Amɔtshi wakole lo mbekelo yele apami efula salɛka wamato akambo oko anto wele l’ɛse kawɔ. Ɛnyɛlɔ, Hans, omendji w’otshimbedi wadjasɛ la Bolivie, mbutaka ate: “Apami amɔtshi wakole lo mbekelo yakeketsha apami dia vɔ nsala akambo la lotamanya tshɛ, apami asɔ mbɔsaka dia vɔ mbahemɛ wamato ndo mbala efula vɔ mbasalɛka akambo aha la dilɛmiɛlɔ.” Shengxian, ekumanyi ka la Taïwan, mbutaka ate: “Lɛnɛ akamole, apami efula mbɔsaka dia wamato hawohombe mbisha apami kanyi. Naka pami mbisha kanyi yoye oma le womoto lo kɛnɛ kendana la dui dimɔtshi, kete asekande mbeyaka mbɔɔnyɔla.” Apami akina mɛnyaka shɔnɔdi yawɔ otsha le wamato lo toho tokina. Ɛnyɛlɔ, vɔ mbeyaka mbatɛ dia nkitshakitsha tɔɔla ta la wamato.

Kɛnɛ kele mɛtɛ ele, ndooko pami kahomba ntshikala mfumbe lo mbekelo ka lɛnɛ akandole. Nde koka minya nkanyi y’ɔnɛ apami ndeka wamato. (Ɛf. 4:​22-24) Dui sɔ koka salema lo mbokoya ɛnyɛlɔ ka Jehowa. Lo sawo nɛ, tayɛna woho wasalɛ Jehowa wamato akambo, woho wakoka anangɛso mbeka dia salɛ wamato akambo oko waasalɛ Jehowa, ndo woho wakoka dikumanyi dialɔmbɔla mɛnya dilɛmiɛlɔ otsha le akadiyɛso.

NGANDE WASALƐ JEHOWA WAMATO AKAMBO?

Jehowa ekɔ ɛnyɛlɔ ka kokele lo woho wasalɛ wamato akambo. L’ɛnyɛlɔ k’ombutshi wa pami wele la kɛtshi, nde mbokaka nkumbo k’ana w’anto ngandji. (Jni. 3:16) Ndo akadiyɛso wa kɔlamelo wekɔ wamato wele la nɛmɔ di’efula le nde. Tɔsɛdingole toho tayela tɛnya woho wɔsa Jehowa wamato la nɛmɔ.

Nde mbasalɛka akambo aha la shɔnɔdi. Jehowa akatonge apami la wamato l’efanelo kande. (Eta. 1:27) Nde kotonga apami la timba kana la diewo dioleki wamato; kana nde ndeka nanga apami oleki wamato. (2 Ɛk. 19:7) Nde akatonge apami la wamato l’akoka akɔ waamɛ wa nshihodia akambo wa mɛtɛ  wa lo Bible ndo dia nkɛnɛmɔla waonga ande w’amɛna. Jehowa mbɔsaka nto kɔlamelo y’apami la ya wamato woho akɔ waamɛ, oyadi elongamelo kawɔ ka nsɛna lanɛ la nkɛtɛ lo paradiso pondjo pondjo kana ka nkamba oko waa nkumi ya dikanga ndo ɛlɔmbɛdi l’olongo. (2 Pe. 1:​1, nɔtɛ.) Kɛnɛ kele mɛtɛ ele, Jehowa bu la shɔnɔdi otsha le wamato.

Nde mbahokamɛka. Jehowa ndjashaka lo nsaki ndo l’ekakatanu wahomana la wamato. Ɛnyɛlɔ, nde mbahokamɛka ndo nde akakadimola lo alɔmbɛlɔ waki Rashɛlɛ nde la Hana. (Eta. 30:22; 1 Sa. 1:​10, 11, 19, 20) Jehowa akasambiya nto afundji wa Bible dia mbidja ndo ɛkɔndɔ w’apami wakahokamɛka wamato. Ɛnyɛlɔ, Abrahama akayele didjango dia Jehowa dia mpokamɛ Sara ka wadɛnde. (Eta. 21:​12-14) Nkumekanga Davidɛ akahokamɛ Abigayɛlɛ. Lo mɛtɛ, nde akayaoke dia Jehowa mbakotome dia nde ndjɔtɛkɛta la nde. (1 Sa. 25:​32-35) Yeso, lakakɛnɛmɔla lo yoho ya kokele waonga wa She, akahokamɛ nyango, mbuta ate Mariya. (Jni. 2:​3-10) Bɛnyɛlɔ sɔ tɔtɔmiyaka yoho mɔtshi yɛnya Jehowa dilɛmiɛlɔ otsha le wamato lo mbahokamɛ.

Nde ndjaɛkɛka le wɔ. Ɛnyɛlɔ, Jehowa akayaɛkɛ le Eva dia mbokimanyiya dia nkokɛ nkɛtɛ k’otondo. (Eta. 1:28) Lo nsala ngasɔ, Jehowa akawɛnya dia nde akawɔsaka la nɛmɔ, koko aha mbɔɔsa dia nde ekɔ l’ɛse ka pami, mbuta ate Adama, koko nde aki okimanyedi le nde. Jehowa akayaɛkɛ nto le omvutshi wa womoto Dɛbɔra ndo Huluda dia mbisha ekambi ande dako, mbidja ndo ombadi ɔmɔtshi ndo nkumekanga kɛmɔtshi. (Emb. 4:​4-9; 2 Nku. 22:​14-20) Ɛlɔ kɛnɛ, Jehowa ndjaɛkɛka le Akristo wa wamato dia nkamba olimu ande. Akadiyɛso wa kɔlamelo asɔ wekɔ lo nkamba oko apandjudi, ambatshi mboka ndo waa misiɔnɛrɛ. Vɔ kimanyiyaka l’osangelo, lo mbika, ndo lo nɔngɔsɔla Mbalasa ya Diolelo ndo mvudu ya bɛtɛlɛ. Amɔtshi kambaka lo Bɛtɛlɛ; akina kambaka lo mvudu y’okadimwelo oma l’etale. Wamato asɔ wekɔ oko olui w’alembe wakamba la Jehowa dia nkotsha lolango lande. (Os. 68:11) Mbokɛmaka hwe dia Jehowa hɔshi wamato oko anto wele wɛɔdu kana wele bu l’akoka.

NGANDE WAKOKA ANANGƐSO MBEKA DIA SALƐ WAMATO AKAMBO OKO WAASALƐ JEHOWA?

Anangɛso le, dia ndjashikikɛ kana tekɔ lo salɛ akadiyɛso w’Akristo akambo oko waasalɛ Jehowa, sho pombaka nsɛdingola tokanyi ndo etsha aso la losembwe tshɛ. Dia nsala dui sɔ, tekɔ l’ohomba w’ekimanyielo. Oko watokimanyiyaka mashinyi welɛwɔ rayons X dia mbeya hemɔ kele l’onto l’otema, ɔngɛnyi wa mɛtɛ ndo Ɔtɛkɛta wa Nzambi koka tokimanyiya dia sho mbishola nsaki tshɛ ya kɔlɔ yele la so l’otema lo dikambo dia wamato. Kakɔna kahombaso nsala dia nongola ekimanyielo kɛsɔ?

Mbola ɔngɛnyi ayɛ ɔmɔtshi w’oshika. (Tok. 18:17) Ayonga dimɛna sho mimbola ɔngɛnyi aso wɛkɛso otema weyama oko onto ɔlɔlɔ ndo wele la yimba ya wɛdimo ambola wayela anɛ: “Oko le yɛ ngande wafɔnyayɛ woho wasalɛmi akadiyɛmi akambo? Onde vɔ koka kotɛ dia dimi mbalɛmiyaka? Onde ekɔ dui dimɔtshi diakokami nsala dia mbasalɛ akambo lo yoho ya dimɛna?” Naka ɔngɛnyi ayɛ ambokotɛ toho tɔmɔtshi takokayɛ ndjalowanya, ewɔ dia mbisha tɛkɛnɛndɛ. Lo dihole dia nsala ngasɔ, onga suke dia nsala etshikitanu wahombama.

Ekaka Ɔtɛkɛta wa Nzambi. Yoho yoleki dimɛna yakokaso mbeya dia kana tekɔ lo salɛ akadiyɛso akambo lo yoho ya dimɛna, ele nsɛdingola dionga ndo etsha aso lo tshimbo y’Ɔtɛkɛta wa Nzambi. (Hɛb. 4:12) Lo mbekaka Bible, tayokondja wetshelo oma le apami wakasalɛ wamato akambo lo yoho ya dimɛna ndo apami waki kombasalɛ akambo lo yoho ya dimɛna. Sho koka mbɛdika etsha awɔ la etsha wakiso hita. Ndo nto, anangɛso pombaka monga la yewo diaha sɛdingolaka paka kɛnɛ kotshi divɛsa ɔtɔi to dia lo Bible ko nkamba ladiɔ dia sukɛ kanyi ya kɔlɔ lo kɛnɛ kendana la wamato, koko vɔ pombaka nsɛdingola avɛsa efula wa lo Bible wɛnya woho wakoka pami salɛ womoto akambo. Lo yoho shɔ mbakokawɔ nshihodia kanyi ya Nzambi lo dikambo dia wamato. Ɛnyɛlɔ, lo 1 Petero 3:​7, pami pombaka mbisha wadɛnde “kɛnɛmɔ kele oko kɛnɛ kashawɔ dɔnga dia diwomba dia wɔdu.” b Onde kɛsɔ nembetshiyaka dia nde ekɔ l’ɛse, mbuta ate bu la yimba kana bu l’akoka wele oko wa pami? Ndooko! Naka sho mbɛdika ɛtɛkɛta wa Petero la kɛnɛ kele lo Ngalatiya 3:​26-29, kete dui sɔ mɛnyaka dia Jehowa akasɔnɛ apami  kaamɛ la wamato dia vɔ tolɛ kaamɛ la Yeso l’olongo. Etena kekaso Ɔtɛkɛta wa Nzambi ndo kambolaso ɔngɛnyi aso ɔmɔtshi kanyi yande lo woho wasalɛso wamato akambo, sho koka mbeka yoho ya laande ya mɛnya akadiyɛso dia sho mbaalɛmiyaka.

NGANDE WƐNYA DIKUMANYI DIA VƆ NƐMIYAKA AKADIYƐSO?

Anangɛso wa l’etshumanelo koka ndo vɔ lawɔ mbeka woho wa salɛka akadiyɛso akambo la dilɛmiɛlɔ tshɛ lo ndjela ɛnyɛlɔ ka dikumanyi dia ngandji. Ngande wakoka dikumanyi mbisha ɛnyɛlɔ ka dilɛmiɛlɔ otsha le akadiyɛso? Tɔsɛdingole toho tɔmɔtshi shikaa.

Vɔ mandolaka akadiyɛso. Ɔpɔstɔlɔ Pɔɔlɔ akatshikɛ dikumanyi ɛnyɛlɔ ka dimɛna ka mbokoya. Nde akaandola akadiyɛso efula lo sɛkɛ lo mukanda wakandafundɛ etshumanelo ka la Rɔmɔ. (Rɔmɔ 16:12) Onde wɛ koka nkanyiya ɔngɛnɔngɛnɔ wakahombe monga l’akadiyɛso asɔ etena kakawadiɛka etshumanelo mukanda w’oma le Pɔɔlɔ? Woho akɔ waamɛ mbele, la ngandji tshɛ dikumanyi mandolaka akadiyɛso lo waonga awɔ w’amɛna ndo olimu wa wolo wakambɛwɔ Jehowa. Dui sɔ kimanyiyaka dia akadiyɛso mbeya ɔnɛ vɔ nɛmiyamaka efula l’etshumanelo ndo vɔ mbowaɔsaka la nɛmɔ. Ɛtɛkɛta w’ekeketshelo w’oma le ekumanyi kɛmɔtshi mbeyaka monga kɛnɛ mɛtɛ kele l’akadiyɛso l’ohomba etena kakambɛwɔ Jehowa la kɔlamelo tshɛ.—Tok. 15:23.

Etena kaandolawɔ akadiyɛso, dikumanyi mbutaka awui w’amɛna ndo wa shikaa lo dikambo diawɔ. Lande na? Kadiyɛso kelɛwɔ Jessica mbutaka ate: “Ekɔ dimɛna efula etena katɛ anangɛso kadiyɛso kɛmɔtshi ɔnɛ ‘olimu wa dimɛna.’ Koko sho ndekaka ngɛnangɛna etena katandola anangɛso l’ɔtɛ wa dikambo dimɔtshi shikaa, ɛnyɛlɔ woho wetshaso anaso woho wa vɔ mbidjasɛ ki lo losanganya kana etena katshɔso tɔsa ombeki aso ɔmɔtshi wa Bible oya lo losanganya.” Etena kandola dikumanyi akadiyɛso lo dikambo dimɔtshi shikaa, vɔ kimanyiyaka di’akadiyɛso ndjaoka dia vɔ wekɔ ohomba ndo vɔ mbɔsamaka la nɛmɔ l’etshumanelo.

 Vɔ pokamɛka akadiyɛso. Dikumanyi diele l’okitanyiya mbeyaka di’aha vɔamɛ ato mbele la tokanyi t’amɛna. Dikumanyi diele l’okitanyiya sɔ nɔmbaka akadiyɛso dia vɔ mbisha tokanyi tawɔ ndo vɔ mbahokamɛka la yambalo tshɛ etena katɛkɛtawɔ. Lo nsala ngasɔ, dikumanyi keketshaka akadiyɛso ndo vɔamɛ ndjakondjɛka wahɔ. Lo ngande? Ekumanyi kelɛwɔ Gerardo, kakamba lo Bɛtɛlɛ mbutaka ate: “Lakɛnyi dia mimbola akadiyɛso tokanyi tawɔ kimanyiyakami dia dimi nsala olimu ami dimɛna. Mbala efula, vɔ wambokamba olimu ɔsɔ edja oleki anangɛso efula.” L’etshumanelo, akadiyɛso efula wekɔ lo nkamba oko ambatshi mboka, diakɔ diele vɔ mbeyaka awui efula wendana l’anto wa l’ɛtshi ka nkɛtɛ kɛmɔtshi. Ekumanyi kelɛwɔ Bryan mbutaka ate: “Akadiyɛso wekɔ l’awui efula wa nsala l’okongamelo. Ɔnkɔnɛ nyokondja wahɔ oma lo diewo diawɔ!”

Dikumanyi diele la tomba hawotone esadi esadi tokanyi t’akadiyɛso. Lande na? Ekumanyi kɛmɔtshi kelɛwɔ Edward mbutaka ate: “Kanyi y’oma le kadiyɛso ndo awui wakokomɛ koka nkimanyiya ɔnangɛso ɔmɔtshi dia nde mbeya dikambo lo tshɛ kadiɔ ndo dui sɔ koka mbokimanyiya dia nde nkɛnɛmɔla kɛtshi.” (Tok. 1:5) Kaanga naka ekumanyi hakambi la nkanyi yaki kadiyɛso, nde koka mbokaloyaka losaka lo welo wakandadjisha dia mbisha kanyi ndo yimba yande.

Vɔ ndowanyaka akadiyɛso. Dikumanyi diele la tomba nyangaka waaso wa ndowanya akadiyɛso. Ɛnyɛlɔ, vɔ koka mbetsha akadiyɛso woho wa nɔmbɔla nsanganya y’otsha l’esambishelo naka ɔnangɛso lambobatizama bu lawɔ. Vɔ koka mbalowanya woho wa nkamba la dihomɔ dimɔtshi kana mashinyi wayokoka mbakimanyiya dia mbika mvudu ndo nɔngɔsɔla prɔjɛ mɔtshi ya l’okongamelo. Lo Bɛtɛlɛ, emendji wakalowanya akadiyɛso l’ɛkɛndɛ w’otshikitanyi, mbidja ndo olimu w’ɔlɔngɔswɛlɔ, osombelo wa diangɔ, lo owadi wa falanga, lo dikongelo dimɔtshi dia ɔrdinatɛrɛ ndo lo diangɔ dikina. Etena kalowanya dikumanyi akadiyɛso, vɔ mɛnyaka dia vɔ mbɔsaka akadiyɛso oko anto wele l’akoka ndo wanɛ wakokawɔ mbɛkɛ etema.

Akadiyɛso efula kambaka l’olowanyelo wakawalongola oma le dikumanyi dia nkondjiyɛ anto akina wahɔ. Ɛnyɛlɔ, akadiyɛso amɔtshi kambaka la elowanyelo wakawalongola oma lo wokelo dia nkimanyiya anto akina dia vɔ nyomoka mvudu yawɔ yakalana l’ɔkɔngɔ wa mpokoso k’oma lo diangɔ diakatongama. Akadiyɛso akina kambaka l’akoka wakaweke dia ndjasha l’esambishelo ka lo sɛkɛ dia nkimanyiya dia ndowanya akadiyɛso akina efula lo yoho y’esambishelo shɔ. Ngande wayaoka akadiyɛso asɔ lo kɛnɛ kendana l’elowanyelo wakawalongola oma le dikumanyi? Kadiyɛso kelɛwɔ Jennifer mbutaka ate: “Etena kakamakambaka lo wokelo wa Mbalasa kɛmɔtshi ka Diolelo, omendji ɔmɔtshi akɔshi etena ka ndowanyɛmi. Nde akɛnyi olimu wakamakambaka ndo akamandola l’ɔtɛ awɔ. Lakalangaka nkamba kaamɛ la nde nɛ dia lakayaokaka dia nde mbɔsakami la nɛmɔ ndo ekɔ onto lahombami mbɛkɛ otema.”

ƐLƆLƆ WAYA LO SALƐ AKADIYƐSO AKAMBO OKO ASE NKUMBO

Sho mbokaka akadiyɛso wa kɔlamelo ngandji oko wa waoka Jehowa! Ɔnkɔnɛ sho mbasalɛka akambo oko ase nkumbo kaso. (1 Tim. 5:​1, 2) Sho mongaka l’ɔlɔ ndo la lowando lo nkamba kaamɛ la wɔ. Ndo sho mongaka l’ɔngɛnɔngɛnɔ etena keyawɔ dia sho mbaokaka ngandji ndo mbasukɛka. Kadiyɛso kelɛwɔ Vanessa mbutaka ate: “Lekɔ lo mbisha Jehowa losaka efula lo woho wemi l’okongamelo ande, woludi l’anangɛso wakeketsha lonyuma lami.” Kadiyɛso kadjasɛ la Taïwan mbutaka ate: “Lekɔ lo mbisha Jehowa losaka l’efula nde la okongamelo ande lo woho wɔsawɔ wamato la nɛmɔ di’efula ndo nsaki yaso. Dui sɔ keketshaka mbetawɔ kami ndo kimanyiyakami dia dimi nyomonga la lowando l’efula lo diɛsɛ diele la mi dia monga l’atei w’okongamelo wa Jehowa.”

Ande ofunu wahomba monga la Jehowa etena kɛnande Akristo w’apami wa kɔlamelo wasala la welo tshɛ dia mbɔsa ndo salɛ wamato akambo oko waasalɛnde lee! (Tok. 27:11) Ekumanyi kelɛwɔ Benjamin ka la Écosse mbutaka ate: “Apami efula wa l’andja ɛlɔ kɛnɛ bu la dilɛmiɛlɔ otsha le wamato lo tshɛ kawɔ, etena kele akadiyɛso lo Mbalasa ka Diolelo sho kombolaka dia mbashikikɛ dia vɔ nɛmiyamaka ndo mbokamaka ngandji.” Nyɛsɔ sho tshɛ tosale tshɛ kakokaso nsala dia mbokoya Jehowa lo salɛka akadiyɛso akambo la ngandji ndo mbasha dilɛmiɛlɔ diasungana.—Rɔmɔ 12:10.