1. Kakɔna kalɔmba Jehowa atɛmɔdi ande dia nsala? (Enda ndo osato.)

 LE NA akokaso ntshɔ etena keso l’ohomba w’esambelo ndo ɛlɔmbwɛlɔ? Sho mbeyaka okadimwelo wa dimbola sɔ. Sho koka ndjasukanya la Jehowa Nzambi lo dɔmbɛlɔ. Jehowa tɔlɔmbaka dia sho nsala dui sɔ. Nde nangaka dia sho mbɔlɔmbaka mbala la mbala, mbuta ate “[n]tetemala nɔmba.” (1 Tɛs. 5:17) Sho koka mbɔlɔmba aha la wengengo ndo nyanga ɛlɔmbwɛlɔ kande lo dui tshɛ diendana la lɔsɛnɔ laso. (Tok. 3:5, 6) Lam’ele nde ekɔ Nzambi kele la lokaho l’efula, Jehowa hatodjɛ elelo lo lofulo la mbala yakokaso mbɔlɔmba.

2. Kakɔna kayotɔsɛdingola lo sawo nɛ?

² Sho mbɔsaka la nɛmɔ efula woshasha wa dɔmbɛlɔ. Koko, lo menda awui efula wahombaso nsala, sho koka monga l’okakatanu wa ntshungola etena ka nɔmba. Sho mbeyaka nto monga l’ohomba wa ndowanya alɔmbɛlɔ aso. Diɛsɛ ko, sho koka ntana ekeketshelo k’efula ndo ɛlɔmbwɛlɔ l’Afundelo. Lo sawo nɛ, tayɔsɛdingola woho wakokaso tshungolaka etena ka nɔmbaka lo nsɛdingola ɛnyɛlɔ ka Yeso. Tayɔkɛtshanya nto woho wakokaso ndowanya alɔmbɛlɔ aso lo mbidja awui atanu w’ohomba.

3. Kakɔna kakashihodia Yeso lo kɛnɛ kendana la dɔmbɛlɔ?

³ Yeso akashihodia dia Jehowa mbɔsaka dɔmbɛlɔ la nɛmɔ. Edja efula la ntondo ka nde ndja lanɛ la nkɛtɛ, nde akɛnyi woho  wakakadimolaka She alɔmbɛlɔ w’apami ndo wa wamato wa kɔlamelo. Ɛnyɛlɔ, Yeso aki suke la She etena kakandakadimolaka alɔmbɛlɔ wa l’otema ɔtɔi waki Hana, Davidɛ, ndo Elidja ndo anto akina waki la kɔlamelo. (1 Sa. 1:10, 11, 20; 1 Nku. 19:4-6; Os. 32:5) Diakɔ diele Yeso aketsha ambeki ande woho wa nɔmbaka mbala la mbala ndo l’eshikikelo!​—Mat. 7:7-11.

4. Wetshelo akɔna wakondjaso oma l’alɔmbɛlɔ wa Yeso?

⁴ Lo tshimbo y’alɔmbɛlɔ ande hita otsha le Jehowa, Yeso akasha ambeki ande ɛnyɛlɔ ka vɔ ndjela. L’edja tshɛ k’olimu ande, Yeso akalɔmbaka mbala la mbala. Nde akahombaka ntshungola etena ka nɔmba nɛ dia nde aki mbala efula l’awui efula wa nsala ndo anto efula wakodingaka. (Makɔ 6:31, 45, 46) Nde aketɔka la yosose dia nde ntana etena ka nde monga ndamɛ dia nɔmba. (Makɔ 1:35) Lo diaaso dimɔtshi, nde akalɔmbɛ otsho w’otondo la ntondo ka nde mbɔsa yɛdikɔ mɔtshi y’ohomba. (Luka 6:12, 13) Ndo Yeso akalɔmbɛ mbala efula l’otsho wa la ntondo ka nyɔi kande, la ntondo ka nde nshidiya ɔkɛndɛ ande woleki wolo lanɛ la nkɛtɛ.​—Mat. 26:39, 42, 44.

5. Ngande wakokaso mbokoya Yeso etena kalɔmbaso?

⁵ Ɛnyɛlɔ ka Yeso tetshaka dia oyadi akambo akɔna wele la so, tekɔ l’ohomba wa ntshungola etena ka nɔmba. L’ɛnyɛlɔ ka Yeso, sho mbeyaka monga l’ohomba wa ntshungola etena ka nɔmba, mbuta ate mbetɔka la kɛsɛkɛsɛ kana nɔmbaka la ntondo ka ndala. Etena kasalaso dui sɔ, sho mɛnyaka Jehowa dia sho mbɔsaka la nɛmɔ woshasha wa laande ɔsɔ. Kadiyɛso kɛmɔtshi kelɛwɔ Lynne mbohɔka woho wakinde la lowando etena kakandeye mbala ka ntondo diɛsɛ dia nɔmba. Nde mbutaka ɔnɛ: “Etena kakameke dia dimi kokaka nsawola la Jehowa wonya tshɛ, kɛsɔ akakimanyiya dia dimi mbowɔsa oko Ɔngɛnyi wa ma ma ndo nsala dia ndowanya alɔmbɛlɔ ami.” Aha la taamu, efula ka l’atei aso ndjaokaka woho akɔ waamɛ. Ɔnkɔnɛ, nyɛsɔ tɔsɛdingole awui atanu w’ohomba wakokaso mbidjaka l’alɔmbɛlɔ aso.

6. Lo ndjela Ɛnyɛlɔ 4:10, 11, kakɔna kasungana Jehowa dia nongola?

⁶ Tombolaka Jehowa. Lo ɛnɛlɔ kɛmɔtshi ka diambo, ɔpɔstɔlɔ Joani akɛnyi dikumanyi 24 l’olongo watɛmɔla Jehowa. Vɔ wakatombolaka Nzambi, lo mbeya dia nde mbasungana “nongola lotombo, kɛnɛmɔ ndo wolo.” (Adia Ɛnyɛlɔ 4:10, 11.) Andjelo wa kɔlamelo nto  ndo vɔ la wɔ wekɔ l’ɛkɔkɔ efula wa ntombola ndo wa mbisha Jehowa kɛnɛmɔ. Vɔ wekɔ kaamɛ la nde l’olongo ndo vɔ mboweyaka dimɛna. Vɔ mɛnaka waonga ande wakashɔma lo kɛnɛ kasalande. Etena kasɛdingolawɔ etsha wa Jehowa, vɔ tshutshuyamaka dia mbotombola.​—Jɔbɔ 38:4-7.

7. Lo awui akɔna wakokaso ntombola Jehowa?

⁷ Sho lawɔ kombolaka dia ntombola Jehowa l’alɔmbɛlɔ aso. Sho koka nsala dui sɔ lo mbotɛ kɛnɛ kalangaso lo dikambo diande ndo lande na kɔlɛmiyaso. Etena kadiayɛ ndo kekayɛ Bible, sala la wolo dia mbishola waonga wakɛnɛmɔla Jehowa walekayɛ ngɛnangɛna. (Jɔbɔ 37:23; Rɔmɔ 11:33) Oma laasɔ, tɛ Jehowa woho wayaokayɛ lo dikambo dia waonga asɔ. Sho la wɔ nto koka ntombola Jehowa nɛ dia nde tokimanyiyaka ndo kimanyiyaka nkumbo k’otondo k’Akristo k’anangɛso l’akadiyɛso. Nde ndjakiyanyaka mbala tshɛ lo dikambo diaso ndo nde tokokɛka.​—1 Sa. 1:27; 2:1, 2.

8. Naa ɛkɔkɔ ɛmɔtshi efula wele la so wɛnya lande na kahombaso mbishaka Jehowa losaka? (1 Tɛsalɔnika 5:18)

⁸ Shaka Jehowa losaka. Tekɔ l’ɛkɔkɔ efula wa mbishaka Jehowa losaka lo dɔmbɛlɔ. (Adia 1 Tɛsalɔnika 5:18.) Sho kokaka mbosha losaka lo dui tshɛ di’ɔlɔlɔ diele la so; laadiko a laasɔ, woshasha tshɛ w’ɔlɔlɔ ndja oma le nde. (Jak. 1:17) Ɛnyɛlɔ, sho koka nkɛnɛmɔla lowando laso, l’ɔtɛ wa nkɛtɛ k’olangala ndo diangɔ dia diambo diakandatonge. Sho koka nto nkɛnɛmɔla lowando lo lɔsɛnɔ lele la so, lele la nkumbo kaso, lele la angɛnyi aso ndo elongamelo kele la so. Ndo sho kombolaka dia mbosha losaka l’ɔtɛ wetawɔnde dia sho monga la lɔngɛnyi la dimɛna la nde.

9. Lande na kele ondo tekɔ l’ohomba wa monga la lowando otsha le Jehowa?

⁹ Sho mbeyaka monga l’ohomba wa mbidja welo wa laande dia nkanyiya dikambo di’ɛkɔkɔ wele la so onto l’onto wa monga la lowando otsha le Jehowa. Tekɔ lo nsɛna l’andja wele la wendjudi. Mbala efula anto ndjashaka paka lo kɛnɛ kalangawɔ lo dihole dia kɛnɛ kakokawɔ nsala dia vɔ mɛnya lowando lo kɛnɛ kele lawɔ. Naka sho ntatɛ mbokoya dionga sɔ, kete alɔmbɛlɔ aso koka monga listɛ la dɔmbalɔmba. Dia mbewɔ diaha dui sɔ tokomɛ, tekɔ l’ohomba wa ntetemala nkɛnɛmɔla ndo mɛnya lowando lo kɛnɛ tshɛ kasala Jehowa lo dikambo diaso.​—Luka 6:45.

10. Ngande wakakimanyiya lowando kadiyɛso kɛmɔtshi dia mbikikɛ? (Enda ndo osato.)

¹⁰ Yimba ya monga la lowando koka tokimanyiya dia mbikikɛ ekakatanu. Tɔsɛdingole dui dimɔtshi diakakomɛ Kyung-sook, diatanema lo Tshoto y’Etangelo ya Ngɔndɔ ka ntondo 15, 2015. Wakawoshola la kansɛrɛ ka l’asasa kaya edja efula. Nde mbutaka ate: “Hemɔ kakampeke wolo efula, lakoke dia handjoyaoka oko onto ndo lakandama la wɔma efula.” Kakɔna kakokimanyiya dia nde ndɔshana l’ehemba wa ngasɔ? Nde mbutaka ate, otsho tshɛ la ntondo ka dimi ntshɔ tolala, lakatshɔka lo tshuku dia luudu ko dimi tɔlɔmba la dui dia wolo lo akambo atanu wakamongi la lowando lo lushi  longo. Dui sɔ diakokeketsha ndo diakotshutshuya dia mboka Jehowa ngandji. Nde akɛnyi woho wakasukɛka Jehowa ekambi wande wa kɔlamelo etena kakawahomanaka la ntena dia wolo di’ekakatanu sɔ, ndo nde akayoshikikɛka dia ɛtshɔkɔ wakondjaso lo lɔsɛnɔ ndeka ehemba wahomanaso la wɔ la fwa. L’ɛnyɛlɔ ka Kyung-sook, tekɔ l’ɛkɔkɔ efula wa mbisha Jehowa losaka, kaanga naka tekɔ l’atei w’ohemba. Naka sho mbɔkɛnɛmɔlɛ lowando laso lo dɔmbɛlɔ, kete kɛsɔ koka tokimanyiya dia sho mbikikɛ ndo ntetemala monga l’ɔngɛnɔngɛnɔ.   

11. Lande na kaki ambeki wa Yeso l’ohomba wa dihonga l’ɔkɔngɔ wa Yeso nkalola l’olongo?

¹¹ Lɔmbaka Jehowa dihonga l’olimu w’esambishelo. Yema tshitshɛ la ntondo ka nde nkalola l’olongo, Yeso akohola ambeki ande ɔkɛndɛ awɔ wa nsambisha awui wendana la nde la “Jɛrusalɛma, lo Judeya y’otondo, la Samariya polo ndo l’ahole woleki etale wa lo nkɛtɛ.” (Ets. 1:8; Luka 24:46-48) Yema tshitshɛ l’ɔkɔngɔ, ewandji w’ase Juda wakande ɔpɔstɔlɔ Petero nde la Joani ndo wakaatɔlɛ la ntondo ka tominadi ta laadiko t’ase Juda, wakatɛ apami wa kɔlamelo asɔ dia vɔ ntshika nsambisha ndo wakawawaanɛ. (Ets. 4:18, 21) Kakɔna kakasale Petero nde la Joani?

12. Lo ndjela Etsha 4:29, 31, kakɔna kakasale ambeki?

¹² Lo mbisha ekadimwelo lo ɛhɛnyɔhɛnyɔ wakaahɛnyahɛnyaka ewandji w’ase Juda, Petero nde la Joani wakate ɔnɛ: “Naka ekɔ dimɛna lo washo wa Nzambi dia sho nyohokamɛ lo dihole dia mpokamɛ Nzambi, nyuamɛ nyosambole. Koko le so, sho hatototshika mbuta akambo wakatɛnyi ndo wakatoke.” (Ets. 4:19, 20) Etena kakatshungɔ Petero nde la Joani, ambeki wakalɔmbɛ Jehowa lo kɛnɛ kendana la nsala lolango lande. Vɔ wakalɔmbɛ ɔnɛ: “Kimanyiya ekambi ayɛ dia vɔ ntetemala nsambisha ɔtɛkɛta ayɛ la dihonga tshɛ.” Jehowa akakadimola dɔmbɛlɔ dia l’otema ɔtɔi sɔ.​—Adia Etsha 4:29, 31.

13. Wetshelo akɔna wakokaso nkondja oma l’ɛnyɛlɔ ka Jin-hyuk?

¹³ Sho koka mbokoya ambeki lo ntetemala nsambisha kaanga etena katoshimba ewandji wa l’andja ɔnɛ. Tɔsɛdingole ɛnyɛlɔ ka Jin-hyuk, ɔnangɛso lakadjama lo lokanu l’ɔtɛ wakandatone mbɔtɔ l’olimu w’ɔsɔlayi. Lo lokanu, wakawosha ɔkɛndɛ wakokɛka ase lokanu akina waki lo lokanu langanyi l’anto akina, koko takinde la lotshungɔ la nsawola la wɔ akambo akina laadiko di’ɔkɛndɛ wakawawosha mbidja ndo Bible. Nde akalɔmbɛ dia monga la dihonga ndo la loshilambo dia ntɛkɛta akambo wa mɛtɛ l’oseka diaaso tshɛ. (Ets. 5:29) Nde mbutaka ate: “Jehowa akakadimolaka alɔmbɛlɔ ami lo mbishami dihonga ndo lomba dia ntatɛ la mbekaka l’efula ka l’atei awɔ minitɛ tshanu lo asoko wa lokanu. Oma laasɔ, l’otsho, lakafundaka mikanda ko lakashaka wanɛ waki la so lo lokanu ɔtɔi lo lushi lakayele.” Sho la wɔ nto koka monga l’eshikikelo dia Jehowa ayotokimanyiya dia sho nkamba olimu aso w’esambishelo. L’ɛnyɛlɔ ka Jin-hyuk, sho koka nɔmba dia monga la dihonga ndo la lomba.

14. Kakɔna kakoka tokimanyiya etena kalɔshanaso l’ekakatanu? (Osambo 37:3, 5)

¹⁴ Lɔmba ekimanyielo ka Jehowa dia ndɔshana l’ekakatanu. Efula ka l’atei aso wekɔ lo ndɔshana l’ekakatanu wendana la yoonge kana ekakatanu wa lo yimba, etena kashishɛwɔ onto ɔmɔtshi lokawɔ ngandji, okakatanu wa lo nkumbo, ɔlɔshamelo kana ekakatanu ekina. Ndo awui amɔtshi wele oko hemɔ yasambemɛ ndo ata wamboleka nkonya ekakatanu ɛsɔ wolo dia ndɔshana la wɔ. Tɛ Jehowa woho wayaokayɛ shikaa. Tɛnde ekakatanu ayɛ oko woho wakokayɛ mbutɛ ɔngɛnyi ayɛ wa ma ma. Onga l’eshikikelo dia Jehowa “ayosala akambo lo wahɔ ayɛ.”​—Adia Osambo 37:3, 5.

15. Ngande wakoka dɔmbɛlɔ tokimanyiya etena k’eso ‘lo mbikikɛ asui’? Sha ɛnyɛlɔ.

 ¹⁵ Ntetemala nɔmba ayotokimanyiya dia mbikikɛ “etena k’[eso] l’asui.” (Rɔmɔ 12:12) Jehowa mbeyaka kɛnɛ kakikɛ atɛmɔdi ande, mbuta ate “delo diawɔ dialɔmbawɔ ekimanyielo.” (Os. 145:18, 19) Kristie lele l’ɛnɔnyi 29 lakamba oko ombatshi mboka akɛnyi dia dui sɔ diekɔ mɛtɛ. Nde akatatɛ monga l’ekakatanu wendana la yoonge wa wolo wende konongamɛka. Etombelo wakonge la dui sɔ ele, nde akayongaka la hemɔ k’ɔkɔmwɛlɔ ka wolo. Oma laasɔ, nde akayɛnaka dia nyango ekɔ la hemɔ kakonya otsha lo nyɔi. Kristie mbutaka ate: “Lakatetemala nɔmba Jehowa dia nde mbishami wolo wakimi l’ohomba lushi la lushi. Lakahembe nama ekongelo kami ka lo nyuma ka lushi la lushi.” Nde kotshaka ate: “Dɔmbɛlɔ akakimanyiya dia mbikikɛ ntena di’ekakatanu. Lakeyaka dia Jehowa aki wonya tshɛ lami ndo nkanyi shɔ yaki tshondo ya kiɔkɔ y’esambelo le mi. Kaanga mbele ekakatanu wendana la yoonge yami koshila mbala kakɔ ɔtɔi, Jehowa akakadimola lo alɔmbɛlɔ ami lo mbishami wɔladi wa l’etei k’otema.” Hatohɛki pondjo dia “Jehowa mbeyaka woho wa nshimbɛ anto woomamema oma l’ehemba.”​—2 Pe. 2:9.

16. Lande na keso l’ohomba wa Jehowa dia nshika ntanga la ntondo k’ohemba?

¹⁶ Lɔmba Jehowa ekimanyielo ka nshika ntanga la ntondo k’ehemba. Oko weso anto wele keema kokele, sho pombaka ndɔshanaka mbala la mbala l’ohemba wa nsala kɛnɛ kele kɔlɔ. Satana ekɔ lo nsala kɛnɛ tshɛ kakokande nsala dia mbetsha ohemba ɔsɔ wolo efula. Yoho mɔtshi yahembande ndanya ekanelo kaso ele oma lo tɔkɛnyɔ t’awui wa mindo. Tɔkɛnyɔ tɔsɔ koka ndodia yimba yaso la tokanyi ta mindo, mbuta ate tokanyi takoka mbidja lonto la l’etei kaso mindo ndo tokonya dia sho nsala pɛkato ka woke.​—Makɔ 7:21-23; Jak. 1:14, 15.

17. L’ɔkɔngɔ wa sho nɔmba ekimanyielo, kakɔna kahombaso nsala dia mbewɔ ohemba? (Enda ndo osato.)

¹⁷ Tekɔ l’ohomba w’ekimanyielo ka Jehowa naka talanga ntondoya ohemba wa nsala kɛnɛ kele kɔlɔ. Yeso akadje ndo dui diakalola mbala la mbala lo dɔmbɛlɔ diande dia ɛnyɛlɔ: “Totokonyake lo ohemba, koko ototshungole oma le  kanga kɔlɔ.” (Mat. 6:13) Jehowa nangaka tokimanyiya, koko sho pombaka mbɔlɔmba ekimanyielo kande. Sho lawɔ pombaka nsala akambo wɔtɔnɛ l’alɔmbɛlɔ aso. Sho koka mpemba nsala kɛnɛ kakokaso nsala dia mbewɔ mbadiaka ndo pokamɛka tokanyi ta kɔlɔ tambekɔnɛ l’andja wa Satana ɔnɛ. (Os. 97:10) Sho kokaka ndodja yimba yaso la tokanyi t’amɛna lo mbadiaka ndo lo mbekaka Bible. Wɔtwɛlɔ wa lo nsanganya ndo olimu w’esambishelo wayokokɛ nto yimba yaso. Jehowa lo wedi ande, nde hetawɔki dia sho mpembama oleki kɛnɛ kakokaso mbikikɛ.​—1 Kɔr. 10:12, 13.

18. Lo kɛnɛ kendana la dɔmbɛlɔ, kakɔna kahombaso sho tshɛ nsala?

¹⁸ Ɔmɔmɔ la l’atei aso ekɔ l’ohomba wa nɔmbaka efula dia ntetemala monga la kɔlamelo le Jehowa l’ekakatanu wa lo nshi y’ekomelo nyɛ. Tshungolaka etena lushi tshɛ dia mbɔlɔmbaka l’otema ɔtɔi. Jehowa nangaka dia sho ‘dihola etema aso la ntondo kande’ lo dɔmbɛlɔ. (Os. 62:8) Tombolaka Jehowa lo mboshaka losaka lushi tshɛ l’ɔtɛ wa kɛnɛ kasalande. Lɔmbande dia wɛ monga la dihonga l’olimu w’esambishelo. Lɔmbande ekimanyielo dia wɛ ndɔshana l’ekakatanu tshɛ ndo dia wɛ nshika ntanga la ntondo k’ohemba tshɛ wakoka mpomana la yɛ. Tetawɔke dia kaanga ɛngɔ kana onto ɔmɔtshi koshimba dia wɛ nɔmbaka Jehowa mbala la mbala. Ko ngande wakadimola Jehowa alɔmbɛlɔ aso? Tayɔsɛdingola dimbola di’ohomba sɔ lo sawo diayela.