1, 2. Ambola akɔna wonyiyama lo kɛnɛ kendana la ɛtɛkɛta wa Yeso watanema lo Mateo 24:14?

YESO akatatshi dia lo nshi y’ekomelo, lokumu l’ɔlɔlɔ la Diolelo layosambishama le anto tshɛ. (Mateo 24:14) Oko weso Ɛmɛnyi wa Jehowa, sho mbeyamaka l’andja w’otondo l’ɔtɛ w’olimu aso w’esambishelo. Anto amɔtshi nangaka losango lasambishaso, koko akina hawolilange. Koko kaanga anto wahalange losango laso tɔlɛmiyaka l’ɔtɛ w’olimu aso. Tekɔ l’ofunu dia paka sho mbasala olimu wakatatshi Yeso. Onde tekɔ la shadiya dia mbuta ngasɔ? Ngande wahombaso monga l’eshikikelo ɔnɛ esambishelo kaso mbele olimu wakatatshi Yeso?

² Atshunda efula w’ɛtɛmwɛlɔ sɛmaka dia vɔ wekɔ lo nsambisha losango la Yeso. Koko esambishelo kawɔ komɛka paka lo asawo washawɔ l’ɔtɛmwɛlɔ, lo televiziɔ, lo Ɛtɛrnɛtɛ kana lo mbutɛ tsho anto akina woho wakaweke akambo wendana la Yeso. Amɔtshi fɔnyaka dia nkimanyiya anto lo ehomba awɔ kana nsala olimu wakimanyiya anto akina oko adɔkɔtɛlɛ,  enganga, kana embetsha ekɔ yoho yawɔ y’esambishelo. Ko onde elimu ɛsɔ mbele olimu w’esambishelo wakatatshi Yeso?

3. Lo ndjela Mateo 28:19, naa akambo anɛi wahomba nsala ambeki wa Yeso?

³ Onde Yeso akalange mbuta di’ambeki ande nkonga anto dia vɔ ndja le wɔ? Ndooko! L’ɔkɔngɔ wa eolwelo kande, Yeso akatɛ nkama y’ambeki ande ate: “Nyotshu ndo nyetɛ anto wa lo wedja tshɛ ambeki, nyaabatize . . . , nyowaetshake dia nkitanyiya akambo tshɛ wambomonyodjangɛ.” (Mateo 28:19, 20) Ɔnkɔnɛ, oko weso ambeki wa Yeso, sho pombaka nsala akambo anɛi. Sho pombaka mbetɛ anto ambeki, mbabatiza ndo mbaetsha. Koko ntondo, sho pombaka ntshɔ otsha le anto. Nomb’ewo kɛmɔtshi k’awui wa lo Bible akalembetshiya ɔnɛ: “‘Tshɔ’ ekɔ ɔkɛndɛ w’onto tshɛ letawɔ ntenyanya shinga kana ntenyanya ndjale.”​—Mateo 10:7; Luka 10:3.

4. Kakɔna kalembetshiya nkoma “amundji w’anto”?

⁴ Kakɔna kakalongamɛka Yeso le ambeki ande? Onde nde akalangaka dia vɔ nsambisha lo ngelo yawɔ hita ko kana nde akalange dia vɔ monga olui w’an to wamboyakongɛ? Lam’ele otonga dui diahakoke salema di’onto ɔtɔi nsambisha lo “wedja tshɛ,” ambeki ande wakahombe monga olui w’anto wamboyakongɛ. Dui sɔ mbakalange Yeso mbuta etena kakandelɛ ambeki ande dia vɔ nkoma “amundji w’anto.” (Adia Mateo 4:18-22.) Yeso konanga mbaɛdika la omundji ɔmɔtshi wa nse wakamba la yɔdi ndo l’ɔbɔ ande lo nkonga lose dia lɔ mundama. Koko wondelo wa nse wakatɛkɛta Yeso mendanaka la ɛtɛi wandawɔ nse. Yoho ya wondelo wa nse shɔ yakalɔmbaka dia nkamba olimu wa wolo, kongɛma, ndo anto efula nkamba kaamɛ.​—Luka 5:1-11.

5. Ambola anɛi akɔna wahombaso nkadimola, ndo lande na?

⁵ Dia mbeya wanɛ wasambisha lokumu l’ɔlɔlɔ, sho pombaka nkadimola ambola anɛi anɛ:

• Losango lakɔna lahomba nsambisha ambeki wa Yeso?

• Kakɔna kahomba mbatshutshuya?

• Toho takɔna tahombawɔ nkamba la tɔ?

• Ngande wahomba monga ohamelo w’olimu ndo l’edja kakɔna kahombawɔ ntetemala?

▪ Ekadimwelo wa ambola anɛ wayotokimanyiya dia sho mbeya waa na wasala olimu washimbɛ nsɛnɔ ndo wayokeketsha nsaki kaso ka ntetemala nsambisha.​—1 Timɔte 4:16.

6. Lande na kakokayɛ monga l’eshikikelo ɔnɛ Ɛmɛnyi wa Jehowa mbasambisha losango la mɛtɛ?

⁶ Adia Luka 4:43. Yeso akasambishaka “lokumu l’ɔlɔlɔ la Diolelo,” ndo nde nangaka dia ambeki ande nsala woho akɔ waamɛ. Naa olui w’anto wasambisha losango lɔsɔ le anto tshɛ? Paka Ɛmɛnyi wa Jehowa! Kaanga anto amɔtshi wahatolange mbetawɔka dui sɔ. Ɛnyɛlɔ, tende kɛnɛ kakatɛ owandji ɔmɔtshi w’ɔtɛmwɛlɔ waki misiɔnɛrɛ waketeta  lo wedja efula wotshikitanyi Ɔmɛnyi ɔmɔtshi wa Jehowa. Lo wodja tshɛ, owandji w’ɔtɛmwɛlɔ ɔsɔ akambolaka Ɛmɛnyi wa Jehowa ɔnɛ losango lakɔna lasambishanyu. Owandji w’ɔtɛmwɛlɔ akɔ akate ate: “Vɔ tshɛ waki dinginya di’efula lo mbisha okadimwelo akɔ waamɛ ɔnɛ: ‘Lokumu l’ɔlɔlɔ la Diolelo.’” Kɔmatɛrɛ k’owandji w’ɔtɛmwɛlɔ ɔsɔ mɛnyaka dia sho bu dinginya koko tekɔ kaamɛ oko Akristo wa mɛtɛ. (1 Kɔrɛtɔ 1:10) Diolelo diaki Nzambi mbele nto losango loleki ohomba latanema lo Tshoto y’Etangelo Mbewoyaka Diolelo diaki Jehowa. Periodikɛ kɛnɛ tanemaka lo ɛtɛkɛta 254 ndo yɛdikɔ ya l’atei atei ya suke la kɔpi 59 000 000 yambotondjama, kɛsɔ mɛnyaka dia tɔ mbele periodikɛ kamboleka kahanyema l’andja w’otondo!

7. Ngande weyaso ɔnɛ ewandji w’ɛtɛmwɛlɔ wa Lokristokristo hawosambisha losango la mɛtɛ?

⁷ Ewandji w’ɛtɛmwɛlɔ wa Lokristokristo hawosambisha awui wendana la Diolelo diaki Nzambi. Naka vɔ wekɔ lo ntɛkɛta awui wendana la Diolelo, efula ka l’atei awɔ mbutaka ɔnɛ diɔ diekɔ nsaki ka l’otema w’onto. (Luka 17:21) Vɔ hawetsha anto ɔnɛ Diolole mbele lowandji la l’olongo lalɔmbwama oma le Yeso. Koko, mbala efula vɔ mbutaka akambo wendana la Yeso lo fɛtɛ ka Nɔɛlɛ kana ka Pasaka. Vɔ hawolembetshiya dia Diolelo mbayokandola ekakatanu tshɛ wele l’anto ndo ɔnɛ keema edja diɔ diayonya akambo wa kɔlɔ tshɛ oma la nkɛtɛ. (Ɛnyɛlɔ 19:11-21) Mbokɛmaka hwe dia, ɛnɔmbɔdi wa lo Lokristokristo haweye kɛnɛ kayosala Yeso oko Nkumekanga ka Diolelo diaki Nzambi. Ndo l’ɔtɛ wewɔ hawoshihodia losango la Yeso, mbahawashihodia lande na kahombawɔ nsambisha.

8. Eyango akɔna wa kɔlɔ watshutshuya anto amɔtshi dia nkamba olimu w’esambishelo?

⁸ Ambeki wa Yeso hawohombe nsambisha dia nkondja falanga kana mbika mvudu ya mambiya anto. Yeso akatɛ ambeki ande ate: “Nyakalongola olongolalongola, nyotokimɔ okimɔkimɔ.” (Mateo 10:8) Ɔnkɔnɛ, olimu w’esambishelo hahombe monga okanda. (2 Kɔrɛtɔ 2:17) Ambeki wa Yeso hawohombe nyanga difuto l’olimu awɔ w’esambishelo. (Adia Etsha 20:33-35.) Kaanga mbele ɛtɛkɛta wa Yeso mbokɛmaka hwe, ɛtɛmwɛlɔ efula mbekolaka timba tawɔ lo kɔngɔlaka falanga l’oyango wa nsukɛ ɛtɛmwɛlɔ awɔ ndo mfuta ewandji w’ɛtɛmwɛlɔ ndo ase elimu akina. Etombelo wele la dui sɔ ele, ewandji efula wa Lokristokristo wambokoma ɛngɔnyi wa mamba.​—Ɛnyɛlɔ 17:4, 5.

9. Ngande wɛnya Ɛmɛnyi wa Jehowa ɔnɛ vɔ ndjashaka l’olimu w’esambishelo l’oyango wa dimɛna?

⁹ Onde Ɛmɛnyi wa Jehowa salaka ɛkɔngɔ lo Mbalasa ya Diolelo yawɔ kana lo nsanganya yawɔ ya weke? Ndooko! Olimu awɔ sukamɛka la weshasha wa la lolango. (2 Kɔrɛtɔ 9:7) L’ɔnɔnyi wetshi, Ɛmɛnyi wa Jehowa waketsha suke la miliyara hende ya wenya lo nsambisha lokumu l’ɔlɔlɔ ndo wakekaka Bible l’anto ndekana miliyɔ divwa ngɔndɔ tshɛ. Vɔ hawofutama l’olimu awɔ w’esambishelo, koko wekɔ l’ɔngɛnɔngɛnɔ wa nkamba la falanga yawɔ hita dia nsala olimu  ɔsɔ. Onyangiyangi ɔmɔtshi akate lo dikambo di’olimu w’Ɛmɛnyi wa Jehowa ate: “Oyango awɔ woleki woke ele wa nsambisha ndo mbetsha.” Nde akate nto di’Ɛmɛnyi wa Jehowa bu la ewandji w’ɔtɛmwɛlɔ wafutawɔ falanga. Ko naka hatosambisha l’ɔtɛ wa falanga, oyango akɔna wele laso? La lolango tshɛ, sho salaka olimu ɔsɔ nɛ dia sho mbokaka Jehowa ngandji ndo anto. Dionga sɔ kotshaka prɔfɛsiya kele lo Osambu 110:3. (Adia.)

10. Toho takɔna takakambaka la Yeso nde l’ambeki ande dia nsambisha?

¹⁰ Toho takɔna takakambaka la Yeso nde l’ambeki ande dia nsambisha? Vɔ wakatshɔka dihole tshɛ diakawakokaka ntana anto. Ɛnyɛlɔ, vɔ wakasambishaka lo toshinga ndo lo waa bingu. Vɔ wakayangaka nto anto lo mvudu yawɔ. (Mateo 10:11; Luka 8:1; Etsha 5:42; 20:20) Esambishelo ka luudu la luudu kaki yoho mɔtshi yakakongɛma dia nsambisha weho w’anto tshɛ.

11, 12. Lo kɛnɛ kendana l’esambishelo ka lokumu l’ɔlɔlɔ, kakɔna kayotota lo mbɛdika welo wadja ase Lokristokristo la wɛnɛ wadja ekambi waki Nzambi?

¹¹ Onde ase ɛtɛmwɛlɔ wa lo Lokristokristo sambishaka lokumu l’ɔlɔlɔ oko wakalisambishaka Yeso? Mbala efula ewandji w’ɛtɛmwɛlɔ wafutama mbishaka sawo dimɔtshi le ase ɔtɛmwɛlɔ awɔ. Vɔ hawetɛ anto ambeki w’eyoyo, koko vɔ tetemalaka kokɛ paka anto wokongaka lawɔ l’ɔtɛmwɛlɔ. Lo ntena dimɔtshi, vɔ wakahembe nkeketsha ase ɔtɛmwɛlɔ awɔ dia nsambisha. Ɛnyɛlɔ, l’ɔnɔnyi 2001, Papa l’Ɔrɔma Jean Paul II akate lo mukanda ɔmɔtshi ɔnɛ ase ɔtɛmwɛlɔ pombaka nsambisha Evanjiliyɔ ndo monga l’ohetoheto waamɛ waki la ɔpɔstɔlɔ Pɔɔlɔ  lakate ate: “Mfɔnu kayale le mi naka halasambisha lokumu l’ɔlɔlɔ.” Oma laasɔ, Papa l’Ɔrɔma akayotaka ɔnɛ olimu w’esambishelo ɔsɔ pombaka salema aha paka oma le anto yema tshitshɛ wakalowanyema, koko le oseka onto tshɛ la l’ɔtɛmwɛlɔ. Koko, anto yema tshitshɛ tsho mbakayele ekeketshelo kɛsɔ.

¹² Ko kayotota lo dikambo di’Ɛmɛnyi wa Jehowa? Vɔamɛ ato mbasambisha ɔnɛ Yeso akatatɛ mbolɛ oko Nkumekanga lo 1914. Vɔ kitanyiyaka Yeso ndo olimu w’esambishelo mbetshawɔ lo dihole dia ntondo lo nsɛnɔ yawɔ. (Makɔ 13:10) Dibuku dimɔtshi (Pillars of Faith—American Congregations and Their Partners) diakate ɔnɛ le Ɛmɛnyi wa Jehowa, olimu w’esambishelo wekɔ ohomba efula. Diɔ diakate nto ɔnɛ etena katanawɔ anto wele la ndjala, wayaoka ompoko, ndo la hemɔ, vɔ pembaka dia mbakimanyiya, koko hawohɛ pondjo dia oyango awɔ woleki woke ele wa nsambisha anto akambo wendana la ekomelo k’andja ɔnɛ ndo mbaetsha akambo wendana la etshungwelo. Ɛmɛnyi wa Jehowa wekɔ lo ntetemala nsambisha losango lɔsɔ lo mbokoya toho takasambishaka Yeso nde l’ambeki ande.

13. Ngande wakahombe monga ohamelo w’olimu w’esambishelo?

¹³ Yeso akate di’ambeki ande wakahombe mbetsha ndo nsambisha lokumu l’ɔlɔlɔ “lo nkɛtɛ k’otondo.” Wakawadjangɛ dia mbetɛ anto ambeki “lo wedja tshɛ.” (Mateo 24:14; 28:19, 20) Dui sɔ nembetshiyaka dia lokumu l’ɔlɔlɔ layohomba sambishama l’andja w’otondo.

14, 15. Kakɔna kɛnya di’Ɛmɛnyi wa Jehowa wambokotsha prɔfɛsiya kaki Yeso kendana la ohamelo w’olimu? (Enda osato wele lo mbɔtwɛlɔ.)

¹⁴ Paka Ɛmɛnyi wa Jehowa ato mbakotsha prɔfɛsiya ka Yeso k’ɔnɛ lokumu l’ɔlɔlɔ layosambishama l’andja w’otondo. Lande na kataso ngasɔ? Lo wodja w’États-Unis, ewandji w’ɛtɛmwɛlɔ wa lo Lokristokristo wekɔ oko 600 000, etena kele Ɛmɛnyi wa Jehowa oko 1 200 000 wekɔ lo nsambisha lokumu l’ɔlɔlɔ lo wodja akɔ. L’andja w’otondo ewandji w’aseka Mupɛ wekɔ oko 400 000, koko Ɛmɛnyi wa Jehowa ndekana miliyɔ 8 wekɔ lo nsambisha lokumu l’ɔlɔlɔ lo wedja 240. Mbokɛmaka hwe dia, Ɛmɛnyi wa Jehowa wekɔ lo nsambisha lokumu l’ɔlɔlɔ l’andja w’otondo, ndo lɔ mbishaka Jehowa kɛnɛmɔ ndo lotombo!​—Osambu 34:1; 51:15.

¹⁵ Oko weso Ɛmɛnyi wa Jehowa, oyango aso ele wa nsambisha anto efula lokumu l’ɔlɔlɔ la ntondo k’ekomelo ndja. Dia nsala olimu ɔsɔ, tambokadimola ndo tambotondja miliyɔ y’abuku, periodikɛ, traktɛ ndo akatshi wa leeta w’oya lo nsanganya ya weke ndo w’oya lo Eohwelo lo ɛtɛkɛta ndekana 700. Tekɔ lo mbisha anto ekanda ɛsɔ ofele. Paka l’ɔnɔnyi wetshi oto, takatondja kɔpi y’ekanda walembetshiya Bible oko miliyara 4 5. Tambotondja nto kɔpi ndekana miliyɔ 200 ya Bible—Ekadimwelo k’andja w’oyoyo lo ɛtɛkɛta ndekana 130. Ndo sitɛ kaso k’Ɛtɛrnɛtɛ kekɔ l’ɛtɛkɛta ndekana 750. Paka Ɛmɛnyi wa Jehowa ato mbasala olimu wa diambo ɔsɔ.

16. Ngande weyaso ɔnɛ Ɛmɛnyi wa Jehowa wekɔ la nyuma ka Nzambi?

¹⁶ Edja ka ngande kahomba olimu w’esambishelo ntetemala? Yeso akate dia lokumu  l’ɔlɔlɔ layosambishama polo lam’ayoya ekomelo. Oko weso Ɛmɛnyi wa Jehowa, tekɔ l’akoka wa mbikikɛ l’olimu w’esambishelo lo nshi y’ekomelo nyɛ paka l’ɔtɛ weso la nyuma k’ekila ka Jehowa. (Etsha 1:8; 1 Petero 4:14) Anto amɔtshi wa l’ɛtɛmwɛlɔ mbeyaka mbuta ɔnɛ: “Tekɔ la nyuma k’ekila.” Ko onde vɔ wekɔ l’akoka wa nkamba olimu wakamba Ɛmɛnyi wa Jehowa lo nshi y’ekomelo nyɛ? Ɛtɛmwɛlɔ ɛmɔtshi wakahembe nsambisha woho wasambisha Ɛmɛnyi wa Jehowa, koko vɔ kotondoya. Anto akina nangaka nsambisha koko paka lo tshanda mɔtshi tsho. Amɔtshi mbeyaka ntetemala nsambisha lo luudu la luudu, koko vɔ hawosambisha lokumu l’ɔlɔlɔ la Diolelo. Ɔnkɔnɛ vɔ hawokoke nsala olimu wakatatɛ Yeso nsala.

17, 18. a) Lande na kakokaso monga l’eshikikelo ɔnɛ Ɛmɛnyi wa Jehowa mbele anto wasambisha lokumu l’ɔlɔlɔ la Diolelo ɛlɔ kɛnɛ? b) Ngande weso l’akoka wa ntetemala nsala olimu ɔsɔ?

¹⁷ Ko waa na wasambisha lokumu l’ɔlɔlɔ la Diolelo ɛlɔ kɛnɛ? Toko Ɛmɛnyi wa Jehowa! Ngande weyaso dui sɔ? Sho mbeyaka dui sɔ nɛ dia tekɔ lo nsambisha losango la dimɛna, mbuta ate lokumu l’ɔlɔlɔ la Diolelo. Tekɔ lo nyanga anto l’olimu aso w’esambishelo ndo tekɔ lo nkamba la toho t’amɛna. Tekɔ la ɔkɔkɔ wa dimɛna wasambishaso, mbuta ate sho mbokaka Jehowa ndo anto ngandji. Olimu aso w’esambishelo wamboleka mpama efula nɛ dia tekɔ lo nsambisha anto wa lo wedja tshɛ ndo wa l’ɛtɛkɛta tshɛ. Ndo sho tayotetemala nsambisha lokumu l’ɔlɔlɔ la Diolelo polo lam’ayoya ekomelo!

¹⁸ Ekɔ mɛtɛ dui dia diambo dia mɛna olimu wa diambo wasala ekambi wa Jehowa dia nsambisha lokumu l’ɔlɔlɔ lo nshi y’ekomelo nyɛ. Ko ngande weso l’akoka wa nsala olimu ɔsɔ tshɛ? Ɔpɔstɔlɔ Pɔɔlɔ akalembetshiya ɔnɛ: “Nzambi mbanyosha wolo, nde mbanyosha nsaki ndo wolo wa nsala akambo lo ndjela kɛnɛ kɔɔngɛnyangɛnya.” (Filipɛ 2:13) Ɔnkɔnɛ, Jehowa atetemale tosha wolo wele laso ohomba dia sho nsala kɛnɛ tshɛ keso l’akoka wa nsala dia ntetemala nsambisha lokumu l’ɔlɔlɔ!​—2 Timɔte 4:5.