1, 2. Ewanu akɔna wa lam’asa anto wɔtɛkɛtami lo dibuku di’Etatelu, ndo lande na kele ɛkɔndɔ ɛsɔ ohomba?

ONDE wɛ atakanaka yimba lo kɛnɛ kendana l’ewanu wakonge lam’asa anto amɔtshi wɔtɛkɛtami lo Bible? Paka lo avɛsa angana wa ntondo wa dibuku di’Etatelu, sho mbadiaka dia Kɛna akadiake Abɛlɛ (Etatelu 4:3-8); Lamɛka akadiake ɔlɔngɔlɔngɔ ɔmɔtshi wa pami l’ɔtɛ wakandohetshaka (Etatelu 4:23); alami wa dongalonga waki Abrahama wakawane la alami wa dongalonga waki Lɔta (Etatelu 13:5-7); Hangara akayaɔsaka dia nde ndeka Sara, ndo Sara akatatɛ momalɛ Abrahama (Etatelu 16:3-6); Ishimaɛlɛ akalɔshanaka l’oseka onto tshɛ, ndo oseka onto tshɛ akɔɔlɔshaka.​—Etatelu 16:12.

² Lande na kakafundama ewanu wa weho ɛsɔ lo Bible? Nɛ dia sho koka nkondja wetshelo oma lo bɛnyɛlɔ di’anto waki komonga kokele wakahomana l’ekakatanu wa mɛtɛ. Sho lawɔ keema kokele, ndo etena kongaso l’ekakatanu wa woho akɔ waamɛ lo lɔsɛnɔ laso, sho koka mbokoya bɛnyɛlɔ di’ɛlɔlɔ diatanema lo Bible ndo mbewɔ mbokoya nɛ dia kɔlɔ. (Rɔmɔ 15:4) Dui sɔ koka tokimanyiya dia mbeya woho wa mbidja wɔladi lam’asaso l’anto akina.

3. Akambo akɔna wayotɔsɛdingola lo sawo nɛ?

 ³ Lo sawo nɛ, tayanga nsɛdingola lande na kahombaso nkandola ekakatanu kana ewanu ndo woho wakokaso nsala dui sɔ. Tayeka nto atɔndɔ amɔtshi w’ohomba wa lo Bible wakoka tokimanyiya dia nkandola ekakatanu ndo ntetemala monga la diɔtɔnganelo dia dimɛna la Jehowa ndo l’anto akina.

4. Dionga diakɔna diambokokanɛ l’andja w’otondo, ndo etombelo akɔna wambonga la dikambo sɔ?

⁴ Satana mbele lo kiɔkɔ ya diatɔnelo ndo y’ekakatanu efula wele lam’asa anto. Lande na kataso ngasɔ? Lo Ɛdɛna, Satana akate dia onto tshɛ koka ndo pombaka nsɔna ndamɛ kɛnɛ kele ɔlɔlɔ la kɛnɛ kele kɔlɔ aha la ɛlɔmbwɛlɔ ka Nzambi. (Etatelu 3:1-5) Koko etena kendaso awui weta l’andja ɛlɔ kɛnɛ, sho mɛnaka dia dionga dia ngasɔ mbelaka paka ekakatanu. Anto efula fɔnyaka dia vɔ wekɔ la lotshungɔ la ndjasɔnɛ vɔamɛ kɛnɛ kele ɔlɔlɔ la kɛnɛ kele kɔlɔ. Vɔ wekɔ la otako, lokaki, ndo la yimba ya shɛmanedi, ndo oyadi tɛdikɔ tawɔ tayonyangiya anto akina vɔ hawete. Dionga sɔ konyaka lo ewanu. Bible toholaka dia naka sho momalaka esadi, kete tayonga l’ekakatanu efula l’anto akina ndo tayosala pɛkato efula.​—Tukedi 29:22.

5. Ngande waketsha Yeso anto woho wa nkandola ekakatanu?

⁵ Etena kakasha Yeso Dako dia lo Dikona, nde aketsha ambeki ande dia mbidja wɔladi ndo dia mbewɔ ekakatanu, kaanga mbakadiɛnamaka dia vɔ komonga suke dia nkitanyiya dui diakɔ. Ɛnyɛlɔ, nde akawatɛ dia monga la kɛtshi, dia mbidja wɔladi lam’asawɔ l’anto akina, dia minya nkɛlɛ, dia nkandola ekakatanu esadi esadi ndo dia nanga atunyi awɔ.​—Mateo 5:5, 9, 22, 25, 44.

6, 7. a) Lande na kele ekɔ ohomba nkandola ekakatanu wa lam’asaso l’anto akina esadi esadi? b) Ambola akɔna wahomba ekambi wa Jehowa tshɛ ndjaoka?

⁶ Ɛlɔ kɛnɛ, sho tɛmɔlaka Jehowa etena kɔɔlɔmbaso, kasambishaso, ndo katshɔso lo nsanganya yaso. Naka hatodje wɔladi lam’asaso la anangɛso, kete Jehowa hatetawɔ ɔtɛmwɛlɔ aso otsha le nde. (Makɔ 11:25) Dia sho monga angɛnyi wa Jehowa, sho pombaka dimanyiya anto akina etena katosalɛwɔ kɔlɔ.​—Adia Luka 11:4; Ɛfɛsɔ 4:32.

⁷ Jehowa nongamɛka di’ekambi ande tshɛ dimanyiyanaka ndo monga la diɔtɔnganelo dia dimɛna l’anto akina. Sho koka ndjambola ɔnɛ: ‘Onde lekɔ suke dia dimanyiya anangɛmi? Onde dimi ngɛnangɛnaka monga kaamɛ la wɔ?’ Naka wɛ ambɛna dia wɛ haleke dimanyiyana, kete lɔmba Jehowa dia nde kokimanyiya dia wɛ ndjalowanya. Shɛso lele l’olongo ayoka alɔmbɛlɔ wa l’okitshakitsha wa ngasɔ ndo ayowakadimola.​—1 Joani 5:14, 15.

8, 9. Kakɔna kahombaso nsala naka wambotosalɛ dui dimɔtshi dia kɔlɔ?

⁸ Sho tshɛ keema kokele, ɔnkɔnɛ sho koka nongamɛ di’anto ntɛkɛta kana tosalɛ akambo wa kɔlɔ. (Undaki 7:20; Mateo 18:7) Ngande wayoyosala? Sho koka nkondja wetshelo w’ohomba oma lo ɔkɔndɔ ɔnɛ: Kadiyɛso kɛmɔtshi akasha anangɛso ahende mɔyɔ lo losanganya lɔmɔtshi. Koko ɔnangɛso  ɔmɔtshi la l’atei awɔ akanyange lo woho wakandawosha mɔyɔ. Etena kakatshikala anangɛso ahende asɔ vɔamɛ, ɔnɛ lakanyange akatatɛ ntɛkɛta kɔlɔ lo dikambo dia kadiyɛso. Koko, ɔnangɛso okina akawohola dia kadiyɛso ambokambɛ Jehowa la kɔlamelo l’edja k’ɛnɔnyi 40 l’atei w’ekakatanu efula. Nde aki l’eshikikelo dia kadiyɛso kombosha mɔyɔ dia mbonyangiya. Kakɔna kakasale ɔnangɛso la ntondo? Nde akate ate: “Wɛ ekɔ la shadiya.” Oma laasɔ, nde akɔshi yɛdikɔ ya mbohɛ kɛnɛ kakete.

⁹ Kakɔna katetsha ɔkɔndɔ ɔnɛ? Etena katosalɛ onto ɔmɔtshi kɔlɔ, sho koka nsɔna kɛnɛ kahombaso nsala. Onto lele la ngandji dimanyiyaka. (Adia Tukedi 10:12; 1 Petero 4:8.) Etena ‘kanyaso yimba lo kɔlɔ,’ kɛsɔ mongaka dui dia dimɛna efula le Jehowa. (Tukedi 19:11; Undaki 7:9) Ɔnkɔnɛ mbala kekina kayota kana kayokosalɛ onto ɔmɔtshi dikambo dimɔtshi dia kɔlɔ, yambola wate: ‘Onde dimi koka minya yimba lo kɔlɔ kɛnɛ? Onde dimi pombaka ntetemala nkanyiya dui nɛ?’

10. a) Dui diakɔna dia ntondo diakasale kadiyɛso kɛmɔtshi lo woho wakawawɔnyɔla? b) Tokanyi takɔna t’oma l’Afundelo takakimanyiya kadiyɛso kɛsɔ dia nama wɔladi ande?

¹⁰ Etena katɛkɛta anto akina dikambo dimɔtshi dia kɔlɔ lo lokombo laso, dui sɔ mbeyaka monga okakatanu dia mbohɛ ɛtɛkɛta awɔ. Tende kɛnɛ kakakomɛ kadiyɛso Lucy lele ombatshi mboka. Anto amɔtshi wa l’etshumanelo wakatɛkɛta kɔlɔ lo kɛnɛ kendana la yoho yande ya nsambisha ndo la woho wakambande la wenya ande. Nde akanyange efula ndo akalɔmbɛ anangɛso amɔtshi wambotshunda lo nyuma alako. Etombelo akɔna wakonge la dui sɔ? Nde mbutaka dia vɔ wakakambe la Bible dia mbokimanyiya dia nde ntshika nkanyiya efula lo kɛnɛ kendana la tokanyi ta kɔlɔ tele l’anto akina ndo ntatɛ nkanyiya efula akambo wendana la Jehowa. Nde akakeketshama etena kakandadia Mateo 6:1-4. (Adia.) Avɛsa anɛ wakawohola dia ngɛnyangɛnya Jehowa mboleki tshɛ ohomba. Oma laasɔ, nde akɔsɛ yɛdikɔ ya minya yimba lo awui wa kɔlɔ wakawate lo lokombo lande. Ɛlɔ kɛnɛ, kaanga anto akina wambɔtɛkɛta kɔlɔ lo kɛnɛ kendana l’olimu ande w’esambishelo, nde ekɔ l’ɔngɛnɔngɛnɔ nɛ dia nde mbeyaka ɔnɛ nde ekɔ lo nsala kɛnɛ tshɛ kakokande nsala dia ngɛnyangɛnya Jehowa.

11, 12. a) Ngande wahomba Okristo nsala naka nde mbeyaka dia ɔnango “ekɔ la nde la dikambo dimɔtshi”? b) Wetshelo akɔna wakokaso nkondja lo yoho yakakandola Abrahama okakatanu ɔmɔtshi? (Enda osato wele lo mbɔtwɛlɔ.)

¹¹ “Sho tshɛ takanaka mbala efula.” (Jakɔba 3:2) Ohɔsa dia wɛ ambeya di’ɔnangɛso ɔmɔtshi akonge la lonyangu l’ɔtɛ wa dui dimɔtshi diakayate kana diakayasale. Kakɔna kahombayɛ nsala? Yeso akate ate naka “wɛ ekɔ lo ndjaye la woshasha ayɛ lo dihole di’elambwelo ko wɛ ambohɔ dia onto ɔmɔtshi ekɔ la yɛ la dikambo dimɔtshi, tshika woshasha ayɛ la ntondo ka dihole di’elambwelo ndo kalola tokotodja ntondo wɔladi lam’asayɛ la nde, oma laasɔ koye, koyokimɔ woshasha ayɛ.” (Mateo 5:23, 24) Sawola la ɔnanyɔ. Etena kasalayɛ dui sɔ, oyango ayɛ  pombaka monga wa mbidja wɔladi lam’asayɛ la nde. Wɛ pombaka mbetawɔ dindja diayɛ ndo wɛ hahombe mbohangwɛ. Wɔladi wasaso l’anangɛso mbele dui dioleki tshɛ ohomba.

¹² Bible mɛnyaka woho wakoka ekambi waki Nzambi kokɛ wɔladi etena katomba ewanu. Ɛnyɛlɔ, Abrahama nde la Lɔta l’ɔna ɔnango waki la dongalonga efula ndo alami awɔ wakatatɛ mana nɛ dia vɔ komonga l’ɛtshi ka nkɛtɛ ka woke kakawakokaka vɔ tshɛ. Lam’ele Abrahama akalangaka wɔladi, nde akasha Lɔta lotshungɔ la nsɔna ɛtshi ka nkɛtɛ ka dimɛna. (Etatelu 13:1, 2, 5-9) Ande ɛnyɛlɔ k’ɔlɔlɔ le so lee! Onde Abrahama akasowe l’ɔtɛ wa yimba yande ya lokaho? Ndooko. Yema tshitshɛ l’ɔkɔngɔ wa laasɔ, Jehowa akalake Abrahama dia mbɔtshɔkɔla ndeka ndo woho wakandashisha. (Etatelu 13:14-17) Wetshelo akɔna wambotokondja? Kaanga naka tekɔ lo nsowa l’ɔtɛ wa ekakatanu ɛmɔtshi, Jehowa ayotɔtshɔkɔla naka sho kandolaka ekakatanu la ngandji. ^[1]—Enda nɔtɛ ka la koma.

13. Ngande wakasale omendji ɔmɔtshi oma lo ɛtɛkɛta wa kɔlɔ wakawotondjɛ, ndo wetshelo akɔna wakokaso nkondja oma lo ɛnyɛlɔ kande?

¹³ Tɔsɛdingole ɛnyɛlɔ kɛmɔtshi ka nshi nyɛ. Omendji w’oyoyo wa lo departɛma dimɔtshi dia losanganya la woke akelɛ ɔnangɛso ɔmɔtshi dia kana nde ayonga l’akoka wa tokamba lo departɛma diakɔ. Ɔnangɛso akatɛkɛta akambo efula wa kɔlɔ ndo akahangɔhangɔ lo telefɔnɛ nɛ dia nde akatshikala la kɛlɛ le omendji waki ntondo lo departɛma diakɔ. Omendji w’oyoyo konyanga, koko nde kokoka mbohɛ kɛnɛ kakandate. Oma l’ɔkɔngɔ wa wonya wa ntango, nde akelɛ ɔnangɛso nto ndo akawɔlɔmbɛ dia vɔ mɛnana. Lomingu lakayelana, anangɛso wakatohomana lo Mbalasa ka Diolelo ndo l’ɔkɔngɔ wa vɔ nɔmba Jehowa, vɔ wakasawola wonya wa ntango w’otondo. Ɔnangɛso akawolembetshiya kɛnɛ kakete lam’asande la omendji waki ntondo. Omendji w’oyoyo akoohokamɛ la ngandji tshɛ ndo akakɛtshanya la nde avɛsa amɔtshi w’ohomba. Etombelo waki la dui sɔ ele, anangɛso wakadje wɔladi lam’asawɔ ndo wakayokamba kaamɛ lo departɛma dia lo losanganya lakɔ. Ɔnangɛso ekɔ la lowando nɛ dia omendji akatɛkɛta la nde la ngandji ndo l’ɔkɔmi tshɛ.

14, 15. a) Etena kakɔna kahombaso nkamba la dako diele lo Mateo 18:15-17? b)  Wanya akɔna asato wakashile Yeso, ndo oyango akɔna wahombaso ndjadjɛ lo nkamba la wɔ?

¹⁴ Akambo efula wele lam’asa Akristo ahende koka ndo pombaka kandɔma paka lam’asawɔ. Koko, lo ntena dimɔtshi dui sɔ hatongaka wɔdu. Akambo amɔtshi mbeyaka nɔmbama ekimanyiyelo k’oma le anto akina lo ndjela mukanda wa Mateo 18:15-17. (Adia.) ‘Pɛkato’ kakatɛkɛta Yeso lanɛ, halembetshiya ekakatanu wa totshitshɛ wa lam’asa Akristo. Ngande weyaso dui sɔ? Yeso akate dia naka otshi wa pɛkato ambotona ndjatshumoya l’ɔkɔngɔ wa nde nsawola la ɔnango, la ntondo k’ɔmɛnyi ɔmɔtshi ndo le anangɛso wele l’ɛkɛndɛ nde pombaka mbɔsama “oko ose wodja kana oko ofutshanyi w’elambo.” Ɛlɔ kɛnɛ, dui sɔ nembetshiyaka ɔnɛ onto akɔ pombaka mbitshanyema. ‘Pɛkato’ kokaka mbɛdikama l’awui wele oko kɔta mishiko, emamatanya, koko awui asɔ hawokoke monga lo pɛkato yele oko loseka, dieyanelo dia lam’asa pami la pami kana womoto la womoto, apɔstazi, kana ɔtɛmwɛlɔ wa dikitshi. Weho wa pɛkato ya ngasɔ nɔmbamaka kandɔma paka oma le dikumanyi.

¹⁵ Oyango wakasha Yeso dako nɛ aki wa tɛnya woho wakimanyiya ɔnangɛso ɔmɔtshi  l’ɔtɛ wawokaso ngandji. (Mateo 18:12-14) Ngande wakokaso ndjela dako nɛ? 1) Sho pombaka mpemba dia mbidja wɔladi lam’asaso l’ɔnangɛso aha l’ekimanyelo k’anto akina. Sho mbeyaka monga l’ohomba wa ntɛkɛta la nde mbala efula. Ko, kakɔna kahombaso nsala naka wɔladi hatetemala monga? 2) Sho pombaka nsawola la ɔnangɛso kaamɛ la onto ɔmɔtshi leya dikambo diakɔ kana ɔnɛ lakoka nshihodia dia mbeya onto lakasadi dikambo dia kɔlɔ. Naka okakatanu wambokandɔ, kete wɛ ‘ambokimanyiya ɔnanyɔ.’ Koko paka naka wɛ ambosawola la ɔnanyɔ mbala efula ndo wɛ ambɛna dia hanyokoke mbidja wɔladi lam’asayɛ la nde etena kɛsɔ mbahombayɛ 3) mbewoya dikumanyi okakatanu akɔ.

16. Kakɔna kɛnya dia ndjela dako dia Yeso ekɔ dui dia dimɛna ndo dia ngandji?

¹⁶ Lo akambo efula, bu ohomba dia sho nkamba la wanya akɔ asato watanema lo Mateo 18:15-17. Dui sɔ keketshaka. Lande na kataso ngasɔ? Nɛ dia lo akambo efula, otshi wa pɛkato suyaka munga kande ndo shikikɛka dikambo diakɔ, ɔnkɔnɛ hatonga ohomba nde mbitshanyema. Onto losalewɔ kɔlɔ pombaka dimanyiya ɔnango ndo mbidja wɔladi lam’asawɔ. Ɔnkɔnɛ mbokɛmaka hwe ɔnɛ oma lo dako dia Yeso dia hatohombe ntshɔ mbala kakɔ ɔtɔi otsha le dikumanyi. Sho pombaka mbuta dikambo diakɔ paka oma l’ɔkɔngɔ wa sho ndjela wanya ahende w’oma l’etatelo ndo paka tekɔ la djembetelo ya shikaa y’ɔnɛ dikambo dimɔtshi dia kɔlɔ diakasalema.

17. Ɛtshɔkɔ akɔna wayotokondja etena ‘kayotoyanga wɔladi’ lam’asaso?

¹⁷ L’edja tshɛ kekeso anto wele keema kokele, tayotetemalaka salɛka anto akina kɔlɔ. Ombeki Jakɔba akafunde ate: “Naka onto hatakana l’ɛtɛkɛta, kete nde ekɔ onto la kokele lele la akoka wa mbahemɛ demba diande di’otondo.” (Jakɔba 3:2) Dia nkandola ekakatanu sho pombaka nsala kɛnɛ tshɛ kakokaso nsala dia ‘nyanga wɔladi ndo mbowesa.’ (Osambu 34:14) Etena katetemalaso mbidja wɔladi lam’asaso l’anto akina, tayonga la lɔngɛnyi l’oshika la anangɛso l’akadiyɛso ndo dui sɔ diayotetɛ kaamɛ. (Osambu 133:1-3) Dui dioleki ohomba ele, tayonga la lɔngɛnyi la ma ma la Jehowa, “Nzambi kasha wɔladi.” (Rɔmɔ 15:33) Sho tayɔngɛnangɛna la ɛtshɔkɔ ɛsɔ tshɛ etena kayotokandolaka ekakatanu la ngandji.