1. Ngande wakakongɛma ekambi wa Jehowa wa lo ntambe ka ntondo?

 ETENA kasha Jehowa ekambi ande olimu ɔmɔtshi wa nsala, nde kombolaka dia vɔ mbosala lo yoho yokongɛmi. (1 Kɔr. 14:33) Ɛnyɛlɔ, lolango lande ele dia lokumu l’ɔlɔlɔ sambishama lo nkɛtɛ k’otondo. (Mat. 24:14) Jehowa akasha Yeso ɔkɛndɛ wa nɔmbɔla olimu ɔsɔ. Ndo akayashikikɛ dia olimu akɔ ɔsɔ wekɔ lo salema lo yoho yokongɛmi. Lo ntambe ka ntondo, etena kakatatemaka tshumanelo l’ahole wotshikitanyi, dikumanyi diakasɔnamaka dia mbisha ɛlɔmbwɛlɔ ndo dilɔmbɔla. (Ets. 14:23) Olui-walɔmbɔla waki la Jɛrusalɛma wakakongɛma la dikumanyi ndo l’apɔstɔlɔ ndo wakɔsaka tɛdikɔ lo dikambo dia tshumanelo tshɛ ndo nshikikɛ dia wekɔ lo nkamba la tɔ. (Ets. 15:2; 16:4) Etombelo waki l’okitanyiya wa tshumanelo lo ɛlɔmbwɛlɔ kakawalongola kɛsɔ ele, “tshumanelo diakatatetemalaka nkeketala lo mbetawɔ ndo lofulo l’anto lakatadɛka.”—Ets. 16:5.

2. Oma ko 1919, ngande washa Jehowa ɛlɔmbwɛlɔ ndo mbo ya ndɛ ya lo nyuma?

² Jehowa ekɔ lo ntetemala nkongɛ ekambi ande ɛlɔ kɛnɛ. Oma ko 1919, Yeso ekɔ lo nkamba la djui ya tshitshɛ y’akitami dia nkongɛ olimu w’esambishelo ndo mbishaka ambeki ande mbo ya ndɛ ya lo nyuma l’etena kahombama. a (Luka 12:42) Mɛnamaka hwe dia Jehowa ekɔ lo ntshɔkɔla olimu w’olui w’anto ɔsɔ.—Isa. 60:22; 65:​13, 14.

3-4. a) Lembetshiya wahɔ wakondjaso lo woho wokongɛmiso. b) Kakɔna kayotɔsɛdingola lo sawo nɛ?

 ³ Otondonga hatokongɛmi, tshike tototonga l’akoka wa nkotsha olimu wakatosha Yeso ɔsɔ. (Mat. 28:​19, 20) Tɔshi ɛnyɛlɔ, ohɔsa dia otondonga hawokahanyisha bɛtshi dia nkɛtɛ; tshike onto tshɛ otosambishaka lɛnɛ alangande. Bɛtshi dimɔtshi dia nkɛtɛ diotokindjɛkindjɛma mbala la mbala oma le apandjudi amɔtshi wotshikitanyi, etena kele bɛtshi dikina dia nkɛtɛ ondo diotohamamɛ tshɛ lo tshɛ. Onde wɛ koka nkanyiya toho tokina takondjaso wahɔ lo woho wokongɛmiso?

⁴ Kɛnɛ kakasale Yeso lanɛ la nkɛtɛ akatotshikɛ ɛnyɛlɔ ka woho watetemalande tokongɛ ɛlɔ kɛnɛ. Lo sawo nɛ, tayɔsɛdingola ɛnyɛlɔ kakatotshikɛ Yeso ndo woho wayela okongamelo aso ɛnyɛlɔ kɛsɔ. Tayɛna nto woho wakokaso mɛnya lowando laso l’okongamelo wa Jehowa.

OKONGAMELO ASO NDJELAKA ƐNYƐLƆ KA YESO

5. Naa yoho mɔtshi yayelaso ɛnyɛlɔ ka Yeso? (Joani 8:28)

⁵ Yeso akeke oma le She lele l’olongo kɛnɛ ka nsala ndo ka mbuta. Okongamelo wa Jehowa ndjelaka ɛnyɛlɔ ka Yeso lo nkamba l’Ɔtɛkɛta wa Nzambi dia tokimanyiya dia mbeya kɛnɛ kele ɔlɔlɔ la kɔlɔ ndo tosha ɛlɔmbwɛlɔ lo nsɛnɔ yaso. (Adia Joani 8:28; 2 Tim. 3:​16, 17) Sho nongolaka mbala la mbala waohwelo lo mbadiaka ndo kambaka l’Ɔtɛkɛta wa Nzambi. Ngande wakondjaso wahɔ lo ndjela dako sɔ?

6. Naa yoho mɔtshi ya laande yakondjaso wahɔ lo mbeka Bible?

⁶ Sho kondjaka wahɔ efula etena kekaso Bible l’ekimanyielo k’ekanda aso w’Akristo. Ɛnyɛlɔ, taya l’akoka wa mbɛdika kɛnɛ ketsha Bible la ɛlɔmbwɛlɔ kalongolaso oma le okongamelo. Etena kɛnaso dia ɛlɔmbwɛlɔ kalongolaso ndja oma l’Afundelo, wɛkamu aso otsha le okongamelo wa Jehowa keketalaka.—Rɔmɔ 12:2.

7. Losango lakɔna laketsha Yeso ndo ngande wayela okongamelo wa Jehowa ɛnyɛlɔ kande?

⁷ Yeso akasambisha “lokumu l’ɔlɔlɔ la Diolelo dia Nzambi.” (Luka 4:​43, 44) Ndo nto, Yeso akadjangɛ ambeki ande dia nsambisha akambo wendana la Diolelo. (Luka 9:​1, 2; 10:​8, 9) Ɛlɔ kɛnɛ, onto tshɛ lakombola monga l’okongamelo wa Jehowa sambishaka losango la Diolelo oyadi dihole diakɔna tshɛ diende kana ɛkɛndɛ wele lande.

8. Diɛsɛ diakɔna diakatalongola?

⁸ Sho koka mbɔsa dia ɔsɔ ekɔ diɛsɛ dia woke efula dia nsambisha akambo wa mɛtɛ wendana la Diolelo dia Nzambi le anto akina! Aha onto tshɛ mbele la diɛsɛ sɔ. Ɛnyɛlɔ, lam’aki Yeso la nkɛtɛ, nde kombetawɔ dia ɛdiɛngɛ nsambisha akambo wendana lande. (Luka 4:41) Ɛlɔ kɛnɛ, la ntondo k’onto nsambisha kaamɛ l’Ɛmɛnyi wa Jehowa, nde pombaka nkotsha kɛnɛ kalɔmbama dia nkondja diɛsɛ sɔ. Sho mɛnyaka lowando l’efula lo diɛsɛ diele laso dia nsambisha dihole tshɛ ndo l’etena tshɛ kakokaso nsala dui sɔ. L’ɛnyɛlɔ ka Yeso, oyango aso ele wa monɛ ndo mbitɛ ashi lo ntɔngɔ y’akambo wa mɛtɛ ya Diolelo l’etema w’anto.—Mat. 13:​3, 23; 1 Kɔr. 3:6.

9. Ngande weyanya okongamelo lokombo la Nzambi?

⁹ Yeso akeyanya lokombo la Nzambi. Lo dɔmbɛlɔ diande di’otsha le She lele l’olongo, Yeso akate ate: “Dimi lakawaewoya lokombo layɛ.” (Jni. 17:26) Lo yoho yɔtɔnɛ l’ɛnyɛlɔ ka Yeso, okongamelo wa Jehowa salaka tshɛ kakokawɔ nsala dia nkimanyiya anto akina dia mbeya lokombo la Nzambi. Bible—Ekadimwelo k’andja w’oyoyo kakakotsha oyango awɔ wa dimɛna efula wa nkaloya lokombo la Nzambi l’ahole alɔ. Kakianɛ ekadimwelo ka Bible kɛsɔ  oyadi la tshondo kana etenyi kaya l’ɛtɛkɛta ndekana 270. Lo Apandisɛ A4 ndo A5 lo ekadimwelo kakɔ, wɛ ayotana awui efula wendana la woho wakawakaloya lokombo la Nzambi lo Bible. Apandisɛ C, wa lo Bible ka wekelo, mbishaka tolembetelo efula tɛnya dia lokombo la Nzambi lakahombe tanema lo Afundelo w’Akristo wa lo Grɛkɛ mbala 237.

10. Wetshelo akɔna wambotokondja oma lo kɛnɛ kakate mama kɛmɔtshi kadjasɛ la Myanmar?

¹⁰ L’ɛnyɛlɔ ka Yeso, sho kombolaka nkimanyiya anto efula naka kokaka dia vɔ mbeya lokombo la Nzambi. Lo mbeya dia Nzambi ekɔ la lokombo, mama kɛmɔtshi kaya l’ɛnɔnyi 67 kadjasɛ la Myanmar akalele ndo akate ate: “Ɔnɛ mbele mbala ka ntondo ka dimi mbeya lo lɔsɛnɔ lami dia lokombo la Nzambi ele Jehowa. . . . Nyu nyambombetsha dui di’ohomba efula diemi talekaka.” Oko wadiɛnya ɛnyɛlɔ kɛnɛ, mbeya lokombo la Nzambi koka monga la shɛngiya ya wolo efula le anto wele l’etema wosembwe.

TETEMALA MƐNYA LOWANDO LAYƐ L’OKONGAMELO ASO

11. Ngande wakoka dikumanyi mɛnya lowando lawɔ l’okongamelo wa Jehowa? (Enda ndo osato.)

¹¹ Na yoho mɔtshi yakoka dikumanyi mɛnya lowando lawɔ l’okongamelo wa Nzambi? Etena kalongolawɔ ɛlɔmbwɛlɔ, dikumanyi salaka tshɛ dia kiadia la yambalo tshɛ ndo nkamba l’ɛlɔmbwɛlɔ kakɔ lo yoho yoleki tshɛ dimɛna lo ndjela akoka awɔ. Ɛnyɛlɔ, vɔ nongolaka ɛlɔmbwɛlɔ aha paka lo woho wa nɔmbɔla tenyi dia losanganya ndo lo woho wa nsala alɔmbɛlɔ l’etshumanelo, koko ndo lo woho wa nkokɛ ɛkɔkɔ wa Kristo. Dikumanyi diayela ɛlɔmbwɛlɔ oma le okongamelo kimanyiyaka anto wele l’ɛse k’ɛlɔmbwɛlɔ kawɔ dia vɔ ndjaoka l’ekokelo ndo ɔnɛ vɔ nangemaka.

12. a) Lande na kahombaso nkamba kaamɛ la wanɛ watɔlɔmbɔla? (Hɛbɛru 13:​7, 17) b) Lande na kahombaso ndeka mbika washo lo waonga w’amɛna wa wanɛ watɔlɔmbɔla?

¹² Etena kalongolaso ɛlɔmbwɛlɔ k’oma le dikumanyi, sho pombaka kiyela aha la ntshimbatshimba. Lo nsala ngasɔ, sho mbetɛka dui sɔ wɔdu le wanɛ walɔmbɔla dia nkamba olimu awɔ. Bible tokeketshaka dia nkitanyiya ndo ndjakitshakitsha l’ɛse ka wanɛ watɔlɔmbɔla. (Adia Hɛbɛru 13:​7, 17.) Dui sɔ koka monga okakatanu lo tena dimɔtshi. Lande na? Nɛ dia apami asɔ bu anto wele kokele. Koko, naka sho mbika washo lo waonga awɔ wa kɔlɔ lo dihole dia mbika washo lo waonga awɔ w’amɛna, kete lo yoho mɔtshi, tekɔ lo nkimanyiya atunyi aso. Lo woho akɔna? Sho koka ndjokitshakitsha wɛkamu aso l’okongamelo wa Nzambi ndo ɔsɔ mbele dui diakombola atunyi aso dia sho nsala. Kakɔna kakokaso nsala shikaa dia mbishola ndo ntona waa prɔpagadɛ ya kashi y’atunyi aso?

TETAWƆKE DI’ANTO AKINA NKITSHAKITSHA LOWANDO LAYƐ

13. Ngande wahemba atunyi wa Nzambi dia mɛnya di’okongamelo ande wekɔ kɔlɔ?

¹³ Atunyi wa Nzambi pembaka dia mɛnya awui w’amɛna wasala okongamelo lo yoho ya kɔlɔ. Ɛnyɛlɔ, sho mbekaka l’Afundelo dia Jehowa nongamɛka di’atɛmɔdi ande monga pudipudi lo demba, lo lɔkɛwɔ ndo lo nyuma. Nde nɔmbaka dia wanɛ tshɛ wele hawoyatshumoya wayela yoho ya lɔkɛwɔ la mindo mbitshanyema oma lo etshumanelo. (1 Kɔr. 5:​11-13; 6:​9, 10) Sho ndjaɛkɛka lo didjango dia l’Afundelo sɔ. Koko l’ɔtɛ wakitanyiyaso didjango sɔ, atunyi aso mbutaka dia tekɔ awui wolo, nomboshanaka ndo hatokana ngandji.

14. Ele lo kiɔkɔ ya ɛkɔndɔ wa kashi wendana l’okongamelo?

¹⁴ Shihodia kiɔkɔ y’ɔlɔshamelo. Satana Diabolo  mbele l’edia ka nsango ya kashi. Nde ekɔ “she kashi.” (Jni. 8:44; Eta. 3:​1-5) Ɔnkɔnɛ, sho pombaka nongamɛ dia Satana ayokamba l’anto ande dia mpandjola ɛkɔndɔ wa kashi lo dikambo di’okongamelo wa Jehowa. Kɛsɔ mbakasalema lo ntambe ka ntondo.

15. Kakɔna kakasale ewandji w’ɛtɛmwɛlɔ lo dikambo dia Yeso ndo di’ambeki ande?

¹⁵ Lo ntambe ka ntondo, wanɛ wakasukɛka Satana wakatɛka anto akambo wa kashi lo dikambo di’Ɔna Nzambi la kokele ndo dikambo di’ahindo wakandasalaka. Ɛnyɛlɔ, ewandji w’ɛtɛmwɛlɔ waketshaka anto ɔnɛ wolo waki la Yeso wa ntondja ɛdiɛngɛ wakayaka oma le “owandji w’ɛdiɛngɛ.” (Makɔ 3:22) Etena kakawalomboshaka Yeso, ewandji w’ɛtɛmwɛlɔ wakofunde ɔnɛ nde ambɔtɛnga Nzambi ndo vɔ wakatshutshuya anto dia nɔmba dia vɔ mbodiaka. (Mat. 27:20) L’ɔkɔngɔ, etena kakatasambishaka ambeki wa Kristo lokumu l’ɔlɔlɔ, wanɛ wakaalɔshaka “wakomala ndo wakatshutshuya anto wa lo wedja” dia ndjaka Akristo asɔ. (Ets. 14:​2, 19) Lo kɛnɛ kendana la Etsha 14:​2, Tshoto y’Etangelo ya Ngɔndɔ ka dikumi l’ahende 1, 1998, nembetshiyaka ɔnɛ: “Lo dihole dia vɔ pembetɛ paka lo tona losango loto, atunyi asɔ w’ase Juda wakatatɛ mbidja lofunguso la nsɔngɔlɛ Akristo, wakahembe dia ntɔmbɔsha Ase Wedja dia vɔ mbâtɔmbɔkwɛ. Vɔ mɛtɛ wakahetshaka Lokristo la mɛtɛ.”

16. Kakɔna kahombaso mbohɔka naka tamboka ɛkɔndɔ wa kashi?

¹⁶ Oma ko ntambe ka ntondo, Satana atatshike mbuta kashi. Ɛlɔ kɛnɛ, nde ekɔ lo ntetemala “[mi]nganyiya nkɛtɛ k’otondo.” (Ɛny. 12:9) Naka wɛ amboka ɛkɔndɔ wa kashi lo dikambo di’okongamelo kana lo dikambo dia  anangɛso walɔmbɔla, ohɔ woho wakasalɛ atunyi wa Nzambi Yeso akambo ndo ambeki ande wa lo ntambe ka ntondo. Ɛlɔ kɛnɛ, ekambi wa Jehowa wekɔ lo pɛnyahɛnyama ndo wekɔ lo mbamamatanyiyɛ akambo paka oko wakadite Bible. (Mat. 5:​11, 12) Hatotokesama oma l’ɛkɔndɔ wa kashi naka sho mbeya kiɔkɔ yawɔ ndo nsala akambo aha la ntshimbatshimba. Kakɔna kahombaso nsala?

17. Ngande wakokaso mbewɔ kesama oma l’ɛkɔndɔ wa kashi? (2 Timɔte 1:13) (Enda ndo kiombo yele l’ɔtɛ a dui ɔnɛ “ Woho wa mbewɔ ɛkɔndɔ wa kashi.”)

¹⁷ Tona ɛkɔndɔ wa kashi. Ɔpɔstɔlɔ Pɔɔlɔ akasha alako wokɛma hwe wa kɛnɛ kakokaso nsala etena kokaso ɛkɔndɔ wa kashi. Nde akatɛ Timɔte dia “mbidjangɛ anto amɔtshi . . . diaha vɔ mbidja yimba l’ɛkɔndɔ . . . wa kashi” ndo aha ndjela “ɛkɔndɔ wa kashi.” (1 Tim. 1:​3, 4; 4:7) Otshikitanyi l’ɔna dikɛnda lakoka ntɔngɔna aha la mbeya ɛngɔ kɛmɔtshi ka kɔlɔ ndo kidja l’onyɔ, onto lambotshunda lashihodia kɛnɛ kele waale hakoke nsala dui sɔ. Sho tonaka ɛkɔndɔ wa kashi nɛ dia sho mbeyaka kiɔkɔ yawɔ. Koko sho pokamɛka paka “ɛtɛkɛta w’eshika” wa kɛnɛ kele mɛtɛ.—Adia 2 Timɔte 1:13.

18. Ngande wakokaso mɛnya lowando laso l’okongamelo wa Jehowa?

¹⁸ Tambɔsɛdingola paka toho tosato l’atei wa toho efula tokoya okongamelo wa Nzambi Yeso. Etena kekayɛ Bible, lembetɛ toho tokina tayela okongamelo wa Nzambi ɛnyɛlɔ ka Yeso. Kimanyiya anto akina wa l’etshumanelo kayɛ dia vɔ nkeketsha lowando lawɔ l’okongamelo. Ndo tetemala mɛnya lowando layɛ lo kambɛka Nzambi la kɔlamelo ndo ongaka suke l’okongamelo wakamba lande dia nsala lolango lande. (Os. 37:28) Nyɛsɔ totetemale nkokɛ diɛsɛ di’ohomba diele laso dia monga l’atei w’anto woka Jehowa ngandji ndo wele la kɔlamelo.