1. Kakɔna katɔlɔmba Jehowa?

 DUI dimɔtshi dialeka mbisha omi la wadi ɔngɛnɔngɛnɔ w’efula ele, etena kotɔ ɔna lele la yoonge ya dimɛna. Koko, kaanga mbalanga ambutshi ɔnawɔ lambotɔ la ngandji ɔsɔ, vɔ hawokombola dia nde tshikalaka paka ɔna ashashi pondjo pondjo. Lo mɛtɛ, vɔ wayoyakiyanya efula naka ɔna ɔsɔ hahame. Woho akɔ waamɛ mbele, Jehowa mongaka l’ɔngɛnɔngɛnɔ etena katakolaso nna dia ntondo dia nkoma ombeki wa Yeso, koko Nde hakombola dia sho tshikalaka paka ana w’ashashi lo nyuma. (1 Kɔr. 3:1) Nde tɔlɔmbaka dia monga Akristo waya “etshundju w’anto.”—1 Kɔr. 14:20.

2. Kakɔna kayotɔsɛdingola lo sawo nɛ?

² Kakɔna kalembetshiya nkoma Okristo wambotshunda? Ngande wahamaso polo ndo lo nkoma Okristo wambotshunda? Ohomba akɔna wele la mbo ya ndɛ ya wolo ya lo nyuma l’ohamelo aso? Ndo lande na kahombaso mbewɔ dia ndeka ndjaɛkɛ le so shoamɛ? Lo sawo nɛ, tayɔsɛdingola ekadimwelo wa ambola asɔ.

KAKƆNA KALEMBETSHIYA NKOMA OKRISTO WAMBOTSHUNDA?

3. Kakɔna kalembetshiya nkoma Okristo wambotshunda?

³ Lo Bible, tshɛkɛta ya lo Grɛkɛ yokadimɔmi ɔnɛ “etshundju” koka nto nembetshiya “mbola,” “nkoma kokele.” a (1 Kɔr. 2:6) Sho komaka etshundju kana Akristo wambotshunda, etena katshikaso dia monga ana w’akɛnda lo nyuma ndo kakomaso apami ndo wamato wambotshunda lo nyuma. Lo mɛtɛ, oyadi kaanga tambokotsha oyango ɔsɔ, hatohombe ntshika pondjo dia mpama lo nyuma. (1 Tim. 4:15) Sho tshɛ, mbidja ndo akɛnda koka nkoma Akristo wambotshunda lo nyuma. Ko kakɔna kɛnya dia Okristo ambotshunda lo nyuma?

4. Ngande wakokayɛ mbeya Okristo wambotshunda?

 ⁴ Okristo wambotshunda ekɔ onto lasɛna lo yoho yɔtɔnɛ l’ɛlɛmbɛ tshɛ wa Nzambi, aha la nsɔna wɛnɛ wakombolande ndjela. Eelo, oko wende keema kokele nde ayosalaka munga. Koko, nde mɛnyaka oma lo lɔsɛnɔ lande la lushi la lushi dia nde kanyiyaka ndo salaka akambo lo yoho yɔtɔnɛ la lolango la Nzambi. Nde ambɔlɔta lonto l’oyoyo ndo nde tetemalaka nsala la wolo dia tokanyi tande ndeka mbɔtɔnɛ la taki Nzambi. (Ɛf. 4:​22-24) Nde akeke dia mbɔsa tɛdikɔ ta lomba tɔtɔnɛ l’ɛlɛmbɛ ndo l’atɔndɔ wa Jehowa, laasɔ nde bu l’ohomba wa listɛ l’otale l’ɛlɛmbɛ lahomba mbowɛnyaka kɛnɛ kahombande nsala. Etena kɔsande yɛdikɔ mɔtshi nde salaka la wolo dia nsala kɛnɛ kɔtɔnɛ la yɛdikɔ yande.—1 Kɔr. 9:​26, 27.

5. Waale akɔna wakoka komɛ Okristo wahatatshunde? (Ɛfɛsɔ 4:​14, 15)

⁵ Lo wedi okina, Okristo wahatatshunde lo nyuma koka minganyiyama esadi eto oma lo “lokeso l’anto” ndo “oma lo totshelo ta mayɛlɛ ta lokeso” ndo nde talaka lo djonga ya waa apɔsta. b (Adia Ɛfɛsɔ 4:​14, 15.) Nde koka monga suke dia mboka anto akina kandjema, mana la wɔ ndo mongaka suke dia nkɔ l’ohemba.—1 Kɔr. 3:3.

6. Ɛnyɛlɔ kakɔna kakoka nkamba la so dia mɛnya woho watatshunde onto lo nyuma? (Enda ndo osato.)

⁶ Oko wakataditshi oma l’etatelo, Afundelo mbɛdikaka otshundelo wa lo nyuma la woho wola onto dia nkoma opalanga. Ɔna dikɛnda bu la shɛnɔdi, laasɔ nde ekɔ l’ohomba wa opalanga mbokokɛka ndo mbolamaka. Tɔshi ɛnyɛlɔ, ombutshi wa womoto mbeyaka nɔmba ɔnande la womoto dia mbokimɛ lo lonya etena katawatenyanya shinga. Koko etena kakoma ɔna ɔsɔ opalanga, nyango mbeyaka mbotshika dia nde ntenyanya shinga kana otadimbo ndamɛ, koko nyango ayowoholaka dia la ntondo ka nde ntenyanya nde pombaka mbɛwɛwa dia menda kana mituka wekɔ l’otadimbo. Etena kakoma ɔna opalanga, nde mbewɔka waale wa ngasɔ wakoka mbokomɛ. Oko watongaka ana w’akɛnda l’ohomba w’ekimanyielo k’oma l’epalanga dia mbewɔ waale, mbele ndo Akristo wahatatshunde wekɔ l’ohomba w’ekimanyielo k’oma le Akristo wambotshunda dia mbewɔ waale wa lo nyuma ndo dia mbɔsa tɛdikɔ ta lomba. Lo yoho yotshikitanyi, etena konga Akristo wambotshunda lo  nyuma l’ohomba wa mbɔsa yɛdikɔ mɔtshi, vɔ kanaka yimba lo atɔndɔ wa lo Bible dia mbeya kanyi ya Jehowa lo dikambo diakɔ ndo nsala kɛnɛ kele ɔlɔlɔ.

7. Onde Akristo wambotshunda wekɔ l’ohomba w’ekimanyielo k’anto akina?

⁷ Onde dui sɔ nangaka nembetshiya di’Akristo wambotshunda bu l’ohomba w’ekimanyielo k’onto ɔmɔtshi? Ndooko. Ndo Akristo wambotshunda vɔ lawɔ nyangaka ekimanyielo tena la tena. Koko onto ɔmɔtshi lele atatshunde lo nyuma mbeyaka nongamɛka di’anto akina mbotɛ kɛnɛ kahombande nsala kana yɛdikɔ yahomande mbɔsa. Okristo wambotshunda lo nyuma lo wedi ande, ayokondja wahɔ oma lo lomba ndo oma lo diewo diele l’anto akina, aha la nde mbohɛ dia Jehowa nongamɛka dia nde ‘mɛmba wotsho ande hita.’—Ngal. 6:5.

8. Lo toho takɔna totshikitanyi Akristo wambutshunda lam’asawɔ?

⁸ Oko wele epalanga la ɛnamelo ka lo demba kotshikitanyi mbele Akristo wambotshunda lo nyuma ntshikitana lo waonga wele oko, lomba, dihonga, lokaho, ndo kɛtshi. Laadiko dia laasɔ, etena kahomana Akristo ahende wambotshunda lo nyuma la woho w’okakatanu waamɛ, vɔ mbeyaka mbɔsa tɛdikɔ totshikitanyi koko tetawɔma lo Afundelo. Dui sɔ diekɔ mɛtɛ djekoleko lo akambo wendana la nkum’otema. Lo mbeya dikambo sɔ, vɔ hawolomboshana lam’asawɔ l’ɔtɛ wambowɔsa tɛdikɔ totshikitanyi. Koko, vɔ salaka tshɛ dia nama kaamɛ kele lam’asawɔ.—Rɔmɔ 14:10; 1 Kɔr. 1:10.

KAKƆNA KAHOMBASO NSALA DIA NKOMA AKRISTO WAMBOTSHUNDA?

9. Onde sho tshundaka lo nyuma aha la mbidja welo? Lembetshiya.

⁹ Lam’atete nshi mbatatshunde ɔna lo demba, koko ndooko onto lakoka ntshunda lo nyuma naka nde hadjisha welo. Ɛnyɛlɔ, anangɛso l’akadiyɛso wa la Kɔrɛtɔ waketawɔ lokumu l’ɔlɔlɔ, wakabatizama, wakalongola nyuma k’ekila ndo wakakondja wahɔ oma lo wetshelo wakawalongola oma le ɔpɔstɔlɔ Pɔɔlɔ. (Ets. 18:​8-11) Koko, ɛnɔnyi ɛmɔtshi l’ɔkɔngɔ wa batisimu kawɔ, efula waki paka akɛnda lo nyuma. (1 Kɔr. 3:2) Akokaso nsala diaha dui diangasɔ tokomɛ?

10. Kakɔna kahombaso nsala dia nkoma Akristo wambotshunda? (Judɛ 20)

¹⁰ Dia tshunda lo yuma, sho pombaka ntondotondo monga la nsaki ka nkoma Akristo wambotshunda. Wanɛ walanga “monga womombe,” mbuta ate wakombola ntetemala ntshikala akɛnda lo nyuma, hawotshundaki pondjo lo nyuma. (Tok. 1:22) Sho hatolange monga oko onto laya opalanga koko aakatetemala mendɛ le ambutshi ande dia vɔ mbowɔsɛ tɛdikɔ. Lo dihole dia nsala ngasɔ, sho ndjaɔsɛka tɛdikɔ ndo ndjashikikɛka dia lonyuma laso lekɔ lo tatetemala mpama. (Adia Judɛ 20.) Naka wɛ ekɔ lo ntetemala mbidja welo dia nkoma onto lambotshunda lo nyuma, kete lɔmba Jehowa dia nde kosha “nsaki la wolo wa nsala akambo” asɔ.—Flpɛ. 2:13.

11. Ekimanyielo kakɔna kalongolaso dia nkoma Akristo wambotshunda? (Ɛfɛsɔ 4:​11-13)

¹¹ Jehowa halongamɛ dia sho mpama otsha lo lotshundu la wolo aso hita. Wanɛ wakamba oko alami w’ɛkɔkɔ ndo oko embetsha l’etshumanelo k’Akristo mongaka suke dia tokimanyiya dia nkoma ‘etshundju w’anto’ lo nyuma, “ndo [nkoma] lo yɛdikɔ ya diema di’otondo dia Kristo.” (Adia Ɛfɛsɔ 4:​11-13.) Jehowa toshaka nto nyuma kande k’ekila dia tokimanyiya dia monga la “yimba ya Kristo.” (1 Kɔr. 2:​14-16) Ndo nto, Nzambi akatosha Evanjiliɔ ɛnɛi dia tɛnya woho wakakanyiyaka, wakatɛkɛtaka ndo wakasalaka Yeso akambo etena kakandakambaka olimu ande lanɛ la nkɛtɛ. Lo mbokoya ekanelo ka yimba kaki Yeso ndo woho wakandasalaka akambo, wɛ koka nkotsha oyango ayɛ wa nkoma Okristo wambotshunda.

 OHOMBA WA MBO YA NDƐ YA WOLO YA LO NYUMA

12. Naa “wetshelo w’etatelo wendana la Kristo”?

¹² Dia mpama ko nkoma anto wambotshunda, sho pombaka nto nshidiya mbeka “wetshelo w’etatelo wendana la Kristo,” mbuta ate wetshelo w’etatelo w’Akristo. L’atei wa wetshelo w’etatelo ɛsɔ mbele ndo wetshelo wendana la ndjatshumoya, mbetawɔ, batisimu ndo eolwelo. (Hɛb. 6:​1, 2) Wetshelo ɛsɔ mbele etshina ka Lokristo. L’ɔtɛ ɔsɔ mbakatɛkɛta ɔpɔstɔlɔ Petero lo dikambo diawɔ etena kakandasambisha olui w’anto lo Pɛntɛkɔsta. (Ets. 2:​32-35, 38) Sho pombaka mbetawɔ wetshelo w’etatelo ɛsɔ dia nkoma ambeki wa Kristo. Ɛnyɛlɔ, Pɔɔlɔ akate di’onto tshɛ latona wetshelo wendana la eolwelo, ambotona mbetawɔ k’otondo k’Okristo. (1 Kɔr. 15:​12-14) Koko, hatohombe komɛ tsho lo wetshelo w’etatelo dia nkoma Akristo wambotshunda.

13. Ahombaso nsala dia nkondja wahɔ oma lo mbo ya ndɛ ya wolo ya lo nyuma yɔtɛkɛtami lo Hɛbɛru 5:14? (Enda ndo osato.)

¹³ Otshikitanyi la wetshelo w’etatelo, mbo ya ndɛ ya wolo ya lo nyuma, mendanaka aha tsho l’ɛlɛmbɛ wa Jehowa koko ndo l’atɔndɔ ande watokimanyiya dia nshihodia ekanelo kande ka yimba. Dia nkondja wahɔ oma lo mbo ya ndɛ shɔ, sho pombaka mbekaka, kanaka yimba ndo nkamba la yambalo tshɛ l’Ɔtɛkɛta wa Nzambi. Etena kasalaso dui sɔ, sho ndjalowanyaka dia mbɔsa tɛdikɔ tangɛnyangɛnya Jehowa. c—Adia Hɛbɛru 5:14.

14. Ngande wakakimanyiya Pɔɔlɔ ase Kɔrɛtɔ dia vɔ ntshunda lo nyuma?

¹⁴ Akristo wahatatshunde lo nyuma mongaka l’okakatanu dia mbɔsa tɛdikɔ t’amɛna etena kele ndooko ɔlɛmbɛ shikaa wa lo Bible watɛkɛta dia dikambo diakɔ. Naka ndooko ɔlɛmbɛ wa lo Bible, anto amɔtshi mbeyaka mfɔnya dia vɔ koka nsala kɛnɛ tshɛ kalangawɔ. Anto akina mbeyaka nɔmba dia mbidja ɔlɛmbɛ etena kele ndooko ɔlɛmbɛ walɔmbama. Ɛnyɛlɔ, ondo Akristo wa la Kɔrɛtɔ wakambola Pɔɔlɔ dia kana ekɔ ɔlɛmbɛ ɔmɔtshi wɛnya dia kana vɔ koka ndɛ diangɔ diakawalambola ekishi kɛmɔtshi. Lo dihole dia nde mbatɛ kɛnɛ kahombawɔ nsala, Pɔɔlɔ akɛnya ohomba wa nkum’otema ndo woho wele onto tshɛ ekɔ la “lotshungɔ la nde nsɔna.” Nde  akakane lawɔ yimba lo ndjela atɔndɔ walɔmba di’onto l’onto monga la wɔladi la nkum’otema kande ko l’etena kakɔ kaamɛ aha la ntakanya anto akina. (1 Kɔr. 8:​4, 7-9) Pɔɔlɔ aki lo nkimanyiya ase Kɔrɛtɔ dia vɔ ntshunda lo nyuma dia vɔ monga l’akoka wa vɔ nkamba la shɛnɔdi lo dihole dia mendɛka paka le anto akina kana nyanga ɛlɛmbɛ wendana la dikambo diele lawɔ.

15. Ngande wakakimanyiya Pɔɔlɔ Akristo w’ase Hɛbɛru dia mpama lo nyuma?

¹⁵ Sho kondjaka wetshelo w’ohomba efula lo kɛnɛ kakafundɛ Pɔɔlɔ Akristo wa la Hɛbɛru. Amɔtshi kotetemala mpama lo nyuma; nɛ dia vɔ mɛtɛ “[wakakalola] ɛkɔngɔkɔngɔ lo monga la ohomba wa abɛlɛ, koko aha mbo ya ndɛ ya wolo [ya lo nyuma].” (Hɛb. 5:12) Vɔ kombeka ndo kombetawɔ akambo wa mɛtɛ w’eyoyo wakatawasholɛka Jehowa yema yema lo tshimbo y’etshumanelo. (Tok. 4:18) Ɛnyɛlɔ, ambetawudi efula w’ase Juda waki lo ntetemala ndjela Ɛlɛmbɛ wa Mɔsɛ kaanga mbele laasɔ ko ambeta ɛnɔnyi oko 30 wele olambo wa Kristo wakakomiya Ɛlɛmbɛ ɛsɔ. (Rɔmɔ 10:4; Tito 1:10) Ɛnɔnyi 30 ɛsɔ wakasha Akristo diaaso di’efula dia nshihodia dia vɔ komonga nto l’ohomba wa ndjela ɛlɛmbɛ ɛsɔ! Onto tshɛ lakadia mukanda wakafundɛ Pɔɔlɔ ase Hɛbɛru, akakoke nshikikɛ dia dibuku sɔ diaki la mbo ya ndɛ ya wolo ya lo nyuma. Ndo mbo ya ndɛ shɔ mbaki Akristo asɔ l’ohomba dia nkeketsha mbetawɔ kawɔ k’ɔnɛ yoho y’oyoyo ya ntɛmɔla yakatondjama lo tshimbo ya Yeso mboleki dimɛna. Ndo dui sɔ diakawasha nto dihonga dia ntetemala nsambisha kaanga mbakawahomana l’ɔlɔshamelo oma le ase Juda.—Hɛb. 10:​19-23.

TEWƆ DIA NDJAƐKƐ OTAMANYA LE SO SHOAMƐ

16. Laadiko dia mpama lo nyuma, kakɔna kahombaso nsala nto?

¹⁶ Sho pombaka nsala la wolo aha tsho dia nkoma anto wambotshunda, koko sho pombaka nto ntetemala ntshikala anto wambotshunda. Dui sɔ nɔmbaka diaha sho ndeka ndjaɛkɛ le so shoamɛ. (1 Kɔr. 10:12) Sho pombaka ‘ntetemala ndjasɛdingola’ dia ndjashikikɛ kana tekɔ lo tatetemala mpama.—2 Kɔr. 13:5.

17. Ngande wɛnya mukanda wakafundɛ Pɔɔlɔ ase Kɔlɔsayi woho wa ntshikala anto wabotshunda lo nyuma?

¹⁷ Lo mukanda ande otsha le ase Kɔlɔsayi, Pɔɔlɔ akatɔtɔmiya nto ohomba wa ntetemala monga anto wambotshunda. Kaanga mbakawakome Akristo wambotshunda, Pɔɔlɔ akawatɛ dia vɔ ndjalama diaha vɔ ndjokesama la tokanyi t’ase  andja ɔnɛ. (Kɔl. 2:​6-10) Ndo Epafrasɛ ɔnɛ lakeyaka ase etshumanelo kɛsɔ dimɛna, akatetemala nɔmba dikambo diawɔ dia ‘l’ekomelo vɔ monga tshɛ lo tshɛ’ anto wambotshunda. (Kɔl. 4:12) Wetshelo akɔna wakokaso nkondja oma lo dikambo sɔ? Pɔɔlɔ l’Epafrasɛ vɔ akɔ ahende wakashihodia ɔnɛ dia ntetemala monga onto lambotshunda nɔmbaka di’onto mbidja welo ndo osukɔ wa Nzambi. Vɔ wakakombolaka di’ase Kɔlɔsayi ntetemala monga anto wambotshunda kana etshundju w’Akristo oyadi ekakatanu akɔna wakahomanaka la wɔ.

18. Kakɔna kakoka nkomɛ Okristo wambotshunda lo nyuma? (Enda ndo osato.)

¹⁸ Pɔɔlɔ akahɛmɔla ase Hɛbɛru dia kaanga Okristo wambotshunda lo nyuma koka ndjɔsɛkama oma le Nzambi lo pondjo. Otema w’Okristo koka nkoma lonyuu woho ɔnɛ wele nde aya bu nto l’akoka wa ndjaatshumoya kana dimanyiyama oma le Nzambi. Diɛsɛ ko, ase Hɛbɛru kokoma polo lɛsɔ. (Hɛb. 6:​4-9) Kayotota dia Akristo wa nshi nyɛ wakoma ko hawoyosambisha kana wanɛ watshanyema ko l’ɔkɔngɔ diko vɔ ndjoyatshumoya? Ndjatshumoya kawɔ ka l’otema ɔtɔi mɛnyaka dia vɔ ntshikitana la wanɛ wele Pɔɔlɔ akafunde lo dikambo diawɔ. Koko etena kakalolɛwɔ Jehowa, vɔ mongaka l’ohomba w’ekimanyielo kashande. (Ɛzk. 34:​15, 16) Dikumanyi koka mbɔsa yɛdikɔ di’Ɔmɛnyi wa Jehowa ɔmɔtshi wambohokɔ akambo mbakimanyiya dia vɔ nkaloya diɔtɔnganelo diaki lam’asawɔ la Jehowa.

19. Oyango akɔna wahomba monga la so?

¹⁹ Naka wɛ ekɔ lo nsala la wolo dia nkoma Okristo wambotshunda, kete eya dia wɛ koka nkotsha oyango ayɛ! Tetemala ndɛ mbo ya ndɛ ya wolo ya lo nyuma ndo nsala di’ekanelo kayɛ ka yimba ndeka mbɔtɔnɛ la ka Jehowa. Ndo naka wɛ amboshilaka nkoma Okristo wambotshunda, kete nsala tshɛ dia ntshikala ngasɔ pondjo pondjo.