1. Lande na kele Eohwelo ekɔ lushi loleki ohomba la l’ɔnɔnyi? (Luka 22:​19, 20)

 LE EKAMBI wa Jehowa, Eohwelo ka nyɔi ka Kristo mbele lushi loleki ohomba la l’ɔnɔnyi. Tɔ kekɔ tshɔi ya dui dia laande diakadjangɛ Yeso ambeki ande dia mbohɔka. (Adia Luka 22:​19, 20.) Sho kongɛɛka Eohwelo l’asolo walomɔlomɔ l’ɔtɛ w’ɛkɔkɔ efula. Tɔsɛdingole ɛmɔtshi l’atei awɔ.

2. Naa ɛkɔkɔ ɛmɔtshi watotshutshuya dia nkongɛɛ Eohwelo l’asolo walomɔlomɔ?

² Eohwelo tokimanyiyaka dia nkana yimba la nɛmɔ diele l’oshinga w’etshungwelo. Tɔ toholaka toho takokaso mɛnya lowando laso lo olambo wa Yeso. (2 Kɔr. 5:​14, 15) Tɔ toshaka nto diaaso dia ‘nkeketshana’ l’anangɛso ndo l’akadiyɛso. (Rɔmɔ 1:12) Ɔnɔnyi tshɛ, anangɛso l’akadiyɛso efula wambɔla lo nyuma mbɔtɔka lɔkɔ. Amɔtshi tshutshuyamaka dia nkalola le Jehowa l’ɔtɛ waalongolaso la waasaso tshɛ. Ndo efula ka wanɛ wayasha l’akambo wa mɛtɛ tshutshuyamaka dia ntatɛ nkɛndakɛnda lo mboka ka lɔsɛnɔ l’ɔtɛ wa kɛnɛ kɛnawɔ ndo kokawɔ. Aha la taamu, Eohwelo kekɔ dui dia laande l’etema aso!

3. Ngande wasala Eohwelo di’anangɛso l’akadiyɛso wa l’andja w’otondo monga kaamɛ? (Enda ndo osato.)

³ Sho lawɔ kanaka yimba la woho wakakatanya Eohwelo nkumbo kaso k’onto l’ɔnango ka l’andja w’otondo. Ɛmɛnyi wa Jehowa wa l’andja w’otondo tshumanaka lam’atɔtɔ wonya yema yema. Sho tshɛ pokamɛka sawo diaka epole ɔsɛkɛ ndo diɛnya ohomba w’oshinga w’etshungwelo. Sho membaka esambo ehende wa lotombo, mbetshetshaka mapa la vinyɔ ndo sho mbitaka “aamɛ” ka l’otema ɔtɔi lo alɔmbɛlɔ anɛi. Lo wenya oko 24, tshumanelo tshɛ dia l’andja w’otondo salaka woho wakɔ waamɛ. Onde wɛ koka nkanyiya ɔngɛnɔngɛnɔ wonga la Jehowa nde la  Yeso etena katɛnawɔ tele kaamɛ tawasha kɛnɛmɔ lo yoho shɔ?

4. Kakɔna kayotɔsɛdingola lo sawo nɛ?

⁴ Lo sawo nɛ, tayɔsɛdingola ambola anɛ: Ngande wakokaso nɔngɔsɔla etema aso dikambo dia Eohwelo? Ngande wakokaso nkimanyiya anto akina dia vɔ nkondja wahɔ oma lɔkɔ? Ndo ngande wakokaso nkimanyiya wanɛ wambɔla lo nyuma? Ekadimwelo wa ambola anɛ wayotokimanyiya dia monga suke lo diaaso di’ekila sɔ.

NGANDE WAKOKASO NƆNGƆSƆLA ETEMA ASO DIKAMBO DIA EOHWELO?

5. a) Lande na kahombaso kanaka yimba la nɛmɔ diele l’oshinga w’etshungwelo? (Osambo 49:​7, 8) b) Wetshelo akɔna wamboyokondja oma lo vidɛo yele l’ɔtɛ a dui ɔnɛ: Lande na kakavu Yeso?

⁵ Yoho mɔtshi yoleki ohomba yakokaso nɔngɔsɔla etema aso lo dikambo dia Eohwelo ele lo kanaka yimba la nɛmɔ diele l’oshinga w’etshungwelo w’olambo wa Yeso Kristo. Lo shoamɛ, hatokokaki pondjo ndjaatshungola oma lo pɛkato la nyɔi. (Adia Osambo 49:​7, 8; enda ndo vidɛo yele l’ɔtɛ a dui ɔnɛ: Lande na kakavu Yeso?) a Ɔnkɔnɛ, Jehowa akayahondja dia nde nkimɔ Ɔnande la ngandji dia nde toshimbɛ. Jehowa akakongɛ dia Yeso nkimɔ lɔsɛnɔ lande dia wahɔ aso. (Rɔmɔ 6:23) Lo yɛdikɔ yayototalekaka nkana yimba lo kɛnɛ kakayahondja Jehowa nde la Yeso lo dikambo diaso, mbayototalekaka mbɔsa oshinga w’etshungwelo la nɛmɔ. Tayɔsɛdingola awui angana wa wolo waketawɔ Jehowa nde la Yeso nsala lo dikambo diaso. Ntondotondo, kakɔna kalembetshiya oshinga w’etshungwelo?

6. Oshinga w’etshungwelo kɛdikɛdi na?

⁶ Oshinga w’etshungwelo ekɔ oshinga wafutama dia ntshungola ɛngɔ kɛmɔtshi kakandama ɔkɔlɛ. Pami ka ntondo, Adama aki kokele etena kakandatongama. Etena kakandasale pɛkato, nde akashisha elongamelo ka lɔsɛnɔ la pondjo ndo nde akashishɛ anande tshɛ elongamelo kɛsɔ. Dia nkaloya kɛnɛ kakashisha Adama, Yeso akakimɔ lɔsɛnɔ lande hita la kokele oko olambo. L’edja tshɛ kakandasɛnaka lanɛ la nkɛtɛ, Yeso “kosala pɛkato ndo lokeso kotanema l’onyɔ ande.” (1 Pe. 2:22) L’etena kakandavu, lɔsɛnɔ la kokele laki Yeso lakɛdima popo la lɔsɛnɔ la kokele lakashisha Adama.—1 Kɔr. 15:45; 1 Tim. 2:6.

7. Naa ehemba ɛmɔtshi wakahomana la Yeso etena kakinde la nkɛtɛ?

⁷ Yeso akakitanyiya lo yoho ya kokele She lele l’olongo kaanga mbakandahomana l’ehemba efula etena kakinde la nkɛtɛ. Oko wakinde ɔna, Yeso akahombe nkitanyiya lowandji l’ambutshi ande waki komonga kokele kaanga mbakandotɔ kokele. (Luka 2:51) Lam’akinde l’ɛnɔnyi dikumi l’ɛmɔtshi, nde akahombe nshika ntanga lo tɔsɛngiya tshɛ takakoke mbokonya diaha nde nkitanyiya ambutshi ande kana nshisha kɔlamelo le Jehowa. Lam’akandakome opalanga, Yeso akahombe nshika ntanga l’ehemba wa Satana Diabolo, mbidja ndo woho wakɔlɔsha Satana lo yoho yɛnama hwe diaha nde ntshikala la kɔlamelo le Nzambi. (Mat. 4:​1-11) Satana akayashikikɛ dia nkonya Yeso dia nsala pɛkato diaha nde monga l’akoka wa mfuta oshinga w’etshungwelo.

8. Naa ehemba ekina wakakikɛ Yeso?

⁸ Lam’akandakambaka olimu ande lanɛ la nkɛtɛ, Yeso akakikɛ ehemba ekina. Nde akahomana l’ɛhɛnyɔhɛnyɔ ndo lɔsɛnɔ lande laki lo waale. (Luka 4:​28, 29; 13:31) Nde akahombe nto mbikikɛ munga y’ambeki ande waki komonga kokele. (Makɔ 9:​33, 34) Lam’akawolomboshaka dikambo dia lɔsɛnɔ lande, wakɔhɛnyahɛnya ndo wakawɔsɔkɛ. Oma laasɔ, wakodiake l’esehe tshɛ ndo nde akasowe efula ndo akashama  nsɔnyi. (Hɛb. 12:​1-3) Nde akahombe mbikikɛ etenyi k’ekomelo k’ohemba ande ɔsɔ, aha l’ekokelo ka Jehowa. b—Mat. 27:46.

9. Ngande wayaokaso lo kɛnɛ kendana l’olambo wa Yeso? (1 Petero 1:8)

⁹ Mbokɛmaka hwe dia, Yeso akasowe efula dia nkimɔ oshinga w’etshungwelo. Onde hatotshutshuyama dia monga la ngandji k’efula otsha le Yeso etena kakanyiyaso woho wakandetawɔ nsowa efula lo wahɔ aso?—Adia 1 Petero 1:8.

10. Kakɔna kakashisha Jehowa lo nkimɔ oshinga w’etshungwelo?

¹⁰ Kayotota dikambo dia Jehowa? Kakɔna kakandetawɔ nshisha dia Yeso mfuta oshinga w’etshungwelo? Jehowa nde la Yeso wekɔ la dimama dioleki wolo diakoka monga lam’asa ombutshi wa pami l’ɔnande la pami. (Tok. 8:30) Laasɔ kanyiya yema paa kaki la Jehowa etena kakandɛnaka Yeso akikɛ ehemba efula etena kakinde lanɛ la nkɛtɛ. Aha la taamu, Jehowa aki l’ɔkɛyi w’efula lo menda woho wakawasalɛ Ɔnande akambo l’esehe, woho wakawotone ndo woho wakandawɛnaka asowa.

11. Kamba l’ɛnyɛlɔ kɛmɔtshi dia mɛnya woho wakayaoke Jehowa ndjaoka etena kakawadiake Yeso.

¹¹ Ombutshi tshɛ wambovusha ɔna mbeyaka dimɛna ɔkɛyi waya lo mvusha ɔna. Tekɔ la mbetawɔ ka wolo lo eolwelo, koko dui sɔ hanya paa konga etena kavɔ lakiso ɔmɔtshi la ngandji. Ɛnyɛlɔ kɛnɛ tokimanyiyaka dia nshihodia woho wakahombe Jehowa ndjaoka etena kakandɛnaka woho wakasowaka ndo wakavu Ɔnande la ngandji lo nshi ya tshitshi lo 33 T.D. c—Mat. 3:17.

12. Akokaso nsala lo mingu ya la ntondo ka Eohwelo?

¹² Etena kakongaso Eohwelo, lande na kahayasale wekelo w’onto ndamɛ kana wekelo wa lo nkumbo waleka ntɛkɛta dikambo dia oshinga w’etshungwelo? Kamba la Dibuku di’eyangelo di’Ɛmɛnyi wa Jehowa (naka diekɔ l’ɔtɛkɛta anyu) kana ekanda ekina walembetshiya Bible dia mbishola awui efula wendana l’oshinga w’etshungwelo. d Ndo nto, yashikikɛ dia ndjela wadielo wa Bible wa lo nshi ya Eohwelo watanema l’ekongelo koshami lo Dikatshi dia losanganya la Lɔsɛnɔ ndo olimu aso w’Okristo. Ndo lo lushi la Eohwelo, tohɛke menda ekongelo ka laande ka Ɔtɛmwɛlɔ wa la pindju. Naka sho nɔngɔsɔla etema aso dikambo dia Eohwelo, kete tayonga  l’akoka wa nkimanyiya anto akina dia vɔ lawɔ nkondja wahɔ oma lɔkɔ.—Ɛzr. 7:10.

TOKIMANYIYA ANTO AKINA DIA VƆ NKONDJA WAHƆ

13. Nna diakɔna dia ntondo diahombaso ntakola dia nkimanyiya anto akina dia vɔ nkondja wahɔ oma lo Eohwelo?

¹³ Ngande wakokaso nkimanyiya anto akina dia vɔ nkondja wahɔ oma lo Eohwelo? Nna dia ntondo ele, mbowaelɛ oya lo Eohwelo. Laadiko dia sho mbitɛ wanɛ wahomana la so l’olimu w’esambishelo, sho koka nsala listɛ l’anto wayotelɛ. Lo listɛ lɔsɔ sho koka mbidja nkombo y’ewotɔ aso, asekaso wa l’olimu, asekaso wa la kalasa ndo anto akina. Oyadi kaanga naka sho bu l’akatshi efula wa leeta, sho koka mbatomɛ liɛ lo telefɔnɛ kana tablɛtɛ yawɔ. Sho mbeyaka mamba lo menda efula k’anto wayokoka mbetawɔ leeta lɔsɔ!—Ond. 11:6.

14. Sha ɛnyɛlɔ kɛnya shɛngiya yele la dikatshi dia leeta.

¹⁴ Tatɔnyɔlake pondjo wolo wakoka monga la dikatshi dia leeta. Lushi lɔmɔtshi, kadiyɛso kɛmɔtshi kele omɛnde bu Ɔmɛnyi akaambe etena kakawotɛ omɛnde dia nde ekɔ lo ndjalɔngɔsɔla dia ntshɔ la nde lo Eohwelo. Lande na kakaambe kadiyɛso? Nɛ dia tena efula diakete diakandalɔmbaka omɛnde dia mbɔtɔ lo Eohwelo koko nde konangaka. Ko kakɔna kambotshikitanya akambo mbala kɛnɛ? Omɛnde akawotɛ dia “ekumanyi kɛmɔtshi ka l’etshumanelo kawɔ kakekesanɛka lande mbakawosha dikatshi dia leeta.” Ɔnɔnyi ɔsɔ omɛnde akɔtɔ lo Eohwelo ndo l’ɛnɔnyi efula ekina wakayele.

15. Kakɔna kahombaso namaka lo yimba etena kelɛso anto oya lo Eohwelo?

¹⁵ Tatohɛke dia wanɛ welɛso mbeyaka monga la ambola djekoleko naka vɔ watɔtɔka ndooko lushi lo losanganya laso lɔmɔtshi. Sho koka nkanyiya la ntondo ambola wakokawɔ ndjotoka ndo ndjalɔngɔsɔla lo woho wa mbasha ekadimwelo. (Kɔl. 4:6) Ɛnyɛlɔ anto amɔtshi mbeyaka ndjambola ɔnɛ: ‘Kakɔna kayeta lo Eohwelo kakɔ?’ ‘Kayoviya wenya engana?’ ‘Dihɔndɔ diakɔna diahombami ndɔta?’ ‘Onde pombaka mfuta akuta la ntondo ka mbɔtɔ?’ ‘Onde ɛkɔngɔ wayosalema lɛkɔ?’ Etena kelɛso onto ɔmɔtshi oya lo Eohwelo, sho koka mbombola tsho ɔnɛ: “Onde wɛ ekɔ la dimbola?”  Ndo oma laasɔ ko sho mbosha okadimwelo lo dimbola tshɛ diakokande monga la diɔ. Sho koka nto nkamba la tovidɛo tɔnɛ: Tohɔ nyɔi ka Yeso ndo Kakɔna kasalema lo Mbalasa ka Diolelo? dia nkimanyiya onto dia mbowɛnya woho weta nsanganya yaso. Ndo wekelo 28 wa dibuku Ngɛnangɛnaka la lɔsɛnɔ pondjo pondjo! wekɔ l’awui amɔtshi w’eshika wakokayɛ nkahana l’anto.

16. Naa ambola akina wakoka monga la wanɛ wɔtɔ lo Eohwelo?

¹⁶ L’ɔkɔngɔ wa mbɔtɔ lo Eohwelo, eyoyo wayasha mbeyaka monga la ambola akina. Vɔ mbeyaka ndjambola lande na kele paka anto angana ato (kana ndooko onto) lakale mapa ndo nnɔ vinyɔ. Vɔ mbeyaka nto mimbola mbala ngana yasalaso Eohwelo. Ndo vɔ koka nanga mbeya dia kana nsanganya tshɛ y’Ɛmɛnyi wa Jehowa salemaka woho wakɔ waamɛ. Kaanga mbele awui efula l’atei w’awui asɔ wayɔtɛkɛtama lo sawo dia Eohwelo, eyoyo mbeyaka monga l’ohomba wa elembetshielo ekina wa laadiko. Sawo dia lo jw.org diele l’ɔtɛ a dui ɔnɛ: “Pourquoi les Témoins de Jéhovah célèbrent-​ils le Repas du Seigneur différemment des autres religions?” koka tokimanyiya dia nkadimola lo ambola amɔtshi wele la wɔ. Sho kombolaka nsala kɛnɛ tshɛ kakokaso nsala la ntondo ka Eohwelo, etena kasalematɔ ndo l’ɔkɔngɔ atɔ, dia “nkimanyiya wanɛ wele nsuke” dia nkondja wahɔ oma lo Eohwelo.—Ets. 13:48.

TOKIMANYIYA WANƐ WAMBƆLA LO NYUMA

17. Ngande wakoka dikumanyi nkimanyiya wanɛ wambɔla lo nyuma? (Ɛzɛkiyɛlɛ 34:​12, 16)

¹⁷ Lo nshi ya Eohwelo, ngande wakoka dikumanyi nkimanyiya wanɛ wambɔla lo nyuma? Ɛnyawɔ dia wɛ ndjakiyanyaka dikambo diawɔ. (Adia Ɛzɛkiyɛlɛ 34:​12, 16.) La ntondo ka Eohwelo, nyoyashikikɛ dia mbelɛ anto efula naka kokaka. Nyowashikikɛ dia nyu mbowaokaka ngandji ndo kombolaka mbakimanyiya lo yoho yakɔna tshɛ. Nyalɔmbɛ dia vɔ mbɔtɔ lo Eohwelo. Naka wamboya lo Eohwelo, nyaalongole la waasaso tshɛ. L’ɔkɔngɔ wa Eohwelo, nyotetemale sawola l’anangɛso ndo l’akadiyɛso wa ngandji asɔ ndo nyowasha ekimanyielo ka lo nyuma kewɔ latɔ ohomba dia nkalola le Jehowa.—1 Pe. 2:25.

18. Ngande wakokaso sho tshɛ nkimanyiya wanɛ wambɔla lo nyuma? (Rɔmɔ 12:10)

 ¹⁸ Ase etshumanelo tshɛ koka nkimanyiya wanɛ wambɔla lo nyuma wɔtɔ lo Eohwelo. Lo ngande? Lo mbasalɛ akambo la ngandji, la ɔlɔlɔ ndo la dilɛmiɛlɔ. (Adia Rɔmɔ 12:10.) Tohɔ dia ɛkɔkɔ wa ngandji ɛsɔ mbeyaka mengenga dia nkalolɛ nsanganyanya. Ondo vɔ mbeyaka monga la wɔma w’ɔnɛ hawotolongɔma dimɛna. e Laasɔ nyewɔ dia nkotola yambalo yawɔ lo mbaoka ambola wakoka mbowasha nsɔnyi kana mbita dui dimɔtshi diakoka mbahomuya. (1 Tɛs. 5:11) Anangɛso l’akadiyɛso asɔ wekɔ asekaso ambetawudi. Tekɔ l’ɔngɛnɔngɛnɔ wa ntɛmɔla la wɔ kaamɛ nto Jehowa!—Os. 119:176; Ets. 20:35.

19. Wahɔ akɔna wakondjaso lo mbohɔka nyɔi ka Yeso?

¹⁹ Tekɔ la lowando l’efula lo woho wakatotɛ Yeso dia mbohɔka nyɔi kande ɔnɔnyi tshɛ ndo nshihodia lande na kele dui sɔ ohomba! Etena kasalaso dui sɔ, sho ndjakondjiyɛka ndo kondjiyɛka anto akina wahɔ lo toho efula. (Isa. 48:​17, 18) Sho fudiaka ngandji kokaso Jehowa nde la Yeso. Sho mɛnyaka dia tekɔ la lowando l’efula lo menda kɛnɛ kakawatosalɛ. Sho keketshaka dimama dia lam’asaso l’asekaso ambetawudi. Ndo sho koka nkimanyiya anto akina dia vɔ mbeka woho wa ngɛnangɛna l’ɛtshɔkɔ wayotokondja oma l’oshinga w’etshungwelo. Nyɛsɔ tosale tshɛ kakokaso nsala dia monga nsuke lo Eohwelo k’ɔnɔnyi ɔnɛ, mbuta ate lushi loleki ohomba la l’ɔnɔnyi!