbitɛ anto akambo akina wendana la Jehowa ndo memba esambo wa mbootombola. (Os. 71:​16, 23) L’ɛnyɛlɔ ka Davidɛ, sho koka monga l’ɔngɛnɔngɛnɔ etena kakongɛso Jehowa. Sho mbotombolaka lo tshimbo y’olimu aso w’esambishelo, lo asawo aso wa lushi la lushi, ndo l’esambo aso. Mbala kayaye kayoyemba osambo ɔmɔtshi wa Diolelo, lande na kahayadje yimba lo losango lakeketsha lele lɔkɔ?

Keketshama oma le anangɛyɛ l’akadiyɛyɛ. Etena kakahomana Davidɛ l’ekakatanu, nde akatɛ Jehowa ate: “Lale anto ayɛ wa kɔlamelo, dimi layolongamɛka lo lokombo layɛ.” (Os. 52:9) Sho lawɔ koka keketshama oma le asekaso ambetawudi wa kɔlamelo, aha tsho lo nsanganya yaso ndo l’olimu w’esambishelo, koko ndo l’etena kongaso kaamɛ lawɔ.—Rɔmɔ 1:​11, 12.

Keketsha elongamelo kayɛ. Osambo 62:5 mbutaka ɔnɛ: “Dimi mbɔlamaka ki etena kakongami Nzambi. Nɛ dia oma le nde kaya elongamelo kami.” Ekɔ dui di’ohomba efula monga l’elongamelo ka wolo djekoleko naka ekomelo kataye esadi oko walongamɛso. Sho pombaka monga l’eshikikelo ɔnɛ alaka wa Jehowa wayokotshama ndo oyadi edja ka ngande kayowoviya, totetemale mbakongɛ. Sho koka nkeketsha elongamelo kaso lo mbekaka Ɔtɛkɛta wa Nzambi, mbuta ate woho wɔtɔnɛ prɔfɛsiya ya lɔkɔ ndo woho wɔtɔnɛyɔ la kiambokambo tshɛ yatosholɛ Jehowa lo dikambo diande ndamɛ. (Os. 1:​2, 3) Ndo nto, sho pombaka ntetemala “mbɔlɔmbaka nyuma kande k’ekila” dia sho monga la diɔtɔnganelo dia dimɛna lam’asaso la Jehowa etena kakongaso dia nde nkotsha daka diande dia lɔsɛnɔ la pondjo.—Judɛ 20, 21.

L’ɛnyɛlɔ ka nkumekanga Davidɛ, tonge l’eshikikelo dia Jehowa ekɔ lo mɛna wanɛ wokongɛ ndo Nde mbowaɛnyaka ngandji Kande ka kɔlamelo. (Os. 33:​18, 22) Tetemala nkongɛ Jehowa la solo dia lotutsha tshɛ ndo leka ndjasha l’akambo w’ohomba wa lo lɔsɛnɔ layɛ, lo mbotombolaka ndo lo kondjaka ekeketshelo oma le asekayɛ Ɛmɛnyi ndo lo ntetemala mbɔsa elongamelo kayɛ ka wolo la nɛmɔ di’efula.