1-3. a) Etshikitanu akɔna wakoka monga wolo le so dia nsala oma l’ɔkɔngɔ wa batisimu? b) Naka tekɔ l’okakatanu dia nsala ehamelo oko wakatalongamɛka, ambola akɔna wahombaso ndjaoka? (Enda osato wele lo mbɔtwɛlɔ.)

AYA ɛnɔnyi efula wele Kevin akakɛnyaka tɔkɛnyɔ ta falanga, akanɔka mfɔka, akanɔka wanu efula ndo didjoyadjoya. ^[1] (Enda nɔtɛ ka la koma.) Oma laasɔ, nde akayekaka akambo wendana la Jehowa ndo akalange monga ɔngɛnyi ande. Koko dia nsala dui sɔ, nde akahombe nsala etshikitanu wa weke efula lo lɔsɛnɔ lande. Nde aki l’akoka wa nsala etshikitanu oma l’ekimanyielo ka Jehowa ndo ka wolo wele l’Ɔtɛkɛta ande, Bible.​—Hɛbɛru 4:12.

² L’ɔkɔngɔ wa Kevin batizama, nde akatetemala nsala etshikitanu lo lonto lande dia nde nkoma Okristo ɔmɔtshi wa dimɛna efula. (Ɛfɛsɔ 4:31, 32) Ɛnyɛlɔ, nde akomalaka esadi. Nde akaambe etena kakandayeyaka dia aki wolo efula mbeka dia mbahemɛ nkɛlɛ kande. Lo mɛtɛ, Kevin akate dia mbeka dia  mbahemɛ nkɛlɛ kande aki dikambo diakaleke wolo oleki woho wakandatshike akambo wa kɔlɔ wakandasalaka la ntondo ka nde batizama! Koko nde aki l’akoka wa nsala etshikitanu lo nsɛngasɛnga Jehowa dia nde mbookimanyiya ndo oma lo tshimbo ya wekelo wa Bible.

³ La ntondo ka sho batizama, efula ka l’atei aso takahombe nsala etshikitanu wa weke lo nsɛnɔ yaso l’oyango wa sho nsɛna lo yoho yatotɛ Bible dia sho nsala. Koko kaanga kakianɛ, tekɔ lo nshihodia dia ekɔ etshikitanu ɛmɔtshi wa totshitshɛ wahombaso nsala dia sho nyomoleka nkoma oko Nzambi la Kristo. (Ɛfɛsɔ 5:1, 2; 1 Petero 2:21) Ɛnyɛlɔ, sho mbeyaka mɛna dia tekɔ la mbekelo ka ngunangunaka efula kana ɔnɛ mbala efula sho ndjakimɔka l’awui wa vate vate ndo todjɛka anto akina ɛtɛkɛta wa kɔlɔ. Kana lo ntena dimɔtshi sho mbeyaka monga la wɔma w’efula lo kɛnɛ kakoka anto akina mfɔnya kana mbuta ɔnɛ hatosale kɛnɛ kele ɔlɔlɔ. Ondo aya ɛnɔnyi efula wambotohemba dia nsala etshikitanu, koko koko tekɔ lo ntetemala nsala munga yakɔ yaamɛ. Ɔnkɔnɛ sho mbeyaka ndjambola ɔnɛ: ‘Lande na kele ekɔ wolo efula le mi dia dimi nsala etshikitanu wa totshitshɛ ɛsɔ? Kakɔna kahombami nsala dia nkamba la kɛnɛ kata Bible dia dimi ntetemala ndowanya lonto lami?’

4. Lande na keso bu l’akoka wa ngɛnyangɛnya Jehowa l’oseka dui tshɛ diasalaso?

⁴ Sho mbokaka Jehowa ngandji ndo sho kombolaka l’otema aso tshɛ dia mbɔngɛnyangɛnya. Lonyangu ko, sho hatokoke mbɔngɛnyangɛnya lo ntena tshɛ, nɛ dia sho keema kokele. Mbala efula sho ndjaokaka oko ɔpɔstɔlɔ Pɔɔlɔ lakate ate: “Lekɔ la nsaki ka nsala kɛnɛ kele ɔlɔlɔ, koko dimi bu la dikoka dia kisala.”​—Rɔmɔ 7:18; Jakɔba 3:2.

5. Etshikitanu akɔna wakatasale la ntondo ka sho batizama, ko naa ɛmɔtshi wele ondo takahombe ndɔshana la wɔ?

⁵ La ntondo ka sho monga l’etshumanelo, takatshike nsala akambo wahetsha Jehowa. (1 Kɔrɛtɔ 6:9, 10) Koko, teeke paka anto wele keema kokele. (Kɔlɔsayi 3:9, 10) Diakɔ diele, tekɔ lo ntetemala nsala munga kaanga mambotobatizama ɛnɔnyi efula. Lo ntena la ntena, sho mbeyaka monga la nsaki ndo la tokanyi ta kɔlɔ, kana sho mbeyaka mɛna diekɔ wolo mbahemɛ wɔɔdu ɔmɔtshi wele laso. Lo mɛtɛ, sho mbeyaka ndɔshana la wɛɔdu akɔ waamɛ ɛnɔnyi efula.

6, 7. a) Kakɔna katokimanyiya dia sho monga angɛnyi wa Jehowa kaanga mbeso keema kokele? b) Lande na kahatahombe ntshika dia nɔmba Jehowa edimanyielo?

⁶ Kaanga mbeso keema kokele, sho koka ntetemala monga la lɔngɛnyi la Jehowa ndo mbokambɛ. Mbala tshɛ ohɔka woho wakayakome ɔngɛnyi wa Jehowa mbala kayɛ ka ntondo. Nde mbaki Onto lakɛnyi dui dimɔtshi di’ɔlɔlɔ le yɛ ndo mbakalange wɛ mbeeya. (Joani 6:44) Nde akeye nto dia wɛ ekɔ la munga ndo la wɛɔdu wakotshutshuya dia nsala wandja. Koko, Jehowa akatetemala nkombola dia wɛ monga ɔngɛnyi ande.

⁷ Jehowa akatolange woho w’anyanya diakɔ diakandatosha woshasha ɔmɔtshi wa nɛmɔ efula. Nde akatome Ɔnande lanɛ la nkɛtɛ dia nde ndjokimɔ lɔsɛnɔ lande oko oshinga w’etshungwelo lo dikambo dia pɛkato yaso. (Joani 3:16) Etena kasalaso munga kɛmɔtshi, sho koka nɔmba Jehowa edimanyielo. Ndo l’ɔtɛ w’oshinga w’etshungwelo, sho koka monga l’eshikikelo ɔnɛ nde ayotodimanyiya ndo ayotetemala monga ɔngɛnyi aso. (Rɔmɔ 7:24, 25; 1 Joani  2:1, 2) Tohɔ dia, Yeso akavu dikambo dia atshi wa pɛkato wayatshumoya. Oyadi tekɔ lo mfɔnya dia kɛnɛ kakatasale kekɔ kɔlɔ efula, hatohombe pondjo ntshika nɔmba Jehowa dia nde todimanyiya. Naka hatɔlɔmbi dia nde todimanyiya, kete dui sɔ diayonga oko ntona nsola anya aso wele la mindo. Ande lowando lele laso lo woho wakatosha Jehowa diaaso dia sho monga angɛnyi ande kaanga mbeso keema kokele lee!​—Adia 1 Timɔte 1:15.

8. Lande na kahatahombe minya yimba oma lo wɛɔdu aso?

⁸ Lo mɛtɛ, hatohombe minya yimba oma lo wɛɔdu aso kana ntetemala mbishaka tɛɛkɛ nɛndɛ tendana la tɔ. Jehowa akatotɛ weho w’anto wa ngande walangande dia vɔ monga angɛnyi ande. (Osambu 15:1-5) Diakɔ diele naka sho nangaka monga suke la nde, sho pombaka ntetemala kanaka yimba lo kɛnɛ kendana la nde ndo l’Ɔnande. Sho pombaka mbahemɛ nto nsaki yaso ya kɔlɔ ndo sho mbeyaka ndjonga l’akoka wa ntshika nsaki mɔtshi l’atei ayɔ. Oyadi edja ka ngande kambotobatizama, sho pombaka ntetemala ndowanya lonto laso.​—2 Kɔrɛtɔ 13:11.

9. Ngande weyaso dia sho koka ntetemala ndɔta lonto l’oyoyo?

⁹ Ɔpɔstɔlɔ Pɔɔlɔ atɛ Akristo ate: “Oma lɔkɔ, nyu pombaka nkolola lonto l’edjedja lɔtɔnɛ la lɔkɛwɔ laki la nyu ntondo, lakalanyema lo ndjela nsaki ya lokeso. Nyu pombaka ntetemala mpiloya timba tanyu eyoyo, ndo nyu pombaka ndɔta lonto l’oyoyo lakatongama lo ndjela lolango la Nzambi lo losembwe ndo lo kɔlamelo ya mɛtɛ.” (Ɛfɛsɔ 4:22-24) Dui sɔ nembetshiyaka dia sho pombaka ntetemala mbidja welo w’efula dia sho tshikitana ndo “ndɔta lonto l’oyoyo.” Ɔnkɔnɛ, oyadi edja ka ngande kambotokambɛ Jehowa, sho kokaka mbekaka nshi tshɛ akambo efula wendana la waonga ande. Ndo Bible koka tokimanyiya dia sho ntetemala nsala etshikitanu lo lonto laso lo nyomoleka monga oko nde.

10. Kakɔna kahombaso nsala dia ntetemala nsala etshikitanu l’ekimanyielo ka Bible ndo ambola akɔna wahombaso ndjaoka?

¹⁰ Sho tshɛ nangaka ndjela kɛnɛ kata Bible. Koko, sho pombaka mbidja welo efula naka sho nangaka ntetemala nsala etshikitanu. Lande na kahombaso mbidja welo wa ngasɔ? Onde Jehowa hakoke tetɛ akambo wɔɔdu dia sho nsala kɛnɛ kele ɔlɔlɔ?

11-13. Lande na kalongamɛ Jehowa dia sho mbidja welo dia mbahemɛ wɛɔdu aso?

¹¹ Etena kakanaso yimba lo kɛnɛ kendana la loowa ndo kɛnɛ tshɛ kele lɔkɔ, sho bu la taamu ɔnɛ Jehowa ekɔ la wolo wa nsala oseka dui tshɛ. Ɛnyɛlɔ, nde akatonge wonya, wele la wolo waheyama mbuta. Lo sekɔndɛ tshɛ, wonya tondjaka lokema l’esase ndo la edungu, koko dia lɔsɛnɔ monga la nkɛtɛ tekɔ paka l’ohomba wa yema y’osase ndo y’edungu ka tshitshɛ. (Osambu 74:16; Isaya 40:26) Jehowa mbishaka nto ekambi ande wa la nkɛtɛ wolo etena kewɔ la wɔ ohomba. (Isaya 40:29) Mbokɛmaka hwe dia,  naka Jehowa nanga, kete nde koka tetɛ akambo wɔɔdu dia sho ndɔshana la wɛɔdu aso ndo ntshika monga la nsaki ya kɔlɔ. Ko laasɔ, lande na kahandasale dui sɔ?

¹² Jehowa akatosha lotshungɔ la nsɔna dia nsala kɛnɛ kalangaso. Nde mbetawɔka dia sho nsɔna shoamɛ dia mbokitanyiya kana dia ntona mbokitanyiya. Etena kasɔnaso dia mbokitanyiya ndo kadjaso welo dia nsala lolango lande, sho mɛnyaka dia sho mbookaka ngandji ndo nangaka mbɔngɛnyangɛnya. Satana mbutaka ɔnɛ Jehowa bu la lotshungɔ la nɔmbɔla. Koko, etena kakitanyiyaso Jehowa, sho mɛnyaka dia sho nangaka nde monga Ɔnɔmbɔdi aso. Ndo sho kokaka monga l’eshikikelo ɔnɛ Shɛso ka ngandji ngɛnangɛnaka welo tshɛ wadjaso dia mbokitanyiya. (Jobo 2:3-5; Tukedi 27:11) Etena kasalaso la wolo dia mbahemɛ wɛɔdu aso kaanga mbele dui sɔ bu wɔɔdu, sho mɛnyaka kɔlamelo yaso le Jehowa ndo sho mɛnyaka ɔnɛ sho nangaka nde monga Ɔnɔmbɔdi aso.

¹³ Jehowa totɛka dia sho pombaka mbidja welo efula dia sho mbokoya waonga ande. (Kɔlɔsayi 3:12; adia 2 Petero 1:5-7.) Nde nongamɛka nto dia sho mbidja welo efula dia mbahemɛ tokanyi taso ndo nsaki yaso. (Rɔmɔ 8:5; 12:9) Etena tshɛ kadjaso welo efula dia nsala otshikitanu ɔmɔtshi ndo katondoyaso, sho mongaka l’ɔngɛnɔngɛnɔ wa laande.

14, 15. Kakɔna kakokaso nsala dia nkɛnɛmɔla waonga walanga Jehowa? (Enda kiombo yele l’ɔtɛ a dui ɔnɛ: “ Bible ndo dɔmbɛlɔ akantshikitanya nsɛnɔ yawɔ.”)

¹⁴ Kakɔna kahombaso nsala dia sho nkɛnɛmɔla waonga walanga Jehowa? Laadiko  dia sho mbɔsa yɛdikɔ shoamɛ l’awui wahombaso nsala etshikitanu, sho pombaka mbetawɔ dia Nzambi tɔlɔmbɔla. Rɔmɔ 12:2 mbutaka ɔnɛ: “Nyotshike mbokoya andja ɔnɛ, koko nyohilwame lo nɔngɔsɔla timba tanyu dia nyamɛ mbeya dimɛna lolango la Nzambi l’ɔlɔlɔ, letawɔma ndo la kokele.” Ɔnkɔnɛ dia mbeya kɛnɛ kalanga Jehowa, sho pombaka ndjaɛkɛ l’ekimanyiyelo kakandatosha. Sho pombaka mbadiaka Bible lushi la lushi, kanaka yimba lo kɛnɛ kadiaso ndo nɔmbaka Jehowa dia nde tosha nyuma kande k’ekila. (Luka 11:13; Ngalatiya 5:22, 23) Lo nsala ngasɔ, Jehowa koka tokimanyiya dia sho nshihodia kɛnɛ kɔngɛnyangɛnya ndo sho koka mbeka dia kanyiya woho wakanyiyande. Etombelo wayonga la dui sɔ ele, kɛnɛ tshɛ kakanyiyaso, katɛkɛtaso ndo kasalaso kayɔngɛnyangɛnyaka Jehowa ndo tayeka woho wa mbahemɛ wɛɔdu aso. Koko kaanga mbediɔ ngasɔ, tayotetemala ndɔshana la wɔ.​—Tukedi 4:23.

¹⁵ Laadiko wa mbadiaka Bible lushi la lushi, sho pombaka kiekaka l’ekimanyiyelo k’ekanda aso, ɛnyɛlɔ oko Tshoto y’Etangelo ndo Réveillez-vous! Asawo efula wa lo periodikɛ nyɛ tetshaka woho wakokaso mbokoya waonga wa Jehowa ndo woho wakokaso ndɔshana la wɛɔdu aso. Sho koka ntana asawo kana avɛsa amɔtshi wakoka tokimanyiya lo yoho ya laande. Sho koka nsɔna avɛsa ndo asawo anɛ dia sho mbawadiaka mbala la mbala.

16. Lande na kahatahombe nkɔmɔ naka sho bu l’akoka wa nsala etshikitanu esadi esadi?

 ¹⁶ Nɔmbamaka etena k’otale dia mbeka dia mbokoya waonga wa Jehowa. Ɔnkɔnɛ, naka wɛ ndjaokaka dia wɛ hakoke nsala etshikitanu efula oko wakombolayɛ, kete onga la solo dia lotutsha. Ntondotondo, wɛ pombaka ndjaketembola dia nsala kɛnɛ kata Bible. Koko, dia wɛ nyomoleka nkanyiya ndo nsala akambo lo yoho yalanga Jehowa, kete ayonga dui dia wɔɔdu dia wɛ nkanyiya woho wakanyiyande ndo nsala kɛnɛ kele ɔlɔlɔ.​—Osambu 37:31; Tukedi 23:12; Ngalatiya 5:16, 17.

17. Naka tekɔ la kɔlamelo le Jehowa, kete sho koka nongamɛ nshi yayaye yakɔna y’ɔngɛnɔngɛnɔ?

¹⁷ Tekɔ lo nomɔlomɔ dia nkoma l’etena kayotokoma kokele ndo kayotokambɛka Jehowa pondjo pondjo. L’etena kɛsɔ, hatotonga l’ohomba wa ndɔshana l’oseka wɔdu tshɛ, ndo hatonga wolo le so dia mbokoya Jehowa. Koko, kaanga ɛlɔ kɛnɛ sho kokaka ntɛmɔla Jehowa nɛ dia nde akatosha woshasha w’oshinga w’etshungwelo. Kaanga mbeso keema kokele, sho koka mbɔngɛnyangɛnya naka sho nsala la wolo dia nsala etshikitanu ndo ndjela kɛnɛ katetshande lo Bible.

18, 19. Lande na kakokaso monga l’eshikikelo ɔnɛ Bible ekɔ la wolo wa ntetemala ntshikitanya nsɛnɔ yaso?

¹⁸ Kevin akasale kɛnɛ tshɛ kakandakoke nsala dia mbahemɛ nkɛlɛ kande. Nde akakane yimba la kɛnɛ kakandadiaka oma lo Bible ndo akasale la wolo dia ntshikitanya lɔsɛnɔ lande. Nde akayele nto alako wakawoshaka asekande Akristo. Kaanga mbele ɛnɔnyi ɛmɔtshi wakete la ntondo ka Kevin ndjolowanya lɔsɛnɔ lande, l’etena kɛmɔtshi nde aki l’akoka wa nkamba oko okambi wakimanyiya. Ndo aya ɛnɔnyi 20 wakambande oko ekumanyi ka l’etshumanelo. Koko kaanga ɛlɔ kɛnɛ, nde mbeyaka dia nde pombaka ndɔshana la wɛɔdu ande.

¹⁹ L’ɛnyɛlɔ ka Kevin, sho koka ntetemala ndowanya lonto laso. Naka sho nsala dui sɔ, kete tayotetemala ndeka ndjasukanya la Jehowa. (Osambu 25:14) Ndo naka sho nsala kɛnɛ tshɛ kakokaso nsala dia nsala etshikitanu dia ngɛnyangɛnya Jehowa, kete nde ayotokimanyiya dia sho ntondoya. Sho koka monga l’eshikikelo ɔnɛ oma l’ekimanyiyelo ka Bible, sho koka ntetemala nsala etshikitanu lo nsɛnɔ yaso.​—Osambu 34:8.